Hit-tia̍p Ki-tok-tô͘ tùi Hiân-bōng kóng, Chit lâng teh kóng, chin-chiàⁿ sı̄ án-ni mah?
Hiân-bōng kóng, Lán tio̍h soè-jı̄, che ia̍h sı̄ phô͘-tháⁿ--ê. Goá chêng thàn chit-hō, ka-kı̄ tı̀-kàu ū kan-khó͘. Án-hiaⁿ, lí siáⁿ-sū siūⁿ? Kám bô Sûn-soaⁿ mah? Goán tiàm Lo̍k-soaⁿ kám bô khoàⁿ-kı̀ⁿ thiⁿ-siâⁿ mn̂g mah? Lán tio̍h ēng sı̀n lâi kiâⁿ, tek-khak ū hit-ê só͘-chāi. Taⁿ tio̍h kín-mé kiâⁿ, bo̍h-tit hō͘ kia̍h piⁿ--ê koh lâi tui lán. Sèng-chheh ū kóng, ‘Bê lâng lı̄ tı̀-sek ê lō͘, soè-kiáⁿ bo̍h-tit thiaⁿ.’Chí chit kù oē, án-hiaⁿ, lí pún-jiân tio̍h kà goá, taⁿ goá hoán-tńg kà lí, ài tit lí tek-khak bo̍h-tit thiaⁿ chit-hō lâng. Lán tio̍h sı̀n, chiah oē tit-tio̍h kiù.
Ki-tok-tô͘ kóng, Goá mn̄g án-hiaⁿ lí, m̄-sı̄ gı̂--kiò lí bô sı̀n, sı̄ beh chhı̀ lí, khoàⁿ án-hiaⁿ lí beh thàn cheh lâng á-bô. Goá chá-chá chai chit hō lâng sı̄ hō͘ mô͘-kúi bê--khı̀. Taⁿ lán tio̍h kín-mé kiâⁿ, sı̄ chai--kiò lán sı̀n ê tō-lí sı̄ chin, lóng bô sió-khoá cheng-chha.
Hiân-bōng kóng, Taⁿ goá ǹg-bāng thiⁿ ê êng-kng, sim-koaⁿ chin hoaⁿ-hí.nn̄g ê ha̍k-seng chiah m̄ chhap Bông-thian, choè in kiâⁿ. Bông-thian ia̍h chhiò-chhiò choè i khı̀.
Hit-tia̍p goá bāng-kı̀ⁿ nn̄g ê ha̍k-seng chı̀n-chêng teh kiâⁿ, ū kàu chı̍t-ê só͘-chāi, kı̀ⁿ ū jı̍p chia hō͘ hit ê khı̀ chhèng, lâng lóng ài khùn. Hiân-bōng hit-tia̍p kàu chia siān-siān, siūⁿ beh khùn, chiū kā Ki-tok-tô͘ kóng, Goá taⁿ chin ài khùn, ba̍k-chiu chin siap, chha-put-to thí boē khui, beh tiàm chia chhiáⁿ khùn tiap-á kú.
Ki-tok-tô͘ kóng, Heh! tek-khak m̄-thang, goá kiaⁿ-liáu lán khùn boē chhíⁿ.
Hiân-bōng kóng, siáⁿ-sū kàu án-ni? Lâng kiâⁿ siān, khùn chin hó. Nā chhiáⁿ khùn tia̍p-á-kú, cheng-sı̂n kiam-chhái oē khah chhiau-chhe̍k.
Ki-tok-tô͘ kóng, Chá-jı̍t chı̍t- ê Bo̍k-chiá kóng kiò ū chı̍t-ê khı̀ oē bê lâng ê só͘-chāi, kah lán m̄-thang khùn. Án-hiaⁿ, lí kám boē-ki tit mah? Koh Sèng-chheh kám bô kóng, Lán bo̍h-tit chhin-chhiūⁿ chèng-lâng teh khùn; tio̍h kéng-séng, kín-sı̄n pé-siú.
