Ha̍k-seng boē iâⁿ-kè sian-siⁿ:
Āu-lâi goá koh siūⁿ kàu Chú lâi kàu sè-kan só͘ siū pah-poaⁿ ê kan-khó͘. Goá ê kan-khó͘ put-kò sı̄ ka-kı̄ ê seng-khu siōng ê sió-khoá kan-khó͘ nā-tiāⁿ. Tng goá siūⁿ kàu chia ê sı̂, goá ê iu-būn chiū lóng bô--khı̀; hoán-tńg sim-tiong chhiong-moá hí-lo̍k.
Bô joā-kú goá chhut-khı̀ chhē chı̍t ūi sı̀n-tô͘, kap i tâm-lūn tō-lí. I mn̄g goá sin-thé sı̄ m̄-sı̄ ū kan-khó͘. Goá chiū tùi i kóng, ū. I kiò goá khı̀ tı̄-liâu. Goá tùi i kóng, in-ūi ka-têng keng-chè bô hó ê iân-kò͘, bô thang khı̀ tı̄-liâu. Āu-lâi i chiū the̍h chı̂ⁿ pang-chān goá kàu Ko-hiông chı̍t ūi sı̀n Chú ê i-seng tı̄ hia tı̄-liâu. Goá chhéng-ká kiōng 45 jı̍t. Kong-khò sui-jiân kiám-chió ha̍k-sı̍p, kám-siā Chú, Chú bô hō͘ goá tı̄ kong-khò siōng tú-tio̍h khùn-lân. Khó-sioh ê chiū-sı̄ goá ê ba̍k-chiu boē thang chiàu hiah ê koan-sim goá ê lâng ê kı̂-thāi, lâi tit-tio̍h i-hó.
Keng-kè Iok-tàn hô:
Tng goá pit-gia̍p āu beh tńg-lâi Phı̂ⁿ-ô͘ ê sı̂, goá ê sin-chiū lóng bô poàⁿ-chiam. Taⁿ beh tùi tông-ha̍k chioh, kiaⁿ-liáu lō͘-thâu lı̄-khui chin hn̄g, goá khah put-piān hêng in, in m̄ chioh goá. Beh kià phoe tùi ka-têng the̍h chı̂ⁿ, kiaⁿ-liáu ka-têng keng-chè bô-hó. Tı̄ chit khoán chōng-thài ê ē-bı̄n, goá só͘ ū ê chí-ū kı̂-tó nā-tiāⁿ.
Kám-siā Siōng-tè, Siōng-tè bô boē-kı̀-tit thiàⁿ I ê lâng. Tng pit-gia̍p tián-lé hit jı̍t, tit-tio̍h chióng-kim. Goá chiū chiong chióng-kim choè chhia-chı̂ⁿ chûn-chı̂ⁿ lah. Sı̍t-chāi sı̄ Chú ê an-pâi.
Tng beh tńg-lâi Phı̂ⁿ-ô͘ ê sı̂, bô lâng chhoā goá. Sui-jiân án-ni, bô-lūn chē chhia, chē chûn, kap kiâⁿ koe-lō͘, Chú lóng chiàu-kò͘ goá pêng-an tńg-lâi kàu Phı̂ⁿ-ô͘.
Lí tı̄ chió ê tio̍h chı̄n-tiong:
Pit-gia̍p āu, goá teh choè ê kang-chok sı̄ àn-mô͘. Che sı̄ lán Tâi-oân bông-jı̂n só͘ tit ê ki-su̍t chiàm toā-pō͘-hūn ê. Bô lâng khı̀ choè tiān-oē ê kau-oāⁿ chhiú; bô lâng khı̀ choè pı̀-su, thoè keng-lí siá phoe; nā oē thang khı̀ choè lāu-su, chiū sǹg it-téng ê lah. Tùi goá ha̍k-sı̍p ê ki-su̍t, goá m̄-káⁿ ka-kı̄ phoe-phêng, chiū-sı̄ tùi goá ê hiān-chāi ê kang-chok, chit-gia̍p, goá m̄-káⁿ phoe-phêng; chí-ū tı̄ hiān-sı̍t ê ē-bı̄n goá eng-kai tio̍h kám-siā. Tı̄ seng-oa̍h siōng goá chiong goá só͘ oē-hiáu tit ê, chı̄n goá só͘ oē khı̀ choè; Chú tek-khak beh tùi goá kóng, Lí tı̄ chió ê í-keng chı̄n-tiong, goá beh siat-lı̍p lí lâi koán choē ê ( Má-thài 25 : 21 ).
