Lâm-iûⁿ ê chí-bē só͘ koan-sim ê kàu-hoē---Hó͘-chíⁿ.
Koh chı̍t ê tó-sū, sı̄ goán Má-keng Kàu-hoē ê lâng chin koan-sim ê, miâ choè Hó͘-chíⁿ. Goá iā sı̄ sio̍k tı̄ Má-keng Kàu-hoē, chū-jiân goá iā siông-siông thiaⁿ-tio̍h hia ê siau-sit; bô-lūn hia ê kàu-hoē ê siau-sit, á-sı̄ tı̄ hit toē-hng Mô͘-kúi choè kang ê sū, goán lóng siông-siông thiaⁿ-tio̍h. Hit ê só͘-chāi sı̄ tùi Má-keng chē chûn 40 hun ê só͘-chāi, goá kúi-nā piàn kap goán Má-keng ê tiúⁿ-ló, Lâu Gím-hó Tiúⁿ-ló khı̀ hia. Lâu Tiúⁿ-ló sı̄ chı̍t ê chin jia̍t-sim ê tiúⁿ-ló, i thiàⁿ Chú, iā thiàⁿ lóng-chóng ê kan-khó͘ lâng; i nā thiaⁿ-tio̍h sím-mı̍h lâng tı̄ sím-mı̍h só͘-chāi ū sím-mı̍h kan-khó͘ ê sū, i chiū má-siōng kiâⁿ-kàu. I iā siông-siông chio goá kap i tàu-tı̄n khı̀. Chin chū-jiân goá iā kap i khı̀ Hó͘-chíⁿ kúi-nā hoê. Hó͘-chíⁿ ê lé-pài-tn̂g sı̄ chı̍t ê Lâm-iûⁿ ê Hoâ-kiâu Khó͘ chí-bē hōng-hiàn lâi khí ê, chóng-sı̄ chin-chió ū thoân-kàu-chiá chū-chāi tı̄ hia.
Cháiⁿ-iūⁿ gín-ná beh tè goán āu-bı̄n?
Goá khı̀ chin-choē piàn ê Hó͘-chíⁿ ê tiong-kan, goá oē kı̀-tit thâu chı̍t hoê goá ū kap koh chı̍t ê ba̍k-chiu bô chū-iû ê Ông Tiong-hàu Kun choè-hoé khı̀. Bô phah-sǹg chı̍t khı̀ chiū hō͘ hong koaiⁿ chı̍t lé-pài kú. Hit ê só͘-chāi bô tiān-hé, bô chúi-tō, m̄-kú tùi goán lâi kóng sı̄ boē kám-kak sím-mı̍h; Chú hō͘ goán bô tiān-hé iā oē thang tha̍k-chheh, chin lı̄-piān. Tı̄ hit chı̍t lé-pài kú, goán kap hia ê gín-ná thit-thô, chhiùⁿ-koa, iā kóng kò͘-sū hō͘ in thiaⁿ. Ū chı̍t hāng sū thang kám-siā Chú ê, chiū-sı̄ goá lóng m̄-bián khı̀ chio-ho͘ gín-ná, gín-ná chin chū-jiân oē kun-tè goá. Cháiⁿ-iūⁿ nih? In-ūi in khoàⁿ-tio̍h goán ba̍k-chiu bô khoàⁿ-tio̍h chin hi-kı̂, ài lâi khoàⁿ goán, ài lâi tè goán. Goán chiū lı̄-iōng hit ê ki-hoē kap in kau-poê, kóng tō-lí hō͘ in thiaⁿ. Lán lóng chai, gín-ná in teh chū-chı̍p tè goán chit khoán lâng ê āu-bı̄n, pún sı̄ hò͘ⁿ-kı̂, chóng-sı̄ kàu tı̄ choè-āu in nā khoàⁿ-kı̀ⁿ oē khi-hū, oē chiau-that--tit, in chiū án-ni khı̀ choè. Chóng-sı̄ tùi goán lâi kóng, goán ê lāi-bı̄n ū Chú ê sı̂n kap goán saⁿ-kap tı̄-teh, só͘-í in lóng boē lâi chiau-that goán. Hoán-tńg oē lâi tè goán thiaⁿ Chú ê tō-lí. Che chiàⁿ-chiàⁿ m̄-sı̄ goán ê pún-sū; sı̄ Chú ê sı̂n tı̄ goán lāi-bı̄n, chiah ū án-ni ê pan-gı̂. Lán thang o-ló ê sı̄ chı̀-koân chı̀-gı̄ ê Siōng-tè.
