David Wilson------> Loā Bêng-tek（Tiuⁿ Bûn-hiàn ê téng-si）
Mary Carter------> Chng Lē-bí(Tiuⁿ Bûn-hiàn ê tông-sū)
John Duncan------> Tiuⁿ Bûn-hiàn(Pún kò͘-sū ê chú-kak）
Rachel Horsley------>Gô͘ Sò͘-gio̍k(Tiuⁿ Bûn-hiàn ê khan-chhiú)
Christine Duncan---->Tiuⁿ Hūi-chin（Tiuⁿ Bûn-hiàn ê Cha-bó͘-kiáⁿ ）
Andrew Duncan------>Tiuⁿ Tâi-an（Tiuⁿ Bûn-hiàn ê kiáⁿ）
Simon MacDonald-----> Ông Liông-kian（Tiuⁿ Hūi-chin ê ang）
Peter------> Ông Thian-sù(Ông Liông-kian ê pa-pa）
Susan------> So͘ Bí-lêng(Ông Liông-kian ê ma-ma）
Ta̍h-oē-thâu
Hoān-chhò ū nn̄g-khoán, thâu chı̍t hāng sı̄ thiau-ı̀-kò͘--è, tē jı̄ tio̍h-sı̄ bô-sè-jı̄--ê. Chin-chē lâng bô siūⁿ beh hoān-chhò, m̄-koh chha-put-to lán lóng ē bô-tiuⁿ-bô-tı̂ khı̀ hoān--tio̍h.
Choē sı̄ siáⁿ? Kám-sı̄ hoat-lu̍t kui-tēng-ê chiah sı̄, iah sı̄ ûi-poē liông-sim tō sǹg. Tham-sim, po̍k-le̍k, siūⁿ-khı̀, oàn-hūn chia lán lóng chai, m̄-koh khah bô bêng-hián ê choē chhiūⁿ hoán-poē tē-kiû, hoán-poē thiⁿ-khong, hoán-poē hái, hoán-poē tē. Chia--ê sı̄ tùi bı̄-lâi, kiáⁿ-sun só͘ hoān ê choē; mā sı̄ lán ba̍k-chiu peh bô kim, bô tio̍h sı̄ ké-chò bô khoàⁿ--kı̀ⁿ.
Tiuⁿ Bûn-hiàn sı̄ seng-bu̍t-ha̍k kang-têng-su. Tng i tı̄ hoà-ha̍k kang-tiûⁿ teh chia̍h-thâu-lō͘ ê sı̂, i siūⁿ kóng sı̄ teh tı̀-ı̀m i ê kiáⁿ. Beh bé toā-keng chhù, chûn, hoaⁿ-hí ê hioh-khùn jı̍t hō͘ in, m̄-koh beh bé siáⁿ khoán ê chiong-lâi hō͘ in leh?
Tim Vicary sı̄ kò͘-sū ê chok-chiá, kà eng-bûn kúi-ā nı̂, hiān-chhú-sı̂ seng-oa̍h kah kang-chok lóng tı̄ York.
It Sin ê Khai-sí
“Tiuⁿ--sian-siⁿ? Chhiáⁿ lí jı̍p--lâi, Loā--sian-siⁿ chit-má beh kı̀ⁿ--lí.”
Bûn-hiàn ı̀n kóng,“To-siā”, khiā--khí-lâi chhong-chhong pōng-pōng kiâⁿ hiòng mn̂g-chhùi. I lâng koân, sán koh po̍h-pán, tāi-io̍k sı̄ 55 hoè lâng. Chhēng chı̍t niá phú-phú ê kū sé-chuh, chit niá sı̄ i siōng hó ê sé-chuh, m̄-koh í-keng ū 10 nı̂--lò͘. I ê thâu-mn̂g phú-phú, ba̍k-kiàⁿ mā kāng-khoán, hông khoàⁿ--khí-lâi bı̄n iu-iu koh siān-siān. Kàu lāi-bı̄n, chı̍t ê cha-po͘-lâng khiā--khí-lâi hoan-gêng. Tùi i kóng, “ Lí kám sı̄ Tiuⁿ--sian-siⁿ? Chin hoaⁿ-hí kah lí saⁿ-kı̀ⁿ. Goá sı̄ Loā Bêng-tek, chit ūi sı̄ lán ê hoà-ha̍k kang-têng-su Chng Lē-bí. ” Tiuⁿ Bûn-hiàn kah In nn̄g ê at chhiú liáu chiah chē--lo̍h-lâi. Chit keng pān-kong-sek put-chí-á toā, thô͘-kha chhu kāu-kāu ê tē-thán, piah-téng koà--ê sı̄ súi-súi ê tô͘. Loā Bêng-tek sı̄ siàu-liân-lâng, sin chhēng chı̍t niá ko-kùi ê sé-chuh, koà chı̍t lia̍p toā-toā lia̍p ê chhiú-chí. Tùi Bûn-hiàn bı̂-chhiò piáu-sı̄ hoan-gêng. “Goá beh Chng sió-chiá jı̍p--lâi sı̄ in-ūi i sı̄ lán siōng-hó ê hoà-ha̍k kang-têng-su. Sı̄ i hoat-hiān lán chiok-chán ê sin chhat-liāu. Hm̄... goá siūⁿ, lí nā lâi tı̄ chia chò, lí ē kah i chò-hoé. ”
Bûn-hiàn ı̀n kóng, “ Ò͘, goá chai”, mā khoàⁿ tùi Lē-bí hia khı̀. Lē-bí pí Bêng-tek khah chē hoè, chha-put-to 35. Bô tek-khak sı̄ ka-pi-sek ê thâu-chang, kah khó-ài, chhin-chhiat ê bı̄n-iông. I chhēng hit niá pe̍h goā-thò téng-koân ê lak-tē-á koà kúi-ā ki pit. I chhin-chhiat teh tùi Bûn-hiàn chhiò, m̄-koh Bûn-hiàn kám-kak àm-àm-tām-tām, jı̄n-ūi tit bē tio̍h chit hūn khang-khoè, in-ūi i siuⁿ lāu, hiān-chhú-sı̂ thâu-ke-lâng lóng ài chhiàⁿ khah siàu-liân--ē.
