Chı̄n-tiong kóng, Thiaⁿ Án-hiaⁿ lí kóng, hō͘ goá kı̀-tit Mô͘-se ū kóng, chheng-khı̀-siùⁿ ê cheng-siⁿ chiū-sı̄ pun-toê, koh hoan-chháu--ê; nā kan-ta pun-toê, bô hoan-chháu, iā sı̄ bô chheng-khı̀. Hò͘ⁿ-giân ê khoán sı̄ án-ni. I éng-éng kóng sèng ê tō-lí, éng-éng kap pháiⁿ lâng saⁿ-kap kiâⁿ, lóng bô lı̄, kám oē sǹg choè sı̄ chheng-khı̀?
Ki-tok-tô͘ kóng, Án-hiaⁿ, lí taⁿ kóng che, goá ia̍h beh kóng. Pó-lô ia̍h ū kóng Hò͘ⁿ-giân hit-hō sı̄ chhin-chhiūⁿ‘phah lô khau poa̍t,’ū siaⁿ bô khı̀ ê mı̍h. Lâng thoân tō-lí kiám-chhái i ê siaⁿ khiok ū chhin-chhiūⁿ thiⁿ-sài, nā bô sı̍t-sı̍t sı̀n hok-im, kàu bé sǹg sı̄ sí, boē kap thiⁿ--nı̍h ê peh-sı̀ⁿ choè phoāⁿ.
Chı̄n-tiong kóng, Goá chêng chin hoaⁿ-hí chit-ê lâng, taⁿ chám-jiân ià--i. Tio̍h cháiⁿ-iūⁿ chiah oē hō͘ i choè i khı̀?
Ki-tok-tô͘ kóng, Lí nā thiaⁿ goá, tû-hui nā m̄-sı̄ Siōng-tè kám-hoà i ê sim, hō͘ i oē-hiáu siūⁿ, i tek-khak m̄-tı̍h lí, choè i khı̀.
Chı̄n-tiong kóng, Án-hiaⁿ, lí ài goá cháiⁿ-iūⁿ?
Ki-tok-tô͘ kóng, Ho̍k-sāi Siōng-tè ēng sı̍t-sı̍t ê sim, án-hiaⁿ lí tio̍h ēng che kap i kóng. I nā kam-goān thiaⁿ lí, lí tio̍h soà mn̄g--i, khoàⁿ i ê pún-sin kap ke ū lóng án-ni á-bô?
Hit-tia̍p Chı̄n-tiong chiū koh kūn-oá Hò͘ⁿ-giân kóng, Taⁿ lí hó mah?
Hò͘ⁿ-giân kóng, Hó--ah; lí nā chá-chá lâi, kàu chit-tia̍p kóng choē-choē--lah.
Chı̄n-tiong kóng, Tio̍h; taⁿ lâi kóng, chóng tio̍h tāi-seng niū goá kóng chı̍t-hāng, chiū-sı̄ beh kóng, Siōng-tè siúⁿ-sù un hō͘ lâng, lâng cháiⁿ-iūⁿ oē chai ū tit-tio̍h á-bô?
Hò͘ⁿ-giân kóng, Lí kóng chit hāng chin ha̍h goá ı̀, taⁿ beh kap lí kóng. Siōng-tè ê un nā ū tiàm lâng sim-lāi tek-khak oē siaⁿ-siaⁿ kù-kù hiâm pháiⁿ, che sı̄ chı̍t-hāng.
Hò͘ⁿ-giân beh kóng tē-jı̄ hāng, Chı̄n-tiong chiū at-chí i kóng, Bān-chiah kóng tē-jı̄ hāng, tio̍h thâu chı̍t-hāng kóng bêng-pe̍k, beh kóng chiah kóng. Lí tú-á kóng goá siūⁿ iáu-bē thò-tòng. Goá kóng--kiò lâng tio̍h oē chin oàn i pún-sin ê choē, chiah ū pı̂n-kù thang chai--kiò ū siū-tio̍h Siōng-tè ê un.
Hò͘ⁿ-giân kóng, Chí nn̄g hāng ū sím-mı̍h cheng-chha?
