Chun-tiōng goá ê gín-ná; Goá chiū beh tit-tio̍h in ê kèng-ùi, O-ló in ê sı̂ choē, Mē in ê sı̂ chió, Khah choē kóng in ê sêng-kong; Iâⁿ-kè kóng-khí in ê sit-pāi.
M̄-thang hō͘ goá ê kiáⁿ-jı̂; Chò goá chò bē kàu ê èng-ún, Ài tùi goá ê gín-ná ū bô hān ê sı̀n-sim, Bô-lūn tı̄ chhù-nih á-sı̄ chhut-goā lóng tio̍h ū siāng-khoán ê koan-liām, Pó-siú in ka-kı̄ ê jı̂n-keh chun-giâm, M̄-thang chiàu ka-kı̄ ê ı̀-sù lâi kái-piàn in.
Chim-chiok chiàu-kò͘ in ê sin-thé; Koh m̄-thang hō͘ in ka-kı̄ léng-sim ka-kı̄ ê ı̀-chı̀, Tio̍h sı̂-siông hoaⁿ-hí kap khoài-lo̍k, In-ūi in ài án-ni chhin-chhiūⁿ ài jı̍t-kng, Tio̍h tùi in ū ke̍k-toā ê thun-lún, Iàu-kín tio̍h ài sià-bián in.
Gín-ná só͘ choè ê m̄ tio̍h ū chin choē in m̄ chai; Iàu-kín tio̍h m̄-thang kı̀-liām in ê m̄ tio̍h, Pó͘-hō͘ gín-ná m̄-thang hō͘ ka-kı̄ ê sı̂n-keng ū éng-hióng; Chhin-chhiūⁿ siū-khı̀, phian-kiàn, pi-koan kap kiaⁿ-hiâⁿ ê sim.
Pang-chān in kéng-soán it-seng sek-tòng ê sū-gia̍p; M̄-thang pek-in lâi ta̍t-sêng ka-kı̄ ê iá-sim, Tio̍h hō͘ in ū chhiong-hun ê sı̂-kan kap khùi-la̍t, Thang choè in ka-kı̄ ê sū, Hō͘ gín-ná oē kap lâng hô-pêng. Chóng-sı̄ tio̍h ū ióng-kám koh sêng-sı̍t koh ū to̍k-lı̍p ê sim.
Hō͘ goá ê gín-ná chū-iû; Kà-sı̄ in cháiⁿ-iūⁿ lâi ēng chū-iû, M̄-thang hō͘ in chiong chū-iû kap hòng-chhiòng saⁿ-lām, Bián-tit hòng-chhiòng tūi-lo̍h, Kín-sı̄n chiàu-kò͘ goá ê kiáⁿ-jı̂, Koh jia̍t-sêng ài-hō͘ in.
Ēng lí-tı̀ kap thiàⁿ lâi ín-chhoā in; Tek-khak m̄-thang ēng hêng-hoa̍t kap mē, Tio̍h gián-kiù liáu-kái goá ê gín-ná; M̄ thang ap-chè, M̄-thang tiām-tiām phoê-phêng kap chhui-chhek; Tio̍h tı̄ it-chhè ê kang-chok tiong hián-chhut lí kian-tēng thiàⁿ in.
Goān thiàⁿ kap lí-kái oē ín-chhoā lán, pang-chān lán choè pē-bú ê tāi-ke chō-chiū chı̍t ê súi ê ka-têng, hióng-siū hēng-hok ê seng-oa̍h, tı̍t kàu éng-éng oán-oán, êng-kng Chú ê miâ. A-men.
(Ka-têng ê Pêng-iú tē 14 kı̂, 1959 nı̂ 4 ge̍h)