Hiám-hiám poa̍h-lo̍h hái:
Kı̀-tit ū chı̍t pái, tı̄ Sèng-tàn-choeh ê sı̂ beh khı̀ Hó͘-chíⁿ, goá kap Tiong-hàu Kun gū-tio̍h gûi-hiám ê sū. Boē-bián-tit goá ê pē-bú bô ài hō͘ goá chit khoán bô chū-iû ê lâng chhut-khı̀; sı̍t-chāi tı̄ tó-ūi ū gûi-hiám ê sū teh tán goán lóng m̄-chai.
Sū-chêng sı̄ án-ni. Má-keng Kàu-hoē nā gū-tio̍h toā ê choeh-kı̂, lóng ū chhut-khı̀ pang-chān hiuⁿ-ē ê kàu-hoē. Che chhin-chhiūⁿ chiâⁿ-choè Má-keng Kàu-hoē ê hêng-sū chi-it. Iā hiuⁿ-ē ê kàu-hoē nā ū kiat-hun ia̍h-sı̄ chòng-sek, Má-keng Kàu-hoē iā lóng khı̀ pang-bâng in; kap in tàu nāu-jia̍t, tàu pang-bâng. In-ūi Má-keng í-goā ê kàu-hoē lóng sı̄ chin soè chin soè ê; nā bô Má-keng khı̀ tàu nāu-jia̍t, kiaⁿ-liáu sè-sio̍k lâng oē khoàⁿ bô khí lán ê kàu-hoē, kiaⁿ-liáu Chú ê miâ siū jio̍k.
Hit hoê ê Sèng-tàn-choeh, goán ê tiúⁿ-ló in ū thê-chêng chı̍t jı̍t khı̀; goán sı̄ tè-āu hit tong-jı̍t chiah khı̀ ê. Goán nn̄g lâng ka-kı̄ kiâⁿ kàu beh chē chûn ê só͘-chāi; hit jı̍t sı̄ lo̍h-hō͘ thiⁿ, chē chûn ê lâng chió-chió; goán bô mn̄g pa̍t-lâng, ka-kı̄ chiū beh khı̀ chē chûn. Hut-jiân-kan nn̄g lâng chiū poa̍h-poa̍h lo̍h-khı̀ lâu-thui chàn-á. Ka-chài, koh chha chı̍t sut-á tio̍h lo̍h-khı̀ hái-nih. Nā-sı̄ nn̄g lâng lóng poa̍h-lo̍h-khı̀, hit-sı̂ ê chêng-hêng m̄-sı̄ án-ni. Che sı̄ Chú teh pó-hō͘ goán, ài goán ūi-tio̍h I choè kang ê sı̂ bô gū-tio̍h sím-mı̍h gûi-hiám ê sū, bián-tit I ê miâ siū jio̍k. Thoân hok-im ê sı̂, Mô͘-kúi iā beh chó͘-tòng, iā beh hām-hāi thiàⁿ I ê lâng, che lán lóng chai-iáⁿ. Chí-ū lán tio̍h khò Chú ê miâ iâⁿ-kè chiah ê it-chhè, thang êng-iāu kui hō͘ Chú.
(Thoân tō-lí ê sı̂ gū-tio̍h gûi-hiám kap siū pek-hāi sı̄ nn̄g hāng sū. Lán tio̍h chı̄n-liōng pı̄-bián, ū-hông thâu-chêng ê sū ).
Tek-chióng phê-hu-pı̄ⁿ khó-lı̂n ê lâng:
Kiat-poè chit ê só͘-chāi sı̄ tı̄ goán Phı̂ⁿ-ô͘ choè siū Chú thiàⁿ ê tó-sū. Hia ū I-liâu-thoân, tit-tio̍h Hok-lı̄-hoē ê pang-chān, keng-siông tùi Pe̍h-soa-tó ū i-seng teh khı̀ in hia. Iā sūn ki-hoē Pe̍h-soa ê thoân-kàu-chiá khı̀ thoân tō-lí hō͘ in thiaⁿ. In ū Te̍k-chióng phê-hu-pı̄ⁿ ê i-seng teh khoàⁿ-kò͘ in, teh koan-sim in. Chú ê thiàⁿ m̄-sı̄ kan-ta án-ni; Hok-lı̄-hoē ū tı̄ hit só͘-chāi kiàn-siat má-thâu, iā khí chı̍t keng chū-hoē-só͘ hō͘ in, hō͘ in thang tı̄ hia chiap-siū i-liâu, koh tit-tio̍h hok-im. Hok-lı̄-hoē koh ū chhiáⁿ chı̍t ūi pó-bó, ūi-tio̍h hit ê toē-hng ê gín-ná siat thok-jı̂-só͘. Tùi án-ni hia ê tó-bı̂n iā chin ài chiū-kūn Chú, ài thiaⁿ Chú ê hok-im. Lán ê soan-tō-hoē chiū phài chı̍t ūi choan-jı̄m ê thoân-kàu-chiá tı̄ hit ê só͘-chāi. Che sı̄ choè-kūn ê sū.
