A-pho-lûn kóng, Lí ho̍k-sāi chit-ê Chú, í-keng bô chı̄n-tiong, beh-thái-oē ǹg-bāng tit-tio̍h siúⁿ?
Ki-tok-tô͘ kóng, Goá ta̍t-lo̍h bô chı̄n-tiong?
A-pho-lûn kóng, Lí khí-thâu chiūⁿ-lō͘ tı̄ Iu-ut ê thô͘-bê lāi hiám-hiám kek--sí, sim-koaⁿ chiū léng-tām; koh lí pē hit-ê tàⁿ, eng-kai thèng-hāu Chú kā lí pàng, nā-sı̄ lí ēng put ha̍p-gı̂ hoat-tō͘ chhı̀-khoàⁿ oē lām-sám pàng; koh lí bat chhı̀n-chhái khùn sit-lo̍h lí ê bûn-pı̂n; koh chı̍t-ē khoàⁿ-kı̀ⁿ nn̄g chiah sai, chiū siūⁿ beh tò-tńg--khı̀; koh lí kiâⁿ chit tiâu lō͘ ê tāi-chı̀, nā kóng só͘ khoàⁿ-kı̀ⁿ, só͘ thiaⁿ-kı̀ⁿ, só͘ tú-tio̍h, sim-lāi ê ı̀-sù, tùi thâu kàu bé lóng ài lâng o-ló.
Ki-tok-tô͘ kóng, Lí taⁿ só͘ kóng ê tāi-chı̀ sı̍t-chāi ū, ia̍h ū pa̍t mı̍h ê pháiⁿ lí lóng bē bat kóng, nā-sı̄ goá só͘ ho̍k-sāi ê Chú, sim-koaⁿ chû-pi, hoaⁿ-hí sià-choē; koh chiah-ê pháiⁿ, goá chá khiā-khí tı̄ lí ê kok lóng-chóng bat ū, chiū-sı̄ hiahN-sı̂ ài pháiⁿ, chhin-chhiūⁿ ài chia̍h hó mı̍h, chóng-sı̄ goá taⁿ oàn-hūn thó͘-khùi hit-ê pháiⁿ, ia̍h í-keng ū tit-tio̍h Chú sià-bián.
Hit-sı̂ A-pho-lûn hoat-sèng toā siū-khı̀ kóng, Goá sı̄ chit-ê Chú ê tùi-te̍k, oàn-hūn i, ia̍h oàn-hūn i ê hoat-tō͘, i ê peh-sı̀ⁿ, goá taⁿ chı̍t choā kiâⁿ, tiâu-kò͘-ı̀ lâi chó͘-tòng lí.
Ki-tok-tô͘ kóng, Lí só͘ choè tio̍h soè-jı̄; goá taⁿ teh kiâⁿ Chú ê toā lō͘, chiū-sı̄ thàu kàu sèng ê só͘-chāi, só͘-í khah hó lí tio̍h ka-kı̄ kín-sı̄n.
A-pho-lûn chiū tián-khui kha-chhiú, lóng-chóng ûi-cha̍h hit-ê lō͘, kóng, Goá lóng m̄-kiaⁿ; lí chit-nı̍h tio̍h sí, goá kí im-hú ê kúi-siū lâi chiù-choā, tek-khak bô pàng lí koh kiâⁿ, chit-tia̍p beh bia̍t-bô lí ê sı̀ⁿ-miâ. Kóng án-ni, chiū ēng hé-chı̀ⁿ lâi siā i ê heng-khám, nā-sı̄ Ki-tok-tô͘ ēng chhiú--nı̍h ê pâi lâi jia, chiū bô siong-hāi.
Ki-tok-tô͘ chiah chai tāi-chı̀ pek-kín, boē tit thang tiāⁿ-tiāⁿ khiā, chiū pu̍ih kiàm. A-pho-lûn chiū chı̀n-chêng chı̄n-la̍t kong, chı̀ⁿ ná lo̍h hō͘, Ki-tok-tô͘ sui-jiân chı̄n-la̍t tí-tng, iáu-kú kha-chhiú, thâu bı̄n lóng tio̍h-siong, chiū sió-khoá thè, A-pho-lûn jip--i; Ki-tok-tô͘ koh chı̀n-chêng, chhut-la̍t kap i tùi-te̍k, toā-tı̂m kau-chiàn, iok-lio̍k poàⁿ jı̍t kú, kàu khùi-la̍t tit-beh bô; in-ūi lâng tio̍h-siong kàu án-ni, tek-khak ná-bô la̍t.
