Thian sı̄ Chó͘-ke

 Lán kiâⁿ lō͘ ū phoāⁿ, chiū khah bē lán. Sui-jiân teh taⁿ-tàⁿ, lō͘ khâm-khia̍t, jı̍t chin iām, koāⁿ lâu lóng bē lı̄; iáu-kú lán kúi-nā lâng chò tı̄n, saⁿ-kap kóng oē, chiū khah bē thiám; chı̍t-ē-á chiū kàu ūi. Lán tiàm sè-kan ná chhut-goā, lō͘ iû-goân pháiⁿ kiâⁿ; sè-kan sı̄ khó͘-hái, khoàⁿ tó chı̍t-ê m̄-bat khàu, tó chı̍t-ê m̄-bat háu, lâu ba̍k-sái, thó͘-khùi. Kū-nı̂ ū kū-nı̂ ê kan-khó͘ chı̍t khoán, kin-nı̂ ū kin-nı̂ ê kan-khó͘ chı̍t khoán, lóng sı̄ tio̍h-boâ, lóng sı̄ thâu-lō͘. 
 Iâ-so͘ nā kap lán chò tui, chiū khah ū phoāⁿ, khah bē lán, khah bē loé-chı̀, khah bē hoân-ló koè-thâu. Ū-sı̂ seng-khu chin siān, sim-sı̂n put-an; nā siūⁿ--tio̍h Iâ-so͘, sim chiū khui, sin-thé khah sóng-khoài. 
 “Goá sim kı̀-liām Iâ-so͘ ê in, 
  Che in ná io̍h chı̍t poaⁿ, 
  Ē ké sè-kan khó͘-thàng iu-būn, 
  Hok-khı̀ hō͘ lâng moá-moá”. 
 Lán kiâⁿ-lō͘ nā ū phoāⁿ, chiū khah khoài kàu ūi; koh nā beh kàu lán chhù, chiū ná kiâⁿ ná hoaⁿ-hí kóng, “Iáu ū chı̍t phò͘ lō͘ chiū kàu ūi”; “Iáu ū gō͘ lí lō͘ nā-tiāⁿ”; “Taⁿ chhun chı̍t chām-á nā-tiāⁿ”; “Taⁿ khoàⁿ hiān-hiān”; “Taⁿ kàu lah! Thang hioh-khùn”. Pài Siōng-tè, sı̀n-khò Iâ-so͘ ia̍h sı̄ án-ni, ná kiâⁿ ná hoaⁿ-hí, ná kiâⁿ ná kı̄n tı̄ chó͘ ke. Sè-kan ê khó͘-lān teh beh koè, thian-tông ê iân-lo̍k teh beh kàu. Tı̄-hia lóng bē kan-khó͘, ia̍h bē sàn-hiong, ia̍h bô chha̍t-bé, ia̍h bô chhiúⁿ-kiap, ia̍h bô hoé-chai, ia̍h bô chúi-chai; thian-tông chin chheng-khı̀-siùⁿ, ke̍k hù-kùi, ke̍k êng-kng. Thian-tông phı̀-jū pó-poè, lâng só͘ bē hiáu kóng; ông-kiong-lāi m̄ ta̍t-tio̍h thian-tông ê chı̍t-hūn. Koh thian-tông sı̄ lán ê Kiù-chú Iâ-so͘ só͘ toà ê só͘-chāi, ia̍h sı̄ hó Sı̂n kap hó lâng só͘ khiā-khí--ê.
 Thian-tông ê hok-khı̀ kóng boē-tit-chı̄n. M̄-kú lâng khah siông bô sím-mı̍h ài kàu ūi; hoán-tńg ài chia̍h tn̂g-hoè-siū. Che sı̄ sím-mı̍h iân-kò͘? Sio̍k-gú kóng, “Jı̂n phàⁿ ló, chè phàⁿ thó”. Sı̍t-chāi ū iáⁿ, lâng m̄-ài lāu, ài tô-lāu, sı̄ in-ūi khiàm-chè, khiàm Siōng-tè ê chè, m̄-káⁿ kap Giâm-kun sǹg-siàu. Lán kóng, “Pn̄g bē chia̍h; ám bē thun; sèⁿ-miā beh kı̀ⁿ Giâm-kun”. 
 Lán ê choē nā iáu tı̄-teh chiū bē bián-tit tio̍h kiaⁿ sí; lán ê choē nā í-keng sià, chiū m̄-nā m̄-bián kiaⁿ, koh ē thang lia̍h sí-jı̍t chò hok-khı̀ ê jı̍t-chí. 
