Portia: Shylock ah, chit tiâu chè-bū kóng beh nn̄g-pē hêng lí, lí siūⁿ siáⁿ khoán?!
Shylock: Chiù-choā! Chiù-choā! Goá í-keng kí thiⁿ lâi chiù-choā lah! Kiám thang hō͘ goá ê lêng-hûn lâi taⁿ poē chiù-choā ê choē mah? Chiū tit-tio̍h Venice choân-kok, iā sı̄ boē ēng tit phiàn ka-kı̄ lah!
Portia: Chit tiuⁿ chèng-bûn í-keng kè-hān, só͘-í Iû-thài lâng khó-í tùi seng-lí lâng chèng-tong lâi iàu-kiû, tùi i ê heng-khám, kūn sim-chōng ê só͘-chāi chhú bah chı̍t-kun, chóng-sı̄ Shylock ah, tio̍h si un-tián lah! Kóng goân-kim ê nn̄g-pē, siáⁿ khoán?! Iā hit tiuⁿ chèng-su hō͘ goá thang thiah phoà!
Shylock: Chiàu chèng-bûn-bı̄n lâi hêng-chè, liáu-āu chiū khó-í thiah-phoà! Chiàu khoàⁿ lí sı̄ hiân-bêng ê chhâi-phoàⁿ-koaⁿ, ū cheng-thong tı̄ hoat-lu̍t, lí ê koé-seh sı̄ chin chèng-khak; thang kóng lí chiū-sı̄ choè chhong-bêng kok-ka hoat-lu̍t ê thiāu-chio̍h lah! Chhiáⁿ lí chiàu hoat-lu̍t lâi chı̀n-hêng lí ê chhâi-phoàⁿ! Goá kí goá ê lêng-hûn lâi chiù-choā, bô lâng oē ēng i gâu piān-lūn ê piān-sia̍t lâi piàn-oāⁿ goá ê koat-sim lah! Put-lūn jû-hô, goá chú-tiuⁿ chiàu chèng-su-bı̄n lâi chhâi-phoàⁿ.
Antonio: Chhiat goân hoat-têng chiū-kı̄n phoàⁿ-koat giân-tō.
Portia: Nā-sı̄ án-ni, pı̄-kò tio̍h ài chún-pı̄ heng-khám, kak-ngō͘ thang hō͘ goân-kò hē-to!
Shylock: Oh, ko-kùi ê phoàⁿ-koaⁿ lah! Choa̍t-sè ê bêng chhâi-phoàⁿ-koaⁿ lah!
Portia: Tùi hoat-lu̍t ê cheng-sı̂n kap bo̍k-tek lâi khoàⁿ, chit-tiuⁿ chèng-su í-keng kè-hān, iā kap hit ê kho-liāu, chiū-sı̄ lâng bah chı̍t-kun, ū bı̍t-chiap ê koan-hē tı̄-teh, lóng bô chı̍t-sut-á chhò-gō͘ kap mâu-tún tı̄-teh!
Shylock: Tông-kám, tông-kám! Oh, hiân-bêng koh kong-tō ê chhâi-phoàⁿ-koaⁿ lah!
Portia: Taⁿ Antonio, tio̍h chún-pı̄ lí ê heng-ha̍h!
Shylock: Sı̄, heng-ha̍h chèng-su án-ni siá bêng, sı̄ siá án-ni hohN? Khó-kèng ê phoàⁿ-koaⁿ lah! “Tē-it kūn-oá sim-chōng,” tú-tú siá án-ni!
Portia: Sı̄, iā lí ū toà chhı̀n-á thang chhı̀n bah á-bô?
Shylock: Ū, ū, goá ū chún-pı̄ lâi!
Portia: Shylock lí ū chhiáⁿ goā-kho-i lâi á-bô? Thang tı̄-liâu siong-chhùi, nā bô, chhut-huih kè-to oē tı̀-bēng!
Shylock: Hit hāng kám ū siá tı̄ chèng-su mah?
Portia: Khiok sı̄ bô, chóng-sı̄ choè án-ni ê hó-sū, kiám ū sím-mı̍h chó͘-gāi!? In-ūi tùi chû-pi lâi choè chit khoán sū, sı̄ choè lí ê lı̄-ek!
Shylock: Tùi chèng-su boē tit hoat-kiàn chit hāng, chèng-su bô siá!
Portia: Seng-lí lâng ah, lí ū beh hoan-hù sím-mı̍h bô?