Bêng-tek ná khoàⁿ chu-liāu ná kóng, “ Tiuⁿ--sian-siⁿ goá chai-iáⁿ lí sı̄ chin gâu ê seng-bu̍t-ha̍k-ka, lí bat tı̄ tāi-ha̍k chò--koè, mā bat tı̄ nn̄g keng chin chhut-miâ ê kong-si chò koè nn̄g tang; m̄-koh lí 9 nı̂ chêng tō bô chò seng-bu̍t-ha̍k ê khang-khoè, sı̄ siáⁿ goân-in? ” Bûn-hiàn kóng, “Goá it seng tiāⁿ-tiāⁿ ê nn̄g hāng hèng-chhù sı̄ seng-bu̍t-ha̍k kah chûn. Gún bó͘ sı̄ chhut-miâ ê chúi-chhiú Gô͘ Sò͘-gio̍k... bô-tek-khak lí ē-kı̀-tit i. I ka-kı̄ chı̍t ê sái phâng-chûn khoân-iû sè-kài.” Bêng-tek ı̀n kóng, “Sı̄, goá ē kı̀ tit i.” Bûn-hiàn kóng, “Gún m̄-chiah khai-sí chò seng-lí, chō phâng-chûn koh kiam bē-chûn.” Tek-á mn̄g kóng, “Seng-lí bē-bái hò͘ⁿ?” Bûn-hiàn kóng, “Tú khai-sí chin hó, liáu āu gún beh chō khah toā khah hó ê phâng-chûn. Chioh chin chē chı̂ⁿ, koh-lâi gún bó͘…” Bûn-hiàn kóng kah chia tō tiām--khı̀.
Tek-á kóng, “Tio̍h! tio̍h! tio̍h! Goá siūⁿ--tio̍h-ah, tō-sı̄ hit-ê Gô͘ Sò͘-gio̍k. ”
Nn̄g lâng tiām 1 khùn,Tek-á siūⁿ-khí tı̄ pò-choá só͘ pò ê thiⁿ-khı̀ kah hái--nih sit-chong ê lâng; khoàⁿ tùi chē tı̄ thâu-chêng hit-ê khó͘-liân ê cha-po͘-lâng.
Bûn-hiàn chiah koh kóng, “M̄-chiah tı̄ 5 nı̂ chêng, gún bó͘ sí liáu, goá tō kā seng-lí siu--khí-lâi. ”
Tek-á kóng,“Goá chai-iáⁿ, kā seng-lí siu--khí-lâi, tùi lí lâi kóng sı̄ kan-khó͘--ê.” Koh khoàⁿ Bûn-hiàn hit niá phú-phú ê kū sé-chuh “ Só͘-í chit-má lí beh chò seng-bu̍t-ha̍k ê khang-khoè, hó, chia sı̄ hoà-ha̍k kang-tiûⁿ, Tiuⁿ--sian-siⁿ. Gún chò chhat-liāu, m̄-koh gún su-iàu seng-bu̍t kang-têng-su lâi khak-jı̄n ta̍k-hāng mı̍h-kiāⁿ lóng sı̄ an-choân. Mā ài ū lâng kā chèng-hú kóng tı̄ chia chia̍h-thâu-lō͘ sı̄ bô gûi-hiám--ê, chng-thâu ê hū-kı̄n ū chı̍t keng chhat-liāu kang-tiûⁿ mā sı̄ sio-siâng an-choân, chia--ê tùi gún sı̄ chin tiōng-iàu. ”
Lē-bí kóng,“Nā ū bô an-choân ê mı̍h-kiāⁿ, lán tō ài kái.” Tek-á khoàⁿ Lē-bí, m̄-koh bô kóng siàⁿ.
Bûn-hiàn khai-sí bē chū-chāi, ı̀n kóng,“Mh, goá chai, goá siūⁿ goá chò ē lâi, goá ê ı̀-sù sı̄ kóng tng goá tı̄ Londen Harper hoà-ha̍k kang-tiûⁿ ê sı̂, goá......” I tâm-lūn i ê khang-khùi ū nn̄g, saⁿ hun-cheng, Tek-á tiām-tiām-á thiaⁿ, bô kóng poàⁿ-kù-oē. Liáu-āu léng-chhiò léng-chhiò, hō͘ Bûn-hiàn kám-kak bē sóng-khoài. Tek-á taⁿ ē kı̀-tit i ê kū sé-chuh, m̄-koh Bûn-hiàn sı̄ chin hi-bāng i bô lâi chia.
