Hit-tia̍p nn̄g ê ha̍k-seng iáu-kú phe sí beh tò-tńg, nā-sı̄ sı̀-koè mı̄ àm-bong-bong, chúi mı̄ im-im, kúi-nā pái hiám im--sí. In chiū nā chhut-la̍t khoàⁿ cháiⁿ-iūⁿ oē kàu hit-ê lı̂-pa, hit mı̂ lóng bô hoat-tit--i. Kai-chài hut-jiân tú-tio̍h chı̍t-só͘-chāi khah bô im, chiah chē teh thèng-hāu thiⁿ kng. Bô joā kú, siān soà khùn-khı̀. Tú-tú lı̄ chit-nı̍h bô joā hn̄g ū chı̍t-ê chē, miâ kiò Gı̂-chē , chē-chú chı̄n kiông-liông, miâ kiò Choa̍t-bōng , nn̄g ê ha̍k-seng hit-tia̍p teh khùn, chiū-sı̄ i ê kài-lāi. Chē-chú chá-chá khí-lâi, tı̄ hit-ê kài-lāi teh sûn, pō͘-pı̂n khoàⁿ-kı̀ⁿ nn̄g ê ha̍k-seng tı̄ hia teh khùn, chiū toā siaⁿ hiàm in chhíⁿ; mn̄g in tùi to̍h-lo̍h lâi, siáⁿ-sū tiàm chia? Nn̄g ê ha̍k-seng kóng, Goán sı̄ kiâⁿ thiⁿ-lō͘ ê lâng, sı̄ kiâⁿ m̄-tio̍h chiah kàu chia.
Choa̍t-bōng kóng, Lín mı̂--sı̂ tiàm goá ê só͘-chāi teh khùn sı̄ m̄-tio̍h, tek-khak tio̍h kap goá lâi-khı̀. Choa̍t-bōng mı̄ toā-hàn, khùi-la̍t mı̄ toā, nn̄g ê ha̍k-seng bô ta-tit-oâ chiah tè i khı̀, iū ka-kı̄ chai m̄-tio̍h, lóng boē-oē thang hun-sò͘. Choa̍t-bōng chiū kiông-kiông thoa khı̀ kā in koaiⁿ kaⁿ. Kaⁿ-lāi o͘-àm koà chhàu, nn̄g ê ha̍k-seng sit-chı̀ chiū ū kóng,
Choa̍t-bōng choè lâng chı̄n sı̄ pháiⁿ,
Ha̍k-seng siū i chhim hām-hāi;
Koaiⁿ kaⁿ chhiⁿ-chhám ke̍k bô pí,
Ou-àm koà chhàu kàu beh sí.
Kè pài-saⁿ kàu pài-la̍k, thong-kiōng ū sı̀ jı̍t, nn̄g ê ha̍k-seng koaiⁿ chit--nı̍h, lóng bô chı̍t-tih chúi thang lim, chı̍t-lia̍p bí thang chia̍h, bô khoàⁿ-kı̀ⁿ jı̍t, bô chı̍t-lâng lâi mn̄g in, ia̍h bô chhin-chhek, pêng-iú thang saⁿ-bāi, chiah ná sit-chı̀. Hit-tia̍p Ki-tok-tô͘ chı̄n hoân-ló, kóng kàu in oē án-ni, lóng sı̄ i m̄-tio̍h.
Choa̍t-bōng ê bó͘ miâ kiò Hut-sı̀n , tò-lâi, Choa̍t-bōng ū kā i kóng, Ū nn̄g lâng lām-sám kiâⁿ goá ê kài-lāi, goá í-keng lia̍h in koaiⁿ kaⁿ, taⁿ tio̍h chái-iūⁿ siat-hoat? In bó͘ kóng, in sím-mı̍h lâng? Tùi to̍h-lo̍h lâi? Beh to̍h-lo̍h khı̀? Choa̍t-bōng lóng-chóng kā in kóng. I ê bó͘ kóng, Bı̂n-á-jı̍t lí tio̍h chá-chá khí-lâi, kā in phah kàu put-chí siong-tiōng, bo̍h-tit khó-lı̂n--in. Kàu bı̂n-á chá-khí, Choa̍t-bōng chiū chá-chá khí-lâi, kia̍h toā ki koáiⁿ-á, jip kaⁿ, phah nn̄g ê ha̍k-seng chhin-chhiūⁿ phah káu chı̍t-poaⁿ-iūⁿ. Nn̄g ê ha̍k-seng kù-chāi i phah, lóng bô poàⁿ kù oē. I iáu-kú chhut-la̍t teh phah, phah kàu hō͘ in tı̄ hí toē teh noà, chha-put-to boē tín-tāng, Choa̍t-bōng chiah khı̀.
