--Bông-jı̂n Kiàn-chèng-chı̍p
Kài-siāu Ê Oē
Goá chin hoaⁿ-hí ū hūn tı̄ chit ê Kiàn-chèng-chı̍p. Che sı̄ choè Má-keng Kàu-hoē ê bo̍k-su ê hok-hūn.
Goá tı̄ 3 nı̂ chêng pit-gia̍p Tâi-lâm Sı̂n-ha̍k-ı̄ⁿ, siū phài lâi kàu Má-keng ê sı̂, tú-tú in Má-keng teh khí sin ê lé-pài-tn̂g. Goá tı̄ seng-oa̍h put-piān ê tiong-kan iā chiām-chiām bat Má-keng ê hoē-iú kap Phı̂ⁿ-ô͘ ê sū-chêng lah. Hit sı̂ Ko Tiong-hok Kun iáu tı̄ Sin-chng teh tha̍k-chheh. Goá ū thiaⁿ-tio̍h i kè-khı̀ ê siau-sit, chóng-sı̄ iáu m̄-bat i ê lâng.
Goá oē kı̀-tit i tú-tú tńg-lâi ê sı̂ goá chin hoaⁿ-hí; kàu-hoē ke chı̍t ūi ióng-sū, tò͘-sū. Chóng-sı̄ keng-kè bô kú goá chiū sit-bāng. In-ūi i ê kiàn-chèng, ia̍h-sı̄ káng-tō lò-lò tn̂g, m̄-chai i sı̄ teh kóng sím-mı̍h, chí-ū chai i sı̄ teh kám-siā Chú nā-tiāⁿ. Tùi hiān-chāi lâi kā i khoàⁿ, i ài kiàn-chèng ê chin-choē chin-choē kóng boē liáu; chóng-sı̄ ài kóng sı̄ ài kóng, kóng boē hó-sè.
Goá hit-sı̂ iā sı̄ tú-tú choè thoân-tō nā-tiāⁿ, m̄-káⁿ phoe-phêng sím-mı̍h; chí-ū i nā ài choè kiàn-chèng, goá chiū lúi sı̂-kan hō͘ i, hō͘ i ê jia̍t-chêng ū lō͘ thang tháu. Iā choè-āu i nā ēng jia̍t-jia̍t ê sim-chêng teh kı̂-tó ê sı̂, goá iā tâng chı̍t-iūⁿ ê sim kap i kóng “A-men.”
Bô phah-sǹg i tı̄ chit 2 nı̂ goā ê tiong-kan tı̄ sı̀n-gióng siōng, tı̄ kóng-oē siōng chı̀n-pō͘ kàu án-ni. Che sı̄ goá só͘ hoaⁿ-hí ê. Che khak-sı̍t sı̄ Chú hō͘ i ê un-sù.
Ko Tiong-hok Kun sı̄ chı̍t ūi moá 22 hè ê nı̂ bé gín-ná. Tı̄ kiàn-chèng ê tiong-kan, lán chiū oē thang chai-iáⁿ, i sı̄ chı̍t ê ba̍k-chiu bô chū-iû ê lâng; sǹg sı̄ chı̍t ê khó-lı̂n ê lâng. Chóng-sı̄ Chú ê thiàⁿ chiah toā tı̄ i ê sin-chiūⁿ, só͘-í ài choè kiàn-chèng, pò-tap Chú ê un; soan-iông Chú ê hok-im, êng-iāu Chú ê miâ. Chhiáⁿ lán kè-sio̍k ūi-tio̍h chit ūi chheng-liân kı̂-tó, hō͘ i ê sı̀n-gióng bô chı̍h-chām, oē thang kian-chhı̂ i só͘ sı̀n ê, koh bô boē kı̀-tit Chú ê un-chêng kàu tı̄ kú-kú.
Chhiáⁿ lán tāi-ke koh koan-sim chı̍t hāng: Lán teh tha̍k i ê kiàn-chèng ê sı̂, chhiáⁿ lán kap i saⁿ-kap tı̄ goán Phı̂ⁿ-ô͘ ê khoán-sit; nā i beh chē chûn ê sı̂, chûn teh iô, chhiáⁿ lán iā kap hit chiah chûn iô-khí iô-lo̍h; keng-giām tio̍h goán Phı̂ⁿ-ô͘ ê chu-bı̄.
Chhiáⁿ lán tāi-seng ūi-tio̍h goán Phı̂ⁿ-ô͘ hoaⁿ-hí; ū chit khoán ê chheng-liân tı̄ goán chia, che sı̄ goán ê hok-khı̀. Chhiáⁿ tāi-ke ūi-tio̍h goán Phı̂ⁿ-ô͘ kàu-hoē kè-sio̍k kı̂-tó.
