8. 8 goe̍h 15 mê
Hok-goân ḿ hō͘ Hok-goân peh kòng chı̍t ē hoeh chim-chim-lâu, chiū chin m̄ goān, chhı̍h-oá beh khı̀ phah Hok-goân peh. Ko͘-niû kín kā i giú leh, kā in chiàm-khui. Hok-goân peh khoàⁿ tio̍h kā Hok-goân ḿ kòng chı̍t-ē, hoeh lâu kàu án-ni, chı̍t-sı̂ iā khah lún-chhiú. Chú-jı̍t-o̍h ê lú kàu-oân kín cháu khı̀ tùi-bı̄n se-i-tiàm, the̍h mı̂-á kap io̍h-á phêng-toà lâi kā i chí-hoeh, soà kā i kô͘, m̄-kú Hok-goân peh chin bô hoaⁿ-hí , iáu tı̍t-tı̍t mē Hoan-á-kàu, sí-liáu bô lâng khàu, pháiⁿ-oē tı̍t-tı̍t chhut. Só͘-í Ko͘-niû khoàⁿ sè-bı̄n m̄ hó, kā Hok-goân ḿ kô͘ hó chiū saⁿ-sı̂ tò-khı̀. Hok-goân ḿ sim chin kan-khó͘ chiū saⁿ-sı̂ chhut toā-mn̂g, tı̍t-tı̍t kā in hoē sit-lé, kóng, Lāu-lâng nā bô tı̄-teh, i chiah beh chhe gín-ná khı̀ chhiáⁿ in lâi chē. Nn̄g lâng chin hoaⁿ-hí, chai Hok-goân ḿ ê sim bô loé-chı̀, chiū kap i saⁿ-sı̂ tò-khı̀. Chiong chit chân sū kóng hō͘ Bo̍k-su thiaⁿ. Tāi-ke thiaⁿ liáu chin pi-siong, chiū iok-sok tio̍h thè in kı̂-tó. Koh chiâⁿ cha̍p jı̍t, Hok-goân peh chiū chhut goā khı̀ Pak-kiaⁿ beh khı̀ Tiâu-thian-kiong koah-hiuⁿ, iàu-kín sı̄ beh ǹg-bāng Thian-siōng sèng-bó te̍k-pia̍t khai-in, kiù in kiáⁿ Tian-sù ah. Óng-hoê tio̍h chiâⁿ lé-pài kú. Hit sı̂ Hok-goân ḿ ah chhe Bí-hoâi ah khı̀ chhiáⁿ Ko͘-niû in lâi chē.
Ko͘-niû sèⁿ Ko, sèng-chêng ke̍k un-sûn, kóng-oē khin siaⁿ sè-soeh. Tiong-kok oē bē 10 hun ê gâu kóng, só͘-í hit ê Chú-jı̍t-o̍h sin-seⁿ iā kap i chò-hoé lâi. Hit ê Chú-jı̍t-o̍h sian-seⁿ hiān-sı̂ boē-kè, chêng bat chò chhiong-ki tı̄ Thài-lo̍k-hn̂g, kiò-chò Lı̂m Siù-gio̍k, seⁿ chò chin hó. Thian-sù ah iā bat kap i kau-poê, hit sı̂ kap i chin siāng-sim iok beh kè--i. Kàu chit 2 nı̂ chêng í-keng tit-tio̍h tō-lí. Bo̍k-su chhut chı̂ⁿ kā i sio̍k chhut-lâi. Iā ū khı̀ tha̍k Hū-o̍h chı̍t nı̂ goā. Chin gâu tha̍k, Sèng-chheh tō-lí chin bat. Chit-tia̍p teh kà Ko Ko͘-niû ê Tiong-kok oē. Só͘-í kap i chò-hoé khı̀. I ê sim iā sı̄ chin khó-lı̂n Thian-sù ah, chin ài kiù--i, ài i tâng kiâⁿ thiⁿ-lō͘. Só͘-í (Sı̀n chú ê lâng èng-kai ū chit hō sim, ta̍k jı̍t kap Ko͘-niû lâi chhoē in, tiong-tàu tǹg siông-siông hō͘ in chhiáⁿ, án-ni liân-liân oá chiâⁿ lé-pài kú. Bí-hoâi ah chin khiáu, koh Sió-ha̍k-hāu í-keng beh chut-gia̍p lah. Só͘-í chò-hoé tha̍k hàn-bûn ê Sèng-chheh, si, lóng ē kiâⁿ. Sim-pū, kap Hok-goân ḿ tāi-ke iā o̍h kúi-nā siú si, iā o̍h kı̂-tó. Hut-jiân tı̄ chiâⁿ lé-pài kú, thong-ke toā hoaⁿ-hí, hiaⁿ-só sió-ko͘ lóng khı̂n-khı̂n tha̍k si, sèng-keng. A-só bô tha̍k-chheh m̄ bat jı̄. Bí-hoâi ah kà--i, án-ni 2-ê soà chin siong-hó. Chàu-chêng chàu-āu tiāⁿ liām si-chheh, soà bē kı̀-tit iu-būn ê sū. Hok-goân ḿ iā chhiò-gı̄-gı̄. Siông-siông àm-àm kı̂-tó Siōng-tè, i sı̀n Siōng-tè ē kiù i ê ke. Kàu chı̍t ê lé-pài āu Hok-goân peh khı̀ koah-hiuⁿ tò-lâi, khoàⁿ lāi-bı̄n toā koh-iūⁿ: chêng ta̍k-àm Hok-goân ḿ to háu, sim-pū tiāⁿ tài hàu-lâm-bı̄n, án-choáⁿ taⁿ tāi-ke thái lóng pı̀ⁿ hoaⁿ-thâu hí-bı̄n, chhiò gı̄-gı̄ ? Hok-goân peh siūⁿ lóng bē hiáu-tit. Sim-pū iā khah ū lé-sò͘. Hiaⁿ-só sió-ko͘ iā chin hó, siông-siông chò-hoé kóng-oē, iā chò-hoé liām Sèng-chheh, liām kàu bô khoà chia̍h pn̄g. Tiàm āu-piah kau chhiò kah ha̍h-ha̍h-kiò. Éng-koè lóng sı̄ chhù-chêng chhù-āu teh thau háu, taⁿ sı̄ teh chhiò, ná siūⁿ ná put-bêng. Chiū kiò Bí-hoâi ah the̍h in teh liām ê chheh lâi hō͘ i khoàⁿ. Bí-hoâi ah chiū the̍h lâi, chin kiaⁿ, kiaⁿ in A-pa kā i khian--lo̍h-khı̀. Chiū lún-lún bô sáⁿ káⁿ oá lâi, Hok-goân peh soà ài chhiò, siūⁿ tio̍h i chêng-jı̍t ê chhióng-pōng, soà tı̀-kàu bó͘ kiáⁿ chiah kiaⁿ--i. I chiū kā i kóng, Bián kiaⁿ lah, lí sı̄ kap lín só-ah teh liām sáⁿ-hoè, án-choáⁿ liām-kàu hiah hó chhiò? Bí-hoâi ah chiū the̍h oá-khı̀, Hok-goân peh ba̍k-chiu