Ki-tok-tô͘ kóng, Haih! Che tek-khak sı̄ chiong chha̍t lâi kan-chèng, chha̍t hoán-tńg ka-kı̄ kóng, i m̄-sı̄ án-ni, iáu lóng bô pa̍t mı̍h kan-chèng lí sı̄ án-ni, iáu lóng bô pa̍t mı̍h kan-chèng thang pı̂n-tit.
Bû-ti kóng, Sim-koaⁿ siⁿ-khí hó ê liām-thâu, kám m̄-sı̄ hó sim; lâng ê só͘ kiâⁿ nā thàn Siōng-tè ê kài-lu̍t, kám m̄-sı̄ hó phín-hēng?
Ki-tok-tô͘ kóng, Sim-koaⁿ siⁿ-khí hó ê liām-thâu, sı̍t-chāi ia̍h sı̄ hó sim, thàn Siōng-tè ê kài-lu̍t lâi kiâⁿ, chin-chiàⁿ ia̍h sı̄ hó phín-hēng, nā-sı̄ ka-kı̄ lia̍h choè án-ni, káⁿ bē pit-jiân ū án-ni.
Bû-ti kóng, Chāi lí ê ı̀-sù hó ê liām-thâu tio̍h cháiⁿ-iūⁿ, thàn Siōng-tè ê kài-lu̍t khı̀ kiâⁿ, iū tio̍h cháiⁿ-iūⁿ? Goá ài lí siông-sè kā goá kóng.
Ki-tok-tô͘ kóng, Hó ê liām-thâu ū kúi-nā hāng, ū liām-tio̍h kàu pún-sin, liām-tio̍h kàu Siōng-tè, liām-tio̍h kàu Iâ-so͘, iáu ū liām-tio̍h kàu chhı̀n-chhái hāng.
Bû-ti kóng, Liām-tio̍h kàu pún-sin, cháiⁿ-iūⁿ kóng--kiò sı̄ hó?
Ki-tok-tô͘ kóng, Nā ha̍h Siōng-tè ê tō-lí, chiū-sı̄ hó.
Bû-ti kóng, Liām-tio̍h kàu pún-sin. Cháiⁿ-iūⁿ kóng--kiò sı̄ ha̍h Siōng-tè ê tō-lí?
Ki-tok-tô͘ kóng, Siōng-tè kóng--kiò lán tio̍h án-ni, lán ia̍h siūⁿ--kiò tio̍h án-ni, chiū-sı̄ ha̍h Siōng-tè ê tō-lí. Taⁿ goá beh kóng khah siông-sè. Sèng-chheh ū kóng, “Bô chı̍t-ê sı̄ gı̄, bô chı̍t-ê hó phín-hēng”; koh kóng, “Lâng ê sim só͘ kè-bô͘, éng-éng sı̄ khǹg pháiⁿ ê liām-thâu nā-tiāⁿ.” koh kóng, “Lâng ê sim tùi soè-hàn hit-tia̍p, chiū khǹg pháiⁿ ê liām-thâu.” Chāi goá siūⁿ ia̍h sı̄ án-ni, liām-tio̍h kàu goá ia̍h sı̄ án-ni. Goá nā oē liām kàu án-ni chiū-sı̄ hó, in-ūi ha̍h Siōng-tè ê tō-lí.
Bû-ti kóng, Sim-koaⁿ ū kàu hiah pháiⁿ, goá lóng m̄ sı̀n.
Ki-tok-tô͘ kóng, Lí nā-sı̄ án-ni, sı̄ chı̍t-sı̀-lâng bē bat liām-tio̍h kàu hó ê oh. Goá kā lí kóng, Siōng-tè kóng--kiò lán ê sim-koaⁿ sı̄ cháiⁿ-iūⁿ, koh kóng, lán ê phín-hēng sı̄ cháiⁿ-iūⁿ, lán ê sim nā kap i saⁿ-ha̍h, chiū-sı̄ hó.
Bû-ti kóng, Lí kóng cheh ı̀-sù, chhiáⁿ lí kā goá kóng khah siông-sè.