Nn̄g ê ha̍k-seng hit-tia̍p tı̄ kaⁿ-lāi chı̄n chhám, chı̍t-jı̍t chheng-chheng thó͘-khùi, kiò ai-o nā-tiāⁿ. Hit mı̂ Hut-sı̀n chai--kiò nn̄g ê ha̍k-seng iáu-bē sí, tùi i ê ang kóng, Lí tio̍h kā in ka-kı̄ sí.
Choa̍t-bōng thiⁿ phú-kng koh pı̀ⁿ bı̄n jı̍p kaⁿ, khoàⁿ-kı̀ⁿ nn̄g ê ha̍k-seng thong seng-khu ū tāng siong, chiū kā in kóng, Lín tı̄ chia sı̄ éng-éng boē tit chhut-khı̀, lêng-khó͘ kiám-chhái tio̍h ēng to, ēng soh, ēng to̍k-io̍h, kín-kín ka-kı̄ sí, che sı̄ khah hó. Koh kóng, Lín kàu chia kan-khó͘, siáⁿ-sū m̄ ka-kı̄ sí teh--ah?
Hit-tia̍p nn̄g ê ha̍k-seng kiû i pàng, i koh-khah pı̀ⁿ bı̄n, kah in tio̍h tiàm chia liâm-piⁿ sí. Nā m̄-sı̄ Choa̍t-bōng hit-sı̂ ū khí iûⁿ-hı̂n, kha-chhiú boē chhut-la̍t, chiū tek-khak hō͘ i hāi-sí.
Hit-tia̍p chiah lı̄ nn̄g ê ha̍k-seng khı̀, hō͘ in ka-kı̄ phah-sǹg beh cháiⁿ-iūⁿ. Nn̄g ê ha̍k-seng chiah chiong Choa̍t-bōng kóng ê oē chham-siông khoàⁿ thang á m̄-thang.
Hit-tia̍p Ki-tok-tô͘ kóng, Taⁿ lán tio̍h cháiⁿ-iūⁿ? Kan-khó͘ kàu án-ni, m̄-chai tio̍h oa̍h á tio̍h sí. Lêng-khó͘ káⁿ tio̍h sí khah hó, sı̄ chit-ê kaⁿ kú pí bōng khah chhám. Lâi thàn choa̍t-bōng ê oē khah hó.
Hiân-bōng chiū kóng, Taⁿ chin-chiàⁿ chhám, nā beh éng-éng án-ni, káⁿ tio̍h sí, khah hó. Nā-sı̄ lán tio̍h koh siūⁿ, beh khı̀ thiⁿ-siâⁿ, thiⁿ-chú ū kóng, ‘bo̍h-tit thâi lâng’, lâng to m̄-thang thâi, bô kóng--kiò thiaⁿ lâng ê oē, lâi ka-kı̄ hāi sí mah? Cheh thâi pa̍t lâng put-kò sı̄ hāi i ê seng-khu, kú boē hāi sí i ê lêng-hûn, kàu ka-kı̄ hāi sí sı̄ hāi seng-khu, soà hāi sı̂n-hûn. Án-hiaⁿ, lí kóng tı̄ kaⁿ--nı̍h pí bōng khah chhám, siáⁿ-sū m̄ siūⁿ sí liáu-āu iáu-kú ū tē-ge̍k, chiū hāi sí lâng ê tio̍h tiàm hit só͘-chāi, Sèng-chheh ū kóng, ‘Kı̀ⁿ-nā thâi lâng--ê, i ê lāi-bı̄n bô éng-oa̍h.’ Iū tio̍h siūⁿ, Choa̍t-bōng ê khùi-la̍t chiū nā toā, i tek-khak boē ta̍k hāng ū koân, hō͘ i lia̍h--ê, liōng ū sı̂ ia̍h oē-tit-thang cháu-chhut, Siōng-tè sı̄ ta̍k hāng oē, kiám-chhái oē bia̍t-bô chit-ê Choa̍t-bōng; á-sı̄ kiám-chhái hō͘ Choa̍t-bōng ê kaⁿ-mn̂g ū-sı̂ boē kı̀-tit choān. Kiám-chhái koh bô joā kú tú-tú tiàm lán ê bı̄n-chêng pı̄ⁿ koh khí, kha-chhiú bô la̍t, ia̍h kú káⁿ. Taⁿ tio̍h siòng khoàⁿ ū phāng thang cháu á-bô. Lán m̄-thang siūⁿ--kiò tio̍h sí, it-ı̀ khoàⁿ lâu-pái chiū-sı̄--lah. Hiân-bōng kóng che, lio̍h-á an-ùi Ki-tok-tô͘ ê sim. Hit jı̍t nn̄g ê ha̍k-seng tiàm hí kaⁿ-lāi, sı̀-koè àm bo̍k-bo̍k, chin-chiàⁿ sı̄ chhiⁿ-chhám.