Goá tı̄ Má-keng í-keng 3 nı̂ poàⁿ kú, iā tı̄ chia choè bo̍k-su. Goá ū khǹg chı̍t ê ı̄ⁿ-siōng, ài goán Phı̂ⁿ-ô͘ ê kàu-hoē chū-ióng, chū-lı̍p kap chū-tı̄.
Goán Phı̂ⁿ-ô͘ Kàu-hoē hō͘ Tâi-oân kàu-hoē āiⁿ 82 nı̂ kú, chiū-sı̄ tùi Kam Bo̍k-su lâi Phı̂ⁿ-ô͘ siat-lı̍p kàu-hoē kàu hiān-chāi, lóng sı̄ oá-khò lán Tâi-oân kàu-hoē ê sèng-chhan hiàn-kim lâi ı̂-chhı̂. Taⁿ goán Phı̂ⁿ-ô͘ í-keng ū 3 keng to̍k-lı̍p, iā keng-kè 15 nı̂ lah. Chit 3 keng nā ha̍p-chok, koh ū Phı̂ⁿ-ô͘ chhut-sin-chiá ê hia̍p-chō͘, eng-kai oē sı̍t-hiān í-siōng só͘ kóng ê chū-ióng, chū-lı̍p kap chū-tı̄ chiah tio̍h.
Ǹg-bāng tı̄ 3-5 nı̂ āu chit ê sū oē sı̍t-hiān. Iā ǹg-bāng lán ê kı̂-tó tı̄ goán Phı̂ⁿ-ô͘ chèng kàu-hoē ê téng-bı̄n.
Choè-āu chiok-hok tāi-ke sin-thé, lêng-hûn tit Chú pêng-an !
Tı̄ Má-keng Kàu-boa̍t Lô͘ Un-hūi A . D . 1968 , 12 , 17 .
Thâu-sū
Goá chin hoaⁿ-hí goá kú-kú só͘ kı̂-thāi ê Kiàn-chèng-chı̍p oē thang ı̀n chhut-lâi.
Goá chit ê kè-e̍k sı̄ tı̄ Sin-chng ê ha̍k-hāu sı̂-tāi chiū ū ê. Hit-sı̂ sui-jiân ū teh siá, chóng-sı̄ siá lóng boē chhut-lâi; in-ūi bô sı̂-kan, iā só͘ siūⁿ ê piáu-ta̍t boē chhut-lâi ê iân-kò͘. Koh sū-sı̍t siōng, lóng iáu-bē ūi Chú choè tio̍h kang, pò-tap Chú ê un-chêng, só͘-í nā tı̄ hit-sı̂ siá it-tēng sı̄ chı̍t pún bô oân-choân ê kiàn-chèng-chı̍p lah.
Kàu pit-gia̍p āu, goá tı̄ Má-keng, tı̄ Phı̂ⁿ-ô͘ ū ló͘-le̍k ūi Chú teh choè kiàn-chèng, só͘-í Chú iā chiok-hok goá tı̄ sı̀n-gióng siōng khah ū chhiong-chiok ê keng-giām lah. Goá chiong Chú hō͘ goá ê sı̀n-gióng siōng ê keng-kè siá tı̄ chit pún Kiàn-chèng-chı̍p. Ǹg-bāng kok-ūi hiaⁿ-tı̄ chí-bē, kè-sio̍k chí-tō, thoè goá kı̂-tó.
Goá sı̄ chı̍t ê nı̂-hè iáu chió ê lâng; tı̄ seng-oa̍h siōng, sı̀n-gióng siōng iáu keng-giām chió-chió; koh beh lâi ê jı̍t-chí iáu chin tn̂g, beh gū-tio̍h sím-mih chai-hāi, he̍k-sı̄ Mô͘-kúi ê chhı̀-thàm iáu m̄-chai. Ǹg-bāng tı̄ hit-sı̂ oē thang tit-tio̍h tāi-ke ê kı̂-tó kap chí-tō, hō͘ goá oē khiā-chāi.
