Sè-kan Lâng Tio̍h Cháiⁿ-iūⁿ`Kiâⁿ Chiah Thang Tit-tio̍h Kiù.
(Tha̍k Chhut Ai-kı̍p kı̀ 12:24--30.)
Sin Kū iok ê chóng-chí, chiū-sı̄ hō͘ sè-kan lâng oá-khò Iâ-so͘ tı̄ sı̍p-jı̄-kè ê kong-lô, chiah thang bián tı̄ sím-phoàⁿ ê sı̂ tēng choē. Siông-sè chhâ-khó Sèng-keng chheng chiuⁿ bān chat, hoán hok koé-bêng, bô m̄ sı̄ ài sè-kan lâng siông-sè bêng kiù-un ê hoat-tō͘, sı̍t-chāi Sèng-keng só͘ lūn ê sū-chek pau-hâm ke̍k khoah. Í-sek-lia̍t lâng tit-tio̍h kiù chhut Ai-kı̍p ê khó͘-lān, sı̄ tāi-seng piáu-bêng lán āu-tāi ê lâng oē thoat-lı̄ choē-ok tāng-tàⁿ ê ki-koan. Só͘-í lán tha̍k chit chiuⁿ, eng-kai khoàⁿ choè Siōng-tè kiù-tō hêng-chōng ê tô͘, kap lán teh-beh tit kiù ê lâng ū toā lı̄-ek. Í-sek-lia̍t lâng tı̄ Ai-kı̍p bē tháu-pàng ê kéng-hóng chhin-chhiūⁿ iáu-bē tit-tio̍h kiù ê choē-jı̂n. Í-sek-lia̍t lâng tit-tio̍h tháu-pàng só͘ ēng ê hoat-tō͘ chhin-chhiūⁿ tāi-seng piáu-bêng Iâ-so͘ Ki-tok āu jı̍t kiù choē-jı̂n só͘ ēng ê hoat-tō͘. Í-sek-lia̍t lâng tiàm Ai-kı̍p choè ke̍k khó-lı̂n ê lô͘-châi, bô lâng oē pang-chān in, iā bô lâng goān pang-chān in, in ka-kı̄ kı̀-jiân boē ka-kı̄ pang-chān, siat-sú ka-kı̄ kiù, koh-khah kan-khó͘, kap bē hoán-hoé koé-pı̀ⁿ ê choē-jı̂n saⁿ-tâng. Bē hoán-hoé koé-pı̀ⁿ ê lâng choè chêng-io̍k ê lô͘-châi, chhin-chhiūⁿ Í-sek-lia̍t lâng choè Ai-kı̍p ê lô͘-châi. Bē hoán-hoé koé-pı̀ⁿ ê lâng choè choē-ok ê lô͘-châi, éng bô tháu-pàng ê jı̍t, chhin-chhiūⁿ kha chhiú hō͘ lâng pa̍k--teh, thong sin-khu boē-oē chū-iû. Sè-kan lâng choè m̄-tio̍h, choè pháiⁿ, ta̍uh-ta̍uh hoān-tio̍h Siōng-tè gı̄ ê siū-khı̀, ka-kı̄ chai boē siám-pı̄ chiong-lâi ê hêng-hoa̍t. Kai-chài Iâ-so͘ hiàn ka-kı̄ ê sin-khu, chhin-chhiūⁿ kó͘-chá lâng lâu iûⁿ-á ê huih hiàn choè chè-mı̍h, choè bán-hoê choē-ok ê lé, só͘-í Siōng-tè chiū hoaⁿ-hí chiap-la̍p lán ū choē ê lâng.
Tng sı̂ Siōng-tè kàng chai-ē tı̄ Ai-kı̍p kok, in-ūi Í-sek-lia̍t lâng khiā-khí tı̄ hit só͘-chāi, boē bián-tit kap Ai-kı̍p lâng tâng-siū chai-lān. Kai-chài Siōng-tè chá-chá lı̍p chı̍t ê hoat-tō͘, kiù kéng-soán ê peh-sı̀ⁿ lı̄-khui, nā bô, Í-sek-lia̍t lâng ê toā-kiáⁿ kap thâu-chúi ê cheng-siⁿ, ia̍h tio̍h kap Ai-kı̍p lâng ê toā-kiáⁿ thâu-chúi cheng-siⁿ pı̂ⁿ-pı̂ⁿ siū phah--sí. (Chhut 12: 19[29].) Lán sè-kan lâng ia̍h sı̄ án-ni. Sèng-keng kóng, “Sı̀n I ê lâng boē siū sím-phoàⁿ, m̄ sı̀n ê lâng í-keng siū sím-phoàⁿ, in-ūi m̄ sı̀n Siōng-tè to̍k-siⁿ kiáⁿ ê miâ.” (Iok-hān 3:18.) Tùi che khoàⁿ, lán ê choē í-keng tiāⁿ-tio̍h, chí-ū hêng-hoa̍t bē kàu sin-chiūⁿ nā-tiāⁿ. Í-sek-lia̍t lâng tı̄ Ai-kı̍p, Siōng-tè ê kiù-un bē hián-chhut ê tāi-seng, in ê choē í-keng tiāⁿ-tio̍h--lah. Í-sek-lia̍t lâng thàn Siōng-tè ê hoan-hù, chiong iûⁿ-á ê huih lâi boah siang-pêng mn̂g-khiā, thong ke ê lâng lóng chū-chı̍p tı̄ boah-huih ê mn̂g-lāi, m̄ hō͘ in chhut--khı̀. Iûⁿ-á ēng hé sio-se̍k chia̍h ê sı̂ tio̍h hâ-toà, chhēng-oê, kia̍h koáiⁿ-á teh chia̍h, chit kúi hāng ê hoan-hù lóng tio̍h sı̍t-hêng, tē-it iàu-kín--ê chiū-sı̄ hiù-huih. Siōng-tè kóng, “Goá chı̍t-ē khoàⁿ-kı̀ⁿ ū huih, chiū poâⁿ-kè lín ê chhù.” Lán chhâ-khó