Sè-kan Lâng M̄-thang Bô--ê.
Bô hó mı̍h ha̍h chhùi, chháu-chhài ia̍h thang chí ki. Bô súi ê saⁿ thang chhēng, chho͘-pò͘ ia̍h thang jia sin-khu. Bô súi ê chhù-the̍h thang khiā, chhù-á ia̍h thang an sin. To̍k-to̍k sim-lāi bô hok-im kiù sè ê tō-lí--ê, chiū chı̂ⁿ-châi bê-he̍k i ê sim, chiú-sek théng i ê su-io̍k, moá sim ê kan-khó͘ kàu boē kóng-tit, sui-bóng hó mı̍h ia̍h boē kah chhùi, súi-saⁿ bô kàu-gia̍h thang chhēng, súi ê chhù-the̍h bô kàu-gia̍h pâi-chhiâng. Bô hoán-hoé koé kè-sit ê khùi-la̍t, bô chek-chū kong-lô kiâⁿ hó ê châi-lêng, kim-sè bô chı̍t jı̍t ê chin khoài-lo̍k, lâi-sè ū bān nı̂ éng-oán ê kan-khó͘, chhin-chhiūⁿ ko͘-toaⁿ ê gín-á sit-lo̍h pē-bú, chhin-chhiūⁿ iûⁿ-á kiâⁿ bô lō͘, sı̍t-chāi chhiⁿ-chhám kàu-ke̍k. Khó-sioh thiⁿ-ē ū choē-choē lâng m̄ chai.
Thoè Hō͘ Phang Tèng.
Ū chı̍t ê soè-hàn Ki-tok-tô͘, kóng-oē chò tāi-chı̀ bô kap pêng-siông ê gín-á saⁿ-tâng. Chı̍t ê bo̍k-su mn̄g i kóng, “Lí kin nı̂ kúi hè? Ū chai sià-choē tit-tio̍h un-tián ê tō-lí á bô?” Ìn kóng, “Goá chai lah. Bô thái oē kham-tit choè Ki-tok-tô͘,” Bo̍k-su kı̂-koài i ê oē. Koh chiong só͘ ı̀n ê mn̄g khah siông-sè. Gín-á ı̀n-kóng, “Goá bat tè lāu-pē jı̍p Sèng-tn̂g, Kiù Chú thoè lâng sio̍k-choē ê tāi-chı̀ goá thiaⁿ kàu put-chí se̍k, put kò bô siáⁿ bêng-pe̍k, goá ia̍h pàng choè bô iàu-kín, phah-sǹg toā-hàn ê sı̂ chai bat khah chhim, chiah koh káng-kiù ia̍h bē tı̂. chı̍t jı̍t goá tı̄ hoe-hn̂g thit-thô, m̄ chai tùi tah-lo̍h pe chı̍t chiah phang lâi, sè-bı̄n put-chí hiông, chhin-chhiūⁿ bô tèng--tio̍h m̄ pàng goá soah. Goá chin kiaⁿ, the̍h chhiú-kun poāⁿ--i, soà tı̄ thâu-khak téng iāⁿ-iāⁿ pe m̄ lı̄-khui, goá koh-khah kiaⁿ. Hit sı̂ goá ê lāu-bú tı̄ chhiū-kha teh ut saⁿ, goá cháu khı̀ chhē--i, lāu-bú âⁿ goá tı̄ kûn--nih, phang iā jip kàu, hioh lāu-bú ê chhiú-tó͘, chhut la̍t tèng, to̍k chhı̀ jı̍p bah chin-chhim. Lāu-bú pàng goá lo̍h, kóng, "Bô iàu-kín--lah." Goá khoàⁿ-kı̀ⁿ phang iáu tı̄ chhiú--nih bē lut. Lāu-bú kóng, "Che sı̄ goá thoè lí hō͘ i tèng--ê. Chí thiaⁿ-kı̀ⁿ Ki-tok thoè lâng siū khó͘, ia̍h tú-tú chit hō ı̀-sù." Goá khoàⁿ-kı̀ⁿ lāu-bú chhiú-tó͘ hoat-hông. Phang phah sí liáu, tèng ê só͘-chāi ia̍h chéng. Lāu-bú kiò thiàⁿ, goá chhin ba̍k khoàⁿ--kı̀ⁿ, put-chí boē kè sim, siūⁿ lāu-bú thiàⁿ sim chiah chhim, goān pún-sin siū kan-khó͘ m̄ kam goá hō͘ phang tèng. Tùi án-ni chiah hiáu-ngō͘ thoè lâng sí sio̍k choē ê tō-lí. Sèng-keng kóng, "Ki-tok siū piⁿ phah, lán lóng tit-tio̍h i-hó." Chá goá bô bêng-pe̍k chit-ê ı̀-sù, taⁿ tùi sı̍t sū khoàⁿ--kı̀ⁿ-lah. Goá chhim-chhim chai chiong-lâi eng-kai siū ê pò-èng, lóng hē tı̄ Kiù Chú ê sin-chiūⁿ, in-ūi Kiù Chú í-keng choè goá ê tāi-piáu. Tāi-piáu kı̀-jiân siū hoa̍t, choē-jı̂n tek-khak bián siū sím-phoàⁿ. Tùi chit tia̍p sim-lāi toā kng-bêng, chai Siōng-tè ê kiù-un í-keng jı̍p goá ê sim. Bo̍k-su! Lí siūⁿ kiù-sio̍k ê ı̀-sù kiám m̄ sı̄ án-ni--mah?” Thiaⁿ-kı̀ⁿ ê lâng toā kı̂-koài, o-ló lāu-bú gâu kà-sı̄.
Hiān-chāi ê kàu-iú ū--ê phah-sǹg tit-tio̍h kiù-sio̍k sı̄ tùi ka-kı̄ ê hó phín-hēng. Án-ni i ê tı̀-sek toā m̄ ta̍t chit-ê gín-á.
Hoān Choē Tit-tio̍h Sià-bián.
Hoat-lu̍t. Hok-im.
Hoat-lu̍t, chiàu kong-lí chı̍t-ē tiāⁿ-tio̍h, boē koh khoan-iông. Hok-im, chiū-sı̄ in-ūi Ki-tok ê jı̂n-ài, ēng te̍k-piat ê un si hō͘--lâng. Che sı̄ hoat-lu̍t kap hok-im ê toā bô saⁿ-tâng. Mô͘-se, to̍k-to̍k chiok-hok siú hoat--ê. Iâ-so͘, chiū sià-bián hoān-hoat--ê. Che sı̄ in nn̄g ê ê toā koh-iūⁿ.
Khiā To̍k-bo̍k Kiô Hn̄g-hn̄g Khoàⁿ Khoài-lo̍k Toē.