A-pho-lûn khoàⁿ sè-bı̄n án-ni, chiū chhek-oá, kap Ki-tok-tô͘ phō teh ián, chiū chiong Ki-tok-tô͘ hit tó tı̄ toē--nı̍h. Ki-tok-tô͘ ê kiàm ka-la̍uh, A-pho-lûn hoaⁿ-hí kóng, Taⁿ lí ê sı̀ⁿ-miā tek-khak bô, chiū chhut-la̍t phah i kàu hiám-hiám sí. Ki-tok-tô͘ phah-sǹg taⁿ bô thang ǹg-bāng. A-pho-lûn kia̍h-khí chhiú beh koh phah chı̍t-ē, chiū chit-ê hó lâng tek-khak sí; kai-chài Siōng-tè ê un-tián, Ki-tok-tô͘ chhun chhiú sa-tio̍h i ê kiàm, chiū kóng, Tùi-te̍k--ah, lí m̄-sái hoaⁿ-hí, goá sui-jiân poa̍h-tó, tek-khak koh khí-lâi. Chiū peh khí-lâi, ēng kiàm lâi chha̍k i. A-pho-lûn kín-kín thè, chhin-chhiūⁿ tio̍h tāng siong, Ki-tok-tô͘ jip i, koh phah, kóng, “Oá-khò thiàⁿ goá--ê, goá tek-khak oē khah iâⁿ.” A-pho-lûn chiū thí sı̍t kín-kín pe--khı̀. Ki-tok-tô͘ bô koh khoàⁿ-kı̀ⁿ; chhin-chhiūⁿ si kóng,
Taⁿ khoàⁿ sū-chêng chin sim-sek,
Sèng-tô͘ mô͘-kúi saⁿ tùi-te̍k,
Sèng-tô͘ khò Chú kia̍h sı̂n-kiàm,
Mô͘-kúi thâi su cháu khı̀ tiàm.
Nā-sı̄ chhin-ba̍k khoàⁿ-kı̀ⁿ, chhin-hı̄ thiaⁿ-kı̀ⁿ, chiū bô lâng oē siūⁿ-chhut phah-sǹg, kau-chiàn oē toā-tı̂m kàu án-ni, A-pho-lûn koài siaⁿ toā háu, thò͘-khı̀ chhin-chhiūⁿ lêng; Ki-tok-tô͘ thó͘-khùi chhan-kiò, bı̄n tài iu-lông, A-pho-lûn hō͘ i ēng kiàm chha̍k-tio̍h, Ki-tok-tô͘ chiah kia̍h thâu lı̂-lı̂-á chhiò. Hāi--ah! chit-ê tāi-chı̀ put-chí thang kiaⁿ, goá bē bat khoàⁿ-kı̀ⁿ.
Kau-chiàn liáu-āu, Ki-tok-tô͘ kóng, Kiù goá thoat-lı̄ sai ê chhùi, pang-chān goá khah-iâⁿ A-pho-lûn, taⁿ tio̍h kám-siā i, chiū chhiùⁿ-koa kóng,
Kúi-ông bô͘ hāi goá lêng-hûn,
Chhin-chhiūⁿ kau-lêng beh lâi thun;
Siū-khı̀ hoat-chhut ná hé to̍h,
Siā chı̀ⁿ chia̍p-chia̍p ná hō͘ lo̍h;
Kai-chài Sèng-sı̂n toā un-hūi,
Ki-tok ha̍k-seng iâⁿ mô͘-kúi;
Goá tio̍h chı̄n-sim ǹg Kiù-chú,
Kám-siā o-ló bān nı̂ kú.
Hit-sı̂ khoàⁿ ū lâng ê chhiú chhun chhut, chhiú-lāi ū oa̍h-miā chhiū ê hio̍h, hō͘ Ki-tok-tô͘, chih--tio̍h lâi kô͘ tio̍h-siong ê só͘-chāi, liâm-piⁿ hó; chiū chē--teh hioh kha, chiong Khûn-sı̄n in só͘ sàng ê chiú kap piáⁿ lâi lim-chia̍h, ho̍k-tńg cheng-sı̂n khùi-la̍t, chiū koh kiâⁿ-lō͘; chhiú iáu-kú kia̍h kiàm, kiaⁿ-liáu kiám-chhái oē koh tú-tio̍h tùi-te̍k, nā-sı̄ Ku-khiam soaⁿ-kok lāi lóng bô koh tú-tio̍h.
Keng-kè chit-ê soaⁿ-kok, chiū kàu koh chı̍t-ê Soaⁿ-kok, miâ kiò Sí-ı̀m soaⁿ-kok, beh khı̀ Thiⁿ-siâⁿ, lō͘ tio̍h tùi chia, só͘-í put-tek-put tio̍h-kè. Chit-ê soaⁿ-kok ke̍k chhiⁿ-chhı̀n, sian-ti lâng Iâ-lı̄-bí, bat chí chit ūi-á, kóng sı̄ khòng-iá kham-khia̍t, khó͘-oāⁿ sí-ı̀m ê toē, lāi-bı̄n bô lâng chiūⁿ-lo̍h, ia̍h bô lâng toà hia khiā-khí.
Ki-tok-tô͘ kàu chit-ê soaⁿ-kok, pí tāi-seng kap A-pho-lûn kau-chiàn, chêng-hêng koh-khah kan-khó͘. Tú-á kàu chit-ê Sí-ı̀m ê kau-kài, tú-tio̍h nn̄g lâng toā-pō͘ cháu tò-tńg--lâi; chāi-chá hiâm Ka-lâm toē choè pháiⁿ só͘-chāi, chiū-sı̄ chí nn̄g lâng ê chó͘.
