Tio̍h choè-kang, bô-lūn sím-mı̍h khoân-kéng:
Tng lán oa̍h teh ê sı̂ chí-ū tio̍h chı̄n-la̍t sı̀n-khó Chú. Bô-lūn lán sím-mı̍h sı̂, gū-tio̍h sím-mı̍h gûi-hiám kiaⁿ-hiâⁿ, Chú chiū beh chiàu-kò͘ lán. Goá iā tio̍h tng goá oa̍h-teh ê sı̂, chı̄n-la̍t sı̀n-khò Chú. Goá tı̄ chit sè-kan só͘ chhun ê sı̂-kan iā tio̍h chı̄n-la̍t ūi Chú choè-kang. Goá sui-jiân sı̄ ba̍k-chiu bô khoàⁿ-kı̀ⁿ, thâu-chêng chhin-chhiūⁿ o͘-o͘ àm-àm, chı̍t phiàn o͘-hûn tà tı̄ goá ê thâu-chêng, tān-sı̄ goá tio̍h oá-khò Chú bián kiaⁿ-hiâⁿ chiah oē ēng-tit. Chı̀n chı̍t pō͘ tio̍h koh ūi Chú choè-kang chiah oē ēng-tit. In-ūi Chú sı̄ khah iâⁿ sè-kan ê Chú. Sèng-keng ū kı̀-chài kóng:
Goá í-keng chiong chiah ê kā lín kóng, hō͘ lín tiàm tı̄ goá ū pêng-an. Tı̄ sè-kan lín ū khó͘-lān, to̍k-to̍k lín thang pàng-sim; goá í-keng khah iâⁿ sè-kan ( Iok 16 : 33 ).
Tı̄ hit ê phoà-pı̄ⁿ ê sı̂ koh-chài hoê-sióng kóng, Goá ê sim-lāi it-tēng iáu ū choē, boē chhâ-chhut ê choē. Chhin-chhiūⁿ goá nā gū-tio̍h chhiⁿ-chhám, kan-khó͘, á-sı̄ ko͘-to̍k ê sı̂, goá siông-siông tùi Chú hē goān; beh ūi Chú choè kang. Chóng-sı̄ kàu tı̄ o͘-hûn kè-khı̀ ê sı̂ goá chiū boē kı̀-tit. Koh goá iā chai, goá ê chhin-lâng choē-choē iáu-bē sı̀n Chú. Liân goá ka-kı̄ ê pē-bú hiaⁿ-tı̄ to poē-ge̍k Chú, ko͘-hū Chú un-tián. Hiān-sı̂ goá nā lı̄-khui sè-kan, goá khó-lêng khang-chhiú kı̀ⁿ Pē lah; bô toà sím-mı̍h.
Pàng-hē tāng-tàⁿ, khı̀ choè-kang:
Hit jı̍t tng goá pı̄ⁿ chin kan-khó͘ ê sı̂, goá chiū kı̂-tó Siōng-tè, kiû Chú koh chı̍t pái lı̂n-bín goá ê choē, sià-bián goá ê loán-jio̍k. Tông-sı̂ goá chiong goá sim lāi ê tāng-tàⁿ kau-thok tı̄ Chú.
Hit sı̂ goá só͘ tha̍k ê Sèng-keng kóng:
Lín kı̀ⁿ-nā tio̍h-boâ taⁿ tāng-tàⁿ ê tio̍h chiū-kūn goá, goá beh hō͘ lín an-hioh. Goá sim-lāi un-jiû khiam-sùn, lín pē goá ê taⁿ lâi tùi goá o̍h, chiū lín ê sim-sı̂n oē tit-tio̍h an-hioh. In-ūi goá ê taⁿ sı̄ khoài , goá ê tàⁿ sı̄ khin ( Thài 11 : 28-30 ).
Tng goá kı̂-tó chiong goá sim-lāi só͘ ū ê tāng-tàⁿ kau-tài Chú liáu-āu, goá ê sim chiū chin pêng-an. Koh bô joā-kú goá chiū khùn khı̀. Tng goá khùn-chhíⁿ ê sı̂, goá ê sin-thé kám-kak chin khin-sang. Keng-kè bô kúi-jı̍t goá ê pı̄ⁿ chiū hó-khı̀. Tùi goá pı̄ⁿ hó liáu-āu, goá chiū kèng-ka hùn-chı̀ ló͘-le̍k siūⁿ beh ūi Chú choè-kang lah.
