Tui-liām Bunun cho̍k ê Pó-lô Lâu Thoân
Nā ū tùi san-toē kàu-hoē koan-sim ê lâng, ta̍k ê lóng bat Lâu-Thoân sı̄ chı̍t ê úi-tāi Bunun ê thoân-kàu-chiá. I tı̄ 5 ge̍h 25 hut-jiân siū Chú kéng-tiàu kui thian. Hit-jı̍t sı̄ pài-la̍k, i teh pı̄-pān tō-lí ê sı̂, hut-jiân sim-chōng bâ-pı̀, 20 hun āu lâng khoàⁿ i thâu-khak the tı̄ í-á, kiò i ê sı̂, í-keng tn̄g-khùi. Keh-jı̍t ū chhut-chòng, ta̍k lâng lâu ba̍k-sái . I chêng sı̄ chı̍t ê hòng-tōng ê lâng, ta̍k jı̍t lim chiú, sio-phah, thit-thô. Iáu-kú in-ūi sı̄ chhong-bêng koh ióng-kám, chiū siū Jı̍t-pún lâng kéng choè chòng-teng thoân-tiúⁿ. Kàu kong-ho̍k āu, koh siū kéng choè chhoan-tiúⁿ. 1949 nı̂ chiaⁿ-ge̍h 24, i lâi hù lán ê pò͘-tō-hoē tı̄ Gio̍k-lí, chiū sûi-sı̂ chiap-siū Chú. Āu-lâi khoàⁿ-kı̀ⁿ i ū chin-sı̍t hoán-hoé, ū sin ê seng-oa̍h, koh chū-hoat-tek teh thoân-tō-lí, lán chiū kā i chiok-thok choè soan-tō-su, kap goá choè-tı̄n tı̄ ta̍k só͘-chāi tùi Bunun thoân-tō .1950 nı̂, i tı̄ ka-kı̄ ê só͘-chāi kiàn-siat Bunun thâu chı̍t keng ê kàu-hoē . I sı̄ chı̍t ê chin ló͘-le̍k ê lâng. I chí-ū siū 4 nı̂ Jı̍t-pún hoan-tông kàu-sı̍p-só͘ ê kàu-io̍k, só͘ tha̍k ê bô joā-choē. Iáu-kú i chin khéng ló͘-le̍k, koh chhong-bêng, só͘-í i ê tı̀-sek sı̄ poâⁿ-kè lóng-chóng ê Bunun. I ê thâu-khak iā te̍k-pia̍t hó, gâu káng-tō, só͘- í bô-lūn tı̄ ta̍k-ūi, i ê káng-tō siū chin toā ê hoan-gêng , sı̄m-chí pa̍t cho̍k ê lâng iā chin ài thiaⁿ i ê só͘ kóng--ê. I ê kha ū koan-chat-iām ( Bunun ê oē sı̄ polo ), só͘- í goá kā i kóng, “Lí chin-chiàⁿ sı̄ Bunun ê Pó-lô, chin gâu choè kang .” 1957 nı̂ 9 ge̍h , i ū jı̍p tı̄ Gio̍k-san Sèng-keng ha̍k-hāu, siū 2 nı̂ ê hùn-liān, koh āu-lâi ū jı̍p kàu-su hùn-liān-pan, chiū siū Kó͘-hong kàu-hoē phèng-chhiáⁿ choè bo̍k-su, che iā sı̄ Bunun thâu chı̍t keng ê Chū-tı̄ Tông-hoē. I iā choè Bunun khu-hoē thâu chı̍t pái ê gı̄-tiúⁿ. Tùi chı̍t-tia̍p khí, i khı̀ ta̍k só͘-chāi kó͘-bú kàu-hoē to̍k-lı̍p. Kàu bô kú í-chêng, iā koh khı̀ Se-pō͘ kó͘-bú in tio̍h liân-ha̍p tı̄ Tang-pō͘ choè chı̍t ê Bunun Tiong-hoē . Goá in-ūi ta̍k-jı̍t tio̍h hoan-e̍k Sèng-keng , bô thang chhut-goā, kàu i choè bo̍k-su í-āu , lóng sı̄ thoè goá khı̀ ta̍k só͘-chāi niá soé-lí kap kái-koat ta̍k hāng ê sū, só͘-í i khah siông bô tı̄ ka-kı̄ ê kàu-hoē choè kang . Taⁿ, i í-keng soah i ê khó͘-kang, iáu-kú goán beh khı̀ tá-lo̍h thang chhē chı̍t ê chiah úi-tāi ê jı̂n-bu̍t thang lâi thoè i ê kang?
(soán chū “Soaⁿ-tè Kàu-hoē”, 1963 nı̂)