Antonio: Bô sím-mı̍h thang kóng, goá tùi chá-chá chiū kak-gō͘ liáu. Bassanio, chhun lí ê chhiú, choè-āu ê tùn-chhiú lah! Goá ūi-tio̍h lí tı̀-kàu án-ni ê pi-chhám, m̄-bián ūi-tio̍h án-ni lâi siong-pi! Un7-bēng ê sı̂n tùi tı̄ goá to iáu ū chin chhin-chhiat tı̄-teh, in-ūi i ê sı̍p-koàn khah-siông sı̄ ài hō͘ put-hēng ê lâng tūi-lo̍h, iā soà pak i ê châi-sán, hō͘ i sit-chı̀, siūⁿ lēng-khó sí khah hó; iā hō͘ in ê bı̄n-phê jiâu, ba̍k-chiu thap-khang, lâi khoàⁿ i ê pı̂n-khùn kè jı̍t, che sı̄ i pêng-siông ê chok-hoat. Chóng-sı̄ i hō͘ goá bián tú-tio̍h chit khoán ê pi-chhám. Taⁿ kā lí só͘ thiàⁿ ê hu-jı̂n chhéng-an, pò i chai Antonio án-cháiⁿ-iūⁿ sí, iā cháiⁿ-iūⁿ thiàⁿ lí, goá nā sí liáu-āu, it-it kóng-bêng hō͘ i thiaⁿ, hō͘ i thang phoàⁿ-toàn Bassanio chāi-siⁿ iā bat ū chit khoán sı̀n-sı̍t ê pêng-iú. Iā lí kan-ta siong-pi lí ū sit-lo̍h chı̍t ê sı̀n-iú, m̄-bián siong-pi lí ê sı̀n-iú ū taⁿ lí ê chè-bū. In-ūi Iû-thài lâng nā chha̍k goá ê heng-ha̍h kàu-gia̍h chhim ê sı̂, goá hoaⁿ-hí sûi-sı̂ chiong choân sim-koaⁿ lâi hêng--i.
Bassanio: Antonio, goá ū chı̍t ê bó͘, goá thiàⁿ i ná goá ê sı̀ⁿ-miā, chóng-sı̄, nā-sı̄ tùi tı̄ goá, lí ê sı̀ⁿ-miā, goá sı̄ khoàⁿ choè pí í-siōng só͘ kóng ê oa̍h-miā, í-kı̍p goá ê bó͘ kap choân sè-kài koh-khah kùi-khı̀. Goá sı̄ khah ài pàng-sak só͘-ū--ê, chiong só͘-ū--ê choè hi-seng lâi kiù lí ê sı̀ⁿ-miā, thang thoat-lı̄ chit ê ok-mô͘ ê chhiú-thâu!
Portia: (Tùi ka-kı̄ soè siaⁿ kóng). Lí ê bó͘ nā tı̄ lí ê sin-piⁿ, lí só͘ kóng chiah ê oē, ún-tàng bô hoaⁿ-hí thiaⁿ!
Gratiano: Goá mā chı̍t ê bó͘, goá iû-goân chin thiàⁿ--i, nā-sı̄ í-keng sí m̄ chin hó, in-ūi tı̄ thiⁿ-téng oē thang tı̍t-chiap tı̍t-sò͘ tı̄ Thian-tè ê bı̄n-chêng, lâi kiû i koé-oāⁿ chit ê chhin-chhiūⁿ chhâi-lông ê Iû-thài lâng ê sim-koaⁿ!
Nerissa: (Tùi ka-kı̄ soè siaⁿ kóng), Kóng chit khoán ê oē, tio̍h tı̄ bó͘ thiaⁿ boē tio̍h ê só͘-chāi lâi kóng, nā bô, ka-têng oē siⁿ-khí hong-pho.
Shylock: Hngh! Chit nn̄g ê tiōng-hu lóng sı̄ Ki-tok-tô͘! Goá ê cha-bó͘-kiáⁿ kiat-kio̍k tio̍h lâi phoè hō͘ Pa-lia̍p-pa ê hō͘-è, m̄-thang kéng Ki-tok-tô͘ lah (Oa̍t piⁿ-á ka-kı̄ kóng) ...... (toā-siaⁿ hoah). Phah-sńg sı̂-kan lah! Chhiáⁿ koáⁿ-kín soan-kò!!
Portia: Tı̄ hia hit ê seng-lí lâng ê bah chı̍t-kun sı̄ lí ê! Hoat-têng sêng-jı̄n, hoat-lu̍t chiong hit ê koân-lı̄ hō͘ lí!
Shylock: Ah, kong-bêng chèng-tāi ê chhâi-phoàⁿ-koaⁿ!