Hiân-bōng kóng, Goá chai--kiò m̄-tio̍h--lah; siat-sú goá ka-kı̄ tiàm chia, kám bô lām-sám khùn, kiám-chhái oē sí ia̍h káⁿ. Só͘-lô-bûn kóng, ‘Chı̍t-lâng m̄ ta̍h-tio̍h nn̄g lâng,’che oē chin tio̍h. Goá kàu chiah kú, oē-tit-thang kap án-hiaⁿ lí choè phoāⁿ, chiū-sı̄ toā iú-ek. Án-hiaⁿ, lí chı̄n-la̍t khǹg goá, pa̍t jı̍t tek-khak ū hó pò-èng.
Ki-tok-tô͘ kóng, Lán nā boē khùn-tit, tio̍h lâi saⁿ-kap kóng oē, che chin hó.
Hiân-bōng kóng, Tio̍h.
Ki-tok-tô͘ kóng, Ài beh saⁿ-kap kóng, tio̍h tāi-seng kóng sím-mı̍h?
Hiân-bōng kóng, tio̍h chiong Siōng-tè khí-thâu kám-hoà lán ê sim lâi tāi-seng kóng, nā-sı̄ án-hiaⁿ lí tio̍h seng kóng.
Hit-tia̍p Ki-tok-tô͘ ū gı̂m-si kóng,
Bo̍h-tit tiàm chia ài beh khùn,
Tio̍h ēng hó tāi saⁿ-kap lūn;
Kiâⁿ-liáu chiàu chêng jı̍p lô-bāng,
Tāi-ke koh-chài siū khó͘-thàng.
Tùi án-ni ū kā Hiân-bōng kóng, Taⁿ goá beh mn̄g lí chı̍t-hāng tāi-chı̀, lí tāi-thâu siáⁿ-sū siūⁿ beh khı̀ thiⁿ-siâⁿ?
Hiân-bōng kóng, A-hiaⁿ, lí mn̄g goá, sı̄ mn̄g goá tāi-thâu thái-thó oē chai thang tùi-tiōng sı̂n-hûn mah?
Ki-tok-tô͘ kóng, Sı̄.
Hiân-bōng kóng, Hu-hoa chhı̄--nı̍h khoàⁿ-kı̀ⁿ só͘ boē ê mı̍h, goá chêng chin ài, goá hit-tia̍p teh siūⁿ, chai--kiò nā-sı̄ iû-goân hèng chit hō, kàu bé tek-khak oē lo̍h tē-ge̍k.
Ki-tok-tô͘ kóng, He sı̄ sím-mı̍h?
Hiân-bōng kóng, Chiū-sı̄ sè-kan ê chı̂ⁿ-châi, hù-kùi, hòng-tōng, chiú-chùi, chiù-chhàn, hau-la̍k, kan-ı̂m chiah-ê pháiⁿ. Hit-tia̍p goá ū thiaⁿ-kı̀ⁿ Siōng-tè ê tō-lí, teh siūⁿ chai--kiò kiâⁿ che pháiⁿ, lóng oē hō͘ Siōng-tè siū-khı̀, kàu bé tek-khak lo̍h tē-ge̍k. Goá chai--kiò án-ni, sı̄ tiàm Hu-hoa chhı̄--nı̍h ū thiaⁿ-kı̀ⁿ Chı̄n-tiong kap lí ê oē.
Ki-tok-tô͘ kóng, Lí hit-tia̍p thiaⁿ-kı̀ⁿ, ū liâm-piⁿ hoán-hoé á-bô?
Hiân-bōng kóng, bô, goá hit-tia̍p chai--kiò ū choē, ia̍h m̄ kam-goān hoán-hoé, sı̄ sim-koaⁿ khiok ū chai chin tō-lí sı̄ tio̍h, iáu-kú ba̍k-chiu pàng khoeh-khoeh m̄ khoàⁿ, m̄-ài chin tō-lí ê kng chiò goá ê sim.