Goá kàu choè-kūn í-keng ka-kı̄ ū siá ( tiám ) choē-choē tiuⁿ khí-lâi, chóng-sı̄ m̄-chai beh cháiⁿ-iūⁿ chhut-pán. Kàu tı̄ kin-nı̂ ( 1968 ) ê hioh-joa̍h khı̀ Hoe-the̍h ê sı̂ ū gū-tio̍h Tân Kok-sin Kun, i sı̄ Chiong-kun-ò ê lâng, tı̄ Sin-tek teh tha̍k I-choan. I thiaⁿ-tio̍h goá ê sū-chêng chiū kó͘-bú goá khı̀ Tâi-oân kok só͘-chāi choè kiàn-chèng, iā chàn-sêng goá ı̀n-chhut Kiàn-chèng-chı̍p. Taⁿ goá eng-kai tio̍h kā i toā-toā seh to-siā. Koh ū choē-choē lâng kā goá pang-chān hoan-e̍k Pe̍h-oē-jı̄ kap Kok-gú, goá iā ài to-siā in ê pang-bâng. Iā kám-siā Chú, I chhe choē-choē lâng lâi pang-bâng goá.
Choè-āu chiok tāi-ke sim-sı̂n jio̍k-thé kiān-khong.
Tı̄ Phı̂ⁿ-ô͘, Má-keng( Kiàn-chèng-jı̂n: Ko Tiong-hok ) kèng-siōng
Kiàn-chèng
I. Choân-ke Ê Kiàn-chèng
Lia̍t-ūi chheng-liân hiaⁿ-chí, goá kin-á-jı̍t chin hoaⁿ-hí chiong goán choân-ke sı̀n Chú ê keng-kè, í-kı̍p goá pún-sin tùi sı̀n tit-tio̍h ê chiok-hok, tı̄ chia siá tām-po̍h choè kiàn-chèng hō͘ tāi-ke chai-iáⁿ.
Saⁿ tāi chêng:
Goán tùi goán ê chó͘-sian chin-choē tāi lóng sı̄ sı̀n Hu̍t-kàu. Jı̂-chhiáⁿ, goá só͘ chai-iáⁿ ê, tùi goá ê chó͘, a-kong, lāu-pē chit 3 tāi lóng sı̄ ài chia̍h chiú. Tı̄ chit-gia̍p hong-biān chí-ū choè khó͘-kang tō͘-kè it-seng. Āu-lâi goán ê seng-oa̍h chin khùn-lân.
Goá ê a-má it-seng siⁿ chin-choē gín-ná; kı̂-tiong iā ū sè-hàn chiū iáu-siū, koh ū ê in-ūi seng-oa̍h khùn-lân bô khó-lêng poê-ióng, chiū sàng hō͘ pa̍t lâng choè kiáⁿ; chí-ū ka-kı̄ lâu 2, 3 ê ta-po͘ gín-ná. Choè-āu iā ū chiong chı̍t ê siōng sè-hàn ê cha-bó͘ gín-ná sàng hō͘ pa̍t lâng choè ióng-lú.
Hit sı̂ goán choân-ke tong-jiân lóng iáu-bē bat Chú Iâ-so͘ ê miâ-jı̄; iā m̄ chai-iáⁿ gín-ná sı̄ Siōng-tè só͘ siúⁿ-sù ê, iā m̄ chai-iáⁿ gín-ná sı̄ Siōng-tè só͘ kau-thok lán iúⁿ-chhı̄ ê. Bô chhin-chhiūⁿ hiān-chāi ê lâng tit-tio̍h Chú ê kng chiò; chai thang ka-têng ê kè-e̍k, thang pó-sioh Chú só͘ kau-thok ê gín-ná.
A-ko͘ ê chō-gū:
Sı̂-kan kè tit chin kín. Tùi goá siāng sè-hàn ê a-ko͘ sàng hō͘ pa̍t-lâng choè ióng-lú liáu-āu, put-ti put-kak í-keng kè-khı̀ chin-choē nı̂. Goá ê a-ko͘ iā í-keng toā-hàn.
Ū chı̍t jı̍t, goá ê a-ko͘ ê ióng-bú hut-jiân phoà-pı̄ⁿ chin siong-tiōng. Bô-lūn mn̄g pu̍t, chhiáⁿ i-seng tı̄-liâu lóng bô hāu-kó. Bô joā-choē ê chek-chū lóng ēng liáu, pı̄ⁿ iû-goán boē hó, jı̂-chhiáⁿ chı̍t-jı̍t chı̍t-jı̍t ná giâm-tiōng.
Goá ê a-ko͘ ê iúⁿ-bú chiū pek goá ê a-ko͘ khı̀ siat-hoat chı̂ⁿ. Goá ê a-ko͘ bô hoat-tō͘ thang siat-hoat kàu chin hó-sè, só͘-í siū iúⁿ-bú mē kóng sı̄ put-hàu. Kó͘-chá ê lâng nā hō͘ sı̄-toā-lâng mē put-hàu sı̄ chin kan-khó͘ ê sū. Chóng-sı̄ goá ê a-ko͘ sui-jiân m̄-sı̄ put-hàu, iáu khak-sı̍t bô pān-hoat thang khı̀ siat-hoat chı̂ⁿ.