Ki-tok-tô͘ kóng, Sèng-chheh ū kóng, lâng ê só͘ kiâⁿ oan-khiau bô tı̍t, m̄-hó koah koāi-phiah; koh kóng, pún-jiân m̄-tı̍h chèng-keng tō-lí, koah m̄-bat. Lâng nā kam-goān jı̄n án-ni, chiū-sı̄ hó, sı̄ in-ūi ha̍h Siōng-tè ê tō-lí.
Bû-ti kóng, Liām-tio̍h kàu Siōng-tè ūi-tio̍h cháiⁿ-iūⁿ?
Ki-tok-tô͘ kóng, Nā-sı̄ ha̍h Sèng-chheh só͘ kóng, chiū-sı̄ hó. Siōng-tè cháiⁿ-iūⁿ. Sèng-chheh lóng ū kı̀-chài, goá kóng boē liáu. Taⁿ beh kóng chı̍t hāng, chiū-sı̄ goá ê choè lâng, Siōng-tè chin chai; goá ū choē, ka-kı̄ m̄-chai, koh goá sim-lāi àm-chin ê liām-thâu, Siōng-tè lóng bêng-pe̍k; koh i khoàⁿ lán ê gı̄ chhin-chhiūⁿ chhàu-bı̄ chı̍t-poaⁿ-iūⁿ; goá nā khò goá ê gı̄ kūn i, Siōng-tè tek-khak m̄ iông-ún goá.
Bû-ti chiū kóng, Lí siáⁿ-sū khoàⁿ goá chhin-chhiūⁿ gōng? Goá kám ū siūⁿ Siōng-tè ê só͘ chai boē khah-iâⁿ goá? Kám ū siūⁿ-kiò goá káⁿ khò ka-kı̄ ê hó lâi oá Siōng-tè mah?
Ki-tok-tô͘ kóng, Taⁿ lí án-ni, lí ê ı̀-sù sı̄ cháiⁿ-iūⁿ?
Bû-ti kóng, Tāi-lio̍h lâi kóng, goá chai--kiò tek-khak tio̍h sı̀n Iâ-so͘ chiah oē chheng choè gı̄.
Ki-tok-tô͘ kóng, Haih! í-keng ka-kı̄ m̄-chai choē, siáⁿ-sū koh kóng sı̀n Iâ-so͘? Lí ka-kı̄ siūⁿ--kiò pún-jiân lóng bô choē, só͘ kiâⁿ lóng bô pháiⁿ, chāi lí pún-sin ka-kı̄ khoàⁿ, lóng m̄-sái khò Iâ-so͘ lâi chheng choè gı̄. Lí siáⁿ-sū iáu kóng sı̀n Iâ-so͘?
Bû-ti kóng, Khiok sı̄ án-ni, goá sı̀n ia̍h hó.
Ki-tok-tô͘ kóng, Lí sı̄ cháiⁿ-iūⁿ sı̀n?
Bû-ti kóng, Goá ū sı̀n--kiò Iâ-so͘ thoè ū choē ê lâng sí, goá koh sı̀n-kiò Siōng-tè khoàⁿ goá ū thàn i ê lu̍t-hoat, beh sià goá ê choē, kiò goá choè gı̄. Goá kiám-chhái beh khah siông-sè kóng; Siōng-tè ū hoaⁿ-hí goá ū thàn i ê lu̍t-hoat, lóng sı̄ in-ūi Iâ-so͘ ê kong-lô chiah ū án-ni khoán-thāi goá.
Ki-tok-tô͘ kóng, Lí án-ni kóng, goá kú beh pok lí. Lí ê sı̀n sı̍t-chāi kap Sèng-chheh ê só͘ kóng, lóng bô hû-ha̍p. Chiàu Sèng-chheh só͘ kóng, lâng oē-tit-thang chheng choè gı̄, sı̄ ūi-tio̍h Iâ-so͘ ê gı̄, sǹg choè sı̄ lán ê, m̄-sı̄ kóng--kiò Siōng-tè hoaⁿ-hí lán ê hó, chheng lán ê choè gı̄. Chiàu lí ê sı̀n, Iâ-so͘ sı̄ chiong lán ê hó chheng choè gı̄, m̄-sı̄ chiong lán pún-sin chheng choè gı̄. Che sı̄ bô ha̍h.