hoe-hoe, chiū the̍h ba̍k-kiàⁿ khí-lâi koà. Tú hian chı̍t siú kóng, "Goá thiaⁿ Iâ-so͘ ê siaⁿ kóng bêng, Lín lóng tiàm chit sè-kan; Kı̀ⁿ-nā lô-khó͘ lâi goá bı̄n-chêng, Ta̍k-lâng lóng ū pêng-an, ûn-ûn." Chóng-sı̄ Hok-goân peh kan-ta tha̍k 4 jı̄ kóng "goá thiaⁿ Iâ-so͘" chiū chin siū-khı̀, chiong hit pún chheh kā i piaⁿ tùi thô͘-kha lo̍h-khı̀,ok Bí-hoâi ah khı̀ tó-ūi kā lâng the̍h hit hō hoan-á chheh. Bí-hoâi ah chı̍t sı̂ kiaⁿ kàu bı̄n chheⁿ sún-sún. Hok-goân ḿ tı̄ pâng-nih thiaⁿ Lāu-ê teh mē kàu hiah toā-siaⁿ, chiū chhut lâi kā i khoàⁿ. Iā khoàⁿ chheh tı̄ thô͘-kha, chiū kín khioh khí-lâi, kín chhoā Bí-hoâi ah cháu, tiām-tiām bô chhap-i. Keh chiâⁿ goe̍h jı̍t khoàⁿ lāi-bı̄n kó-jiân chin koh-iūⁿ: chêng oán-jiân oa̍h tē-ge̍k; chit-tia̍p pı̀ⁿ ná Lo̍k-hn̂g. Chí-ū i chı̍t lâng kap in bô tâng, nā khah mē in iā sı̄ teh liām. Iā beh chia̍h pn̄g ê sı̂ i ê ba̍k-chiu kheh-kheh, in iā kheh; kan-ta i chı̍t ê bô ba̍k-chiu kheh-kheh chiū chia̍h. Kàu ū chı̍t-jı̍t Hok-goân peh he-ku tı̍t-tı̍t tū khí-lâi, chin siong-tiōng, cha-bó͘ kiáⁿ sim-pū lóng kūi teh thè i kı̂-tó. Hok-goân ḿ tiāⁿ chē tı̄ bı̂n-chhn̂g-thâu kóng tō-lí hō͘ thiaⁿ, thiaⁿ-liáu toā siū kám-tōng chiū hoaⁿ-hí sı̀n Iâ-so͘ ka-tı̄ iā siông-siông kı̂-tó. (Chin kiong-hí, Sèng-tō ê koân-lêng). Kàu 8 goe̍h poàⁿ hit mê, goe̍h chin kng, poàⁿ-mê āu hoan chı̍t tiám hut-jiân pēⁿ chin siong-tiōng, kò͘ ê lâng lóng siān, tuh-ku khı̀. Hut-jiân thiaⁿ Hok-goân peh hoah kóng, Chú ah goá tı̄ chia chhiáⁿ lí chiap-la̍p goá. Hok-goân ḿ in tāi-ke hia̍hⁿ cheng-sı̂n, khoàⁿ i ê khùi í-keng tn̄g, hióng-siū 69 hoè. Hok-goân ḿ chı̍t sim toā iu-būn, lāi-bı̄n tāi-ke khui-siaⁿ háu; chóng-sı̄ chı̍t bı̄n siū an-ùi: in-ūi chai i ū hō͘ Chú chín-kiù. Só͘-í tāi-ke kūi-lo̍h kı̂-tó, tán-hāu thiⁿ kng thang siat-hoat bâi-chòng ê sū. Kàu thiⁿ kng Hok-goân ḿ chiū kiò Bí-hoâi ah khı̀ chhiáⁿ Bo̍k-su.
9 .Chheⁿ-kông tân ê hoé-chhia-lê
Thiⁿ kng Bí-hoâi ah chiū khı̀ chhoē Lı̂m Siù-gio̍k sian-seⁿ iā khı̀ chhoē Bo̍k-su. Chiong só͘ keng-koè ê sū, thâu-boé lóng kóng hō͘ Bo̍k-su thiaⁿ, Bo̍k-su Ko͘-niû tāi-ke iā chı̍t sim iu-būn, chı̍t-sim hoaⁿ-hí. Hok-goân peh ū tit-kiù ê khoán-sit. Chiū an-ùi Bí-hoâi ah, kap i iok-sok ē-po͘ 4 tiám beh chio chē-chē hoē-iú khı̀ sàng-chòng. Hit jı̍t tú-tú pài 2, ē-po͘ 2 tiám ū Hū-jı̂n kı̂-tó-hoē, oá ū 100 liân lâng lâi chū-chı̍p. Ko Ko͘-niû chiong chit chân sū tı̄ kı̂-tó hoē kóng hō͘ chí-moāi chai, tāi-ke thiaⁿ liáu chin tông-chêng. Chē-chē hoaⁿ-hí khı̀ sàng-chòng, kàu 3 tiám kı̂-tó-hoē soah, chiū sûi lâng tò-khı̀ pı̄-pān, ū lâng soà thong-ti pa̍t ê pêng-iú. Só͘-í hit ē-po͘ ê sàng-chòng ū 200 goā lâng, 4 tiám tāi-ke lóng chê-chı̍p kàu Hok-goân peh ê ke. Hok-goân ḿ chhut-lâi ngiâ-chih, iā chiong chêng-hêng kóng hō͘ Bo̍k-su thiaⁿ, kóng Hok-goân peh sui-bóng chiàu tō-lí iáu-boē siáⁿ chai; chóng-sı̄ hoaⁿ-hí ta̍k-hāng chiàu tō-lí ê lé-sò͘ lâi bâi-chòng. Tùi án-ni Bo̍k-su chin hoaⁿ-hí, chiū chiàu lé-sò͘ lâi bâi-chòng i. Tāi-ke hián-chhut ke̍k tông-chêng ê khoán, saⁿ-kap kàu bōng, chē-chē chí-moāi iā kap in lâu ba̍k-sái. Kàu 5 tiám goā, chòng-sek bêng-pe̍k. Bo̍k-su chai chí-moāi kı̄n-lâi pháiⁿ-koè, thâu-chhùi chı̍t-ke 5-ê, koh Hok-goân peh phoà-pēⁿ khai-hùi,iā bô sím-mı̍h hó lâi-lō͘; iū-koh bâi-chòng-hùi khai chē-chē. Chiū kí-gı̄ tùi hoē-chòng ê hiaⁿ-tı̄ chí-moāi, chı̍t lâng chē-chió bō͘-chı̍p tām-po̍h, kiōng oá 50 kho͘, chiū án-ni sàng Hok-goân ḿ khı̀ ēng. Hok-goân ḿ m̄ sêng-siū; chóng-sı̄ āu-lâi siū Bo̍k-su kap chèng-lâng ê hó-ı̀; chiū hoaⁿ-hí sêng-siū iā lâu ba̍k-sái seh-siā. Liáu-āu tāi-ke sı̀ soàⁿ; chóng-sı̄ Ko Ko͘-niû kap Lı̂m Siù-gio̍k sian-siⁿ chin tông-chêng, kap Hok-goân ḿ chò-hoé khı̀ kàu chhù an-ùi i.