Ki-tok-tô͘ mn̄g in, Lín beh ta̍t-lo̍h khı̀?
Hí nn̄g lâng toā siaⁿ kiò, Koáⁿ-kín thè, koáⁿ-kín thè, lí nā ài oa̍h iā-tio̍h tè goán.
Ki-tok-tô͘ mn̄g, Sı̄ sím-mı̍h iân-kò͘!
Nn̄g lâng kóng, Hngh! Iân-kò͘--ah! Sı̄ chit lō͘ ê iân-kò͘, goán tāi-seng kiâⁿ, hiám-hiám boē tit-thang tò-tńg--lâi, nā koh chı̀n kúi pō͘, tek-khak boē kàu chia lâi pò lí.
Ki-tok-tô͘ mn̄g, Lí só͘ tú-tio̍h sı̄ sím-mı̍h mı̍h?
Nn̄g lâng ı̀n kóng, Goán hiám-hiám jı̍p Sí-ı̀m ê soaⁿ-kok, kai-chài chêng-bı̄n ê lō͘ siông-sè khoàⁿ, chai-kiò hit-ê gûi-hiám, chiah thang cháu-siám.
Ki-tok-tô͘ mn̄g, Lín khoàⁿ-kı̀ⁿ sím-mı̍h--ah, choè lín kóng.
Nn̄g lâng ı̀n, Khoàⁿ sim8-mı̍h--ah! Sı̄ khoàⁿ-kı̀ⁿ chit-ê soaⁿ-kok o͘-o͘ àm-àm; ū im-hú ê iau-chiⁿ, kúi-koài, kau-lêng, sı̀-koè ū koài siaⁿ siông-siông âu-kiò, chhin-chhiūⁿ lâng siū khok-to̍k ê hêng-hoa̍t, chē ke̍k chhám ê thih-liān; ū hun-hun loān-loān ê o͘-hûn, hō͘ lâng sí-sim; ū chhiⁿ-chhı̀n, sí-sit ê khı̀ tà tı̄ téng-bı̄n; tāi-khài kóng, chit-ê soaⁿ-kok sı̄ hūn-hūn tūn-tūn, hō͘ lâng kiaⁿ kàu-ke̍k.
Ki-tok-tô͘ kóng, Lín sui-jiân kóng án-ni, nā-sı̄ beh khı̀ thiⁿ-siâⁿ iáu-kú tek-khak tio̍h tùi chia kè.
Nn̄g lâng kóng, Ài tùi chia kè, kù-chāi lí, goán tek-khak m̄; chiū choè in khı̀. Ki-tok-tô͘ koh kiâⁿ, chhiú iû-goân kia̍h kiàm, kiaⁿ-liáu oē tú-tio̍h tùi-te̍k.
Goá bāng-kı̀ⁿ chit-ê soaⁿ-kok, tùi thâu kàu bé, chó-pêng ū chhim-kau, chhiⁿ-mı̂ khan chhiⁿ-mı̂ le̍k-tāi lóng-chóng hām-lo̍h chia tı̂m-lûn; iū-pêng ū noā-thô͘ ke̍k hiám; sui-jiân choè hó ê lâng, nā hām-lo̍h ia̍h bô tè thang khiā-kha; Chāi-chá Tāi-pı̍t ông bat hām-lo̍h chia, chóng-sı̄ Choân-lêng--ê chhun chhiú, pu̍ih i chhut, chiah bô kek--sí. Chit só͘-chāi lō͘ ia̍h put-chí oe̍h, só͘-í Ki-tok-tô͘ ê chêng-hêng it-hoat kan-khó͘. Soaⁿ-kok lāi ke̍k o͘-àm, nā siám-pı̄ chó-pêng ê chhim-kau, chiū hiám-hiám hām-lo̍h iū-pêng ê noā-thô͘, nā siám-pı̄ iū-pêng ê noā-thô͘; chiū hiám-hiám hām-lo̍h chó-pêng ê chhim-kau; án-ni-siⁿ ná kiâⁿ ná kiâⁿ, siông-siông chhám-chhoeh thó͘-khùi; teh kiâⁿ ta̍k pái khí kha lâi ta̍h, m̄-chāi oē ta̍h-tio̍h sím-mı̍h só͘-chāi.