Hoê-sióng khòng-iá ê lō͘-chiūⁿ:
Goá chhut-sı̀ tı̄ sè-kan í-lâi, sin-thé chhin-chhiūⁿ chin chió ū ióng-kiāⁿ ê sı̂, tiāⁿ-tiāⁿ teh phoà-pı̄ⁿ. Koh seng-oa̍h keng-kè bô joā hó. Só͘-í tı̄ sin-thé siōng, seng-oa̍h siōng siông-siông kám-kak chin-choē ê su-iàu. Tng goá tú-tio̍h kan-khó͘, phoà-pı̄ⁿ, á-sı̄ gū-tio̍h chhı̀-liān sim bô pêng-an ê sı̂, goá nā bô tùi pa̍t-lâng kóng-khí chiū bô lâng chai-iáⁿ goá ê su-iàu. Bô kā pa̍t-lâng kóng, tong-jiân pa̍t-lâng m̄ chai-iáⁿ. Sui-jiân sı̄ án-ni, goá pún-lâng sı̄ kám-kak chin ko͘-to̍k ê. Ū sı̂ sui-jiân tùi lâng kóng, tān-sı̄ lâng iā boē oē liáu-kái lán. Iā sū-sı̍t choē-choē lâng boē-oē thé-thiap pa̍t-lâng, sı̄m-chı̀ liân pē-bú hiaⁿ-tı̄ chí-bē, chhin-lâng pêng-iú iā sı̄ án-ni. Tong-jiân ū sı̂ m̄-nā boē thang tit-tio̍h an-ùi, in-ūi ū kiáu-jiáu tio̍h in, só͘-í hoán-tńg siū lé-mē. Che sı̄ goá choē-choē pái só͘ gū-tio̍h ê sū.
Tng goá kan-khó͘, iu-būn, phoà-pı̄ⁿ kap sim boē pêng-an ê sı̂, chí-ū Chú chai-iáⁿ goá ê khàm-kheh nā-tiāⁿ. Chit khoán oē-gú tùi tha̍k ê lâng kap thiaⁿ ê lâng sı̄ bô hó-thiaⁿ, chóng-sı̄ sū-sı̍t sı̄ án-ni; chí-ū Chú oē thang sı̍t-sı̍t chāi-chāi thé-thiap lán, chai-iáⁿ lán ê thòng-khó͘; iā Chú oē i-tı̄ lán, an-ùi lán. Chú Siōng-tè sı̄ chai bān lâng ê sim ê Siōng-tè.
Iâ-hô-hoa ah, khiam-pi ê lâng ê sim-goān,
Lí í-keng thiaⁿ-kı̀ⁿ;
Lí beh pı̄-pān in ê sim,
Lí beh àⁿ hı̄-khang lâi thiaⁿ.
( Si-phian 10 : 17 ).
Chí-ū kám-siā Chú o-ló Chú:
Koh choán-hoê lâi kóng. Goá nā m̄-sı̄ sı̀n Chú, ū Chú thang khò, khó-lêng chin-chá chiū í-keng bô tı̄ chit sè-kan. Koh goá nā m̄-sı̄ sı̀n Chú, goá bô ū kin-á-jı̍t ê hí-lo̍k. Sū-sı̍t Chú chin thiàⁿ goá; hō͘ goá tit-tio̍h Má-keng Kàu-hoē ê thiàⁿ Chú ê lâng ê pang-chān, khı̀ tı̄-liâu ba̍k-chiu; iā hō͘ goá ū ki-hoē thang khı̀ tha̍k-chheh, o̍h ki-gē. Goá tùi tı̄ ha̍k-sı̍p tiám-jı̄ chiah oē-hiáu tha̍k Sèng-keng, oē-hiáu gı̂m-si; tùi án-ni lâi cheng-ka goá ê sı̀n-gióng. Goá siong-sı̀n tı̄ phó͘-thong ê Bông-à ha̍k-hāu chhut-lâi ê lâng in sui-jiân oē-hiáu tiám-jı̄, chóng-sı̄ pit-gia̍p liáu chiū lóng bô teh bong, bô teh tha̍k-chheh chiah tio̍h. Goá in-ūi tı̄ kàu-hoē teh chhut-jı̍p, ta̍k jı̍t lóng ū ki-hoē thang khı̀ tùi Sèng-keng tit-tio̍h tı̀-sek; jı̂-chhiáⁿ sı̄ thiⁿ-téng lâi ê tı̀-sek. Goá tùi chit tiám iā tio̍h toā-toā kám-siā goá ê Chú, in-ūi I thiàⁿ goá kàu-ke̍k.