Ki-tok-tô͘ kóng, hit-tia̍p Sèng-sı̂n kám-hoà lí ê sim, lí siáⁿ-sū m̄?
Hiân-bōng kóng, Ū kúi-nā hāng. Thâu chı̍t-hāng, sı̄ m̄-chai Sèng-sı̂n ài beh kám-hoà goá ê sim. Hit-tia̍p goá lóng m̄-chai Siōng-tè ài beh kám-hoà lâng ê sim, sı̄ tāi-seng hō͘ i chai--kiò ū choē. Tē-jı̄ hāng, goá hit-tia̍p hoaⁿ-hí chiah-ê su-io̍k, chhin-chhiūⁿ hó-chia̍h mı̍h, sim-koaⁿ m̄-kam pàng-sak. Tē saⁿ hāng, chêng kap i kau-poê--ê, goá chin hoaⁿ-hí i ê só͘ kiâⁿ, m̄-kam pàng-lı̄. Tē sı̀ hāng, hit-tia̍p chai choē, goá ê sim-koaⁿ chin kan-khó͘ kàu lóng boē-kò͘-tit, taⁿ goá m̄-káⁿ chiong hit-tia̍p koh khioh lâi siūⁿ.
Ki-tok-tô͘ kóng, Thiaⁿ-kı̀ⁿ án-hiaⁿ lí teh kóng, kóng--kiò lí chai choē kan-khó͘, liōng káⁿ ia̍h ū-sı̂ m̄-sái án-ni.
Hiân-bōng kóng, Kiám-chhái ū-sı̂ ia̍h káⁿ, nā-sı̄ bē joā kú koh siūⁿ-tio̍h ū choē, kú kan-khó͘ ná thiám.
Ki-tok-tô͘ kóng, Hō͘ lí koh siūⁿ-tio̍h choē sı̄ ūi mı̍h iân-kò͘?
Hiân-bōng kóng, Ū choē-choē hāng. Kiám-chhái lō͘--nı̍h chhēng-tio̍h hó lâng, kiám-chhái pō͘-pı̂n thiaⁿ-kı̀ⁿ Sèng-chheh ê tō-lí, kiám-chhái seng-khu tú-tn̄g ū pı̄ⁿ, kiám-chhái thiaⁿ-kı̀ⁿ chhù-piⁿ ū pı̄ⁿ, kiám-chhái chhàu-khám thiaⁿ-kı̀ⁿ khàu ê siaⁿ, kiám-chhái thiaⁿ-kı̀ⁿ ū lâng bô tiuⁿ-tı̂ sí. Che lóng sı̄ hō͘ goá chia̍p-chia̍p koh siūⁿ-tio̍h choē, kú ná chhám.
Ki-tok-tô͘ kóng, Lí kı̀-jiân koh siūⁿ-tio̍h lí ê choē, lí kám bô kiaⁿ hit-ê choē ê chek-sêng mah?
Hiân-bōng kóng, Boē, goá nā koh siūⁿ-tio̍h beh kiâⁿ sím-mı̍h pháiⁿ, hit-tia̍p goá sim sı̄ ná hoân.
Ki-tok-tô͘ kóng, Lí hit-tia̍p sı̄ cháiⁿ-iūⁿ?
Hiân-bōng kóng, Hit-tia̍p goá ka-kı̄ teh siūⁿ kóng--kiò tio̍h chhut-la̍t koé-pı̀ⁿ, nā bô, tek-khak lo̍h tē-ge̍k.
Ki-tok-tô͘ kóng, Lí chin-chiàⁿ ū koé-pı̀ⁿ á bô?
Hiân-bōng kóng, Ū, goá m̄-nā lı̄ kū ê pháiⁿ, bô beh kap kū ê pêng-iú kau, koh chhut-la̍t ho̍k-sāi Siōng-tè, ta̍k sı̂ kı̂-tó, khûn-khûn kàu-khàm Sèng-chheh, hoân-ló goá ê choē, kóng oē láu-sı̍t, chiah-ê tāi-chı̀. Hit-tia̍p goá lóng sı̄ án-ni kiâⁿ.