Goá koh khoàⁿ-kı̀ⁿ kiâⁿ chit-ê soaⁿ-kok kàu poàⁿ-lō͘; chiū kè tē-ge̍k ê chhim-khiⁿ tı̄ lō͘-piⁿ, ta̍uh-ta̍uh chhut hé-iām o͘-o͘ ê hûn, hé-chhiⁿ koài siaⁿ. Ki-tok-tô͘ kàu hit ūi-á, chiū ka-kı̄ siūⁿ kóng, Goá taⁿ tio̍h cháiⁿ-iūⁿ? Tú-tio̍h A-pho-lûn boē pí-tit tú-tio̍h chit-ê; sui-jiân kia̍h kiàm, ū sím-mı̍h lō͘-ēng? Chiū siu i ê kiàm, lâi ēng pa̍t mı̍h ê khı̀-kū, miâ kiò Siông-siông kı̂-tó. Goá thiaⁿ-kı̀ⁿ i toā siaⁿ kiò kóng, ‘Khún-kiû Iâ-hô-hoa lâi kiù goá ê lêng-hûn.’ Ki-tok-tô͘ kiâⁿ kú-kú, iáu-kú ū hé-iām nà tı̄ bı̄n-chêng, ū ai-oàn ê siaⁿ âu-âu kiò-kiò bô tiāⁿ bô tio̍h; Ki-tok-tô͘ kiaⁿ-liáu oē tú-tio̍h thún-ta̍h hún-sin chhùi-kut; khoàⁿ-kı̀ⁿ chit-hō ê tāi-chı̀, thiaⁿ-kı̀ⁿ chit-hō ê siaⁿ, kiâⁿ phò͘-goā lō͘ siông-siông ū án-ni, chiah kàu chı̍t-só͘-chāi, ū siaⁿ chhin-chhiūⁿ kúi chiâⁿ tı̄n lâi; Ki-tok-tô͘ kàu hit ūi, chiū thêng kha tiû-tû, m̄-chai beh cháiⁿ-iūⁿ, ū-sı̂ siūⁿ tio̍h tò-tńg--khı̀, chiah koh ka-kı̄ phah-sǹg, í-keng kiâⁿ ê lō͘ tú-tio̍h gûi-hiám put-chí choē, kı̀-jiân lóng-chóng thoat-lı̄, taⁿ keng-kè soaⁿ-kok, káⁿ í-keng kiâⁿ khah ke chı̍t-poàⁿ lō͘, siat-sú tò-tńg--khı̀, pí chı̀n-chêng kiâⁿ koh-khah toā gûi-hiám, chiah koat-ı̀ tio̍h chı̀n-chêng kiâⁿ. Chiah-ê kúi chiām-chiām kūn-oá, Ki-tok-tô͘ chiū chhut toā siaⁿ kiò kóng, ‘Goá oá-khò Iâ-hô-hoa Siōng-tè ê khùi-la̍t hó-táⁿ lâi kiâⁿ.’ Kúi chiū kiu-cháu, m̄-káⁿ oá-kūn. Soaⁿ-kok o͘-àm thang kiaⁿ-hiâⁿ,
Kiù-chú ha̍k-seng ia̍h tio̍h kiâⁿ;
Oa̍h-lō͘ sui-jiân kūn im mn̂g,
Tı̍t kiâⁿ chiū oē jı̍p thiⁿ-tn̂g.
Koh ū chı̍t-hāng ê tāi-chı̀, goá phah-sǹg ia̍h tio̍h kóng; goá khoàⁿ-kı̀ⁿ Ki-tok-tô͘ Hit-sı̂ sim-koaⁿ kiaⁿ kàu jû-chhiáng-chhiáng, boē hun-pia̍t ka-kı̄ ê siaⁿ; teh kiâⁿ kūn hit-ê hé-khiⁿ, ū chı̍t-ê pháiⁿ kúi liam-liam tè i ka-chiah-āu, ēng toā-tı̂m siat-to̍k Siōng-tè ê oē, i ê siaⁿ sui-jiân soè, nā-sı̄ tn̂g koh bêng, jı̍p Ki-tok-tô͘ ê hı̄-khang thàu kàu sim, Ki-tok-tô͘ lia̍h choè sı̄ ka-kı̄ ê sim só͘ hoat-chhut. Chit-ê tāi-chı̀, pí tāi-seng lóng-chóng só͘ tú-tio̍h--ê, hō͘ Ki-tok-tô͘ koh-khah toā iu-būn, ka-kı̄ siūⁿ i tāi-seng put-chí thiàⁿ Chú, taⁿ lâi siat-to̍k i, sim pháiⁿ kàu án-ni; nā-sı̄ sı̍t-chai m̄-sı̄ i ê sim pháiⁿ, sı̄ kiaⁿ kàu loān, m̄-chai thang ng hı̄-khang, ia̍h m̄-chāi hit-ê siat-to̍k ê oē tùi ta̍t-lo̍h lâi.