Portia: Lí tio̍h pún-sin tùi i ê heng-ha̍h lâi koah chı̍t-tè bah! Hoat-lu̍t hú-khó lí! Hoat-têng sêng-jı̄n lí!
Shylock: Tē-it gâu ê chhâi-phoàⁿ-koaⁿ lah! Soan-kò lah! Taⁿ Antonio, chún-pı̄ thǹg-saⁿ!
Portia: Chhiáⁿ tán--cheh, goá iáu ū oē beh kóng, Chit tiuⁿ chèng-su bô siá “huih” beh hō͘ lí, sı̄ kan-ta bah nā-tiāⁿ, bêng-bêng siá bah chı̍t-kun. Só͘-í tio̍h chiàu chèng-su só͘ siá, án-ni lâi chhú chı̍t-kun ê bah. Bān-it chhú bah ê sı̂, nā lâu-chhut chı̍t-tih Ki-tok-tô͘ ê huih ê sı̂, chiū beh chiàu Venice ê kok-hoat lâi bu̍t-siu lí só͘ ū ê thó͘-toē kap châi-sán lâi kui kok-khò͘!
Gratiano: Oh, kong-bêng chèng-tāi ê chhâi-phoàⁿ-koaⁿ lah! Oé, Iû-thài lâng ah, ū thiaⁿ-kı̀ⁿ bô? Kó-jiân sı̄ phok-ha̍k ê chhâi-phoàⁿ-koaⁿ lah!
Shylock: Soà ū án-ni ê lu̍t-hoat!!
Portia: Khah-hó lí tio̍h chhin-ba̍k lâi khoàⁿ chit tiuⁿ tiâu-bûn! Kiù-kèng, lí kı̀-jiân iàu-kiû chiàu chèng-su-bı̄n giâm-tiōng ê chhâi-phoàⁿ, lí tio̍h ài kak-gō͘ oē siū chiàu lí só͘ ài í-siōng chùn-giâm ê chhâi-phoàⁿ chiah oē ēng tit!
Gratiano: Oh, phok-ha̍k ê chhâi-phoàⁿ-koaⁿ! Oé, Iû-thài lâng ah! Sı̍t-chāi bô chhò, hiân-bêng ê chhâi-phoàⁿ-koaⁿ lah!
Shylock: Nā-sı̄ án-ni, lí só͘ kóng, goân-kim têng-pē ê gia̍h hō͘ goá, goá chiū pàng Antonio bô sū!
Bassaino: Chá-chá chiū kā lí kóng, chı̂ⁿ tı̄ chia lah! Lâi the̍h lah!
Portia: Bān-cheh, Iû-thài lâng, bô hiah sûi-piān! Tio̍h ài chiàu kong-hoat chiah oē ēng--tit! Bô koáⁿ-kín ê pit-iàu, Iû-thài lâng só͘ èng-tong tit ê kho-liāu í-goā, i boē ēng tit poàⁿ-hāng!
Gratiano: Ah, kong-bêng chèng-tāi ê chhâi-phoàⁿ-koaⁿ lah! Phok-ha̍k ê phoàⁿ-koaⁿ lah! Oé, Iû-thài lâng ah!
Portia: Só͘-í tio̍h ài chún-pı̄ thang koah bah, m̄-thang hō͘ i lâu-huih, iā tio̍h tú-tú chı̍t-kun, boē ēng tit ke, á-sı̄ kiám-chió! Ká-sú koah pí chı̍t-kun khah ke, á-sı̄ khah chió, sui ke̍k bı̂-soè, chı̍t hun ê jı̄-cha̍p-hūn-chı̍t, oē hō͘ bah chha khin-tāng, chiū chha chı̍t ki thâu-mn̂g ê tāng ê sı̂, chiū beh kā lí chhú sí-hêng, iā beh kā lí bu̍t-siu só͘ ū ê châi-sán!
Gratano: Lí khoàⁿ tē-jı̄ ê Daniel lah! Daniel lah! Oé, Iû-thài lâng ah, siáⁿ khoán? Taⁿ m̄ kín hē-chhiú!
Portia: Siáⁿ-sū Iû-thài lâng iáu teh iân-chhiân? Koáⁿ-kín chhú lí ê kho-liāu!
Shylock: Goân-kim hêng goá, hō͘ goá thè-têng!
Bassanio: Kā lí kóng goá to ū toà--lâi, chiah, tı̄-chia lâi the̍h!
Portia: Lí tı̄ kong-khai ê hoat-têng, kı̀-jiân kū-choa̍t m̄-the̍h, só͘-í chiàu kong-hoat, tû-khı̀ chèng-su-bı̄n, lâng-bah chı̍t-kun í-goā, boē tit iàu-kiû pa̍t-hāng mı̍h!