Kàu jı̍t àm, Choa̍t-bōng koh jı̍p kaⁿ-lāi, lâi khoàⁿ nn̄g ê ha̍k-seng ū thàn i ê oē á-bô, khoàⁿ-kı̀ⁿ in chha-put-to beh sí, chı̍t-tiâu khùi teh the̍h nā-tiāⁿ, sı̄ nn̄g ê ha̍k-seng kú-kú bô chia̍h, khit i phah, seng-khu tio̍h tāng-siong chiah án-ni. Choa̍t-bōng khoàⁿ-kı̀ⁿ in bē sí, liâm-piⁿ toā siū-khı̀, kóng in m̄ thàn i ê oē, tek-khak tio̍h phah khah thiám, hō͘ in siūⁿ--kiò sí khah hó. Nn̄g ê ha̍k-seng thiaⁿ-kı̀ⁿ che, chám-jiân kha-chhiú-bah chhoah, kiaⁿ kàu boē-kò͘--tit. Ki-tok-tô͘ chit-sı̂ khioh hūn--khı̀, put ti jı̂n-sū, tiap-á-kú chiah cheng-sı̂n. In chiong Choa̍t-bōng ê oē koh saⁿ-kap chham-siông, iáu-bē koat-toàn. Ki-tok-tô͘ chē-teh, khoán-sit chhin-chhiūⁿ ài thàn Choa̍t-bōng. Hiân-bōng koh kā i kóng, Án-hiaⁿ lí pêng-sò͘ chı̄n hó-táⁿ, chit-tia̍p siáⁿ-sū kiaⁿ kàu án-ni? A-pho-lûn thâi to boē iâⁿ lí. Kàu hit-ê Sí-ı̀m ê soaⁿ-kha ū chı̄n-chāi hiám, lí to bô kiaⁿ, chit-tia̍p kiaⁿ kha̍uh-kha̍uh mı̍h-tāi? Goá pún sı̄ khah sió-táⁿ lí, taⁿ Choa̍t-bōng hāi lán tāi-ke koaiⁿ chí kaⁿ-lāi, goá to bô chhin-chhiūⁿ lí chiah lún. Lán tio̍h noā-noā sèng-tē, khoàⁿ ū hó-sè thang cháu. Lán m̄-thang ka-kı̄ sí, phah-pháiⁿ sèng-tô͘ ê miâ-siaⁿ.
Hit-mı̂ Hut-sı̀n koh mn̄g nn̄g ê ha̍k-seng ū thàn i ê oē á-bô? Choa̍t-bōng kóng, Chit nn̄g lâng ke̍k húi-lūi, sim-koaⁿ soà lia̍h thán-hoâiⁿ, oē kham-tit chiah-ê kan-khó͘, lóng m̄-kam ka-kı̄ sí. Hit-tia̍p i ê bó͘ kóng, Bı̂n-á-jı̍t tio̍h thoa in khı̀ khoàⁿ chí chē-lāi teh sı̄-chiòng ê thâu-khak kut, kóng, Lín nā m̄ ka-kı̄ sí, bē joā kú lín oē chhin-chhiūⁿ chit-hō.
