Lâng tiàm sè-kan tē-it ài--ê, chiū-sı̄ pêng-an, khoài-lo̍k, hó-gia̍h, ióng-kiāⁿ, tn̂g hoè-siū, kiáⁿ-sun chē, tē-ūi koân. Chiū-sı̄ ài tit moá-ı̀ ê jı̂n-seng. Iā tē-it m̄-ài--ê, chiū-sı̄ chhiⁿ-chhám, kan-khó͘, sàn-hiong, soe-lám, iáu-chiat, ko͘-toaⁿ, pi-bı̂. Chiū-sı̄ m̄-ài put-jû-ı̀ ê seng-oa̍h.
Ūi-tio̍h án-ni, lán chiū ēng chı̄n só͘-ū ê tı̀-hūi kap khùi-la̍t, lâi tui-kiû tē-it hó ê jı̂n-seng, iā chı̄n-liōng ài pı̄-bián it-chhè tē-it m̄-hó ê seng-oa̍h.
Taⁿ nā lâng-lâng só͘ teh tui-kiû--ê, lóng ta̍t-chiâⁿ, chiū sè-kan sı̄ bô sím-mı̍h kan-khó͘, á-sı̄ khùn-lân. Chóng-sı̄ sū-sı̍t pò lán chai “Jı̂n-seng” pēng m̄-sı̄ chiah-nih kán-tan, in-ūi chı̍t-bı̄n kó-jiân sè-kan ū chē-chē lâng tit-tio̍h moá-ı̀ ê jı̂n-seng, siâng-sı̂ koh chı̍t bı̄n iā sı̄ ū chē-chē lâng teh keng-koè put-jû-ı̀ ê seng-oa̍h. Chiū siâng chı̍t ê lâng iā ē keng-giām-tio̍h chit nn̄g-chéng ê kéng-gū, chhin-chhiūⁿ cháu-bé-teng, lâi koh khı̀, khı̀ koh lâi, bô thêng-hioh.
Siat-sú jı̂n-seng nā chí hān-tiāⁿ tı̄ chit bu̍t-chit ê sè-kan, chiū-sı̄ kàu sí chiū soah lah! Kı̂-sı̍t m̄-sı̄ án-ni, in-ūi sím-mı̍h lâng to chin chheng-chhó, iā chin bêng-pe̍k, tû-khı̀ bu̍t-chit ē khoàⁿ-kı̀ⁿ ê seng-oa̍h í-goā, iáu ū chı̍t ê boē khoàⁿ-kı̀ⁿ ê “Lêng-sèng” seng-oa̍h. Lán thang tùi jı̂n-lūi só͘-ū it-chhè ê chong-kàu seng-oa̍h lâi tit-tio̍h chèng-bêng.
Taⁿ chit ê lêng-sèng ê seng-oa̍h só͘ teh tui-kiû--ê, goân-chek-siōng iû-goân kap bu̍t-chit seng-oa̍h ê tui-kiû siâng-khoán, lóng sı̄ ài hó m̄-ài pháiⁿ. Iā hit ê hó ê hong-bı̄n, chiū-sı̄ chhin-chhiūⁿ lâng ài sè-kan hó ê seng-oa̍h án-ni, ài tit-tio̍h tı̄ “Thiⁿ”--nih ū hó ê seng-oa̍h ê só͘-chāi, chiū-sı̄ it-poaⁿ kiò-chò “Thian-tông” ê. Iā só͘ m̄-ài ê pháiⁿ ê hong-bı̄n, sı̄ pí m̄-ài sè-kan pháiⁿ ê seng-oa̍h, koh-khah m̄-ài. In-ūi sè-kan pháiⁿ ê seng-oa̍h, kàu sí chiū oân-kiat, koh m̄-sı̄ kàu hiah lı̄-hāi; nā-sı̄ lêng-sèng pháiⁿ ê seng-oa̍h, chiū-sı̄ kàu-ke̍k ê chhiⁿ-chhám kap khó͘-thàng, hit ê só͘-chāi kiò-chò “Tē-ge̍k.”
Tē-bı̄n-chiūⁿ bu̍t-chit ê seng-oa̍h, siông-siông ē-thang tùi lâng ê lêng-le̍k lâi khek-ho̍k, á-sı̄ piàn-oāⁿ, hō͘ só͘ m̄-ài ê pháiⁿ ê jı̂n-seng, piàn-chò hó ê jı̂n-seng; iā hō͘ pháiⁿ seng-oa̍h ê tiûⁿ-só͘, piàn-oāⁿ chò hó seng-oa̍h ê tiûⁿ-só͘. Chóng-sı̄ lêng-sèng ê seng-oa̍h chiū bē-thang án-ni ê chū-iû. “Thian-tông tē-ge̍k” sı̄ sio̍k tı̄ bû-hêng ê sè-kài, m̄-sı̄ lâng ē-thang chū-iû soán-te̍k. Só͘-í tùi tı̄ tē-ge̍k ê ui-hia̍p (kiaⁿ-ùi), sı̄ hui-siông ê giâm-tiōng. Ūi-tio̍h kiaⁿ-liáu tio̍h lo̍h tē-ge̍k, chiū koh-khah ài kàu thian-tông.