Gratiano: Kā lí kóng, Daniel leh, tē-jı̄ ê Daniel lah! Iû-thài lâng ah, goá kā lí seh-siā, in-ūi chit kù sı̄ lí kà goá ê lah!
Shylock: Kan-ta goân-kim, iā boē ēng-tit mah?
Portia: Lí tó͘ sı̀ⁿ-miā, só͘ ài chhú ê kho-liāu í-goā, boē ēng-tit the̍h poàⁿ-hāng!
Shylock: Ngh! The̍h khı̀ hō͘ pháiⁿ-kúi choè lō͘-ēng ah! Bô beh chhéng-kiû lí poàⁿ-hāng lah!
Portia: Thèng-hāu! Tùi tı̄ lí ê chhâi-phoàⁿ, iáu-bē chheng-chhó! Tio̍h chim-chiok thiaⁿ! Ká-sú nā ū goā-kok lâng, tı̍t-chiap, á-sı̄ kàn-chiap, kè-bô͘, ēng chhiú-toāⁿ ài beh hām-hāi Venice lâng ê sı̀ⁿ-miā, hit ê chèng-jiah nā-sı̄ bêng-liâu ê sı̂, hit ê ka-hāi-chiá, á-sı̄ kè-bô͘ ê lâng, in só͘ ū ê châi-sán, tio̍h ài chı̍t-poàⁿ hō͘ pı̄-hāi ê lâng chiah oē ēng-tit, iáu koh chı̍t-poàⁿ, tio̍h siū bu̍t-siu tı̄ kok-khò͘, iā pún-lâng ê sı̀ⁿ-miā tio̍h sûi-chāi Kong-chiok Kok-hā pān-lí, bô iông-ún pa̍t-lâng lâi kan-sia̍p. Che sı̄ hoat-lu̍t só͘ kui-tēng--ê. Lí ê choē-chn̄g chiū-sı̄ siong-tong tı̄ chit tiâu, lí ū tı̍t-chiap, kàn-chiap beh hām-hāi hit ê siong-jı̂n, che sı̄ chin bêng-liâu ê sū-sı̍t, só͘-í lí toàn-jiân boē-tit-thang siám-pı̄ í-siōng só͘ kóng ê choē-chn̄g. In-ūi án-ni ê lí-iû, lí tio̍h ài koáⁿ-kín kūi-lo̍h tùi Kong-chiok Kok-hā lâi kiû chû-pi!
Gratiano: Khah-hó tio̍h kiû tiàu-tāu ê hú-khó lah! Lí ê châi-sán kı̀-jiân siū bu̍t-siu, chiū bô chı̂ⁿ thang boé tiàu-tāu soh, kiat-kio̍k tio̍h khai chèng-hú ê hùi-iōng chiah oē ēng-tit!
Kong-chiok: Lán ê cheng-sı̂n kap i bô-siāng khoán,i bē kiû ê tāi-seng, i hit tiâu sı̀ⁿ-miā beh sià-bián--i lah! Iā châi-sán ê chı̍t-poàⁿ kui Antonio, chı̍t-poàⁿ kui kok-khò͘ ê siu-jı̍p, tān-sı̄ i nā-sı̄ chin-sim hoé-ngō͘ ê sı̂, kiám-chhái kho-liāu oē siū bián-tû iā bô tiāⁿ-tio̍h.
Portia: Ū-iáⁿ! Kok-ka bu̍t-siu hit pō͘-hūn, kiám-chhái ēng hoa̍t-kim lâi thoè, chóng-sı̄ Antonio hit pō͘-hūn boē ēng-tit án-ni!
Shylock: M̄-nā châi-sán, sı̀ⁿ-miā soà hō͘ lí! Bô pit-iàu sià-bián goá lah! Kok-hā nā hia̍p goá ê chhù ê thiāu-kha khí-lâi, chiū kui keng chhù soà hō͘ lí sı̄ siāng chı̍t-iūⁿ. Chi-chhı̂ goá ê seng-oa̍h ê châi-sán nā kā goá bu̍t-siu--khı̀, chiū goá ê sı̀ⁿ-miā soà hō͘ lí sı̄ tong-jiân!
Portia: Antonio! Lí ū beh si chû-pi hō͘ chit ê lâng bô?