Chı̄n-tiong kóng, Heh! Toā-lı̂m cheng-chha. Lâng ū tāi-chı̀ hoān-tio̍h i ê phāng, i ia̍h chin gâu hiâm hit-ê pháiⁿ. Nā-sı̄ chin-tiuⁿ oàn i ka-kı̄ ê choē, tek-khak sı̄ sim ū siū-tio̍h Siōng-tè ê un, chiah oē án-ni. Goá ū bat khoàⁿ-kı̀ⁿ lâng thoân tō-lí hit-tia̍p, khiok ū chám-jiâm hiâm pháiⁿ, nā-sı̄ i pún-sin kap ke iáu-kú ū kiâⁿ hit-ê teh hiâm ê pháiⁿ. Chêng iok-sek ê Chú-bú ài kap i sêng-chhin, iok-sek m̄ ún i: i pháiⁿ-sı̂n-khı̀ ké-iàⁿ toā siaⁿ âu-kiò, ū chhin-chhiūⁿ chèng-keng ê khoán-sit, nā-sı̄ i ê sim sı̍t-chāi ài kap i kiâⁿ sek-io̍k ê tāi-chı̀. Koh lâng hiâm pháiⁿ, ū chhin-chhiūⁿ lāu-bú tùi i ê kiáⁿ khiok ū chhùi mē i ê pháiⁿ, nā-sı̄ i ê sim-koaⁿ tiāⁿ-tio̍h ū tia̍p-á-kú koh phō--i, chim--i.
Hò͘ⁿ-giân kóng, Lí ài chhē phāng hiâm goá mah?
Chı̄n-tiong kóng, M̄-sı̄ án-ni, goá ài lí kiâⁿ sı̀-chiàⁿ. Taⁿ chhiáⁿ lí kóng tē-jı̄ hāng.
Hò͘ⁿ-giân chiū kóng, Goá kóng hok-im chhim ê ı̀-sù, lâng nā oē chin-tiuⁿ chai, chiū-sı̄ Siōng-tè ê un tek-khak ū tiàm cheh lâng ê sim.
Chı̄n-tiong kóng, Lí án-ni kóng, kú iáu-bē tio̍h. Lâng bē siū-tio̍h Siōng-tè ê un kám-hoà, chiū hok-im chhim ê ı̀-sù kú ia̍h oē chai, Sèng-chheh ū kóng, “Oē bat Siōng-tè chhim ê tō-lí, nā bô saⁿ-thiàⁿ ia̍h sı̄ bô iú-ek.” Chit-hō kám oē-tit-thang choè Siōng-tè ê peh-sı̀ⁿ mah? Kiù-chú kap i ê ha̍k-seng kóng tō-lí, bat kā in kóng, “Lín nā chai che, kiâⁿ--i chiū ū hok-khı̀.” Hit-tia̍p Kiù-chú m̄-sı̄ kóng chai chiū ū hok-khı̀, tek-khak kóng kiâⁿ chiah ū hok-khı̀. Taⁿ lí tio̍h siūⁿ ū chit-hō khang-khang chai, lóng bô kiâⁿ. Chhin-chhiūⁿ Sèng-chheh ū kóng, “Lô͘-po̍k chai chú-lâng ê ı̀-sù, lóng bô beh thàn chiū-sı̄ án-ni.” Lâng khiok chhin-chhiūⁿ thiⁿ-sài ê chin-tiuⁿ chai, bē tek-khak sı̄ Siōng-tè ê peh-sı̀ⁿ, chiah lí kóng chit hāng sı̍t-chāi iáu-bē tio̍h.Che sı̄ cháiⁿ-iūⁿ chiah khang-khang chai, sı̄ ài kóng oē, ài phín-phóng--ê só͘ hoaⁿ-hí; sı̍t-sı̍t lâi kiâⁿ--ê sı̄ Siōng-tè hoaⁿ-hí. Án-ni kóng, lí m̄-thang lia̍h goá sı̄ khoàⁿ-khin hit-ê chai; sı̄ lâng nā lóng m̄-chai, i ê sim thái-thó oē choè hó? Taⁿ lí tio̍h kàu-khàm, chit-ê chai ū nn̄g-hō, chı̍t-hō sı̄ kan-ta siūⁿ, tı̀-kàu khang-khang chai; chı̍t-hāng sı̄ chin-tiuⁿ chai koah oē kiâⁿ Siōng-tè ê chí-ı̀; chhin-chhiūⁿ Tāi-pı̍t hông-tè kà tı̄ Si-phian ū kóng, “Siúⁿ-sù goá tı̀-hūi siú lí ê lu̍t-lē, chı̄n-sim khı̀ thàn.”
Hò͘ⁿ-giân kóng, Lí iū sı̄ beh chhē phāng hiâm goá mah? Nā-sı̄ án-ni saⁿ-kap kóng, kun-tı̍t sı̄ bô iú-ek.
Chı̄n-tiong kóng, Lâng ê sim ū Siōng-tè ê un á-bô, ka-kı̄ oē chai á boē? Lí nā ū sím-mı̍h thang kóng, chhiáⁿ lí kóng.
Hò͘ⁿ-giân kóng, Lí ê ı̀-sù kap goá bô ha̍h, goá taⁿ m̄ kóng--lah.