Tek-á kóng,“Tiuⁿ--sian-siⁿ, lí kám chin-chiàⁿ ài chit hūn khang-khoè? Chin su-iàu hò͘ⁿ ?”
Bûn-hiàn chin kín tō ı̀n kóng,“Tio̍h, chin su-iàu.” M̄-koh sim lāi teh siūⁿ kóng goá thó-ià lí, Loā Bêng-tek lí tı̄ chia teh hiáng-siū, ài khoàⁿ lâng bē chiūⁿ-ba̍k, goá hiâm kah lí kāng khoán ê lâng.
Tek-á ná chhiò ná toā siaⁿ, khiā--khí-lâi at Bûn-hiàn ê chhiú, koh kóng,“Hó, lí siáⁿ-mih sı̂-chūn ē-tàng lâi chò? ”
Bûn-hiàn toā-kiaⁿ chı̍t-tiô kóng,“Siáⁿ, lí kóng siáⁿ?”
Tek-á kóng,“Goá kóng lí kín chá lâi kín chò, pài-it ē-sái--bô?”
Bûn-hiàn kóng,“Lí sı̄ kóng lín beh chhiàⁿ--goá!”
Tek-á at Bûn-hiàn ê chhiú kóng,“Tong-jiân, kiong-hí! Lí ê sin-súi goá ê pı̀-su ē kā lí soat-bêng, lí ū lí kò-jı̂n ê pān-kong-sek kah kong-si chhia, tong-jiân, goá ài lí kah Lē-bí tı̄ pài-it khai-sí tō kang-chok, hó--bô?”
Bûn-hiàn kóng,“Goá!… hó, hó, tong-jiân hó, to-siā, chin to-siā.”
Jı̄ Tı̄ Chhù
“Pa-pa, lí ê àm-tǹg tı̄ chàu-kha.” Hūi-chin án-ne kóng, Hūi-chin sı̄ Bûn-hiàn ê cha-bó͘-kiáⁿ, 16 hoè, chē tı̄ chheh-toh-á teh chò kong-kò. Bûn-hiàn ê kiáⁿ Tâi-an, 17 hoè, tng teh khoàⁿ tiān-sı̄.
Bûn-hiàn kóng, “ Kám-siā--lí, Hūi-chin, pháiⁿ-sè, goá khah oàⁿ tńg--lâi, lín hó--bô? ”
Hūi-chin chhiò chı̍t-ē kóng,“Hó--ah!” Tō koh kè-siok siá kong-khò, Bûn-hiàn khı̀ chàu-kha the̍h chı̀ⁿ--ê hı̂ kah chhip-su (chips), mı̍h-kiāⁿ ta-sò bô kài hó-chia̍h, m̄-koh lóng bô kóng án-choáⁿ. Bûn-hiàn ka-tı̄ ham-bān chú-chia̍h, i ê kiáⁿ mā hó bē kah tó, i ē kı̀-tit in bó͘ chin gâu chú-chia̍h.
Bûn-hiàn bóng chia̍h bái-jı̍p-âu ê àm-tǹg, koh tùi chit keng sè, koh sán ê kong-ú, 4 kho͘-ûi-á khoàⁿ-khoàⁿ--leh, ka-kū ū 20 nı̂--loh, piah-choá chham tē-thán sı̄ sio̍k koh lah-sap, pâng-keng lóng chin sè, jı̂-chhiáⁿ thang-á-mn̂g khoàⁿ--chhut-khı̀ bô chhiū-á mā bô hoe-hn̂g, khioh sı̄ kı̂-thaⁿ chē-chē ê kong-ú; tı̄ thô͘-kha-tau choân sı̄ chheh, saⁿ kah pò-choá.
Tng in bó͘ tı̄-leh ê sı̂, i ū chán ê chhù, sı̄ chı̍t keng súi koh toā ê chng-kha pia̍t-chong, mā ū chin toā ê hoe-hn̂g. In ū chē-chē ê sin ka-kū, nn̄g tâi chhia, bô sio̍k ê ká-kı̂ kah su-iàu ê chióng-chióng mı̍h-kiāⁿ; ū hó ê thâu-lō͘; m̄-bián hoân-ló chı̂ⁿ; hit-chūn koh khai-sí keng-êng chō phâng-chûn kong-si, liáu-āu tō bô hiah hó-ūn--lò͘.
Tng Sò͘-gio̍k sí ê sı̂-chūn, Bûn-hiàn hui-siông ê thòng-khó͘, mā in-ūi siuⁿ siong-sim bô khı̀ chù-ı̀ seng-lí, m̄-chiah tı̄ kúi kò goe̍h āu kong-si koaiⁿ-mn̂g, só͘-ū ê chı̂ⁿ mā lóng khai liáu-liáu. Chū-án-ne kā chng-kha ê pia̍t-chong bē tiāu, poaⁿ khı̀ sàn-chhiah ê kong-ú.