Sèng Sı̂n choè-kang, Mô͘-kúi iā teh choè-kang:
Goá beh choè-kang ê sı̂, tong-jiân Mô͘-kúi chiū siat choē-choē kè-bô͘ beh chó͘-tòng goá, ài hō͘ goá sit-chı̀. Chóng-sı̄ goá ū Chú ê Oē thang khò, tek-sèng kàu ū chhun. Hit ê keng-kè chhin-chhiūⁿ án-ni:
Ū choē-choē bô ài thiaⁿ tō-lí ê lâng tng bı̄n tùi goá ki-chhı̀ kóng, Lí sı̄ chêng-sè hoān-choē, tı̀-kàu hiān-chāi gū-tio̍h ba̍k-chiu bô khoàⁿ-kı̀ⁿ. Iā ū lâng kóng, Lí sı̄ tùi lí ê chó͘-sian hoān-choē tı̀-kàu liân-lūi tio̍h lí ba̍k-chiu bô khoàⁿ-kı̀ⁿ. Chit khoán ê oē-gú goá tùi sè-hàn ê sı̂, tio̍h siông-siông thiaⁿ-kı̀ⁿ. Goá tha̍k tio̍h Sèng-keng tiong, Chú tùi chit ê kái-tap ê sı̂ goá sim chin hoaⁿ-hí. Te̍k-pia̍t koh thiaⁿ-kı̀ⁿ bo̍k-su ê kái-soeh ê sı̂ goá ê sim chiū hiáu-ngō͘, pêng-an lah.
Sèng-keng chı̍t-toāⁿ ê kò͘-sū lán lóng chai, kóng:
Iâ-so͘ kiâⁿ kè ê sı̂, khoàⁿ-kı̀ⁿ chı̍t lâng chhut-sı̀ chiū chhiⁿ-mı̂. I ê ha̍k-seng mn̄g I kóng, Lia̍p-pí chit lâng chhut-sı̀ chiū chhiⁿ-mı̂, tùi chı̄-chūi hoān-choē, sı̄ i pún-sin; á-sı̄ i ê pē-bú ah? Iâ-so͘ ı̀n kóng, Chit lâng bô hoān-choē, i ê pē-bú iā bô; to̍k-to̍k beh ēng i lâi hián-bêng Siōng-tè ê só͘ choè( Iok 9 : 1-3 ).
Ū hó ê bô͘-iūⁿ tı̄ thâu-chêng:
Hái-lûn Kái-liok Lú-sū, i sui-jiân chhut-sı̀ liáu-āu ba̍k-chiu chiū bô khoàⁿ-kı̀ⁿ, é-káu, koh chhàu-hı̄-lâng, tān-sı̄ Chú iā bô pàng-sak i; kiâⁿ choē-choē ê kı̂-sū tı̄ i ê sin-chiūⁿ. Lâng kóng i sı̄ 20 sè-kí ê sı̂n-jiah.
Goá siong-sı̀n goá ê ba̍k-chiu bô khoàⁿ-kı̀ⁿ, iā sı̄ Chú beh ēng goá, beh thong-kè goá ê sin-chiūⁿ choè I ê kiàn-chèng, êng-kng I ê miâ. Goān Chú pó-siú goá kàu I beh tiàu ê jı̍t.
Ū choē-choē lâng iā oē ki-chhı̀ goá kóng, Lí kóng Iâ-so͘ oē i-hó lâng ê pı̄ⁿ, ūi sím-mı̍h lí ê ba̍k-chiu chiah boē tit-tio̍h i-hó? Goá chiū iōng Iok-hān 9 chiuⁿ ê bé-chām ê kò͘-sū thiah-bêng hō͘ in thiaⁿ.
Goá in-ūi sím-phoàⁿ lı̂m-kàu chit sè-kan, hō͘ boē khoàⁿ-kı̀ⁿ ê lâng khoàⁿ-kı̀ⁿ; iā khoàⁿ-kı̀ⁿ ê lâng pı̀ⁿ-choè chhiⁿ-mı̂. Hoat-lı̄-sài lâng thiaⁿ-kı̀ⁿ chiah ê oē, chiū kā I kóng, Chóng-bô goán iā chhiⁿ-mı̂ mah? Iâ-so͘ kā in kóng, Lín nā chhiⁿ-mı̂, chiū bô choē; taⁿ lín kóng, Goán khoàⁿ-kı̀ⁿ; chiū lín ê choē tiāⁿ-tiāⁿ tı̄-teh.
Lín thiàⁿ goá khah-iâⁿ chiah ê mah ?
Goá beh choè kang, iáu ū chı̍t hāng ê chó͘-keh, chiū-sı̄ pē-bú tùi goá ê “thiàⁿ ”. Tùi chêng-chiuⁿ tiong lán í-keng oē chai-iáⁿ goá ê lāu-pē ê kò͘-chip ê sū; m̄ hō͘ goá khı̀ chhiú-su̍t, khı̀ tha̍k-chheh. Sū-sı̍t siōng chit ê pē-bú ê thiàⁿ hiám-hiám hāi goá sit-ha̍k, hiám-hiám hō͘ goá choè chı̍t ê bô lō͘-ēng ê lâng, iā koh sū-sı̍t siōng ū hun-loān goá ê sı̀n-gióng. Chóng-sı̄ goá iā put-piān phoe-phêng sím-mı̍h.