Bû-ti kóng, Haih! lí sı̄ ài goá kan-ta khò Iâ-so͘ ê kong-lô, ka-kı̄ ê hó lóng bô iàu-kín mah? Nā-sı̄ án-ni, sı̄ chhut-chāi lâng lām-sám khı̀ kiâⁿ, lóng thang. Lâng nā-sı̄ chheng-chheng tùi sı̀n oē-tit-thang chheng choè gı̄, lóng m̄-sı̄ lı̂-lı̂-á khò ka-kı̄ ê hó, i nā kiâⁿ pháiⁿ, sı̄ bô iàu-kín mah?
Ki-tok-tô͘ kóng, Lí miâ choè Bû-ti, kóng oē ia̍h sı̄ bû-ti. Chit-ê sı̀n Iâ-so͘ hō͘ lâng oē-tit-thang chheng choè gı̄, che gı̄ sı̄ cháiⁿ-iūⁿ, lí to boē hiáu-tit. Sı̄ kóng--kiò lâng nā sı̀n i ê gı̄, chiū oē hō͘ lán hoaⁿ-hí hâng-ho̍k Siōng-tè, chiū thiàⁿ Iâ-so͘, chiū him-bō͘ i ê tō-lí, chiū thàiⁿ i ê peh-sı̀ⁿ, kám iáu-kú ū lām-sám kiâⁿ chhin-chhiūⁿ lí chit-hō bû-ti ê só͘ siūⁿ mah?
Hit-tia̍p Hiân-bōng tùi Ki-tok-tô͘ kóng, Án-hiaⁿ, lí tio̍h mn̄g--i, khoàⁿ Thiⁿ-Pē ū bat ēng Iâ-so͘ lâi kà hō͘ i chai bô?
Bû-ti thiaⁿ-kı̀ⁿ cheh oē, chiū kóng, HaihN! thái-thó ū che--ah? Goá siūⁿ--kiò lín kóng, che tek-khak sı̄ tāi-ke sim-koaⁿ hoat-kông.
Hiân-bōng kóng, Che sı̄ cháiⁿ-á kóng, Iâ-so͘ m̄-sı̄ pún-jiân lâng só͘ oē khoàⁿ-kı̀ⁿ, nā bô Thiⁿ-Pē ēng i lâi kà lâng chai, lâng sı̄ lóng m̄-bat--i.
Bû-ti chiū kóng, Lí sı̀n kàu án-ni, goá kú m̄-sı̄ án-ni. Lí choē-choē lām-sám siūⁿ, goá khiok m̄ ta̍h-tio̍h lí, nā-sı̄ goá ê só͘ sı̀n kú ia̍h tio̍h.
Ki-tok-tô͘ kóng, Lí tio̍h hō͘ goá kóng chı̍t kù oē. Chí chit hāng ê tāi-chı̀, lí kú m̄-thang chhı̀n-chhái kóng. Goá ê hó pêng-iú Hiân-bōng ū kóng, goá káⁿ choè kan-chèng, sı̄ kóng-kiò nā m̄-sı̄ ēng Ki-tok lâi kà lâng chai, lâng thái-thó oē bat i? Lâng ēng sı̀n lâi chih-chiap Iâ-so͘, chit-ê sı̀n chiū-sı̄ Siōng-tè ke̍k toā ê khùi-la̍t, hō͘ lâng ê sim siⁿ-khí-lâi. Nā-sı̄ ū án-ni, lí to m̄-chai; lí chiah tio̍h kín-kín chhíⁿ-gō͘, siūⁿ-tio̍h ka-kı̄ ū hiám, cháu khı̀ kūn Chú Iâ-so͘. Cheh Iâ-so͘ chiū-sı̄ Siōng-tè, i ê gı̄ chiū-sı̄ Siōng-tè ê gı̄, nā khò i ê gı̄, chiah oē-tit-thang bô choē.
Bû-ti chiū kóng, Lí kiâⁿ chin kín, goá boē kham-tit kap lí saⁿ-kap kiâⁿ. Lí thang tāi-seng kiâⁿ, goá beh tè lí ka-chiah-āu khı̀. Nn̄g ê ha̍k-seng chiū gím-si kóng,
Bû-ti sim-koaⁿ lóng bô kiaⁿ,
Chèng-keng tō-lí i m̄ thiaⁿ;
Oá-khò ka-kı̄ kiâⁿ kong-lô,
M̄-chai poē Chú oē phah bô.
Lūn kàu che choē tio̍h cháiⁿ-iūⁿ?