Choa̍t-bōng chiah chá-chá khí-lâi, kó-jiân thoa nn̄g ê ha̍k-seng khı̀ khoàⁿ, lóng chiàu in bó͘ ê oē kóng. I kóng--kiò, Lín teh khoàⁿ ê thâu-khak kut lóng sı̄ kiâⁿ thiⁿ-lō͘--ê, chhin-chhiūⁿ lín jı̍p goá ê kài-lāi; in ê seng-khu chhut-chāi goá thâi kàu chhùi-chhùi; in ê thâu-khak chhut-chāi goá chûi, lín bē joā kú chóng m̄-sái kiaⁿ m̄-tio̍h án-ni. Liâm-piⁿ chiū hiàm nn̄g ê ha̍k-seng, kah in tò-khı̀ kaⁿ--nı̍h, chı̍t-lō͘ kā in phah kàu thiám-thiám. Hit jı̍t tú-tú sı̄ pài-la̍k, nn̄g ê ha̍k-seng tiàm hí kaⁿ-lāi, iû-goân sı̄ chiàu-kū án-ni chhiⁿ-chhám.
Hit mı̂ Hut-sı̀n koh kap i ê ang kóng kàu chit chân ê tāi-chı̀. Choa̍t-bōng kóng--kiò, Goá to ū thiám-thiám phah in, koh ēng oē pek in, in to m̄ ka-kı̄ khı̀ sí, goá to boē-hiáu-tit. I ê bó͘ kóng, in kàu án-ni iáu m̄ sí, liōng in káⁿ ia̍h sı̄ ū ǹg-bāng, kiám-chhái sı̄ khoàⁿ ū lâng thang lâi kiù in, á-sı̄ in seng-khu ū sai-khia ê choān-sı̂ thang choān khui cháu. Choa̍t-bōng kóng, Hiân-chhe, lí kóng che chı̄n tio̍h, thiⁿ-kng goá tek-khak beh chhiau in ê seng-khu, chhiau kàu chim-chiok chim-chiok.
Hit mı̂ kiⁿ chhim--lah, nn̄g ê ha̍k-seng teh kiû Siōng-tè, kàu thiⁿ-kng iáu-kú bē soah. Hit-tia̍p Ki-tok-tô͘ liâm-piⁿ oē-hiáu siūⁿ kóng, Goá seng-khu to ū choān-sı̂, mih-sái kàu chiah gōng, iû-goân tiàm chí chhàu kaⁿ--nı̍h. Goá chit-ê choān-sı̂ tek-khak oē khui chit-ê Gı̂-chē sı̀-koè ê mn̂g.
Hiân-bōng kóng, Nā ū che, hehN, chin-chiàⁿ sı̄ hó, siáⁿ-sū m̄ kín-kín the̍h chhut-lâi chhı̀-khoàⁿ--teh? Ki-tok-tô͘ chiū the̍h chhut-lâi, khin-á chı̍t-ē choān--teh, kaⁿ-mn̂g liâm-piⁿ khui, nn̄g ê ha̍k-seng lóng cháu chhut-lâi. Kàu hit ê tiong mn̂g, koh chı̍t-ē choān--teh, ia̍h khui. Kàu hit-ê goā-ûi-mn̂g, chit-ê mn̂g sı̄ thih--ê, chı̄n oh khui, ēng hit-ê choān-sı̂ kā i choān, ia̍h khui, chiū chhut-la̍t sak hit-ê mn̂g, kín-mé ài cháu chhut-lâi. Mn̂g siaⁿ chı̍t-ē tân, Choa̍t-bōng soà chhíⁿ--teh, chhiⁿ-chin chiū khí-lâi, beh jip-khı̀ lia̍h nn̄g ê ha̍k-seng; hit-tia̍p i ê pı̄ⁿ koh khí, kha-chhiú nńg kô-kô, poàⁿ pō͘ to boē jip. Hit-tia̍p nn̄g ê ha̍k-seng tı̍t-thàu cháu, cháu kàu hit-ê lı̂-pa mn̂g, koh jı̍p thiⁿ-lō͘, chiah m̄-bián kiaⁿ, sı̄ hit--nı̍h Choa̍t-bōng boē tit kàu. Nn̄g ê ha̍k-seng kai-chài kàu chia, koh saⁿ-kap siong-liông kóng, tio̍h ēng sím-mı̍h hoat-tō͘ thang hō͘ āu-sin ê lâng chai, hō͘ i bo̍h-tit tùi piⁿ lō͘ khı̀, bián-tit koh hō͘ Choa̍t-bōng lia̍h-tio̍h. Chiū khiā chı̍t-ê pâi, phah jı̄ kóng, “Tùi chit-ê lı̂-pa mn̂g khı̀ thàng Gı̂-chē, hia ū chı̍t-ê kiông-liông ê lâng, miâ kiò Choa̍t-bōng tiàm teh pé-siú. I khoàⁿ thiⁿ chú m̄ chiūⁿ-ba̍k, ta̍uh-ta̍uh beh hāi i ê sèng-tô͘.” Chit-ê pâi hō͘ hit-tia̍p nn̄g ê ha̍k-seng ū chı̍t-siú si kóng,
Kı̀m-toē só͘-chāi m̄-chai siám,
Tùi chia lâi kiâⁿ chı̄n gûi-hiám;
Taⁿ lán tāi-ke cháu chhut-lâi,
Khiā pâi phah jı̄ kà lâng chai.
