Siōng-tè ê un kóng boē chı̄n
Hō͘ goá choē-jı̂n lâi chhin-kı̄n
Tit-tio̍h Siōng-tè kéng-soán goá
Choè I kiáⁿ-jı̂ siōng khùiⁿ-oa̍h
Sè-kan mô͘-kúi hō͘ lâng kiaⁿ
Ài hāi lán lâng ê sı̀ⁿ-miā
Siōng-tè siúⁿ-sù goá lêng-hûn
Oá-khò Iâ-so͘ toā kiù-un
Chá-sı̂ bê-lō͘ ê iûⁿ-kiáⁿ
Tit-tio̍h Iâ-so͘ kiù sı̀ⁿ-miā
Chhut-sı̀ lāu-bú Chú kéng-tiàu
Bê-lō͘ ê iûⁿ bô iûⁿ-tiâu
Sı̀-koè phun-pho loān-loān-cháu
Chhē-tio̍h kiù-chú chiah oa̍t-thâu
Ū thiaⁿ tō-lí bô tèng-kin
Chiū hō͘ mô͘-kúi lâi oá-sin
Tú-tio̍h pı̄ⁿ-thiàⁿ chin-chiàⁿ kú
M̄ -chai Siōng-tè sı̄ chin-chú
Siūⁿ lâi siūⁿ khı̀ siūⁿ bô pō͘
Siūⁿ -beh chū-chı̄n kiâⁿ té-lō͘
Goá ê khoân-kéng chin khó͘ tāi
Nā bô kóng chhut bô lâng chai
Goá ê ka-têng chin o͘-àm
Gō͘-ko chhoā goá kè lō͘-chām
Chhoā goá chı̍t-chām koh chı̍t-chām
Kai-chài Siōng-tè ū pó-hō͘
Chhoā goá oa̍t-thâu kiâⁿ chiàⁿ-lō͘
Goá taⁿ an-sim oá-khò Chú
Chiong-lâi hok-khı̀ tek-khak ū
Sè-kan jı̍t-chí chin khoài kè
Bô kú chiū beh tńg thian-ke
Kàu hia chiū beh kı̀ⁿ Thiⁿ-pē
Thian-tông chiū-sı̄ goá chó͘-ke
Thian-tông êng-kng ê só͘-chāi
Chhin-lâng pêng-iú tı̄ hit-lāi
Saⁿ -kap hoaⁿ-hí teh chheng-chàn
O-ló Thiⁿ-pē un bô-hān
Só͘ choè si-koa bô thang hó
Bô choè ko͘-hū Chú kong-lô
