II. Goá Pún-sin Ê Kiàn-chèng :
Goá ê lāu-bú siⁿ goán hiaⁿ-tı̄ chí-bē chóng-kiōng 11 lâng; ta-po͘ gín-ná goá siōng toā.
Sí koh-oa̍h:
Goá chhut-sı̀ ê sı̂ goân-pún m̄-sı̄ ba̍k-chiu bô khoàⁿ-kı̀ⁿ. Kàu 3 hè ê sı̂ chhut-moâ ( chhut-phiah ), phoà-pı̄ⁿ chin kú boē hó. Ū chı̍t chá-khí goá ê pı̄ⁿ chin giâm-tiōng, chiū sí-sí--khı̀. Tng goá sí kúi sió-sı̂ liáu-āu, keng-kè i-seng chín-toàn, goá sı̄ í-keng chin-chiàⁿ sí-khı̀. Goá ê lāu-pē chiū ūi goá pı̄-pān sió-sió koan-bo̍k. Tng pē-bú chiong goá sàng jı̍p koan-bo̍k, bô joā-kú goá chiū koh oa̍h-khí-lâi, khui siaⁿ teh háu. Tùi hit jı̍t khí, goá múi-jı̍t lóng chiàu-siông sit-sı̂n kúi-nā piàn chiah koh oa̍h khí-lâi. Choân-ke lóng ūi-tio̍h goá chin siong-sim; m̄-chai beh cháiⁿ-iūⁿ pān-lí. Te̍k-pia̍t sı̄ goá nı̂-lāu ê a-má ūi-tio̍h goá pi-siong, tı̀-kàu liân i ê ba̍k-chiu iā pı̀ⁿ-chiâⁿ bông-bū.
Ba̍k-chiu bô khoàⁿ-kı̀ⁿ lah :
Tng goá ê pı̄ⁿ tit-tio̍h i-hó liáu-āu, goá ê ba̍k-chiu chiū piàn-chiâⁿ bô khoàⁿ-kı̀ⁿ ê lah, jı̂-chhiáⁿ sin-thé iā pı̀ⁿ-chiâⁿ chin soe-lám. Chin-choē i-seng kóng, goá sı̄ í-keng bô kú tı̄ chit sè-kan ê lâng.
Bô joā-kú, siūⁿ boē kàu goá ê sin-thé jı̍t-jı̍t ióng-chòng khí-lâi. Sı̍t-chāi chin-chiàⁿ Siōng-tè beh hō͘ lâng ū oa̍h-miā tı̄ chit sè-kan, sı̄ lán sè-kan lâng só͘ boē-oē chín-toàn, boē-oē ū-chhek ê.
Kàu goá toā-hàn liáu-āu, kè-khı̀ ê sū goá ê pē-bú chiah tùi goá kóng khí. Goá tı̄ sè-hàn ê sı̂ só͘ gū-tio̍h ê sū, goá pún-sin lóng m̄-chai, iā lóng boē kı̀-tit. Kan-ta chí-ū chı̍t hāng---goá chai, goá ê ba̍k-chiu bô khoàⁿ-kı̀ⁿ. Goá múi-pái hoê-sióng pē-bú tùi goá kóng sè-hàn ê sū ê sı̂, goá chiū chin siong-sim; kám-kak jı̂n-seng chin bô liâu. Cháiⁿ-iūⁿ kan-ta goá chı̍t lâng sı̄ án-ni pháiⁿ-miā.
Tng goá ba̍k-chiu bô khoàⁿ-kı̀ⁿ liáu-āu, iā ū bat keng-kè choē-choē i-seng tı̄-liâu. Poeh hè ê sı̂ iā bat kàu tı̄ Tâi-oân khı̀ tı̄-liâu, tān-sı̄ iā bô khó-lêng hō͘ goá ê ba̍k-chiu hó khí-lâi.
Jı̍p-ha̍k ê nı̂-hè kàu lah:
Āu-lâi ū lâng kài-siāu goá beh khı̀ Tâi-pak Bông-à ha̍k-hāu tha̍k-chheh. Hit sı̂ goá ê nı̂-kí tú-tú sı̄ 8 hè. Goá sui-jiân sı̄ chin sè-hàn, chóng-sı̄ goá oē kı̀-tit, goá chin koat-ı̀ siūⁿ beh ūi-tio̍h chiong-lâi chiân-tô͘ ló͘-le̍k. Só͘-í goá chin chhiat-ı̀ siūⁿ beh tha̍k-chheh. Khó-sioh pē-bú chó͘-chí goá, bô thang hō͘ goá khı̀. In-ūi goá ba̍k-chiu bô khoàⁿ-kı̀ⁿ, só͘-í goá ê pē-bú kèng-ka thiàⁿ goá ê iân-kò͘; kiaⁿ-liáu goá chhut-goā bô lâng chiàu-kò͘; iā jı̂-chhiáⁿ lō͘-tô͘ chin hn̄g, nā sı̄ sím-mı̍h tāi-chı̀ beh kı̀ⁿ-bı̄n chin khùn-lân; kiaⁿ-liáu goá tú-tio̍h khùn-lân; iā kiaⁿ-liáu goá tı̄ hia tú-tio̍h lâng khi-hū. Chiah ê lóng sı̄ pē-bú só͘ khoà-lū ê, só͘-í m̄-chún goá khı̀.