Nn̄g tang chêng i tō bô thâu-lō͘, mā-sı̄ sàn koh put-hēng ê lâng, ū chhı̀ chhoē koè chin-chē khang-khoè, m̄-koh bô lâng beh tı̍h. In-ūi ū thài-chē chhong-bêng ê siàu-liân seng-bu̍t-ha̍k kang-têng-su, m̄-koh chit-má lóng kái-piàn--lò͘. Chhiò-chhiò khoàⁿ in cha-bó͘-kiáⁿ koh mn̄g kóng, “Hūi-chin, lí tı̄ ha̍k-hāu khoài-lo̍k--bô?” Hūi-chin ı̀n kóng, “ Ò͘, goá siūⁿ sı̄ bē-bái, goá the̍h chı̍t tiuⁿ thong-ti-toaⁿ hō͘ lí.” M̄-koh Hūi-chin khoàⁿ--khí-lâi bô chin khoài-lo̍k.
Hūi-chin kā tı̄ toh-á ê thong-ti thuh hō͘ Bûn-hiàn, Bûn-hiàn phah khui, he sı̄ ha̍k-hāu ê thong-ti, lāi-té siá kóng ū ha̍k-hāu ê lāu-su tı̄ sńg-seh ê hioh-khùn-jı̍t, beh chhoā in khı̀ Switzerland ê soaⁿ--nih. 10 kang ài £ 400kho͘, beh hō͘ in gín-á khı̀ ê sı̄-toā-lâng tı̄ 2 goe̍h 25 chı̀n-chêng ài kā chı̂ⁿ kau hō͘ ha̍k-hāu.
Bûn-hiàn ê chhiò-iông ná lâi ná khui, mn̄g Hūi-chin kóng,“ Chit-ê hioh-khùn-jı̍t lí kám ū beh khı̀?”
Hūi-chin iōng kı̂-koài ê gán-kong khoàⁿ Bûn-hiàn, kóng,“Pa--a, goá tong-jiân siūⁿ beh khı̀, m̄-koh goá bô-hoat-tō͘ khı̀, kám m̄-sı̄--leh? In-ūi lán bô-hoat-tō͘ the̍h chhut £ 400 kho͘.”
Bûn-hiàn thàu-koè kāu-kāu ê ba̍k-kiàⁿ siông-sè khoàⁿ Hūi-chin, koh kóng, “M̄-sı̄, goá siūⁿ m̄-sı̄ án-ne. ” Hūi-chin sı̄ khiáu koh kian-kiông ê cha-bó͘ gín-á, tha̍k-chheh, ūn-tōng lóng chin gâu. M̄-koh i m̄-bat khı̀ sńg-seh, in-ūi Bûn-hiàn bô hiah chē chı̂ⁿ.
Bûn-hiàn mn̄g Hūi-chin kóng,“ Lí ê pêng-iú beh khı̀--bô? ”
Hūi-chin kóng,“Beh--ah, chhiūⁿ Lân--á, Tin--á, Hun--á in khah hó koè--ê, tiāⁿ-tiāⁿ khı̀ sńg-seh, tùi in lâi kóng sı̄ chin kán-tan, pa-á, goá chai-iáⁿ goá bô-hoat-tō͘ khı̀, kā phoe tàn-tiāu--lah.”
Bûn-hiàn khoàⁿ Hūi-chin, sim-koaⁿ pho̍k-pho̍k thiàu, kóng,“Hūi-chin, mài, mài án-ne chò, lí nā beh khı̀, ē-sái khı̀--ah, kám m̄-sı̄--leh?”
Hūi-chin chhiò--lò͘, kóng,“Pa-á, hoat-seng siáⁿ tāi-chı̀? sı̄ chhiúⁿ gı̂n-hâng ia̍h sı̄ pa̍t-hāng? ”
Bûn-hiàn khiā--khí-lâi khı̀ chàu-kha, the̍h i ê liâng-chúi, kiâⁿ--tńg-lâi ê sı̂ kóng,“ M̄-sı̄, m̄-koh kin-á-jı̍t hoat-seng ū ı̀-sù ê tāi-chı̀, Hūi-chin, kā kong-khò khǹg--leh, Tâi-an, kā tiān-sı̄ koaiⁿ-tiāu, goá ū koá-á tāi-chı̀ beh kā lín kóng.”
Tâi-an kóng,“ Ò͘, pa-á, mài chit-má--lah, tiān-sı̄ tng chhı̀-khe̍k neh.”
Bûn-hiàn kóng,“ Goá mā ū chhı̀-khe̍k ê kò͘-sū beh kā lín kóng, Tâi-an lâi chia thiaⁿ.”
Bûn-hiàn in kiáⁿ khiā tı̄ kū koh loān chhau-chhau ê kong-ú, siông-siông chia̍h pháiⁿ-chia̍h ê mı̍h-kiāⁿ, in bô chı̂ⁿ, m̄-koh in iáu koh thiaⁿ in pa-á ê oē, só͘-í Tâi-an koaiⁿ-tiāu tiān-sı̄, chē tı̄ Bûn-hiàn, Hūi-chin piⁿ-á ê phòng-í.