Chí-ū khoa-kháu Chú:
Lia̍t-ūi hiaⁿ-tı̄ chí-bē, lín khoàⁿ goá só͘ siá ê kiàn-chèng, nā kám-kak goá tām-po̍h teh khoa-kháu goá ê sı̀n-sim, á-sı̄ teh khoa-kháu goá ê choè lâng, chhiáⁿ goān-liōng goá. Choè chı̍t ê 20 goā hè ê chheng-liân-lâng, goá bô sím-mı̍h thang kap tāi-ke pí-phēng. Goá chí-ū chiong goá tit-tio̍h ê un-sù, sı̀n Chú ê keng-kè kap só͘ tit-tio̍h sı̀n-gióng ê keng-giām siá tām-po̍h kài-siāu hō͘ lán tāi-ke chai-iáⁿ. Nā ū thang khoa-kháu ê, chiū-sı̄ khoa-kháu Chú tùi goá ê thiàⁿ nā-tiāⁿ.
Sū-sı̍t goá pún-sin sı̄ siông-siông siūⁿ beh chū-sat. Sı̄ ūi-tio̍h ka-têng seng-oa̍h bô hó? Ia̍h-sı̄ pē-bú bô thiàⁿ goá ah? Che lóng m̄-sı̄. Chí-ū sı̄ ūi-tio̍h goá ê ba̍k-chiu bô khoàⁿ-kı̀ⁿ, oa̍h tı̄ sè-kan bô chū-iû. Sèng-keng bat kóng, seng-khu ê lêng chiū-sı̄ ba̍k-chiu, lí ê ba̍k-chiu nā kim, thong seng-khu chiū kim. Lí ê ba̍k-chiu nā hoe, thong seng-khu chiū àm (Thài 6 : 22 ). Sio̍k-gú ū chı̍t kù oē kóng, Thian tiōng jı̍t-goa̍t, Jı̂n tiōng lióng gán. Sū-sı̍t goán chhiⁿ-mı̂ ê bô chū-iû sı̄ lín m̄-chai ê, lín ê keng-giām goā ê.
Bông-jı̂n ê khó͘-thàng:
Ba̍k-chiu bô khoàⁿ-kı̀ⁿ ê lâng thang kóng sı̄ chin o͘-àm. Sè-kan só͘ ū ê kong-kéng boē tàng him-sióng; só͘ ū tı̄ sin-piⁿ ê mı̍h-kiāⁿ lóng m̄-chai ū sím-mı̍h mı̍h. Goán chhun chhiú teh bong, m̄-sı̄ beh the̍h sim só͘ ài ê mı̍h, put-kò sı̄ teh bong ū sím-mı̍h mı̍h tı̄ sin-piⁿ. Hit hāng mı̍h nā tú-tú sı̄ goán sim só͘ ài ê mı̍h, chiū-sı̄ bān-hēng lah. Te̍k-pia̍t kap pa̍t-lâng teh seng-oa̍h, kap goā-lâng teh kau-chhap ê sı̂, chit ê chōng-thài koh khah sı̄ án-ni. Nā goán ka-kı̄ ū goán ka-kı̄ ê pâng-keng, ū ka-kı̄ ê iōng-phín chiū pí-kàu hong-piān lah. Goán oē thang chiàu goán ka-kı̄ ê hong-piān chéng-lí it-chhè ê mı̍h-kiāⁿ. Chóng-sı̄ kiat-kó lâi kóng, goán sı̄ chı̍t ê ko͘-lı̍p, ko͘-toaⁿ ê lâng. Goán kap goán kı̂-thaⁿ ê it-chhè goân-chek siōng sı̄ keh-tn̄g bô liân-lo̍k ê.
Ba̍k-chiu ū khoàⁿ-kı̀ⁿ ê lâng oē thang chū-iû kiâⁿ in ê lō͘; bô-lūn sı̄ in iáu m̄-bat kiâⁿ-kè ê lō͘. Goán chiū boē tàng án-ni lah. Kun-pún goán lóng m̄-chai, tó-ūi ū koh siⁿ-chhut chı̍t tiâu ê sió-lō͘. Peh-soaⁿ, iû-lám kap goán lóng bô kan-sia̍p. Tiān-iáⁿ, tiān-sı̄ kap goán iā bô koan-hē. Lín teh khiām choē-choē chı̂ⁿ boé tiān-sı̄, goán lóng bô hūn-gia̍h. Jı̂-chhiáⁿ lín bô-lūn teh choè sím-mı̍h sū-gia̍p, á-sı̄ sím-mı̍h kang-chok lóng chin chū-iû soán-te̍k. In-ūi múi chı̍t ê kang-chok lóng su-iàu ba̍k-chiu ê pang-chō͘. Nā-sı̄ goán lóng sı̄ khang-khang, o͘-o͘ àm-àm. Goán Phı̂ⁿ-ô͘ lâng siông-siông teh chē chûn, siông-siông chhut-hái, chóng-sı̄ goán iā boē thang khoàⁿ-kı̀ⁿ hái ê khoan-khoah sı̄ cháiⁿ-iūⁿ, hái ê kong-kéng sı̄ siⁿ-choè cháiⁿ-iūⁿ.