Taⁿ chhin-chhiūⁿ hit khoán só͘-chāi goá chin ài khı̀, ài tı̄ hia kóng-khí Chú ê thiàⁿ. Khó-sioh, ki-hoē sui-jiân ū kàu, hō͘ goán oē tàng khı̀ kàu hit ê só͘-chāi, chóng-sı̄ hit jı̍t sı̄ hit keng chū-hoē-só͘ ê hiàn-tn̂g-sek, só͘-í bô sı̂-kan thang hō͘ goá choè kiàn-chèng. Chit ê sū chhim-chhim iáu tı̄ goá ê sim-lāi, goá tı̄ kı̂-tó ê tiong-kan ài Chú thoè goá siat-hoat, hō͘ goá ū pa̍t ê ki-hoē thang choân-kang tı̄ hia choè kiàn-chèng. Ǹg-bāng Chú khui-lō͘, hō͘ goá oē thang kap hia ê lâng o-ló Chú ê thiàⁿ-thàng.
Kau-thong sui-jiân put-piān, Chú ka-kı̄ choè-kang:
Kiat-poè sı̄ tio̍h tùi Má-keng chē chhia 40 hun, kàu Chhiah-khàm koh chē chûn 45-50 hun chiah oē kàu ūi. Kau-thong bô lı̄-piān ê goân-in sı̄ chāi tı̄ beh khı̀ Kiat-poè ê chûn-pang bô tiāⁿ-tio̍h. Chiū-sı̄ bô tēng-kı̂ ê kau-thong chûn ê koan-hē. Nā m̄-sı̄ tiau-kang chhiàⁿ chûn, chiū tio̍h tiau-kang thok choē-choē lâng liân-lo̍k, chiah oē ta̍t-tio̍h bo̍k-tek. Tong-jiân nā toà tı̄ Chhiah-khàm ê lâng sı̄ sûi-sı̂ chai sím-mı̍h chûn beh khı̀, chóng-sı̄ nā tı̄ Má-keng, būn-toê chiū bô sio-siāng lah.
Koh chı̍t hāng goán Phı̂ⁿ-ô͘ ê put-piān ê só͘-chāi, chiū-sı̄ lí nā khoàⁿ “ hó-thiⁿ ” lí beh khı̀ lı̄-tó, lı̄-tó ê lâng iā khoàⁿ sı̄ “ hó-thiⁿ ”, in beh khı̀ lia̍h hı̂ chhut hái. Che chin éng-hióng chū-hoē. Chí-ū thang kám-siā Chú ê chiū-sı̄ tı̄ chit khoán lı̄-tó Chú ê thiàⁿ ná toā tı̄ in ê tiong-kan. Che sı̄ hō͘ lán thang tit-tio̍h an-ùi ê.
Jú kūn to͘-chhı̄, jú kò͘ sè-kan:
Goá ū koh khı̀ chı̍t ê tó-sū, Sai-sū tó. I tùi Má-keng chē 3, 40 hun ê chûn ê só͘-chāi. Sai-sū tó sı̄ chı̍t ê chin toā ê tó-sū, i kap Pe̍h-soa tó kap Má-keng pún-tó saⁿ chiap-kūn. Jı̂n-kháu iā chin-choē, chhut-sin ê jı̂n-bu̍t iā boē chió; choē-choē lóng lâi tı̄ Má-keng teh choè sū-gia̍p. Chóng-sı̄ hia ê kàu-hoē chin soè keng. In hia ê lâng lâi-lâi khı̀-khı̀ tı̄ Má-keng chin bô-êng, chin gâu choè seng-lí, gâu kò͘ sè-kan ê sū lah.
Goá ū khı̀ nn̄g piàn. Kı̂-tiong chı̍t piàn pài-thok chı̍t ê lâi Phı̂ⁿ-ô͘ choè peng ê Sı̂n-ha̍k-seng chhoā goá khı̀. Goá hit jı̍t ê toê-ba̍k sı̄ “ Siōng-tè thiàⁿ sè-kan lâng " ( Iok-hān 3 : 16 ). Kóng, Chú cháiⁿ-iūⁿ thiàⁿ lán, lán iā án-ni tio̍h thiàⁿ I, tio̍h pò-tap Chú ê un-tián.
Hit jı̍t kap Un-tián Kun beh tńg-lâi ê sı̂, in-ūi sı̂-kan siuⁿ kè-thâu, tı̀-kàu boē hù kau-thong-chhia; sı̄ in-ūi in chin hó-ı̀ lâu goán tı̄ hia chia̍h tiong-tàu, iā tı̄ hia kóng choē-choē Sai-sū ê sū, kap tâm-lūn kàu-hoē ê sū.