Phı̀-jū kóng, goá ê pē-bú in-ūi thiàⁿ goá, chai goá ba̍k-chiu bô khoàⁿ-kı̀ⁿ chin bô chū-iû; tı̄ goā-bı̄n kiâⁿ lâi kiâⁿ khı̀ chin gûi-hiám. In chiū thiàⁿ goá ê iân-kò͘ chó͘-tòng goá, m̄ hō͘ goá chhut-khı̀ khah hn̄g ê só͘-chāi. Lán beh phoe-phêng chit khoán ê thiàⁿ choè bông-bo̍k ê thiàⁿ. Chóng-sı̄ choè pē-bú ê lâng kiám m̄-sı̄ lóng sı̄ chit khoán ê mah? Lán choè lâng ê lāu-pē lāu-bú ê m̄-chai cháiⁿ-iūⁿ? Goá tong-jiân iáu m̄-chai chı̍t hāng sū ê sı̍t-chāi.
Chhiⁿ-mı̂-lâng teh tah-chûn:
Lán lóng chai, goán Phı̂ⁿ-ô͘ chiū-sı̄ chı̍t ê choē-choē tó-sū ê só͘-chāi. Má-keng pún-tó pí-kàu kau-thong khah lı̄-piān í-goā, nā beh khı̀ goā-tó lóng tio̍h chē chûn. Chhiáⁿ lín sióng-siōng chı̍t ê ba̍k-chiu bô khoàⁿ-kı̀ⁿ ê lâng beh chē chûn ê tiûⁿ-bı̄n: Nā bat lâi Phı̂ⁿ-ô͘ ê lâng lóng chai-iáⁿ, goán beh khı̀ lı̄-tó ê kau-thong-chûn m̄-sı̄ joā-toā chiah. I khò-hoāⁿ ê sı̂, nā chúi im, chiū khah hó chiūⁿ chûn; chóng-sı̄ nā chúi khó ê sı̂, chiū lóng tio̍h iōng thiàu ê chiah oē tàng lo̍h chûn. Iā chûn m̄-sı̄ tiāⁿ-tiāⁿ thêng tı̄ hia. Chûn siū tio̍h hái-éng poah-lâi poah-khı̀, iô-lâi iô-khı̀, chin bô an-tēng. Lo̍h chûn iā sı̄ án-ni, khí chûn iā sı̄ án-ni. Ū-sı̂ tı̄ lı̄-tó iā tio̍h thiàu lo̍h chúi-lāi, liâu kàu hái-kı̂ⁿ. Tı̄ hit sı̂ ba̍k-kim ê chai chúi ê chhim chhián, goán sı̄ chí-ū sı̀n-iōng in ê oē, thiàu chiū thiàu. Hit ê kám-kak sū-sı̍t chhin-chhiūⁿ beh thiàu jı̍p hái, thiàu lo̍h-khı̀ sí chı̍t-iūⁿ.
Tı̄ chit khoán chōng-thài ê ē-bı̄n, goá ê pē-bú bô ài goá chhut-khı̀ kàu lı̄-tó choè-kang sı̄ tong-jiân ê sū. Lán beh cháiⁿ-iūⁿ kóng in ah?
Chú thoè goá khui-lō͘ kàu Chhit-bí:
Chóng-sı̄ chiah ê sū-chêng bô-lūn jû-hô, boē tı̀-kàu chó͘-tòng goá thiàⁿ Chú ê sim.
Kám-siā Chú, Chú ū thoè goá khui-lō͘, hō͘ goá oē thang khı̀ kàu tı̄ choè hn̄g ê lı̄-tó “Chhit-bí”, tı̄ hia ūi Chú choè kiàn-chèng. Ki-hoē chiū-sı̄ chhin-chhiūⁿ án-ni kàu ê. Tú-tú tùi Lâm Bí-chiu ū Khó͘ Iú-châi Bo̍k-su tńg-lâi Tâi-oân, iā ū lâi kàu goán Phı̂ⁿ-ô͘ choē-choē jı̍t ( A. D. 1967 ). Khó͘ Bo̍k-su iā ū pâi Chhit-bí ê jı̍t-thêng. Tng goán Má-keng Kàu-hoē ū teh bō͘-chı̍p èng-oān ê sı̂, goá chiū koat-ı̀ sūn chit ê ki-hoē kàu tı̄ Chhit-bí.
Goá chiong chit ê sū tı̄ kı̂-tó ê sı̂ lia̍t-jı̍p tı̄ kı̂-tó ê hāng-bo̍k ê lāi-bı̄n, ǹg-bāng Chú thoè goá khui-lō͘. Kám-siā Chú, goá ê kı̂-tó tit-tio̍h Chú kàm-la̍p. Chú chiū chhe goán ê Tiúⁿ-ló Lâu Gím-hó chí kā goá ê pē-bú kóng chin-choē ê hó oē, kó-jiân, goá ê pē-bú ū sêng-lo̍k beh hō͘ goá khı̀.
