Gí-giân chiap-chhiok ê chhiò-oē

Tiong-kok-oē cháu lâi Tâi-oân chham Tâi-oân-oē chiap-chhiok, ū sán-seng chin chē chhiò-oē, kı̂-tiong ū kúi-ê chin sim-sek, goá kā kı̀-lok tiàm chia: 1. Kàu-tn̂g Chı̍t-ê nı̂-khin ê ma-ma, chhoā i saⁿ hoè ê gín-á lâi Tang-hái tāi-ha̍k chhit-thô. Tang-hái tāi-ha̍k ê kàu-tn̂g chin súi chin ū miâ. Ma-ma iōng Hoâ-gí kā gín-á kóng: “Ni khan, jiau-tang!” Gín-á chiū àⁿ--lo̍h-khı̀,tiàm thô͘-kha it-tı̍t chhoē,I m̄ kiaⁿ thâng, koh chiok ài sńg thâng--ê, chhoē lóng bô, chı̍t-ki chhùi àu-tū-tū, kóng: “Lí kóng ‘chia ū thâng’, a̍h bô iáⁿ !” 2. Chia tán A-hoat--a khı̀ chia̍h goā-séng-á mı̄ ê sı̂, thâu-ke mı̄ chú hó tio̍h iōng Tiong-kok-oē mn̄g I kóng: "Chia tan,to͘ u ian,hau pu hau?" A-hoat--a siūⁿ kóng án-ne ke khai-chı̂ⁿ, chiū kā ı̀n kóng : "Chia tán ài ke gō͘ kho͘, bô, goá chhut-lâi goā-kháu tán tō hó." 3. Lí Su-kho chèng-hāu-kûn Lí Su-kho chhiúⁿ gı̂n-hâng liáu-āu, choân Tâi-oân ê gı̂n-hâng, piān khoàⁿ-tio̍h tı̀ bō-á am “kho͘ chau” ê lāu-hoè-á, lóng chin kiaⁿ. Ū chı̍t-kang, ū chı̍t-ê A-peh--a tı̀ bō-á koh am chhùi-am lâi gı̂n-hâng beh niá-chı̂ⁿ. Gı̂n-hâng ê sió-chiá, khoàⁿ I ê tá-pān, sió-khoá kiaⁿ-kiaⁿ, in-ūi chiok sêng Lí Su-kho--ê, tio̍h kā A-peh--a kóng: “A-peh--a, pài-thok lí kā bō-á thǹg--khí-lâi, mā pài-thok lí thǹg ‘kho͘-chau’ chı̍t--ē.” A-peh--a sa lóng bô liâu-á-mn̂g, ba̍k-thâu kat-kat, mn̄g kóng:「Sı̄ án-choáⁿ ài koh thǹg khò͘ cháu-- chı̍t-ē ?」 4. Sòng--ê kóng Tâi-gí Sòng--ê ūi-tio̍h beh phiàn Tâi-oân-lâng ê soán-phiò, chin jı̄n-chin teh o̍h Tâi-gí. I ē tòng-soán Tâi-oân le̍k-sú ûi-it ê chı̍t-jı̄m séng-tiúⁿ, kóng--khí-lâi sı̍t-chāi sı̄ kóng Tâi-gí ê kong-lô. I kóng: “Goá sı̄ chiok thiàⁿ goá hit-ê Tâi-oân-bó͘--ê. Goán bó͘ mā chiok thiàⁿ--goá-leh, ta̍k-kang goá beh khı̀ siōng-pan í-chêng, goán bó͘ lóng mā kā goá ‘thǹg saⁿ-á-khò͘’.” Pún-lâi I sı̄ kóng in bó͘ pang I ‘Thang I-hu’, m̄-koh lâng lóng lia̍h-chún kóng in ang-á-bó͘ kám-chêng hiah-nı̍h hó, ta̍k kang thàu-chá lóng koh chò sán-khùi chiah hun-chhiú. Cha-bó͘ phiò koāⁿ chiok chē koè--khı̀. I kóng: “Goá lâi séng-chèng-hú chò chú-se̍k chiok piàⁿ--ê, í-keng chò ‘chéng-chéng nn̄g-ê nı̂-thâu’.” Ta̍k-ke siūⁿ-kóng: chò kah nn̄g-ê leng-thâu chéng-chéng, án-ni ū kàu piàⁿ tō-tio̍h, chiok kám-tōng--ê. I koh kóng: “Lâng teh chò,thiⁿ teh khoàⁿ，kú thâu saⁿ chhioh ū sı̂n-bêng!” Ta̍k-ke siūⁿ kóng chit-ê lâng thian-seng ı̄-péng, “Ku-thâu” saⁿ chhioh,koh ū sı̂n-bêng,hó lı̄-hāi, it-tēng sı̄ thiⁿ chhiòng eng-bêng,chhut-sè thian-chú-miā, èng-kai ài hō͘ tiâu, nā bô,ge̍k-thiⁿ-bēng. Chiū sı̄ án-ni, chit saⁿ kù Tâi-oân-oē hō͘ Sòng--ê tòng-soán séng-tiúⁿ.