Chı̍t ê siàu-liân choè lâng put-chí hó, khó-lı̂n bô pē kiáⁿ, lı̂n-bín sòng-hiong lâng, kèng lāu thiàⁿ soè, tâng hiuⁿ--ê ta̍k ê o-ló--i, chiū i ka-kı̄ ia̍h phah-sǹg bong sim bô kiàn-siàu, Āu-lâi ún-tàng ū thang hióng-siū Thian-tông ê hok-khı̀. Ū chı̍t mı̂, i bāng-kı̀ⁿ kiâⁿ thiⁿ-lō͘, poàⁿ-lō͘ ū chúi keh--teh, hoāⁿ-piⁿ ū chhâ-kiô, sı̄ pún-sin só͘ tah--ê, chiū kiâⁿ tı̄ kiô téng, kàu kiô chı̄n, chúi ná khoah boē kè--khı̀. Chit tiâu chúi kóng sı̄ Iok-tàn ê hô. Hn̄g-hn̄g khoàⁿ Sı̂n siâⁿ saⁿ-lı̄ bô loā hn̄g, lāi-bı̄n po-lê tiān bé-ló kiong koâiⁿ kàu tú thiⁿ, thiⁿ-sài sèng-tô͘ tiàm lāi-bı̄n gı̂m-si chhiùⁿ-koa, lóng-chóng oē thiaⁿ-kı̀ⁿ, tāi-khài sı̄ hoaⁿ-hí oá-khò Iâ-so͘ Ki-tok ê kong-lô chiah ū thang hióng-siū hok-khı̀. Oa̍t thâu khoàⁿ pún-sin só͘ tah ê kiô lóng sı̄ chio̍h-thâu thia̍p--ê, chio̍h--nih phah choē-choē hó kù, chhin-chhiūⁿ chheng-khı̀ sim-koaⁿ, kiám-chió su-io̍k, siu-tı̄ ka-kı̄, thiàⁿ--lâng, kiâⁿ hó chiah-ê ta̍k khoán sio̍k tō-tek ê jı̄-iūⁿ, chóng-sı̄ iû-goân boē kàu Thian-tông, chiah chai chı̍t-sı̀-lâng só͘ choè chiâⁿ choè khang-khang, boē kı̀m-tit toā siong-sim, soà cheng-sı̂n.
Thang chai tit-tio̍h kiù ê tō-lí, chāi oá-khò Kiù Chú, m̄ sı̄ oá-khò ka-kı̄ ê kong-lô.
Khoàⁿ chheh ê pêng-iú! Tio̍h chai sè-kan só͘ kiò choè hó lâng--ê, put-kò sı̄ kóng chit-ê khah iâⁿ hit-ê nā-tiāⁿ, chiàu lâng saⁿ pí thang kóng sı̄ hó, m̄-kú kap Siōng-tè saⁿ pí, khah cháiⁿ-iūⁿ ia̍h sı̄ choē-jı̂n, só͘-í chek-chū kong-tek boē kàu-gia̍h tit-tio̍h Siōng-tè ê un, lâi hióng-siū Thian-tông ê hok-khı̀. Khó͘ hái bô piⁿ, ài tah kiô kè--khı̀, m̄ sı̄ lâng ê la̍t só͘ oē choè, to̍k-to̍k goān sè-kài ê lâng khoàⁿ bô ka-kı̄, siūⁿ chı̍t-sı̀-lâng só͘ choè ê hó tek-hēng, sı̄ pún-hūn só͘ eng-kai chı̄n--ê, bô kàu-gia̍h thang khoa-kháu, nā án-ni kap Siōng-tè saⁿ pí sı̍t-chāi cheng-chha ke̍k hn̄g. Só͘-í tio̍h chiū-kūn Kiù Chú, oá-khò I pàng-sak sin-khu sio̍k-choē ê kong-lô, chiah ū chiūⁿ kàu Thian-kok ê ǹg-bāng. Siat-sú sè-kan nā ū oân-choân ê lâng, chiū Ki-tok bián kàng sè choè lâng ê Kiù Chú. Siōng-tè siúⁿ-sù chit-ê hok-im Sèng-tō, chiū-sı̄ ūi-tio̍h sè-kài ê lâng, tùi chá kàu taⁿ bē oē kiâⁿ hó thang chhin-chhiūⁿ Siōng-tè. Sin-iok Má-khó tē cha̍p chiuⁿ kı̀ chı̍t ê siàu-liân lâng kı̀ⁿ Iâ-so͘, ka-kı̄ chheng it-chhè ê kài-bēng tùi soè-hàn lóng ū siú kàu oân-choân. Iâ-so͘ kā i kóng, “Lí iáu khiàm chı̍t tiâu iáu-bē kiâⁿ.” In-ūi lâng tiàm sè-kan só͘ eng-kai tio̍h chı̄n ê chek-jı̄m ke̍k bô hān-liōng, nā ka-kı̄ oá-khò hó phín-hēng hó kong-tek, chiū tio̍h ta̍k hāng kiâⁿ kàu oân-boán, khiàm chı̍t hāng iû-goân boē choè--tit. Só͘-í Sèng-keng kóng, “Kan-hoān chı̍t tiâu kài-bēng kap kan-hoān chèng tiâu bô koh-iūⁿ.” Siat-sú bô Ki-tok lı̂m-kàu sè-kan kiù--lâng, chiū sè-kan bô chı̍t ê ū oa̍h ê ǹg-bāng. Pó-lô kóng, “To̍k-to̍k Siōng-tè ê Kiáⁿ Iâ-so͘ thoè goá pàng-sak sı̀ⁿ-miā sio̍k-choē.” Koh kóng, “M̄-sı̄ lâng thiàⁿ Siōng-tè, sı̄ Siōng-tè ka-kı̄ tāi-seng thiàⁿ--lâng, só͘-í chhe Kiáⁿ kàng-lo̍h sè-kan, choè sè-kan lâng sio̍k-choē ê bán-hoê chè, chit-ê sı̄ siōng-tè ê thiàⁿ sè-kan lâng bêng-bêng ê kan-chèng.” (I Iok-hān 4:10.) Sèng-keng koh kóng, “Lán chiah-ê tú-tú tı̄ choē-ok ê tiong-kan, Ki-tok í-keng thoè goá sí--lah.” (Lô-má 5:6. )
Iáu-kú Khiàm “Chı̍t.”
Sè-kài ū chin choē lâng, i ê kiâⁿ tāi-chı̀ put-chí kng-bêng, siú-kí thiàⁿ--lâng, hō͘ lâng thang o-ló, só͘ khó-sioh--ê iáu-kú khiàm chı̍t hāng, chiū-sı̄ bē bat Ki-tok choè Kiù Chú. Tāi-khài m̄-bat Ki-tok choè Kiù Chú ê lâng, sui-bóng goā-phê sı̄ hó lâng ê khoán-sit, m̄-kú lāi-sim bô Siōng-tè ê tō-lí, goā-phê ū sè-kan ta̍k hāng ê hù-kùi êng-hoâ, lāi-sim bô thiⁿ-téng ê chun-kùi khoài-lo̍k, goā-phê ū chhin-chhek pêng-iú ê o-ló, lāi-sim bô Sèng Sı̂n ê kám-hoà, jı̂n-kan ū hó lâng ê miâ-siaⁿ, thiⁿ-téng bô éng-oa̍h ê hok-khı̀, só͘-í kóng khiàm chı̍t hāng boē choè--tit.