Chhit-bí sı̄ lı̄ goán Má-keng 4 tiám cheng ê chûn ê só͘-chāi. Gō͘ ge̍h bé, 6 ge̍h chhoe tùi thiⁿ-khı̀ lâi kóng sı̄ chin hó ê sı̂-ki; bô hong, bô hō͘, boē léng, boē joa̍h ê sı̂-kı̂. Hit jı̍t tı̄ sı̂-kan siōng goán boē oē tàng hióng-siū kun-chûn ê piān-lı̄. (Goán Phı̂ⁿ-ô͘ kóng kun-chûn, m̄-sı̄ teh chí thih-kah ê toā chiah chiàn-chûn. Goán kóng kun-chûn chiū-sı̄ iok 100 bé ê kun ê kau-thong chûn ). Hit jı̍t goán tio̍h chē bı̂n-kan ê 45 bé ê phó͘-thong kau-thong-chûn. Che tùi goá lâi kóng sı̄ thâu chı̍t pái beh chē sè-chiah chûn ê.
Sió sı̀n ê lâng ah?
Sui-jiân ū khah kiaⁿ, khah khoà-lū, nā-sı̄ siūⁿ kàu bo̍k-su in iā sı̄ beh chē sio-siâng hit chiah chûn, iā sio-siâng tio̍h chē 4 tiám cheng kú, goá chiū chiong chit khoán ê hoân-ló kau-thok Chú lah.
Siūⁿ kàu chá-chêng Chú Iâ-so͘ chhut lâi thoân tō-lí ê sı̂, iā án-ni tı̄ Ka-pek-lông chē chûn. Chú iā ū gū-tio̍h toā hong-éng. Hit sı̂ Chú khí-lâi chek-pı̄ hong kap hái hō͘ i pı̂ⁿ-tiāⁿ. Kı̀-jiân lán bat tha̍k tio̍h chit ê kò͘-sū, iā sı̀n lán ê Chú sı̄ koán-lí ú-tiū bān-mı̍h ê Chú, lán kiám beh koh chiâⁿ-choè chı̍t ê sió-sı̀n ê lâng mah? Goá chiū chiong it-chhè ê sū kau-thok Chú an-pâi, thèng-hāu hit ê jı̍t-chí lah.
Kó-jiân gū-tio̍h hong-hō͘:
Kàu tı̄ hit jı̍t goá oē-kı̀-tit chin hó-thiⁿ. Goá ê pē-bú chiū chiàu iok-sok hō͘ goá chhut-hoat. Goán chiū chhut-hoat. Kám-siā Chú tit-tio̍h tâng-sı̀n ê hiaⁿ-chí ê pang-bâng, goá só͘ khoà-lū ê “ chiūⁿ-chûn " ê sū lóng sūn-sū; in khan goá ê chhiú, chı̍t bı̄n kiò goá tio̍h hoa̍h joā toā pō͘, kā goá chù-ı̀ tio̍h sím-mı̍h sı̂ thiàu lo̍h-khı̀. Tùi chit hong-bı̄n lâi kóng, goá ê chûn-chāi khak-sı̍t sı̄ “ tı̂ⁿ-poàⁿ ” pa̍t lâng ê chûn-chāi .
Chhut-hoat ê sı̂ sui-jiân sı̄ chin sūn-sū, chóng-sı̄ kàu tı̄ tô͘-tiong hut-jiân khí hong, ia̍h lo̍h hō͘. Chûn chı̍t-ē iô, tāi-ke chiū khai-sí hı̂n-chûn. Chóng-sı̄ hō͘ lo̍h lâi ê sı̂, chêng-hêng chiū bô sio-siâng lah. Kàu-taⁿ tāi-ke chhu tı̄ ē-bı̄n teh chē ê chhio̍h-á, hiān-chāi tio̍h the̍h khí lâi am thâu-khak. Chhio̍h-á cháiⁿ-iūⁿ oē tàng jia hō͘ nih? Tùi chhio̍h-á phāng sia̍p chúi jı̍p khı̀ liáu-āu, tāi-ke tio̍h khı̀-sak chhio̍h-á lah, chóng-sı̄ ū sím-mı̍h thang am nih?
Tı̄ chit khoán ê chêng-hêng ê ē-bı̄n hō͘ goá siūⁿ khí, Lâng nā tek-choē Siōng-tè, jiá-khí Siōng-tè ê siū-khı̀ ê sı̂, tek-khak beh chhin-chhiūⁿ án-ni bô só͘-chāi thang bih chiah tio̍h. Tng ú-tiū ê toā Chú-cháiⁿ, lán ê Siōng-tè hoat-chhut I siū-khı̀ ê bı̄n ê sı̂, chı̄-chūi oē siám-bih thoat-lı̄ I ê siū-khı̀ ah? Kı̀-jiân sı̄ án-ni, lán tio̍h tı̄ Chú Iâ-so͘, lán ê Kiù-chú ê toā kiù-un iáu tı̄ lán tiong-kan ê kin-á-jı̍t, lán tio̍h pı̄-pān lán ê sim chiap-siū lán ê Chú, tit I pó-hō͘. Tng sím-phoàⁿ ê jı̍t siū I tit-tio̍h chiap-la̍p, jı̍p tı̄ éng-oán ê kok.