Beh chiūⁿ thian-tông m̄-sái siūⁿ;
Kín-kín khı̀ siâ lâi kui chèng,
Chiah bián āu-lâi pháiⁿ pò-èng.
Hit-tia̍p Ki-tok-tô͘ ū tùi Hiân-bōng kóng, i ê khoán3-sit án-ni, lán tio̍h koh ka-kı̄ kiâⁿ.
Nn̄g ê ha̍k-seng tùi chia chiū kín-kín chı̀n-chêng kiâⁿ. Bû-ti ia̍h tè in āu-bı̄n lâi. Hit-tia̍p Ki-tok-tô͘ kóng, Khó-sioh chit-ê lâng lō͘-bé tek-khah m̄-hó.
Hiân-bōng kóng, Khó͘--ah! lán siâⁿ--nı̍h ê lâng choē-choē ū chhin-chhiūⁿ chit-hō. Put-lūn sı̄ thong ke, thong hiuⁿ-lí, miâ khiok kóng--kiò sı̄ sèng ê ha̍k-seng, ia̍h lóng-chóng sı̄ án-ni. Lán ê siâⁿ--nı̍h iáu-kú to sı̄ choē-choē án-ni, bô kóng--kiò Bû-ti ê pún-hiuⁿ kám m̄-sı̄ án-ni mah?
Ki-tok-tô͘ chiū kóng, Sèng-chheh ū kóng, ‘Siōng-tè chhut-chāi i ba̍k-chiu chhiⁿ-mı̂ boē bêng, hı̄-khang chhàu-hı̄-lâng boē lāi.’ Taⁿ siūⁿ--kiò chit ê lâng sı̄ cháiⁿ-iūⁿ? I kám bô sı̂ lio̍h-á chai choē, chai--kiò i ka-kı̄ ū hiám mah?
Hiân-bōng kóng, Án-hiaⁿ lí pí goá khah liân-tióng, thang ka-kı̄ kóng.
Ki-tok-tô͘ kóng, Lí nā m̄ kóng, chiàu goá ê ı̀-sù, chit-hō lâng liōng káⁿ ia̍h ū sı̂-chūn oē chai choē. Nā-sı̄ i pêng-sò͘ pún-jiân Bû-ti, lóng m̄-chai ka-kı̄ hoán-hoé choē sı̄ hó, chiah bô beh hoán-hoé choē, iû-goân khı̀ lām-sám kiâⁿ.
Hiân-bōng kóng, Chāi goá ê ı̀-sù, ia̍h chhin-chhiūⁿ án-hiaⁿ lí ê só͘ kóng, sı̄ lâng oē hoán-hoé choē chin ū lō͘-ēng, thang hō͘ i khí-thâu kiâⁿ thiⁿ-lō͘, sim-koaⁿ sı̀-chiàⁿ m̄-sái oai.
Ki-tok-tô͘ kóng, Lâng oē án-ni kiaⁿ-hiâⁿ, chin toā lō͘-ēng to tio̍h, Sèng-chheh ū kóng ‘Kèng-ùi Siōng-tè chiū-sı̄ tı̀-hūi ê khí-thâu.’ Tàu-tí kiaⁿ-hiâⁿ tio̍h tú-hó.
Hiân-bōng kóng, Tú-hó ê kiaⁿ-hiâⁿ sı̄ cháiⁿ-á kóng?
Ki-tok-tô͘ kóng, Tú-hó ê kiaⁿ-hiâⁿ ū saⁿ hāng thang kóng. Tē it hāng, khí-thâu tio̍h hoán-hoé choē. Tē-jı̄ hāng, lán ài oē-tit-thang kiù, tio̍h choan-sim khò Iâ-so͘. Tē saⁿ hāng, lán tio̍h soè-jı̄ thàn Siōng-tè ê tō-lí, kui êng-kng Siōng-tè, m̄-thang lı̂-á ûi-ke̍h--i, tı̀-kàu hō͘ lán ê sim-koaⁿ bô pêng-an.
Hiân-bōng kóng, Án-hiaⁿ lí ê só͘ kóng chin-chiàⁿ tio̍h, chóng-sı̄ chit-ê bê-khı̀ ê só͘-chāi, lán taⁿ kiâⁿ thàng á bē?