huih ê ı̀-sù bô oh bêng, chiū-sı̄ piáu-bêng Iâ-so͘ ê pó-huih. Iûⁿ-á ê huih kiù Í-sek-lia̍t lâng, chiū-sı̄ tāi-seng piáu-bêng Iâ-so͘ Ki-tok ê huih kiù sè-kan ê choē-jı̂n. Thâi bô choē ê iûⁿ-á lâi kiù Í-sek-lia̍t lâng ê toā-kiáⁿ, chhin-chhiūⁿ Sèng-keng kóng, Siōng-tè ê Iûⁿ-ko Ki-tok ūi-tio̍h sè-kan lâng ê choē, lâu-huih sí-sit, gı̄--ê thoè put-gı̄ sí, hō͘ sı̀n ê lâng éng boē tēng-choē. Án-ni Iâ-so͘ ê sí chiū thang kiù sı̀n I ê lâng tit-tio̍h éng-oa̍h, éng boē kàu bia̍t-bô. Í-sek-lia̍t lâng ēng iûⁿ-á huih boah tı̄ mn̂g-bâi mn̂g-khiā, thong ke ê lâng bih tı̄ chhù-lāi, che chiū-sı̄ ēng huih choè siám-pı̄ hoān-lān ê só͘-chāi, oá-khò huih chiū tit-tio̍h kiù. Phah-sí Ai-kı̍p lâng ê toā-kiáⁿ ê thiⁿ-sài khoàⁿ-kı̀ⁿ huih chiū bô jı̍p--lâi. Tiong-kok ū só͘-chāi ê hong-sio̍k, tú-tio̍h un-e̍k á-sı̄ beh siám-pı̄ sím-mı̍h chai-hāi, tio̍h thâi koe, iûⁿ, cheng-siⁿ, chiong huih boah tı̄ mn̂g-bâi kap siā-lí ê sı̀-bı̄n, lâi siám-pı̄ un-e̍k, an-tiāⁿ hé-chai. Soè-hàn gín-ná ia̍h ū ēng huih siá “sı̍p” jı̄ tı̄ thâu-hiah lâi siám-pı̄ kúi-sūi. Chit hō hong-sio̍k m̄ chai tùi siáⁿ sı̂ khí, chóng-sı̄ ia̍h thang ín choè Pó-huih sio̍k-choē ê kan-chèng. Í-sek-lia̍t lâng ēng huih kô͘ tı̄ mn̂g--nı̍h, chiū tit-tio̍h huih ê pó-hō͘, choē-jı̂n lâi chhē Iâ-so͘, sı̀n-ho̍k oá-khò Iâ-so͘, chiū tit-tio̍h Chú lâu-huih kong-lô ê pı̀-iū, hoān-nā chiū-kūn Iâ-so͘, ka-kı̄ jı̄n choè choē-jı̂n, bêng chai sím-phoàⁿ boē tô-siám--tit, siūⁿ bih tı̄ Iâ-so͘ ê huih ē. Siōng-tè bat kóng, “Khoàⁿ-kı̀ⁿ mn̂g-bâi mn̂g-khiā boah-huih, tek-khak poâⁿ-kè in ê mn̂g.” (Chhut 12:23.) In-ūi án-ni in bô giâu-gı̂, m̄-káⁿ piān-pok, chí-ū siong-sı̀n Iâ-so͘ thoè in sí, sı̄ ū kong-hāu, oē kiù i bián-tit Siōng-tè ê toā siū-khı̀, chiū chiàu Siōng-tè kiù un ê hoat-tō͘ choè, bô m̄ tit-tio̍h pêng-an.
Í-sek-lia̍t lâng tı̄ Ai-kı̍p siú Poâⁿ-kè choeh, sui-jiân siú Siōng-tè só͘ hoan-hù ta̍k-hāng ê lé-sò͘, chóng-sı̄ tē-it m̄-thang bô--ê, chiū-sı̄ boah-huih chit-hāng. Siōng-tè lóng bô kóng khoàⁿ-kı̀ⁿ lín io hâ toà, kha chhēng oê, chhiú kia̍h koáiⁿ, Goá chiū poâⁿ-kè bô hāi--lín. Siat-sú ū lâng ta̍k-hāng chiàu só͘ hoan-hù khı̀ kiâⁿ, kı̂-tiong làng boah-huih chı̍t hāng bô kiâⁿ, lí phah-sǹg cháiⁿ-iūⁿ? Thiⁿ-sài kiám m̄ sı̄ iû-goân beh jı̍p-khı̀ thâi sí in ê toā kiáⁿ--mah? Só͘-í bô lūn lâng cháiⁿ-iūⁿ chun-siú Poâⁿ-kè choeh, nā bô ēng huih boah tı̄ mn̂g--nı̍h, kı̂-û ê lé-sò͘ sui ū oân-choân siú, iû-goân boē bián-tit toā kiáⁿ sí. Sè-chiūⁿ ū kiâⁿ choè toan-hong ê lâng, goā-phê ū kàu-iú ê khoán-sit, tit-tio̍h chhù-piⁿ o-ló, sı̄m-chı̀ í-keng hōng-kàu niá soé-lé, siông-siông ū lâng kiò i choè Ki-tok-tô͘, pêng-sò͘ iā chun-siú Kàu-hoē ta̍k-hāng ê kui-kú lé-gı̂, in ka-kı̄ phah-sǹg m̄ kiaⁿ chiong-lâi ê sím-phoàⁿ, bô phah-sǹg bô bih tı̄ Iâ-so͘ pó-huih ê ē-bı̄n, lóng bô ún-tàng, in-ūi lâng khò ka-kı̄ ê tek-hēng, chóng boē bián-tit ka-kı̄ phiàn ê kè-sit. Sèng-keng kóng, “Siōng-tè boē phiàn--tit.” Kàu sím-phoàⁿ ê sı̂ boē bián tēng-choē, chí ū tit-tio̍h Iâ-so͘ pó-huih ê kiù-un, chū-jiân pêng-an bô tāi-chı̀. Í-sek-lia̍t