Keng-kè bô kúi-jı̍t goá ê a-ko͘ ê iúⁿ-bú chiū sí khı̀. Tng iúⁿ-bú pı̄ⁿ chin giâm-tiōng kám-kak chin kan-khó͘ ê sı̂ chiū tùi goá ê a-ko͘ kóng, goá sí liáu-āu it-tēng m̄-goān lí, beh choè kúi lâi chhē lí.
A-ko͘ koh phoà-pı̄ⁿ:
Iúⁿ-bú sí liáu-āu ka-têng kèng-ka hūn-loān, seng-oa̍h ná khùn-lân. Goá ê a-ko͘ khoàⁿ-kı̀ⁿ ka-têng í-keng ka-sàn jı̂n-bông, i ê sim chin kan-khó͘. Āu-lâi i chiū tò-tńg khı̀ siⁿ-bú ê só͘-chāi. Keh bô kúi-jı̍t goá ê a-ko͘ chiū khí sin-keng-pı̄ⁿ, jı̂-chhiáⁿ piàn-sin siⁿ-chhng; keng-kè chin-choē i-seng tı̄-liâu lóng bô hāu-kó. Goá ê a-má chiū khı̀ mn̄g pu̍t. Pu̍t tùi goá ê a-má kóng, goá ê a-ko͘ sı̄ hō͘ kúi tı̂ⁿ-sin ê. Goá ê a-má chai-iáⁿ liáu-āu sim chin kan-khó͘, ūi-tio̍h beh hō͘ goá ê a-ko͘ pı̄ⁿ hó, chiū khı̀ mn̄g pu̍t khoàⁿ beh iōng sím-mı̍h hong-hoat i-hó goá ê a-ko͘ ê pı̄ⁿ. Pu̍t kā goá ê a-má kóng choē-choē hong-hoat; goá ê a-má chiū chiàu án-ni khı̀ choè, jı̂-chhiáⁿ koh hiàn chin-choē chı̂ⁿ choè biō ê lō͘-ēng. Koh iōng chin-choē mı̍h-kiāⁿ khı̀ pài pu̍t, ǹg pu̍t hē goān kóng, pu̍t nā i-hó goá a-ko͘ ê pı̄ⁿ, goān-ı̀ chiong goá ê a-ko͘ hōng-hiàn hō͘ pu̍t choè i ê lō͘-ēng. Kiat-kó goá ê a-ko͘ ê pı̄ⁿ iā bô tit-tio̍h i-hó.
Āu-lâi goá ê a-má koh khı̀ chhiáⁿ chin ū miâ ê hoat-su lâi kā goá ê a-ko͘ koáⁿ kúi. Chóng-sı̄ lóng bô khó-lêng thang hō͘ i hó; hoán-tńg ná giâm-tiōng chhin-chhiūⁿ beh sí chı̍t-iūⁿ. Hit-sı̂ goán choân-ke lóng ūi-tio̍h goán ê a-ko͘ chin siong-sim.
Chú ê sù-chiá kàu:
Ū chı̍t-jı̍t hut-jiân ū chı̍t ūi cha-bó͘-lâng lâi goán chhù. Chit ê cha-bó͘-lâng sı̄ goá ê a-má ê hó pêng-iú; sı̄ chı̍t ê sı̀n Chú, pài Siōng-tè ê lâng. Goá ê a-ko͘ ê pı̄ⁿ mı̂-jı̍t boē chia̍h boē khùn-tit, mı̂-jı̍t jiáu-loān ka-têng. Hit sı̂ hit ê lú sı̀n-tô͘ khoàⁿ-kı̀ⁿ goá ê a-ko͘ chit khoán chêng-hêng, chiū mn̄g goá ê a-má sı̄ sím-mı̍h goân-in. Goá ê a-má chiū kā i kóng. Lú sı̀n-tô͘ thiaⁿ-kı̀ⁿ goá ê a-má ê kái-soeh liáu-āu, chiū ūi-tio̍h goá ê a-ko͘ kı̂-tó; iā sūn ki-hoē thoân hok-im hō͘ goá ê a-má.