Sai-sū ê kau-thong:
Sai-sū tó ê kau-thong-chhia sı̄ chin chió. Ū nn̄g tâi kū-kū ê chhia, í-goā ū 2, 3 tâi saⁿ-lián-á chhia; nā chē bô tio̍h chiū tio̍h ēng kiâⁿ-lō͘ ê lah. Siūⁿ khí goán Má-keng 2, 3 nı̂ chêng hiàn-tn̂g-sek ê sı̂, ū Tâi-pak lâi ê lâng-kheh khı̀ chē tio̍h goán Sai-sū ê chhia kiaⁿ chı̍t tiô; in-ūi in Tâi-pak ê chhia, thiaⁿ kóng sı̄ toā koh sin koh chheng-khı̀-siùⁿ; in ê lō͘, thiaⁿ kóng khoah koh pı̂ⁿ, in teh chē chhia sı̄ lâng teh chē, goán sı̄ “hêng-lí” teh chē chhia, lâng sı̄ “kah” hêng-lí lâi teh chē chhia ê. Goán tong-jiân koàn-sı̀ koàn-sı̀ lah.
Taⁿ goá hit-sı̂ kap Un2-tián Kun chiū poàⁿ kiâⁿ poàⁿ cháu khı̀ tō͘-chûn-tiûⁿ lah. Ū 3, 40 hun ê lō͘-chām.
Chhiⁿ-mı̂-lâng teh cháu:
Chhiáⁿ lín sióng-siōng khoàⁿ-māi leh, chı̍t ê ba̍k-kng--ê chhoā chı̍t ê chhiⁿ-mı̂--ê toā-pō͘ soè-pō͘ ê kong-kéng. Ka-chài hiuⁿ-ē ê lō͘ bô lâng teh kiâⁿ, iā bô chhia teh kè. Kàu tı̄ lı̄-khui chûn iáu chin hn̄g ê sı̂, chûn í-keng pàng soh khui-chûn lah. Goá tong-jiân bô khoàⁿ-kı̀ⁿ hn̄g-hn̄g ê chûn teh pàng soh, chí-ū sı̀n-khò“goá ê chhiú só͘ khan” ê lâng ê oē-gú, goá chiū piàⁿ-miā kap i cháu. Che chiū-sı̄ kun-kù Hi-pek-lâi Jı̂n-su 11:1 chat só͘ kóng:
Sı̀n chiū-sı̄ só͘ ǹg-bāng ê sū-sı̍t, kap boē khoàⁿ-kı̀ⁿ ê sū ê pı̂n-chún.
Kám-siā Chú, Chú ê thiàⁿ kám-tōng sái chûn ê lâng, hō͘ in tán goán kú-kú chiah khui chûn; pún-lâi chē hù, sı̄ bô chē bô hù ê lâng ka-kı̄ ê būn-toê, ka-kı̄ ê sū. Chóng-sı̄ kám-siā Chú, hō͘ goán Phı̂ⁿ-ô͘ ê só͘-chāi, iáu pó-chhı̂ chit khoán súi ê koan-hē, tı̄ lâng kap lâng ê tiong-kan. Lín tı̄ Tâi-oân ai-kiû hé-chhia kā lí tán, hé-chhia iā goân-goân boē thêng. Goán sái chûn ê lâng i tùi hn̄g-hn̄g ê só͘-chāi chiū toā siaⁿ teh kiò goán, teh ia̍t goán. Che chiū-sı̄ “Thiàⁿ iâⁿ-kè lu̍t-hoat” lah.
Cháu it-téng:
Goá cháu kàu-tè, kha lóng khiā boē-tiâu, tı̍t-tı̍t beh un lo̍k-khı̀, chóng-sı̄ Chú tı̄ goán cháu chin kín ê sı̂ lóng bô hō͘ goá tú-tio̍h boē kham-tit ê sū. Chit hoê sı̄ goá it-seng-gâi cháu siāng-kín ê chı̍t hoê. ( Thiaⁿ kóng, 100 bí 20 bió, phah-phoà chhiⁿ-mı̂-lâng ê sè-kài kı̀-lio̍k ). Che sı̄ chhiò-tâm. Chóng-sı̄ cháu chin kín sı̄ bô m̄-tio̍h.
Í-goā goá iáu ū khı̀ choē-choē só͘-chāi, lóng sı̄ tı̄ Má-keng pún-tó kap Pe̍h-soa tó ê kàu-hoē. Kám-siā Chú, goán Phı̂ⁿ-ô͘ ê thoân-kàu-chiá bô hiâm goán ê pi-bı̂, iông-ún goá tı̄ in ê só͘-chāi choè kiàn-chèng, che sı̄ Chú thoè goá khui-lō͘, hō͘ goá ū khah choē ê ki-hoē.
IV . Siōng-tè Ê Thiàⁿ .