Ki-tok-tô͘ teh kiâⁿ, sim-koaⁿ chhoeh-chhoeh, jiân-āu thiaⁿ-kı̀ⁿ ū siaⁿ chhin- lâng tı̄ thâu-chêng kiâⁿ, teh kóng, ‘Goá tit-tio̍h lí pı̀-iū, só͘-í keng-kè Sí-ı̀m ê toē ia̍h bô kiaⁿ.’ Ki-tok-tô͘ thiaⁿ-kı̀ⁿ chit-ê siaⁿ, chiū hoaⁿ-hí tùi ka-kı̄ kóng, Kiâⁿ chit-ê soaⁿ-kok-iāi ia̍h ū kèng-ùi Siōng-tè ê lâng, m̄-nā goá ka-kı̄ tiā-tiāⁿ; koh chit-ê lâng bêng-bêng tit-tio̍h Siōng-tè ê pı̀-iū, kiám ū pı̀-iū i tiā-tiāⁿ, ia̍h bô pı̀-iū goá? Tek-khak ū pı̀-iū goá, chóng-sı̄ goá ka-kı̄ m̄-chai; taⁿ tio̍h jip oá chit-ê lâng, goá chiū ū phoāⁿ. Ki-tok-tô͘ chiū chı̀n-chêng kiâⁿ, kiò chit-ê thâu-chêng ê lâng; nā-sı̄ hit lâng m̄ ı̀n, in-ūi i ia̍h phah-sǹg chit só͘-chāi nā i chı̍t-lâng tiā-tiāⁿ.
Bô loā-kú thiⁿ phah-phú kng, Ki-tok-tô͘ hoaⁿ-hí kóng, “Chú hō͘ sí-sit ê ı̀m-ńg pı̀ⁿ choè chá-khí sı̂ ê kng.” Thiⁿ chiām-chiām kng, Ki-tok-tô͘ chiū oa̍t-thâu khoàⁿ só͘ kiâⁿ lâi ê lō͘, m̄-sı̄ ài tò-tńg--khı̀, sı̄ ài thàn jı̍t-sı̂ ê kng, lâi khoàⁿ mı̂--sı̂ só͘ keng-kè ê gûi-hiám; chiū bêng-bêng khoàⁿ-kı̀ⁿ chó-pêng ê chhim-kau, iū-pêng ê noā-thô͘; tiong-ng ê lō͘ ke̍k oe̍h; koh khoàⁿ-kı̀ⁿ chiah-ê im-hú ê iau-chiⁿ, kúi-koài, kau-lêng. Taⁿ lóng-chóng hn̄g-hn̄g lı̄-khui, m̄-káⁿ oá, in-ūi thiⁿ í-keng kng. Chiah-ê gûi-hiám Ki-tok-tô͘ tāi-seng put-chí kiaⁿ, taⁿ thiⁿ-kng khoàⁿ khah bêng, sim-lāi siūⁿ ka-kı̄ chı̍t-lâng kiâⁿ chit tiâu lō͘, ia̍h lóng-chóng tit-tio̍h thoat-lı̄, chiū toā tah-hiahN. Jı̍t-thâu í-keng chhut, chit-ê ia̍h sı̄ Siōng-tè ê toā un-tián, in-ūi Sí-ı̀m soaⁿ-kok téng poàⁿ lō͘ sui-jiân gûi-hiám, ē poàⁿ-lō͘ koh-khah gûi-hiám. Tùi Ki-tok-tô͘ só͘ khiā-kha ê só͘-chāi, thàu kàu soaⁿ-kok ê kháu-bı̄n, iân-lō͘ lóng-chóng ū lô-bāng, oa̍h-tauh, toē-hām, chhim-khiⁿ kap lóng-chóng ê ki-koan; siat-sú teh kiâⁿ lō͘ chhin-chhiūⁿ tāi-seng hiah o͘-àm, sui-jiân ū chheng-tiâu ê sı̀ⁿ-miā, ia̍h tio̍h bia̍t-bô. Taⁿ jı̍t í-keng chiūⁿ, Ki-tok-tô͘ chiū kóng, “Chú ê kng sı̀-koè chiò, sui-jiân kiâⁿ o͘-àm, ia̍h oē chiò-tio̍h kng.”
Ki-tok-tô͘ thàn chit-ê kng, kiâⁿ kàu soaⁿ-kok ê kháu-bı̄n. Goá bāng-kı̀ⁿ chhut hit-ê soaⁿ-kok ê só͘-chāi ū huih, ū kut, ū sio ê kut-thâu hu, ū chhùi-chhùi ê sin-si; che lóng-chóng sı̄ chá-chêng kiâⁿ chit tiâu lō͘ ê lâng, tú-tio̍h hām-hāi tı̄ chia. Goá teh siūⁿ chit-ê sı̄ sím-mı̍h iân-kò͘, hut-jiân khoàⁿ-kı̀ⁿ thâu-chêng ū chı̍t-ê tōng, chāi-chá ū nn̄g ê hó-hàn lâng khiā hia, chı̍t-ê miâ Pài-siōng , chı̍t-ê miâ Pà-pek , chí nn̄g lâng oá-khò toā koân-sè, kiâⁿ chân-jím hāi-sí choē-choē sèng-tô͘. Chit só͘-chāi só͘ ū ê huih, kut, kap chiah-ê, lóng sı̄ chí nn̄g lâng só͘ hām-hāi--ê. Ki-tok-tô͘ keng-kè hia, bô sím-mı̍h gûi-hiám; goá lio̍h-á kı̂-koài, āu-lâi chai hit-ê iân-kò͘, chiū-sı̄ Pài-siōng í-keng sí kú--lah; Pà-pek sui-bóng iáu tı̄-teh, nā-sı̄ í-keng lāu, koh siàu-liân ê sı̂, choē-choē kau-chiàn sún-siong i ê khùi-la̍t; só͘-í chit tia̍p soe-lám, kha-chhiú bān-tūn, nā oē chē tı̄ tōng-kháu tiāⁿ-tiāⁿ, chı̍t-ē khoàⁿ-kı̀ⁿ kiâⁿ thiⁿ-lō͘ ê lâng keng-kè, chiū siū-khı̀ lâi gı̂n, in-ūi boē-tit-thang khí-lâi lia̍h, chiū kā-gê chhiat-chhí. Ki-tok-tô͘ khoàⁿ-kı̀ⁿ chit-ê lāu hàn, sim lio̍h-á kiaⁿ, sui-jiân boē-oē hāi lâng, iáu-kú háng-hoah kóng, Nā bô koh sio-sí lín, lín éng-éng m̄ koé-pı̀ⁿ. Ki-tok-tô͘ chēng-chēng m̄ ı̀n, ûn-ûn-á kè-khı̀, lóng bô siū i hāi. Hit-sı̂ hoaⁿ-hí gim-si, kóng,
Sí-ı̀m soaⁿ-kok kúi chiâⁿ tı̄n,
Gûi-hiám kiaⁿ-hiâⁿ kóng boē chı̄n;
Lô-bāng oa̍h-tauh sı̀-koè sı̄,
Toē hām ki-koan oh-tit lı̄.