Hit-tia̍p nn̄g ê ha̍k-seng koh tùi thiⁿ-lō͘ teh kiâⁿ, ū kàu Lo̍k-san . Kàu chit-ê soaⁿ, chiū peh-khı̀, khoàⁿ-kı̀ⁿ hia ū hoe-ba̍k, ké-chí hn̂g, iáu ū chúi-choâⁿ. I chiū bán ké-chí chia̍h, ia̍h ū iúⁿ chúi soé seng-khu. Hit-ê soaⁿ-téng ū Bo̍k-chiá teh chhı̄ iûⁿ, tú-tú khiā tı̄ lō͘-piⁿ. Nn̄g ê ha̍k-seng chiū oá lâi mn̄g kóng, Cheh soaⁿ chú chı̄-chūi, chia̍h chháu ê iûⁿ chı̄-chūi-á ê?
Bo̍k-chiá kóng, Cheh soaⁿ chiū-sı̄ Í-má-loē-lı̄ ê toē, tùi chia thang khoàⁿ-kı̀ⁿ i kiaⁿ-siâⁿ, iûⁿ lóng sı̄ i ê, i thoè iûⁿ pàng-sak sı̀ⁿ-miā.
Ki-tok-tô͘ kóng, Tùi chia khı̀ sı̄ thàng thiⁿ-siâⁿ mah? Bo̍k-chiá kóng, Tio̍h.
Ki-tok-tô͘ kóng, Tùi chia kàu thiⁿ-siâⁿ joā hn̄g?
Bo̍k-chiá kóng, Kóng--kàu chit tiâu lō͘, nā m̄-sı̄ kiâⁿ thiⁿ-lō͘ ê lâng tek-khak sı̄ hn̄g, kiâⁿ boē tit kàu.
Ki-tok-tô͘ kóng, Chit tiâu lō͘ sı̄ hó kiâⁿ, á pháiⁿ kiâⁿ?
Bo̍k-chiá kóng, Ū chı̍t-hō lâng kiâⁿ liáu chı̄n hó kiâⁿ, chí-ū poē-ge̍k tō-lí ê lâng tek-khak oē poa̍h-tó tı̄ hia.
Ki-tok-tô͘ mn̄g i kóng, Kiâⁿ thiⁿ-lō͘ ê lâng kàu chia, seng-khu siān ài hioh, ū só͘-chāi á bô?
Bo̍k-chiá kóng, Che soaⁿ chú í-keng ū hoan-hù goán kóng, ‘tio̍h thiàⁿ chhut-goā lâng, bo̍h-tit boē kı̀-tit.’ Taⁿ chit--nı̍h ū só͘-chāi, chhut-chāi lí hioh. Bo̍k-chiá koh mn̄g nn̄g ê ha̍k-seng kóng, Lín tùi to̍h-lo̍h lâi? Tùi to̍h-lo̍h jı̍p chit tiâu lō͘? Lín siáⁿ-lō͘ oē kham-tit kú-kú kiâⁿ chit tiâu lō͘, lâi kàu chia?