Pē-bú ê thiàⁿ-thàng kóng sı̄ sè-kài choè úi-tāi ê thiàⁿ, pē-bú ê kong-lô iā sı̄ choè úi-tāi. Tng lāu-bú beh siⁿ lán chhut-sı̀ ê sı̂, só͘ siū ê kan-khó͘ chin toā, kàu siⁿ lán chhut-lâi liáu-āu, pē-bú iáu koh ēng chin-choē sim-sı̂n poê-iúⁿ lán. Tng lán hoaⁿ-hí ê sı̂ pē-bú iā kap lán hoaⁿ-hí; tng lán kan-khó͘, phoà-pı̄ⁿ, lâu ba̍k-sái ê sı̂, pē-bú iā tè lán pi-siong lâu ba̍k-sái.
Pē-bú ê thiàⁿ:
Goá kı̀-tit goá soè-hàn ê sı̂, sı̄ choè pháiⁿ iúⁿ-chhı̄ ê; choē-choē pı̄ⁿ-thiàⁿ, choē-choē kan-khó͘, pē-bú lóng siông-siông ūi-tio̍h goá koan-sim. Kàu goá toā-hàn tit-tio̍h tō-lí liáu-āu, lóng siông-siông siūⁿ m̄-chai beh jû-hô pò-tap pē-bú ê un-hūi; goá lóng siông-siông siūⁿ beh pò-tap, tān-sı̄ lóng boē-oē. Chí-ū chı̄n Chú só͘ hō͘ goá ê le̍k-liōng lâi choè. Goá chí-ū ǹg-bāng Chú chiok-hok goá ê pē-bú.
Hiān-chāi sè-kài siōng iáu ū choē-choē lâng, in m̄-nā boē-oē siūⁿ beh pò-tap pē-bú ê un-hūi; hoán-tńg kóng pē-bú bô thiàⁿ in; sı̄m-chı̀ iáu ū lâng siông-siông choè pē-bú só͘ bô hoaⁿ-hí ê sū lâi poē-ge̍k pē-bú; sı̄m-chı̀ iáu ū lâng siông-siông phah-mē pē-bú, khó͘-chhó͘ pē-bú, boē-oē hàu-kèng pē-bú. Chiah ê choē sı̄ kèng-ka toā ê. Ū chı̍t koá lâng jı̄m-ûi kóng, hàu-kèng pē-bú sı̄ ēng mı̍h-kiāⁿ hō͘ pē-bú chia̍h, kı̂-sı̍t iú-hàu pē-bú m̄-sı̄ chí-ū ēng mı̍h-kiāⁿ hō͘ i chia̍h chiah sı̄ iú-hàu; nā chí-ū ēng mı̍h-kiāⁿ hō͘ i chia̍h, iā bô thiaⁿ-thàn i ê kà-sı̄ iā m̄-sı̄ sǹg choè iú-hàu. Iú-hàu sui-jiân ēng mı̍h-kiāⁿ hō͘ pē-bú chia̍h, iáu tio̍h tı̄ choè sū, tı̄ hêng-ûi kap chióng-chióng hong-bı̄n hō͘ i hoaⁿ-hí; iā chhian-bān m̄-thang phah-mē pē-bú, m̄-thang khó͘-chhó͘ pē-bú, iā m̄-thang tı̄ chióng-chióng hong-bı̄n hō͘ i iu-būn; tio̍h chı̄n lí ê le̍k-liōng hō͘ pē-bú hoaⁿ-hí kap boán-chiok. Tng lán hiān-chāi iáu ū ki-hoē ê sı̂, nā bô chı̄n-la̍t hàu-kèng pē-bú, pò-tap i ê un-hūi, kiaⁿ-liáu í-āu lán put-hàu pē-bú ê choē tı̄ sím-phoàⁿ kàu ê sı̂ tam-tng boē khí. Tng lán ài sè-kan ê mı̍h-kiāⁿ, oē thang ēng chı̂ⁿ khı̀ boé, tng pē-bú iáu ióng-chòng ê sı̂, lán nā bô chı̄n-la̍t iú-hàu i, kiaⁿ-liáu pē-bú sí liáu lán chiah siūⁿ beh iú-hàu í-keng bô ki-hoē lah; sı̄m-chı̀ ēng chı̂ⁿ iā boē thang khı̀ boé chı̍t ê chhin-siⁿ lán ê pē-bú. Sèng-keng kóng, “Tio̍h hàu-kèng lí ê lāu-pē, lí ê lāu-bú, hō͘ lí ê jı̍t-chí tı̄ Iâ-hô-hoa lí ê Siōng-tè só͘ siúⁿ-sù lí ê toē tit-tio̍h kú-tn̂g” ( Chhut Ai-kı̍p-kı̀ 20 : 12 ).