lâng thái oē tit-tio̍h Siōng-tè ê kiù-un? Lóng m̄-sı̄ khò chia̍h iûⁿ-bah ia̍h m̄-sı̄ khò ū kiâⁿ ta̍k-hāng ê lé-gı̂, só͘ khò ê chí-ū tı̄ mn̂g-goā ê huih; nā chiong huih boah mn̂g-goā chiū thang tit-tio̍h kiù, bô, sui tı̄ ke-lāi chun-siú Siōng-tè ê hoan-hù, ia̍h bô lı̄-ek, kiaⁿ-liáu sí-sit iû-goân kàu ke-lāi lâng. Í-sek-lia̍t lâng chai hit mı̂ ū hāi-sí toā-kiáⁿ ê thiⁿ-sài beh tùi i ê mn̂g-kháu kè, thiⁿ-sài chí-ū jı̄n bêng chı̍t hāng mı̍h choè kı̀-hō, khoàⁿ-kı̀ⁿ chit hāng mı̍h, chiū chai tio̍h jı̍p lāi phah-sí toā kiáⁿ á bián. Chit hāng mı̍h sı̄ sím-mı̍h? Chiū-sı̄ boah tı̄ mn̂g-goā mn̂g-khiā, mn̂g-bâi ê huih. Thiⁿ-sài lóng bô jı̍p-lâi khoàⁿ lâng ū hâ-io, chhēng-oê, kia̍h koáiⁿ-á--bô, só͘ chù-ı̀--ê, mn̂g--nı̍h ê huih nā-tiāⁿ. Siōng-tè kóng, “Goá chı̍t ē khoàⁿ-kı̀ⁿ huih chiū poâⁿ-kè lí ê chhù.” Chhı̀ siūⁿ “Lí” jı̄ ê ı̀-sù, put-kò chí kò-jı̂n lâi kóng, lóng bô koán pa̍t-lâng ê tāi-chı̀, ta̍k lâng ka-kı̄ choè ka-kı̄ siu, sím-mı̍h lâng siong-sı̀n chiū hit-ê tit-tio̍h kiù, sím-mı̍h lâng m̄ kô͘ huih chiū hit-ê siū choē. Kàu tı̄ chia̍h bô kàⁿ piáⁿ, khó͘-chhài kap tit-tio̍h kiù lóng bô koan-hē, nā mn̂g téng bô huih, chia̍h bô kàⁿ piáⁿ, khó͘-chhài iû-goân bô lı̄-ek. Tı̄ I Ko-lı̂m-to 5:7, ū chiong chin-chiàⁿ kap sêng-sı̍t lâi koé-bêng bô kàⁿ piáⁿ ê ı̀-sù, khó͘-chhài ê ı̀-sù, chiū-sı̄ in-ūi hoān-choē lâi iu-būn, chit nn̄g hāng kap tit-tio̍h kiù bô kan-sia̍p, lóng boē hō͘ choē-jı̂n ū si-hô ǹg-bāng tit-kiù. Khó-sioh sè-kan ū choē-choē lâng oá-khò chhin-chhiūⁿ chit hō ê tāi-chı̀, ǹg-bāng tit-tio̍h kiù. Siông-siông thiaⁿ-kı̀ⁿ lâng kóng, “Goá hiān-chāi chhut-la̍t choè hó-lâng.” “Khó-sioh goá chiông-chêng ū choè chin-choē m̄-tio̍h.” Kóng chí nn̄g kù oē ê lâng nā bô cha̍p hun sı̀n Iâ-so͘ thoè i sí, thoè I lâu-huih, i chiū boē tit-tio̍h kiù, i nā bô ēng Iâ-so͘ só͘ lâu ê huih choè siám-pı̄ choē ê só͘-chāi, kan-ta koé-pı̀ⁿ, hoán-hoé lâi ka-kı̄ kiù, éng boē tit--tio̍h. Chûn-sim tiong-hō͘ sı̄ lâng ê pún-hūn, pho͘ kiô chō-lō͘, toā sià-sı̀, chín-chè sòng-hiong lâng, ia̍h sı̄ choè oē kàu ê lâng só͘ eng-kai tio̍h choè, chí kúi-hāng lóng boē kiù lâng. Thàn hó lı̄ pháiⁿ, hoán-hoé choē, koé kè-sit, ia̍h bē-bat kiù chı̍t lâng, chiah-ê lóng sı̄ sio̍k kiù-un lāi-bı̄n só͘ ū ê m̄ sı̄ tit-tio̍h kiù ê toē-ki. Sè-kan lâng toàn-toàn boē lia̍h kiâⁿ téng-bı̄n hiah-ê sū chiū oē tit-tio̍h kiù, to̍k-to̍k oá-khò pó-huih chiah oē tit-tio̍h kiù. Siông-siông khoàⁿ-kı̀ⁿ sè-kan ū choē-choē lâng lia̍h jia̍t-sim choè tē it iàu-kín, phah-sǹg ū jia̍t-sim, sêng-sim chiū ū ǹg-bāng, kı̂-sı̍t chhin-chhiūⁿ bô kàⁿ piáⁿ chı̍t-iūⁿ, boē-oē kiù tı̄ Ai-kı̍p ê Í-sek-lia̍t lâng thoat-lı̄ kan-khó͘, thang chai chin-sı̍t jia̍t-sim ia̍h boē kiù choē-jı̂n. Lâng sui-jiân jia̍t-sim, ū sı̂ i só͘ jia̍t-sim sı̄ chhò-gō͘ ê jia̍t-sim, iû-goân bô lō͘-ēng, chhin-chhiūⁿ Pó-lô iáu-bē sı̀n tō-lí í-chêng hit sı̂ i sui-jiân ke̍k jia̍t-sim, iû-goân boē tùi jia̍t-sim kiù--i, khó-kiàn kan-ta oá-khò jia̍t-sim, sı̍t-chāi boē hō͘ lâng tit-tio̍h kiù, chí-ū Iâ-so͘ ê pó-huih chiah oē kiù lâng.