Nn̄g ê ha̍k-seng chiū chiong chêng-iû kā in kóng.
Bo̍k-chiá thiaⁿ-liáu chiū hoaⁿ-hí, chhiò-chhiò kā in kóng, Lín lâi chit-ê Lo̍k-soaⁿ, goán ê sim chin hoaⁿ-hí. Bo̍k-chiá ê miâ chiū-sı̄ Tı̀-sek, Liān-ta̍t , Kín-siú , Sêng-sı̍t, chiah-ê. In ū khan nn̄g lâng ê chhiú, chhoā in jı̍p tiùⁿ-pâng, ēng in tú-tú beh chia̍h ê mı̍h chhek-èng--i. Chia̍h liáu, koh chhiáⁿ in ke tiàm chı̍t nn̄g jı̍t, oē-tit-thang khah siong-se̍k, seng-khu koh oē tit-thang khah khoàⁿ-oa̍h. Nn̄g ê ha̍k-seng ia̍h ài hō͘ in lâu, hit-tia̍p kiⁿ chhim--lah, chiah khı̀ khùn.
Kàu thiⁿ-kng, chhiáⁿ nn̄g ê ha̍k-seng khí-lâi, kah in khı̀ chit-ê soaⁿ thit-thô, thang sı̀-koè khoàⁿ kong-kéng. Hit-tia̍p Bo̍k-chiá saⁿ-kap kóng, Ū kúi-nā kı̂-koài ê só͘-chāi, lán tio̍h chhoā in khı̀ khoàⁿ. Chiū chhoā in peh chı̍t-ê soaⁿ, miâ hō choè ı̄ⁿ-toan, chit-ê soaⁿ āu-piah chı̄n koâiⁿ koah chhiâ. Bo̍k-chiá kah in tio̍h àⁿ lo̍h-khı̀ khoàⁿ, kóng--kiò ē-toé ū kut-thâu, lóng sı̄ soaⁿ-téng poa̍h lo̍h-khı̀ ê lâng, seng-khu hu, kut-thâu chhùi. Ki-tok-tô͘ kóng, Che sı̄ sím-mı̍h in-toaⁿ?
Bo̍k-chiá kóng, Chāi-chá Hú-pí-nái, Hui-lı̄-tô͘, lām-sám kóng koh-oa̍h ê tō-lí, ū lâng thàn i ê oē, liâm-piⁿ poē tō-lí, lām-sám kiâⁿ, lí kám bô thiaⁿ-kı̀ⁿ mah?
Nn̄g ê ha̍k-seng kóng, Goán ia̍h bat thiaⁿ-kı̀ⁿ.
Bo̍k-chiá kóng, Soaⁿ-ē chhùi-chhùi ê kut-thâu chiū-sı̄ chiah-ê. Kàu taⁿ iáu bē chòng, sı̄ beh lok--teh hō͘ āu-sin ê lâng khoàⁿ, hō͘ in m̄-káⁿ kūn chit-ê ı̄ⁿ-toan soaⁿ.
Bo̍k-chiá chiū koh chhoā in peh chit-ê koâiⁿ soaⁿ, soaⁿ miâ kiò-choè Kéng-kài, kah in tio̍h siòng hí hn̄g-hn̄g. In siông-sè teh khoàⁿ, khoàⁿ-kı̀ⁿ hit-nı̍h ū chı̍t-ê thióng-soaⁿ, kúi-nā lâng tùi hia kiâⁿ-lâi kiâⁿ-khı̀. Koh siông-sè teh khoàⁿ, khoàⁿ-kı̀ⁿ hiah-ê lâng chin-chiàⁿ sı̄ chhiⁿ-mı̂, ta̍uh-ta̍uh tak--tio̍h, chheng-chheng tiàm hí thióng-soaⁿ--nı̍h teh tı̂ⁿ, lóng boē tit chhut-lâi.
Ki-tok-tô͘ kóng, Che sı̄ cháiⁿ-iūⁿ?
Bo̍k-chiá kóng, Tı̄ cheh soaⁿ-ē bô joā hn̄g, lō͘-piⁿ ū chı̍t-ê lı̂-pa-mn̂g, ū lō͘ thang jı̍p chháu-po͘, lí kám bô khoàⁿ-kı̀ⁿ mah?