Sı̂-jı̍t chin khoài-koè, liâm-piⁿ kàu koè-nı̂ ê 4 goe̍h. Hit sı̂ Má-tán ah seng koè Siáu ha̍k-hāu 2 liân, Bí-hoâi ah Sió ha̍k-hāu chut-gia̍p. Chut-gia̍p-sek hit jı̍t Lāu-bú iā khı̀ khoàⁿ. Bí-hoâi ah thâu-miâ. Oah ! Lāu-bú moá-pak ê hoaⁿ-hí. Chhut-se̍k cheng-khı̂n, phín-hēng hong-chèng, hō͘ thong hāu ê sian-seⁿ o-ló. Tùi án-ni Ko͘-niû chiū tùi Bo̍k-su siāu-kài, chiàn i jı̍p lán kàu-hoē siat ê Lú-o̍h. Hok-goân ḿ m̄ káⁿ; in-ūi chai bô khùi-la̍t, Ko͘-niû chin hó-ı̀, tah-èng beh thè i siat-hoat. In-ūi in khoàⁿ chit ê cha-bó͘ gín-á seⁿ chò súi, koai koh léng-lı̄, jı̂n-jiá gâu tha̍k-chheh. Lé-pài-jı̍t m̄ bat bô lé-pài, chin jia̍t-sim. Kin-nı̂ tú 16 hoè, sı̄ chin ē poê-iúⁿ tit, ū toā ǹg-bāng ê cha-bó͘ gín-ná. Só͘-í tı̍t-tı̍t kó͘-bú Hok-goân ḿ tio̍h hō͘ i tha̍k, Hok-goân ḿ siū in ê kó͘-bú, cha-bó͘ kiáⁿ iā chin ài tha̍k. Tùi án-ni tı̄ 4 goe̍h chiū koh khı̀ tha̍k Pó-tēng siâⁿ ê Tiúⁿ-ló-kàu Ko-téng Lú-ha̍k-ı̄ⁿ. Taⁿ chia chhiáⁿ àn-hā.
Kóng Thian-sù ah tiàm Lâm-kiaⁿ hū-kı̄n chng-siā ê cheng-bí kang-tiûⁿ chò ku-lí, tō͘ koè-jı̍t. Ū chı̍t jı̍t jiám tio̍h phoà-pēⁿ, sı̄ chò-lı̄, put-sı̂ pàng, lâng pı̀ⁿ chin sán chin pháiⁿ-khoàⁿ, bô lâng thang chiàu-kò͘ i, saⁿ-á-khò͘ phoà iâm-iâm, sin-khu choân sian, thâu-mn̂g phah-kat-kiû. Khùn tı̄ chı̍t keng phoà-phoà chiú-keⁿ liâu-á, seng-khu chhàu-hiàn tı̄-toa̍h, chí-ū káu sı̄ i ê hó pêng-iú. Tùi hia koè ê lâng chē-chē lâng phùi chhùi-noā, ū-ê ng phı̄ⁿ-khang. Ah ! Kàu chia Thian-sù ah ka-tı̄ siūⁿ-liáu chêng chin chı̄n, beh tò-khı̀ iā bô lō͘-hùi, seng-khu chí-ū chhun 8 chiam chı̂ⁿ; iā nā tò-khı̀ hō͘ lâng chai, lâng iā sı̄ beh lia̍h, chı̀n bô pō͘, thè bô lō͘, kin-tú oa̍h-teh iā sı̄ sí, oh-tit ū chhut-thâu-thiⁿ ê jı̍t-chí, siūⁿ lâi siūⁿ khı̀ chiū koat-sim beh chò hoé-chhia-tòng (Chhi-chhám, lo̍k-phek ê ke̍k-thâu thang kám-kài āu-lâi ê chheng-liân). Chiū peh khí-lâi, phiân-ā-phiân. Iā tiàm hia lı̄ oá chiâⁿ-lí-lō͘ ū hoé-chhia-lō͘, chiū-sı̄ Lâm-kiaⁿ beh khı̀ So͘-chiu, Siōng-hái ê soàⁿ-lō͘. Chia chhiáⁿ àn-hā. Kóng chhù-nih tùi kúi-nā-jı̍t chêng Hok-goân ḿ kap sim-pū ke-lāi ê lâng lóng hut-jiân sim chin kan-khó͘, chhin-chhiūⁿ ū chio̍h-thâu that teh; chóng-sı̄ in ê sim bô loé-chı̀. Chá-khí ê-hng ta-ke sim-pū kap sun-á lóng chū-chı̍p lé-pài, bô chı̍t-pái bô ūi-tio̍h i ê kiáⁿ Thian-sù ah lâi kı̂-tó. Te̍k-pia̍t, tùi chit kı̄n-jı̍t sim toā kan-khó͘, tāi-ke khah pek-chhiat kı̂-tó kàu ta-ke sim-pū lâu ba̍k-sái, kiû Siōng-tè tio̍h kiù i ê kiáⁿ.
Hut-jiân tı̄ pài-6 ē-po͘, Lú-ha̍k-ı̄ⁿ ê goā-chhut-jı̍t Bí-hoâi ah tùi Lú-o̍h tò-lâi iā tùi Lāu-bú kóng chiah kú hut-jiân sim iā sı̄ chin kan-khó͘. Cha-mê bāng-kı̀ⁿ in kiáⁿ phoà-pēⁿ chin siong-tiōng. Kóng tó-tı̄ lō͘-piⁿ àm-sı̂ iā bô kah-phoē. Kóng liáu tāi-ke tâm-lūn, chiū ta-ke sim-pū, bó-kiáⁿ hiaⁿ-só sió-ko͘ 3-ê kūi-kūi teh thı̂-khàu lâu ba̍k-sái pek-chhiat kiû Siōng-tè.
Kóng Thian-sù ah nā kó-chin ū tı̄-teh chiū bāng Chú kiù i thoat-lı̄ kan-khó͘ kiù hoê-thâu, (in sui-bóng m̄-chai Thian-sù ah ê sí-oa̍h; chóng-sı̄ chiàu in ê ı̀-sù sı̄ sı̀n i iáu oa̍h; iā chhim-sı̀n Siōng-tè, pek-chhiat mê-jı̍t kı̂-tó bô ià. Thang khó-chhú); Chia chhiáⁿ àn-hā. Kóng Thian-sù ah. Chin-sı̍t tı̍t-tı̍t phiân, phiân kàu hoé-chhia lō͘-piⁿ. chiū tó-tı̄ chhia-lō͘ nih beh tán kip-hêng chhia tùi hia koh koè. Hit sı̂ tú hông-hun-àm 7 tiám liân koh oá poàⁿ tiám-cheng kú, chiâⁿ-sı̍t, tùi Lâm-kiaⁿ khí-sin beh khı̀ Siōng-hái hù hoé-chûn chhut-phâng-kı̂ ê choè-tāi kip-hêng chhia teh lâi. Hit ê hoé-chhia hù-hù kiò ê siaⁿ, Thian-sù ah ê thâu-khak tó-tı̄ hoé-chhia-lō͘ : só͘-í oá 2 lí lō͘ chiū ū thiaⁿ tio̍h hit ê chhia siaⁿ hù-hù kiò. Tı̄ hit sı̂ sim toā kan-khó͘, chı̍t sim siūⁿ oa̍h-teh bô lō͘-ēng, koat-toàn ài sí; chı̍t sim siūⁿ i hoān-choē hiah tāng, sí liáu nā chiâⁿ-sı̍t ū tē-ge̍k, iā i bô chı̂ⁿ thang chò sai-kong, ún-tàng ē lo̍h hong-kó͘ chio̍h-bō; chı̍t sim siūⁿ tio̍h pē-bó tı̄ Pó-tēng siâⁿ chhia-thâu, tong sı̂ beh sàng i chhut-hoat khı̀ Phû-lōng-só͘ ê sı̂ khàu kah hūn-lo̍h-khı̀; iā chit pang nā sí, ún-tàng ē hō͘ pē-bó háu khah thiám; koh chı̍t sim iā siūⁿ tio̍h i ê kiáⁿ Má-tán ah kin-nı̂ 9 hoè lah, chiū siūⁿ sí m̄ ta̍t; m̄-kú bô sí kàu chia kin-tú iā sı̄ kiâⁿ bô lō͘ lah. Só͘-í khàu-khàu leh, chheh-sim beh hō͘ i kauh. Ah ! Hoé-chhia kàu lah, oá 10 goā tn̄g hn̄g, hoāⁿ ki-koan chhia ê lâng, khoàⁿ tio̍h ū lâng tı̄ chhia-lō͘, tı̍t-tı̍t tân lê, hoé-chhia iū tòng bē tiām. Ah ! gûi-hiám ò͘ ! gûi-hiám ò͘ ! sái hoé-chhia ê lâng hoah kàu chiâⁿ toā siaⁿ.