Ū lâng kóng, “Oá-khò Ki-tok Iâ-so͘, koh chı̄n la̍t choè chheng-khı̀ ê lâng, goá thang ǹg-bāng tit-tio̍h kiù.” Chóng-sı̄ che m̄-sı̄ Siōng-tè kiù lâng ê hoat-tō͘, Siōng-tè bē-bat kóng, “Goá khoàⁿ-kı̀ⁿ huih ê sı̂, lín chin-chin ū chia̍h iûⁿ-bah, Goá chiū poâⁿ--kè.” Ia̍h bē-bat kóng, “Goá khoàⁿ-kı̀ⁿ huih ê sı̂, lín chin-chin ū chia̍h bô kàⁿ piáⁿ, Goá chiū poâⁿ--kè.” Siáⁿ-sū kóng án-ni? In-ūi Siōng-tè ài lâng chai chí-ū ke̍k chun-kùi êng-kng, choē-jı̂n put-kò ēng chit-ê hoat-tō͘ chiū thang tit-tio̍h kiù. Tû “Iâ-so͘ ê huih” í-goā, bô lūn ēng sím-mı̍h hoat-tō͘, lán éng boē tit-tio̍h kiù. Siōng-tè kı̀-jiân tēng lí ê choē lí chiū tio̍h siū hêng-hoa̍t, nā-sı̄ Iâ-so͘ ūi-tio̍h lí só͘ eng-kai siū ê hêng-hoa̍t, só͘-í sí tı̄ sı̍p-jı̄-kè. Chiàu Siōng-tè só͘ tiāⁿ tio̍h ê hoat-lu̍t, choē-jı̂n eng-kai chiàu só͘ hoān ê choē-ok siū-khó͘, siū sí, m̄-kú Siōng-tè ê Kiáⁿ sí tı̄ sı̍p-jı̄-kè téng lâu-huih, só͘ lâu ê pó-huih I í-keng thoè lí lâu lah. Tit-tio̍h kiù ê lâng tı̄ thiⁿ-téng gı̂m-si kóng, “Lí bat siū thâi lâu-huih, tùi bān cho̍k-sı̀ⁿ ê tiong-kan sio̍k-hoê goán lâi kui Siōng-tè.” (Khé-sı̄-lio̍k 5:9.) Choē-jı̂n cháiⁿ-iūⁿ oē tit kàu thian-kok hióng-siū êng-hoâ, lóng m̄-sı̄ oá-khò ka-kı̄ ê hoán-hoé, koé-pı̀ⁿ, hó só͘-kiâⁿ, á-sı̄ choè sím-mı̍h im-chek, choan-choan sı̄ khò Iâ-so͘ ê pó-huih, tùi án-ni thang tit-tio̍h êng-kng. Sèng-keng kóng, “I bat ēng iûⁿ-ko ê huih soé i ê saⁿ kàu pe̍h-pe̍h, tiàm tı̄ Siōng-tè ê chō-ūi chêng.” (Khé-sı̄-lio̍k 7:14.15.) Nā bô, koat-toàn boē-tiàm Siōng-tè ê pó-chō chêng. Phah-sí Ai-kı̍p toā kiáⁿ ê thiⁿ-sài khoàⁿ-kı̀ⁿ mn̂g-bâi mn̂g-khiā í-keng boah-huih chiū chai mn̂g-lāi ê choē-jı̂n í-keng sí--lah. Sè-kan lâng bô lūn hoān-choē loā tāng, sí-bô chiū-sı̄ i ê pò-èng, taⁿ í-keng sí, kiám iáu ū siáⁿ choē thang tēng. Hoān-nā sio̍k Iâ-so͘ Ki-tok--ê, cháiⁿ-iūⁿ bián tēng choē? Chiū-sı̄ Iâ-so͘ í-keng choè tāi-piáu thoè choē-jı̂n sí ê pı̂n-kù. Lí siūⁿ chit-hō kiù-un sı̄ lí ka-kı̄ só͘ oē sêng-chiū--ê mah? Lí iû-goân siūⁿ khò pún-sin kiâⁿ hó-sū chiū thang kàu Thian-tông--mah? Lí iû-goân siūⁿ choè khiân-sêng lâi chiūⁿ Thian-tông mah? Lí iû-goân siūⁿ m̄ khò Iâ-so͘ ê pó-huih, beh ēng pa̍t ê hoat-tō͘ chiūⁿ Thian-tông--mah? Kiám-chhái lí í-keng sêng-jı̄n chí-ū Iâ-so͘ ê huih oē hō͘ lí tit-tio̍h kiù, lí kiù-kèng choè sím-mı̍h lâi kiù ka-kı̄? Lí tàu-tí ēng sím-mı̍h hoat-tō͘ lâi kiù ka-kı̄? Chhiáⁿ lí soè-jı̄ siūⁿ, chiah-ê būn-toê lóng sı̄ chin iàu-kín, lí eng-kai thàn-chá tiāⁿ-tio̍h. Sè-kan ia̍h ū choē-choē lâng sim-lāi put-chí moá-ı̀ kóng, “Goá sêng-jı̄n chí-ū Iâ-so͘ oē kiù lán.” “Lán chai lán lóng sı̄ choē-jı̂n.” “Lán sı̀n Iâ-so͘ ū sí.” Chóng-sı̄ án-ni chiū kàu-gia̍h--lah-mah? Án-ni chiū oē tit kiù--mah? Í-sek-lia̍t lâng poàⁿ-mı̂ ê sı̂, nā kan-ta siūⁿ iûⁿ-á í-keng thâi-lah.” Kiám án-ni chiū oē kiù Í-sek-lia̍t lâng--mah? Chiàu án-ni chiū oē kiù choē-ok cha̍p-hun tāng ê choē jı̂n--mah? Sı̍t-chāi bô kàu-gia̍h thang kiù--in.
Siōng-tè bē-bat kóng, “Iûⁿ-á thâi--lah, lín chiū tit-tio̍h pêng-an.” Siōng-tè kóng, “Lín tio̍h ēng huih boah tı̄ mn̂g-bâi, mn̂g-khiā, lín bih tı̄ lāi-bı̄n chiū tit-tio̍h pêng-an.”
Lín bo̍h-tit ka-kı̄ jia-moâ lâi an lí ê liông-sim, chhin-chhiūⁿ i-seng tah siau-to̍k io̍h tı̄ pı̄ⁿ ê phê-hu, boē tû hit-ê pı̄ⁿ-kun, kóng, “Goá sı̀n Ki-tok ū sí.” Mô͘-kúi ia̍h sı̄ án-ni sı̀n. Lí phah-sǹg Mô͘-kúi ū giâu-gı̂ Iâ-so͘ bô sí--mah? Mô͘-kúi sı̍t-chāi bô giâu-gı̂, m̄-kú Mô͘-kúi boē oá-khò huih lâi bih tı̄ pó-huih ê ē-bı̄n. Lí chhiat-chhiat m̄-thang ka-kı̄ su-sim moá-chiok, pàng khùn-khùn kóng, “Goá chin pêng-an.” Tek-khak tio̍h chin-sim hoán-hoé koé-pı̀ⁿ choè oāⁿ sin ê lâng, chiah thang bih tı̄ Iâ-so͘ ê lāi-bı̄n, pó-huih oē jia-khàm lí chiông-chêng lóng-chóng ê choē-sio̍k, án-ni it-tēng tit-tio̍h kiù.