Phı̀-jū o̍h sǹg-siàu--ê liân-liân siá la̍k ê khoân 000000, nā mn̄g chiah-ê siàu-ba̍k loā-choē, iû-goân sı̄ bô, á-sı̄ khang-khang, nā sı̄ tı̄ la̍k khoân ê thâu-chêng siá chı̍t jı̄ “chı̍t”--jı̄, chiū chiâⁿ choè chı̍t pah bān, án-ni chit jı̄ “chı̍t”--jı̄, kiám bô toā iàu-kín--mah?
Goá Ia̍h Chāi Lāi.
Sèng-keng kóng, hoān-nā sı̀n tō-lí ê lâng, siⁿ-chêng oē hióng-siū pêng-an, sí-āu ū éng-oán ê hok-khı̀. Goá bat ēng chit hāng khoàn sè-kan lâng, thiaⁿ-kı̀ⁿ-ê kóng, Bô tek-khak goá ū chāi lāi. Mn̄g, sı̄ cháiⁿ-iūⁿ? Ìn kóng, Chit hō sı̄ hoàn-hoàn ê oē, nā sı̄ goá ū hūn cháiⁿ-iūⁿ bô kı̀ goá ê sı̀ⁿ-miâ? Goá kā i kóng, Sè-kan tâng sı̀ⁿ tâng miâ--ê m̄ chai loā-choē. Siat-sú nā ū chù miâ, ia̍h bô tek-khak sı̄ tú-tú chí hit-ê lâng. Lô-má saⁿ chiuⁿ cha̍p káu chat kóng, Thong sè-kan ê lâng lóng phak tı̄ Siōng-tè sím-phoàⁿ ê ē-bı̄n. Koh kóng, Hoān-nā ū hiat-khı̀--ê, bô chı̍t ê tùi chun-siú hoat-lu̍t oē tı̄ Siōng-tè ê bı̄n-chêng chheng-ho͘ choè pē--ê. Só͘ kóng “Thong sè-kan.” “Hoān-nā ū hiat-khı̀--ê,” kiám m̄-sı̄ pau-hâm thong sè-kài lâi kóng? Lí kiám oē tùi sè-kài goā siⁿ--lâi? Lí ka-kı̄ phah-sǹg kóng bô tek-khak ū hūn, put-kò the-thok ê oē nā-tiāⁿ. Eng-kok ê kùi-cho̍k, choē-choē ài sí-āu bâi-chòng tı̄ lé-pài-tn̂g lāi, thia̍p chio̍h choè bōng, tok ge̍k choè pi, tiau-khek hoe chiáu jı̂n-bu̍t, ài hō͘ khoàⁿ--kı̀ⁿ-ê o-ló kóng, Chit-ê sı̄ bó͘-bó͘ ê bōng. Hong-sio̍k sı̄ án-ni, bô kàu-gia̍h kı̂-koài.
Bōng--nih ê Kan-khó͘ Khoài-lo̍k.
Goá chı̍t pái kàu bó͘ keng toā lé-pài-tn̂g kiâⁿ-kiâⁿ, khoàⁿ-kı̀ⁿ lāi-bı̄n chı̍t ê bōng, khiā ge̍k bōng-pâi, khek Lia̍p-teng jı̄ “Kan-khó͘.” Ì-sù sı̄ kóng bōng-lāi ê lâng ke̍k kan-khó͘, tāi-khài sı̄ siú tō-lí bô chhim, sí lı̂m-chiong ê sı̂ só͘ hoan-hù ê oē. Āu-lâi goá koh khı̀ Lô-má siâⁿ thit-thô, siâⁿ kha toē lāi lóng sı̄ toā thô͘-hām kúi-nā chheng lí tn̂g, che sı̄ chá Ki-tok-tô͘ pı̄-lān ê só͘-chāi, hiān-kim teh choè thióng-bōng. Tiong-kan chı̍t ê bōng-pâi phah choē-choē “Khoài-lo̍k” ê jı̄-iūⁿ, ı̀-sù sı̄ bōng-lāi ê lâng ke̍k khoài-lo̍k. Che káⁿ ia̍h sı̄ sí lı̂m-chiong ê sı̂ ka-kı̄ chai pêng jı̍t sı̀n tō-lí sêng-sim chiah án-ni kóng. Khoàⁿ-kı̀ⁿ chit nn̄g tè bōng-pâi, boē bián-tit siūⁿ tùi chá kàu taⁿ, ta̍k lâng tio̍h keng-kè sí chit koan. To̍k-to̍k goān sè-kài ê lâng tı̄ siⁿ-chêng chài-saⁿ ka-kı̄ chhúi-to̍k, chiong-lâi bōng-pâi--nı̍h beh phah sím-mı̍h jı̄-iūⁿ. Chit hāng sı̄ kin-á-jı̍t só͘ tio̍h siūⁿ--ê.
Chún Chı̍t Miâ Choē-jı̂n Jı̍p-lāi.
Bó͘ jı̍t, chı̍t ê pù-lâng kā i ê lô͘-po̍k Tiuⁿ Sam kóng, “Thiaⁿ-kı̀ⁿ kóng lí í-keng tit-tio̍h un-tián thang jı̍p Thian-kok. Goá chai lí teh chhē chit-ê hok-khı̀ sı̍t-chāi chin kú--lah. Chhı̀ mn̄g, lí cháiⁿ-iūⁿ tit-tio̍h án-ni? Chhiáⁿ kā goá kóng bêng.” Tiuⁿ Sam kóng, “Chit chat sı̄ chin kı̂-koài. Goá tāi-seng lia̍h choè ke̍k oh, chóng-sı̄ m̄ chai sı̄ hui-siông iông-ı̄ⁿ. Goá ê jı̍p tiûⁿ koàn chı̍t ē the̍h--chhut, mn̂g chiū khui, iā goá thang jı̍p-lāi. Án-ni beh jı̍p Thian-kok nā-sái chı̍t tiuⁿ jı̍p tiûⁿ koàn chiū oē ēng--tit. Só͘ khó-sioh sı̄ chit tiuⁿ jı̍p tiûⁿ koàn tùi goá soè-hàn ê sı̂ chiū ū, in-ūi boē hiáu ēng, tı̀-kàu ū ná bô, kàu chit tia̍p í-keng choē-choē nı̂ bô ēng--lah.” Chú-lâng thiaⁿ liáu kı̂-koài kóng, “Lí kı̀-jiân ū chit tiuⁿ jı̍p tiûⁿ koàn, cháiⁿ-iūⁿ m̄ chai-iáⁿ thang ēng? Tàu-tí hit tiuⁿ jı̍p tiûⁿ koàn siáⁿ khoán?” Ìn-kóng, “Tāi-lio̍k kap pêng-siông ê jı̍p tiûⁿ koàn saⁿ-tâng, téng-bı̄n siá, ‘Choē-jı̂n’ nn̄g jı̄, tiong-kan siá, ‘Jı̍p tiûⁿ koàn,’ tē saⁿ-pâi siá, ‘Chı̍t tiuⁿ chı̍t miâ.’ lō͘-bé chù ‘Lō͘-ka 18 chiuⁿ 13,14 chat’”
Chú-lâng kóng, “Án-ni nā-tiāⁿ?” Kóng, “Put-kò án-ni. Goá chêng boē ēng--tit ê in-toaⁿ, chiū-sı̄ chiàu ka-kı̄ ê ı̀-sù thiⁿ kúi-nā jı̄ tı̄ choē-jı̂n nn̄g jı̄ ê ē-toé kóng, pí chhù-piⁿ thâu-bé ê lâng lio̍h-lio̍h-á khah hó. Koán-mn̂g--ê khoàⁿ--kı̀ⁿ chiū kóng, ‘Chit tiuⁿ koàn boē ēng--tit.’ Tē-jı̄ pái khı̀, koh tı̄ choē-jı̂n nn̄g jı̄ ê ē-toé thiⁿ, ‘Chit lâng chin chhut-la̍t koh chió-chió choē-koà.’ Bô phah-sǹg ia̍h boē ēng--tit. Só͘-í goá chiū tò--lâi, lâu ba̍k-sái kı̂-tó put-chí pek-chhiat. Tē saⁿ pái khı̀, koh thiⁿ, ‘Chit lâng thı̂-khàu choē-ok.’ Chí kúi jı̄ tı̄ koàn--nı̍h.