Ki-tok-tô͘ kóng, Lí hit-tia̍p án-ni, kám bô ka-kı̄ kóng lí lóng tio̍h mah?
Hiân-bōng kóng, Khiok ia̍h ū án-ni kóng, nā-sı̄ chı̍t-sim hoán-hoé, chı̍t-sim chêng ê kan-khó͘ iû-goân tiâu-teh.
Ki-tok-tô͘ kóng, Lí í-keng koé kū ê pháiⁿ, siáⁿ-sū koh hoân-ló kàu án-ni?
Hiân-bōng kóng, Hō͘ goá án-ni ia̍h ū kúi-nā hāng. Sèng-chheh kóng, “Lâng ê hó, ū gı̄, lóng sı̄ chhin-chhiūⁿ phoà-noā lâ-sâm ê saⁿ.” Koh kóng, “Khò lu̍t-hoat kiâⁿ ê lâng, bô lâng thang chheng-choè ū gı̄,” koh kóng, “Lán nā kiâⁿ Chú ê hoan-hù, ia̍h tio̍h ka-kı̄ kóng bô lō͘-ēng ê lô͘-po̍k.” Goá hit-tia̍p chiah ka-kı̄ siūⁿ kóng, ka-kı̄ ê hó ū gı̄, chin-chiàⁿ chhin-chhiūⁿ phoà-noā lâ-sâm ê saⁿ, khò lu̍t-hoat kiâⁿ, tùi Siōng-tè ê bı̄n-chêng chin-chiàⁿ boē-tit-thang chheng choè ū gı̄, thàn Chú ê bēng-lēng teh kiâⁿ, sı̍t-chāi ia̍h sı̄ bô lō͘-ēng ê lô͘-po̍k, khó-kiàn khò lu̍t-hoat siūⁿ beh kàu thiⁿ-téng, che sı̄ chin gōng. Hit-tia̍p goá koh ka-kı̄ siūⁿ kóng, kiám-chhái lâng ū sia lâng ê mı̍h, thong-kiōng khiàm gō͘-pah kho͘, āu-lâi khiok ia̍h ēng hiān-chı̂ⁿ boé, nā-sı̄ chêng khiàm ê iáu-bē chheng, hit-ê chè-chú kiám boē tùi koaⁿ-hú tâu-kò, lia̍h i khı̀ koaiⁿ kaⁿ mah?
Ki-tok-tô͘ kóng, Án-hiaⁿ lí ēng che phı̀-jū, goá bô sím-mı̍h oē hiáu-tit.
Hiân-bōng kóng, Goá ê ı̀-sù sı̄ kóng--kiò goá í-keng tek-choē Siōng-tè, chhin-chhiūⁿ khiàm i ê chè iáu bē hêng, taⁿ chiū nā koé-pı̀ⁿ, siūⁿ-tio̍h kàu chêng ê pháiⁿ, boē bián-tit lo̍h tē-ge̍k.
Ki-tok-tô͘ kóng, Che phı̀-jū chin hó, chhiáⁿ án-hiaⁿ lí koh kóng.
Hiân-bōng kóng, Chai choē liáu, iáu ū pa̍t hāng tāi-chı̀ hō͘ goá m̄ pêng-an, sı̄ goá ê só͘ kiâⁿ, kú hit-ê ke̍k hó--ê lâi khoàⁿ, loē-tiong ia̍h ū pháiⁿ. Goá chiah chai, chêng chiū nā ka-kı̄ lia̍h choè tio̍h, goá ê pháiⁿ chin choē, kú tio̍h lo̍h tē-ge̍k.
Ki-tok-tô͘ kóng, Lí hit-tia̍p cháiⁿ-iūⁿ?
Hiân-bōng kóng, Tāi-thâu goá lóng boé-hiáu cháiⁿ-iūⁿ, chiah ū chiong goá sim-lāi ê tāi-chı̀ kā Chı̄n-tiong kóng. Chı̄n-tiong pún-jiân kap goá siong-se̍k. i ū kā goá kóng, iàu-kín tio̍h tit-tio̍h chı̍t-lâng bô choē ê gı̂, chiah oē-tit-thang kiù, nā m̄-sı̄ án-ni, thong sè-kan ê gı̂ lóng boē kiù lí.