Ki-tok-tô͘ kóng, Án-hiaⁿ lí siáⁿ-sū mn̄g che? sı̄ m̄-ài kóng cheh tāi-chı̀ mah?
Hiân-bōng kóng, M̄-sı̄, goá sı̄ ài chai taⁿ kiâⁿ thàng, iá bē thàng.
Ki-tok-tô͘ kóng, Koh kiâⁿ la̍k, chhit lí chiū thàng. Nā-sı̄ lán tio̍h koh chiong chêng ê oē lâi kóng. Cheh hoán-hoé choē, kiaⁿ-hiâⁿ ê tāi-chı̀, Bû-ti hit-hō chin-chiàⁿ sı̄ m̄-chai ū lō͘-ēng, chiah m̄-ài ēng sim siūⁿ.
Hiân-bōng kóng, i sím-mı̍h tāi-chı̀ m̄-ài siūⁿ?
Ki-tok-tô͘ kóng, Ū saⁿ, sı̀ hāng. Tē it hāng, hoán-hoé choē kiaⁿ-hiâⁿ, che sı̍t-chāi sı̄ Siōng-tè hō͘ i án-ni, i siūⁿ--kiò che sı̄ mô͘-kúi, kiaⁿ-liáu hō͘ i hāi, chiah bô beh tı̍h--i. Tē-jı̄ hāng, i kóng kiaⁿ-liáu sı̀n Chú ê sim hō͘ kiaⁿ-hiâⁿ hāi, chiah chı̄n-la̍t at-chí, nā-sı̄ i ka-kı̄ kóng ū sı̀n lı̍p-sı̍t kú bô. Tē saⁿ hāng, i kóng sı̄ i ê pún-hūn, tio̍h m̄-thang kiaⁿ, chiah sim-lāi kiám-chhái pō͘-pı̂n ū kiaⁿ, i iû-goân m̄ kiaⁿ. Tē sı̀ hāng, i chai--kiò hoán-hoé choē, kiaⁿ-hiâⁿ sı̄ boē, iáu-kú thang ka-kı̄ khò choè ū gâu, chiah chı̄n-sim m̄-tı̍h chit-ê kiaⁿ-hiâⁿ.
Hiân-bōng kóng, Cheh khoán-sit goá phó͘-phó͘ chai. Chêng goá m̄-chai, hit-tia̍p ia̍h chhin-chhiūⁿ án-ni.
Ki-tok-tô͘ kóng, Lán taⁿ tio̍h pàng hiat-ka̍k Bû-ti, lēng-goā lâi kóng iú-ek ê tāi-chı̀.
Hiân-bōng kóng, Hó, án-hiaⁿ lí tio̍h tāi-seng kóng.
Ki-tok-tô͘ chiū kóng, Cha̍p-nı̂ chêng lín siâⁿ--nı̍h ū chı̍t-lâng, thàn chin tō-lí hit-tia̍p, chhut-la̍t tàu saⁿ-chiⁿ tāi-seng kiâⁿ, i ê miâ kiò Chiām-sı̀n , lí bat i mah?
Hiân-bōng kóng, Ū, goá bat--i. I chêng khiā Choa̍t-un hiuⁿ, lı̄ Sı̀n-sı̍t la̍k, chhit lí, kap Hoán-kū choè keh-piah .
Ki-tok-tô͘ kóng, Tio̍h, Cheh lâng chhíⁿ-gō͘ hit-tia̍p, goá kā i siūⁿ, i sı̍t-chāi sı̄ ka-kı̄ chai choē, soà chai choē ê pò-èng.
Hiân-bōng kóng, Goá liōng ia̍h sı̄ án-ni. i ê chhù lı̄ goá hia lím-lím-á chiâⁿ phò͘ lō͘, éng-éng lâi kı̀ⁿ goá. Hit-tia̍p sim-koaⁿ hiáu-ngō͘ lâu ba̍k-sái, goá chin khó-lı̂n--i, ǹg-bāng i thang choè hó. Nā-sı̄ khoàⁿ kàu āu-lâi, i sı̄ khang-khang kóng, Chú--ah! Chú--ah!
Ki-tok-tô͘ kóng, i bat chı̍t pái kā goá kóng, beh kiâⁿ thiⁿ-lō͘, i ê ı̀-sù koat-toàn. Āu-lâi pō͘-pı̂n kau-tio̍h chit-ê Sek-sin , tùi chia chiū kap goá bô chhin-jia̍t.