Koh-chài boē ēng--tit. To̍k-to̍k goá ka-kı̄ siūⁿ kan-khó͘ thang ǹg-bāng lı̂n-bín, kong-lô thang lâi pó͘ choē-koà. Goá kàu chit chūn, siūⁿ choē-ok chin tāng, boē oē tit kiù, chha-put-to beh sit-lo̍h tit-tio̍h kiù ê ǹg-bāng. Hut-jiân thiaⁿ-kı̀ⁿ Ki-tok kā goá kóng, ‘Goá chiū-sı̄ mn̂g, tùi goá jı̍p--ê oē tit-tio̍h kiù.’ (Iok-hān 10:9.) Koh kóng, ‘Chiū-kūn goá ê lâng, Goá bô khı̀-sak--i.’ (Iok-hān 6:37.) ‘Nā sı̄ lín m̄ ài chiū-kūn Goá lâi tit-tio̍h oa̍h.’ (Iok-hān 5:40.) Āu-lâi koh kóng pó-poè ê oē kóng, ‘Kam-goān ê lâng chin sim thang pe̍h-pe̍h tit-tio̍h oa̍h ê chúi.’ (Khé-sı̄-lio̍k 22:27[17].)
Chhâ-khó Sèng-keng Hoat-lı̄-sài lâng kap thiu-hiòng ê lâng saⁿ-kap chiūⁿ tiān kı̂-tó (Lō͘-ka 8[18]:10.) choē-jı̂n hoán-tńg tit-tio̍h Siōng-tè chiap-la̍p. Ka-kı̄ chheng gı̄ ê lâng hoán-tńg siū kū-choa̍t, tùi án-ni goá chai chit-ê lí, choē-jı̂n tit-tio̍h Chú ê un-tián, bô pa̍t hāng ê in-toaⁿ. I pún sı̄ choē-jı̂n, koh ka-kı̄ chai sı̍t-chāi sı̄ choē-jı̂n, lóng bô kóng choē tāng--ê chiū boē tit-tio̍h kiù, ia̍h bô kóng choē khin--ê thang ǹg-bāng têng-thâu-siⁿ, m̄ bián kiû khoan-iông, nā oē sêng-sim jı̄n ka-kı̄ ê choē oá-khò Siōng-tè só͘ siúⁿ-sù ê un-tián chiū hó. Só͘-í Chú lūn sèng-tiān kı̂-tó ê choē-jı̂n kóng, ‘Chit lâng tò--khı̀ thang tit-tio̍h chheng-gı̄.’ Goá kı̀-tit Iâ-so͘ ê oē kóng, ‘Goá lâi chit sè-kan sı̄ chio ū choē ê lâng hoán-hoé koé-pı̀ⁿ.’ Kàu chit-tia̍p goá chiū the̍h chhut jı̍p-tiûⁿ koàn, lóng bô koh thiⁿ jı̄, kau hō͘ koán mn̂g ê lâng, mn̂g í-keng khui, goá chiū liâm-piⁿ jı̍p-khı̀.”
Chhı̀ mn̄g lín ê sim-chı̀ ài jı̍p Thian-tông á-bô? Nā ài jı̍p tio̍h o̍h Tiuⁿ Sam ê kò͘-sū, ka-kı̄ jı̄n sı̄ choē-jı̂n, oá-khò Iâ-so͘ choè Kiù Chú, kiò Siōng-tè choè Thiⁿ-pē, só͘ kiû--ê chiū oē tit-tio̍h.
Bí-su̍t Koán ê Kò͘-sū.
Tek-kok ê To͘-sū-tō siâⁿ, chá sı̂ ū chı̍t ê chhut-miâ ê ūi-tô͘-ka, miâ kiò Sū-teng-pó, chit lâng ê ūi-tô͘, miâ-siaⁿ put-chí hó, bô phah-sǹg só͘ boē chin chió. I ê pêng-iú tı̄ kı̀ⁿ--i ê sı̂, tâng siaⁿ o-ló kóng, Āu-lâi tiāⁿ-tio̍h tit-tio̍h miâ-siaⁿ kap châi-lı̄.