Chı̄n-tiong kóng, Lí nā m̄ kóng, thiaⁿ goá kóng.
Hò͘ⁿ-giân kóng, Hó--ah; chhut-chāi lí kóng.
Chı̄n-tiong kóng, Sim-koaⁿ ū Siōng-tè ê un, m̄-nā ka-kı̄ oē chai, piⁿ-á khoàⁿ--ê ia̍h oē chai. Sı̄ cháiⁿ-iūⁿ kóng ka-kı̄ oē chai? Chiah lâng siū-tio̍h Siōng-tè ê un, i chai-kiò ū choē, nā bô Kiù-chú thang khò, kàu bé kun-tı̍t sı̄ lo̍h tē-ge̍k; koh chai--kiò ū choē chám-jiân hoân-ló koah kiàn-siàu, Tû-hui nā m̄-sı̄ sı̀n Kiù-chú, cheh choē éng boē sià, soà boē éng-oa̍h, chiah kui sim sı̀n i ná chhin-chhiūⁿ lâng iau ài chia̍h, chhùi-ta ài lim. Koh chı̍t-hāng, hit-ê lâng ê sı̀n sı̄ chhim á khín, chiū-sı̄ i ê pêng-an hoaⁿ-hí, ia̍h sı̄ chhin-chhiūⁿ sı̀n ê khoán-sit. I ê sı̀n ná chhim; i ê ho̍k-sāi Siōng-tè ná chhiat. Lâng siū-tio̍h un kám-hoà chiah oē chai kàu án-ni, nā-sı̄ tio̍h koh siūⁿ chı̍t-chân, kiám-chhái chı̍t-poàⁿ pái ū kū ê pháiⁿ koh khí--lâi, su-io̍k hut-jiân khàm--teh, sim-koaⁿ chiū nā ū Siōng-tè ê un kám-hoà, ū sı̂ káⁿ ia̍h ka-kı̄ m̄-chai.
Piⁿ-á ê lâng khoàⁿ oē chai sı̄ cháiⁿ-iūⁿ? Sı̄ khoàⁿ-kı̀ⁿ i chin-chiàⁿ ū jı̄n Kiù-chú, koh khoàⁿ-kı̀ⁿ i só͘ kiâⁿ lóng chheng-khı̀, tú-tú ha̍h i ê chhùi só͘ kóng, chiū-sı̄ sim só͘ siūⁿ--ê, kap só͘ kiâⁿ tı̄ ke-lāi--ê, ta̍k-jı̍t ê hêng-tōng kú-chí, lóng ū chim-chiok.
Taⁿ lâng ū siū-tio̍h Siōng-tè ê un, oē chai á boē, goá iok-lio̍k kóng liáu--lah, nā-sı̄ m̄-tio̍h, lí thang piān-pok; nā bô phāng thang hiâm, goá beh koh mn̄g--lí.
Hò͘ⁿ-giân kóng, Goá m̄ piān-pok; lí ū sím-mı̍h thang mn̄g?
Chı̄n-tiong kóng, Goá tú-tú teh kóng, khoàⁿ lí ê sim kap hêng-tōng kú-chí, ū ha̍h á-bô, ia̍h sı̄ kiám-chhái lí ho̍k-sāi Siōng-tè khang-khang ēng chı̍t-ki chhùi nā-tiāⁿ, nā-sı̄ khín beh ı̀n goá, tı̄ Siōng-tè ê bı̄n-chêng kóng oē tio̍h sim kap chhùi saⁿ-ha̍h. Nā-sı̄ chhı̀ⁿ-chhái kóng, goá chit hāng ia̍h choè hó, hit hāng ia̍h choè hó, chı̍t-ē kàu-khàm lí pún-sin kap chhù-piⁿ ê kan-chèng, sı̍t-chāi lóng bô iáⁿ-chiah; che sı̄ toā-tı̂m khó-ò͘ⁿ.
Hò͘ⁿ-giân thiaⁿ-kı̀ⁿ che hit-tia̍p i ū âng-bı̄n kiàn-siàu; ū tiap-á-kú chiah chū-jiân ı̀n kóng, Lí án-ni kóng, tāi-seng goá lóng bô siūⁿ kàu chit chân. Taⁿ lí án-ni mn̄g goá, goá bô tek-khak beh ı̀n--lí. Lí chiū nā ài chhâ-khó, goá ia̍h bô beh hō͘ lí mn̄g. Lí siáⁿ-sū mn̄g goá?