Hiân-bōng kóng, Goá taⁿ kóng kàu chit-ê lâng, tio̍h lio̍h-á kā i sím-sı̍t, khoàⁿ i siáⁿ-sū chiām-chiām lı̄ chin-lí.
Ki-tok-tô͘ kóng, Ēng che lâi kóng, chin-chiàⁿ iú-ek, lí tio̍h tāi-seng kóng.
Hiân-bōng kóng, Oē choè-tit. Chāi goá siūⁿ ū sı̀ hāng. Tē it hāng, chit-hō khiok ū chai choē, nā-sı̄ i ê sim iû-goân iáu-bē koé, hoán-hoé choē ná kú ná léng, ho̍k-sāi Siōng-tè ia̍h ná kú ná-bô jia̍t, iû-goân kiâⁿ i kū ê khoán-sit. Tē jı̄ hāng, i chai choē, kiaⁿ sı̄ siuⁿ kè-thâu; chhin-chhiūⁿ Sèng-chheh ū kóng, ‘Kiaⁿ-lâng ê sim-koaⁿ tiong-ng ū hām-khiⁿ.’ I chit-hō chai kiò tē-ge̍k thang kiaⁿ, khiok ia̍h pek-chhiat beh kiû kiù, nā-sı̄ kiaⁿ-hiâⁿ lio̍h-á pàng láng-sang, liâm-piⁿ chiū khǹg pa̍t mı̍h ı̀-sù, kóng thàn chin-lí, che sı̄ bô lâng khoàⁿ-kı̀ⁿ, siáⁿ-sū kàu chiah bô tı̀-sek, lêng-khó͘ tio̍h koh thàn sè-sio̍k. Tē saⁿ hāng, I ê sim-koaⁿ iû-goân sı̄ chin kiau, siūⁿ--kiò lı̄ sè-sio̍k lâi thàn chin-lí, chám-jiân kiàn-siàu, chiah kiaⁿ lo̍h tē-ge̍k ê sim chiām-chiām siau--khı̀, liâm-piⁿ koh kiâⁿ i kū ê khoán-sit. Tē sı̀ hāng, hoán-hoé choē kiaⁿ, i chin m̄-ài tit, ia̍h m̄-ài siūⁿ pa̍t jı̍t ê kan-khó͘, chiah chiām-chiām bô siūⁿ-tio̍h kàu Siōng-tè ê siū-khı̀, liâm-piⁿ pàng hiah-ka̍k chèng-keng lō͘.
Ki-tok-tô͘ kóng, Án-hiaⁿ lí só͘ kóng ia̍h tio̍h.Goá sím-sı̍t i ê sim, goá khoàⁿ i ê sim chin-chiàⁿ bē oāⁿ sin. I sı̄ chhin-chhiūⁿ hoān choē kàu koaⁿ-hú ê bı̄n-chêng, kiaⁿ kàu boē kò͘-tit i ê khoán-sit chhin-chhiūⁿ thòng-hūn chêng ê pháiⁿ, khah thêng nā pàng i khı̀, i iû-goân sı̄ bô kiaⁿ, khı̀ kiâⁿ pháiⁿ.
Hiân-bōng kóng, Chiām-sı̀n m̄-tı̍h chin ê tō-lí, goá í-keng ū kóng i ê in-toaⁿ, nā-sı̄ i cháiⁿ-iūⁿ m̄-tı̍h, chhiáⁿ án-hiaⁿ lí kóng?