10.Koè-kè ia̍h ê Chı̂ⁿ-siuⁿ-á
Ah ! Hiám-hiám choa̍h chı̍t tiám: koh tú chhun tn̄g goā hn̄g chiū ē kauh tio̍h ê sı̂, ū chı̍t ê sûn chhia-lō͘ ê thih-lō͘ kang-hu tùi hia lâi, thiaⁿ tio̍h hoé-chhia-lê kap jiáng gûi-hiám ê siaⁿ, chiū cháu oá-lâi, khoàⁿ Thian-sù ah tó-tı̄ hia, kín-kín kā i thoa cháu. Tú thoa lı̄ chhia-lō͘ 3, 4 chhioh hn̄g, hoé-chhia tú kàu ūi, kai-chài tùi án-ni kauh bô tio̍h. Hoé-chhia tùi án-ni tı̍t-tı̍t koè, lâng-kheh tāi-ke chin kiaⁿ, lóng àⁿ tùi thang-á goā chhut lâi khoàⁿ. Hoé-chhia koè liáu, soàⁿ-lō͘ kang-hu chiong Thian-sù ah kā i chhoā khı̀ kau kéng-chhat. Hit sı̂ chin sán beh sí beh sí, kin-nı̂ 33 hoè lah, chhùi-chhiu bô siu bı̄n bô sé kap chá-chêng toā koh-iūⁿ. Chêng khui tı̂n-í tiàm hit sı̂ ū chı̂ⁿ, chhoā sè-ı̂, hoat-hok, bô chhùi-chhiu; chit-tia̍p chı̍t-ê chhin-chhiūⁿ kúi. Bô lâng ē jı̄n-tit, iā kap chêng hō͘ lâng oē siōng beh lia̍h ê hêng toā koh-iūⁿ. Iā i kóng i sı̄ So͘-chiu-siâⁿ hū-kı̄n ê kan-khó͘ lâng, sèⁿ Lı̂m miâ Thian-lâi lâi Lâm-kiaⁿ thàn-chia̍h. Só͘-í kéng-chhat bô giâu-gı̂ (Chi-ná ê hō͘-kháu bô chéng-chê) chiū kā i sàng jı̍p Hêng-lú pēⁿ-ı̄ⁿ (chhut-goā lâng phoà-pēⁿ siu-iông ê ūi). Jı̍p-ı̄ⁿ chiâⁿ lé-pài chiū í-keng khah hó. Ū chı̍t mê khùn-khı̀, liông-sim chū-chek, bāng kı̀ⁿ i tı̄ chhù nih bē tı̂n-í kap lâng-kheh sio-phah ê sū, bāng liáu chhut-siaⁿ teh jiáng. Jiáng kóng, Hō͘ lí sí ah ! Lí án-choáⁿ mē goá Phû-lōng-chiá hoè. Jiáng liáu khí kha chiū that-khı̀, hām-bı̂n hām-bı̂n that tùi pı̂n-pang lo̍h-khı̀. Phiàng chı̍t-ê chin toā siaⁿ. Keh-piah ū chı̍t ê lâng chhéⁿ, thiaⁿ chiah-ê oē sim chin giâu-gı̂. Thian-sù ah ka-tı̄ hia̍hⁿ cheng-sı̂n, i chai hām-bı̂n-oē ū làu-kháu, kha sui-sı̄ that chı̍t ē chin thiàⁿ; chóng-sı̄ m̄-káⁿ ai chhut siaⁿ (Liông-sim khiàn-chek). Thiⁿ-kng keh-piah hit ê hoān-chiá, chiong chit chân sū àm-chēⁿ kā ı̄ⁿ-tiúⁿ kóng. Īⁿ-tiúⁿ iā chin sè-jı̄, lóng m̄-káⁿ phah chheⁿ-kiaⁿ--i, chóng-sı̄ put-chí chù-ı̀ teh khoàⁿ i ê tōng-chok. Thian-sù ah tùi hit mê làu-kháu, ka-tı̄ iā bô pêng-an. Só͘-í ka-tı̄ chheⁿ-kiaⁿ, soà só͘-chò kap chêng-jı̍t bô siāng, chiū it-hoat hō͘-lâng chin chù-ı̀, ka-tı̄ iā ná chhàu-sim-gı̂, phah-sǹg sū ē phoà. Kàu keh kúi-nā-jı̍t, hit mê goe̍h kng, chiū siūⁿ beh thau-cháu chhut ı̄ⁿ. Só͘-í chiū bi tùi pēⁿ-sek ê āu-boé mn̂g chhut-khı̀. Beh cháu m̄-kú bô só͘-hùi, hit sı̂ sin-thé í-keng oa̍h-tāng lah, chiū jı̍p pēⁿ-ı̄ⁿ ê sū-bū sek. Chhàu-khám hit-mê sū-bū-sek ê mn̂g koh bô só, chiū khui jı̍p-khı̀. Tı̄ koè-kè-ia̍h ê toh-téng, ū 1 ê chı̂ⁿ-kūi-á tı̄-hia. I chiū tı̄-hia ēng chı̍t ki to-á teh kā i kiāu.
