Tui-tō-toān
Liāu kun Sam-tiōng, jū-miâ Tō-siu, Chiū-sı̄ goá só͘-thiàⁿ só͘ ǹg-bāng ê hiân-iú. “Gú ûn ti tē bo̍k jio̍k su,” ké-soeh kóng, Chai ha̍k-seng ê khoán-sit, to̍k-to̍k sı̄ sian-siⁿ. Tùi Bêng-tı̄ 30 nı̂, Kàu-sū-hoē chhiáⁿ goá jı̍p Tiong-o̍h chō͘-kàu, i chiū sio̍k tı̄ jı̄-liân-seng, hit-sı̂ chha-put-to 13 hoè, chu-chit chhang-miâ, iā hùn-chı̀ khı̂n-tha̍k, chin him-bō͘ Hàn-ha̍k, kı̀ⁿ-nā só͘ khó ê lóng sı̄ saⁿ-miâ-lāi. Tı̄ Tiong-o̍h tha̍k kàu chut-gia̍p, hit-sı̂ Hùi Sian-siⁿ ū chhiáⁿ i pang-chān kà chı̍t nı̂ kú, āu-lâi lı̍p-chı̀ beh chò thoân-kàu ê kang, chiū jı̍p Sı̂n-ha̍k-hāu, sı̂-kan-lāi khı̂n-khı̂n káng-kiù ta̍k hāng ê ha̍k-būn, sı̂-kan-goā chin jia̍t-sim pò͘-tō, chin hó kháu-châi, tha̍k kàu chut-gia̍p jiân-āu koh khı̀ Tang-kiaⁿ jı̍p Bêng-tı̄-ha̍k-ı̄ⁿ chò sı̀-liân-seng chut-gia̍p liáu koh jı̍p Chó-tiū-tiân Tāi-ha̍k, khó-sioh tha̍k bô loā-kú kū-sı̂ ê náu-pēⁿ koh khí, chiū tńg-lâi Tâi-oân hioh-khùn. Kàu chit pang koh khı̀ Jı̍t-pún tiāu-ióng, bô phah-sǹg khı̀ Tāi-pán ê hái-bı̄n sé-e̍k, káⁿ-sı̄ bô la̍t thang siû, chiah hō͘ chúi tū--sí, kin-nı̂ 29 hoè. Chiàu lâng teh khó-liân i tùi sè-hàn tha̍k-chheh kàu-taⁿ, teh pı̄-pān beh chò kàu-hoē ê lō͘-ēng, taⁿ kap sè-kan soah, chiū i ê châi-tiāu ha̍k-būn lóng toè chúi lâu khı̀; kàu-hoē iā khiàm chı̍t-ê jı̂n-châi, án-ne khiok ū-iáⁿ, m̄-kú Siōng-chú ê chí-ı̀ chin ò-biāu, hō͘ lán bē-ē chhek-to̍k--tit. Kiám-chhái Siōng-chú lı̂n-bín i ê náu-pēⁿ, ài soah i ê kan-khó͘, só͘-í chá-chá tiàu i tńg-khı̀ hō͘ i hióng-siū éng-oán ê khoàⁿ-oa̍h, án-ne khiok iáu khah hó, tio̍h o-ló Siōng-chú ê hó ı̀-sù. Chá-chêng Khóng-chú ū chı̍t ê ha̍k-seng sèⁿ Gân miâ Hoê; Khóng-chú o-ló i tek-hēng chin hó, kài thong-o̍h ê gâu tha̍k-chheh, ū pang-chān ông ê châi-tiāu. Put-hēng chia̍h kàu 32 hoè chiū koè-sin, che iā sı̄ hō͘ lâng siūⁿ bē hiáu-tit. Liāu kun Sam-tiong ê cho-gū iā sı̄ chhin-chhiūⁿ án-ne. Chóng-kóng Liāu kun ū 3 hāng thang chò chheng-liân ê bô͘-iûⁿ: 1.Ū khiam-sùn ê tek-hēng. 2. Ài hiàn-sin chò Chú ê kang. 3.Chhang-miâ koh hèng-tha̍k. Phí-jı̂n ū chih-tio̍h i ê lēng-heng ê phoe ài goá khı̀ Sai-lê hù chhe-jı̄ sàng-chòng, goá chin ài thé-thiap, khó-sioh iû-piān chó͘-tòng, kàu chhe-jı̄ mê chiap-tio̍h phoe, sǹg sı̄ koè-sı̂ lah, taⁿ bô thang koh kı̀ⁿ i ê bı̄n, tio̍h siá kúi-kù lâi piáu su-tē ê chêng. (Tâi-lâm Kàu-hoē-pò tē 356 koàn,1914 nı̂ 11 ge̍h)