Antonio: Kok-hā í-kı̍p lia̍t-ūi chu-hiân! I ê châi-sán ê chı̍t-poàⁿ hit tiâu hoa̍t-kim, chhiáⁿ kā i bián-tû! Beh hō͘ goá ê chı̍t-poàⁿ iā bián, bô tit-tio̍h hit poàⁿ goá iā sı̄ boán-chiok, chóng-sı̄ hō͘ goá pó-koán chiū hó, in-ūi Shylock nā kè-sin liáu, thang hō͘ hit ê choè-kūn chhoā i ê cha-bó͘-kiáⁿ cháu hit ê sin-sū. Kı̂-thaⁿ iáu ū nn̄g tiâu, hi-bōng hoat-têng bēng-lēng i tio̍h ài iok-sok lâi lí-hêng, chiū-sı̄ i sûi-sı̂ lâi choè Ki-tok-tô͘ (Christian). Koh chı̍t hāng, i nā kè-sin liáu āu, tio̍h ài chiong i só͘ ū ê châi-sán hō͘ i ê cha-bó͘-kiáⁿ hu-hū, iā chit hāng tio̍h ài tı̄ hoat-têng lâi siá châi-sán jiōng-tō͘-su, soà chhiam-miâ.
Kong-chiok: Chàn-sêng! Beh chiàu án-ni lâi bēng-lēng i, nā m̄ sūn-thàn, chiū sûi-sı̂ chhú-siau sià-bián!!
Portia: Iû-thài lâng hó mah? Beh sūn-thàn á bô?
Shylock: Án-ni hó! Ko͘-put-chiong!
Portia: Su-kı̀, chhiáⁿ lí siá chı̍t-tiuⁿ châi-sán jiōng-tō͘ chèng-su.
Shylock: Chit-chūn hō͘ goá thè têng, in-ūi phoà-pı̄ⁿ! Chèng-su, āu-lâi chiah the̍h lâi hō͘ goá chhiam-miâ.
Kong-chiok: Thè-têng thang, chóng-sı̄ tio̍h ài chiàu bēng-lēng lâi lí-hêng!
Gratiano: Shylock ah, lí beh siū soé lâi choè Christian ê sı̂, tio̍h ài nn̄g-miâ ê kàu-hū lâi-hoē chiah oē ēng-tit! Ká-sú goá nā-sı̄ phoàⁿ-koaⁿ, goá beh bēng-lēng ke-thiⁿ cha̍p-miâ, kiōng cha̍p-jı̄ miâ, chóng-sı̄ m̄-sı̄ beh chhoā lí khı̀ siū soé ê só͘-chāi, sı̄ beh ah lí lâi khı̀ Ká-siú-tâi lah! (Shylock jı̍p-tiûⁿ).
Kong-chiok: Chhiáⁿ sian-siⁿ tông-tō pè-the̍h hōng siōng chho͘-chhan.
Portia: Kám-siā lí ê hó-ı̀! Chóng-sı̄ e-hng goá tio̍h ài tńg-khı̀ Padoa, só͘-í tı̄-chia ài kap Kok-hā saⁿ-sı̂ lâi chhut-hoat.
Kong-chiok: Chin ûi-hām, in-ūi lí ê sı̂-kan m̄ iông-ún lí, ... (tùi Antonio) Antonio, lí tio̍h kā chit ūi sian-siⁿ seh-siā. In-ūi lí ū siū-tio̍h i ê un-gı̄ chin toā!
Bassanio: Khó-kèng ê sian-siⁿ. Goá kap goá ê iú-jı̂n Antonio, tùi tı̄ lí ê châi-tı̀, oē-tit-thang thoat-lı̄ chit ê ū koan-hē sı̀ⁿ-miā, chân-jím ê kho-liāu! Tı̄ chia ū 3000 ducat beh hêng Iû-thài lâng--ê, goán chin hoaⁿ-hí piáu-sı̄ goán pò-tap sian-siⁿ khún-chhiat ê lô-le̍k, ǹg-bāng sian-siⁿ hoaⁿ-hí siu!
Antonio: Kin-ná-jı̍t ê un-chêng, í-āu kú-kú bô boē kı̀-tit! thang choè kèng-ài sian-siⁿ lí ê sêng-ı̀.
Portia: Ka-kı̄ boán-chiok ê lâng í-keng tit-tio̍h pò-siúⁿ--lah! Goá oē thang kiù lí ê sı̀ⁿ-miā, ka-kı̄ chin boán-chiok, án-ni í-keng tit-tio̍h--lah. Goá m̄-bat ǹg-bāng tit-tio̍h khah ke ê pò-siû! Chhiáⁿ oē kı̀-tit goá, kàu chài-hoē ê sı̂, bāng lín khong-kiān, lín chhiáⁿ!!
Oân.