Loán-jio̍k ha̍k-seng keng-kè kiâⁿ,
Tùi-te̍k pháiⁿ kúi lóng boē iâⁿ;
Bo̍k-hui sı̄ Chú lâi pang-chān,
Chit-sı̂ āu-lâi tio̍h siōng-chàn.
Ki-tok-tô͘ chı̀n-chêng kiâⁿ, hit-tia̍p kàu chı̍t-ê lio̍h-á koâiⁿ ê só͘-chāi. Kiâⁿ ê lâng peh chia thang khoàⁿ chêng ê lō͘. Ki-tok-tô͘ chiū peh hí téng-bı̄n teh khoàⁿ, khoàⁿ-kı̀ⁿ ū Chı̄n-tiong tı̄ thâu-chêng tı̍t-tı̍t kiâⁿ. Ki-tok-tô͘ liâm-piⁿ toā siaⁿ kiò i kóng, Pêng-iú--ah, chhiáⁿ thêng-teh, goá beh kap lí saⁿ-kap kiâⁿ. Chı̄n-tiong oa̍t-kè-lâi khoàⁿ. Ki-tok-tô͘ koh kóng, Un5-á kiâⁿ, ûn-á kiâⁿ, hō͘ goá jip lí oē tio̍h. Chı̄n-tiong kóng, Goá sı̄ tô-miā teh cháu, chhian-bān m̄-thang.
Ki-tok-tô͘ thiaⁿ-kı̀ⁿ che, sim-koaⁿ put-chí kip, liâm-piⁿ chhut-la̍t kín jip, bô loā kú jip--tio̍h iā koh choè thâu--i. Án-ni āu-piah--ê tò-hoán choè thâu-chêng. Hit-tia̍p Ki-tok-tô͘ khah-iâⁿ, sim-koaⁿ lio̍h-á kiau, bı̂-bı̂-á chhiò, kiâⁿ m̄-hó, bô tiuⁿ-tı̂, hut-jiân poa̍h-tó; thèng-hāu Chı̄n-tiong lâi khan--i, chiah oē khí-lâi khiā.
Hit-tia̍p goá bāng-kı̀ⁿ cheh nn̄g lâng lia̍h-choê teh kiâⁿ, ı̀-sù put-chí siong-hó, lō͘--nih kı̀ⁿ ū tú-tio̍h ê tāi-chı̀ lóng hoaⁿ-hí saⁿ-kap kóng. Ki-tok-tô͘ tùi Chı̄n-tiong kóng, Án-hiaⁿ--ah, taⁿ jip-tio̍h lí, goá put-chí hoaⁿ-hí, koh hoaⁿ-hí Siōng-tè siⁿ lán, lí goá thang choè tâng-phoāⁿ, lâi kiâⁿ chit tiâu hok-khı̀ ê lō͘.
Chı̄n-tiong kóng, Goá chhut Chiong-bông siâⁿ chiū siūⁿ ài kap án-hiaⁿ lí choè phoāⁿ, nā-sı̄ lí tāi-seng chhut-lâi, goá bô tà-tit-oâ chiah ka-kı̄ kiâⁿ.
Ki-tok-tô͘ kóng, Tùi goá chhut Chiong-bông siâⁿ, lí iáu-kú tiàm hia he ū joā kú?
Chı̄n-tiong kóng, Goá tiàm hia, kàu tòng lóng boē tiâu, chiah chhut-lâi; nā-sı̄ lí cháu chhut-lâi liáu, lâng lóng kóng cheh siâⁿ tek-khak oē hō͘ thiⁿ-hé sio-lio--khı̀.