Goá sim sui-jiân siūⁿ beh khı̀, chóng-sı̄ tı̄ hit sı̂ goá m̄-chai tio̍h cháiⁿ-iūⁿ choè, m̄-chai tio̍h cháiⁿ-iūⁿ kap goá ê lāu-pē kau-sia̍p thang tit-tio̍h in ê sêng-lo̍k. Goá chí-ū múi-jı̍t tı̄ chhù-lāi ūi-tio̍h ba̍k-chiu bô khoàⁿ-kı̀ⁿ, sim-tiong siong-sim lâu ba̍k-sái. Ū sı̂ hūn-thiⁿ oàn-tē kóng, pı̂ⁿ-pı̂ⁿ sı̄ chı̍t ê lâng, ūi sím-mı̍h hō͘ goá tú-tio̍h chiah toā ê put chū-iû, bô chhin-chhiūⁿ lâng.
Goá chiū chin sit-chı̀, siông-siông bih tı̄ lāi-bı̄n, m̄-ài chhut-khı̀ goā-bı̄n. Koh piān nā kha ta̍h chhut mn̂g; in-ūi kiâⁿ-lō͘ bô chū-iû, tian-tian tó-tó; piān siū lâng thí-chhiò. Tı̀-kàu goá choân-jı̍t lóng tı̄ lāi-bı̄n, bô pêng-iú, bô thit-thô ê tùi-siōng, chin ko͘-to̍k.
Koh boē-tàng khı̀ tha̍k-chheh:
Kàu tı̄ 12 hè ê sı̂, ū lâng beh kài-siāu goá khı̀ Tâi-lâm Bông-à Ha̍k-hāu tha̍k-chheh. Chit sı̂ goá ê pē-bú iû-goân sio-siâng lí-iû bô beh hō͘ goá khı̀. Só͘-í goá chiū sit-khı̀ tha̍k-chheh ê ki-hoē lah.
Chhiáⁿ lín m̄-thang siūⁿ goán Phı̂ⁿ-ô͘ sı̄ lo̍k-ngó͘ ê só͘-chāi; kiám-chhái tı̄ kau-thong siōng ū khah put-piān; kiám-chhái tı̄ seng-oa̍h hong-bı̄n ū khah su lâng; chóng-sı̄ tha̍k-chheh ê hong-biān sı̄ ū chin hó ê thoân-thóng kap hong-khı̀. Lín nā lâi Phı̂ⁿ-ô͘ 1, 2 jı̍t sı̄ khah boē thang thiaⁿ tio̍h, chóng-sı̄ nā lâi khah choē jı̍t, koh kàu hiuⁿ-ē ê sı̂ lóng oē-thang thiaⁿ tio̍h, che sı̄ sím-mı̍h siù-châi ê chhù. Koh thiaⁿ tio̍h, chit chhoan ū chhut kúi-ê kúi-ê siù-châi. Sū-sı̍t Phı̂ⁿ-ô͘ lâng tha̍k-chheh ê hong-khı̀ sı̄ chin sēng ê.
Chú ê sèng-chhiú chhun-chhut:
Sı̂-kan kè-tit chin-kín, bô joā-kú goá chiū í-keng 15 hè lah. Tng goá 15 hè ê sı̂, ū chı̍t ūi goā-kok ê bo̍k-su-niû, Sun Bo̍k-su-niû, tú-tú beh lâi Phı̂ⁿ-ô͘ khai-siat ko͘-jı̂-ı̄ⁿ. I kàu goán ê chhù lâi thàm-hóng goá ê pē-bú. Bo̍k-tek sı̄ ūi-tio̍h beh boé thó͘-toē kiàn-siat ko͘-jı̂-ı̄ⁿ. Goá ê lāu-pē tāi-seng m̄-khéng; in-ūi hit tè thó͘-toē tı̄ toā-lō͘ piⁿ, goán siūⁿ ka-kı̄ beh khí tiàm-bı̄n. (Goán sı̄ toà tı̄ lı̄ Má-keng kiâⁿ-lō͘ 30 hun ê só͘-chāi, miâ Am-o͘. Sui-jiân sı̄ sio̍k tı̄ kau-goā, chóng-sı̄ kau-thong chin lı̄-piān ).
Chóng-sı̄ Chú kı̂-biāu ê chok-ûi, hō͘ goá ê lāu-pē hit tong-sı̂ chhiú-kut kui-ki lóng teh noā, chin siong-tiōng. Só͘-í Sun Bo̍k-su-niû chiū sūn-soà chhoā i khı̀ hō͘ i-seng tı̄-liâu. Tı̄ chhut-chhut jı̍p-jı̍p ê tiong-kan hō͘ goá ê lāu-pē chin kám-tōng. Che chiū-sı̄ goán chı̍t ke koh kap Chú, í-kı̍p Chú ê kàu-hoē saⁿ siong-thong ê khai-sí. Hit sı̂ sı̄ Bı̂n-kok 50 nı̂, goán chı̍t ke sı̀n-gióng ho̍k-heng ê sı̂ lah. Thó͘-toē ê sū iā tùi án-ni chiū sêng-lı̍p, boē hō͘ Sun Ngá-kok Bo̍k-su-niû. Goá ba̍k-chiu bô khoàⁿ-kı̀ⁿ ê sū iā tùi án-ni jı̍p tı̄ bo̍k-su-niû ê hı̄ⁿ-khang, iā tit-tio̍h i ê koan-sim.