Hit sı̂ tú ū chı̍t ê tong-tı̍t sûn pēⁿ-lâng ê i-su kap khàn-hō͘-hū beh jı̍p lâi gia̍h kiám-un-khı̀, chiū hoah-chha̍t. Tùi án-ni ı̄ⁿ-lāi ê lâng lóng cheng-sı̂n, ûi chhut-lâi, Koh pēⁿ-ı̄ⁿ chiu-ûi chng-á-chhiûⁿ chin koân, cháu bô lō͘, hō͘ lâng lia̍h tio̍h, chai sı̄ Lı̂m Thian-lâi, thiⁿ-kng ı̄ⁿ-tiúⁿ chin siū-khı̀, kā i sàng khı̀ Lâm-kiaⁿ tiong-iong kéng-chhat-su, kā i sím-mn̄g, iā kiò keh-piah ê hoān-chiá lâi tùi-chí, kóng lí bó͘ mê-hng oá poàⁿ-mê āu 12 tiám goā, hoah kóng, "Hō͘ lí sí ah, lí án-choáⁿ mē goá Phû-lōng-chiá hoè." He sı̄ sím-mı̍h ı̀-sù ? Iā khı̀ tiàu i khı̀ chò ku-lí hit ūi ê cheng-bí-só͘ ê lâng lâi tiau-cha, khoàⁿ tı̄-sı̂ chiah chhiàⁿ chit ê lâng. Kóng sı̄ tùi chûn-nı̂ 6, 7 goe̍h; iā m̄-chai i sı̄ tùi tó-ūi lâi. Khí-thâu jı̍t-sı̂ bô lâi, lóng àm-sı̂ lâi chò-kang; iā m̄-chai i tı̄ sím-mı̍h só͘-chāi khùn. Ná chhâ ná giâu-gı̂. Iā tiàu thong Lâm-kiaⁿ i-ho̍k kó͘-bu̍t-siong ê chú-lâng, lâi jı̄n khoàⁿ i só͘ chhēng ê kó͘-i tı̄ tó-ūi bé-ê. Āu-lâi chı̍t ê lâng chhut-lâi jı̄n kóng, Sı̄ tı̄ i ê tiàm-nih bé-ê, sı̄ chá-khí-sı̂ thàu-chá lâi bé, iáu ē jı̄n-tit. Bē i 2 niá; chı̍t niá sı̄ thô͘-chúi sai-hū ê kū-saⁿ. Tùi án-ni chiū chin giâu-gı̂. Kéng-chhat su-tiúⁿ chiū khı̀ the̍h kúi-nā tiuⁿ kı̄n-lâi ê tiōng-hoan oē hêng-siōng beh lia̍h ê lâng ê siōng chhut-âi. Hō͘ bē kó͘-i ê thâu-ke kap cheng-bí-só͘ ê thâu-ke jı̄n, khoàⁿ chêng i ê khoán ū chhin-chhiūⁿ chiah-ê siōng lāi-bı̄n só͘ ū ê lâng-hêng á-bô. Jı̄n lâi jı̄n khı̀, 2 ê lóng kóng hit ê bı̄n chhin-chhiūⁿ Tân Thian-sù hit tiuⁿ. Thian-sù ah chı̍t sı̂ bı̄n lóng sit-sek. Kéng-chhat sū-tiúⁿ chiū tı̍t-tı̍t kā i chhâ-mn̄g. Choē teh siu, chiū ı̀n kàu ihN-ihN ngh-ngh. Tùi án-ni chiū kiò tiān-oē khı̀ chiàu-hoē Lâm kéng-chhat-su. Kiò hia tiau-cha chûn nı̂ Lâm kéng-chhat-su ê pı̀-bı̍t àn. Tiau-cha liáu, chiū chhoē tio̍h bó͘ nı̂ goe̍h jı̍t ê sı̂, ū chı̍t ê bē hēng-jı̂n-tê--ê, kóng ū jiok tio̍h Tân Thian-sù ê sū, chiū khı̀ tiàu bē hēng-jı̂n-tê--ê lâi . Bē hēng-jı̂n-tê--ê lâi, liâm-piⁿ jı̄n tio̍h. Chiū tı̍t-chí i tı̄ Thiⁿ-kong-toâⁿ khoàⁿ kò-sı̄ thó͘ toā khùi chàm-kha kóng, "Khó͘ ah! Goá ê chò-lâng, kin-á-jı̍t kàu chia thiⁿ choa̍t goá ê lō͘ lah," Tū chı̍t-ē. Thian-sù ah lóng bô oē (m̄-sı̄ bô pò; sı̄ jı̍t-chí boē-tò, ke-nn̄g khah ba̍t iā ū phāng) bı̄n pı̀ⁿ sí-lâng-sek. Tùi án-ni ko͘-put-chiong tio̍h jı̄n. Chiū siū sàng lo̍h Hoat-ı̄ⁿ, Hoat-ı̄ⁿ tı̍t-chiap sàng hō͘ Pó-tēng siâⁿ ê Hoat-ı̄ⁿ. Pó-tēng siâⁿ ê Hoat-ı̄ⁿ chiap tio̍h chit kiāⁿ sū, chiū koat-tēng tı̄ 5 goe̍h chhe-it beh kong-phoàⁿ. Chit ê tāi-chı̀ ū chhut-tı̄ sin-bûn, Bí-hoâi ah tāi-seng chai, in-ūi Lú-o̍h ū bé sin-bûn. Chiū cháu tò-lâi pò in lāu-bú. Hok-goân ḿ thiaⁿ chı̍t ē, chı̍t sim hoaⁿ-hí, chı̍t sim iu-būn. Hoaⁿ-hí, sı̄ hoaⁿ-hí kiáⁿ iáu-oa̍h; hoân-ló, sı̄ hoân-ló kiáⁿ hō͘-lâng beh kong-phoàⁿ. Sı̂ í-keng kàu, 5 goe̍h chhe-it 8 tiám beh khui-têng kong-phoàⁿ. Boē kàu tiám, Kong-têng ê lâng lóng boán-oân. Goân-kò sı̄ hō͘ i phah-sí hit ê lâng-kheh ê kiáⁿ, kap hit jı̍t khı̀ sı̍t-tē tiau-cha ê kéng-chhat. Mn̄g kúi-nā kù Thian-sù ah chai chèⁿ bô chhái kang, chiū jı̄n. Tùi án-ni chiū soan-kò bû-kı̂-tô͘-hêng, kā i sàng khı̀ Pak-kiaⁿ koaiⁿ-kaⁿ. Taⁿ ài chai koaiⁿ-liáu cháiⁿ-iūⁿ, chhiáⁿ khoàⁿ āu-hoê.
11.Pài 2 ē-po͘ ê Kı̂-tó hoē
Boeh chhut-hoat chē hoé-chhia khı̀ Pak-kiaⁿ kaⁿ-ga̍k ê sı̂, Hok-goân ḿ kap sim-pū, kap Bí-hoâi ah, Má-tán ah 4-ê lóng khı̀ chhia-thâu khoàⁿ. Hit sı̂ bo̍k-su kap Ko͘-niû iā khı̀. Tı̄ chhia-thâu tāi-ke sio-jı̄n, khí-thâu Khàn-siú kap ah-sàng ê kaⁿ-ga̍k Kam-tok, m̄ chún in kóng-oē; nā-sı̄ Bo̍k-su thè Hok-goân ḿ kiû, chiū chún i 10 hun cheng kú bó-kiáⁿ, ang-bó͘, hiaⁿ-moāi, pē-kiáⁿ, tāi-ke kı̀ⁿ-bı̄n. Hit sı̂ chı̍t-sı̂ 5 ê lám-lám-teh, khàu kàu ò͘-ò͘ kiò chhin-chhiūⁿ gû. Kiaⁿ-tio̍h thong chhia-tiûⁿ ê lâng, chı̍t-sı̂ chhia-thâu ê lâng-kheh loān kún-kún: Khàn-siú kap Kéng-chhat hoah in tio̍h tiām-tiām, m̄-thang háu; nā bô m̄-chún in kóng-oē. In chiū tiām-tiām, Hok-goân ḿ chiū kā i kóng, kiáⁿ ah, Lí ê A-pa í-keng tı̄ kū-nı̂ 8 goe̍h 15 tiong-chhiu-mê sí-khı̀ lah, chı̍t-ke chhun 4 lâng: Bí-hoâi ah khı̀ jı̍p Lú-o̍h, Má-tán ah khı̀ tha̍k Siáu-ha̍k-hāu, kan-khó͘ teh koè-jı̍t. Iā siōng iàu-kín kā I kóng, Taⁿ choân-ke lóng ū pài Siōng-tè. Chóng-sı̄ Thian-sù ah iáu sı̄ oàn-hı̄n tō-lí; m̄-kú chit-tia̍p thiaⁿ in lāu-bú kóng Bo̍k-su ê hō͘-thāi kap sió-moāi siū Ko͘-niû pang-chān khı̀ tha̍k Lú-o̍h, chı̍t sı̂ khiok iā sı̄ kám-sim; m̄-kú sı̄ chit hı̄ⁿ jı̍p hit hı̄ⁿ chhut. Hok-goân ḿ kóng-liáu chiū kūi lo̍h thè i kı̂-tó, kiû Siōng-tè kiù--i. I chò i ba̍k-chiu kim-kim, khiok iā sı̄ bo̍k-koài; in-ūi i tō bô thiaⁿ tō-lí.