Goán nā jú siūⁿ chiah ê sū, goán oē jú kám-kak o͘-àm, pi-siong ê. Chiah ê tú-tú sı̄ goán siūⁿ beh chū-sat ê goân-in. Chit ê sim-chêng goá siūⁿ lín iā boē oē cha̍p-jı̄ hun ê lí-kái.
Chú i-tı̄ goán:
Chóng-sı̄ lán choè Ki-tok-tô͘ oē thang kóng ê, chiū-sı̄, nā-sı̄ Chú ê Oē teh an-ùi lán, lán chiū boē siūⁿ beh chū-sat lah. Chí-ū Chú oē thang sı̍t-sı̍t chāi-chāi liáu-kái lán, thé-thiap lán. Chú sı̄ kàm-chhat lán sim-su ı̀-liām ê Chú. I lóng chai lán ê it-chhè, I oē tam-tng lán ê kan-khó͘, thoè-sio̍k lán ê choē. I sı̄ lán ê Kiù-chú, lán ê chio̍h-poâⁿ, sı̄ lán kham-tit o-ló ê. I ê Oē sı̄ ū la̍t ê Oē, oē hō͘ lâng ê sim iu-būn chiâⁿ-choè khoài-lo̍k. I ê kng sı̄ sù oa̍h-mı̍h ê kng.
I ê kng nā chiò tı̄ goán, goán beh tit-tio̍h kng-bêng. I ê kng iā sı̄ goán chhiⁿ-mı̂ lâng “ kha-chêng ê teng, lō͘-chiūⁿ ê kng.” Goán ta̍k-jı̍t teh kiâⁿ-lō͘, sui-jiân o͘-àm kiaⁿ-hiâⁿ, chóng-sı̄ Chú ê kng hō͘ goán bô lún-neh, iā boē poa̍h-tó.
Tı̄ Sèng-keng Iok-hān 14 chiuⁿ 27 chat kóng: Goá ēng pêng-an lâu teh hō͘ lín, goá chiong goá ê pêng-an siúⁿ-sù lín. Goá teh hō͘ lín m̄-sı̄ chhin-chhiūⁿ sè-kan teh hō͘ lâng ê khoán. Lín ê sim bo̍h-tit kiaⁿ-hiâⁿ.
Kiû Chú pó-siú goán bô tio̍h-tak:
Goá tùi sı̀n-khò Chú liáu-āu, goá teh kiâⁿ-lō͘ lóng chin toā-pō͘. Ū lâng tùi án-ni lâi giâu-gı̂ goá sı̄ ké chhiⁿ-mı̂. Goá kiâⁿ-lō͘ ū sı̂ boē su ba̍k-kim ê. Tong-jiân khah-iâⁿ lāu a-pô. Goá nā tı̄ pài 5 ka-têng lé-pài kap in saⁿ-kap kiâⁿ ê sı̂, sū-sı̍t goá lóng kiâⁿ boē su in.
Goá án-ni kóng m̄-sı̄ kóng goá boē-oē gū-tio̍h kau-thong kap lō͘-chiūⁿ ê gûi-hiám, m̄-kú goán nā beh kiaⁿ, sū-sı̍t sı̄ kiaⁿ boē liáu lah. Nā-sı̄ Chú ê hó chí-ı̀, goá siūⁿ, chiong-lâi só͘ oē gū-tio̍h ê gûi-hiám iáu sı̄ beh chō-chiū goá. Goá án-ni siūⁿ, goá chiū káⁿ toā-pō͘ kiâⁿ, ū-sı̂ káⁿ toā-pō͘ cháu lah.