Chú ê thiàⁿ tı̄ goá sin-chiūⁿ:
Bo̍k-su-niû lı̄-khui Phı̂ⁿ-ô͘ liáu-āu tı̄ Tâi-pak ê só͘-chāi iáu ū teh koan-sim tı̄ goá. Āu-lâi ū phah tiān-oē lâi hō͘ Lı̂m Chiàu Bo̍k-su, chiong goá ê sū kau-thok bo̍k-su, iā chhiáⁿ Lı̂m Bo̍k-su siat-hoat hō͘ goá khı̀ Tâi-pak i-tı̄ ba̍k-chiu, it-chhè ê hùi-iōng Sun Bo̍k-su-niû oē hū-tam. Iā kóng, nā-sı̄ i oē hó, chiū beh hō͘ goá tńg-lâi Phı̂ⁿ-ô͘, nā i boē hó, beh lâu goá tı̄ hia tha̍k-chheh.
Lı̂m Bo̍k-su chiap tio̍h chit ê tiān-oē liáu-āu, chiū sûi-sı̂ kàu goá ê chhù, chiong chiah ê hó siau-sit kā goá ê pē-bú kóng. Goá thiaⁿ liáu-āu chiū hoaⁿ-hí kàu-ke̍k, siūⁿ beh khı̀ Tâi-pak chiap-siū Sun Bo̍k-su-niû ê hó-ı̀; iā sı̄ goá kú-kú só͘ kı̂-thāi ê sū --- oē khoàⁿ-kı̀ⁿ kap tha̍k-chheh. Chóng-sı̄ goá ê pē-bú iáu bô hoaⁿ-hí goá lı̄-khui i ê sin-piⁿ.
Kng kap àm ê tò͘-cheng:
Tùi hit jı̍t khí, Lı̂m Bo̍k-su ta̍k-jı̍t kàu goá ê chhù, iōng chin hó ê oē-gú khoàn-kái goá ê pē-bú. Goá ê pē-bú chiū boē kham-tit Lı̂m Bo̍k-su ê mı̂-noā, chiū tùi bo̍k-su kóng, chhiáⁿ koh tán 3 lé-pài. Kàu hit sı̂ goá ê lāu-pē chiah beh kap goá khı̀ Tâi-pak. Goá ê lāu-pē ê ı̀-sù chiū-sı̄, jû-kó ba̍k-chiu nā oē i-hó chiū beh soà chhiú chhoā goá tńg-lâi Phı̂ⁿ-ô͘; nā boē hó, chiū beh sūn-soà khı̀ chham-koan Bông-jı̂n Ha̍k-hāu ê siat-pı̄, nā chin hó-sè chiah beh hō͘ goá tı̄ hia tha̍k-chheh.
Lı̂m Chiàu Bo̍k-su thiaⁿ-kı̀ⁿ goá ê lāu-pē ê oē, chiū chin hoaⁿ-hí, iā hoaⁿ-hí tán kàu 3 lé-pài. 3 lé-pài beh kàu lah, Lı̂m Bo̍k-su chiū siat-hoat ài tı̄ goá ê chhù choè ka-têng lé-pài, ūi-tio̍h goá ê sū kı̂-tó. Siūⁿ boē kàu goá ê lāu-pē koh hoán m̄ hō͘ goá khı̀. Lı̂m Bo̍k-su thiaⁿ án-ni sim chin kan-khó͘. Goá nih ? Goá ê sim pí í-chêng 1, 2 pái koh kèng-ka kan-khó͘, siūⁿ kàu beh khı̀ chū-sat. Goá ê jı̂n-seng sı̍t-chāi o͘-o͘ àm-àm lah. Goá ba̍k-chiu bô khoàⁿ-kı̀ⁿ, iā bô chhin-chhiūⁿ lâng khı̀ tha̍k-chheh, chiong-lâi beh cháiⁿ-iūⁿ kap lâng pí-phēng nih? Goá iáu oē kı̀-tit, goá hit tong-sı̂ sim siūⁿ kàu án-ni, chin kan-khó͘. Goá pi-siong lâu ba̍k-sái.
Tek-sèng ê sı̀n-gióng:
Kám-siā Chú ! Tng goá ê sim sit-bāng pi-siong ê sı̂, Lı̂m Chiàu Bo̍k-su chiū kóng tō-lí hō͘ goá thiaⁿ. Hit sı̂ só͘ kóng ê tō-lí goá boē kı̀-tit lah, chóng-sı̄ tı̄ hit sı̂ i só͘ gı̂m ê Sèng-si goá iáu kı̀ chin bêng.
Hit siú Sèng-si chiū-sı̄ án-ni :
Kéng-gū hó pháiⁿ sı̄ Chú só͘ tiāⁿ,
Siōng-tè teh chiàu-kò͘ lí,
Tiàm Chú sı̍t-ē ún-tàng bián kiaⁿ,
Siōng-tè teh chiàu-kò͘ lí.