Ki-tok-tô͘ kóng, Lí hit-tia̍p ū sı̀n i mah?
Hiân-bōng kóng, Hit-tia̍p goá ka-kı̄ lia̍h choè tio̍h, nā thiaⁿ-kı̀ⁿ che oē tek-khak kóng i gōng, m̄ sı̀n--i. Kàu chai--kiò ū choē, chı̍t-ē thiaⁿ-kı̀ⁿ i kóng, chiah bô tit-ta-oâ tio̍h sı̀n--i.
Ki-tok-tô͘ kóng, i kóng tek-khak tio̍h. Ū chı̍t-ê bô choē, lí hit-tia̍p siūⁿ chí sè-kan ū chit-hō lâng bô?
Hiân-bōng kóng, Tāi-thâu thiaⁿ-kı̀ⁿ che chin kı̂-koài koah giâu-gı̂, kàu ûn-ûn-á kap i kóng, chiah ná thiaⁿ ná chhim-sı̀n.
Ki-tok-tô͘ kóng, Chit-hō bô choē--ê, lí ū mn̄g--kiò sı̄ chı̄-chūi, cháiⁿ-iūⁿ oē-tit-thang tùi i chheng choè gı̄ bô?
Hiân-bōng kóng, Ū--ah! I ū kóng che chiū-sı̄ lán ê Chú Iâ-so͘, ū chē tı̄ Siōng-tè ê toā pêng. Koh kóng, ài-tit tùi i chheng choè gı̄, tio̍h khò Iâ-so͘ tèng sı̍p-jı̄-kè ê kong-lô lâi sı̀n--i. Goá koh mn̄g i kóng, i chı̍t-lâng gı̄, sı̄ cháiⁿ-iūⁿ oē hō͘ lâng kàu chheng choè gı̄? I kóng, Iâ-so͘ chiū-sı̄ bān koân-lêng ê Siōng-tè, i tı̄ sè-kan ū tam-tng hit-ê sí, lóng m̄-sı̄ in-ūi ka-kı̄, sı̍t-sı̍t sı̄ in-ūi pa̍t lâng; lán nā sı̀n--i, i ê gı̄ kap kong-lô chiū sǹg-tit sı̄ lán ê.
Ki-tok-tô͘ kóng, Lí hit-tia̍p koh cháiⁿ-iūⁿ?
Hiân-bōng kóng, Hit-tia̍p goá ia̍h m̄-káⁿ sı̀n i, kiaⁿ-liáu i bô beh kiù goá. Goá kap Chı̄n-tiong án-ni kóng.
Ki-tok-tô͘ kóng, hit-tia̍p Chı̄n-tiong ı̀n lí cháiⁿ-iūⁿ?
Hiân-bōng kóng, i kóng-kiò lí tio̍h chhı̀-khoàⁿ. Goá chiah kóng, goá nā án-ni, kú kiaⁿ-liáu goá sı̄ toā táⁿ chū-choan.I kóng m̄-sı̄ án-ni, Iâ-so͘ to ū kah lí khı̀. Hit-tia̍p beh hō͘ goá hó-táⁿ káⁿ khı̀, i ū chiong chit pún Sèng-chheh hō͘ goá. i kóng--kiò, che Sèng-chheh sı̄ ta̍k hù ū-iáⁿ, lóng m̄-sái lı̂-á giâu-gı̂. Goá chiah koh mn̄g i kóng, goá beh oá Kiù-chú tio̍h cháiⁿ-iūⁿ? I kóng, lí tio̍h koan-sim chhiat-ı̀ kiû Thiⁿ-Pē hō͘ lí chai i ê chí-ı̀. Hit-tia̍p goá koh mn̄g i kóng, kiû Thiⁿ-Pē tio̍h cháiⁿ-iūⁿ? I chiū kóng, Siōng-tè put-sı̂ ū chē i ê un-tián ê ūi. Lí tio̍h kiû i sià lí ê choē. Hit-tia̍p goá chiah koh kóng, beh kiû--i, goá kú lóng boē hiáu-tit. I kóng, lí nā kiû tio̍h kóng, “Siōng-tè khó-lı̂n goá ū choē ê lâng, hō͘ goá bat Iâ-so͘ lâi sı̀n--i. Goá chai nā bô Iâ-so͘ ê gı̄, éng-éng tio̍h sí, lo̍h tē-ge̍k. Khún-kiû Siōng-tè khó-lı̂n goá, tài-liām Iâ-so͘ ê gı̄, sià goá ê choē.”
