Tn̄g-kha koh tn̄g-chhiú

Kàu-su hiu-sit-sek ū 1-ê í-keng sú-iōng 20 goā-tang ê kó͘-tóng sı̂-cheng, sı̄ chá-nı̂ ka-tiúⁿ-hoē-tiúⁿ kià-hù hō͘ ha̍k-hāu--ê, chin kū--a,koh ē bān-hun. Tān-sı̄ kang-iú Láu-Chhı̂--ê kóng hit-ê sı̂-cheng poê-phoāⁿ I chiâⁿ kú--a, kám-chêng chiâⁿ chhim, só͘-í it-tı̍t m̄-kam kā tàn-tiāu. Pài-saⁿ chá-khí, sı̂-cheng koh bān 10 goā-hun--a. Hā-khò ê sı̂, 60 goā-hoè ê Ông lāu-su khoàⁿ-tio̍h iáu boē chhoā-bó͘ ê Chhoà lāu-su kiâⁿ--koè-lâi, tō chhiò-chhiò--a kā kóng : "Siàu-liân--ê! Lâi--chı̍t-ē, lí tn̄g-kha koh tn̄g-chhiú, mâ-hoân lí khiā khı̀ í-á téng kā sı̂-cheng chhiâu hō͘ chiàⁿ.” Chhoà lāu-su thiaⁿ liáu kiaⁿ chı̍t-tiô, tō koáⁿ-kín ı̀n kóng: “Goá hó-kha hó-chhiú, tang-sı̂ leh tn̄g-kha koh tn̄g-chhiú--leh?” Ông lāu-su kā chhiò-siaⁿ kiông-kiông thun--lo̍h-khı̀, ı̀n kóng: “Siàu-liân--ê mài gō͘-hoē, goá sı̄ kóng lí lâng seⁿ-chò lò-sia̍k-sia̍k koh chiâⁿ ian-tâu, kha iā tn̂g, chhiú iā tn̂g, án-ne kám ū siáⁿ-mih m̄-tio̍h?”