( Hô )
Siōng-tè teh chiàu-kò͘ lí,
Ta̍k-jı̍t teh kò͘, ta̍k-jı̍t chhoā lō͘,
Siōng-tè teh chiàu-kò͘ lí,
Siōng-tè teh chiàu-kò͘ lí.
Tng goá thiaⁿ tio̍h chit siú Sèng-si liáu-āu, chiū ta̍k-jı̍t iōng hoaⁿ-hí ê sim-chêng teh gı̂m chit siú Sèng-si. Sit-bāng ná toā, Chú hō͘ lán ê hoaⁿ-hí iā ná toā. Sı̄ lah !
Ū chı̍t chat Sèng-keng kóng:
Lâng nā tit-tio̍h choân sè-kài, lâi sòng-sit i ê sı̀ⁿ-miā, ū sím-mı̍h lı̄-ek ? Á-sı̄ lâng beh chhut sím-mı̍h lâi tùi-oāⁿ i ê sı̀ⁿ-miā ? ( Má-thài 16 : 26-27 ).Sı̄ lah! Hit-sı̂ goá nā ūi-tio̍h boē tàng khı̀ tha̍k-chheh lâi chū-sat, iā bô sím-mı̍h lı̄-ek.
Kám-siā Chú ê lı̂n-bín, tı̄ bān lâng tiong I bô khoàⁿ goá choè pi-bı̂ bô lō͘-ēng ê, I kéng-soán goá choè I ê peh-sı̀ⁿ. Goá tùi tit-tio̍h hok-im khí, sim chiū bô koh ūi-tio̍h ba̍k-chiu bô khoàⁿ-kı̀ⁿ lâi iu-chhiû. Í-āu ū sı̂ sui-jiân tú-tio̍h pháiⁿ ê kéng-gū, tān-sı̄ goá ê sim iû-goân chhiong-moá liáu hoaⁿ-hí kap khoài-lo̍k.
Bān-sū kau-thok Chú:
Tng goá iáu-bē sı̀n Chú ê í-chêng, sim bô pêng-an ê sı̂, iā bat khı̀ goán hù-kūn ê biō; ài tùi hia lâi tit-tio̍h sím-mı̍h pêng-an á-sı̄ khoài-lo̍k. Kiat-kó lóng hō͘ goá kám-kak bô ū sím-mı̍h thang tit-tio̍h. Kàu tı̄ sı̀n Chú liáu-āu, sui-jiân tú-tio̍h kan-khó͘ ut-chut, goá chai ū chı̍t ūi oa̍h-oa̍h ê Chú teh an-ùi goá. Só͘-í goá chiū tit-tio̍h chin toā ê an-ùi kap pêng-an lah.
Phı̀-jū goá iáu-bē sı̀n Chú ê sı̂, goá lóng m̄-káⁿ ka-kı̄ chı̍t ê chhut-khı̀ goā-bı̄n. Kàu tı̄ sı̀n Chú liáu-āu, múi lé-pài-jı̍t m̄-bián lâng chhoā, goá ka-kı̄ iā káⁿ chhut-khı̀ choè lé-pài, iā káⁿ kiâⁿ-lō͘. Í-chêng goá sı̄ chı̍t ê chin pháiⁿ ê gín-ná; siông-siông hoat pháiⁿ phı̂-khı̀, siông-siông kóng bô tı̀-sek ê oē-gú; siông-siông ài kap lâng oan-ke, liân pē-bú ê oē goá iā m̄-thiaⁿ. Tùi tı̄ sı̀n Chú liáu-āu, Chú toā-toā kái-piàn goá ê sèng-chêng lah.
Hûn-thiāu hé-thiāu chhoā-lō͘:
Keh bô kú, goá ê sim-lāi ū siⁿ-chhut chı̍t ê chú-ı̀, siūⁿ beh choè chı̍t ê seng-lí-á, boē tang boē sai lâi thàn-chı̂ⁿ. In-ūi goá khah káⁿ kiâⁿ-lō͘, khah káⁿ chhut-khı̀, hêng-tōng khah chū-iû lah. Koh hit-sı̂ goá siūⁿ kóng goá sui-jiân ba̍k-chiu bô khoàⁿ-kı̀ⁿ, goá iā boē thang kú-tn̂g khò pē-bú thàn-chı̂ⁿ hō͘ goá seng-oa̍h. Goá chiū chiong beh choè ê sū kau-tāi Siōng-tè, ǹg-bāng Chú ūi goá an-pâi.