Ki-tok-tô͘ kóng, Chı̄n-tiong án-ni kà, lí ū kiâⁿ bô?
Hiân-bōng kóng, Ū--ah. Goá ū chia̍p-chia̍p kiâⁿ.
Ki-tok-tô͘ kóng, Hit-tia̍p Thiⁿ-Pē ū ún lí kiû bô?
Hiân-bōng kóng, Goá bat kiû kúi-nā pái, i kú lóng bô ún.
Ki-tok-tô͘ kóng, Hit-tia̍p lí cháiⁿ-iūⁿ?
Hiân-bōng kóng, Hit-tia̍p goá lóng boē hiáu-tit.
Ki-tok-tô͘ kóng, Hit-tia̍p Siōng-tè bô ún lí, lí kám bô siūⁿ bô beh kiû mah?
Hiân-bōng kóng, Ū--ah. Heh, goá sı̄ boē sǹg-tit pái.
Ki-tok-tô͘ kóng, Nā-sı̄ án-ni, siáⁿ-sū koh kiû bô soah.
Hiân-bōng kóng, Goá ū thiaⁿ-kı̀ⁿ kóng, nā bô Iâ-so͘ ê gı̄, goá tek-khak tio̍h sí. Chit kù oē goá sı̀n chin-chiàⁿ sı̄ ū-iáⁿ, chiah ka-kı̄ siūⁿ kóng, nā m̄-sı̄ án-ni kiû, goá ún-tàng oē sí, lêng-khó͘ tio̍h tiāⁿ-tiāⁿ kiû, iáu thang ǹg-bāng oa̍h. Koh goá kı̀-tit Sèng-chheh ū kóng, “Goá tek-khak kín-kín kàu; khoàⁿ lâng ê só͘ kiâⁿ só͘ pò-èng--i;” goá chiah tı̍t-tı̍t kı̂-tó.
Ki-tok-tô͘ kóng, Siōng-tè ū kà-sı̄ lí chai mah?
Hiân-bōng kóng, Ū--ah. Goá ū chı̍t-jı̍t chı̄n-chāi hoân-ló, it-seng goá lóng m̄-bat kàu chiah hoân-ló. Chit-ê hoân-ló sı̄ cháiⁿ-iūⁿ? Sı̄ chai--kiò goá ê choē ke̍k tāng, tek-khak tio̍h lo̍h tē-ge̍k, siū éng-éng ê hêng-hoa̍t. Goá tú-á teh siūⁿ, pō͘-pı̂n chhin-chhiūⁿ khoàⁿ-kı̀ⁿ Chú Iâ-so͘ tùi thiⁿ àⁿ teh khoàⁿ, hit-tia̍p ū kā goá kóng, Tio̍h sı̀n Chú Iâ-so͘ Ki-tok chiah oē tit-tio̍h kiù. Goá ū kóng, Chú--ah, goá ê choē chin tāng. Chú chiū kóng, M̄-sái kiaⁿ, goá ê un, lí chiū kàu-gia̍h thang kiù lí. Goá kóng, Chú--ah, sı̀n Chú tio̍h cháiⁿ-iūⁿ? Chú chiah kóng, “Kūn goá--ê, éng boē iau; sı̀n goá--ê, éng boē chhùi-ta.” Chí chit kù oē hō͘ goá chai--kiò tio̍h sı̀n Chú kap tio̍h kūn Chú, ı̀-sù lóng sı̄ pı̂ⁿ-pı̂ⁿ. Hit-tia̍p goá ê sim siū kám-hoà, ba̍k-chiu lâu ba̍k-sái, koh kóng, Chú--ah, goá ê choē kàu chiah tāng, chin-chiàⁿ kam-goān kiù goá mah?