Chú ê sèng-chhiú jia-cha̍h pó-hō͘:
Tú-tú tı̄ chit khoán gông-ngia̍h, tiû-tû, kiâⁿ bô lō͘ ê sı̂, Chú ê sèng-chhiú jia-cha̍h pó-hō͘ goá. I bô pàng-sak goá chit khoán loán-jio̍k ê lâng, Chú chhe thiàⁿ Chú ê chí-bē iōng i ê hō͘-soàⁿ lâi jia-khàm goá. Sui-jiân sı̄ án-ni, tı̄ chûn-téng hong teh thàu ê sı̂, hō͘-soàⁿ pún-sin sı̄ chin gûi-hiám ê mı̍h; tú boē tiâu toā hong. Āu-lâi in chiū khan goá jı̍p khı̀ chûn-tó͘ ê lāi-bı̄n, niū goá ū ūi thang bih.
Tı̄ chia hō͘ goá keng-giām 3 hāng ê sū: Thâu chı̍t hāng: Chú sı̄ thiàⁿ-thàng ê Chú. I tı̄ lán gū-tio̍h gûi-hiám ê sı̂ I tek-khak oē chhun I ê sèng-chhiú jia-cha̍h pó-hō͘ lán. Tē jı̄: I ê sèng-chhiú beh tùi lí bô khoàⁿ-kı̀ⁿ ê só͘-chāi, bô phah-sǹg ê tiong-kan pang-chān lí. Tē 3: lán iáu-bē thiàⁿ lâng ê tāi-seng, Chú í-keng thiàⁿ lí. Só͘-í lán bô sím-mı̍h thang khoa-kháu, nā beh khoa-kháu, chí-ū khoa-kháu sı̍p-jı̄-kè téng ê Chú nā-tiāⁿ. Phı̀-jū kóng, goá thiàⁿ Chhit-bí ê lâng, koan-sim in, ài chiong Chú hok-im ê kiàn-chèng pun hō͘ in; só͘-í chiah chē chûn beh khı̀ Chhit-bí. Chóng-sı̄ iáu bē kàu Chhit-bí ê tāi-seng, tı̄ chûn lāi, thiàⁿ Chú ê lâng tāi-seng thiàⁿ goá lah; in chhun in ê chhiú jia-cha̍h, pó-hō͘ goá.
Lí boē thiàⁿ I, I seng thiàⁿ lán:
Goá hit jı̍t in-ūi thiⁿ-khı̀ chin hó, só͘-í bô toà sím-mı̍h khah sio ê saⁿ; chhēng po̍h-po̍h ê saⁿ nā-tiāⁿ. Nā m̄-sı̄ in ê thiàⁿ-thàng tı̄ goá ê téng-bı̄n, goá tek-khak tú boē tiâu hong kap hō͘ ê chhı̀-thàm. Lán lóng chai hái-hong sı̄ chin léng ê. Goá siong-sı̀n in hō͘ goá jı̍p tı̄ chûn-tó͘ lāi, tek-khak ū chı̍t lâng thoè goá chhut khı̀ goā-bı̄n hō͘ hong chhe, hō͘ hō͘ ak chiah tio̍h. Sím-mı̍h lâng thoè goá hō͘ hō͘ ak, goá m̄-chai, goá chí-ū chai Chú ê thiàⁿ kek-tōng thiàⁿ Chú ê lâng án-ni choè ê. Phı̂ⁿ-ô͘ kau-thong-chûn ê siat-pı̄ ū-ê chin chha, phó͘-thong lâng-kheh moá-moá, chóng-sı̄ jia-jı̍t ê pò͘-phâng to ı̀-sù ı̀-sù chı̍t niá nê tı̄ tiong-ng. Tı̀-kàu hō͘ lâng-kheh tı̄ jı̍t tiong-tàu, jı̍t chin iām ê sı̂, tı̄ jı̍t tiong-ng pha̍k 4 tiám cheng sı̄ phó͘-thong ê sū. Phó͘-thong ê lâng it-tēng oē liù-phê.
Taⁿ Chú ê thiàⁿ kı̀-jiân kàu án-ni, goá eng-kai tio̍h cháiⁿ-iūⁿ pò-tap Chú ê un ah? Chú kı̀-jiân thiàⁿ chı̀-bı̂-sè ê goá khah iâⁿ tı̄ phó͘-thong-lâng, goá eng-kai tio̍h cháiⁿ-iūⁿ pò-tap Chú ê un ah? Che sı̄ goá it-seng ê toê-ba̍k.
