Nn̄g ê ha̍k-seng mn̄g in kóng, iáu kám bô pa̍t tiâu lō͘ thang jı̍p?
Nn̄g lâng kóng, Ū, nā-sı̄ Í-lo̍k, Í-lı̄-a í-goā, tùi khui thiⁿ toē kàu taⁿ, iáu-bē ún lâng kiâⁿ, chiū kàu lō͘-bé jı̍t, hō-thâu tân hit-tia̍p, ia̍h bô lâng kiâⁿ.
Ki-tok-tô͘ sim chiū hoân-ló, Hiân-bōng ia̍h sı̄ án-ni. Siang-pêng sı̀-ûi teh khoàⁿ, lóng bô pa̍t-hāng kè-tı̀ thang m̄-sái tùi chit-ê hô kè-khı̀.Hit-tia̍p chiū mn̄g N̄g lâng kóng, Hô chúi ta̍k só͘-chāi lóng sı̄ chhim mah?
Nn̄g lâng kóng, Khiok bô, chóng-sı̄ kàu chia goán boē chān lín. Tio̍h khoàⁿ lín ê sı̀n sı̄ toā, sı̄ soè, chiah oē chai chit-ê hô ê chhim, khín.
Nn̄g ê ha̍k-seng chiū tùi hô-nih khı̀, Ki-tok-tô͘ chı̍t-ē jı̍p-khı̀, ûn-ûn-á tı̂m lo̍h-khı̀, toā siaⁿ-âu Hiân-bōng kóng, Goá tı̂m hí chhim chúi--nı̍h, chúi ê toā éng lóng im goá ê thâu-khak.
Hiân-bōng kóng, Án-hiaⁿ lí m̄-sái kiaⁿ, goá ū ta̍h-tio̍h i ê toé, chai--kiò ū sı̍t-toē.
Ki-tok-tô͘ kóng, “Sí kap hoân-ló tı̂ⁿ goá, lâu leng lâu bı̍t ê só͘-chāi, goá tek-khak boē-tit-thang khoàⁿ-kı̀ⁿ.” Hit-tia̍p o͘-àm kap kiaⁿ-hiâⁿ lóng kàu Ki-tok-tô͘, i peh chiūⁿ-lâi hit-tia̍p, khoàⁿ lóng boē kı̀ⁿ, chha-put-to put-séng jı̂n-sū; chit lō͘ só͘ tit-tio̍h ê un-tián, an-ùi, lóng boē kı̀-tit. i hit-tia̍p teh kóng, lóng sı̄ kóng hoân-ló kap kiaⁿ-hiâⁿ, kiaⁿ-liáu sí hí hô--nı̍h, boē-tit-thang jı̍p thiⁿ-siâⁿ. Hit-tia̍p siūⁿ--tio̍h kàu chêng ê choē, i ê sim chı̄n-chāi hoân-ló. Hit-tia̍p iā ū kā piⁿ-á ê lâng kóng, kóng--kiò ū Mô͘-kúi lâi tı̂ⁿ--i, chiah kàu chit tia̍p. Hiân-bōng chiū nā chhut-la̍t beh hû--i, ia̍h boē bián-tit i ê thâu-khak boē tı̀m-lo̍h-khı̀, sı̄ i hit-tia̍p-n2 chha-put-to beh sí, pō͘-pı̂n ū hoan--khí-lâi.
Hiân-bōng chiah an-ùi i kóng, Án-hiaⁿ--ah! goá khoàⁿ-kı̀ⁿ hit ê mn̂g, téng-bı̄n ū lâng teh khiā, tit-beh chih-chiap lán.
Ki-tok-tô͘ kóng, i sı̄ chih-chiap lí, m̄-sı̄ beh chih-chiap goá, sı̄ lí kap goá siong-se̍k kàu taⁿ, phín-hēng thang o-ló.
Hiân-bōng kóng, Án-hiaⁿ--ah! lí ê phín-hēng sı̍t-chāi thang o-ló.
Ki-tok-tô͘ kóng, Án-hiaⁿ--ah! goá nā chin-chiàⁿ sı̄ án-ni, Chú taⁿ siáⁿ-sū m̄ kiù goá? I sı̄ khoàⁿ goá ū choē, chiah chhoā goá kàu hí hām-khiⁿ--nı̍h pàng hiat-ka̍k goá.