Ū chı̍t jı̍t, goá chiū koat-tēng beh khı̀ boē peng-ki. Che sı̄ goá hit-sı̂ siūⁿ oē kàu ê choè-toā choè hó ê kang-chok. In-ūi ba̍k-chiu bô khoàⁿ-kı̀ⁿ, beh choè boé-boē sı̄ chám-jiân khùn-lân ê sū. Nā-sı̄ peng-ki chin iông-ı̄ⁿ siau, koh iông-ı̄ⁿ sǹg chı̂ⁿ. Tong-jiân tı̄ chit ê sió-sió ê seng-lí tiong iā ū choē-choē ê chó͘-gāi. In-ūi goá tùi lō͘ lóng bô se̍k, tû-khı̀ beh khı̀ Má-keng Kàu-hoē hit tiâu toā-lō͘ í-goā, goá chin hán-tit kiâⁿ kı̂-thaⁿ ê lō͘. Koh goá iáu-bē siū hùn-liān kiâⁿ-lō͘ í-chêng, goá teh kiâⁿ-lō͘ chí-ū sı̄ khò sı̀n-sim teh chı̀n-chêng ê. Kiâⁿ m̄-tio̍h lō͘, kiâⁿ poah-tó, kap kau-thong ê gûi-hiám, goá lóng oē tú-tio̍h. Koh nā lòng-phoà peng-koàn, chiū tio̍h poê-siông choē-choē. Taⁿ goá chiū chiong chiah ê sū kau-thok Siōng-tè, kiû Chú ín-chhoā, kiû Sèng Sı̂n pang-chān.
Sı̀n-gióng seng-oa̍h:
Goá chiū chiong it-chhè kau-tài Chú, chiū chhut-khı̀ choè chit ê sió seng-lí lah. Kó-jiân Chú ê thiàⁿ tı̄ goá ê lāi-bı̄n, I pó-hō͘ goá, ín-chhoā goá pêng-an keng-kè 2 , 3 nı̂ kú. Goá tı̄ hit ê kı̂-kan kàu tı̄ múi gū-tio̍h lé-pài-jı̍t ê sı̂, lóng thêng-chí choè seng-lí, tek-khak khı̀ chū-hoē, choè lé-pài. Sui-jiân lé-pài-jı̍t sı̄ gín-ná choè choē ê sı̂, m̄-kú goá chai goá chhut-lâi teh choè chit ê sió seng-lí sı̄ Siōng-tè ê ún-chún chiah oē thang choè ê. Siōng-tè kı̀-jiân kiò lán tio̍h siú An-hioh-jı̍t, cháiⁿ-iūⁿ oē-sái-tit tı̄ lé-pài-jı̍t bô khı̀ lé-pài nih? Sū-sı̍t Siōng-tè bô ko͘-hū lâng, I iā hō͘ goá bô khiàm-kheh. Goá pêng-sò͘ chin jı̄n-chin teh choè, tùi thàu-chá chiū chhut-khı̀ kàu chin àm chiah tńg-lâi. Só͘ thàn ê chı̂ⁿ sui-jiân chió, Siōng-tè ê chiok-hok chin-choē. I hō͘ goá ka-kı̄ thàn goá ka-kı̄ ê seng-oa̍h-hùi. Ēng chı̍t kù chin kiàn-siàu ê oē lâi kóng, goá ka-kı̄ to̍k-lı̍p lah. Che sı̄ Siōng-tè thê-poa̍t goá ê, I hō͘ goá ê.
Sı̀n-gióng ê lâu-thui:
Ū chı̍t jı̍t ê sū: Tng goá seng-lí choè liáu àm-àm chiah tńg-khı̀ kàu chhù ê sı̂, ū chin-choē Chú-lāi ê hiaⁿ-chí kàu goá ê chhù beh kú-hêng ka-têng lé-pài. Goá tong-jiân kap in chham-ka lé-pài. Lé-pài liáu, ū chı̍t ūi chí-bē tùi goá kóng, múi-jı̍t chheng-chá nā oē thang khı̀ kàu sèng-tiān chham-ka choè chá-thian kı̂-tó-hoē sı̄ chin hó. Goá thiaⁿ-kı̀ⁿ i kóng án-ni, sim chiū chin him-bō͘ ta̍k-jı̍t khı̀ chham-ka. Pêng-sò͘ goá lóng sı̄ jı̍t-sı̂ chhut-goā, mı̂-sı̂ goá chiū m̄-káⁿ chhut-khı̀ lah. In-ūi nā mı̂-sı̂ chhut-khı̀ koh kiâⁿ m̄-tio̍h lō͘ ê sı̂, bô lâng thang mn̄g lō͘. Koh 4, 5 tiám cheng sui-jiân ū lâng teh keng-kè, he lóng sı̄ hiuⁿ-ē ê hı̂-hoàn teh koáⁿ sı̂-kan ê lâng; in khiâ-chhia thiaⁿ kóng chin kín, chhin-chhiūⁿ teh pe; in bô kā lâng tōng-sí chiū ka-chài, m̄-bián phah-sǹg beh tùi in mn̄g lō͘. Chóng-sı̄ goá iā khò Chú ê ín-chhoā, koat-toàn siūⁿ beh khı̀ chham-ka chó-thian ê kı̂-tó-hoē.