Lú sı̀n-tô͘ kóng: Lí ê cha-bó͘-kiáⁿ kı̀-jiân oá-khò i-seng, iōng chióng-chióng tı̄-liâu ê hong-hoat, pı̄ⁿ iû-goân boē hó, taⁿ chhiáⁿ lí m̄-bián ūi-tio̍h án-ni sim peh-pak; oá-khò sè-kan ê i-seng io̍h-hng sui-jiân bô ǹg-bāng, tān-sı̄ iáu-ū chı̍t ūi ( Kiù-sè chú ) Iâ-so͘ Ki-tok. I ūi-tio̍h lán ê choē kàng-seng kàu sè-kan choan-būn i-pı̄ⁿ koáⁿ-kúi kap kái-tû lâng ê choē-koà. Lâng boē-oē choè ê sū I lóng oē-tit choè. I iā ū koân-lêng thang hō͘ lâng tùi sí koh-oa̍h. I sı̄ lán lêng-hûn choè toā ê Kiù-chú; jio̍k-thé choè toā ê i-seng. Lí ê cha-bó͘-kiáⁿ ê pı̄ⁿ sǹg sı̄ sió-khoá. Lí nā goān-ı̀ chiong lí ê cha-bó͘-kiáⁿ ê pı̄ⁿ kau-tài tı̄ chit ūi chin Sı̂n Iâ-so͘ ê chhiú, I chiū beh i-hó i. Tng lán chı̀n-thoè bô lō͘ ê sı̂ chí-ū tio̍h chhē Kiù-chú Iâ-so͘; bô-lūn khoân-kéng cháiⁿ-iūⁿ kan-lân, thòng-khó͘, pı̄ⁿ-thiàⁿ, iu-chhiû, kap hoân-ló, lán nā sı̀n-khò I, I chiū ūi lán kái-koat it-chhè būn-toê.
A-ko͘ jı̍p-sı̀n:
Goá ê a-má thiaⁿ liáu-āu, sim siū Sèng Sı̂n ê kám-tōng, chiū koat-ı̀ beh hō͘ goá ê a-ko͘ sı̀n Chú Iâ-so͘. Hit ūi lú sı̀n-tô͘ thiaⁿ-kı̀ⁿ goá ê a-ko͘ beh sı̀n Iâ-so͘, sim chin hoaⁿ-hí, bô kú chiū lı̄-khui goán ê chhù khı̀ Má-keng kàu-hoē chhiáⁿ bo̍k-su lâi thoè goá ê a-ko͘ kı̂-tó. Chit ūi lú sı̀n-tô͘ sı̄ hiān-chāi Tâi-lâm Bı̂n-cho̍k-lō͘ kàu-hoē ê Khó͘ San-lūn Bo̍k-su ê tiūⁿ-ḿ, miâ kiò Lí Tân To-ka. Hit sı̂ tú-tú Lı̂m Chiàu Bo̍k-su tı̄ Má-keng kàu-hoē choè bo̍k-su ê sı̂. To-ka chí chiū chhiáⁿ bo̍k-su kap choē-choē sı̀n-tô͘ kàu goá ê ka-têng choè Sèng-pia̍t lé-pài .
Goá ê a-ko͘ tùi hit jı̍t Sèng-pia̍t liáu-āu, tit-tio̍h Chú ê lı̂n-bín, pı̄ⁿ chiū chiām-chiām kiám-khin. Goá ê a-ko͘ múi àm beh khùn ê sı̂, hit ūi lú sı̀n-tô͘, To-ka chí, lóng lâi ūi-tio̍h i kı̂-tó. Kó-jiân kı̂-tó ê kong-hāu chin toā. Keng-kè bô kúi-jı̍t goá ê a-ko͘ pı̄ⁿ chiū oân-choân hó khı̀.
Mô͘-kúi khó͘-chhó͘ goá ê a-ko͘:
Goá ê a-ko͘ sı̀n Chú liáu-āu, Mô͘-kúi chiū m̄-káⁿ koh khó͘-chhó͘ i. Tān-sı̄ Mô͘-kúi chin hiong-ok, m̄-goān lı̄-khui goán ê ka-têng. Āu-lâi Mô͘-kúi chiū hoán-tńg khó͘-chhó͘ goá ê lāu-bú.
Goá ê lāu-bú siū Mô͘-kúi khó͘-chhó͘ ê chêng-hêng iā sı̄ chin lı̄-hāi. Tng goá ê lāu-bú siū hāi ê sı̂, goá ê a-má iû-goân sı̄ khı̀ mn̄g pu̍t; khoàⁿ sı̄ sím-mı̍h goân-in. Pu̍t kóng, goá ê lāu-bú sı̄ hoān tio̍h kúi. Koh kóng hit ê kúi sı̄ goá ê lāu-bú chêng-sè ê tiōng-hu. Hit sı̂ goá iáu chin sè-hàn, chí-ū goá ê a-má ēng chin-choē ê hong-hoat beh koáⁿ kúi ê sū goá ū kı̀-ek nā-tiāⁿ. Tān-sı̄ lóng bô kong-hāu. Āu-lâi ū koh khı̀ chhiáⁿ chin-choē koáⁿ kúi ê hoat-su kap i-seng lâi tı̄-liâu goá ê lāu-bú ê pı̄ⁿ. Chóng-sı̄ lóng bô hāu-kó.