Hiân-bōng kóng, Sèng-chheh ū kóng, “I sí ê chêng-iû, khoan-iông bô pé-pa̍k, i ê khùi-la̍t iáu ióng, m̄-sı̄ chhin-chhiūⁿ pa̍t lâng ê hoân-ló kiáu-chhá, che sı̍t-chāi sı̄ chí pháiⁿ lâng kóng.” Án-hiaⁿ lí kám boē kı̀-tit mah? Taⁿ án-hiaⁿ lí tùi chúi--nı̍h ū hoân-ló, kan-khó͘. Ēng che choè pı̂n-kù, chin-chiàⁿ m̄-sı̄ Siōng-tè m̄-tı̍h, sı̄ Siōng-tè beh chhı̀ lí, khoàⁿ lí chêng tit-tio̍h i ê un-tián, taⁿ oē kı̀-tit á boē.
Goá hit-tia̍p bāng--nı̍h khoàⁿ-kı̀ⁿ Ki-tok-tô͘ thiaⁿ-kı̀ⁿ che, chı̍t-sı̂ ka-kı̄ teh siūⁿ. Hiân-bōng koh kā i kóng, Án-hiaⁿ lí m̄-sái kiaⁿ, Iâ-so͘ beh kiù lí. Ki-tok-tô͘ chiah toā siaⁿ kiò kóng, Haih--ah! Goá khoàⁿ-kı̀ⁿ Chú ū tùi goá kóng, “Lí thang kè chiah-ê chúi, Goá tek-khak beh kap lí saⁿ-kap kè chiah-ê hô, tek-khak boē im lí.” Nn̄g ê ha̍k-seng ê sim tùi chit-tia̍p lóng án-ni, kàu kè hô chiūⁿ hoāⁿ.
Hit-tia̍p N̄g ê ha̍k-seng peh-chiūⁿ hit pêng hoāⁿ, hit-nı̍h ū N̄g lâng chhēng chı̄n-chāi kng ê saⁿ teh thèng-hāu, beh chih-chiap in. Kàu in hia, N̄g lâng ū kā in kóng, Goán sı̄ chhe-ēng ê sı̍t, thoè tit-beh tit-tio̍h kiù ê lâng, hō͘ i thang chhe-ēng, soà thang ho̍k-sāi i; chiah saⁿ-kap kiâⁿ, ûn-ûn-á tùi siâⁿ-mn̂g khı̀. Chit ê siâⁿ sı̄ khí tı̄ hit-ê koâiⁿ soaⁿ-téng. Nn̄g ê ha̍k-seng peh-chiūⁿ hia, sı̄ ū N̄g lâng khan--i, chiah peh chin khoài. Hit-tia̍p kap N̄g ê lâng teh kóng oē chMn7 hoaⁿ-hí, sı̄ in-ūi kè hô lóng bô hāi, koh sı̄ in-ūi ū chı̍t-N̄g lâng thang saⁿ-sàng. In hit-tia̍p teh kóng, lóng sı̄ kóng thiⁿ-siâⁿ ê êng-kng. Hí N̄g lâng ū kóng thiⁿ-siâⁿ ê êng-kng, sı̄ kóng lóng boē liáu. In koh kóng, “Hit--nı̍h ū Sûn-soaⁿ, thiⁿ-téng ê Iâ-lō͘-sat-léng, thiⁿ-sài choè chı̍t tui, ū chheng-chheng bān-bān; koh ū gı̄--ê sı̀n tit-tio̍h thíⁿ--nı̍h chiâu-chn̂g ê hok-khı̀.” Koh kóng, Lín taⁿ beh khı̀ Siōng-tè ê lo̍k-hn̂g, oē-tit-thang khoàⁿ-kı̀ⁿ oa̍h-miā ê chhiū, soà thang chia̍h i ê hó ké-chí, lín kàu hit--nı̍h, tek-khak ēng pe̍h saⁿ siúⁿ-sù lín, ta̍k-jı̍t thang kap Chú saⁿ-kap kóng, saⁿ-kap kiâⁿ, ta̍k tāi bô soah.Koh kóng, Lín tiàm sè-kan ū hoân-ló, pı̄ⁿ-thiàⁿ, kan-khó͘, oē sí, chiah-ê tāi-chı̀, tùi chia kàu bé boē koh khoàⁿ-kı̀ⁿ che.Koh kóng, Chêng ê tāi-chı̀ kè liáu, lín taⁿ tit-beh kūn A-pek-lia̍p-hán, Í-sat, Ngá-kok, chiah ê sian-ti lâng.