Koh kúi hun cheng hoé-chhia beh chhut-hoat lah, chiū m̄-chún in koh kóng, chiū kā i thoa chiūⁿ hoé-chhia. Bó-kiáⁿ tāi-ke ba̍k-sái nih-nih lâu pun-khui, Tùi án-ni Thian-sù ah chiū khı̀ koaiⁿ tı̄ Pak-kiaⁿ ê kaⁿ-ga̍k, chò bû-kı̂-tô͘ ê siû-hoān. Sim-pū í-kı̍p Bí-hoâi ah, kap Hok-goân ḿ, bo̍k-su tāi-ke iân-lō͘ lâu ba̍k-sái tò-lâi. Hit jı̍t tú sı̄ pài-it, keh-jı̍t pài-jı̄ ê Kı̂-tó-hoē, Hok-goân ḿ kap sim-pū lóng chhoā khı̀ hù. Ko͘-niû kóng tō-lí, soà chhiáⁿ chèng chí-moāi pek-chhiat ūi Hok-goân ḿ ê kiáⁿ lâi kı̂-tó. Tāi-ke chin tông-chêng, kı̂-tó kàu lâu ba̍k-sái . Iā ū chiâⁿ 10 ê chí-moāi kap Hok-goân ḿ iok-sok, kóng in lóng beh ta̍k-sı̂ thè i kı̂-tó. Kàu 3 tiám chiū soàⁿ hoē. Hit-mê Hok-goân ḿ thong-mê kūi tı̄ bı̂n-chhn̂g chêng pek-chhiat kı̂-tó, bô pa̍t kù oē; chí-ū tı̍t-tı̍t liām " Chú ah, Chú ah! Lí tio̍h kiù goá ê kiáⁿ o͘h! Goá ê Chú ah! Lí tio̍h kiù goá ê kiáⁿ. Ah! Chú ah, khó lı̂n kiù leh! Kiû lí àⁿ lo̍h thiaⁿ ū choē ê kı̂-tó, Chú ah, Chú, kiù-leh. Ah ! Kiù leh, leh ! " Ba̍k-sái sı̀-lâm-sûi, hit ê pek-chhiat ê siaⁿ, thiaⁿ kàu tı̄ Siōng-tè. Kı̂-tó tiong hut-jiân chhù-lāi ū toā-kng, sı̄ Chú chhut-hiān, khiā tı̄ i ê sin-piⁿ kā i kóng, Chí-moāi ah! Lí bo̍h tit khoà-lū, tio̍h sı̀n Siōng-tè, iā tio̍h sı̀n goá. Lí ê kı̂-tó í-keng ū thiaⁿ kàu Pē ê tau lah! Kàu ū chı̍t jı̍t ún-tàng ê chiáu lí só͘ sı̀n lâi chiâⁿ. Hut-jiân bô--khı̀, pâng-lāi iû-goân àm-àm. (Pek-chhiat ê kı̂-tó Chú ē thiaⁿ). Tùi án-ni Hok-goân ḿ toā kiaⁿ, kín cháu chhut-lâi, hit-sı̂ sı̄ poàⁿ-mê āu tiám goā lah. Kín cháu chhut-lâi kā sim-pū kóng. Sim-pū thiaⁿ-liáu toā hoaⁿ-hí, chiū khí-lâi tiám-teng, gı̂m-si o-ló Siōng-tè.
Keh thiⁿ-kng, chhù-piⁿ sè-sio̍k-lâng, mn̄g in cha-mê án-choáⁿ poàⁿ-mê āu liām kàu ı̄-o-kiò ? Hok-goân ḿ chiū chiong hiah-ê sū kóng hō͘ lâng thiaⁿ, in bô sı̀n Chú: só͘-í bô lâng boeh sı̀n; ū-ê soà hiâm i thâu-náu bô tú-hó. Chóng-sı̄ tùi hit-tia̍p khí, Hok-goân ḿ ê sim, ke 10 hun an-sim. Chia chhiáⁿ àn-hā.
Kóng Thian-sù ah tı̄ Kaⁿ-ga̍k lāi, ta̍k jı̍t chin kan-khó͘, sı̄ koaiⁿ tı̄ lāi-têng kaⁿ. Lāi-bı̄n àm-so-so. Hit nı̂ pháiⁿ nı̂-tang, bí-niû kùi, kaⁿ-ga̍k ê chia̍h-sı̍t chin bái. Siông-siông chia̍h bô 10 hun pá, chhài-se chin bái, lóng sı̄ kiâm-hı̂, chhài-thâu-á. Múi-jı̍t kaⁿ-ga̍k tiúⁿ lâi sûn 2 pái, sûn ê sı̂ lóng tio̍h kūi teh hō͘ i kiám-tiám, m̄-chún i kap keh-piah ê lâng kóng-oē. Ta̍k jı̍t chiàu sı̂-kan, kap i liân chò-hoé hit ê kiông-to͘-hoān, chò-hoé chhut-khı̀ chò kang.
Sı̂-jı̍t chin khoài-koè, liâm-piⁿ koè chı̍t-nı̂ lah. Kaⁿ-ga̍k ê oē-seng koh bô-thang hó, chē-chē lâng phoà-pēⁿ, bı̂n-chhn̂g khùn-tı̄ thô͘-kha, chhu 2 phı̀ⁿ pang, koé nn̄g tè chng-á. Ba̍k-sat chin kāu. Khoán-thāi hiah-ê tiōng-hoān sı̄ chún-chò bô lō͘-ēng ê hoè-mı̍h lah. Só͘-í Thian-sū ah thang kóng sı̄ choa̍t-bāng. M̄-kú chiàu in lāu-bú Hok-goân ḿ ê sı̀n sı̄ Chú beh kiù i ê kiáⁿ, án-ni kiám bē gōng sı̀n mah ? Hok-goân ḿ ê kı̂-tó bô ià-siān. Kaⁿ-ga̍k ê khàn-siú lóng te̍k-pia̍t chù-ı̀ teh khàn-siú: in-ūi chai i ū kûn-thâu; iā sı̄ bat koè Phû-lōng só͘ ê toā húi-lūi. Só͘-í sū-sū ka-poē giâm-siú. Khàn-siú i iā kéng khah ióng, thih-liān iā ka-poē toā tiâu, iā koaiⁿ tı̄ khah chhim-kaⁿ. Ah! Kiám iáu ū tit-kiù ê jı̍t mah? Chı̍t-ê bû-kı̂-tô͘ ê sí hoān!