Thâu-á, chit-ê kò͘-sū bē chin chhı̀-khe̍k, Bûn-hiàn kóng,“Kin-á-jı̍t goá khı̀ chı̍t keng kang-tiûⁿ, sı̄ tı̄ hô-piⁿ ê chhat-liāu chhiúⁿ, Tâi-an, thiaⁿ hō͘ hó, chhat-liāu chhiúⁿ ē-tàng kóng chin chán, in hō͘ goá chı̍t hūn khang-khoè, goá tih-beh ū ka-tı̄ ê pān-kong-sek, toā tâi chhia, tō sı̄ ū chin chē chı̂ⁿ, lán beh hó-gia̍h--lò͘...! ”
Saⁿ Hó-gia̍h-lâng
Bûn-hiàn tı̄ pài-it khai-sí siōng-pan, Lē-bí chhoā i khı̀ kang-tiûⁿ sı̀-kè khoàⁿ-khoàⁿ--leh, chit keng kong-si siōng tiōng-iàu ê sán-phín sı̄ chı̍t chióng chhia teh iōng ê sin chhat-liāu, sı̄ chin kian-kò͘ koh tēng ê chhat, bô mı̍h-kiāⁿ ē-tàng kā sún-hāi, sı̄ Lē-bí kah i ê hoà-ha̍k kang-têng-su só͘ hoat-tián--ê, jı̂-chhiáⁿ koh chhı̀-siau khı̀ choân sè-kài. Sng hām iâm-chúi lóng bô-hoat-tō͘ siong--i, chhia tùi Arctic(lâm-kek) kah Sahara soa-bô͘ tńg--lâi, khoàⁿ--khí-lâi iáu ná sin--e.
Kong-si tùi chit-ê chhat-liāu thàn chin chē chı̂ⁿ, mā hō͘ chit-ê chng-thâu ke chhut 400 goā ê khang-khoè.
Ū chı̍t kang, tng Bûn-hiàn chò iú-koan chhat-liāu ê khang-khoè, lı̀ khui hùi-liāu khı̀ bak tio̍h kha, chin kín tō chheng-sé, m̄-koh tı̄ phoê-hu lâu tio̍h âng koh thiàⁿ ê só͘-chāi, sé iā sé bē tiāu, hō͘ i kui-àm bē khùn--tit, i kā i-seng kóng bak--tio̍h ê chêng-hêng, i-seng iōng kı̂-koài ê gán-sı̂n khoàⁿ--i.
I-seng siông-sè mn̄g kóng,“ Só͘-í chia ê hoà-ha̍k-phín, lóng kah sin chhat-liāu ū koan-hē, kám chin-chiàⁿ ū koan-hē? ”
Bûn-hiàn kóng,“ Sı̄--ā, goá kā lí kóng, he sı̄ chı̍t koàn ê hùi-liāu-phín, goá tı̄ pān-kong-sek tng teh koan-chhat--in.”
I-seng khoàⁿ tùi thang-á goā, ná siūⁿ ná kóng,“ Goá liáu-kái, goá siūⁿ lín kong-si tng teh seng-sán chē-chē ê hùi-liāu-phín.” Mā kā chhiú tiām-tiām-á soá kàu toh-á.
Bûn-hiàn chin kín-tiuⁿ kóng,“ Lí khoàⁿ, lí ē-tàng hō͘ goá mı̍h-kiāⁿ tah--bô? ” In-ūi i tı̄ 10 hun-cheng lāi ài kı̀ⁿ tiōng-iàu ê lâng.
“ Ò͘, tong-jiân.” I-seng khai-sí tı̄ chı̍t tiuⁿ choá siá koh kóng,“ Chái-khí, àm-sı̂ tah che, ē thiàⁿ 1,2 kang, m̄-koh goá kiaⁿ phoê-hu ē âng 1,2 tang, Tiuⁿ--sian-siⁿ, lí chai-iáⁿ in sı̄ gûi-hiám ê hoà-hak2-phín.”
Bûn-hiàn chhiò-chhiò-á kóng,“ Sı̄, goá chai, m̄-bián hoân-ló, goá tı̄ kang-tiûⁿ ē chin sió-sim, bô chhēng te̍k-chè ê hō͘-sin-saⁿ ê lâng, bē tàng kiâⁿ-oá--in, lí nā ài, ē-tàng lâi khoàⁿ-khoàⁿ--leh.”
I-seng kóng,“ Chin hoaⁿ-hí lí án-ne kóng.” Koh the̍h chı̍t tiuⁿ choá hō͘ Bûn-hiàn.
Bûn-hiàn kóng,“To-siā!” Koh ǹg mn̂g-chhùi kiâⁿ--chhut-khı̀.
“Tiuⁿ--sian-siⁿ ? ”
Bûn-hiàn kiaⁿ chı̍t-tiô, oa̍t-thâu kóng,“Kiò--goá? ”
I-seng kóng,“Kang-tiûⁿ seng-sán chia ê hùi-liāu, lóng tò-khı̀ tó-ūi? Kám tò jı̍p khı̀ hô--nih?”