Nn̄g ê ha̍k-seng mn̄g i kóng, Goán kàu thiⁿ-siâⁿ, tio̍h choè sím-mı̍h tāi-chı̀? in kóng, Lín kàu hit--nı̍h tek-khak chiong thoa-boâ oāⁿ khoàⁿ-oa̍t, chiong hoân-ló oāⁿ hoaⁿ-hí. Lín chêng tiàm sè-kan khui siaⁿ kı̂-tó, lâu ba̍k-sái, ūi-tio̍h Chú siū kan-khó͘, kàu hit--nı̍h tek-khak tit-tio̍h i ê ké-chí; koh tek-khak thang tı̀ kim ê bián-liû, thiⁿ-nih sèng ê Chú ta̍k sı̂ oē-tit-thang khoàⁿ-kı̀ⁿ. Lín chêng tiàm sè-kan, sı̍t-chāi sı̄ ài ho̍k-sāi Chú, nā-sı̄ seng-khu teh ho̍k-sāi sı̄ chám-jiân oh, taⁿ lín kàu hit--nı̍h, tek-khak éng-éng ho̍k-sāi Chú, o-ló, hoaⁿ-hí, kóng to-siā ta̍k sı̂ bô ià. Tı̄ hia ta̍k hāng oē ê Chú, lín ê ba̍k-chiu tek-khak hoaⁿ-hí khoàⁿ-kı̀ⁿ i ê êng-kng, hı̄-khang ia̍h hoaⁿ-hí thiaⁿ i ê siaⁿ.Koh lín khiā hit--nı̍h tek-khak tit-tio̍h êng-kng ê saⁿ thang chhēng, êng-kng ê chhia thang chē, thang kap êng-kng ê Chú saⁿ-kap kiâⁿ. Kàu Chú chē thiⁿ-hûn koh lâi, hō-thâu toā siaⁿ tân, lín ia̍h oē-tit-thang kap I saⁿ-kap khı̀. Chú chē sím-mn̄g ê chē-ūi, lín ia̍h oē-tit-thang tiàm i piⁿ-á teh khiā. Koh kiám-chhái sı̄ pháiⁿ sı̂n, sı̄ pháiⁿ lâng, hit-tia̍p Chú toān i ū choē, lín ia̍h oē-tit-thang kap i saⁿ-kap toàn. Koh Chú tò-khı̀ thiⁿ-siâⁿ--nı̍h, lín ia̍h thang kap i saⁿ-kap tò-khı̀, éng-éng kap i khiā.
Hit-tia̍p tāi-ke án-ni saⁿ-kap kóng, chiām-chiām kūn siâⁿ-mn̂g, pō͘-pı̂n ū choē-choē thian-kun chhut-lâi chih-chiap in. Nn̄g ê kng-kng ê lâng kā thiⁿ-peng kóng, Chí N̄g lâng chiū-sı̄ tiàm sè-kan ū thiàⁿ Chú, ūi-tio̍h Chú pàng hiat-ka̍k i só͘ ū. Chú chhe goán toà in lâi, taⁿ í-keng kàu chia lah, thang hō͘ in jı̍p siâⁿ, oē-tit-thang kı̀ⁿ-tio̍h Chú ê bı̄n.Hit-tia̍p thian-kun ū hoaⁿ-hí kiong-hí kóng, “Kı̀ⁿ-ū tit-beh chē iûⁿ-ko chhoā-bó͘ ê toh-ê, ū hok-khı̀.” Hit-tia̍p koh ū Chú ê ga̍k-kong chhut-lâi chih-chiap--in. In ê saⁿ pe̍h koah kng, siaⁿ toā koah hô, ūn kàu hí thiⁿ--nı̍h. Nn̄g ê ha̍k-seng lı̄ sè-kan kàu chia ū choē-choē ga̍k-kong toā-toā kā in kiong-hí. In ûi N̄g ê ha̍k-seng, ū ê thâu-chêng, ū ê āu-piah, ū ê tò-pêng, ū ê chiàⁿ-pêng, ná chhin-chhiūⁿ beh chiàu-kò͘ in, hō͘ in thang peh-chiūⁿ téng-bı̄n. chı̍t lō͘ chok-ga̍k siaⁿ lóng hô-hô, ná chhin-chhiūⁿ thiⁿ lâi kàu in tau. chèng-lâng án-ni chı̀n-chêng kiâⁿ, ga̍k-kong