Ū chı̍t jı̍t hit ê lú sı̀n-tô͘ koh lâi goán ê chhù. Khoàⁿ-kı̀ⁿ chit khoán ê chêng-hêng, chiū tùi goá ê a-má kóng, kiò goá ê a-má tio̍h hō͘ goá ê lāu-bú lâi sı̀n Iâ-so͘. Hit sı̂ goá ê a-má chiah siūⁿ khí í-chêng goá ê a-ko͘ ê sū, chiū chin goān-ı̀ hō͘ goá ê lāu-bú sı̀n Iâ-so͘ lah.
Tùi hit chūn liáu-āu goá ê lāu-bú ê pı̄ⁿ chiū hó khı̀.
Tio̍h kàu goá ê a-kong:
Keng-kè bô joā-kú goá ê a-kong chhut-goā kang-chok ê sı̂, bô sió-sim hō͘ chı̍t ki toā-sam teh-tio̍h chı̍t-ki kha ê chńg-thâu á. Chêng-hêng chin giâm-tiōng.
Āu-lâi tit-tio̍h Má-keng kàu-hoē ê sı̀n-tô͘ kap bo̍k-su ê koan-sim kap pang-chān, múi-jı̍t ēng chhia chài goá ê a-kong khı̀ hō͘ i-seng tı̄-liâu. Iā siông-siông kàu goá ê ke lâi thàm-hóng kap tāi-tó. Tùi án-ni goá ê a-kong sim siū kám-tōng; ū chı̍t jı̍t i chiū beh koat-ı̀ sı̀n Iâ-so͘ Ki-tok choè i ê Chú. To-ka chí liâm-piⁿ chai goá ê a-kong beh sı̀n Iâ-so͘, chiū sūn chit ê ki-hoē hiòng goán choân-ke thoân hok-im. I kóng, Chhiáⁿ lín choân-ke tùi kin-á-jı̍t khí lâi sı̀n Iâ-so͘, Mô͘-kúi chiū bô khang-phāng thang lâi koh hām-hāi lín. Choân-ke thiaⁿ liáu-āu sim tit-tio̍h Sèng Sı̂n ê kám-tōng, tùi hit jı̍t khí goán choân-ke chin hoaⁿ-hí ngiâ-chih Chú Iâ-so͘ chı̀n-jı̍p goán ê ke choè ka-teng ê Chú.
Choân-ke kui Chú :
Goán choân-ke tùi Lı̂m Chiàu Bo̍k-su Sèng-pia̍t lé-pài liáu-āu chiū chiâⁿ-choè pêng-an kap hoaⁿ-hí khoài-lo̍k, chhiong-moá tiau-hô khı̀-hun ê ka-têng. Choân-ke siū Sèng-pia̍t ū 8 ê lâng, í-goā m̄ goān-ı̀ sı̀n Chú ê sı̄ goá ê jı̄ chek chı̍t lâng.
Tng Sèng-pia̍t hit jı̍t i tú-tú bô tı̄ chhù, chhut-goā choè peng. Tı̄ hiu-ká ê sı̂ i tńg-lâi chhù, khoàⁿ-kı̀ⁿ chhù-lāi it-chhè ngó͘-siōng lóng siū tû liáu-liáu, chiū mn̄g goá ê a-má, khoàⁿ sı̄ sím-mı̍h goân-in. Goá ê a-má chiū tùi i kóng, lán choân-ke sı̀n Chú, iā chiong it-chhè ê keng-kè kóng hō͘ i thiaⁿ. Chóng-sı̄ goá ê a-chek chin siū-khı̀, jı̂-chhiáⁿ hoán-tùi goán khı̀ sı̀n Iâ-so͘, jı̍p kàu .
A-chek ê hoán-tùi:
Hit jı̍t sı̄ lông-le̍k 12 ge̍h 29 jı̍t, in ê hiu-ká-jı̍t. keh jı̍t chiū-sı̄ chiaⁿ-ge̍h chhoe 1. Goá ê a-chek chiū khai-sí hêng-tōng lah. I koat-ı̀ ài beh koh kè-sio̍k pài pu̍t,chiū kap bô sı̀n Chú it-poaⁿ ê lâng siāng-khoán, tah liân, kat-chhái. Koh khı̀ goā-bı̄n toà chin-choē ngó͘-siōng lâi chhù-nih beh ho̍k-sāi.