Goán ba̍k-chiu bô khoàⁿ-kı̀ⁿ ı̂-it ê hó-chhù chiū-sı̄ bô siū goā-kài ê ín-iú nā-tiāⁿ. Chit kù oē nā m̄-sı̄ ū sı̀n Chú ê lâng lâi kóng, sı̄ bô ı̀-sù ê. Goán tı̄ chit ê boa̍t-sè kiám-chió tùi “ khoàⁿ ” lâi ê ín-iú, oē thang sèng-kiat goán ê seng-khu, che sı̄ goán ê hēng-hok. Tı̄ chit boa̍t-sè sı̍t-chāi bê-lâng ê ba̍k ê chin-choē lah. Thiaⁿ kóng choè-kūn hū-jı̂n-lâng teh liû-hêng ê saⁿ-kûn chin té. Che tùi goán lóng bô ı̀-gı̄; in ê saⁿ ū chhiú-ńg bô chhiú-ńg, tn̂g chhiú-ńg té chhiú-ńg goán lóng bô koan-hē; in ê boe̍h-á iù-ê, á-sı̄ chho͘-ê, saⁿ kak ê, á-sı̄ 4 kak ê, kāu ê, po̍h ê, tiû choè ê, lóng choè ê, tùi goán iā bô koan-hē. Tiān-iáⁿ ê chiat-bo̍k kap in ê hong-khı̀ ê hó bái bô éng-hióng tio̍h goán. Tiān-sı̄ iā sı̄ án-ni.
Só͘-í goán choè tiōng-iàu ê chiū-sı̄ sim chheng-kiat chiū hó lah. Kiám-chhái Siōng-tè chai goán ê loán-jio̍k, boē kham-tit siū-tio̍h í-siōng só͘ kóng ê ín-iú tı̀-kàu koaiⁿ goán ê ba̍k-chiu iā bô tek-khak.
Tè Chú ê lâng ū hēng-hok:
Choè-āu koh ēng kám-siā ê sim-chêng lâi kóng kúi kù. Siōng-tè hō͘ goá ê ba̍k-chiu bô khoàⁿ-kı̀ⁿ iáu sı̄ sió-khoá, in-ūi chit sè-kan iáu ū chin-choē pí goá khah kan-khó͘ ê lâng. Tng lán kiâⁿ-jı̍p Kiù-chè-ı̄ⁿ, Ióng-ló-ı̄ⁿ ê lāi-bı̄n, á-sı̄ sı̂n-keng-pı̄ⁿ-ı̄ⁿ ê sı̂, lán chiū oē khoàⁿ-kı̀ⁿ chin-choē pái-kha, é-káu, chhàu-hı̄-lâng, kap phoà-siùⁿ ê lâng choē-choē. In choē-choē lóng bô tit-tio̍h lâng ê thiàⁿ, iā bô tit-tio̍h Siōng-tè ê thiàⁿ. In sui-jiân tit-tio̍h kok-ka teh kā in iúⁿ-chhı̄ kap tı̄-liâu, sı̍t-chāi in khiàm-kheh lâng ê thiàⁿ choē-choē lah.
Goán Phı̂ⁿ-ô͘ iā ū Kiù-chè-ı̄ⁿ. Goá siông-siông khı̀ hia hóng-būn hia ê lāu-lâng. Sū-sı̍t chèng-bêng in pí goá khah khó-lı̂n. Chhiáⁿ tāi-ke iā ūi-tio̍h in kı̂-tó.
III. Tio̍h Thiàⁿ Lâng Chhin-chhiūⁿ Ka-kı̄.
Lia̍t-ūi hiaⁿ-tı̄ chí-bē, lín kiám ū kám-kak ba̍k-chiuū khoàⁿ-kı̀ⁿ, sin-thé ióng-chòng ê hok-khı̀ mah?
Hok-khı̀ tı̄ kok lâng sin-piⁿ:
Nā-sı̄ m̄-bat siūⁿ tio̍h, che sı̄ ko͘-hū Siōng-tè ê un lah. Nā-sı̄ ū, lín tio̍h chai chiah ê lóng sı̄ Chú siúⁿ-sù lín ê. Só͘-í chhiáⁿ lín tio̍h kám-siā Siōng-tè, pò-tap I ê un. Tông-sı̂ lín iā tio̍h hó-hó pó-siú lín tı̄ chāi-sè ióng-kiāⁿ, iā tio̍h pó-sioh lín ê kong-im. Nā bô án-ni choè, lín chiū ko͘-hū Siōng-tè ê un.