Lí siūⁿ Iâ-so͘ ê pó-huih ū siáⁿ lō͘-ēng? Lí tàu-tí lia̍h hit-ê pó-huih choè sím-mı̍h lō͘-ēng? Lí siáⁿ-sū iáu iân-chhiân m̄ goān lâi khò pó-huih choè siám-pı̄ chai-hāi ê só͘-chāi? Kiám-chhái ū lâng beh kóng, “Ah! Lí kóng--ê chin tio̍h, ta̍k-hāng sı̄ sı̍t-chêng ê oē, goán lóng bô giâu-gı̂, ia̍h sı̀n Sèng-keng, cha̍p hun chai tit-kiù ê lō͘, chí-ū tùi Ki-tok chit tiâu nā-tiāⁿ.” Chit chióng lâng chhùi sui sı̄ kóng kàu chiah hó-thiaⁿ, kı̂-sı̍t sim-lāi iáu-bē khò Kiù Chú, só͘ kóng--ê choân-jiân bô lō͘-ēng. Pí-phēng tng sı̂ Í-sek-lia̍t lâng tı̄ Ai-kı̍p, ū lâng kā in kóng, koáⁿ-kín boah-huih tı̄ mn̂g-bâi, mn̂g-khiā in-ūi kin-mı̂ poàⁿ-mı̂ ê sı̂, teh beh lâi sím-phoàⁿ, Í-sek-lia̍t lâng kiám-chhái ı̀n kóng, “Ū iáⁿ, hó, hó, iân-chhiân--kúi-jı̍t-á chiah choè.” Nā án-ni, in ê toā kiáⁿ chún-chún hō͘ thiⁿ-sài phah--sí.
Hit mı̂ chiū-sı̄ Í-sek-lia̍t lâng tit-tio̍h oa̍h-miā, tit-tio̍h chū-iû ê khí-thâu, chit mı̂ í-chêng in choè lô͘-châi, sui-bóng oa̍h, chhin-chhiūⁿ sí. Siōng-tè kóng, “Lín tio̍h ēng chit ge̍h choè chiaⁿ-ge̍h.” Siáⁿ-sū án-ni? In-ūi hit mı̂ in ū bih tı̄ huih ê ē-bı̄n chiah ū sı̀ⁿ-miā, chiū-sı̄ in ū sı̀ⁿ-miā ê thâu chı̍t jı̍t, ia̍h sı̄ chiâⁿ kok ê thâu chı̍t jı̍t.
Lí ê oa̍h-miā kiù-kèng tùi sím-mı̍h sı̂ khí? Chiū-sı̄ tùi oá-khò Ki-tok ê pó-huih hit sı̂ khí, ia̍h sı̄ lí oa̍h-miā ê thâu chı̍t jı̍t. Nā bô khò Ki-tok ê pó-huih, lí chiū bô oa̍h-miā. He sı̄ cháiⁿ-iūⁿ kóng? In-ūi lâng hām-lo̍h choē-gia̍t, chhin-chhiūⁿ lo̍h tı̄ hé-khiⁿ, kap sí chı̍t-iūⁿ.
Án-ni lí eng-kai cháiⁿ-iūⁿ kiâⁿ chiah oē tit-tio̍h kiù? Tio̍h koáⁿ-kín bih tı̄ Iâ-so͘ ê ē-bı̄n, in-ūi I ū thoè lí pê choē-gia̍t ê kè-chı̂ⁿ, chit-ê kè-chı̂ⁿ m̄-sı̄ kim, gûn, hè-mı̍h, pó-poè, chiū-sı̄ ēng I ê pó-huih kiù-sio̍k lí ê choē, choè lí siám-pı̄ hoān-lān ê só͘-chāi. Taⁿ tio̍h koáⁿ-kín oá-khò Iâ-so͘ ê pó-huih kiù-sio̍k lí ê choē-gia̍t. Siōng-tè ū èng-ún kóng, “Goá khoàⁿ-kı̀ⁿ lín mn̂g-kháu ū boah-huih chiū làng--kè-khı̀.” Kin-á jı̍t chiū-sı̄ lí ū oa̍h-miā ê jı̍t, ia̍h sı̄ lí têng-thâu siⁿ ê jı̍t.
Oāⁿ Iâⁿ.
Goán ê chong-cho̍k pêng-sò͘ tùi-tiōng bú-ióng, ūi kok tam-tng kan-khó͘ sí--ê chin choē. Goán chó͘ tı̄ Tiong-kok Tō-kong nı̂ kan, in-ūi Tiong-eng sit hô khai-chiàn, jı̍p iâⁿ-ngó͘ choè peng. Goán peh in-ūi Eng Gô nn̄g kok chiàn-sū, ia̍h jı̍p kau-chiàn hāu-lô. Goán chek in-ūi Ìn-tō͘ chok-loān ia̍h khı̀ chhut cheng. Só͘-í goán chit cho̍k siàu-liân lóng ióng-kám, kàu goá chiū khah bô.
Goá tāi-seng tng hiong-thoân, put-kò chı̄n hiuⁿ-lí tām-po̍h-á pún-hūn nā-tiāⁿ, bô kú ū ı̀-sù jı̍p kun-kài, āu--lâi khı̀ pò miâ, keng-kè i-seng chhâ-giām sin-thé, chiū sàng goá kàu iâⁿ-pō͘, ta̍k-jı̍t chiàu sı̂ chhau-liān ná choè khó͘-kang. Bô tāi-chı̀ ê sı̂ chio nn̄g saⁿ ê pêng-iú, jı̍p chiú-koán chia̍h chiú, kóng chhiò hı̀-hiauh, chiú ná lim, hèng ná khí, ta̍k jı̍t kò͘ thit-thô. Bô kúi ge̍h jı̍t, kun-lēng kàu, beh tiàu goán khı̀ siú pa̍t-ūi, goán chin hoaⁿ-hí, in-ūi thang oāⁿ sin hō saⁿ. Iâⁿ--nı̍h pàng kúi-nā jı̍t hō͘ lâng tò-khı̀ pı̄-pān hêng-lí kap ke-lāi saⁿ-sı̂, kàu beh khí-sin chêng chı̍t mı̂, goán in-ūi beh lı̄-khui pún hiuⁿ, só͘-í jı̍p chhài-koán toā lim, chia̍h chùi-chùi chiah tò--lâi, kàu iâⁿ--nı̍h the tı̄ hé-lô͘ piⁿ ê í, bô soè-jı̄ poa̍h-lo̍h hé-lô͘, kai-chài tâng-phoāⁿ chhah goá khı̀ bı̂n-chhn̂g, nā bô tek-khak sio kàu chhàu-ta. Goá nā chit mı̂ sí-khı̀, tek-khak lo̍h tē-ge̍k; kè-jı̍t goá pèng bô kóng chā-jı̍t chiú-chùi hiám sí, āu--lâi tio̍h kéng-kài goá ê tâng-phoāⁿ ia̍h bô kóng goá chùi kàu hiám-hiám hō͘ hé sio--sí.