Chı̄n-tiong kóng, Khoàⁿ-kı̀ⁿ lí chheng-chheng ài kóng sèng ê tō-lí, iáu lóng m̄-chai lí oē-hiáu sím-mı̍h. Goá bat thiaⁿ-kı̀ⁿ lâng kóng, lí ho̍k-sāi Siōng-tè, kan-ta sı̄ ēng chı̍t-ki chhùi, iáu bô. Chiàu lâng kóng, lí pháiⁿ kàu án-ni, sı̍t-chāi jio̍k-tio̍h sèng-hoē, hō͘ lâng húi-pòng sèng ê tō-lí, koh hō͘ lâng hām-lo̍h choē, hiám-hiám beh lo̍h tē-ge̍k. Lí nā kóng ho̍k-sāi Siōng-tè sı̄ kap chiú-chùi, tham-sim, kiâⁿ ı̂m-io̍k, loé-mē, kóng pe̍h-chha̍t, chiah-ê pháiⁿ, pı̂ⁿ-pı̂ⁿ tâng-choē. Lí án-ni-siⁿ liân-lūi Sèng-hoē, ná chhin-chhiūⁿ chhiong-ki liân-lūi-tio̍h chèng-keng hū-jı̂n-lâng,
Hò͘ⁿ-giân kóng, Lí hı̄-khang khin, thiaⁿ lâng kóng, lām-sám hiâm goá, liōng lí tek-khak sı̄ khek-po̍k ê lâng, thong sè-kan lóng bô chı̍t-ê tèng lí ı̀. Kap lí kóng, kun-tı̍t sı̄ bô ek, Kóng soah, liâm-piⁿ chiū chı̀n-chêng choè i khı̀.
Hit-tia̍p Ki-tok-tô͘ kūn-oá Chı̄n-tiong kóng, Hāi--ah! Chit lâng choè i khı̀, goá chêng kā lí kóng, chin-chiàⁿ sı̄ bô chhò; Lí láu-sı̍t kap i kóng, i lóng boē-hiáu thiaⁿ, m̄-khéng hoán-hoé koé-pı̀ⁿ, soà ài beh kap lí choa̍t-kau. Nā-sı̄ i í-keng khı̀, chek-sêng sı̄ i ê, m̄-sı̄ lán ê. Kiám-chhái i nā m̄ lı̄ lán, lán ia̍h tek-khak beh lı̄--i, kiaⁿ-liáu lán hō͘ i bak-tio̍h, kap i ê pháiⁿ lóng bô cheng-chha. Pó-lô ū bêng-bêng kóng, ‘Chit-hō ê lâng lán tio̍h lı̄-khui--i.’
Chı̄n-tiong kóng, Án-ni khiok tio̍h, chóng-sı̄ lio̍h-á kap i kóng ia̍h hó, bāng i āu-lâi kiám-chhái oē-hiáu siūⁿ goá ê oē, khiok ka-kı̄ hoán-hoé koé-pı̀ⁿ; chiū nā m̄ án-ni, goá láu-sı̍t kap i kóng, i nā lo̍h tē-ge̍k, ia̍h m̄-sı̄ goá ê choē.
Ki-tok-tô͘ kóng, Án-hiaⁿ lí láu-sı̍t kap i kóng kàu án-ni chin hó, chóng-sı̄ chit-tia̍p ê lâng hán-tit ū chiah láu-sı̍t, chiah hō͘ lâng choē-choē oàn-hūn sèng ê tō-lí, chhin-chhiūⁿ oàn chhàu-mı̍h, sı̄ chit-hō khang-khang kóng ê lâng, kan-ta ēng chhùi ho̍k-sāi Siōng-tè, sèng ê ha̍k-seng kap i óng-lâi, m̄-nā hō͘ lâng gı̂, soà oē jio̍k-tio̍h sèng ê tō-lí. Goá chin ài chèng-lâng khoán-thāi chit-hō ná lí khoán-thāi--i, nā-sı̄ án-ni, i kiám-chhái m̄ hoán-hoé koé-pı̀ⁿ, tek-khak khoàⁿ sèng-hoē chhin-chhiūⁿ jia̍t-jia̍t ê toē tòng-boē-tiâu, thái-thó oē kú-kú tiàm--teh khiā m̄-khı̀. Kóng soah, Ki-tok-tô͘ chiū gı̂m-si kóng,
Hò͘ⁿ-giâⁿ chng-choè hó khoán-sit,
Chhin-chhiūⁿ chiáu-chiah thí súi sı̍t,
Khí-thâu tú-tio̍h Chı̄n-tiong hiaⁿ,
Chit-lō͘ kap i saⁿ-kap kiâⁿ.
Poē-ge̍k Thiⁿ-pē boē poeh-sí,
Phian-phian phín i bat chin-li.
Kóng-lâi kóng-khı̀ chin gâu choán,
Lóng kap Siōng-tè saⁿ tùi-hoán.