Ki-tok-tô͘ kóng, Ho͘hN! Siâⁿ--nih ê lâng chin-chiàⁿ ū cheh oē mah?
Chı̄n-tiong kóng, Ū--ah, hit-tia̍p lâng lóng ta̍k-ê teh kóng.
Ki-tok-tô͘ kóng, Chin-chiàⁿ ū án-ni, siáⁿ-sū siám-pı̄ chai-ē cháu chhut-lâi nā lí ka-kı̄ chı̍t-lâng?
Chı̄n-tiong kóng, Khiok ū choē-choē lâng án-ni teh kóng, liōng in ia̍h bô chin-tiuⁿ sı̀n. In tú-tú kóng cheh tāi-chı̀, iáu ū lâng mē--lí, lām-sám kóng, ché lō͘ chiū-sı̄ káu-hūn sí, chı̍t-hūn oa̍h ê lō͘. Nā-sı̄ lán ê siâⁿ kàu bé oē hō͘ thiⁿ-hé sio-lio--khı̀, goá sı̄ chin-tiuⁿ sı̀n, chiah ū cháu chhut-lâi.
Ki-tok-tô͘ chiū kóng, Goá ê chhù-piⁿ Īⁿ-chhian, lí ū thiaⁿ-kı̀ⁿ lâng kóng i mah?
Chı̄n-tiong kóng, Ū--ah; thiaⁿ-kı̀ⁿ tè lí kiâⁿ, ū kiâⁿ kàu Iu-ut ê thô͘-khut, koh thiaⁿ-kı̀ⁿ i poa̍h tı̄ thô͘-khut--nih; goá liōng hit-tia̍p i thong seng-khu tek-khak bak-tio̍h lâ-sâm-sia̍h ê thô͘-bê, nā-sı̄ m̄-ài lâng chai.
Ki-tok-tô͘ kóng, Siâⁿ--nih ê lâng khoàⁿ-kı̀ⁿ i tò-khı̀, cháiⁿ-iūⁿ khoán-thāi--i?
Chı̄n-tiong kóng, I tò--khı̀ liáu, chhı̀n-chhái lâng choē-choē ba̍k-tē bô--i, lóng bô lâng beh kap i kau-koan. I chhut siâⁿ koh tò-khı̀ m̄-ta̍h bo̍h-tit chhut-lâi khah hó.
Ki-tok-tô͘ kóng, Siâⁿ--nih ê lâng, chêng khoàⁿ chit tiâu lō͘ m̄ chiūⁿ ba̍k; taⁿ Īⁿ-chhian cheh lō͘ to pàng hiat-ka̍k, siáⁿ-sū iáu hiâm--i?
Chı̄n-tiong kóng, Lâng lóng kóng i ê kóng-oē kap kiâⁿ tāi-chı̀ bô saⁿ-ha̍p, hoán lâi hok-khı̀ bô tiāⁿ-tio̍h, put-chí khó-ò͘ⁿ. Nā-sı̄ goá kā i siūⁿ khí-lâi, i m̄-tı̍h cheh chèng-keng lō͘, liâm-piⁿ hō͘ lâng hiâm kàu án-ni, lia̍h-choè ū-iáⁿ, che sı̄ Siōng-tè pò-èng i ê pháiⁿ.
Ki-tok-tô͘ kóng, Lí bē chhut siâⁿ bat kap cheh lâng kóng mah?
Chı̄n-tiong kóng, Goá ū chı̍t-pái tı̄ lō͘--nı̍h tú-tio̍h i. I ê bı̄n put-chí ū kiàn-siàu, khoàⁿ-kı̀ⁿ goá chiū siám, chiah bē bat kap i kóng.
Ki-tok-tô͘ kóng, Cheh lâng khí-thâu thàn chit-ê tō-lí lō͘-bé koh choè pháiⁿ, chiah chhin-chhiūⁿ Sèng-chheh ū kóng, ‘Káu hoán tńg chia̍h i só͘ thò͘ ê mı̍h, ti soé chheng-khı̀ liáu koh khı̀ hí thô͘-bê--nı̍h noà’. Goá hit-tia̍p chhut siâⁿ, iáu ǹg-bāng cheh lâng oē choè hó, taⁿ kiaⁿ-liáu i oē kap siâⁿ saⁿ-kap bia̍t-bô.
Chı̄n-tiong kóng, Goá ia̍h kiaⁿ-liáu án-ni. Nā-sı̄ kàu chit-ê khám-chām chı̄-chūi-á ū hoat-tit--i?
Ki-tok-tô͘ kóng, Taⁿ Īⁿ-chhian ê tāi-chı̀, m̄-sái koh kóng, lâi kóng lí goá ê tāi-chı̀. Goá siūⁿ lí tı̄ lō͘--nı̍h tek-khak ū tú-tio̍h sím-mı̍h tāi-chı̀. Chhiáⁿ án-hiaⁿ lâi kap goá kóng.