Goá ū kóng tio̍h “ pó-sioh sı̂-kan ” ê sū. Chhiáⁿ tāi-ke siūⁿ khoàⁿ. Goán chhiⁿ-mı̂-lâng ê sı̂-kan sı̄ pí lín khah chió lah. Lín ū 24 tiám cheng chı̍t jı̍t. Chit ê 24 tiám ê sò͘-jı̄ sı̄ lín ba̍k-kng ê só͘ tēng ê; nā-sı̄ goán, goán chı̍t jı̍t chí-ū 18 tiám cheng nā-tiāⁿ. Iōng pí-kàu ê lâi kóng, goán kap lín tı̄ àm-sı̂ ê 12 tiám cheng sı̄ sio-siōng, jı̍t-sı̂ chiū m̄-sı̄ án-ni lah. Lín ê 12 tiám cheng, goán chí-ū 6 tiám cheng nā-tiāⁿ. In-ūi goán ê hêng-tōng kú-chí lóng pí lín bān chı̍t poàⁿ. Lín ê sı̂-kan sı̍t-chāi chin hong-hù, sı̍t-chāi chin kàu-gia̍h lah. Chhiáⁿ lín iā oē-hiáu ēng tı̄ pa̍t lâng ê sin-chiūⁿ nih. Chiū-sı̄ kóng, tio̍h thiàⁿ lâng chhin-chhiūⁿ ka-kı̄. Chhiáⁿ m̄-thang kan-ta ēng 24 tiám cheng lóng tı̄ lín ka-kı̄ ê sin-chiūⁿ.
Pe̍h-pe̍h pun hō͘ pa̍t-lâng :
Sio-siâng lí-iû, sè-kan ū choē-choē hó-gia̍h lâng óng-óng boē-oē ēng kám-siā ê sim lâi seng-oa̍h; iā boē-oē ēng in ê chı̂ⁿ-gûn tı̄ pa̍t-lâng ê sin-chiūⁿ. Che lóng sı̄ ko͘-hū tio̍h Siōng-tè ê un.
Sè-kan lâng óng-óng boē-oē thé-giām tio̍h sòng-hiong lâng, bô chū-iû ê lâng ê kan-khó͘. Hó-gia̍h ê, ióng-chòng ê tian-tò boē hiáu khı̀ thé-thiap pa̍t lâng. In-ūi in bô gū-tio̍h kan-khó͘ ê keng-giām. Siōng-tè hō͘ Ki-tok-tô͘ choē-choē tùi sòng-hiong, phoà-pı̄ⁿ, siū ap-chè ê tiong-kan khí-lâi; I ài lán chiong lán ê keng-giām lâi lı̄-ek pa̍t lâng, thé-thiap pa̍t lâng. Lán Ki-tok-tô͘ boē ēng-tit kan-taⁿ tùi Chú kiû pêng-an kap hok-khı̀. Lán tio̍h chiong tit-tio̍h Chú tháu-pàng ê hok-im thoân hō͘ pa̍t lâng; koan-sim in, thé-thiap in, thoè in kı̂-tó tı̄ Siōng-tè ê bı̄n-chêng chiah oē sái-tit.
Chú kóng, Lín pe̍h-pe̍h tit-tio̍h, tio̍h pe̍h-pe̍h hō͘ lâng ( Thài 10: 8 ).
Chhiáⁿ thé-thiap pháiⁿ-miā lâng:
Goá tāi-piáu goán chit khoán bô chū-iû, loán-jio̍k, pi-bı̂ ê lâng tùi lín tāi-ke pài-thok. Hiān-chāi ū chin-choē khùn-khó͘ ê lâng tı̄ lán ê sin-piⁿ. In chin su-iàu lán ê pang-chān, su-iàu lâng ê an-ùi. Tng lán chai-iáⁿ nā ū su-iàu lán pang-chān ê lâng, chhiáⁿ lán khı̀ pang-chān i. Tng nā khoàⁿ-kı̀ⁿ ba̍k-chiu bô khoàⁿ-kı̀ⁿ ê lâng tı̄ lō͘ teh kiâⁿ, i nā ū gū-tio̍h gûi-hiám ê sū, bô chū-iû, bê-lō͘ ê sū, chhiáⁿ lín pang-chān in. Pài-thok, pài-thok.
Goá sı̀n Chú liáu-āu chiah oē-hiáu khı̀ siūⁿ pa̍t lâng ê sū, ūi-tio̍h pa̍t lâng kı̂-tó, pang-chān in. Goá chiū siông-siông khı̀ goán Phı̂ⁿ-ô͘ ê Kiù-chè-ı̄ⁿ. Kiù-chè-ı̄ⁿ sı̄ tı̄ goán tau beh lâi Má-keng Kàu-hoē ê tô͘-tiong ê só͘-chāi. Goá chêng nā-sı̄ ēng kiâⁿ-lō͘ lâi Má-keng ê sı̂, chiū siông-siông sūn-lō͘ oat jı̍p-khı̀.