Kai-chài goán taⁿ m̄-sı̄ gōng,
Kín ēng tō-lí kap i kóng,
Thiaⁿ liáu ut-chut chò i khı̀;
Che sı̄ iáu-bē têng-thâu-siⁿ.
Nn̄g ê ha̍k-seng koh kiâⁿ lō͘, chiong chiah-ê tāi-chı̀ koh khioh khí-lâi kóng. Ná kóng ná kiâⁿ, kàu m̄-chai ià. Hit-tia̍p jı̍p khòng-iá tú-tú kiâⁿ tit-beh chhut-khı̀, Chı̄n-tiong oa̍t-kè-lâi khoàⁿ, liâm-piⁿ khoàⁿ-kı̀ⁿ chı̍t-lâng lâi. Chı̄n-tiong bat--i, chiū mn̄g Ki-tok-tô͘ kóng, hit-ê lí chai--kiò sı̄ chı̄-chūi? Ki-tok-tô͘ chı̍t-ē khoàⁿ, Chiū kóng, Che sı̄ Thoân-tō, goán sian-siⁿ, Chı̄n-tiong kóng, kú ia̍h sı̄ goán sian-siⁿ; kah goá khı̀ oe̍h-mn̂g chiū-sı̄ cheh lâng. Thoân-tō kiâⁿ kūn-oá tùi nn̄g ê ha̍k-seng kóng, Ài-tit lín pêng-an, liân chān lín ê lâng ia̍h soà pêng-an.
Ki-tok-tô͘ tùi Thoân-tō kóng, Lí lâi chin hó. Chêng lí thiàⁿ goá, ài goá tit-tio̍h kiù, thoè goá khûn-khûn tio̍h-boâ, taⁿ koh kı̀ⁿ-tio̍h lí ê bı̄n, goá chin hoaⁿ-hí.
Chı̄n-tiong ia̍h tùi Thoân-tō kóng, Lí lâi chin hó. Goá teh kiâⁿ lō͘ ê lâng ū lí kap goán choè phoāⁿ chin-chiàⁿ iú-ek.
Thoân-tō kóng, Pêng-iú--ah, tùi lı̄-pia̍t kàu taⁿ, kūn-lâi hó mah? Lín lō͘--nı̍h ū tú-tio̍h sím-mı̍h? Lín ū chiàu khí-kang kiâⁿ á-bô? chhiáⁿ lín kā goá kóng.
Nn̄g ê ha̍k-seng chiah chiong lō͘--nı̍h tú-tio̍h ê tāi-chı̀, lóng ta̍k hāng kā i kóng, kóng--kiò in ū kè choē-choē hāng ê kan-khó͘ chiah kàu chia.
Hit-tia̍p Thoân-tō kóng, Thiaⁿ-kı̀ⁿ lín kóng, goá sim chin hoaⁿ-hí, m̄-sı̄ hoaⁿ-hí lín tú-tio̍h chiah-ê kan-khó͘, sı̄ hoaⁿ-hí lín oē tam-tng chiah-ê kan-khó͘ lâi kàu chia. Koh m̄-nā án-ni, soà hoaⁿ-hí lín ê iú-ek, liân goá ia̍h ū hūn: sı̄ kóng-kiò pò͘--ê sı̄ goá, koah--ê sı̄ lín, kàu siu-sêng hit-tia̍p pò͘--ê, koah--ê, tāi-ke lóng hoaⁿ-hí. Chóng-sı̄ iàu-kín tio̍h kàu bé bô piàn, Sèng-chheh ū kóng, “Kiâⁿ hó m̄-thang poàⁿ tiong-tn̂g soah, sı̂ kàu tek-khak oē siu-sêng.” Bı̄n-thâu-chêng ū êng-kng ê bián-liû beh hō͘ lín, cheh bián-liû éng-éng boē phah-pháiⁿ. Lín tio̍h tàu chı̀n-chêng kiâⁿ, chiah oē tit-tio̍h cheh bián-liû. Siông-siông ū lâng ài kiû cheh bián-liû, chiū nā chhut-la̍t cháu kàu hn̄g-hn̄g, pō͘-pı̂n ū lâng chı̀ⁿ i thâu-chêng, bián-liû liâm-piⁿ hō͘ i toa̍t--khı̀. Sèng-chheh ū kóng, lí só͘ ū ê tio̍h chhut-la̍t chiàu-kò͘, bián-tit lí ê bián-liû hō͘ lâng chhiúⁿ--khı̀. Lín kiâⁿ chit-nı̍h, iáu sı̄ mô͘-kúi ê chı̀ⁿ siā oē-tit-kàu--ê. Lín ê ba̍k-chiu tio̍h siông-siông chù-sı̂n tı̄ hit-ê éng-éng-oa̍h ê kok; nā m̄-sı̄ thiⁿ-téng ê mı̍h, lín ê sim-koaⁿ m̄-thang siūⁿ. Iàu-kín tio̍h tı̂-hông chit-ê sim-koaⁿ ê su-io̍k, sı̄ cheh su-io̍k chin pháiⁿ oh koé. Lín tio̍h lı̍p-chı̀ lóng bô ı̂-e̍k, tio̍h chai Siōng-tè ta̍k-sı̂ éng-éng teh chān lín.