Keng-kè kú-kú lóng bô lâng lâi mn̄g, kai-chài chit-ê lâng ê ūi-tô͘, chhut tı̄ siⁿ-sêng ê só͘ ài, bô ūi-tio̍h thàn chı̂ⁿ, só͘-í ta̍k jı̍t ūi-tô͘ kàu bé bē siⁿ-khí oàn-hūn. Chı̍t jı̍t ū chhù-piⁿ ê Lé-pài-tn̂g ê sı̂n-hū, chhin-sin khı̀ thàm--i, thok-tiōng i ūi tâi-téng chı̍t pak tô͘. Sı̂n-hū tāi-seng kóng chhut ka-kı̄ ê ı̀-sù, chiū-sı̄ chiong Iâ-so͘ tèng sı̍p-jı̄-kè ūi tı̄ tiong-ng, nn̄g-pêng chiah ūi pa̍t hāng ê kò͘-sū. Ūi-tô͘-su thiaⁿ liáu, chēng-chēng siūⁿ tia̍p-á-kú chiū kóng, “Chit-ê kang m̄ sı̄ khoài choè, in-ūi Iâ-so͘ tèng sı̍p-jı̄-kè, kap pa̍t téng-hō ê tô͘ bô tâng, nā pêng-siông ê hoat-tō͘ lâi ūi, chiū lóng bô ı̀-sù, hō͘ lâng bô chhù-bı̄, tek-khak tio̍h chin hó--ê chiah oē hō͘ khoàⁿ tô͘ ê lâng chhíⁿ-ba̍k kiaⁿ-sim, chóng-sı̄ m̄ chai lí oē chhut loā-choē kang-chı̂ⁿ, nā kang-chı̂ⁿ chha-put-to, goá tek-khak chhut-la̍t lâi choè, hō͘ i pí pa̍t khoán ê tô͘ khah ū koh-iūⁿ ê khoán-sit.” Sı̂n-hū kóng, “Lí m̄ bián tāi-seng chhui-chhiâu kè-chı̂ⁿ, chhiáⁿ thiaⁿ goá kóng bêng hit-ê in-toaⁿ, ū chı̍t ê pù-lâng, tı̄ pún Lé-pài-tn̂g thiaⁿ tō-lí siū kám-kek, tùi án-ni hoán-hoé choē-koà, tit-tio̍h Siōng-tè kiù-sio̍k ê un-tián, chiū kı̂-tó hē-goān beh choè chit-ê tô͘ lâi sàng pún Lé-pài-tn̂g choè kı̀-liām, hit lâng ê ı̀-sù, bô iàu-kín kang-chı̂ⁿ loā choē, chí-ū nā tit-tio̍h ke̍k hó ê tô͘. I chiū oē chhut choē-choē kang-chı̂ⁿ.” Ūi-tô͘-su kóng, “Kı̀-jiân án-ni kóng, goá chiū tio̍h chhut-la̍t thàn bēng-lēng, lí āu--jı̍t koh lâi, chit-ê tô͘ ê kó tek-khak hó, hiah-ê iù-soè ê só͘-chāi, chiah koh chim-chiok koé-oāⁿ.” Sı̂n-hū ún-chún--i, saⁿ-sı̂ chiū khı̀. Ūi-tô͘-su sûi-sı̂ choân-kang ūi pı̂n-hong ê tô͘ lâi kiû miâ-siaⁿ.
Tı̄ chit-ê To͘-sū-tō siâⁿ ê Iû-thài kok ê seng-lí lâng khiā-khí put-chí choē. Ūi-tô͘-su siūⁿ Iâ-so͘ tèng tı̄ sı̍p-jı̄-kè téng, sı̀-ûi khoàⁿ--i ê lâng, lóng sı̄ Iû-thài lâng, goá iā tio̍h ūi Iû-thài lâng ê bı̄n-hêng, só͘-í siông-siông khı̀ Iû-thài lâng chū-chı̍p ê só͘-chāi, chiong in ê bı̄n-hêng tāi-seng ūi tı̄ soè-pún chheh, tò--lâi liáu-āu, chiah koh soè-jı̄ ūi tı̄ pı̂n-hong tô͘. Sı̂n-hū siông-siông lâi khoàⁿ siōng, chiū chai ūi-tô͘-su sı̍t-chāi ū chhut-la̍t teh ūi, chiū put-chí hoaⁿ-hí, phah-sǹg chit-ê tô͘ nā ūi hó, tek-khak oē ke-thiⁿ lé-pài-tn̂g ê êng-kng.
Hit sı̂ tú-tú sı̄ chhun-thiⁿ, ūi-tô͘-su siông-siông khı̀ hiuⁿ-siā kiâⁿ-iû khoàⁿ-kı̀ⁿ ta̍k hāng ê kong-kéng, chiū sūn pit lâi ūi--khí-lâi, chit-ê sı̄ i seng-sêng ê só͘ ài. Chı̍t jı̍t keng-kè chhiū-nâ, khoàⁿ-kı̀ⁿ chı̍t tı̄n siⁿ-hūn ê peh-sı̀ⁿ lâi khui-tiàm, iā bô hioh kheh-tiàm. In bô chhin-chhiūⁿ pêng-siông ê khoán, siông-siông toà in ê pò͘-pı̂ⁿ,jı̍t--sı̂ sı̀-koè kiâⁿ choè seng-lí, mı̂--sı̂ chiū tah pò͘-pı̂ⁿ lâi hioh. Hiuⁿ-siā lâng iā chin choē khoàⁿ-khin hit hō lâng kóng, “In miâ choè seng-lí lâng, sı̍t-chāi chiū-sı̄ chha̍t.” Ūi-tô͘-su khoàⁿ-kı̀ⁿ hiah-ê peh-sı̀ⁿ ê tiong-kan, ū chı̍t ê cha̍p goā hè ê cha-bó͘ gín-á, thâu-mn̂g o͘-kim chhin-chhiūⁿ kiàⁿ, súi giang-giang, sui-jiân i-chiûⁿ phoà-phoà, iā boē phah bô i ê súi. Ūi-tô͘-su khoàⁿ--kı̀ⁿ, phah-sǹg nā ūi i ê bı̄n-hêng, tek-khak sı̄ chin súi. Koh siūⁿ Se-pan-gâ kok ê chhiùⁿ-khek ê cha-bó͘-lâng, tı̄ hit sı̂ sı̄ put-chí chhut-miâ, nā ūi choè lú-ga̍k tūi sı̄ ha̍p-gı̂, chiū kah i thiàu-bú, chng choè ta̍k khoán ê sè-bı̄n, hut-jiân kah i tio̍h tiāⁿ-tiāⁿ khiā bô tín-tāng. Lâng siông-siông o-ló kóng ūi-tô͘-su, ūi-tô͘ chin kín, chóng-sı̄ iā boē liâm-piⁿ ūi hó, chit-ê soè-hàn ê cha-bó͘ gín-á chin kú bô tín-tāng, chiū put-chí ià-siān. Kàu siōng ūi liáu, chiah khoàⁿ-kı̀ⁿ i ê bı̄n-sek chhin-chhiūⁿ thô͘. Ūi-tô͘-su khoàⁿ-kı̀ⁿ hit-ê cha-bó͘ gín-ná chiah sūn-thàn, chiū o-ló--i. Koh kap i ê pē-bú iok beh hō͘ i tām-po̍h chı̂ⁿ, chiū hoan-hù i tio̍h ta̍k lé-pài saⁿ pái khı̀ ūi-tô͘-su ê ke hō͘ i ūi, kàu tô͘-ūi hó chiah soah.