Khó͘ Iú-châi Bo̍k-su lâu sı̂-kan hō͘ goá choè-kang:
Kàu tı̄ Chhit-bí Kàu-hoē, in ū hō͘ goá ki-hoē, tı̄ Khó͘ Iú-châi Bo̍k-su poê-lêng-hoē liáu-āu hō͘ goá choè kiàn-chèng; Goán iā ū koh kàu tı̄ lēng-goā chı̍t ê só͘-chāi choè iá-goā ê pò͘-tō, tı̄ hia goá iā ū choè kiàn-chèng.
Chhit-bí hit ê kàu-hoē sı̄ 48 nı̂ chêng Sèng Sı̂n ka-kı̄ choè-kang ê só͘-chāi. Goán Phı̂ⁿ-ô͘ ê sı̀n-tô͘ lóng chai hit ê kı̂-sū; “ Í-má-loē-lı̄ ” ê Sı̂n cháiⁿ-iūⁿ tı̄ hia khai-thok hiah ê kàu-hoē. In chāi-toē ê lâng iā siông-siông thê-khí chit ê sū lâi kó͘-lē āu-tāi chiah ê sı̀n-tô͘. Só͘-í goá khı̀ ê sı̂ goá ū kám-kak in thiàⁿ Chú ê sim sı̄ ke̍k-kı̂ hong-sēng ê.
Kàu tı̄ àm-sı̂, in hia sı̄ bô tiān-hé. Eng-kai goá sı̄ pí jı̄m-hô lâng khah hong-piān, chóng-sı̄ in tùi goá ê khoan-sim sı̄ pí goá tùi in ê só͘ choè khah choē. Tı̀-kàu goá siông-siông teh siūⁿ; tàu-tí sı̄ beh khı̀ thoân hok-im hō͘ lâng, á-sı̄ beh khı̀ hō͘ lâng bô-êng, khoán-thāi goá nih?
Ǹg-bāng Chú kian-kiông goá, hō͘ goá ê thiàⁿ oē iâⁿ-kè pa̍t lâng tùi goá ê thiàⁿ.
Í-siōng sı̄ khı̀ Chhit-bí, lı̄ Má-keng choè hn̄g ê só͘-chāi, só͘ tit-tio̍h ê kiàn-chèng.
Khı̀ Bōng-oaⁿ choè-kang:
Goá koh teh koan-sim ê tó-sū ū Bōng-oaⁿ tó ( Bōng-an ). Hia ū nn̄g keng kàu-hoē, Hoe-the̍h kap Chiong-kun. Tı̄ hia sui-jiân ū sian-siⁿ teh bo̍k-hoē, chóng-sı̄ hit ê só͘-chāi sı̄ tùi Má-keng chē chûn nn̄g tiám cheng ê só͘-chāi, só͘-í tı̄ liân-lo̍k siōng, kū-lı̄ siōng siông-siông siū lâng boē kı̀-tit ê só͘-chāi.
Goá chin ài kàu hit ê só͘-chāi choè kiàn-chèng. Goá chiū tı̄ kı̂-tó ê tiong-kan ǹg-bāng Chú khui lō͘. Kó-jiân ū ki-hoē kàu lah. Hia ê thoân-tō sian-siⁿ pún-sin thiaⁿ tio̍h goá chhut-khı̀ ta̍k-ūi teh kiàn-chèng, iā i pún-sin iā ū thiaⁿ tio̍h goá ê kiàn-chèng, i chiū ài goá kàu in ê só͘-chāi tùi hia ê lâng choè kiàn-chèng. I chiū tùi goá ê lāu-pē kau-sia̍p. M̄-kú goá ê lāu-pē bô bêng-bêng tah-èng. Chhin-chhiūⁿ beh, chhin-chhiūⁿ m̄-khéng.
Kàu tı̄ hit tong-jı̍t goá chiū kap Tân Sian-siⁿ chhut-hoat, bô koh chı̍t pái tit-tio̍h goá ê lāu-pē ê ún-chún chiū khı̀. Hit jı̍t tı̄ chûn lāi goá lóng bô gū-tio̍h sím-mı̍h. Goá kı̀-jiân khı̀ kàu Chhit-bí, chē 4 tiám cheng ê chûn, sı̄m-chı̀ boē hı̂n-chûn; hô hòng nn̄g tiám cheng ê Bāng-oaⁿ, goá sim lóng bô khoà-lū. Hit sı̂ só͘ chē ê sı̄ 20 bé ê hı̂-chûn, sı̄ lı̂m-sı̂ pài-thok hō͘ goán tah ê. Taⁿ tùi chit hoê ê keng-giām hō͘ goá koh-khah ū chū-sı̀n; goá nā beh tı̄ goán Phı̂ⁿ-ô͘ ê lı̄-tó hia, chia, choè Chú ê kang ê sı̂, nā tio̍h chē chûn, goá lóng boē hı̂n chiah tio̍h. Che sı̄ Chú hō͘ goá ê un-sù ê chı̍t hāng. Goá siong-sı̀n sı̄ án-ni.