Bûn-bêng sı̄ choē-ok mah?
Choè-kūn ū chū-tōng-chhia ê piān liáu-āu goá chiū khah hán-tit tùi hia lo̍h chhia. Che sı̄ goá sim kan-khó͘ ê sū. Ū chhia thang chē, chiat-séng sı̂-kan; cháiⁿ-iūⁿ tian-tò boē-oē khah chia̍p-chia̍p khı̀ hóng-būn in nih? Che tú-tú sı̄ lán bûn-bêng sı̂-tāi choè toā mâu-tún ê só͘-chāi. Boa̍t-sè ê Ki-tok-tô͘ ê thiàⁿ-sim ê tūi-lo̍h tú-tú tı̄ chit ê só͘-chāi. Goá bat keng-giām chit ê, sim chin kiaⁿ-hiâⁿ; goá iā sı̄ chı̍t ê boa̍t-sè Ki-tok-tô͘ mah? Goá sı̄ teh chiat-séng sı̂-kan nih? Goá sı̄ teh kám-kak goá só͘ hùi ê chhia-chı̂ⁿ bô chhái nih? Goá ê chhia-chı̂ⁿ kiám m̄-sı̄ pí phó͘-thong lâng khah tit-tio̍h iu-thāi nih? Chèng-hú iu-thāi goán chhiⁿ-mı̂-lâng ê chhia-chı̂ⁿ, Ki-tok-tô͘ ê goá iōng só͘ chiat-séng ê chı̂ⁿ ēng tı̄ tó-ūi nih?
Ǹg-bāng Chú sià-bián, hō͘ goá oē siông-siông koh khı̀ kàu hia, Kiù-chè-ı̄ⁿ, ūi-tio̍h hiah ê kan-khó͘, bô i-oá ê lâng an-ùi in; chiong Chú só͘ hō͘ lán ê pêng-an pò hō͘ in chai.
Phı̂ⁿ-ô͘ sı̄ Chú tiāⁿ-tio̍h ê só͘-chāi:
Kám-siā Chú, Chú hō͘ goá toà tı̄ Phı̂ⁿ-ô͘ ê só͘-chāi. Goán chia ū choē-choē lı̄-tó, lâng khah bô ài khı̀ ê tó-sū, tı̄ hia oē thang ūi Chú choè kiàn-chèng. Che sı̄ Chú só͘ hō͘ goán ê thoân hok-im ê tiûⁿ-só͘. Kè-khı̀ iā ū choē-choē lâng khı̀ choè kang, chóng-sı̄ iáu ū khiàm-ēng choē-choē kang.
Tng goá khı̀ tó-sū ê sı̂ sui-jiân bô chū-iû: Tio̍h chē sè chiah chûn-á, chin gûi-hiám; iā siū thí-chhiò kóng sı̄ hong-so bô an-hūn siú-kí; chóng-sı̄ Chú iā bô hō͘ goá sit-chı̀. In-ūi lı̄-tó ê só͘-chāi chin su-iàu lâng khı̀ pang-chān, ná choē sı̄ ná hó. Goá sui-jiân bô chū-iû koh siū lâng thí-chhiò, chóng-sı̄ goá ná choè kang ná khoài-lo̍k. In-ūi siūⁿ kàu tı̄ in hiah ê tio̍h-boâ, kan-khó͘ poē tāng-tàⁿ ê lâng oē thang tit-tio̍h Chú ê hok-im lâi an-hioh ê sı̂, boē kı̀m-tit chı̀n-hêng khı̀. Chú nā ū ki-hoē hō͘ goá, goá chiū bô hō͘ i phah-sńg.