Chit ê cha-bó͘ gín-á jı̍p-siâⁿ kàu ūi-tô͘-su ê ke khoàⁿ-kı̀ⁿ só͘ bē-bat khoàⁿ--kı̀ⁿ-ê, chiū put-chí kı̂-koài, hoān só͘ ū ê ke-si, ta̍k-hāng tio̍h mn̄g khoàⁿ ū sím-mı̍h lō͘-ēng. Hut-jiân khoàⁿ-kı̀ⁿ ūi iáu-bē hó ê pı̂n-hong tô͘ chiū koh-khah gông-ngia̍h, tı̍t-tı̍t khoàⁿ bô nih, khoàⁿ-kı̀ⁿ tô͘-tiong só͘ ūi, ū saⁿ lâng tèng tı̄ sı̍p-jı̄ kè, sı̀-bı̄n ū choē-choē lâng teh khoàⁿ lâi thí-chhiò, chiū boē kò͘-tit tiāⁿ-tiāⁿ, ēng chhiú kí tô͘-tiong ê sı̍p-jı̄-kè, mn̄g ūi-tô͘-su kóng, “Chit-ê sı̄ sím-mı̍h lâng!” Ūi-tô͘-su ı̀n kóng, “Chit-ê sı̄ Ki-tok.” I koh mn̄g kóng, “Chiah choē lâng sı̄ teh choè sím-mı̍h?” Ìn kóng, “Chiū-sı̄ beh tèng I tı̄ sı̍p-jı̄-kè.” Koh mn̄g kóng, “Sı̀-bı̄n teh khoàⁿ ê lâng bı̄n-ba̍k hiông-ok sı̄ sím-mı̍h lâng?” Hit-sı̂ ūi-tô͘-su chù-ı̀ tı̄ ūi-tô͘, cha-bó͘ gín-á jı̍p ūi-tô͘ ê pâng, liâm-piⁿ bēng-lēng i chiàu só͘ choè hoan-hù--ê lóng m̄-thang sió-khoá tín-tāng. Chóng-sı̄ cha-bó͘ gín-á ài khoàⁿ pı̂n-hong ê tô͘, koh mn̄g choē-choē oē, tı̀-kàu phah-bô chng-choè ê khoán-sit, ūi-tô͘-su chiū chek-pı̄ i kóng, “Goá hō͘ lí kang-chı̂ⁿ, bēng-lēng lí chiàu hit-ê khoán-sit, tiāⁿ-tiāⁿ khiā m̄-thang tín-tāng, lí cháiⁿ-iūⁿ chhùi tı̍t-tı̍t kóng iā chhiú kí tô͘, khoàⁿ lâi khoàⁿ khı̀, beh hō͘ goá cháiⁿ-iūⁿ ūi?” Cha-bó͘ gín-á siū chek-pı̄ liáu-āu, m̄-káⁿ koh-chài khui-chhùi, koh chng chhin-chhiūⁿ chêng ê sè-bı̄n, chóng-sı̄ sim pho̍k-pho̍k thiàu, siông-siông thau-khoàⁿ pı̂n-hong ê tô͘, soà boē kı̀-tit tāi-seng ūi-tô͘-su só͘ hoan-hù i ê oē, koh mn̄g ūi-tô͘-su kóng, “Chit-ê lâng cháiⁿ-iūⁿ siū tèng tı̄ sı̍p-jı̄-kè? Sı̄ chin pháiⁿ ê lâng--mah?” Ūi-tô͘-su tòng boē-tiâu, bı̄n ū hián-chhut siū-khı̀ ê khoán kóng, “M̄-sı̄, m̄-sı̄, I sı̄ chin hó ê lâng.” Cha-bó͘ gín-á khoàⁿ-kı̀ⁿ ūi-tô͘-su siū-khı̀, chiū m̄-káⁿ koh mn̄g, chí-ū tı̄ sim-lāi teh siūⁿ kóng, “Nā sı̍t-chāi sı̄ hó lâng, kiám oē tú-tio̍h chiah chhiⁿ-chhám--mah?” Siūⁿ lâi siūⁿ khı̀ lóng m̄ chai hit-ê iân-kò͘. To̍k-to̍k thèng-hāu ūi liáu, chiah chēng-chēng tò--khı̀ nā-tiāⁿ. Āu-pái koh lâi, ūi-tô͘-su ēng hoaⁿ-hí ê bı̄n-sek kap i kóng-oē, “Siū tèng--ê kı̀-jiân sı̄ hó lâng cháiⁿ-iūⁿ oē siū tèng, tèng chı̍t-pái chiū beh pàng--I á-sı̄ beh koh pān--I?” Ūi-tô͘-su khoàⁿ-kı̀ⁿ cha-bó͘ gín-á ta̍uh-ta̍uh mn̄g bô soah, nā bô kā i kóng chit-ê tô͘ só͘ ūi ê lâi-le̍k, i tek-khak koh-chài kiáu-jiáu--goá, boē-oē chù-sı̂n kú-kú chng sè-bı̄n, chiū kā i kóng, “Lí chhiáⁿ thèng-hāu goá chiong só͘ ūi-ê ê lâi-le̍k lóng-chóng kā lí kóng, Āu-lâi m̄-thang koh kiáu-jiáu.”
Sûi-sı̂ chiong Siōng-tè thiàⁿ sè-kan lâng, Iâ-so͘ kàng-seng i-pı̄ⁿ kiù-lâng, kàu lō͘-bé siū loā-choē ê sún-hāi tèng-sí tı̄ sı̍p-jı̄-kè chiah-ê chêng-hêng lóng kóng hō͘ i chai. Ūi-tô͘-su lūn chit-ê tāi-chı̀ tı̄ i lóng bô kan-sia̍p, chí ū chhin-chhiūⁿ chhùi kóng kò͘-sū chı̍t iūⁿ, to̍k-to̍k chit-ê choè seng-lí lâng ê cha-bó͘ gín-á, khí-thâu thiaⁿ-kı̀ⁿ kóng Iâ-so͘ ê tāi-chı̀, sim-lāi liâm-piⁿ siū kám-tōng kàu beh lâu ba̍k-sái, chhim-chhim lı̂n-bín Siōng-tè to̍k-siⁿ ê Kiáⁿ lo̍h-lâi sè-kan siū pō-gio̍k ê hêng-hoa̍t, chóng-sı̄ in-ūi tı̄ chèng-lâng ê bı̄n-chêng, m̄-ài chhut-siaⁿ thı̂-khàu, chí-ū sim-koaⁿ iu-būn. Āu-lâi nā kàu ūi-tô͘ ê pâng, siang ba̍k chù-sı̂n khoàⁿ pı̂n-hong ê tô͘, chóng-sı̄ in-ūi sūn-thàn ūi-tô͘-su só͘ hoan-hù chiah m̄-káⁿ koh mn̄g. Keng-kè kú-kú, chit-ê tô͘ ūi hó, ūi-tô͘-su chiū chiàu chêng só͘ gı̄-lūn ê chı̂ⁿ hō͘--i, koh lēng-goā ēng chı̂ⁿ siúⁿ--i kóng, “Goá ūi chit-ê tô͘ chin kai-chài, í-keng ū lâng ēng choē-choē chı̂ⁿ boé--khı̀-lah. Lí ê bı̄n chin súi, kap kó͘-chá chhut-miâ ê cha-bó͘ gín-á chhin-chhiūⁿ, goá taⁿ beh ūi pa̍t khoán ê tô͘ thèng-hāu goá hit-ê tô͘ ê kó phah hó, nā tio̍h koh ēng lí chiah kiò lí lâi.” Cha-bó͘ gín-á chiū the̍h chı̂ⁿ iā kóng to-siā.