Bûn-hiàn kóng,“ Tio̍h--a, tong-jiân.” Chin kín koh kóng,“M̄-koh, lí mā chai in chin hó-sè, gún chin sè-jı̄ teh kiám-cha, hô chiah toā-tiâu, put-kò taⁿ hō͘ gún chı̍t kang seng-sán kúi-pah-á kong-seng ê hùi-liāu niâ, koh-chài kóng, gún lı̄ hái kan-taⁿ 2 kong-lí hn̄g niâ.”
I-seng kóng,“ Hó, goá bô-ài hō͘ jı̄n-hô lâng khı̀ chia̍h chia ê hùi-liāu, oân--ā.”
Bûn-hiàn kóng,“In bē--lah, i-seng lí chai só͘-ū lim ê chúi sı̄ tùi 5 kong-lí hn̄g ê chíⁿ-chúi lâi--ê, tû-liáu thiⁿ-tn̂g-chúi ê iân-kò͘ í-goā, siáng ē khı̀ lim àn hô-kháu lâi ê iâm-chúi? Lí mā chai tùi London lâi ê hoà-ha̍k kang-têng-su, mā kiám-cha--koè, gún kong-si ê lu̍t-su lóng chai, in bô gûi-hiám, goán mā bē hoān-chhò, bián hoân-ló.”
Bûn-hiàn kiâⁿ-chhut mn̂g-chhùi, poàⁿ tiám-cheng koè, tō bē kı̀-tit 2 lâng kóng ê oē.
Bûn-hiàn chit-má sı̄ chin bô-êng ê lâng, kui-kang ài chhek bô kāng-khoán ê chhat-liāu, koh khak-tēng in sı̄ an-choân, mā tng bô-êng bé toā koh sù-sı̄ ê chhù, chhù ê piⁿ-á ū ē-tàng hō͘ Hūi-chin khiâ-bé ê toā-tiâⁿ, chhù lı̄ hái ū poàⁿ kong-lí hn̄g, hoe-hn̂g lo̍h-khı̀ tō sı̄ hô, hia ū chı̍t keng khòng-khoah ê chûn-ok.
Tâi-an mn̄g kóng,“Pa-á, lán ē-tàng ū chûn--bô? Goá siūⁿ tong-jiân m̄-sı̄ chit-má, m̄-koh tng lí hù-oân chhù ê chı̂ⁿ, bô tek-khak, tio̍h--bô?”
Bûn-hiàn chhiò-chhiò, in kiáⁿ í-keng sàn chin kú--lò͘, m̄-koh hiān-chāi i ē-tàng bé in siūⁿ beh bé ê mı̍h-kiāⁿ.
Bûn-hiàn chin hoaⁿ-hí kóng,“ Kiáⁿ--ah, lí nā beh, hiān-chhú-sı̂ tō ē-sái bé chûn, chit-chūn goá bé ē-khí chhiūⁿ chiah toā keng ê chhù, tong-jiân bé ē-khí chûn, lán ē-tàng ta̍k lé-pài khı̀ tiò-hı̂, kám m̄-sı̄--leh? Jı̂-chhiáⁿ goá beh tı̄ ē-tàu kà lín sái-chûn, lín mā chai-iáⁿ goá it-tı̍t siūⁿ beh án-ne chò. ”
Bûn-hiàn bô-hoat-tō͘ siong-sı̀n i ná chiah hó-ūn, boé-á ū hó ê khang-khoè, sù-sı̄ ê chhù, kah hō͘ gín-á in beh tı̍h ê mı̍h-kiāⁿ, ûi-it hi-bāng--ē sı̄ in bó͘ ē-tàng oa̍h--leh, kah i hiáng-siū, chit-má kan-na chı̍t hāng mı̍h-kiāⁿ bô-hoat-tō͘ hō͘ in kiáⁿ--ê, tō sı̄ lāu-bú.
Sı̀ Hái-káu
Kúi kò goe̍h āu, Bûn-hiàn chhiáⁿ Lē-bí lâi sin-chhù chia̍h-pn̄g. Hit àm chin pháiⁿ koè. In-ūi i m̄-bat chhiáⁿ jı̄n-hô lâng khı̀ in khah-chá ê kong-ú, gín-á ê pêng-iú mā m̄-bat lâi chia chia̍h-pn̄g. Sin-chhù sı̄ loān chhau-chhau, tùi chia̍h-mı̍h bô siáⁿ hòng-sim, koh kah Hūi-chin chò-hoé chú ke, in siūⁿ-kóng he chiâⁿ kán-tan, m̄-koh ke chú kah chiáⁿ phı̍h-phu̍h, jı̂-chhiáⁿ pn̄g mā chú-liáu siuⁿ nńg.
Lē-bí sui-jiân chai-iáⁿ m̄-koh chhiò-chhiò, ké chò bô chù-ı̀--tio̍h. M̄-koh hit àm bô hó koè. Hūi-chin tùi i hoat-sèng-tē, in-ūi Lē-bí chéng-lí chàu-kha; Tâi-an mā kāng-khoán, lí-iû sı̄ Lē-bí bô ài khoàⁿ tiān-sı̄. In nn̄g-ê chá-chá tō khı̀ khùn, koh siūⁿ tio̍h in ma-ma.