Siōng-tè ê thiàⁿ koh khah toā:
Sui-jiân pē-bú ê thiàⁿ úi-tāi, tān-sı̄ iáu ū chı̍t ūi thiàⁿ pí pē-bú khah toā ê, chiū-sı̄ chin Sı̂n Siōng-tè. I ê thiàⁿ iâⁿ-kè pē-bú ê thiàⁿ chin-choē. Pē-bú sui-jiân sı̄ thiàⁿ lán, tān-sı̄ in ê thiàⁿ ū sı̂ iáu sı̄ bô kong-pı̂ⁿ ê; ū ê pē-bú thiàⁿ toā-kiáⁿ, ū ê khah thiàⁿ soè-kiáⁿ; chân-hoè ê, ū ê pē-bú chiū khah khoàⁿ-khin i.
Nā-sı̄ Siōng-tè ê thiàⁿ m̄-sı̄ chhin-chhiūⁿ án-ni. Siōng-tè ê thiàⁿ sı̄ oân-choân kong-gı̄ ê thiàⁿ; bô-lūn sı̄ hó-gia̍h á-sı̄ sòng-hiong, ū tē-ūi á-sı̄ bô tē-ūi, ba̍k-chiu bô khoàⁿ-kı̀ⁿ ê lâng, phoà-pı̄ⁿ ê, chân-hoè ê, toā-lâng, gín-ná, lâm-hū ló-iù, Siōng-tè iā pı̂ⁿ-pı̂ⁿ lóng sı̄ thiàⁿ in. Hiah ê ū sı̀n Chú, bô sı̀n Chú ê lâng, kiâⁿ-hó, kiâⁿ pháiⁿ ê, Siōng-tè iû-goân thiàⁿ in; múi-jı̍t iā sı̄ hō͘ in bí-niû, chhài-se, kap jı̍t-kng, khong-khı̀, oa̍h-miā. Siōng-tè ê thiàⁿ ū sím-mı̍h piáu-hiān kap hián-bêng? Ǹg-bāng bô khoàⁿ lán ê choē. Tng lán ê choē chin tāng eng-kai tio̍h sí ê sı̂, Siōng-tè bô chhin-chhiūⁿ koaⁿ-hú, chai-iáⁿ lán ū sím-mı̍h chhò-gō͘ chiū lı̍p-khek kā lán pān-choē. Lán sui-jiân hoān-choē, Siōng-tè iáu lâu hoé-kái ê ki-hoē hō͘ lán; I ǹg-bāng lán ū hoé-kái ê ki-hoē; nā bô hoé-kái, lán sí-āu I chiah sím-phoàⁿ lán. Che chiū-sı̄ thâu chı̍t hāng Siōng-tè thiàⁿ ê piáu-hiān. Tē 2 hāng thiàⁿ ê piáu-hiān, chiū-sı̄ lán ê choē chin tāng eng-kai tio̍h sí ê sı̂, Siōng-tè iû-goân bô pàng-sak lán, kam-goān chiong I ê to̍k-siⁿ Kiáⁿ siúⁿ-sù lán, ūi-tio̍h lán tam-tng choē, siū tèng sí tı̄ sı̍p-jı̄-kè téng, siū it-chhè ê kan-khó͘. Sèng-keng kóng,
In-ūi Siōng-tè chiong to̍k-siⁿ ê Kiáⁿ siúⁿ-sù sè-kan, hō͘ kı̀ⁿ-nā sı̀n I ê lâng boē tı̂m-lûn, oē tit-tio̍h éng-oa̍h. I thiàⁿ sè-kan kàu án-ni ( Iok-hān 3 : 16 ).
Iâ-so͘ ê thiàⁿ:
Siōng-tè chhe Iâ-so͘ lâi sè-kan sı̄ m̄-sı̄ beh kap lán kèng-cheng I ê tē-ūi, á-sı̄ kèng-cheng tı̄ sū-gia̍p nih? Á-sı̄ beh hióng-siū sè-kan ê khoài-lo̍k nih? Tng Iâ-so͘ kàng-seng ê sı̂ Hi-lu̍t ông kóng, I sı̄ beh kap i cheng-chhú ông-ūi beh choè ông, só͘-í Hi-lu̍t ông ēng chin-choē ê kè-bô͘ beh hāi Iâ-so͘. Iâ-so͘ m̄-sı̄ beh kap lán cheng-chhú tē-ūi, ia̍h m̄-sı̄ beh hióng-siū sè-kan ê khoài-lo̍k. I ia̍h m̄-sı̄ beh choè sè-kan ê ông; I ê kàng-seng tē it sı̄ sūn-thàn Siōng-tè ê bēng-lēng; tē jı̄ sı̄ ūi-tio̍h jı̂n-lūi ê choē, I ūi-tio̍h choē-jı̂n ê choē siū khó͘ chin-choē, chin-choē lâng boē-oē kám-siā, iā m̄-sı̀n I sı̄ Siōng-tè ê to̍k-siⁿ Kiáⁿ, sı̄m-chı̀ iáu ū chin-choē lâng kong-kek Iâ-so͘, hām-hāi I, lé-mē I, siông-siông beh ēng chio̍h-thâu tı̀m I.
