Tiān-oē

“Oê...sı̄ siáⁿ-lâng? Sı̄ a-má sio͘h?” “Goá sı̄ A-lian--la, a-má--o͘, lí kám beh kap pa-pa kóng?” “Boài sio͘h? Hó--la, goá khı̀ kā pa-pa kiò.” “Pâ-á, tiān-oē--la, a-má beh kap lí kóng.” Ta̍k-pái a-bú khà tiān-oē lâi, lóng ē kap A-lian kóng chı̍t-khùn chiah ē kiò goá khı̀ thiaⁿ, nā sı̄ thiaⁿ-tio̍h tiān-oē teh liang, koh chin kú bô lâi kiò goá thiaⁿ, tō chai-iáⁿ sı̄ a-bú khà--lâi-ê. Hit-kang hong-thai lâi, goā-kháu toā-hong toā-hō͘, chin kiaⁿ--lâng, m̄-koh gún tı̄ chhı̄-lāi khōng-kú-lih chhù lāi-té,m̄-kiaⁿ hong-hō͘, kan-taⁿ kiaⁿ hō͘ lo̍h siuⁿ chē, chúi ùi chúi-kau-á moá--chhut-lâi, im kah kui-keng lóng chúi, ka-chài chı̀n-chêng kau-á, chúi-mn̂g lóng chheng kah chin chheng-khı̀, chúi nā sià ē lı̄, tō bē im--jı̍p-lâi. Hit-àm goá tı̄ chhù--nih, teh koáⁿ goe̍h-té beh sàng-khı̀ ı̀n ê gín-á-chheh, pàng A-lian chı̍t-ê lâng tı̄ thiaⁿ--nih khoàⁿ bàng-kah, peh-tiám koè chı̍t-poàⁿ, hong-hō͘ kā thang-á-mn̂g siàn kah pı̀n-piàng-kiò, A-lian hiông-hiông ùi goá kha-chiah-phiaⁿ tah--lo̍h: “Pâ-á, a-má khà tiān-oē lâi, lí kín khı̀ thiaⁿ!” Kóng liáu, A-lian ùi pâng-keng cháu-khı̀ tiān-oē piⁿ--á, nn̄g-ki chhiú kā tiān-oē, chhiú-ki-á gia̍h koân-koân, beh hō͘ goá khı̀ chiap, goá ùi A-lian ê chhiú--nih kā tiān-oē the̍h koè chhiú, kan-taⁿ thiaⁿ-tio̍h “toⁿ toⁿ toⁿ”ê siaⁿ, goá mn̄g A-lian a-má ū kóng siáⁿ--bô? A-lian kóng a-má kap khah-chá kāng-khoán, mn̄g-kóng i ū koai-koai--bô, ma-ma chú-pn̄g ū koai-koai-á chia̍h-liáu--bô, ū khah toā-hàn--bô.... Goá siūⁿ kóng, tán goá kā gín-á-chheh ê kó pian hó-sè, chiah khà tńg-khı̀ Soaⁿ-á-kha mn̄g a-bú tú-á khà--lâi ū siáⁿ tāi-chı̀--bô, tō kiò A-lian koh khı̀ thiaⁿ--nih khoàⁿ-bàng-kah, goá tō ē-sái kín kā kó khoàⁿ hō͘ liáu, nā-sı̄ Bí-hong bô khı̀ Tâi-pak, tō ē-sái seng kā A-lian chhoā khı̀ khùn. 9 tiám koè 10 hun, toā-hō͘ toā kah ná-chhiūⁿ ū lâng mi kui-pé chio̍h-thâu-lia̍p-á teh khian thang-á-mn̂g, keh-piah kam-á-tiàm ê khanpang hō͘ siáu-kúi-á hong chhoe poe--khı̀, lak tı̄ thô͘-kha piàng chı̍t-siaⁿ chiok toā-siaⁿ, A-lian kiaⁿ kah cháu lâi kap goá chē, i chē tı̄ goá tò-chhiú-pêng hit-chiah lián-á-í, khoàⁿ goá teh bô-êng m̄-káⁿ kā goá lû, chē tı̄ lián-á-í téng-thâu, iōng boé-chui chhut-la̍t gô-lâi gô-khı̀, gô beh 10 hun-cheng chiah kiu-kiu-á kóng: “Pâ-á, tú-á a-má koh khà tiān-oē lâi neh, i kóng ū chiok chē oē beh kā goá kóng, a-má koh kóng pa-pa teh koáⁿ khang-khoè, m̄-thang kā lí kiò, a-má kóng Soaⁿ-á-kha hong-hō͘ chiok toā--ê, soaⁿ-téng ê chúi chiok toā-káng, soa-á, chio̍h-thâu