Ki-tok-tô͘ kóng, Goá chin hoaⁿ-hí kóng. Chit hō m̄-tı̍h chèng-keng lō͘, i lóng bô siàu-liām Siōng-tè, ia̍h bô siūⁿ--tio̍h kàu sí, ia̍h bô siūⁿ--tio̍h kàu sím-mn̄g hit-jı̍t. I ia̍h bô sai-khia ka-kı̄ kı̂-tó at-chí su-io̍k, chhíⁿ-gō͘, hoán-hoé i ê choē, chiah-ê. Tùi chia i ia̍h m̄ kap sèng-tô͘ kau-poê, sèng-tô͘ ū kong-sū kiám-chhái tio̍h kàu hoē-tn̂g thiaⁿ tō-lí, kiám-chhái tio̍h saⁿ-kap kàu-khàm Sèng-chheh, kiám-chhái tio̍h tāi-ke gı̄-lūn thiⁿ ê tāi-chı̀, i ê sim-koaⁿ lóng m̄-ài-tit. Hit-tia̍p koh àm-chin khioh khoán sèng-tô͘ ê m̄-tio̍h, ài beh ká-chià che lâi m̄-tı̍h chin ê tō-lí. Koh nā kap húi-lūi kiat pêng-iú, soà kap i kóng m̄ chèng-keng oē. Kiám-chhái nā khoàⁿ-kı̀ⁿ hó lâng, bô tiuⁿ-tı̂ ū pháiⁿ, i chiū hoaⁿ-hí. Tùi chia ná hó-táⁿ, káⁿ hián-jiân kiâⁿ pháiⁿ, kàu bé sı̄ oē ûn-ûn-á lo̍h tē-ge̍k.
Goá bāng-kı̀ⁿ nn̄g ê ha̍k-seng chit-tia̍p kiâⁿ kè hit-ê Bê-khı̀ toē, tú-tú-á jı̍p Chhù-tē , toē-khı̀ chin hó, beh khı̀ thiⁿ-siâⁿ, lō͘ tio̍h tùi chia khı̀. Nn̄g ê ha̍k-seng kàu chia chin khoàⁿ-oa̍h. Hit-tia̍p ū thiaⁿ-kı̀ⁿ pah iūⁿ ê chiáu-á put-sı̂ teh hàu, ta̍k jı̍t ū khoàⁿ-kı̀ⁿ mı̍h-á hoe ta̍k só͘-chāi ū, koh ū thiaⁿ-kı̀ⁿ ka-chui siaⁿ. Hit-nı̍h ū jı̍t, bô mı̂. Kàu chia ū hn̄g-hn̄g keh Sí-ı̀m ê soaⁿ-kha, sı̄ Choa̍t-bōng boē kàu ê só͘-chāi, ia̍h boē khoàⁿ-kı̀ⁿ Gı̂-chē. Koh kàu chia chiū oē khoàⁿ-kı̀ⁿ thiⁿ-siâⁿ. Siâⁿ--nih ê peh-sı̀ⁿ ū chhut-lâi chih-chiap--i, sı̄ chit só͘-chāi kūn thiⁿ, i chiah ū chhut-lâi chia kiâⁿ-niâ--teh. Che chiū-sı̄ Kiáⁿ-sài kap Sin-niû ū tùi chia têng-thâu iok, koh chhin-chhiūⁿ kiáⁿ-sài hoaⁿ-hí sin-niû, chiū-sı̄ Siōng-tè hoaⁿ-hí i ê peh-sı̀ⁿ.Chit-nı̍h chúi kap gō͘-kak lóng kàu-gia̍h, koh chı̍t-lō͘ ài tit-tio̍h ê mı̍h, kàu chia tit-tio̍h chin choē. Í-keng kàu chia, koh thiaⁿ-kı̀ⁿ tùi thiⁿ-siâⁿ ū siaⁿ lâi, toā siaⁿ kiò kóng, “Tio̍h khoàⁿ lí ê Kiù-chú beh kàu, lí ê siúⁿ-sù ia̍h lâi”; chit-nı̍h ê peh-sı̀ⁿ koh chheng nn̄g ê ha̍k-seng “Choè sèng peh-sı̀ⁿ, hō͘ Chú sio̍k-choē ê lâng”.
Hit-tia̍p nn̄g ê ha̍k-seng kiâⁿ kàu chia, oē-tit-thang kūn thiⁿ-siâⁿ, in sim-koaⁿ ná hoaⁿ-hí.Hit-tia̍p thiⁿ-siâⁿ ná kūn-oá, khoàⁿ ná bêng. Siâⁿ lóng sı̄ chin-chu pó-chio̍h khí--ê; koe-lō͘ lóng sı̄ n̂g-kim pho͘--ê, siâⁿ--nih ke̍k kng chhiûⁿ. Ki-tok-tô͘ khoàⁿ-kı̀ⁿ che, him-bō͘ kàu pı̄ⁿ. Hiân-bōng ia̍h sı̄ án-ni, chiah tiàm chia ū tiap-á-kú, toā siaⁿ kiò kóng, “Kı̀ⁿ ū khoàⁿ-kı̀ⁿ goá só͘ thiàⁿ--ê, tio̍h kā i kóng, goá thiàⁿ kàu ū pı̄ⁿ”.