I kàng-seng lâi kàu sè-kan m̄-nā bô tit-tio̍h khoài-lo̍k, jı̂-chhiáⁿ iā bô tit-tio̍h sím-mı̍h hióng-siū, liân khoà thâu-khak ê só͘-chāi iā bô; hoán-tńg siū pek-hāi choē-choē. Sui-jiân chió-chió lâng oē ūi-tio̍h in ê pêng-iú hi-seng ka-kı̄, chóng-sı̄ ūi-tio̍h gı̄ lâi sòng-sit sı̀ⁿ-miā ê chí-ū Iâ-so͘ chı̍t ê. I kam-goān ūi-tio̍h sè-kan lâng ê choē hi-seng sı̀ⁿ-miā iā bô oàn-thàn, che chiū-sı̄ i thiàⁿ-lâng ê piáu-hiān. Iâ-so͘ sı̄ Siōng-tè ê Kiáⁿ; I siū tèng sí tı̄ sı̍p-jı̄-kè téng, nā m̄-sı̄ kam-sim khéng ūi lâng hi-seng, I goân-pún chiū ū lêng-le̍k thoat-lı̄. Tān-sı̄ I bô án-ni choè, I kam-goān ūi-tio̍h choē-jı̂n ê choē, m̄-kiaⁿ sí; choè-āu tı̄ sı̍p-jı̄-kè téng siū kàu choē-choē tiám-cheng ê thòng-khó͘, jiân-āu tn̄g-khùi sí. I lâu-chhut pó-huih, soé-chheng choē-jı̂n ê choē, kı̀ⁿ-nā sı̀n I ê lâng lóng ū hūn I ê kiù-sio̍k.
Ū chı̍t ê kò͘-sū:
Ū chı̍t ê gín-ná kap hé-chhia ê su-ki chin siong-se̍k. I múi-jı̍t beh khı̀ ha̍k-hāu tha̍k-chheh ê sı̂ lóng tio̍h keng-kè hé-chhia-lō͘. Tng i nā beh keng-kè hé-chhia-lō͘ ê sı̂, nā ū khoàⁿ-kı̀ⁿ hé-chhia tı̄ hn̄g-hn̄g teh lâi, i chiū kap hé-chhia ê su-ki phah chio-ho͘.
Ū chı̍t jı̍t, chit ê gín-ná kiâⁿ kàu hé-chhia-lō͘ ê sı̂, hut-jiân khoàⁿ-kı̀ⁿ hé-chhia lō͘ ê kiô, keng-kè hong chhe, hō͘ ak, nı̂ kú ge̍h chhim, í-keng beh tn̄g-khı̀ lah. I iā khoàⁿ-kı̀ⁿ hn̄g-hn̄g ū chı̍t tâi hé-chhia teh lâi lah. Só͘-í i ê sim chin tio̍h-kip, kiaⁿ-liáu hé-chhia lâi chiū poa̍h-lo̍h kiô-ē. I chiū koáⁿ-kín chiong ka-kı̄ ê saⁿ thiah chı̍t tè pò͘ pa̍k tı̄ tek-á kia̍h koân. Su-put-tı̄ su-ki bô khoàⁿ-kı̀ⁿ ê khoán-sit, hé-chhia í-keng khui kàu gûi-hiám ê só͘-chāi lah. Chı̍t ê gín-ná khoàⁿ-kı̀ⁿ chit khoán ê chêng-hêng chin gông-ngia̍h, m̄-chai beh cháiⁿ-iūⁿ kái-koat. Hit ê gín-ná chí-ū sim chin chhiat, ài kiù i só͘ thiàⁿ ê su-ki, kap hé-chhia lāi ê lâng-kheh; i chiū kè-sio̍k koh kiâⁿ khah kūn lâi ia̍t i ê pò͘. Khó-lı̂n, hit ê gín-ná chiū ūi liáu án-ni hō͘ hé-chhia kheh-sí lah.
Hé-chhia lāi ū lâng ū khoàⁿ-kı̀ⁿ án-ni, chiū thong-ti su-ki thêng hé-chhia. Tng hé-chhia thêng khí-lâi ê sı̂, hé-chhia í-keng kūn-oá tı̄ choè-āu ê chı̍t pō͘ ê só͘-chāi lah. Choē-choē lâng-kheh lo̍h-chhia chai gín-ná sí-khı̀ ê goân-in, sı̄ beh kiù in lóng-chóng ê lâng, chiū choē-choē lâng siū kám-tōng lah.