Kı̂-biāu bô kı̂-biāu, 29 àm goá ê lāu-bú beh khùn ê sı̂ chiū koh siū Mô͘-kúi khó͘-chhó͘ khai-sí kan-khó͘ lah. Jı̂-chhiáⁿ hit ê chêng-hêng pí í-chêng khah giâm-tiōng. Hit àm goá ê lāu-bú lóng thong-mı̂ bô khùn, choân-ke lóng ūi-tio̍h i lâi kiaⁿ-hiâⁿ. Kàu thiⁿ-kng ê sı̂ goá ê a-kong chiū khı̀ Má-kong kàu-hoē chiong chiah ê sū tùi bo̍k-su kóng. Bo̍k-su chiū koh khı̀ goán tau, kú-hêng tē 2 piàn ê tû ngó͘-siōng ê lé-pài; iā ūi-tio̍h goá ê lāu-bú, choân-ke kūi-lo̍h tı̄ Chú ê bı̄n-chêng jı̄n-choē kı̂-tó. Goá ê lāu-bú chiū ho̍k-tò kiān-khong ê sin-thé khí-lâi.
Sı̀n Chú tit pêng-an :
Goá oē-kı̀-tit goá sè-hàn ê sı̂, goá ê a-kong tùi goá kóng chı̍t ê kò͘-sū. I kóng, tng i 35 hè, iáu-bē sı̀n Chú ê sı̂ ū chı̍t piàn phoà-pı̄ⁿ chin giâm-tiōng. I jı̄n-ūi bô bāng lah. Ū chı̍t jı̍t i chiū khı̀ mn̄g pu̍t, khoàⁿ i ê siū-miā oē tàng oa̍h kàu kúi nı̂. Pu̍t kóng, goá ê a-kong choè tn̂g siū-miā put-kò sı̄ kàu 72 hè.
Chóng-sı̄ goá ê a-kong sı̀n Chú liáu-āu, Chú chiok-hok i hō͘ i hiān-chāi oa̍h kàu 78 hè iáu chin kiān-khong. Che sui-jiân m̄-sı̄ chin joā hó ê kiàn-chèng, tān-sı̄ goá ê a-kong siong-sı̀n i sı̀n Chú liáu-āu, Chú khak-sı̍t ū ke-thiⁿ i ê hè-siū; iā hō͘ i ê sim pêng-an bô hoân-ló, hoān-sū kau-tài tı̄ Chú; khak-sı̍t sin-thé ū khah ióng-kiāⁿ.
Goán choân-ke kui Chú sı̄ bı̂n-kok 40 nı̂. Iā goá ê a-ko͘ kiat-hun sı̄ bı̂n-kok 42 nı̂; kè hō͘ chı̍t ê i-seng. Bô kú goá ê a-ko͘ chiū poaⁿ-soá kàu Tâi-oân khı̀.
A-ko͘ hó-gia̍h chiū lı̄-khui Chú:
Khó-sioh, goá ê a-ko͘ poaⁿ kàu Tâi-oân liáu-āu, in-ūi ka-têng ê sok-pa̍k, seng-oa̍h iū koh hù-jū, chiū chiām-chiām boē-kı̀-tit kè-khı̀ i ê kan-khó͘, iā boē-kı̀-tit Chú cháiⁿ-iūⁿ chín-kiù i thoat-chhut khó͘-lān ê jı̍t. I tı̄ hia boē-oē kám-siā Chú, hoán-tńg tı̄ hia chiām-chiām hòng-khı̀ chū-hoē, án-ni i kap Chú kau-thong ê sı̂-kan chiām-chiām chió lah.
Sio-siâng án-ni, goán tı̄ chia ê choân-ke, iā keng-kè chı̍t toāⁿ sı̂-kan liáu-āu chiām-chiām boē-kı̀-tit Chú ê un-hūi. Khó-liân, bô khó-liân ah !