Chú ê un-sù kok lâng bô-tâng:
Tı̄ chia goá siūⁿ khí í-chêng tùi Chhit-bí beh tńg-lâi ê sı̂ ê chı̍t ê kò͘-sū: Ū chı̍t ê thiàⁿ Chú ê chheng-liân-lâng tùi goá kóng, Lí nā hı̂n ê sı̂ chiah chhē goá. I sı̄ Chhit-bí ê chāi-tē-lâng, iā hit jı̍t beh tńg-lâi ê sı̂ hong chin toā. Hit jı̍t ê hong sı̄ kā goán koaiⁿ tı̄ Chhit-bí 1, 2 jı̍t ê hong. Goán beh tńg lâi ê sı̂ hong sui-jiân iáu chin toā, m̄-kú goán kok lâng lóng ū to͘-ha̍p, te̍k-pia̍t Khó͘ Bo̍k-su koh-khah sı̄ ū to͘-ha̍p; I kap Tâi-oân ê kàu-hoē só͘ tēng ê jı̍t-thêng-pió sı̄ cha̍t-cha̍t ê. Só͘-í chiah kiông-kiông siat-hoat khui chûn. Taⁿ kiat-kó cháiⁿ-iūⁿ nih? Hit ê chheng-liân bô kú chiū hı̂n-chûn. Goá hoán-tńg lóng bô sím-mı̍h. Che m̄-sı̄ goá ê pún-sū. Goá siong-sı̀n sı̄ Chú pó-siú goá, hō͘ goá khah iâⁿ chiah ê. In-ūi lūn kàu goá ê sin-thé, goá bô pí pa̍t lâng khah ióng-kiāⁿ, koh goá ê kang-chok siōng, goá ū khah sit-bı̂n; chiàu eng-kai tı̄ chit khoán ê chōng-thài ê ē-bı̄n sı̄ pí pa̍t-lâng khah oē hı̂n-chûn chiah tio̍h. Kám-siā Chú, I hō͘ goá chı̍t pái koh chı̍t pái lóng bô gū-tio̍h boē kham-tit ê sū.
Tı̄ hia iā ū thiàⁿ Chú ê chheng-liân:
Chit hoê goá khı̀ ê só͘-chāi sı̄ Hoe-the̍h. Tân Sian-siⁿ sı̄ chū-chāi tı̄ Hoe-the̍h ê kàu-hoē, soà kiam Chiong-kun ê pò͘-tō-só͘. Goá khı̀ Chiong-kun ê sı̂ ū hō͘ chı̍t ūi thiàⁿ Chú ê chheng-liân āiⁿ chiūⁿ phiâⁿ.
Chit ê chheng-liân khó-sioh tı̄ bô kú í-chêng koaⁿ tēng kè-sin. I hiān-chāi kap Chú tâng khiā-khí chin khoài-lo̍k chiah tio̍h. Chú soah i ê kan-khó͘, tùi hit ê ko͘-tó bô lâng kiâⁿ kàu ê só͘-chāi tiàu tńg khı̀ Pē ê só͘-chāi lah. Chit ê chheng-liân chin jia̍t-sim, iā gâu thiàⁿ Chú, thiàⁿ lâng. Tı̄ chit khoán lı̄-tó, iáu ū chit khoán súi ê sı̀n-gióng ê chheng-liân-lâng chhut, che bêng-bêng sı̄ Sèng Sı̂n ka-kı̄ teh choè-kang ê iân-kò͘. Nā-sı̄ Sèng Sı̂n chhin-chū choè-kang, bô lūn tı̄ thiⁿ-piⁿ hái-kak; bô-lūn sı̄ tı̄ thoân-kàu-chiá khah bô beh khı̀ ê só͘-chāi, in thiàⁿ Chú ê sim lóng sio-siâng. Khak-sı̍t m̄-sı̄ lâng teh gâu, m̄-sı̄ lâng teh thoân tō-lí ê; sı̄ Chú ê Sı̂n pún-sin teh choè-kang. Goān Chú an-ùi i ê ûi-cho̍k.