lóng toè soaⁿ-téng ê thô͘-kô͘ chhiâng--lo̍h-lâi, kū-nı̂ chó͘-lêng ê chhiū-a chai bē-hù toā-châng tō kap kui-phiàn soaⁿ-piah lu--lo̍h-lâi, toā-sè-lia̍p chio̍h-thâu ká chò-hoé, ká kah khih-khih-kho̍k-kho̍k, chhiū-á kiáⁿ kap chhiū-a-má chı̀m tı̄ toā-káng chúi lāi-té, chhiâng kah pin-pin-pōng-pōng......”A-lian ná kóng ba̍k-sái ná lâu, goá ê tiān-pit tèng tı̄ oē-tô͘-pang tı̍t-tı̍t it-tı̍t chhoah, tiān-náu téng-thâu hit-ê tiám jú lâi jú toā, kui-ê Page lóng hoe--khı̀. “A-má koh kóng, kàu boé--á, chúi, thô͘, soa, chio̍h-thâu, chhiū-á.....lóng ùi āu-piah-mn̂g kui-káng lóng--jı̍p-lâi, a-má kóng i bē-hù cháu, i ê kha hō͘ chı̍t-lia̍p chiâⁿ tāng ê chio̍h-thâu teh tiâu--leh, thô͘-kô͘ it-tı̍t ùi āu-piah-mn̂g chhiâng--jı̍p-lâi, a-má bô hoat-tō͘ chhoán-khùi, kui-ê lâng im tı̄ chúi-té, chiok koâⁿ--ê, A-lian ài thiaⁿ pa-pa ma-ma ê oē, koai-koai m̄-thang pháiⁿ, nā bô, a-má āu-pái boài bé kó͘-á-teng hō͘ lí sńg--o͘......” A-lian chē tı̄ í-á téng, kui-bı̄n lóng sı̄ ba̍k-sái kap phı̄ⁿ-chúi, bē-su ka-chiòng phah ê hoeh-bı̄n, goá kā khang-khoè hām A-lian pàng tı̄ pâng-keng lāi, sûi kó͘ tiān-oē tńg Soaⁿ-á-kha, tiān-oē soah bē thong, tiān-oē hoan jı̍h--lo̍h, “toⁿ!” nn̄g-siaⁿ, chı̍t-ê cha-bó͘ sûi kóng-oē: “Hoa-lian tē-khu in-ūi chhit-hō hong-thai-hō͘ éng-hióng, soàⁿ-lō͘ bē thong, bô hong-piān ê só͘-chāi, chiah chhiáⁿ lí goân-liōng.” A-lian tı̄ pâng-keng lāi khàu kah khùn--khı̀, goá kā phō-khi bı̂n-chhn̂g, poe̍h-á tı̄ pa̍k-tó͘ kı̂ⁿ pâu chı̍t-liàn, só-sı̂ chah--leh, phe-chhia tńg Soaⁿ-á-kha. Tı̄ toā-lō͘ téng, hong nā siàn chiàⁿ-pêng chhia tō phiah chiàⁿ-pêng, siàn tò-pêng han-tó͘-luh tō ài pháng chiàⁿ-pêng, chiah bē sái jı̍p-khı̀ kau-á-té, chhia-lián hō͘ chúi im beh chı̍t-poàⁿ, bô sêng teh sái-chhia, tian-tò sêng teh sái-chûn, thàu-hong siàn-hjō͘, o͘-àm ê káu-hō kong-lō͘ téng-thâu, kan-taⁿ goá chı̍t-tâi chū-iōng-chhia teh kap chhit-hō hong-thai chhia-piàⁿ. Soaⁿ-chúi kâm thô͘-chio̍h-soa kap chhiū-á-kin, tı̄ beh jı̍p-khı̀ Soaⁿ-á-kha ê soaⁿ-lō͘ téng chhoah-lâu, goá sái sı̀-lián chûn-á tùi soaⁿ ê khang-chhùi kauh--koè-khı̀, Soaⁿ-á-kha ê kū-chhù tó chı̍t-pêng khı̀, ǹg soaⁿ-piah ê hit-tó͘ piah kap toā-chúi chhoah-lâu chò-hoé lâu--khı̀, ùi toā-mn̂g piàⁿ chhut-lâi thiân--nih. 2001 nı̂ hō͘ hong-thai chhoā toā-hō͘ chhoah-lâu, tùi Hoa-lian hāⁿ--koè, kā soaⁿ-téng bô lâng koán bô lâng chhap ê būn-tê lóng péng-péng--chhut-lâi, soaⁿ-piah phoà-khang lâu-hoeh, kúi-nā 10 lâng toè hong-thai chò-hoé khı̀. (TGB Thong-sı̀n tē 26 kı̂, 2001 nı̂ 11 goe̍h)