M̄-koh Lē-bí tı̄ lé-pài koh lâi, Bûn-hiàn chhoā in kàu sin ê chûn--nih, hit kang ê khı̀-hun ke chin hó, Lē-bí m̄-chai beh án-choáⁿ sái, m̄-chiah gín-á ài kà--i, chiàu gín-á kà--i ê khı̀ sái, kám-kak chin hoaⁿ-hí, Bûn-hiàn chē tı̄ chûn ê āu-piah, tiām-tiām khoàⁿ in kiáⁿ, kám-kak in kiáⁿ chin iāng, jı̄n-ūi in mā hō͘ i chin hiau-pai, Lē-bí kah gín-á thâu pái chò-hoé teh chhiò, Bûn-hiàn khoàⁿ--tio̍h chhiò hai-hai.
5 goe̍h tiong m̄-tāⁿ súi koh ū jı̍t-thâu, hông-hun, thiⁿ nâ koh chheng, sái-chûn chiâⁿ chhù-bı̄, chûn sái kín koè pe̍h-chúi-hoe ê sió hái-éng, in sái kàu hô-kháu, hia ū chē-chē ê sió-tó kah soa-chiu.
Tâi-an ke̍k-tōng kí tùi tn̂g koh kē ê soa-chiu kóng,“Pa-á kín khoàⁿ hia! He sı̄ siáⁿ? ”
Bûn-hiàn kóng,“ Hái-káu, lí í-chêng kám m̄-bat khoàⁿ--koè? ”
Tâi-an kóng,“ Taⁿ bat tı̄ iáⁿ-phı̀ⁿ khoàⁿ--koè, m̄-bat tı̄ chin-sı̍t ê seng-oa̍h khoàⁿ--koè, in kám chin-chiàⁿ tı̄ chia seng-oa̍h?” I hoaⁿ-hí kah bı̄n ē hoat-kng.
Bûn-hiàn kóng,“ Sı̄--ā, in sı̄ chit-tı̄n hái-káu ê ka-têng, hái-káu-bó ta̍k nı̂ lâi chia seⁿ gín-á. ”
In sái khah oá soa-chiu, kàu lı̄ hái-káu 20 bí ê só͘-chāi. Sip koh kng ê hái-káu-bó gia̍h-thâu iōng nâ-sek ê ba̍k-chiu khoàⁿ--in. Hái-káu-á-kiáⁿ tng teh suh-leng, teh pah hái-káu-bó, tı̄ chúi-chhián ê só͘-chāi teh sńg, jiân-āu chı̍t chiah hái-káu-kang gia̍h-thâu bô hoaⁿ-hí teh kā in gı̂n.
Lē-bí kóng,“ Goá kám-kak in bē-bái, m̄-chai in tı̄ chia seng-oa̍h, lı̄ chng-thâu chiah-nı̍h kı̄n, khoàⁿ tio̍h in án-ne hō͘ goá kám-kak chiâⁿ hoaⁿ-hí.
Hūi-chin kóng,“ Sı̄--ā, goá mā kāng-khoán, kám m̄-sı̄--leh? Nā in ē-tàng ka-tı̄ tı̄ chia seng-oa̍h, bián lâng lâi chiàu-kò͘, goá siūⁿ sè-kan bô chin-chiàⁿ ê būn-tê--loh! ”
Lē-bí kóng,“ Sı̄--ā, in mā khak-sı̍t súi, lí khoàⁿ! Lí khoàⁿ! Lí kám ū khoàⁿ hit chiah sè-chiah-á tı̄ in lāu-bó ê kha-chiah-phiaⁿ teh sńg? Goá hi-bāng mā ē-tàng án-ne. ”
Bûn-hiàn chhiò--lò͘, tng i khoàⁿ Lē-bí kah i ê kiáⁿ chò-hoé ū kóng ū chhiò, jı̄n-ûi chit-ê sè-kài mā sı̄ bē-bái.
Gō͘ Sin Chhı̀-giām
Koè kúi-jı̍t-á, Bûn-hiàn iàu-kiû Lē-bí chò lēng-goā ê chhı̀-giām, chhoā Lē-bí khı̀ kang-tiûⁿ āu-bı̄n chı̍t keng tn̂g koh chēng ê pâng-keng, lāi-bı̄n lóng sı̄ sè-chiah tōng-bu̍t ê kiò-siaⁿ.
Bûn-hiàn kóng,“ Goá it-tı̍t teh chhı̀ hùi-liāu, lâi chia khoàⁿ che. ” The̍h chı̍t tiuⁿ choá hō͘ Lē-bí, koh kóng,“ Ū ê niáu-chhí chia̍h ū hùi-liāu sêng-hun ê chia̍h-mı̍h kah lim ê chúi, iáu bô chin-chiàⁿ ê būn-tê, 1,2 chiah tio̍h-pēⁿ m̄-koh bô chē, bô siáⁿ iàu-kín. ”
Lē-bí chim-chiok khoàⁿ kiat-kó, i bô ài chit chióng chhı̀-giām, m̄-koh chai-iáⁿ he sı̄ pit-iàu--è, Bûn-hiàn kóng liáu tio̍h,bô niáu-chhí khiau--khı̀, tio̍h-pēⁿ--ê mā bô joā-chē.