12.Tô-kaⁿ
Thian-sù ah mê-jı̍t tı̄ kaⁿ-lāi chò-kang, hân-hā iā siông-siông siàu-liám tio̍h hit-jı̍t tı̄ chhia-thâu kap lāu-bú bó-kiáⁿ koh sio-jı̄n ê kong-kéng. Chiū tiāⁿ-tiāⁿ ka-tı̄ lâu ba̍k-sái. Chia chhiáⁿ àn-hā.
Kóng chhù-nih Hok-goân ḿ ê kı̂-tó iáu-kú bô ià. Chai kiáⁿ sı̄ bû-kı̂-tô͘ ê sí-hoān; chóng-sı̄ i ê sı̀n bô piàn-oāⁿ, tùi thiaⁿ tō-lí kàu kin-á-jı̍t, í-keng ūi kiáⁿ mê-jı̍t kı̂-tó 2 nı̂ goā lah. Kàu kin-á-jı̍t i bô chı̍t sut-á ê léng-sim; m̄-kú chiàu jı̂n-chêng lâi siūⁿ, Hok-goân ḿ ê kı̂-tó sı̄ chin bô lí-khı̀, sı̄ gōng-gōng ê kı̂-tó.
Ah! Tı̄ hit nı̂ ê 8 goe̍h 12 jı̍t, sı̄ Thian-sù ah jı̍p-kaⁿ chò bô-kı̂-tô͘ hoān ê moá chı̍t-nı̂ koè 3 goe̍h-jı̍t. Tı̄ hit mê ū hui-siông ê toā tē-tāng, sı̄ chha-put-to Tiong-kok iú-sú í-lâi, bı̄ chêng-iú ê toā tē-tāng. Iā tùi tē-tāng chiū koân-lâu, kang-chhiúⁿ, hoē-siā lóng tó. Poàⁿ-mê āu tùi kúi-nā-ūi hoat-hoé, toā-poàⁿ sı̄ tùi tiān-hoé soàⁿ chhut-hoé. Só͘-í chı̍t-sı̂ iā toā hoé-sio. Pak-kiaⁿ ê kaⁿ-ga̍k iā tó 3 hun 2 khah ke, chhun toā mn̂g , kap chàu-kha, chhng-khò͘ bô tó; kı̂-û ê kaⁿ-ga̍k pâng kap kaⁿ-ga̍k ê kang-tiûⁿ, tāi-khài lóng tó, ū-ê lóng soà sio-khı̀. Hit sı̂ Pak-kiaⁿ ê chhı̄-lāi, lóng toā loān: Só͘-í Khàn-siú chē-chē lóng sûi-lâng kò͘ sèⁿ-miā tô-cháu; ū-ê kín khı̀ khoàⁿ ka-kı̄ ê khiā-ke.
Hit sı̂ Thian-sù ah ê kaⁿ-ga̍k pâng iā lóng tó, tāi-khài hoān-lâng iā lóng sí; chóng-sı̄ hit-sı̂ Thian-sù ah bô sí. Hit-tia̍p i sūn ki-hoē chiū thau tô-kaⁿ. Chhı̄-lāi chin loān: só͘-í i tú-tio̍h hó ki-hoē tı̍t-tı̍t tô-cháu. Cháu kàu chhân-chng tı̍t-tı̍t khı̀. Āu-lâi jı̍t sı̂ bih, mê-sı̂ cháu. Chit pang i m̄ káⁿ cháu tùi pa̍t ê to͘-chhı̄ khı̀, sı̄ tı̍t-tı̍t cháu jı̍p soaⁿ. Chiū cháu-kàu lı̄ Pak-kiaⁿ 60 liân phò͘ ê chhim-soaⁿ. Khı̀ hia chò soaⁿ-chha̍t. Chia chiáⁿ àn-hā.
Kóng kaⁿ-ga̍k hoé-sio āu keh-jı̍t, chiū toā tiau-cha, chiū chai kaⁿ-ga̍k kiōng liáu kúi-nā cha̍p bān, hoān-lâng tô-cháu chin-chē; chóng-sı̄ khah chē lâng sı̄ siūⁿ Thian-sù ah í-keng sí; in-ūi in tiàm ê ga̍k-pâng lóng tó; iā-sı̄ sio liáu-liáu, koh tē-tāng poàⁿ-mê āu; chóng-sı̄ in m̄-chai hit sı̂ Thian-sù ah kap tâng liân chò-hoé hit ê lâng, 2 ê kûn-thâu lóng chin hó, ē poe-thiàu chin koân, tú tē-tāng ê sı̂ , chhù boé tó, in í-keng piàⁿ chhut lâi. Khoàⁿ tang-lâm kak ê ga̍k chhiûⁿ ū tó chı̍t ūi-á, chhun-oá chiâⁿ tn̄g koân. Hit sı̂ 2-ê í-keng thiàu chhut chhiûⁿ cháu khı̀ lah. Khàn-siú ê lâng kiaⁿ sí boē chēng boē chiū cháu: só͘-í m̄-chai Thian-sù ah in tùi tó-khı̀, iā kiaⁿ kaⁿ-ga̍k tiúⁿ hêng-hoa̍t: só͘-í tı̍t-tı̍t chèng-bêng Thian-sù ah sı̄ sio-sí lah. Tùi án-ni chiū tāi-ke bô sím-mı̍h teh tı̀-ı̀ Thian-sù ah ê sū. Chia chhiáⁿ àn-hā.
Kóng chhù-nih Bí-hoâi í-keng seng-koè Lú-o̍h 2 liân, seng-liân ê sêng-chek iā sı̄ chin hó. Kin-nı̂ í-keng 17 hoè, lâi tùi Hok-goân ḿ kiû-chhin ê lâng iā-sı̄ chin-chē. Ū-ê sı̄ chin hó-gia̍h, ū-ê kiáⁿ-sài-châi seⁿ chò chin hó; chóng-sı̄ Hok-goân ḿ i ê ı̀-sù lóng bô teh tiōng sè-kan: in-ūi chêng in iā bat hó-gia̍h koè, só͘-í i chai hó-gia̍h m̄-sı̄ thang him-soān ê sū. Iā kiáⁿ-sài châi hó, bô lı̄-ek. In Thian-sù ah mā sı̄ seⁿ-chò chin hó. Só͘-í i iàu-kín beh chhú 2 hāng:
(1)Chiū-sı̄ jia̍t-sim pài Siōng-tè, (2) Ū chı̀-khı̀ láu-sı̍t ê lâng. Só͘-í ū chē-chē sè-sio̍k lâng, sui-bóng chin ū sè-le̍k, hó-gia̍h, lâi teh kóng, i lóng m̄ èng-ún i. Koh chı̍t-hāng: Ko͘-niû in iā-sı̄ ū tùi Hok-goân ḿ kóng. In iā tek-khak beh kap i tàu chhoē chı̍t ê tú-hó ê chhin-chiâⁿ. Só͘-í kah i m̄-thang sûi-piān ín chò lâng, in-ūi chiàu Ko͘-niû ê ı̀-sù sı̄ siūⁿ nā ē-tit tú-hó chin ài chhoē chı̍t ê Ki-hoē lâi kap Hok-goân ḿ chham-siông, hō͘ Bí-hoâi ah Lú-o̍h nā chut-gia̍p liáu, koh khı̀ tha̍k khah koân ê ha̍k-hāu, iā āu-lâi thang tò-lâi tàu kà Lú-o̍h. Iā siat-sú nā ài kè, chiū ài kā i chhoē chı̍t ê tú-hó ê chong-kàu ka, ài khó͘-khǹg Hok-goân ḿ lâi hiàn i ê cha-bó͘-kiáⁿ chò Chú ê kang. Hok-goân ḿ chē-chió iā sı̄ chai Ko͘-niû in ê ı̀-kiàn. Só͘-í lâng lâi chò, lóng kā lâng teh khah bān.