Nn̄g ê ha̍k-seng kóng, Ū.
Bo̍k-chiá kóng, Tùi lı̂-pa-mn̂g jı̍p-khı̀, tı̍t-tı̍t thàng kàu Gı̂-chē, ū chı̍t-ê kiông-liông ê lâng, miâ kiò Choa̍t-bōng, tiàm hia pé-siú. Chí kúi ê kiâⁿ thióng-soaⁿ ê lâng tāi-seng ia̍h sı̄ kiâⁿ thiⁿ-lō͘. Kiâⁿ kàu lı̂-pa-mn̂g, lō͘ chı̄n pháiⁿ kiâⁿ, chiah oat jı̍p chháu-pō͘-nih, hō͘ Choa̍t-bōng lia̍h khı̀ koaiⁿ hit-ê Gı̂-chē ê kaⁿ. Koaiⁿ ū hiah kú, āu-lâi ū iah in ê ba̍k-chiu, chhoā in khı̀ thióng-soaⁿ--nı̍h, chhut-chāi in lo̍k-lo̍k se̍h, kàu taⁿ iáu boē thang chhut-lâi, chiū-sı̄ cheh tāi-chı̀. Chhin-chhiūⁿ Só͘-lô-bûn kóng, ‘Pàng hiat-ka̍k tı̀-sek ê lō͘, tek-khak oē khiā chiah-ê sí-lâng ê tiong-ng.’
Hit-tia̍p nn̄g ê ha̍k-seng siūⁿ kàu che, tāi-ke tùi-siòng lâu ba̍k-sái.
Hit-tia̍p goá ū bāng-kı̀ⁿ Bo̍k-chiá chhoā nn̄g ê ha̍k-seng koh kàu chı̍t-ê só͘-chāi, tú-tú sı̄ hit ê soaⁿ-ē. Tı̄ hia ū mn̂g, Bo̍k-chiá chiū khui cheh mn̂g, kah in oá khı̀ khoàⁿ. Lāi-bı̄n lóng o͘-àm sı̀-koè hun-hun, ū thiaⁿ-kı̀ⁿ pi-pi pia̍k-pia̍k ê siaⁿ, chhin-chhiūⁿ hé teh pia̍k, ia̍h ū thiaⁿ-kı̀ⁿ chhiⁿ-chhám, thı̂-khàu ê siaⁿ, koah ū phı̄ⁿ-kı̀ⁿ liû-hông ê bı̄.
Ki-tok-tô͘ kóng, Che sı̄ sím-mı̍h?
Bo̍k-chiá kóng, Che sı̄ tē-ge̍k ê sai-khia mn̂g, hō͘ chiah-ê ké ê ha̍k-seng tùi chia teh jı̍p. Ū chhin-chhiūⁿ o̍h Í-sò--ê, boē i toā kiáⁿ ê ke-hé; o̍h Iû-tāi--ê, boē Kiù-chú; o̍h kim-kang A-le̍k-san-tāi--ê, húi-pòng siat-to̍k hok-im; o̍h A-ná-nı̂-á kap i ê bó͘ Sat-hui-iat-ê, kóng pe̍h-chha̍t, chiah-ê lâng, lóng sı̄ tùi chia jı̍p.
Hit-tia̍p Hiân-bōng kā Bo̍k-chiá kóng, Goá khoàⁿ chí chiah ê lâng, ta̍k-ê ū kiâⁿ thiⁿ-lō͘, sı̍t-chāi kap lán pı̂ⁿ-pı̂ⁿ.
Bo̍k-chiá kóng, Tio̍h, in kiâⁿ thiⁿ-lō͘ kú--lah.
Hiân-bōng kóng, in kiâⁿ thiⁿ-lō͘, sı̄ kiâⁿ kàu joā hn̄g chiah bô?
Bo̍k-chiá kóng, Ū-ê kiâⁿ kàu chit-ê soaⁿ, ū-ê bē kàu chit-ê soaⁿ.
Hit-tia̍p nn̄g ê ha̍k-seng saⁿ bián-lē kóng, Lán tio̍h pek-chhiat kiû Kiù-chú, bāng i ēng khùi-la̍t siúⁿ-sù lán.