Má-keng ê sı̀n-tô͘ ū hok-khı̀:
Goá sı̄ sio̍k tı̄ Má-keng Kàu-hoē. Goán Phı̂ⁿ-ô͘ tı̄ tē-lí siōng, lı̄-tó ê jı̂n-châi lóng lâu jı̍p tı̄ Má-keng Kàu-hoē. Má-keng iā sı̄ kau-thong ê tiong-sim tē-tiám, só͘-í lı̄-tó ê lâng kap Má-keng ê lâng lóng ū koan-hē. Tùi tı̄ kàu-hoē lâi kóng, Má-keng Kàu-hoē iā sı̄ Phı̂ⁿ-ô͘ ê tiong-sim kàu-hoē; i put-tàn ka-kı̄ tio̍h khiā-chāi, i iā tio̍h pang-bâng lı̄-tó ê kàu-hoē. Sū-sı̍t siōng Má-keng Kàu-hoē lóng ū án-ni teh choè. Só͘-í goá sio̍k tı̄ Má-keng Kàu-hoē beh chhut-khı̀ lı̄-tó pang-bâng in lı̄-tó ê kàu-hoē, sǹg sı̄ chin chū-jiân ê sū, boē hō͘ lâng siūⁿ kóng sı̄ teh phín-phóng, teh ké-gâu. Goá siong-sı̀n chit hāng sū iā sı̄ Chú te̍k-pia̍t an-pâi hō͘ goá ê. Goá nā siⁿ tı̄ lı̄-tó, sio̍k tı̄ lı̄-tó ê kàu-hoē, kiaⁿ-liáu goá boē thang hiah iông-ı̄ⁿ siūⁿ beh khı̀ tó-ūi chiū khı̀ tó-ūi. Lán nā chai-iáⁿ Phı̂ⁿ-ô͘ ê sı̍t-chêng ê lâng chiū chai-iáⁿ chit ê sū. Tı̄ goán Phı̂ⁿ-ô͘, lı̄-tó kap Má-keng ê kau-thong sǹg iáu boē bái, lı̄-tó kap lı̄-tó ê óng-lâi chin put-piān, sı̄ téng-ū bô.
Thàn ki-hoē thoân hok-im:
Tı̄ goá ê kang-chok siōng goá iā siông-siông thàn ki-hoē tùi lâng thoân hok-im. Sui-jiân ū sı̂ siū lâng kū-choa̍t m̄ thiaⁿ, kám-siā Chú, Chú iā bô hō͘ goá sit-chı̀. Ta̍k-jı̍t ta̍k-jı̍t tán lâng-kheh ê sı̂, ia̍h sı̄ teh àm-mô͘ ê sı̂ goá iû-goân chhē ki-hoē thoân hok-im. Chú kı̀-jiân hō͘ goá ê un-sù chin-chiàⁿ toā, goá thoân hok-im choè Chú ê kang sı̄ tong-jiân ê sū.
Siūⁿ khí tng goá tha̍k-chheh chı̍t nı̂, sú-ká tńg-lâi Phı̂ⁿ-ô͘ ê sı̂ ū chı̍t ūi bo̍k-su lâi Má-keng pò͘-tō. Tng pò͘-tō soah ê sı̂, hit ūi bo̍k-su kóng, Sím-mı̍h lâng goān-ı̀ it-seng ūi Chú hōng-hiàn choè Chú ê kang, chhiáⁿ kia̍h-chhiú. Tı̄ hit jı̍t goá ū kia̍h-chhiú, goān-ı̀ it-seng hōng-hiàn ūi Chú choè-kang.
Goá ū kap lâng kia̍h-chhiú:
Sū-sı̍t hit tong-sı̂ goá iā bô teh siūⁿ “ beh cháiⁿ-iūⁿ ”khı̀ choè; goá chı̍t ê chhiⁿ-mı̂ lâng beh án-choáⁿ khı̀ thoân. Kàu tı̄ pit-gia̍p āu, iáu sı̄ m̄-chai beh cháiⁿ-iūⁿ ūi Chú choè-kang. Ū sı̂ iáu sı̄ thiàⁿ sè-kan khah kè-thâu thiàⁿ Chú. Ū sı̂ iáu sı̄ thiàⁿ ka-kı̄, khó-lı̂n ka-kı̄ khah iâⁿ thiàⁿ Chú. Ū sı̂ siūⁿ beh choè, chóng-sı̄ lún-neh m̄-káⁿ choè; ū sı̂ kám-kak goá só͘ bat ê tō-lí bô joā-choē.
Kàu tı̄ goá pit-gia̍p nn̄g nı̂ āu, ū chı̍t jı̍t goá phoà-pı̄ⁿ chin giâm-tiōng. Tı̄ goá phoà-pı̄ⁿ tiong chin kan-khó͘ ê sı̂, hit jı̍t goá jı̄m-ûi goá oē kiat-sok goá ê jı̂n-seng. Hit sı̂ goá chin kiaⁿ-hiâⁿ. Chóng-sı̄ Sèng-keng ū kóng:
Koh-oa̍h kap oa̍h-miā sı̄ chāi-tı̄ goá, sı̀n goá ê lâng sui-bóng sí, iáu-kú beh oa̍h ( Iok 11:25 ).