Chhia-lāi nā ū 900 lâng, án-ni chiū-sı̄ kóng hit ê gín-ná kiù 900 lâng lah. I ê hi-seng hō͘ 900 lâng chiām-sı̂ koh oa̍h kúi-nā nı̂ tı̄ chit sè-kan, chóng-sı̄ chit ê gín-ná iā boē oē kiù hiah ê 900 lâng ê lêng-hûn bián lo̍h tē-ge̍k.
Iâ-so͘ ê hi-seng:
Chú Iâ-so͘ ê kiù-sio̍k m̄-sı̄ chhin-chhiūⁿ hit ê gín-ná nā-tiāⁿ, I ê hi-seng iā m̄-sı̄ chí-ū beh kiù Phı̂ⁿ-ô͘ ê lâng nā-tiāⁿ, iā m̄-sı̄ beh kiù Hàn-bı̂n-cho̍k nā-tiāⁿ. I ê hi-seng sı̄ ūi-tio̍h choân sè-kài ê lâng, múi sı̂-tāi ê lâng. I ê kiù-sio̍k m̄-sı̄ beh hō͘ lâng ióng-kiāⁿ, toā thàn-chı̂ⁿ, á-sı̄ beh hō͘ lâng hó sin-miā nā-tiāⁿ; I ê hi-seng sı̄ beh hō͘ kı̀ⁿ-nā sı̀n I ê lâng ê lêng-hûn boē tı̂m-lûn, oē tit-tio̍h éng-oa̍h.
Só͘-í lán sı̀n Chú ê lâng, choè-toā choè-āu ê ǹg-bāng m̄-sı̄ tı̄ chit sè-kan; in-ūi chit sè-kan ê ǹg-bāng lóng sı̄ chiām-sı̂ ê, chiong-lâi iā sı̄ kui tı̄ khang-khang. Choè-toā ê ǹg-bāng eng-kai khǹg tı̄ chiong-lâi Thian-kok ê hok-khı̀; tı̄ hia bô iu-būn, bô hoân-ló, bô lâu ba̍k-sái, bô pı̄ⁿ-thiàⁿ; tı̄ hia chiah ū éng-oán ê pêng-an kap khoài-lo̍k.
Chin khó-sioh, hiān-chāi ū chin choē lâng in goân-pún chiū chai-iáⁿ ū chin Sı̂n Siōng-tè, tān-sı̄ in-ūi in m̄-sı̀n Siōng-tè. Chai koh m̄-sı̀n, chit ê choē chin-chiàⁿ sı̄ tāng ah! Tong-jiân iā ū choē-choē bô beh sı̀n sí-āu lêng-hûn ê sím-phoàⁿ.
In chai ū chı̍t tiâu lêng-hûn, chóng-sı̄ m̄-chai beh cháiⁿ-iūⁿ choè; cháiⁿ-iūⁿ siat-hoat in ê lêng-hûn ê kui-siok. Koh m̄ chiap-siū sı̀n ê lâng ê oē-gú. Khó-lı̂n bô khó-lı̂n!
Sèng-keng ū kı̀-chài, Iâ-so͘ koh-oa̍h hō͘ To-má khoàⁿ-kı̀ⁿ ê sı̂ kā To-má kóng:
Lí in-ūi khoàⁿ-kı̀ⁿ goá chiah sı̀n, hiah ê bô khoàⁿ-kı̀ⁿ lâi sı̀n ê lâng ū hok-khı̀ ( Iok-hān 20 : 26 ).
Chhiáⁿ lán lâi gı̂m-si 490 siú:
1 .Tè Chú ê lâng ū hēng-hok,
Ná chún iû-siúⁿ chin khoài-lo̍k;
Ta̍k sı̂-khek o-ló gı̂m-si,
Moá sim pêng-an chin tek-ı̀.
( Hô )
Oē tit khoài-lo̍k,
tè Chú ê lâng khoài-lo̍k,
Chú ê khoài-lo̍k bô thang pí,
Sim-toé tiô-thiàu toā hoaⁿ-hí,
Khı̂ⁿ-tiâu Chú m̄-thang pàng-lı̄, chiū tit khoài-lo̍k,
Éng-oán thang tit Chú khoài-lo̍k.
2 .Tè Chú ê lâng ū hēng-hok,
Khah-iâⁿ khó͘-thàng tit khoài-lo̍k;
Tit Chú hok-im jı̍p goá sim,
Chhùi boē kı̀m-tit khui siaⁿ gı̂m.
3. Tè Chú ê lâng ū hēng-hok,
Sui-jiân kiâⁿ o͘-àm soaⁿ-kok;
Nā tè Iâ-so͘ ê kha-pō͘,
Oē tit Chú kā lán chhoā lō͘.
A-men.