 Nn̄g lâng beh chiūⁿ kiaⁿ; chı̍t ê lâng ná kı̄n kiaⁿ-siâⁿ ná hoân-ló, beh ah chhut-khı̀ thâi; hit-ê lâng ná kı̄n ná hoaⁿ-hí, beh khı̀ ín-kiàn. Á-sı̄ lán nn̄g lâng tâng-chê teh kiâⁿ lō͘, beh kàu bó͘ siâⁿ; lí ài koáⁿ khah kín, in-ūi chhut goā kú, taⁿ ài tò-khı̀ lín chhù; goá chin ài chhiân, in-ūi beh kàu tēng-choē ê só͘-chāi. Á-sı̄ lí khı̀ ū gı̂n chı̍t pah thang the̍h, chiū lí kiâⁿ lō͘ ê sı̂ chha-put-to nn̄g hoa̍h chò chı̍t hoa̍h; nā-sı̄ goá ê choē lóng mn̄g liáu, beh kàu tēng-choē ê só͘-chāi, chiū ná kiâⁿ ná ài khah bān. 
 Pêng-iú ah, sè-kan bô lán kú-tn̂g khiā-khí ê só͘-chāi. Tiông-seng put-ló ê io̍h bô kàu-gia̍h ê lō͘-ēng. Ta̍k-hāng ē hō͘ lán tiuⁿ-tı̂--tit, kan-ta sí hō͘ lán bē tiuⁿ-tı̂--tit. Sui-jiân ū chı̍t pah bān gı̂n ia̍h bô thang pó lán bô sí; chhin-chhiūⁿ sio̍k-gú teh kóng, “Seⁿ ū sı̂, sí ū jı̍t”. Liân Hông-tè nā kàu beh sí ê sı̂, i ê kim-soaⁿ bô thang bé i chı̍t ê miā, ia̍h bô thang hō͘ i ke chia̍h chı̍t hoè, ke oa̍h chı̍t nı̂. Lán bē ē iân-chhiân lán ê sèⁿ-miā ke-oa̍h chı̍t khek kú. 
 Koh lán lóng m̄-chai sèⁿ-miā tó chı̍t-jı̍t lō͘-boé jı̍t. Bōng-á-po͘ kám lóng sı̄ tâi la̍k-chhit-cha̍p hoè ê lâng ? Cha̍p hoè--ê iû-goân hō͘ Siōng-tè tiàu i-ê lêng-hûn. M̄-chai lán tó chı̍t-ê khah chá, tó chı̍t-ê khah bān. Kiaⁿ-liáu chit pang sı̄ lō͘-boé pái tāi-ke saⁿ-kı̀ⁿ. 
 Án-ni kám m̄-tio̍h tı̀-ı̀ siūⁿ khoàⁿ lán seⁿ tùi tó-ūi lâi, sí beh tùi tó-ūi khı̀. Ū ê the-sı̂ kóng, M̄-chai. Hit ê m̄-chai kám m̄-sı̄ chin kan-khó͘? Chhin-chhiūⁿ lí nā mn̄g goá, “Lí beh tó-khı̀”? ia̍h goá ı̀n kóng, “Beh tńg--khı̀”. lí soà koh mn̄g, “Lí beh tńg-khı̀ tó-ūi?” Ia̍h goá ı̀n kóng, “M̄-chai”; án-ni kám m̄-sı̄ chin kan-khó͘, “ū lō͘ bô chhù”? Gán-chêng khiok khah m̄-chai-iáⁿ kan-khó͘. Chhin-chhiūⁿ chá-khí-sı̂ gín-ná chhut-mn̂g thit-thô, sı̀-koè liû, lóng m̄-bián siūⁿ pē-bó chhù tı̄ tó chı̍t kak. Kàu jı̍t lo̍h soaⁿ, beh tńg--khı̀ kiâⁿ bô lō͘, chiū chai chhám khàu kàu sim beh phoà. Ia̍h lán siàu-liân, ióng-kiāⁿ ê sı̂ khah hán-tit teh siūⁿ tò--khı̀ ê sū; sèⁿ-miā nā kàu chiū hoân-ló lán beh lı̄-khui chhân-hn̂g bó͘-kiáⁿ, iū-koh lóng m̄ chai beh tùi tó-ūi khı̀. Khiok bô tek-khak sı̄ m̄-chai, sı̄ m̄-káⁿ siūⁿ, m̄-káⁿ kóng. Ta̍k-ê chai thang kiaⁿ kóng, “Sí pháiⁿ-tāi”. Taⁿ pò lín hó ê siau-sit kóng, Thiⁿ sı̄ chó͘-ke, Thiⁿ sı̄ lán tau. Lán ê Pē Siōng-tè kám sı̄ ài lán kan-khó͘? Lí ū kiáⁿ chhut-goā, kám m̄-sı̄ ài i tio̍h tńg--lâi-khı̀? Lán ê Pē ia̍h sı̄ án-ni, chin ài lán tio̍h tńg--lâi-khı̀ Thian-tông; koh chhe I to̍k-seⁿ ê Kiáⁿ beh chhoā lán ê lō͘, beh ín-chı̀n lán. Taⁿ tio̍h lâi kiâⁿ thiⁿ-lō͘, lâi hō͘ Iâ-so͘ kiù. 

(Tâi-lâm Kàu-hoē-pò tē 292 koàn, 1909 nı̂ 7 ge̍h)