Hit-tia̍p Ki-tok-tô͘ chin kám-siā Thoân-tō, koh kiû i kà-sı̄ iáu-bē oa̍t-le̍k ê tāi-chı̀, sı̄ Thoân-tō i ē tāi-seng chai tit-beh tú-tio̍h ê tāi-chı̀, cháiⁿ-iūⁿ ē ap-chè khah-iâⁿ i. Hit-sı̂ Chı̄n-tiong soà kap Ki-tok-tô͘ saⁿ-kap kiû, Thoân-tō chiū tùi nn̄g ê ha̍k-seng kóng, Lín thiaⁿ hok-im chin-sı̍t ê oē, m̄ chai tio̍h keng-kè choē-choē kan-khó͘, chiah oē-tit jı̍p thiⁿ-kok, ia̍h chai ta̍k siâⁿ ê thih-liān, gûi-hiám, kan-khó͘, teh thèng-hāu lín. Taⁿ lín teh kiâⁿ che lō͘, kiám oē kú-kú lóng m̄-sái tú-tio̍h che kan-khó͘? Lín chêng tú-tio̍h ê tāi-chı̀, tāi-khài thang choè kan-chèng sı̄ án-ni. Chit-tia̍p bô joā kú iáu ē tit-beh tú-tio̍h, sı̄ lín tit-beh tùi chit-ê khòng-iá chhut-khı̀, kàu chı̍t-ê siâⁿ, lín tùi chit--nı̍h, tek-khak oē hō͘ chiah-ê tùi-te̍k sı̀-bı̄n pau oá, ài beh chı̄n-la̍t hāi lín. Hit-tia̍p lín nn̄g lâng tek-khak oē chı̍t-ê sí, lâi kan-chèng tō-lí; nā-sı̄ chin-chiàⁿ Chı̄n-tiong sí, Chú tek-khak chiong éng-oa̍h ê bián-liû siúⁿ-sù lí. Tı̄ chit-nı̍h sí ê, chiū nā kan-khó͘ kàu boē kò͘-tit, nā-sı̄ pí hit-ê iáu tı̄-teh ê tâng-phoāⁿ, koh-khah ū hok-khı̀; sı̄ cháiⁿ-iūⁿ? Sı̄ kóng-kiò m̄-nā tāi-seng kàu thiⁿ-siâⁿ, koh hit-ê tit-beh kiâⁿ-lō͘ ê kan-khó͘ soà oē bián-tit. Lín kàu hit-ê siâⁿ, khoàⁿ-kı̀ⁿ goá chit-tia̍p teh kóng, chin-chiàⁿ ū-iáⁿ, tio̍h hó-táⁿ, m̄-thang loé-chı̀--teh.
Hit-tia̍p goá bāng-kı̀ⁿ nn̄g ê ha̍k-seng chı̍t-ē tùi khòng-iá chhut-khı̀, liâm-piⁿ khoàⁿ-kı̀ⁿ thâu-chêng ê chı̍t-ê siâⁿ, miâ kiò Hi-hoâ, lāi-bı̄n ê chı̍t-ê toā koe-chhı̄, miâ kiò Hi-hoâ chhı̄. Chit e chhı̄ siáⁿ-sū kiò-choè Hi-hoâ? Sı̄ in-ūi hit ê siâⁿ lóng sı̄ choè chiah-ê khang-khang bô iáⁿ-chiah-ê tāi-chı̀, koh hit-ê lāi-bı̄n boé-boē--ê, lóng sı̄ ài hó khoàⁿ ê mı̍h, chiah miâ Hi-hoâ chhı̄.