hoaⁿ-hí, ta̍k-sı̂ chia̍p-chia̍p chok-ga̍k, thiàu-bú, ı̀-sù sı̄ beh N̄g ê ha̍k-seng chai, in sı̄ hoaⁿ-hí lâi chih-chiap in. Hit-tia̍p N̄g ê ha̍k-seng khiok bē jı̍p siâⁿ, í-keng ū chhin-chhiūⁿ tiàm thiⁿ nı̍h ê hoaⁿ-hí, i ê sim chı̄n khoàⁿ-oa̍h kàu boē-kò͘-tit. Hit-tia̍p kiâⁿ kàu chia, siâⁿ lóng ū khoàⁿ-kı̀ⁿ, hóng-hut ū thiaⁿ-kı̀ⁿ, siâⁿ nı̍h ū cheng-kó͘ ê siaⁿ, chhin-chhiūⁿ beh lâi chih-chiap in jı̍p khı̀. Nn̄g ê ha̍k-seng chiū kiâⁿ kàu siâⁿ-mn̂g. Hit-tia̍p ū khoàⁿ-kı̀ⁿ mn̂g-téng ū kim jı̄ kóng, “Kı̀ⁿ ū thàn Chú ê tiâu-kài--ê, ū hok-khı̀, thang tit-tio̍h oa̍h-miā ê chhiū, tùi mn̂g jı̍p siâⁿ.”
Hit-tia̍p goá bāng-kı̀ⁿ N̄g ê êng-kng--ê hoan-hù N̄g ê ha̍k-seng tio̍h phah mn̂g. Phah liáu ū lâng tùi mn̂g-téng khoàⁿ lo̍h-lâi, chiū-sı̄ Í-lo̍k, Mô͘-se, Í-lı̄-a chiah ê.chèng-lâng kā in kóng, chit N̄g ê ha̍k-seng ūi-tio̍h thiàⁿ Chú ū lı̄ Chiong-bông siâⁿ lâi. Nn̄g ê ha̍k-seng chêng só͘ tit-tio̍h ê chip-chiò, hit-tia̍p the̍h-chhut-lâi kau, liâm-piⁿ ū lâng chiong chip-chiò the̍h hō͘ Chú. Chú khoàⁿ soah, chiū kóng, Hiah ê lâng to̍h-lo̍h? Ìn i kóng, Chit-tia̍p tı̄ hí mn̂g-goā.
Chú chiū kah--i mn̂g tio̍h liâm-piⁿ khui, hō͘ in jı̍p-lâi.
Goá bāng-kı̀ⁿ N̄g ê ha̍k-seng hit-tia̍p jı̍p thiⁿ-siâⁿ, chı̍t-ē jı̍p, bı̄n chiū piàn sek, ū chhēng saⁿ kng-kng chhin-chhiūⁿ kim. Koh ū lâng chı̀n-chêng the̍h khı̂m kap bián-liû siúⁿ-sù in. Hit-ê khı̂m sı̄ o-ló Chú thang ēng, hit-ê bián-liû chiū-sı̄ chun-kùi ê bō. Hit-tia̍p goá bāng-kı̀ⁿ thong siâⁿ ê cheng-kó͘ toā siaⁿ teh tân, Chú kā in kóng, “Lín tio̍h jı̍p-lâi, siū-tio̍h Goá ê hoaⁿ-hí.”
Goá ia̍h ū thiaⁿ-kı̀ⁿ N̄g ê ha̍k-seng toā siaⁿ teh chhiùⁿ kóng, “Ài hok-khı̀, chun-kùi, êng-kng, koân-lêng, khùi-la̍t kui hō͘ chē thiⁿ-ūi--ê, soà kui hō͘ Iûⁿ-ko, ta̍k-tāi bô soà”.
Mn̂g tú-á khui, N̄g ê ha̍k-seng jı̍p-khı̀, goá khoàⁿ-kı̀ⁿ hí lāi-bı̄n, siâⁿ ê kng chhin-chhiūⁿ jı̍t, koe-lō͘ lóng sı̄ pho͘ n̂g-kim. Siâⁿ-lāi ū choē-choē lâng teh kiâⁿ, thâu tı̀ kim ê bián-liû, chhiú kia̍h chó-ki, kap kim khı̂m. Koh goá ū khoàⁿ-kı̀ⁿ chèng-lâng ê chiông-tiong, seng-khu ū sı̍t--ê, éng-éng saⁿ-kap toā siaⁿ kiò kóng, “Sèng--ah! Sèng--ah! Sèng--ah! Goá ê Chú Siōng-tè.” Āu-lâi mn̂g chiah koaiⁿ. Goá khoàⁿ-kı̀ⁿ che, ia̍h chı̄n-chāi ài tiàm hit--nı̍h.