Goán tng-peng lâng ū pháiⁿ hong-sio̍k, khùn thiⁿ kng chiū lim, to̍k-to̍k chiú-tiàm bē khui, só͘-í chit chá-khí bô lim, kàu chia̍h jı̍t-tàu thiaⁿ-kı̀ⁿ pé-chóng hia ū hó chiú, chiū khı̀ chhē i toā lim, tı̀-kàu thâu hı̂n ba̍k àm, chéng tūi khı̀ hé-chhia tiàm, khoàⁿ-kı̀ⁿ kiâⁿ-lō͘ lâng chiū toā siaⁿ kap in kóng, “Chài-hoē, chài-hoē,” iā chhiùⁿ kúi-tiâu-á pháiⁿ koa-khek. Tı̄ hé-chhia lāi khoàⁿ-kı̀ⁿ chı̍t pân “Ui-su-kı̀” chiú, chhùi-khí noā tı̍t-tı̍t lâu, tiāⁿ-tio̍h kàu chhia-chām tek-khak boé lâi lim. Bô loā-kú kàu chhia-chām, chhia chí-ū beh thêng kúi hun cheng, goá kap tâng-phoāⁿ saⁿ-kap kàu koán-tài ê bı̄n-chêng, kia̍h-chhiú kiâⁿ-lé, kóng, “Chhiáⁿ koaⁿ-tiúⁿ chún goán lo̍h chhia boé chı̍t hāng chin iàu-kín ê mı̍h.” Koán-tài bô siáⁿ beh ún, goán kā i kóng sı̄ ke̍k iàu-kín, lō͘-bé chiah hō͘ goán khı̀. Boé kúi-nā kan chiū chhia-lāi lim liáu-liáu, āu--lâi kàu Kho-chhiáⁿ-su-tek, goán koh toā lim, ta̍k-pái tio̍h lim kàu chùi-chùi. Án-ni chū-iû ê sin-khu, soà hō͘ chiú khu-sok, bô lim boē kè-jı̍t.
Kàu Lûn-tun, goán bē hioh kheh-tiàm, tāi-seng chhē chı̍t keng chhut-miâ ê chiú-tiàm lim, bô gı̂ só͘ kiò-choè chhut-miâ--ê, chiū-sı̄ ù-oè ok-chhok ê tāi-chı̀ teh chhut-miâ, jı̍p tiàm teh lim--ê, lóng sı̄ bô hē-lo̍h ê lâng, in ê sim-ı̀ to m̄-sı̄ chia̍h chiú. Pháiⁿ hū-jı̂n lâng khoàⁿ-kı̀ⁿ goán sı̄ sin-kheh, khoán-thāi choè siōng-téng lâng, goán bô beh chhap-tēng--in, to̍k-to̍k lim-chiú nā-tiāⁿ, lim-soah koh kàu pa̍t keng tiàm, pí tāi-seng--ê koh khah su, goá hō in choè “Oa̍h tē-ge̍k”, chin-chiàⁿ bô-ok put-chok, goá chhin-ba̍k khoàⁿ-kı̀ⁿ in ku-ku koài-koài ê pháiⁿ-tāi, boē-hiáu ēng oē lâi kóng, to̍k-to̍k ı̀n tı̄ thâu-náu lāi, bô boē kı̀-tit hit hō ok-chhok ê khoán, goá chiah pi-chiān tō iàm-ò͘ⁿ, hô-hòng iâⁿ-kè goá ê lâng? Siōng-tè ke̍k toā lı̂n-bín khoán-thāi--goá, chiong goá tı̄ tē-ge̍k lāi kiù chhut, hō͘ goá tūi-lo̍h hit tiong-kan, goá só͘ kiâⁿ bô chiàu hoat-tō͘ í-keng choē nı̂, kai-chài Mô͘-kúi ê la̍t ná khah soe-bı̂, bô kú goá chiū tit-tio̍h kiù. Tâng-phoāⁿ ta̍k jı̍t tı̄ ke̍k pháiⁿ ê só͘-chāi lim-chiú thiòng-lo̍k, chı̂ⁿ-gûn khai liáu, tò-tńg siūⁿ chêng-jı̍t ê sū, sı̍t-chāi bô bı̄, koat-tiāⁿ koh kúi-nā jı̍t beh koh toā lim.
Pêng jı̍t í-keng koàn-sı̀, nā chı̍t jı̍t bô chhut-mn̂g, chiū chin bô gē, só͘-í saⁿ-kap gı̄-lūn kin-á-jı̍t beh khı̀ chúi-siú hoē-tn̂g siau-liâng, khiok chai bô siáⁿ hèng-bı̄, ia̍h bô chiú thang lim, m̄-kú bô poàⁿ-ı̂ⁿ, bô tê thang lim nā bô khı̀ koh-khah bô ı̀-sù, só͘-í tiāⁿ-tio̍h beh khı̀ hia thit-thô. Kàu-tè, chiū ū lâng chih-chiap jı̍p-khı̀, ēng hó tê saⁿ chhiáⁿ, bı̄ put-chí phang. Lim soah, siūⁿ beh tò-khı̀ iâⁿ--nı̍h, hut-jiân ū lâng lâi kóng, “Lín chhiáⁿ thêng tia̍p-á kú, ū bó͘ ê sian-siⁿ beh lâi kóng tō-lí, chhiáⁿ tāi-ke toà teh thiaⁿ.” Goán thiaⁿ chit hō oē bô siáⁿ ı̀-ài, chóng-sı̄ in-ūi lâng hiah hó chio-ho͘, put-piān bô lé sı̂--i, put-kò bóng tiàm tia̍p-á-kú. Bô phah-sǹg tō-lí kóng liáu, koh tio̍h ta̍k lâng chhiam-miâ, khǹg goán jı̍p kài-chiú hoē, koat-ı̀ tùi kin-á-jı̍t choè hó, bô koh lim, kiat Sèng Sı̂n ê ké-chí. Goán sim-lāi m̄-ài chhiam-miâ, āu--lâi hō͘ pêng-iú chhut-la̍t khó͘-khǹg, chiah thàn in ê ı̀-sù bô the, chóng-sı̄ chhiam-miâ ê sı̂, goá tùi pêng-iú phín kóng, kin-á-jı̍t chhiam-miâ, bı̂n-á-jı̍t bô sǹg-siàu, goán lóng bô siūⁿ tio̍h, “Lâng ū chheng-bān sǹg, m̄-ta̍t thiⁿ chı̍t uih,” chiū-sı̄ m̄-chai í-keng hō͘ Siōng-tè ê Sı̂n kám-tōng, hō͘ goá thoat-lı̄ hāi goá ê lêng-hûn ê toā choē. Goá sui-bóng siông-siông kàu chúi-siú hoē-tn̂g kap pêng-iú thó-lūn chin-tō, nā-sı̄ án-ni iû-goân boē kiù goá, in-ūi goá bē ū thê-khí Iâ-so͘ ê miâ, goá iáu m̄-bat Iâ-so͘, bô tit-tio̍h Iâ-so͘, goá sim lóng bô moá-ı̀. Choè peng ê sèng khah choē ngı̄, tē-it m̄-ài ké-hó. Bó͘ ē-hng goá kap chı̍t ê Thian-chú kàu ê lâng piān-lūn tō-lí, hut-jiân hō͘ i siū-khı̀ háu-hoah, goá ia̍h bô kap i kè-kàu, iû-goân kap i piān-lūn kàu-lāi ê chin-lí, i toā siū-khı̀, ēng kûn-thâu-bú cheng goá ê ba̍k-chiu. Kè-jı̍t koán-tài mn̄g ba̍k-chiu cháiⁿ-iūⁿ tio̍h-siong? Goá ı̀n “poa̍h-tó.” Koán-tài bêng chai goá bô láu-sı̍t, khiok iā bô siông-sè chhâ-mn̄g. Án-ni goá sı̀n chong-kàu iû-goân bô lō͘-ēng, goá iáu-kú teh hoān-choē. Goá bē tit-tio̍h Iâ-so͘, sim-lāi lóng bô moá-ı̀, iā bô ū sim-lāi chin-sı̍t ê pêng-an.