Chit-ê chhı̄ mā-sı̄ kı̄n-lâi siat, sı̄ chāi-chá chiū ū. Tùi gō͘-chheng-goā nı̂ chêng, ū kiâⁿ thiⁿ-lō͘ ê lâng beh khı̀ thiⁿ-siâⁿ, ná chhin-chhiūⁿ chí nn̄g ê ha̍k-seng chı̍t-poaⁿ-iūⁿ. Hit-tia̍p Mô͘-kúi kap i ê tâng-hé, khoàⁿ-kı̀ⁿ kiâⁿ thiⁿ-lō͘ ê lâng tek-khak tio̍h tùi chia kè, chiah siat chı̍t-ê koe-chhı̄ lok chia, choè chiah-ê khang-khang ê boé-boē ta̍k jı̍t bô thêng. I lāi-tiong teh boē, chiū-sı̄ chhù-the̍h, chhân-hn̂g, pah-hāng ê kang-gē, ta̍k hāng ê kan-kí, chun-kùi, koaⁿ-ūi, hōng-lo̍k, phín-kip, miâ-siaⁿ, thó͘-toē, pang-kok, su-io̍k, lim-chia̍h ê hoaⁿ-hí; koh ū ta̍k hāng sè-sio̍k ê mı̍h, chhin-chhiūⁿ chhiong-ki, ang-bó͘, hāu-siⁿ, cha-bó͘-kiáⁿ, chú-lâng, lô͘-po̍k, lú-pı̀, lâng ê sı̀ⁿ-miā, lâng ê huih, seng-khu, lêng-hûn, kim, tiû-toàn, chin-chu, pó-poè, ta̍k hāng mı̍h lóng chiâu-pı̄. Lāi-tiong iáu ū khang-khang ê siâ-su̍t, chhin-chhiūⁿ chhiùⁿ-koa, chhiùⁿ-khek, poaⁿ-hı̀, phiàn lâng, poa̍h-kiáu, koái-kùn, choè chha̍t, put-sı̂ lóng ū. Tı̄ chit-ê siâⁿ iáu-kú ū thau-the̍h, thâi-lâng, poē-iok, chiah-ê pháiⁿ; lóng m̄-sái ēng chı̂ⁿ, kù-chāi lâng khoàⁿ. Lāi-tiong iáu ū koe-ku chin choē; ū chhin-chhiūⁿ Tiong-kok ê koe-ku, An-lâm ê koe-ku, Thian-tio̍k ê koe-ku, Eng-kok ê koe-ku, Bí-kok ê koe-ku, Hoat-kok ê koe-ku, Lú-sòng ê koe-ku, Hô-lân ê koe-ku, chiah-ê ta̍k só͘-chāi ê koe-chhı̄, lóng ū hi-hi hoâ-hoâ ê mı̍h teh boē. Nā beh khı̀ thiⁿ-siâⁿ, lō͘ tek-khak tio̍h tùi Hi-hoâ siâⁿ kè. Kiám-chhái ài beh khı̀ thiⁿ-siâⁿ mā tùi chia khı̀, tek-khak tio̍h lı̄ sè-kan. Chêng bān ông ê Ông tng i tiàm sè-kan hit-tia̍p, beh tò-khı̀ pún kok, ia̍h bat tùi Hi-hoâ siâⁿ kè, tú-tú sı̄ toā-hi-jı̍t. Hit-tia̍p koe-chhı̄ ê sı̄-toā, Sat-tan, kiû Iâ-so͘ boé hi-hoâ ê hè, kóng i nā beh kèng--i, pài--i, ia̍h kam-goān beh niū i choè koe-chhı̄ ê sı̄-toā. Iâ-so͘ sı̄ ke̍k chun-kùi, Sat-tan chiah chhoā i kè chit-ê koe-ku, hit-ê koe-ku. Hit-tia̍p mô͘-kúi ēng bān-kok ê pâi-chhiáng hō͘ i khoàⁿ, ı̀-sù ài beh ín-iū Iâ-so͘ boé hit-ê khang-khang ê hé. Nā-sı̄ Iâ-so͘ sim-koaⁿ lóng bô hó che, lóng bô boé poàⁿ-ê ı̂ⁿ.