Koh hō͘ hong koaiⁿ-tiâu--lah:
Tńg-lâi tı̄ Hoe-the̍h, tı̄ hia àn-sǹg 2, 3 jı̍t beh kap in seng-oa̍h, chóng-sı̄ ” Thian put chiông jı̂n-goān,” goá tı̄ hia hō͘ hong koaiⁿ 8, 9 jı̍t. Che tı̄ goán Phı̂ⁿ-ô͘ sı̄ phó͘-thong ê sū, tông-sı̂ iā sı̄ goán Phı̂ⁿ-ô͘ lâng beh khı̀ lı̄-tó ê sı̂ eng-kai tio̍h khó-lū chāi-lāi ê sū. Chóng-sı̄ goá chit hoê beh lâi Hoe-the̍h ê sı̂, goá bô chiong chit khoán sū khǹg tı̄ kı̂-tó ê lāi-bı̄n. Só͘-í kàu tı̄ siū hong koaiⁿ tı̄ Hoe-the̍h ê sı̂; goá chı̍t-bı̄n kám-siā Siōng-tè, I ài goá tı̄ chia khah choē jı̍t thang lí-kái in, oē thang kap in chhin-bo̍k, iû-hı̀, saⁿ thit-thô, ia̍h-sı̄ choè choē-choē hoê ka-têng lé-pài; lēng-goā chı̍t-bı̄n goá chin khoà-lū chhù-nih ê lāu-pē lāu-bú m̄-chai cháiⁿ-iūⁿ teh hoân-ló, cháiⁿ-iūⁿ teh siū-khı̀. Chit 9 jı̍t sı̄ tı̄ chin mâu-tún ê sim-chêng ê ē-bı̄n keng-kè.
Goá tio̍h cháiⁿ-iūⁿ kı̂-tó:
Iâ-so͘ ài lán nā beh tè I chiū tio̍h pàng-sak it-chhè, m̄-thang thiàⁿ pē-bú, hiaⁿ-tı̄, á-sı̄ kiáⁿ-jı̂ khah iâⁿ-kè Iâ-so͘, sı̄ goá ê pē-bú thiàⁿ goá khah iâⁿ-kè thiàⁿ Iâ-so͘. Goá pún-sin nih? Tio̍h cháiⁿ-iūⁿ chhú-lí chit ê būn-toê ah? Chiong chit khoán sū the̍h chhut-lâi choè būn-toê teh siūⁿ pún-sin í-keng sı̄ thiàⁿ pē-bú iâⁿ-kè mah?
Goá tı̄ 9 jı̍t āu tńg-khı̀ ê sı̂ pē-bú chin siū-khı̀ goá, che sı̄ bián kóng ê.
Koh khı̀ Bāng-oaⁿ:
Kám-siā Chú, I koh hō͘ goá chı̍t pái koh chı̍t pái khı̀ Bāng-oaⁿ ê só͘-chāi. Tē jı̄ pái sı̄ Chiong-kun ê kàu-hoē ê hiàn-tn̂g-sek. Tē saⁿ pái goá ū kap chı̍t ūi tâng-phoāⁿ, sı̄ kap goá sio-siāng ba̍k-chiu bô chū-iû ê pêng-iú saⁿ-kap choè-hoé khı̀. Chit ê pêng-iú sı̄ choè-kūn ū khah bêng-pe̍k tō-lí, i chiah ài kap goá tâng-kang, ūi Chú choè kiàn-chèng. Goán choè-hoé kú-kú, goá iā thoân tō-lí hō͘ i kú-kú, chóng-sı̄ tı̄ choè-kūn chiah khah bêng-pe̍k tō-lí. Kám-siā Chú.
Sèng Sı̂n choè-kang ê kàu-hoē---Chiong-kun.
Goá tı̄ Chiong-kun Kàu-hoē, tı̄ lé-pài-jı̍t káng-tō ê sı̂, ū chı̍t ūi teh tha̍k i-ha̍k ê chheng-liân chin kám-tōng. Jiân-āu i thê-gı̄ goá tio̍h chiong kiàn-chèng ı̀n choè chı̍t pún chheh lâi hō͘ pa̍t-lâng tha̍k. Che tú-tú sı̄ goá í-keng ū ê sim-goán. Goá tı̄ hit-sı̂ tùi i ê oē chiū koat-ı̀ beh chhut goá ê kiàn-chèng-chı̍p, ēng án-ni lâi êng-iāu Chú ê miâ; hō͘ khah choē lâng oē thang siàu-liām Chú ê un. Goá pún-sin sı̄ chı̍t ê hêng-tōng bô chū-iû ê lâng, nā khò bûn-jı̄, khò bûn-chiuⁿ oē thang kià kàu choē-choē só͘-chāi thang lâi thoè goá ê kiàn-chèng, che koh-khah ū lı̄-ek chiah tio̍h. Í-āu goá chin chek-ke̍k choè chit ê kang lah. Ka-chài Chú iā tı̄ chit hong-bı̄n thoè goá pı̄-pān hō͘ goá bô khiàm-kheh. Hit ê chheng-liân ū tah-èng goá beh siat-hoat chhut-pán ê sū. Iā goán ê bo̍k-su iā ū tah-èng goá, beh thoè goá siá Pe̍h-oē-jı̄ ê sū. Iā Tiong-bûn hong-bı̄n iā ū chı̍t ūi lâi goán Phı̂ⁿ-ô͘ choè peng ê Sı̂n-ha̍k-seng beh kā goá pang-bâng. In-ūi goá phó͘-thong lóng sı̄ ēng tiám-jı̄ teh siá, nā bô in pang-bâng goá, goá chiū m̄-chai beh cháiⁿ-iūⁿ chhut-pán chheh. Kám-siā Chú.