Kiû chiū tit-tio̍h, phah-mn̂g chiū kā lín khui:
Thâu chı̍t jı̍t goá beh khı̀ ê sı̂, chiū kiò goá ê a-kong kap goá choè-hoé khı̀. Tē jı̄ jı̍t ia̍h-sı̄ goá ê a-kong kap goá choè-hoé khı̀. Kàu tē saⁿ jı̍t, i chiū kóng chheng-chái chin ià-siān. Só͘-í goá chiū ka-kı̄ khı̀. Boē chhut-khı̀ ê í-chêng, goá chiū tāi-seng kı̂-tó Siōng-tè. Tng goá ka-kı̄ kiâⁿ kàu lé-pài-tn̂g ê sı̂, goá ka-kı̄ iáu m̄-chai-iáⁿ kiâⁿ kàu lah. Kám-siā Chú ! Lé-pài-tn̂g ê cheng tú-tú tân. Chú ēng cheng-siaⁿ kiò goá oat jı̍p-khı̀ lé-pài-tn̂g. Tùi hit jı̍t khí goá chiū bô koh khò goā-lâng chhoā goá ê lō͘ lah.
Koh khah kı̂-biāu ê chiū-sı̄ hit-sı̂ goá boē hiáu khoàⁿ sı̂-kan. Mı̂-sı̂ khùn khí-lâi beh khı̀ kı̂-tó-hoē lóng m̄-chai kúi tiám. Sui-jiân án-ni, Siōng-tè iû-goân hō͘ goá múi chá-khí chiàu-sı̂ khí-lâi khı̀ chham-ka kı̂-tó-hoē.
Goá chit khoán ê ló͘-le̍k tiong chhim-chhim thé-giām tio̍h ū sı̀n-sim só͘ choè ê sū, Siōng-tè lóng bô hō͘ lâng kui tı̄ khang-khang. Ū-sı̂ goá beh khı̀ hù kı̂-tó-hoē ê sı̂ hong chin-toā, goá iā khò sı̀n-sim khı̀ hù. Koh ū-sı̂ bô toà hō͘-moa, Siōng-tè iû-goân chiàu-kò͘ goá, bô hō͘ goá tú-tio̍h boē kham-tit ê sū. Koh tang-thiⁿ sı̂ thiⁿ-khı̀ hân-léng, lâng-lâng kiaⁿ koâⁿ hó-khùn ê sı̂, goá oá-khò sı̀n-sim kiâⁿ kàu sèng-tiān; iā bô kám-kak oē koâⁿ. Che sı̄ goá tú-tio̍h ê kiàn-chèng.
Chhiáⁿ lán tāi-ke iā oē thang tit-tio̍h chit khoán ê kiàn-chèng lâi êng-iāu kui hō͘ Chú. Goān Chú chiok-hok lán.
Thiaⁿ lán kı̂-tó ê Siōng-tè:
Tng goá iōng sı̀n-khò ê sim tùi Siōng-tè kiû ê, I lóng ū thiaⁿ goá ê kı̂-tó, sù pêng-an hō͘ goá, soà pò-tap goá só͘ kiû ê.
Ū chı̍t chá-khí, goá khı̀ chá-thian kı̂-tó-hoē, soàⁿ-hoē tńg-khı̀ chhù. Hut-jiân goá ê ba̍k-chiu phê teh chhoah. Goá ū thiaⁿ lâng kóng che sı̄ pháiⁿ-sū beh hoat-seng ê chiân-tiāu, só͘-í goá sim ē chin boē pêng-an. Goá pèng m̄-sı̄ kiaⁿ sí; ia̍h-sı̄ kiaⁿ pháiⁿ-sū lı̂m-kàu goá. Chiū-sı̄ goá ê lāu-pē chin ài lim chiú, chin pháiⁿ phı̂-khı̀; siông-siông tı̄ chia̍h chiú ê tiong-kan kap lâng oan-ke. Goá ê lāu-bú sui-jiân siông-siông kā i khoàn-kái, iā bô tit-tio̍h thiaⁿ, hoán-tńg chin chân-jím siū goá lāu-pē phah. Só͘-í hit jı̍t goá sı̄ kiaⁿ goá ê ka-têng koh ū tāi-chı̀ hoat-seng. Che sı̄ goá hit jı̍t só͘ tam-iu ê sū. Goá chiū chiong hit ê sū kı̂-tó kau-tāi Siōng-tè.
Goá pêng-siông-sı̂ tı̄ chhù-nih kı̂-tó ê sı̂ lóng siông-siông chiong mn̂g koaiⁿ khí-lâi, kı̂-tó Siōng-tè. Hit jı̍t iā sı̄ án-ni. Hut-jiân ū chı̍t ê siaⁿ-im tı̄ goá kı̂-tó tiong tùi goá kóng, Soè-kiáⁿ-à, m̄-bián kiaⁿ, bô tāi-chı̀. Goá thiaⁿ-kı̀ⁿ chit ê siaⁿ liáu-āu, sim chiū sûi-sı̂ bô koh ū kiaⁿ-hiâⁿ kap hoân-ló; hoán-tńg chiâⁿ-choè chin hoaⁿ-hí khoài-lo̍k. Hit jı̍t kó-jiân pêng-an bô sū lah. Che sı̄ goá chı̍t ê sió-sió ê kiàn-chèng.
Chú ê thiàⁿ iâⁿ-kè it-chhè:
Tng goá 18 hè ê sı̂, Má-keng Kàu-hoē ū choē-choē hiaⁿ-chí koan-sim goá ê ba̍k-chiu bô khoàⁿ-kı̀ⁿ. Ū chı̍t ūi sı̀n-tô͘ tùi goá ê lāu-pē kóng, kiò goá ê lāu-pē chhoā goá khı̀ Tâi-oân i-tı̄ ba̍k-chiu, iā nā-sı̄ chı̂ⁿ ê būn-toê i lóng beh hū-tam.
