Toā-chio̍h ia̍h tio̍h chio̍h-á kēng

Sai tı̄ kau-goā teh hó khùn; niáu-chhú-á tiàm i sin-piⁿ teh thit-thô tiô-thiàu, sai hut-jiân hō͘ i kiaⁿ chhíⁿ, chius7 ûi-sı̂ ēng i-ê kha-jiáu kā i khàm--teh. Niáu-chhú-á bē-ē thoat-lı̄, chiū tı̄ jiáu-ē ài-kiû lı̂n-bín. Sai khoàⁿ sè-sè ê niáu-chhú-á, hāi-sí--i ia̍h bô lı̄-ek, put-jû sià-bián i khah-hó. Niáu-chhú-á chiū thoat-lı̄. Koh bô loā-kú sai hō͘ lâng ēng lô-bāng tng--tio̍h. Pah-siù thiaⁿ-kı̀ⁿ chiū lóng ûi lâi beh kiù--i. Khó-sioh lóng kiù bô hoat--tit. Án-ni-siⁿ chhin-chhiūⁿ tio̍h pàng in ê ông sí tı̄ lô-bāng--nı̍h. Hit chiah sai ka-tı̄ khó͘-chheh kóng,“Taⁿ sı̄ goá ê miā--liáu.” Chı̍t chiah niáu-chhú-á lâi kā i kóng,“Ông--ah, goá hó-táⁿ kóng, lí khéng hō͘ goá kiù lí chhut--mah?” Pah-siù thiaⁿ-kı̀ⁿ chit ê oē lóng-chóng chhı̀n-chhiò, in-ūi toā-chiah chhiūⁿ kap lóng-chóng ê béng-siù kiù bô-hoat--tit, chit hō bû-bêng siáu-chut chiū káⁿ siūⁿ beh lâi kiù--i. Pêng-sò͘ sai khoàⁿ niáu-chhú-á m̄-chiūⁿ ba̍k, thái-thó khéng kap i kóng-oē, nā-sı̄ kàu chit-ê sı̂-chūn, i sui-bóng sı̄ chı̍t chiah phí-phí-á-chiah ê niáu-chhú-á, sai ia̍h m̄-káⁿ khoàⁿ-khin, hoaⁿ-hí kiû i-ê kè-chhek, hiⁿ-hiⁿ-chhan kóng: “Khún-kiû lí chhı̀ lâi kiù goá.” Hit chiah niáu-chhú-á chiū sô khı̀ hí bāng--nı̍h, ēng i lāi-lāi ê chhùi-khí, tùi bāng ê soh-á chı̍t-kó͘ khè-koè chı̍t-kó͘, lóng bô siūⁿ siān. Kàu lō͘-boé khè-tn̄g, sai chiū chhut--lâi. Chhiat-chhiat bo̍h-tit khoàⁿ-khin siáu-jı̂n, kiaⁿ-liáu kin-á jı̍t ê siáu-jı̂n sı̄ āu-lâi ê in-jı̂n, ia̍h bē thang chai. (Tâi-lâm-hú-siâⁿ kàu-hoē-pò tē 140 koàn, 1896 nı̂ 11 goe̍h)