Sı̂-jı̍t chin khoài koè, ba̍k chı̍t nih iū-koh keh chı̍t nı̂ lah. Hit sı̂ Bí-hoâi ah í-keng 18 hoè, Lú-o̍h Ko-téng pō͘ 3 liân. Sêng-chek iû-goân chin hó. Tú seng koè liân kúi goe̍h-jı̍t, chiū tò lâi chhù-nih hioh-joa̍h. Tı̄ hioh-joa̍h tiong ū i chá-sı̂ chò gín-ná 11, jı̄ hoè chò-hoé tı̄ Siáu-ha̍k-hāu ê gín-ná pêng-iú, miâ Lí Iāu-chong. Hit ê gín-ná in tau sı̄ jia̍t-sim ê sı̀n-chiá, sı̄ Pó-tēng siâⁿ Kàu-hoē ê Tiúⁿ-ló. Hit ê gín-ná ke Bí-hoâi ah 2 hoè, chá chò-hoé tha̍k Siáu-ha̍k-hāu ê sı̂, Bí-hoâi ah 12 hoè 2 liân, in-ūi i 10 hoè chiah khı̀ tha̍k; iā Lí Iāu-chong sı̄ 8 hoè chiū khı̀ tha̍k: só͘-í Bí-hoâi ah 12 hoè 2 liân, Iāu-chong ah 14 hoè sı̄ 6 liân. Sui-bóng bô siāng-liân; iáu-kú ūi-tio̍h Hok-goân peh sı̄ kap in lāu-pē hó pêng-iú: só͘-í 2-ê saⁿ-thiàⁿ chhin-chhiūⁿ chí-moāi-á. Bí-hoâi ah tı̄ Sió-ha̍k-hāu ê-sı̂, ū sím-mı̍h m̄ bat, nā mn̄g i, iā ū sím-mı̍h hō͘ lâng khi-hū; i iā tiāⁿ thè-i chhut-thâu. Só͘-í 2-ê chin siong-hó. Iā hiān-sı̂ Iāu-chong tı̄ Pak-kiaⁿ tē-1 ko-téng ha̍k-hāu, chin chhang-miâ. Kin-nı̂ 20 hoè. 14 chut-gia̍p Siáu-ha̍k-hāu, 19 hoè pı̍t-gia̍p Pó-tēng Tiong-ha̍k. Kin-nı̂ sı̄ Ko-téng ha̍k-hāu 2-liân. Tiúⁿ-ló sı̄ ē tit koè ê lâng. Só͘-í sim ài kā i poê-iúⁿ kàu jı̍p Tāi-ha̍k. Iā tı̀-ı̀ ài i jı̍p Sı̂n-ha̍k-pō͘, āu-lâi chhut lâi thang chò pún-siâⁿ ê Bo̍k-su. Hit sı̂ iā tú-tú pàng-kè, tò lâi hioh-khùn. Thiaⁿ lāu-pē teh kóng-khí Bí-hoâi ah in iā lâi sı̀n Chú, iā kóng in hiaⁿ ê sū, iā kóng Bí-hoâi ah iā khı̀ tha̍k Lú-o̍h Ko-téng kho ê sū, chiū chin hoaⁿ-hí. Poah-kang khı̀ thàm Bí-hoâi ah. Khı̀, tāi-ke chı̍t ē kı̀ⁿ-bı̄n, chin hoaⁿ-hí, oán-jiân hiaⁿ-moāi. Koh kóng-khí tı̄ Siáu-ha̍k-hāu sı̂-tāi ê chêng-hêng. Kóng kàu chin chhù-bı̄. Ū chı̍t ē-á, Iāu-chong ah chiū mn̄g, Hok-goân peh khı̀ tó-ūi ? Bí-hoâi ah, ı̀n kóng, Tı̄ kúi-nā nı̂ chêng í-keng sí lah. Iāu-chong thiaⁿ chı̍t ē tio̍h kiaⁿ, mn̄g Hok-goân ḿ kóng, Hok-goân peh tio̍h sím-mı̍h pēⁿ sí? Hok-goân ḿ, chêng-thâu it-lí lóng kóng hō͘ i thiaⁿ. Iāu-chong ah thiaⁿ liáu iā lâu ba̍k-sái. I sı̄ chin ū chêng ê lâng. Bí-hoâi ah iā háu. Iāu-chong mn̄g, Hok-goân ḿ khoàⁿ Hok-goân peh sí ê sı̂ ū thiaⁿ tō-lí á iáu-boē? Hok-goân ḿ kā i kóng, Ū. Tùi án-ni chiū tāi-ke koh kóng pa̍t-mı̍h lâi chò an-ùi. Sı̂ í-keng hông-hun; chóng-sı̄ 2-ê siàu-liân lâng chin chhin-chhiūⁿ chêng-tâu-ı̀-ha̍p. Hit àm Iāu-chong ah soà tiàm tı̄ in hia hō͘ in chhiáⁿ. Hok-goân ḿ chin hoaⁿ-hí, thâi ke chhiáⁿ--i. Bí-hoâi ah kā thiⁿ-pn̄g, tāi-ke kap lāu-bú, hiaⁿ-só, sun-á chhin-chhiūⁿ ke-lāi ê lâng, chò-hoé chia̍h pn̄g. Chia̍h pá, Iāu-chong ah chiū kap in saⁿ-sı̂ beh tò-khı̀. Hok-goân ḿ kap Bí-hoâi iā lóng sàng i kàu toā mn̂g-goā, chiū chhiáⁿ i koh lâi chē. Iāu-chong ah iā kín seh siā, liáu-āu saⁿ-sı̂. Kiâⁿ oá kàu chiâⁿ 10 pō͘ ê sı̂, hut-jiân Bí-hoâi ah kiò Iāu-chong ah kā i kóng, Iāu-chong hiaⁿ, goán bı̂n-á ē-po͘ kap ka-bú khı̀ soaⁿ nih khoàⁿ ka-hū ê bōng, m̄-chai lí ū ki-hoē thang chò-hoé khı̀ kiâⁿ-kiâⁿ á-bô? Iāu-chong chin hoaⁿ-hí: in-ūi Hok-goân peh oa̍h tang-sı̂ iā chin thiàⁿ--i. Sè-hàn ê sı̂ nā lâi Hok-goân peh hia, Hok-goân peh tiāⁿ bé mı̍h hō͘ i, chit-hāng chit-hāng. Só͘-í iā sı̄ chin siàu-liām i ê thiàⁿ. Koh Bí-hoâi ah teh chio, chiū chin hoaⁿ-hí ín--i, tāi-ke iok-sok bı̂n-á-chài beh khı̀ khoàⁿ bōng, chiū saⁿ-sı̂ tò-khı̀. Tı̄ in ê saⁿ-sı̂ ê oē, siaⁿ, khoán-sit, sı̍t-chāi chin oh-tit hō͘-lâng bē kı̀-tit ê khoán.