Āu-lâi nn̄g ê ha̍k-seng khùi-la̍t lio̍h-á khah ióng, chiū koh chı̀n-chêng kiâⁿ, ná kiâⁿ ná oá.Koh khoàⁿ-kı̀ⁿ chit-nı̍h ū pah ké-chí ê hn̂g, mn̂g thàng thiⁿ-lō͘. Nn̄g ê ha̍k-seng kàu chia, khoàⁿ-kı̀ⁿ hn̂g-teng khiā hí lō͘-piⁿ, ū mn̄g i kóng, Chit-ê hoe-hn̂g chı̄-chūi ê? Hn̂g-teng kóng, Che sı̄ thiⁿ Chú ê. I beh ēng che ka-kı̄ hoaⁿ-hí, ia̍h beh hō͘ kiâⁿ thiⁿ-lō͘ ê hoaⁿ-hí.
Hn̂g-teng chiah chhoā in jı̍p-khı̀, chhiáⁿ in chia̍h ké-chí, lâi pó͘ khùi-la̍t, koh ēng Chú só͘ hoaⁿ-hí ê só͘-chāi, kóng hō͘ in khoàⁿ.
Nn̄g ê ha̍k-seng chiām-sı̂ tiàm chia an-ún teh khùn.
Goá bāng-kı̀ⁿ nn̄g ê ha̍k-seng hit-tia̍p teh khùn, ū kóng oē choē-choē. Goá tú-á teh kı̂-koài, hn̂g-teng ū kā goá kóng, Lí mı̍h-sái kı̂-koài, che hn̂g--nih ê phû-tô chia̍h liáu chin koáⁿ-âu, hō͘ chia̍h ê teh khùn oē kóng oē.
Hit-tia̍p goá khoàⁿ-kı̀ⁿ nn̄g ê ha̍k-seng khùn chhíⁿ, liâm-piⁿ ka-kı̄ hâ io, beh tùi thiⁿ-siâⁿ chiūⁿ khı̀, nā-sı̄ siâⁿ-nı̍h ê kng tı̍t-tı̍t sih i ê ba̍k-chiu, nn̄g ê ha̍k-seng boē-tit-thang tēng-chin khoàⁿ-kı̀ⁿ. Hit-tia̍p ū kap nn̄g ê lâng saⁿ-chhiáⁿ, in ê saⁿ ū chhin-chhiūⁿ kim ê kng, in ê bı̄n ê kng ná jı̍t.
Mn̄g nn̄g ê ha̍k-seng tùi to̍h-lo̍h lâi, koh mn̄g in lō͘-nı̍h hioh to̍h-lo̍h, ū sím-mı̍h kan-khó͘, ū sím-mı̍h khoàⁿ-oa̍h? Nn̄g ê ha̍k-seng chiū ta̍k-hāng kā in kóng. Hit-tia̍p nn̄g lâng chiū kóng, Lín iáu-kú tio̍h ū nn̄g hāng ê kan-khó͘, chiah oē-tit-thang jı̍p siâⁿ.
Hit-tia̍p nn̄g ê ha̍k-seng chhiáⁿ in saⁿ-kap kiâⁿ, nn̄g lâng kóng, Hó, nā-sı̄ lín tio̍h ēng sı̀n chiah oē jı̍p siâⁿ. Tāi-ke chiū saⁿ-kap kiâⁿ, teh kiâⁿ ū khoàⁿ-kı̀ⁿ siâⁿ mn̂g í-keng kūn. Goá khoàⁿ-kı̀ⁿ nn̄g ê ha̍k-seng kap siâⁿ-mn̂g chiông-tiong ū keh chı̍t-ê hô, i ê miâ chiū-sı̄ Sú . Bô kiô, hô iū ke̍k chhim. Nn̄g ê ha̍k-seng khoàⁿ liáu chin kiaⁿ, ài beh tò-thè. Nn̄g lâng chiū kóng, Nā m̄ kè chit-ê hô, kú boē-tit-thang kàu siâⁿ-mn̂g.