Lí ài pı̄-bián lo̍h tē-ge̍k, tit-tio̍h chiūⁿ kàu thian-tông mah? Lí tio̍h tāi-seng bêng-pe̍k thian-tông, tē-ge̍k ê chha-ı̄ⁿ; nā bô, kiaⁿ-liáu ē ūi-tio̍h bô bêng hit ê sı̍t-chêng, tı̀-kàu jı̍p tı̄ kiaⁿ-hiâⁿ ê bê-lō͘.
Lí siūⁿ thian-tông sı̄ sím-mı̍h khoán ê só͘-chāi? Lí ài bêng-pe̍k thian-tông ê sı̍t-chêng, tio̍h tāi-seng thiaⁿ Siōng-tè ê oē, chiū-sı̄ tio̍h tāi-seng tùi Sèng-keng lâi bêng-pe̍k thian-tông ê chêng-hêng. Iā chhiáⁿ lí m̄-thang siūⁿ thian-tông chiū-sı̄ “Se-thian.”
Sèng-keng Khé-sı̄-lio̍k 21:1-22:7, só͘ kı̀--ê, put-kò sı̄ beh hō͘ tiàm tı̄ bu̍t-chit sè-kài ê lâng sió-khoá thang bêng-pe̍k hit ê chêng-hêng, kap siⁿ-chhut him-bō͘ ı̀-ài ê sim. Kı̂-sı̍t thian-tông ê hó, sı̄ hō͘ lâng boē chhek-to̍k--tit. In-ūi choè-chió siū èng-ún thang jı̍p thian-tông ê pài Siōng-tè ê lâng, tı̄ tē-bı̄n-chiūⁿ ê seng-oa̍h ū tit-tio̍h pó-chèng, bián siū-tio̍h pháiⁿ-sı̂n ê khó͘-chhó͘, tú-tio̍h chióng-chióng ê ûi-lân, chhin-chhiūⁿ “chhiong, hoān, tāng, thó͘, soah” chiah ê put-jû-ı̀, kiaⁿ-hiâⁿ ê seng-oa̍h. Í-goā iáu chē-chē boē thang lóng siá. Chiū-sı̄ sui-bóng sàn-hiong, iā thang tit-tio̍h thiaⁿ “Hok-im” (Má-thài 11:5).
Iā lí siūⁿ tē-ge̍k sı̄ sím-mı̍h khoán ê só͘-chāi? Sı̄ teh siu-iông kap jio̍k-thé pun-lı̄ ê “lêng-hûn,” keng-koè chı̍t toāⁿ ê kı̂-kan siū hêng-hoa̍t. Moá-kı̂ liáu-āu, tit-tio̍h lûn-hoê choán-seng, chiū thang tùi hia chhut--lâi mah? Lí nā án-ni siūⁿ, chiū toā chhò-gō͘. Chhiáⁿ lí iû-goân thiaⁿ Sèng-keng ê oē, chiū ē hō͘ lí tit-tio̍h chheng-chhó, bêng-pe̍k, koat-toàn piáu-hiān lí só͘ tio̍h chhú ê thài-tō͘.
Sèng-keng Lō͘-ka 16:19-31 só͘ kı̀ ê, put-kò sı̄ hō͘ lâng sió-khoá thang chai tē-ge̍k ê chêng-hêng. Chóng-sı̄ nā tha̍k Má-thài 25:41, chiū hō͘ lán koh-khah thang bêng-pe̍k tē-ge̍k ê choa̍t-bāng. Chiū-sı̄ “Siū chiù-chó͘ ê,” tio̍h “Jı̍p éng-oán ê hoé, chiū-sı̄ ūi-tio̍h Mô͘-kúi......só͘ pı̄-pān ê.”
Lí ài kàu “Thian-tông,” pı̄-bián kàu “Tē-ge̍k” mah? Tio̍h bat Siōng-tè, sı̀n Siōng-tè, thiaⁿ Siōng-tè ê kà-sı̄, chun-siú lâi kiâⁿ, chiū ē tit-tio̍h. Chiū-sı̄ tio̍h siông-siông kàu lé-pài-tn̂g thiaⁿ tō-lí, kap siông-siông tı̀-ı̀ tha̍k Sèng-keng, sı̍t-hêng lí só͘ tit-tio̍h ê kà-sı̄.
(Tâi-oân Kàu-hoē-kong-pò tē 784 kı̂, 1954 nı̂ 4 ge̍h)