Goá hit-tia̍p tú-á teh khoàⁿ, pō͘-pı̂n oa̍t kè-khı̀, khoàⁿ-kı̀ⁿ Bû-ti kūn hô-piⁿ, kè hô chin kín, lóng bô chhin-chhiūⁿ N̄g ê ha̍k-seng ê kan-khó͘. Sı̄ i hit-tia̍p kàu chia, pō͘-pı̂n ū tú-tio̍h chı̍t-ê tō͘-thâu--ê, miâ kiò Hu-bōng, ēng sió chûn chài i kè-khı̀. Bû-ti ia̍h pı̂ⁿ-pı̂ⁿ peh-chiūⁿ soaⁿ, beh kàu siâⁿ-mn̂g, nā-sı̄ i hit-tia̍p kú sı̄ chēng-chēng ka-kı̄ teh kiâⁿ, lóng bô chit lâng chhut-lâi chih-chiap--i. Í-keng kàu thiⁿ-mn̂g, kia̍h thâu khoàⁿ-kı̀ⁿ mn̂g téng ê kim-jı̄, ia̍h phah mn̂g, liōng mn̂g tek-khak liâm-piⁿ khui, thang kap i jı̍p-khı̀. Mn̂g téng àⁿ teh khoàⁿ ê lâng ū mn̄g i kóng, Lí tùi to̍h-lo̍h lâi? ài tit-tio̍h sím-mı̍h?
Bû-ti kóng, Goá chêng bat tiàm Chú ê bı̄n-chêng lim-chia̍h, Chú ū bat tiàm goán hit--nı̍h kà-sı̄. Hit-tia̍p mn̂g téng ê lâng ū beh tùi i the̍h chip-chiò, khı̀ kau hō͘ Chú, Bû-ti tùi tó͘-koāⁿ sı̀-koè chhiau, lóng bô. Hit-tia̍p chiū mn̄g Bû-ti kóng, Lí kám bô mah?
Bû-ti é-é lóng bô poàⁿ-kù oē thang kóng.Mn̂g-téng ê lâng ēng che oē pò hō͘ Chú chai.Chú m̄ lo̍h-lâi kı̀ⁿ--i, chiah kah N̄g ê êng-kng ê lâng chhut-khı̀ pa̍k i ê kha chhiú, lia̍h i khı̀.
Nn̄g ê lâng liâm-piⁿ chhut-khı̀ lia̍h Bû-ti, tùi poàn-khong-tiong khı̀, kàu chêng só͘ khoàⁿ-kı̀ⁿ ê soaⁿ-mn̂g, chiah hiat i lāi-bı̄n. Goá hit-tia̍p teh siūⁿ, chai--kiò m̄-nā tùi Chiong-bông siâⁿ ū lō͘ thang thàng tē-ge̍k, chiū tùi thiⁿ-mn̂g ia̍h ū lō͘ thang thàng tē-ge̍k.
Goá bāng-kàu chia chiah chhíⁿ, chiah ū gı̂m chı̍t-siú si kóng,
Bāng-lāi ū oē ín Sèng-keng,
Chiuⁿ-chiuⁿ kù-kù koé hun-bêng;
Put-lūn pêng-iú kap hiaⁿ-tı̄,
Tio̍h ēng che oē saⁿ chí-sı̄.
Kàu-khàm lâi kiâⁿ chin tō-lí,
Bo̍h-tit loé-chı̀ koà poeh-sí;
Chı̀n-chêng phı̀-jū hō͘ lín chai,
Ài lín kı̀-liām khǹg sim-lāi.
Chit tiâu chiū-sı̄ thian-tông lō͘,
M̄ tùi chia khı̀ chı̄n chhò-gō͘;
Chit pún só͘ thoân ke̍k-kı̂ hó,
Pí gûn pí kim bān pē hó.
Kín chiong ta̍k phiⁿ lâi hoan-e̍k,
Khó͘-khǹg tāi-ke tio̍h bêng-pe̍k;
Nā lia̍h só͘ bāng choè bô-ek,
Kàu bé seng-khu lo̍h tē-ge̍k.