Kun-iâⁿ ê sin-piⁿ ū chı̍t ê lāu hū-jı̂n lâng, khiā-khí kúi-nā keng chhù-á, lāi-bı̄n siat lé-pài-tn̂g kap cha-keng só͘, iâⁿ--nı̍h ê peng ia̍h put-sı̂ khı̀. Chiong-kūn Sèng-tàn, lāi-bı̄n tio̍h chng tio̍h kat, lāu-ḿ kiò goá khı̀ tàu pang-chān. Goá khı̀ choè kúi-nā-jı̍t, sim put-chí hoaⁿ-hí, án-ni goá kè chı̍t ê Sèng-tàn lóng bô lim chiú.
Pêng-sı̂ iâⁿ--nı̍h tı̄ Sèng-tàn choeh sı̄ tē-it khoài-lo̍k ê jı̍t, ia̍h sı̄ tē-it kiaⁿ-hiâⁿ ê jı̍t, chhin-chhiūⁿ goá bô kèng-ùi Siōng-tè siōng-chhiáⁿ chai thang kiaⁿ, in-ūi kun-iâⁿ to̍k-to̍k ū hoān-choē ê khoài-lo̍k, bô chin ê khoài-lo̍k. Kè Sèng-tàn liáu-āu, ū chı̍t ē-hng lé-pài soah, lâng mn̄g goá ê lêng-hûn cháiⁿ-iūⁿ? Ēng siáⁿ hoat-tō͘ chiah oē tit-tio̍h kiù? Koh kā goá kóng, kiâⁿ hó chín-chè--lâng, lóng boē hō͘ lâng tit-tio̍h kiù. Iâ-so͘ ū thoè lán sí, thoè lán pàng-sak sı̀ⁿ-miā, tam-tng lán ê choē-ok. Án-ni kóng, chha-put-to chı̍t tiám cheng kú. Kóng soah, goán chiū kūi-lo̍h saⁿ-kap kı̂-tó. Chit mı̂ tò-lâi kun-iâⁿ, goá sim-lāi ke̍k iu-būn, in-ūi ài ke thiaⁿ tit-kiù ê hoat-tō͘, chóng-sı̄ in-ūi kun-hoat put-chí giâm, tek-khak tio̍h chiàu sı̂ tò--lâi. Goá tú-tú kiâⁿ kàu nn̄g-pêng ûi-chhiûⁿ ê tiong-kan, Siōng-tè ê Sèng Sı̂n ū ke̍k toā lêng-le̍k kám-tōng--goá, hián-bêng Iâ-so͘ thoè goá só͘ choè ê kong-lô, goá chiū chai chá goá só͘ hoān ê choē-ok, lóng kap Iâ-so͘ tâng tèng sı̍p-jı̄-kè téng, só͘-í thang chai, Siōng-tè in-ūi Iâ-so͘ chiong lán só͘ ū ê choē-ok oân-choân sià-bián. Chit hō su-sióng ı̀n tiâu goá ê thâu-náu, hō͘ goá cha̍p hun khoài-lo̍k, chı̄n-la̍t o-ló Iâ-so͘, koh kiâⁿ--kúi-pō͘, í-keng kàu iâⁿ mn̂g, chiū kau mn̂g-phiò jı̍p iâⁿ, kàu khùn-pâng, chit sı̂ goá siūⁿ beh jı̄n Iâ-so͘, teng í-keng bô kng, chóng-sı̄ hé-lô͘ iáu teh to̍h, goá chiū kūi tı̄ lô͘-piⁿ kı̂-tó, bē khùn ê tâng-phoāⁿ lóng ū khoàⁿ--kı̀ⁿ. Goá ê kı̂-tó bô loā tn̂g, in-ūi goá í-keng thoè Iâ-so͘ choè kan-chèng. Āu--lâi tek-khak choè Iâ-so͘ ê ha̍k-seng, chá-jı̍t só͘ choè ta̍k-hāng lóng bián kóng, to̍k-to̍k goá sı̀n Iâ-so͘ chiū thang tit-tio̍h kiù. Kè-jı̍t, goá bín saⁿ ê sı̂, hut-jiân thiaⁿ-kı̀ⁿ pâng-lāi nn̄g lâng teh khau-sé goá, chı̍t ê liâm-piⁿ toā siaⁿ kiò goá kóng, “Tiuⁿ Khian, chit ūi bô ké-hó ê lâng, nā ài choè Iâ-so͘ ê ha̍k-seng, tio̍h sı̍t-hêng m̄-thang ké- iáⁿ choè.” Goá ı̀n kóng, “Kiû Siōng-tè chān--goá, goá beh sı̍t-hêng. Kai-chài Siōng-tè chān--goá, goá chiah oē sı̍t-hêng.” Goá tı̄ pâng-lāi siông-siông tha̍k Sèng-keng, sim-lāi put-chí khoài-lo̍k. Sèng-keng ê oē chí-sı̄ goá choè lâng ê tō-lí. Goá goān chı̍t-sı̀-lâng ēng Sèng-keng choè chí-lâm chiam, bô lūn siáⁿ-sū lóng boē poâⁿ-kè kui-kú.