Hit-tia̍p Chú kóng, Beh--ah. “Kı̀ⁿ ū oá goá--ê, goá lóng bô beh pàng hiat-kak--i.” Goá chiū kóng, Goá ài kūn lí, tio̍h cháiⁿ-iūⁿ chiah bô chhò? Chú ū kóng, “Ki-tok Iâ-so͘ kàu sè-kan, sı̄ ài beh kiù ū choē ê lâng.” kı̀ⁿ ū sı̀n-khò--i, oē-tit-thang sià-choē, chheng choè gı̄; i choè tiong-pó éng-éng oa̍h tı̄ thiⁿ--nih thoè lán kı̂-tó. Goá siūⁿ kàu chit kù oē, chiah chai ài beh chheng choè gı̄ tek-khak tio̍h it-ı̀ sı̀n Iâ-so͘, ài tit sio̍k-choē tek-khak tio̍h choan-choan khò i ê huih. Iâ-so͘ thàn Siōng-tè ê lu̍t-hoat, siū-tio̍h lu̍t-hoat ê hêng-hoa̍t, che m̄-sı̄ ūi ka-kı̄ chiah án-ni, sı̄ ūi-tio̍h lâng.
Hit-tia̍p goá chai--kiò che, moá-sim hoaⁿ-hí, lâu ba̍k-sái, sim-koaⁿ chheng-chheng thiàⁿ Iâ-so͘, thiàⁿ i ê peh-sı̀ⁿ, thiàⁿ i ê tō-lí.
Ki-tok-tô͘ kóng, Lí ê sim oē kàu án-ni, chin-chiàⁿ sı̄ Iâ-so͘ kà lí. Iáu lí āu-lâi ê sim sı̄ cháiⁿ-iūⁿ?
Hiân-bōng kóng, Goá hit-tia̍p siū-tio̍h i ê kà-sı̄, chiah chai thong sè-kan ê lâng chiū nā ka-kı̄ kiò choè gı̄, iáu-kú sı̄ ū choē. Goá ia̍h chai Siōng-tè chiū nā ke̍k kong-gı̄, i oē chheng ū choē ê lâng kiò choè gı̄. Goá koh chin kiàn-siàu chêng ê pháiⁿ, goá chiah koat-toàn siūⁿ āu-lâi chı̍t-sı̀-lâng tek-khak beh thàn Kiù-chú.
Hit-tia̍p goá bāng-kı̀ⁿ Hiân-bōng oa̍t-kè-lâi khoàⁿ, khoàⁿ-kı̀ⁿ Bû-ti tùi āu bı̄n lâi, chiū tùi Ki-tok-tô͘ kóng, Lí ū khoàⁿ-kı̀ⁿ hit-ê siàu-liân lâng liâu-liâu thian-thian tùi āu-bı̄n lâi, lı̄ lán joā hn̄g--ah?
Ki-tok-tô͘ kóng, Goá ū khoàⁿ-kı̀ⁿ. I chin m̄-ái kap lán tâng kiâⁿ.
Hiân-bōng kóng, Chāi goá siūⁿ, i nā kap lán saⁿ-kap kiâⁿ, ia̍h bô hāi to̍h-lo̍h.
Ki-tok-tô͘ kóng, Tio̍h--ah, nā-sı̄ i kú m̄.
