Tio̍h chun-siú sı̂-kan

Tı̄ 1788 nı̂ ê bó͘-jı̍t, Bí-kok chóng-thóng Hoâ-sèng-tùn lú-hêng kàu Pho-sū-tùn siâⁿ: I koat-tēng tı̄ bó͘-jı̍t ê chá-khí 8 tiám, beh chhut-hoat khı̀ Sat-bûn siâⁿ. Ū chı̍t-tūi bé-peng beh lâi pó-hō͘ i. Hit chá-khí lé-pài-tn̂g ê sı̂-cheng, kòng 8 tiám ê sı̂, Hoâ-sèng-tùn chiū chún-sı̂ khiâ-bé chhut-hoat. In-ūi chóng-thóng chin chun-siú sı̂-kan. Hit-sı̂ pó-hō͘ chóng-thóng ê ūi-tūi iáu-boē kàu-ūi; keng-koè kúi hun-cheng āu, ūi-tūi chiah kàu-ūi. Ūi-tūi chai-iáⁿ chóng-thóng í-keng chhut-hoat, in piàⁿ-miā khı̀ tui chóng-thóng; kàu-boé ū jio̍k-tio̍h chóng-thóng. Hoâ-sèng-tùn tùi ūi-tūi ê tūi-tiúⁿ kóng: “Lí toè goá chiah-kú, kiám iáu m̄ chai-iáⁿ, sím-mı̍h-sı̂ sı̄ 8 tiám?” Koh ū chı̍t-pái, Hoâ-sèng-tùn siūⁿ beh bé bé. I ū kap chı̍t-ê seng-lí-lâng iok-tēng, bó͘-jı̍t ê chá-khí 5 tiám, kàu i ê pān-kong-sek chham-siông. Chóng-thóng chún-sı̂ kàu-ūi, nā-sı̄ hit-ê seng-lí-lâng khiok bān 15 hun-cheng chiah-lâi. Hit-sı̂ chóng-thóng í-keng teh kap pa̍t-lâng kóng-oē. Hit ê seng-lí-lâng ko͘-put-chiong, tio̍h koh tán chı̍t lé-pài í-āu, chiah ē-thang chı̀n-kiàn chóng-thóng. Seng-lí-lâng in-ūi bān 15 hun-cheng, soah tio̍h koh tán-hāu chı̍t lé-pài. Sèng-keng kóng: “Tio̍h pó-sioh ki-hoē,” ı̀-sù sı̄ “Tio̍h ài-sioh kong-im.” Sio̍k-gú kóng: “Chı̍t-chhùn kong-im chı̍t-chhùn-kim.” Só͘-í lâng-lâng lóng tio̍h ài-sioh kong-im, iā-tio̍h chun-siú sı̂-kan. (Tâi-oân Kàu-hoē Kong-pò tē 2076 kı̂, 1991 nı̂, 12 goe̍h)