Goá ê lāu-pē chin hoaⁿ-hí chiū chún pı̄ beh chhoā goá khı̀ Tâi-oân. Chit hoê goá ê lāu-pē bô phah-sǹg chin hoaⁿ-hí hō͘ goá khı̀. Ū chı̍t jı̍t goá ê lāu-pē chiū chhoā goá kàu Ko-hiông, tı̄ hia keng-kè choē-choē i-seng ê tı̄-liâu. Chóng-sı̄ i-seng lóng kóng bô hoat-tō͘. Choè-āu koh ū lâng kài-siāu goá kàu Gô͘ Ki-hok Phok-sū ê só͘-chāi. Keng-kè chı̍t-toāⁿ sı̂-kan ê chù-siā, chia̍h-io̍h, kap tı̄-liâu, chóng-sı̄ tùi goá ê ba̍k-chiu sı̄ bô hāu-kó. Goá chiū tùi goá ê lāu-pē kóng, goá bô ài koh tı̄ chia tı̄-liâu ba̍k-chiu lah. Bô kú goá chiū chhut-ı̄ⁿ. Tı̄ chit ê kı̂-kan lāi goá lóng bô ūi-tio̍h ka-kı̄ ê ba̍k-chiu kı̂-tó Siōng-tè. In-ūi goá sui-jiân ba̍k-chiu bô khoàⁿ-kı̀ⁿ, iā chhin-chhiūⁿ bô bāng thang tit-tio̍h i-hó, tān-sı̄ Chú í-keng ū hō͘ goá sim-gán thang chai-iáⁿ sè-kan kap thian-kok it-chhè ê sū lah.
Chú ê bo̍k-chiá thiàⁿ iûⁿ-kûn:
Hit-sı̂ tú-tú Lı̂m Chiàu Bo̍k-su siū phài tı̄ Ko-hiông ê Kiô-á-thâu Kàu-hoē. Goá chiū khı̀ chhē bo̍k-su.
Lı̂m Bo̍k-su khoàⁿ goá khı̀ chin hoaⁿ-hí. In-ūi goá sı̄ bo̍k-su choè koan-sim ê hoē-iú ê chı̍t ê, iā sı̄ choè mâ-hoân bo̍k-su ê chı̍t ê. I chin thiàⁿ goá. Bo̍k-su thiaⁿ goá só͘ kóng keng-kè, chin tông-chêng goá. Choè-āu i kiàn-gı̄ ài chhoā goá khı̀ Tâi-pak tha̍k-chheh. Kı̀-jiân ba̍k-chiu í-keng bô ǹg-bāng hó khí-lâi, iā tio̍h tha̍k koá chheh chiah hó. Chóng-sı̄ goá ê lāu-pē iáu kò͘-chip i ê ı̀-kiàn bô beh hō͘ goá khı̀, sı̄ ài chhoā goá tńg-khı̀ Phı̂ⁿ-ô͘ i ê sin-piⁿ. Hit-sı̂ goá pún-sin koat-ı̀ siūⁿ bô beh tńg-khı̀ Phı̂ⁿ-ô͘. Iā siūⁿ kóng chit-hoê sı̄ choè-āu ê ki-hoē lah. Nā tı̄ chit-hoê goá bô khı̀ tha̍k-chheh, goá chiū sit-khı̀ it-chhè tha̍k-chheh ê ki-hoē lah. Goá chiū kı̂-tó, chiong goá ê ba̍k-chiu kap í-āu it-chhè ê sū, tha̍k-chheh kap goá ê chiân-tô͘, kau-tāi Chú, kiû I thoè goá an-pâi.
Chú pún-sin thoè goá khui-lō͘:
Ū chı̍t jı̍t, goá ê lāu-pē tú-tú kap goá ê a-chek hoat-seng oan-ke ê sū. Tı̄ hit-sı̂ goá ê lāu-pē chiah thé-giām tio̍h sè-kan ê pē-bú hiaⁿ-tı̄, chhin-lâng, pêng-iú lóng boē thang hō͘ lán oá-khò. ( I siūⁿ kóng tng lán sit-pāi ê sı̂, chí-ū tio̍h khò ka-kı̄ ló͘-le̍k ). Tùi án-ni khan-liân lâi, goá ê lāu-pē chiū ún-chún goá khı̀ Tâi-pak tha̍k-chheh. Kı̂-biāu, bô kı̂-biāu?
Lı̂m Bo̍k-su chiū kā goá kài-siāu khı̀ Tâi-pak Sin-chng Bông-jı̂n Tiōng-kiàn-ı̄ⁿ lah. Kám-siā Chú, o-ló Chú !
Chiàu sim só͘ goān tit-tio̍h tha̍k-chheh ê ki-hoē:
Keng-kè 2 nı̂ kú, ha̍k-sı̍p choē-choē khò-thêng. Ū ha̍k-sı̍p tiám-jı̄, iā ū liān-sı̍p àn-mô͘.