Hiân-bōng kóng, Liōng i ê ı̀-sù sı̄ án-ni, nā-sı̄ lán tio̍h thèng-hāu i lâi. Nn̄g ê ha̍k-seng chiah thèng-hāu i. Bû-ti ná kiâⁿ ná oá--i. Ki-tok-tô͘ chiah toā siaⁿ kiò kóng, Tio̍h kín-mé lâi, siáⁿ-sū chiah chhiân?
Bû-ti kóng, Goá ài ka-kı̄ kiâⁿ, m̄-ài kap lâng saⁿ-kap kiâⁿ.
Hit-tia̍p Ki-tok-tô͘ soè siaⁿ kā Hiân-bōng kóng, Goá kám bô kā lí kóng, i m̄-ài kap lán saⁿ-kap kiâⁿ? Nā-sı̄ chit--nı̍h chin chēng-chauh, tio̍h kap i kiâⁿ khah hó. Hiân-bōng chiah kā Bû-ti kóng, Lí chiah kú hó mah? Lí sı̀n Siōng-tè, lí ê ı̀-sù cháiⁿ-iūⁿ?
Bû-ti kóng, Goá siūⁿ lóng tio̍h. Goá teh kiâⁿ lō͘, éng-éng ū hó ê liām-thâu ka-kı̄ an-ùi.
Ki-tok-tô͘ kóng, Ū sím-mı̍h hó ê liām-thâu, chhiáⁿ lí kā goá kóng.
Bû-ti kóng, Goá chiū-sı̄ liām-tio̍h kàu Siōng-tè, liām-tio̍h thian-tông.
Ki-tok-tô͘ kóng, Mô͘-kúi kap chiah-ê tı̂m-lûn--ê, kú ia̍h ū chit-hō ê liām-thâu.
Bû-ti kóng, Goá m̄-nā sı̄ chheng-chheng liām, kú ia̍h ài tit-tio̍h.
Ki-tok-tô͘ kóng, Ū choē-choē lâng ài tit-tio̍h che, soah-bé kú boē tit-tio̍h. Sèng-chheh ū kóng, “Kı̀ⁿ ū lán-tō--ê, sim-koaⁿ ài tit-tio̍h, kàu bé lóng bô.”
Bû-ti kóng, Goá m̄-nā liām, koh ūi-tio̍h i chiong só͘ ū ê mı̍h lóng pàng hiat-ka̍k.
Ki-tok-tô͘ kóng, Lí káⁿ bē pit-jiân sı̄ chiong só͘ ū ê mı̍h lóng pàng hiat-ka̍k, lâng choē-choē kóng che sı̄ khoài, sı̍t-chāi kú put-chí oh. Lí kóng ūi-tio̍h Siōng-tè, ūi-tio̍h thian-tông, chiah pàng hiat-ka̍k chiah-ê mı̍h, ū sím-mı̍h pı̂n-kù?
Bû-ti kóng, Ū; goá ê sim thang choè pı̂n-kù.
Ki-tok-tô͘ kóng, Só͘-lô-bûn kóng, “Ka-kı̄ khò i ê sim--ê, sı̄ gōng.”
Bû-ti kóng, Só͘-lô-bûn che oē sı̄ chí pháiⁿ sim--ê kóng, goá ê sim kú hó.
Ki-tok-tô͘ kóng, Ū sím-mı̍h pı̂n-kù?
Bû-ti kóng, in-ūi goá ê sim-koaⁿ ǹg-bāng thian-tông, éng-éng an-ùi.
Ki-tok-tô͘ kóng, Che kiám-chhái sı̄ lí ê sim ka-kı̄ phiàn. Goá teh siūⁿ, éng-éng ū chit-hō lâng bô sím-mı̍h thang ǹg-bāng, sim oa̍h ka-kı̄ kiò choè hoaⁿ-hí.
Bû-ti kóng, Goá m̄-sı̄ khang-khang hoaⁿ-hí, goá sim-koaⁿ siūⁿ kàu chia, chiū kiâⁿ kàu hia.
Ki-tok-tô͘ kóng, Lí thái-thó oē chai án-ni?
Bû-ti kóng, Goá ê sim-koaⁿ ka-kı̄ chai.