Hit-tia̍p nn̄g ê ha̍k-seng tùi chit-ê koe-chhı̄ khı̀. Chı̍t-ē jı̍p-khı̀ hia, thong siâⁿ thong koe-chhı̄ lóng gōng-ngia̍h. Chit-ê gōng-ngia̍h ū kúi-nā hāng, sı̄ in chhēng ê saⁿ kap koe-chhı̄ ê lâng lóng koh-iūⁿ. Hiah ê peh-sı̀ⁿ khoàⁿ-kı̀ⁿ in, ū-ê kiò-choè in sı̄ khám, ū-ê kiò-choè in sı̄ kông, ū-ê kiò-choè in sı̄ pa̍t só͘-chāi ê lâng. Koh gōng-ngia̍h in ê khiuⁿ-kháu, hán-tit lâng oē hiáu-tit. Sı̄ nn̄g ê ha̍k-seng teh kóng oē lóng sı̄ thiⁿ-kok khiuⁿ-kháu, koe-chhı̄ lâng teh kóng oē put-kò sı̄ sè-sio̍k oē, chiah tāi-ke khoàⁿ-lâi khoàⁿ-khı̀, khoàⁿ in sı̄ goā-kok lâng. Koh gōng-ngia̍h nn̄g ê ha̍k-seng khoàⁿ hit-ê siâⁿ-lāi hè lóng m̄ chiūⁿ-ba̍k. Ū lâng kiò in boé, nn̄g ê ha̍k-seng lóng ēng chhiú ng hı̄-khang, m̄ thiaⁿ, soà toā siaⁿ kiò kóng, ‘Kiû Chú hō͘ goá ê ba̍k-chiu bo̍h-tit khoàⁿ chiah-ê khang-khang lām-sám ê mı̍h’; koh kia̍h thâu teh khoàⁿ, ı̀-sù sı̄ tùi-tiōng thiⁿ-kok nā-tiāⁿ. Lāi-tiong ū chı̍t-lâng khoàⁿ-kı̀ⁿ nn̄g ê ha̍k-seng án-ni, kún-chhiò kā in kóng, Sı̄ beh boé sím-mı̍h? Nn̄g ê ha̍k-seng chiū kek kàu tiām-tiām, kā i kóng, Goán sı̄ beh boé chin-lí. Lâng thiaⁿ-kı̀ⁿ che, ná khoàⁿ-khin in; ū-ê mē--in, ū-ê kí-tu̍h--in, ū-ê toā siaⁿ hiàm beh phah--in. Koe-chhı̄ hit-tia̍p lóng jû chhiáng-chhiáng pà-chhı̄. Thoân kàu hō͘ koe-chhı̄ ê sı̄-toā chai, liâm-piⁿ chiū pún-sin lâi, kah in sim-pak ê lâng lia̍h in lâi mn̄g. Liâm-piⁿ chiū mn̄g nn̄g ê ha̍k-seng kóng, Lín tùi to̍h-lo̍h lâi, beh to̍h-lo̍h khı̀, lín siáⁿ-sū chhēng chit-hō kı̂-koài ê saⁿ lâi chia? Nn̄g ê ha̍k-seng kóng, Goán sı̄ kè lō͘ kheh, beh khı̀ goán pún siâⁿ, chiū-sı̄ thiⁿ-téng ê Iâ-lō͘-sat-léng. Lâng mn̄g goán beh boé sím-mı̍h mı̍h? Goán ū kóng beh boé chin-lí; iáu to-bô sím-mı̍h tāi-chı̀. Siâⁿ-lāi lâng kap teh boé-boē bô iân-kò͘ pō͘-jio̍k goán, m̄ hō͘ goán kiâⁿ lō͘. Sím-mn̄g ê lâng lóng bô sı̀n chit nn̄g-ê ha̍k-seng, liōng-iok in sı̄ kông, káⁿ-sı̄ tiâu-kò͘-ı̀ beh chhá chit-ê koe-chhı̄, in chiah ū lâi. Liâm-piⁿ chiū kia̍h tı̂n-tiâu phah--in, chiong thô͘ kā in phia̍h, koh ēng tû kā in tû, hō͘ chèng-lâng khoàⁿ. Hit-tia̍p nn̄g ê ha̍k-seng tı̄ tû--nı̍h siū lâng lêng-lek, koe-chhı̄ ê sı̄-toā khoàⁿ-kı̀ⁿ che, liâm-piⁿ toā siaⁿ chhiò hah-hah. Nn̄g ê ha̍k-seng chheng-chheng thun-lún tiāⁿ-tiāⁿ, lâng loé-mē--in, in thoè lâng kiû hok-khı̀, lâng ēng pháiⁿ oē hiàm--in, in ēng hó-oē kap in kóng, lâng ài beh hāi--in, in tò-hoán thiàⁿ--in; chiah koe-chhı̄--nı̍h ū chı̍t, nn̄g ê khah oē hiáu-tit ê lâng khoàⁿ-kı̀ⁿ nn̄g ê ha̍k-seng án-ni, tò-hoán hō͘ lâng lêng-lek, chiah hiàm kah in tio̍h soah. Koe-chhı̄ ê lâng toā siū-khı̀, chiū hiàm Cheh lâng, kóng-kiò in sı̄ kap nn̄g ê ha̍k-seng kiat-tóng, ài beh soà chek-choē--i. Hiah ê lâng chiū kóng, Khoàⁿ chit nn̄g ê ha̍k-seng liōng sı̄ sūn tō-lí ê peh-sı̀ⁿ, ı̀-sù mā-sı̄ beh hāi lâng. Koh kóng, Koe-chhı̄--nı̍h ū choē-choē lâng sı̄ khah pháiⁿ chit nn̄g ê ha̍k-seng, kám m̄ tio̍h ēng tû kā i tû, koh-khah tiōng-tiōng kā in hêng-hoa̍t.