Goá sı̀n-khò Iâ-so͘ tit-tio̍h kiù liáu-āu, tı̄ iâⁿ--nı̍h tng chit bô loā-kú, sui sı̄ bô kú, kàu-gia̍h oē hō͘ koaⁿ-tiúⁿ peng-sū chai goá chá-jı̍t siáⁿ-khoán, soà hō͘ in chai tùi taⁿ beh kun-sûi chı̄-chūi. In-ūi tı̄ o͘-àm--nı̍h ê kng, tiāⁿ-tiāⁿ chai sió kè-sit, iâⁿ--nı̍h sı̄ tē-it o͘-àm ê só͘-chāi, bô Siōng-tè ê tō-lí boē-oē ū kng, chóng tio̍h ū Iâ-so͘ ê tō-lí tı̄ hit lāi-bı̄n, chiah oē ū kng. Goá beh lı̄-khui ê jı̍t, tùi chheh-kè nı̍h the̍h goá ê Sèng-chheh. Chhian-chóng kóng, “Che sı̄ hō͘ lí lı̄-khui chia ê mı̍h. Ia̍h hō͘ lí tit-tio̍h kiù ê mı̍h. Koh, sı̄ hō͘ lí pàng-sak pháiⁿ, choè hó ê mı̍h.”
Khoàⁿ chheh ê pêng-iú, lí nā oē kóng, “Kiù-chú Iâ-so͘, goá kám-siā--lí, lí ū thoè goá sí tı̄ sı̍p-jı̄-kè téng.” Lí nā oē án-ni kóng, chhiáⁿ chiū khoàⁿ chheh chit-tia̍p soà tı̄ chit só͘-chāi, ēng chit-ê ı̀-sù sêng-sı̍t kā Chú kóng, lí chiū thang tit-tio̍h kiù. Sèng-keng kóng, “In-ūi Siōng-tè chhe Kiáⁿ lâi sè-kan, m̄ sı̄ beh sím-phoàⁿ sè-kan, chiū-sı̄ hō͘ lâng tùi I lâi tit-tio̍h kiù.” (Iok-hān 3:17.)
Hiaⁿ ê Kong-lô Sio̍k Sió-tı̄ ê Choē.
Lô-má sı̄ tiong-kó͘ sı̂-tāi hoat-lu̍t tē-it giâm ê kok. Peh-sı̀ⁿ hoān-choē, m̄-chún lâng ai-kiû sià-bián, in-ūi kiaⁿ-kiaⁿ hiâⁿ-hiâⁿ ngia̍uh-ngia̍uh chhoah, toā sit-lo̍h kok-bı̂n ê thé-thóng, choē-hoān ia̍h m̄-thang boē kı̀-tit i choè Lô-má ê kok-bı̂n, sui-bóng siū hêng-hoa̍t ê sı̂ ia̍h tio̍h lún thiàⁿ bô chhut siaⁿ, bô haiⁿ bô kiû, ia̍h tio̍h chai thàng-thiàⁿ chiū-sı̄ só͘ pê hoān-tio̍h ê kok-hoat. Só͘-í sui-jiân choè hoān-lâng ia̍h tio̍h chı̄n kok-bı̂n ê gı̄-bū. Hit sı̂ ū chı̍t ê lâng in chó͘-kong bat choè Lô-má ê koaⁿ, in-ūi bô͘-hoán siū sím-phoàⁿ tēng sí-choē. Tng sím-phoàⁿ-koaⁿ teh tēng sí-choē ê sı̂, hoān-lâng ia̍h m̄ goān kūi-lo̍h ai-kiû. I ū chı̍t ê hiaⁿ bat ūi-tio̍h kok-sū chhut-chiàn, nn̄g chhiú siū siong lut--khı̀, hit sı̂ sı̀-chiàⁿ khiā tı̄ sím-phoàⁿ-koaⁿ ê bı̄n-chêng, kia̍h-koâiⁿ i ê chhiú-tó͘, chı̀n-chêng thoè sió-tı̄ kiû un, kóng, “Goá ê sió-tı̄ chok-loān, choē eng-kai tio̍h sí, kiû sím-phoàⁿ-koaⁿ khoàⁿ goá thoè kok-ka siá sin, khai-un sià-bián goá ê sió-tı̄ ê choē.” Sím-phoàⁿ-koaⁿ khoàⁿ-kı̀ⁿ i bat ūi kok-sū chiâⁿ-choè phoà-siùⁿ, sim toā kám-tōng, liâm-piⁿ sià in sió-tı̄ ê choē, chhut tn̂g-jū kóng, “Sím-mn̄g kai àn-hoān bó͘-bó͘, bô͘-poān sio̍k sı̍t, chiàu lē eng-kai chèng-hoat, lâi choè kéng-kài. Taⁿ chhiáⁿ tài-liām i ê hiaⁿ bó͘-bó͘ tı̄ chiàn-tiûⁿ siá sin lı̍p kong-lô, koh pún-sin lâi thoè hoān-lâng ai-kiû, só͘-í kek-goā si-un, sià-bián tháu-pàng.” Án-ni hit-ê hoān-lâng tit-tio̍h bián sí, choan oá-khò i ê hiaⁿ ū thoè kok lı̍p kong-lô, iū-koh thoè ai-kiû sià-bián, chiah thang bián chèng-hoat.
Tùi chit hāng hō͘ lán soà siūⁿ Ki-tok Iâ-so͘ thoè lán kiàn-lı̍p kong-lô, lán pún-jiân hoān-tio̍h thiⁿ ê hoat-lu̍t, choē eng-kai sí. Iâ-so͘ Ki-tok thoè lán tèng sí tı̄ sı̍p-jı̄-kè, choè bán-hoê ê chè-mı̍h, taⁿ koh khiā tı̄ Siōng-tè ê bı̄n-chêng, hian I chhiú-chiúⁿ ê tèng-jiah thoè lán ai-kiû. Lán sı̀n--I, lı̍p-chı̀ koé-pı̀ⁿ, tùi taⁿ í-āu beh choè Siōng-tè kéng-soán ê peh-sı̀ⁿ, liâm-piⁿ tit-tio̍h sià-bián choē ê un-tián, chiūⁿ Thian-tông hióng-siū éng-oa̍h ê hok-khı̀. Lán tit-tio̍h chit hō lı̄-ek, m̄ sı̄ in-ūi lán ū siáⁿ kong-chek, sı̄ Siōng-tè tài-liām Kiù-chú Iâ-so͘ ê chêng, só͘-í sià-bián lán ê choē.