M̄-thang bông-un poē-gı̄:
Lia̍t-ūi hiaⁿ-chí ! Che kiám m̄-sı̄ chı̍t ê bông-un poē-gı̄ ê sı̀n-tô͘ mah? Tng chı̍t ê lâng chin thiàⁿ lán ê sı̂, lán nā boē-oē kám-siā i, pò-tap i ê un-tián, bô siông-siông kap i lâi-óng, hoán-tńg tòng choè bô sio-bat ê lâng, goá siong-sı̀n hit ê un-jı̂n it-tēng siong-sim. Kiám-chhái hit ê lâng beh hoe-sim sit-chı̀, siūⁿ kóng, i só͘ choè ê lóng kui tı̄ khang-khang. Chhin-chhiūⁿ án-ni, Siōng-tè chín-kiù lán thoat-lı̄ it-chhè khó͘-lān, thiàⁿ lán lóng bô soah. Lán nā boē-oē kám-siā I, pò-tap kèng-pài I, Siōng-tè ê Sı̂n it-tēng oē iu-būn.
Goá siong-sı̀n goá ê a-ko͘ í-kı̍p goán choân-ke, í-chêng ê kan-khó͘ nā m̄-sı̄ Chú ê lı̂n-bín chiū m̄-chai beh koh piàn-sêng sím-mı̍h khoán pháiⁿ ê cho-gū.
Goá ǹg-bāng lán tāi-ke lóng oē thang chai-iáⁿ Chú ê thiàⁿ, tông-sı̂ iā oē thang chai-iáⁿ Chú ūi-tio̍h lán ê choē hiàn I ka-kı̄ ê sı̀ⁿ-miā, siū tèng sí tı̄ sı̍p-jı̄-kè téng, thiàⁿ ê kiù-sio̍k. Goān lán tāi-ke khoàⁿ-kı̀ⁿ che sió-sió ê kiàn-chèng iā oē thang siūⁿ kàu Chú thiàⁿ-thàng ê úi-tāi lâi kian-kiông lán ê sı̀n-gióng. Án-ni Chú chiū beh chiok-hok lán. M̄-thang chhin-chhiūⁿ goán ê choân-ke chiâⁿ-choè bông-un poē-gı̄ ê lâng.
Chú bô pàng-sak goán:
Ka-chài Chú iáu thiàⁿ goán choân-ke. Goán choân-ke lı̄-khui Chú liáu-āu kàu tı̄ bı̂n-kok 50 nı̂ chiah koh tit-tio̍h Chú ê lı̂n-bín kiò-chhíⁿ chı̍t ke 3 lâng hoán-hoé, jı̄n-choē, koh lâi hù chū-hoē.
Sui-jiân án-ni goá iáu ǹg-bāng Chú koh kè-sio̍k kiò-chhíⁿ goán choân-ke, hō͘ in chı̍t-sı̀-lâng koat-sim kun-tè Chú. Chóng-sı̄ lâng ê só͘ siūⁿ nā m̄-sı̄ Chú ê ı̀-sù chiū lóng boē chiâⁿ. Goān Chú lı̂n-bín. Goān goán ê kı̂-tó siū Chú chiap-la̍p ê jı̍t tı̄ kūn-kūn.
Chhiáⁿ lán lâi gı̂m, Sèng-si 275 siú:
Chı̀-hó Pêng-iú Chiū-sı̄ Iâ-so͘
1 . Chı̀-hó pêng-iú chiū-sı̄ Iâ-so͘,
Tam-tng choē-koà kap hoân-ló,
Chin-chiàⁿ lán ū toā-toā hok-khı̀,
Bān sū lóng thang tùi I thó;
Sim-koaⁿ siông-siông sit-lo̍h pêng-an,
Ta̍uh-ta̍uh khoà-lū kan-khó͘ sū,
Che sı̄ tùi lán bē ū chhim-sı̀n,
Bē ū pàng sim kau-thok Chú.
2. Kiám-chhái tú-tio̍h iu-būn chhı̀-liān,
Á-sı̄ sím-mı̍h toā hoân-ló,
Tek-khak m̄-thang siông-siông sit-chı̀,
Tio̍h chiong ta̍k hāng lâi kı̂-tó;
Kiám ū pêng-iú kàu chiah chı̄n-tiong,
Kam-goān thé-thiap bān chai-hō,
Iâ-so͘ chai lán sim ê loán-jio̍k,
Chiong che khó͘-sū lâi kı̂-tó.
3.Siat-sú ià-lán lóng bô khùi-la̍t,
Chhin-chhiūⁿ taⁿ tàⁿ beh poa̍h-tó,
Chı̀ toā Kiù-chú lán thang chhin-kūn,
Bān sū lóng thang tùi I thó;
Pêng-iú nā ū khoàⁿ-khin iàm-chiān,
Thang chiong che sū lâi kı̂-tó,
Chú oē ēng chhiú jia-cha̍h, pó-hō͘,
Sim thang an-jiân bián hoân-ló.
A-men.