Ha̍k-hāu lāi ê ha̍k-seng toā-pō͘-hūn chêng lóng bat tı̄ pa̍t ê ha̍k-hāu siū kè hùn-liān. Chí-ū goá tùi soè-hàn lóng boē bat siū kè hùn-liān. Chho͘-chhù kàu ha̍k-hāu ê sı̂ kám-kak kong-khò chin khùn-lân, tān-sı̄ goá chí-ū oá-khò Siōng-tè, jı̄n-chin ha̍k-sı̍p, lı̄-iōng sı̂-kan ha̍k-sı̍p it-chhè ê kong-khò. Kàu tı̄ pit-gia̍p ê sı̂, goá to boē pí lâng khah su. Kám-siā Chú.
Siūⁿ khí tı̄ ha̍k-hāu ê sı̂, ha̍k-hāu lāi ê ha̍k-seng chí-ū goá chı̍t ê sı̄ sı̀n Chú, kı̂-thaⁿ lóng bô sı̀n. In sı̂-siông kong-kek goá, kap ki-chhı̀ Ki-tok-kàu. Chóng-sı̄ kàu tı̄ āu-lâi, bô phah-sǹg in siū Iâ-so͘ ê sı̂n ê kám-tōng lâi hoé-kái, iā in ê sı̀n-sim kap thiàⁿ lâng ê sim, í-kı̍p in ê hêng-tōng kú-chí lóng iâⁿ-kè goá pún-sin.
Ke̍k hó-sū iā ū o͘-tiám:
Tı̄ ha̍k-hāu ê seng-oa̍h iā ū chin kan-khó͘ ê sū. Sin-chng ū khah koâⁿ Phı̂ⁿ-ô͘. Goá tùi chhù só͘ toà khı̀ ê i-ho̍k lóng bô kàu thang chhēng sio. Kàu tang-thiⁿ koh khah kan-khó͘; saⁿ chhēng boē sio, phoē am boē bā; koh goá ū pí pa̍t-lâng khah ēng-kang, goá chiū tài nn̄g chióng pı̄ⁿ lah. Chı̍t chióng sı̄ kám-mō͘, koh in-ūi kú-kú bô hó, só͘-í ín-khí kàu tı̄ phı̄ⁿ-khang. Tē jı̄ chióng sı̄ nâ-âu chèng. Tú-tú chit nn̄g hāng lóng tio̍h khui-to chiah oē hó ê pı̄ⁿ.
Hit-sı̂ lóng bô lâng chai-iáⁿ goá ê kan-khó͘, goá iā bô tùi lâng kóng, iā bô tùi ha̍k-hāu sin-chhéng tı̄-liâu. Āu-lâi pı̄ⁿ khah siong-tiōng ê sı̂, goá chiū tùi ha̍k-hāu sin-chhéng tńg-khı̀ Phı̂ⁿ-ô͘, siūⁿ beh tı̄ Phı̂ⁿ-ô͘ tı̄-liâu. Bô phah-sǹg chāi tı̄ Phı̂ⁿ-ô͘ lóng bô chit khoán ê choan-kho ê i-seng. Taⁿ beh koh tńg-khı̀ Tâi-oân tı̄-liâu, kiaⁿ-liáu keng-chè siōng boē iông-ún. Iā siūⁿ kóng bô lâng thang pang-bâng goá. Nā tı̄ Phı̂ⁿ-ô͘ chı̀-chió goá iáu oē thang sin-chhéng pó͘-chō͘, iā ū lâng oē thang thoè goá pān chhiú-sio̍k.
Chí-ū Chú chai lán ê kan-khó͘:
Siūⁿ-lâi siūⁿ-khı̀, kiat-kio̍k siūⁿ kóng kàu pit-gia̍p ê sı̂ chiah chhiú-su̍t. In-ūi chı̍t hong-bı̄n kiaⁿ-liáu tam-gō͘ kong-khò, éng-hióng ha̍k-gia̍p; chı̍t hong-bı̄n tùi kim-chı̂ⁿ iā khah hó-sè.
Tān-sı̄ goá ê sim siūⁿ kóng, nā bô tı̄-liâu sin-thé hō͘ hó-sè, goá chiū boē tàng kè-sio̍k khı̀ tha̍k-chheh. Só͘-í goá ê sim sı̍t-chāi chhin-chhiūⁿ teh tò͘-cheng chı̍t-poaⁿ-iūⁿ. Tng teh kan-khó͘ ê sı̂ goá chiū chhē chı̍t só͘-chāi an-chēng ê toē-tiám, tı̄ hia kı̂-tó tha̍k Sèng-keng, gı̂m-si:
Goá sim toā hoaⁿ-hí, goá ê chhùi tio̍h gı̂m-si,
Kám-siā Siōng-chú chı̀ toā jı̂n-gı̄;
Tı̄ jı̍t-sı̂ o-ló, tı̄ mı̂-sı̂ kám-siā,
Án-ni ho̍k-sāi iā bô kàu-gia̍h.
Hit-sı̂ goá só͘ tha̍k ê Sèng-keng chat sı̄ Si-phian 119 phiⁿ 105 chat.
Lí ê oē choè goá kha-chêng ê teng,
Choè goá lō͘-chiūⁿ ê kng.