Bo̍k-chiá kóng, Tio̍h, lín tit-tio̍h che khùi-la̍t, put-sı̂ tio̍h ēng.
Hit-tia̍p nn̄g ê ha̍k-seng koh ài chı̀n-chêng kiâⁿ, Bo̍k-chiá ia̍h ài tit in án-ni, liâm-piⁿ sàng in kàu soaⁿ-āu. Ū si kóng,
Kiâⁿ kàu khoài-lo̍k hí soaⁿ-tiûⁿ,
Bo̍k-chiá tı̄ hia teh chhı̄ iûⁿ;
Ài-tit ha̍k-seng kàu thiⁿ-siâⁿ,
Kà i chı̀n-chêng koh-chài kiâⁿ.
Hit-tia̍p Bo̍k-chiá tāi-ke saⁿ-kap kóng, Taⁿ thiⁿ-siâⁿ ê mn̂g, lán ū chhian-lí-kiàⁿ, tio̍h chioh chit nn̄g ê ha̍k-seng khoàⁿ, iáu chiū chhoā in peh chit-ê koâiⁿ soaⁿ, soaⁿ miâ kiò-choè Chheng-kéng . Bo̍k-chiá chiū chiong kiàⁿ chioh nn̄g ê ha̍k-seng. Nn̄g ê ha̍k-seng chih-khı̀, tú-tú teh beh khoàⁿ, siūⁿ-tio̍h kàu Bo̍k-chiá chhoā in khı̀ khoàⁿ soaⁿ-ē tē-ge̍k sai-khia mn̂g ê tāi-chı̀, sim-koaⁿ mı̄ kiaⁿ, chhiú mı̄ chhoah, khoàⁿ-liáu lóng boē chún-chı̂n. Nā-sı̄ án-ni, iáu-kú lı̂-lı̂-á khoàⁿ-kı̀ⁿ thiⁿ-siâⁿ ê mn̂g, ia̍h ū khoàⁿ-kı̀ⁿ hit-ê mn̂g chı̄n kng. Nn̄g ê ha̍k-seng khoàⁿ soah, chiū koh chı̀n-chêng kiâⁿ. Hit-tia̍p ū gı̂m si kóng,
Chhoā lán peh-chiūⁿ Chheng-kéng soaⁿ,
Bo̍k-chiá chiong kiàⁿ chioh lán khoàⁿ;
Chù-sı̂n teh chiò ba̍k chı̄n kng,
Hn̄g-hn̄g khoàⁿ-kı̀ⁿ thiⁿ-siâⁿ mn̂g.
Nn̄g ê ha̍k-seng tit-beh khí-sin, hit-tia̍p chiah-ê Bo̍k-chiá, chı̍t-ê ēng lō͘-chām ê chheh hō͘ in, chı̍t-ê kah in tio̍h soè-jı̄, tı̂-hông phô͘-tháⁿ ê lâng, chı̍t-ê kah in kàu hit-ê bê-he̍k lâng ê só͘-chāi, tek-khak m̄-thang khùn, koh chı̍t-ê thoè in kı̂-tó kóng, Goān Siōng-tè chı̍t lō͘ kap lín saⁿ-kap tı̄-teh.
Goá bāng-kı̀ⁿ kàu chia chiū chhíⁿ. Āu-lâi khùn koh bāng-kı̀ⁿ, khoàⁿ-kı̀ⁿ chit nn̄g ê ha̍k-seng ûn-ûn-á lo̍h soaⁿ, ǹg thiⁿ-siâⁿ khı̀. Lio̍h-lio̍h-á lı̄ chit-ê soaⁿ ê chó-pêng, ū chı̍t-só͘-chāi kiò-choè Chū-boán , chit só͘-chāi ū chı̍t-tiâu lō͘ thang chhiah jı̍p thiⁿ-lō͘. Lō͘ soè tiâu, koah oan-oat. Nn̄g ê ha̍k-seng kàu chí lō͘-kháu, tú-tio̍h chı̍t-ê siàu-liân lâng, khoán-sit iô-iô pái-pái, tùi hit--nı̍h lâi, miâ choè Bû-ti . Ki-tok-tô͘ mn̄g i tùi to̍h-lo̍h lâi, beh to̍h-lo̍h khı̀.