Lē-bí kóng,“ Lí tàu-té sı̄ beh hō͘ goá khoàⁿ siáⁿ? ”
Bûn-hiàn kóng,“ Che--a”, phah-khui thang-á-mn̂g-piⁿ ê a̍p-á “ Chit 10 chiah niáu-chhí lim ū hùi-liāu sêng-hūn ê chúi, ū nn̄g lé-pài--loh, goá hō͘--in ê lông-tō͘ sı̄ pah-bān chi 5 (5 ppm), kin-á-jı̍t teh-beh seⁿ-kiáⁿ--loh, chún nā kiáⁿ bô būn-tê, lán tō m̄-bián hoân-ló siáⁿ--loh! ”
Lē-bí kóng,“Ò͘, Bûn-hiàn, chò che sı̄ joā-nı̍h kiaⁿ--lâng! ”
Bûn-hiàn kóng,“ Goá chai, goá chai.” M̄-koh bô teh thiaⁿ, koh tio̍h-kip kóng,“ In ū ê í-keng seⁿ--chhut-lâi-ah! ”
Bûn-hiàn ùi a̍p-á lia̍h kúi chiah niáu-chhí-á-kiáⁿ, iōng hàm-kiàⁿ koan-chhat--in.
Bûn-hiàn lō͘-boé kan-khó͘ kan-khó͘ kóng,“Ò͘, Lē-bí ! lí khoàⁿ, khó-lêng ū būn-tê! ”
Lē-bí iōng hàm-kiàⁿ khoàⁿ, khai-sí kám-kak boē sóng-khoài, chin kú bô kóng-oē.
Tı̄ an-chēng ê pâng-keng, Lē-bí koân koh toā-siaⁿ hoah kóng,“ Khak-sı̍t ū būn-tê ! ”
Lē-bí iōng hàm-kiàⁿ kim-kim-khoàⁿ chia ê sió tōng-bu̍t, kóng “ Niáu-chhí-á-kiáⁿ bô ba̍k-chiu, bô hı̄ⁿ-á, 6 ki kha, ò͘! Bûn-hiàn! Bûn-hiàn! Lí sı̄ chhı̀ siáⁿ--lah? ”
Bûn-hiàn iōng kı̂-koài ê gán-sı̂n khoàⁿ--i, kóng,“ Chin khó-phàⁿ--hò͘ ? M̄-koh lí chı̍t-chūn ài chai. Mā ài ē kı̀-tit in lāu-bó lim ū hùi-liāu 5 ppm lông-tō͘ ê chúi, ū nn̄g lé-pài, he sı̄ pí lán tò tı̄ hô--nih, chhiau-koè thài chē thài chē--leh. ”
Lē-bí ba̍k-chiu soá khui niáu-chhí, khı̀ siūⁿ tio̍h hit lé-pài ê e-po͘ in kah Bûn-hiàn ê gín-á, tı̄ nâ koh chheng ê hái--nih sái-chûn. Kóng,“ Bûn-hiàn chia ê hùi-liāu sı̄ gûi-hiám, lán bē-sái koh tò-lo̍h hô--nih. ”
Bûn-hiàn iōng chhiú tah i ê keng-kah-thâu an-ùi i kóng,“ Tong-jiân, tong-jiân, lán nā pit-iàu, tong-jiân ài tòng--khí-lâi. ” M̄-koh 1 ki chhiú iáu the̍h niáu-chhí, koh kóng,“Kong-si ē-tàng chng ke-khı̀ chheng hùi-liāu, āu-lé-pài khai-sí pò-kò hō͘ Bêng-tek-á chai. ”
Tng Lē-bí oa̍t-thâu bı̄n tùi Bûn-hiàn, Bûn-hiàn ê chhiú ùi Lē-bí ê keng-kah-thâu soá--lo̍h-lâi, Lē-bí kóng,“ M̄-koh...lí kám bô siūⁿ kóng lán chit-chūn ài thêng-chí seng-sán chit chióng ê chhat-liāu, Bûn-hiàn? Chng chia ê ke-khı̀ khó-lêng su-iàu kúi-ā nı̂, jı̂-chhiáⁿ chit-má lán iáu teh tò hoà-ha̍k hùi-liāu lo̍h khı̀ hô--nih! ”
Chı̍t ê iáⁿ iáⁿ-koè Bûn-hiàn ê bı̄n, i ê gán-sı̂n khoàⁿ Lē-bí, jiân-āu soá tùi thang-á goā khı̀.
Bûn-hiàn kóng,“ Lē-bí, goá siūⁿ lán chit-chūn bô su-iàu chò che, lán chit-má tò hô--nih mā chin chió, kong-si mā ē chng chia ê ke-khı̀, kám m̄-sı̄--leh? ”
Lē-bí siūⁿ tio̍h chiah-chē nı̂ ê khang-khoè, sò͘ pah ê bô sêng-kong chhı̀-giām, bong Bûn-hiàn ê chhiú koh kóng,“ Bûn-hiàn, goá hi-bāng sı̄ án-ne, goá chin-chiàⁿ hi-bāng sı̄ án-ne. ” Tńg-sin,chin kín tō lı̄-khui pâng-keng.