Chı̄n-tiong kóng, Lí poa̍h tı̄ Iu-ut ê thô͘-bê--nih, goá khı̀ oe̍h-mn̂g bô cheh tāi-chı̀. Kan-ta tú-tio̍h chı̍t-ê pháiⁿ hū-jı̂n-lâng, miâ kiò Îm-hū, hiám-hiám khit i bê--khı̀.
Ki-tok-tô͘ kóng, Lí bô hō͘ i bê--khı̀, put-chí kai-chài. Iok-sek bat hō͘ chit lâng pek, sè-bı̄n cháu hiám boē lı̄, nā-sı̄ i ia̍h bô hō͘ i bê--khı̀. Cheh lâng hit-tia̍p kap lí cháiⁿ-iūⁿ?
Chı̄n-tiong kóng, I ê oē put-chí tiⁿ; nā m̄-sı̄ lí lio̍h-lio̍h-á chai i ê in-iû chin-chiàⁿ siūⁿ oh chhut. I pek goá kap i saⁿ-kap khı̀, kóng ū ta̍k hāng ê hoaⁿ-hí beh hō͘ goá.
Ki-tok-tô͘ kóng, Khiok ū án-ni, iáu-ū chı̍t-hāng ê hoaⁿ-hí i boē-tit-thang hō͘ lí, chiū sı̄ sim-koaⁿ chai-kiò bô pháiⁿ ê hoaⁿ-hí.
Chı̄n-tiong kóng, hit-ê hū-jı̂n-lâng ún beh choē-choē hoaⁿ-hí hō͘ goá, lóng sı̄ sek-io̍k ê hoaⁿ-hí.
Ki-tok-tô͘ chiū kóng, Lí kap hit ê hū-lı̂n-lâng bô kau-chhap, chin-chiàⁿ sı̄ siū-tio̍h Siōng-tè ê un. Sèng-chheh ū kóng, “Nā-sı̄ Chú oàn--ê tek-khak poa̍h-lo̍h kau”.
Chı̄n-tiong kóng, Goá m̄-káⁿ kóng, lóng bô bak-tio̍h i ê lâ-sâm.
Ki-tok-tô͘ kóng, Che cháiⁿ-á kóng, kám ū thàn i mah?
Chı̄n-tiong kóng, Bô tek-khak lóng bô bak-tio̍h i ê lâ-sâm, nā-sı̄ sı̍t-chāi bô thàn i, sı̄ chit-tia̍p goá kı̀-tit Sèng-chheh ū kóng, ‘ı̂m-hū ê lō͘ tı̍t-tı̍t thàng kàu tē-ge̍k.’ Goá hit-tia̍p ba̍k-chiu chiah khoeh-khoeh, kiaⁿ-liáu hō͘ i ê bı̄n bê--khı̀. Chit-ê lâng chiū mē goá, goá choè goá chı̀n-chêng kiâⁿ lâi siám--i.
Ki-tok-tô͘ kóng, Án-hiaⁿ lí hit-tia̍p ū koh tú-tio̍h pa̍t ê á-bô?
Chı̄n-tiong kóng, Ū; kan-lân soaⁿ-ē tú-tio̍h chı̍t-lâng chin lāu, mn̄g goá sı̄ siáⁿ lâng, beh to̍h-lo̍h khı̀? Goá kā i kóng, sı̄ kiâⁿ thiⁿ-lō͘ ê lâng, beh khı̀ thiⁿ-siâⁿ, Lāu lâng kóng, Goá khoàⁿ lí ê bı̄n, siūⁿ lí tek-khak sêng-sı̍t; lí nā beh kap goá tiàm, goá beh hō͘ lí kang-chı̂ⁿ. Lí beh m̄? Hit-tia̍p goá mn̄g--i, Lí sı̄ chı̄-chūi? Khiā tı̄ to̍h-lo̍h? Lāu lâng kóng, Goá miâ kiò Chêng ê A-tong; khiā Hun-bê hiuⁿ. Goá mn̄g i choè sím-mı̍h keng-kí, beh hō͘ goá sím-mı̍h kang-chı̂ⁿ? I kóng-kiò i ê keng-kí, chiū-sı̄ ta̍k-hāng hoaⁿ-hí ê keng-kí, goá ê kang-chı̂ⁿ chiū-sı̄ lō͘-bé thang chiap i ê ke-hé. Goá koh mn̄g i ke-hé cháiⁿ-iūⁿ, i ê lô͘-po̍k kúi lâng? I kóng sè-kan ê hó mı̍h lóng sı̄ i ke-lāi teh ēng; koh kóng i ê lô͘-po̍k lóng sı̄ i pún-sin chhı̄--ê. Goá koh mn̄g i kúi ê kiáⁿ. I kóng ū saⁿ ê cha-bó͘-kiáⁿ, miâ kiò Sè-io̍k, Sè-tham, Sè-kiau. goá nā beh saⁿ ê choè-chı̍t-ē chhoā in, i kam-goān ún goá. Hit-tia̍p goá mn̄g i, beh kap i tiàm-teh tio̍h kàu joā kú? I kóng kàu i lı̄-khui.