Ūi-tô͘-su lóng bô chù-ı̀ tı̄--i, i chiū kiâⁿ oá pı̂n hong ê tô͘ chêng tı̀-ı̀ khoàⁿ, chēng-chēng siūⁿ tia̍p-á-kú, hut-jiân kā ūi-tô͘-su kóng, “Chit-ê Kiù Chú án-ni thoè lí siū-khó͘, phah-sǹg sian-siⁿ tek-khak tı̀-ı̀ thiàⁿ--I-mah?” Ūi-tô͘-su bô ı̀n--i, cha-bó͘ gín-á chiū hoân-ló kóng-oē bô ha̍h i ê ı̀-sù, kiàn-siàu ê khoán-sit chhut-hiān tı̄ chhùi-phoé, koáⁿ-kín chiū saⁿ-sı̂ tò--khı̀. Cha-bó͘ gín-á tò--khı̀ liáu-āu, ūi-tô͘-su siūⁿ cha-bó͘ gín-á só͘ kóng ê oē sim pho̍k-pho̍k thiàu, jı̍t-mı̂ boē pêng-an, chek-sı̂ tiāⁿ-tio̍h beh khı̀ lé-pài-tn̂g, kā sı̂n-hū kóng, kiám-chhái thang tit-tio̍h pêng-an, sı̂n-hū mn̄g i khoàⁿ chai kàu-lāi ê kui-kú á m̄ chai, sèng-tō thang sı̀n--mah? Koh kā i kóng, “Liáu-āu sim-lāi m̄ bián koh iu-būn,” chiū thoè i kı̂-tó sià-choē, kah i an-sim tò--khı̀. Āu-lâi ūi-tô͘-su chiong pı̂n-hong ê tô͘ kau i, kè-chı̂ⁿ siu i khah sio̍k, phah-sǹg kóng goá chı̄n gı̄-bū khek-kí, tek-khak oē hō͘ Siōng-tè hoaⁿ-hí, sim-koaⁿ chiū chiām-chiām pêng-an.
Āu-lâi nā ka-kı̄ chı̍t lâng tı̄ chēng-chēng ê só͘-chāi teh ūi-tô͘ ta̍uh-ta̍uh siūⁿ hit-ê cha-bó͘ gín-á só͘ kóng, “Kiù Chú án-ni thoè lí siū hêng-hoa̍t lí tek-khak thiàⁿ--I.” Chit kù oē koh siūⁿ kóng, “Goá sı̍t-chāi m̄-bat kèng-ài chí nn̄g jı̄, thái-thó oē pò-tap Iâ-so͘ ê sin-khu, lâi ka-kı̄ hō-choè ha̍k-seng?” Tùi án-ni koh iu-būn boē pêng-an, boē choan-sim ūi-tô͘, lóng bô hèng-bı̄. Kiâⁿ-iû tı̄ koe-chhı̄ chhin-chhiūⁿ teh chhē phah-m̄-kı̀ⁿ ê mı̍h. Chı̍t-jı̍t khoàⁿ-kı̀ⁿ choē-choē lâng kiâⁿ jı̍p hāng-á lāi chı̍t keng chhù-á, chiū mn̄g lâng kóng, “Chit ūi sı̄ sím-mı̍h só͘-chāi?” Ū lâng kā i kóng, “Chit-ê sı̄ Ho̍k-goân kàu ê lé-pài-tn̂g.” Koh kóng, “In sı̄ chun-thàn Sèng-chheh ê oē choè chong-chí, lán hōng thian-chú kàu ê lâng, khoàⁿ in sı̄ ı̄ⁿ-toan, put-chí m̄ ài jı̍p in ê lé-pài-tn̂g.” Ūi-tô͘-su phah-sǹg chit-sı̂ tı̄ koe-lō͘ kiâⁿ-iû, koh sim-thâu loān-loān, put-jû jı̍p lâi thiaⁿ tō-lí, kiám-chhái thang soah iu-būn, chiū tè chèng-lâng jı̍p--khı̀, thiaⁿ-kı̀ⁿ bo̍k-su só͘ kóng ê oē kap pa̍t lâng bô tâng, í-chêng lóng bô thiaⁿ-kı̀ⁿ chit-hō ê oē. Thoân-tō ê lâng chhin-chhiūⁿ put-chí chai só͘ kóng ê oē sı̄ chin--ê. Lé-pài soah chiū kap bo̍k-su tâm-lūn, bo̍k-su chiū the̍h ka-kı̄ ê Sèng-chheh chioh i khoàⁿ, khó͘-khǹg i tio̍h tı̀-ı̀ Iâ-so͘ ê oē, tio̍h chhim-sı̀n Sèng-chheh lóng-chóng ê chin-lí, bô kú chiū oē siū Sı̂n ê kám-hoà, tit-tio̍h chin sià-bián choē ê pı̀-koat. Thiaⁿ i ê oē put-chí ū chhù-bı̄, iáu-kú bô choē-koà ê só͘-chāi, Āu-lâi i soè-jı̄ tha̍k chit pún Sèng-keng, hut-jiân chiū bêng-pe̍k, chai i siū Siōng-tè ê un-tián lâi sià-bián choē tit-tio̍h têng-thâu-siⁿ, choè Iâ-so͘ sı̀n-sı̍t ê ha̍k-seng. Chá-sı̂ m̄ chai beh cháiⁿ-iūⁿ lâi thiàⁿ Iâ-so͘, hiān-sı̂ chiū í-keng bêng-pe̍k, sim-koaⁿ chiū siⁿ-khí pò-tap ê ı̀-sù, m̄-chai beh cháiⁿ-iūⁿ pò-tap.
Chit-sı̂ Tek-kok iáu-bē ū chong-kàu chū-iû ê hoat-lu̍t, Ho̍k-goân kàu ê bo̍k-su siông-siông siū pún-toē ê Kàu-hoē khún-pek, tùi án-ni chiū lı̄-khui To͘-sū-tō siâⁿ. Ūi-tô͘-su chin ài thoè Iâ-so͘ choè kan-chèng, khó-sioh bô kháu-châi, boē oē tng chèng-lâng ê bı̄n-chêng hó-táⁿ tâm-lūn, put-chí boē koat-toàn, teh siūⁿ ê sı̂, chhiú the̍h iân-pit bô ı̀-tiong sūn chhiú ūi Iâ-so͘ ê thâu-khak tı̀ chhı̀-á bián-liû ê tô͘, ūi hó, soà ka-kı̄ tio̍h kiaⁿ, hut-jiân siūⁿ kàu lâng ta̍k ê lóng ū kiàn-tiông, Siōng-tè iáu-bē siúⁿ-sù goá kháu-châi, kiám boē ēng goá ūi-tô͘ ê pit lâi piáu-bêng Ki-tok ê thiàⁿ-sim--mah? Koh siūⁿ chêng só͘ ūi ê pı̂n-hong tô͘ sui-jiân tit-tio̍h chèng-lâng o-ló, sı̍t-chāi ū bô oân-choân hó ê só͘-chāi, in-ūi hit-sı̂ ūi chit-ê tô͘, chí ū hián-bêng Kiù Chú bı̄n-hêng ê kan-khó͘, nā beh koh ūi, tek-khak tı̄ iu-būn kan-khó͘ ê tiong-kan, oē hián-chhut chin toā ê thiàⁿ sim chiah sı̄ oân-choân, tùi án-ni chiū kı̂-tó, kiû Siōng-tè chí-sı̄ tio̍h cháiⁿ-iūⁿ lâi ūi chit-ê tô͘, lâi hián-bêng Siōng-tè ê lı̂n-bín, Iâ-so͘ ê un-tián, hō͘ hoān-nā khoàⁿ-kı̀ⁿ tô͘ ê lâng lóng ū hoán-hoé tâu-hâng I ê sim.
Ūi ê sı̂ chhiú bô chiàu ka-kı̄ ê ı̀-sù lâi ūi, siông-siông chhut tı̄ bô phah-sǹg chiū-sı̄ ka-kı̄ khoàⁿ tô͘ iā put-chí kı̂-koài, ūi hó, kı̀ⁿ-nā khoàⁿ-kı̀ⁿ tô͘ ê lâng bô m̄ o-ló--i, ū lâng beh ēng choē-choē chı̂ⁿ kā i boé, ūi-tô͘-su m̄ boē--i, sûi-sı̂ sàng hō͘ pún siâⁿ ê kong-só͘ khı̀ tiàu, hō͘ pêng-siông ê lâng lóng khoàⁿ oē kı̀ⁿ. Tô͘ ē ū siá nn̄g kù si kóng, “Goá bat thoè lí siū-khó͘, lí beh thè Goá cháiⁿ-iūⁿ?” Siâⁿ-lāi khoàⁿ tô͘ ê lâng put-chí choē, siông-siông thiaⁿ-kı̀ⁿ kiau-ngō͘ ê lâng liām chit nn̄g kù si, ūi-tô͘-su iā siông-siông kàu kong-tn̂g chhù-āu an-chēng ê só͘-chāi àm-chı̄ⁿ kı̂-tó Siōng-tè hō͘ chit pak tô͘ ū kám-hoà--lâng ê kong-hāu. Chı̍t-jı̍t chèng-lâng sı̀-soàⁿ liáu-āu ū chı̍t ê sòng-hiong ê hū-jı̂n-lâng tiāⁿ-tiāⁿ khiā tı̄ tô͘ chêng, bı̄n ū ba̍k-sái, chhin-chhiūⁿ sı̍t-chāi ū siū kám-tōng, siông-sè khoàⁿ chiah chai chiū sı̄ chêng hit-ê choè seng-lí lâng ê cha-bó͘ gín-ná. Cha-bó͘ gín-ná kóng, “Sian-siⁿ--ah, Kiù Chú thiàⁿ--lí thoè lí pàng-sak sin-khu, lí ūi chit pak tô͘ lâi pò-tap--I, goá sı̄ seng-lí lâng ê cha-bó͘ gín-á, boē-oē ū hūn tı̄ I ê thiàⁿ-sim, beh cháiⁿ-iūⁿ?” Ūi-tô͘-su chiū chiong sèng-tō kóng hō͘ i chai kóng, “Iâ-so͘ sı̍t-chāi thoè lí sí.” Koh chiong pún-sin tit-tio̍h kiù ê lí-iû, chiū-sı̄ tùi i chá-chêng só͘ mn̄g--ê, “Chú thoè lí sí lí tek-khak tı̀-ı̀ thiàⁿ--I.” Chit-sı̂ ūi-tô͘-su bô lia̍h cha-bó͘ gín-á ta̍uh-ta̍uh mn̄g choè kiáu-jiáu chiū chiong Iâ-so͘ sí āu chiūⁿ-thiⁿ kap koh lâi sè-kan ê tō-lí kóng hō͘ i thiaⁿ, cha-bó͘ gín-á sim siū kám-tōng, tit-tio̍h Kiù Chú sià-choē ê un, ke̍k-kı̂ hoaⁿ-hí, iā kam-goān choè Ki-tok ê ha̍k-seng, ūi Chú choè kan-chèng.
Téng-bı̄n só͘ kóng, sı̄ Tek-kok kúi-nā pah nı̂ chêng ê tāi-chı̀, Āu-lâi kúi cha̍p nı̂ ū siàu-liân choè koaⁿ ê kiáⁿ-jı̂, chē bé-chhia kiâⁿ-iû tı̄ To͘-sū-tō siâⁿ, chhı̄-bé ê sı̂ kiâⁿ-iû tı̄ kong-tn̂g, khoàⁿ-kı̀ⁿ chit pak tô͘, toā-toā siū kám-tōng, kéng-jiân chù-sı̂n teh khoàⁿ, iân-chhiân sı̂-kan, jı̍t àm beh koaiⁿ-mn̂g, kò͘-mn̂g ê lâng tah i ê keng-thâu, chiah tio̍h-kiaⁿ chhut-mn̂g tò--khı̀. Chit lâng miâ kiò Sim Séng-tō (chhut-sı̀ tı̄ chı̍t chheng chhit pah nı̂, sí tı̄ chı̍t-chheng chhit-pah la̍k-cha̍p nı̂) sı̄ hù-kùi ê kiáⁿ-jı̂, tò-khı̀ kàu kheh-tiàm, jı̍p pâng, kūi-lo̍h tı̄ thô͘-kha, chiong hù-kùi kong-lô miâ-siaⁿ lóng hiàn hō͘ Kiù Chú, koh chı̍t-sı̀-lâng lı̍p-chı̀ beh choè Siōng-tè ê kang, siat-lı̍p Tek-kok chı̍t ê chhut-miâ chin jia̍t-sim khek-kí ê Kàu-hoē. In la̍k-cha̍p lâng ê tiong-kan, chiū tio̍h chhe chı̍t lâng khı̀ ke̍k hn̄g ê só͘-chāi, thoân-tō tı̄ pài-pu̍t ê lâng ê tiong-kan. Sı̍t-chāi sı̄ pa̍t ê Kàu-hoē só͘ boē pí--tit-ê. Beh khoàⁿ Sū-teng-pó ê tô͘ hiān-kim boē khoàⁿ--kı̀ⁿ, in-ūi kúi nā cha̍p nı̂ chêng, kong-tn̂g tio̍h hé-sio, chit tiuⁿ tô͘ iā sio--khı̀. Ūi-tô͘-su ūi hó liáu-āu, chit-ê tô͘ bat hō͘ choē choē lâng ka-kı̄ mn̄g kóng, Ki-tok bat thoè goá sí, goá tio̍h cháiⁿ-iūⁿ tio̍h-boâ lâi pò-tap? Tha̍k ê lâng--ah! Chhiáⁿ siūⁿ chit-ê tô͘ sui-jiân boē-oē khoàⁿ--kı̀ⁿ, m̄-kú tô͘ tiong siá ê si lóng boē bia̍t-bô. Iā ǹg-bāng lí oē ēng chit-kù oē ka-kı̄ mn̄g.
