Lán teh saⁿ-chiⁿ chhit kha ê kun á-bô? "Ka-kı̄ pi-bı̂ ê, beh tit-tio̍h seng-koâiⁿ." (Lō͘ 18: 14)
Chı̍t ê siàu-liân ê bo̍k-su, chı̍t-jı̍t teh ián-káng, i ê keng-toê sı̄, "Ki-tok soé ha̍k-seng ê kha." Tı̄ poàⁿ tiong-tn̂g i ū kóng chı̍t kù kóng, "Pêng-iú ah! Lán tı̄ kàu-hoē ê lāi-bı̄n, lóng teh saⁿ-chiⁿ choè-thâu, saⁿ-chiⁿ koâiⁿ ê tē-ūi, chóng-sı̄ chin chió lâng ū teh saⁿ-chiⁿ soé-kha ê kun." Che chiū-sı̄ kóng chin-chió lâng kam-goān ūi-tio̍h Ki-tok lâi chiâⁿ-choè tē-it lō͘-bé, tē-it kē, tē-it bı̂-soè ê.
Ū iōng-ı̀ ê pí-kàu. "Chit-ê lâng ū chhim ê sı̀n, kap hō͘ Sèng Sı̂n chhiong-moá." (Hēng 6: 5)
Lí nā-sı̄ chı̍t ê choē-jı̂n, lí beh ēng sím-mı̍h lâng kap lí pí-kàu? Lí kiám m̄-sı̄ chiong hiah-ê bô chiàu tō-lí ê hoē-iú kap lí pí-kàu mah? Nā-sı̄ án-ni, chiū-sı̄ ná chhin-chhiūⁿ chı̍t ê oé-lâng, chiong ún-ku ê kap i ka-kı̄ pí-kàu kóng, "Goá bô pí chit-ê ún-ku ê khah soè-hàn." Lí siáⁿ-sū m̄ kap chı̍t ê oân-choân ê lâng pí-kàu?
Kàu-hoē lāi ū joā-choē jia̍t-sim ê Ki-tok-tô͘ lí cháiⁿ-iūⁿ m̄ khı̀ kap in pí-kàu? Lí nā kap in pí-kàu, in beh ná chhin chhiūⁿ chı̍t chiah toā chhiūⁿ, lí beh chhin-chhiūⁿ chı̍t chiah lia̍h niáu-chhú ê la̍h-káu.
Sòng-hiong lâng hiàn chı̂ⁿ á-m̄-bián? "Má-ki-tùn lâng." (II Lı̂m 9: 4)
Má-ki-tùn lâng tı̄ ke̍k sòng-hiong ê sı̂, iû-goân kam-goān hiàn-chı̂ⁿ. Chin-choē keng lé-pài-tn̂g, ūi-tio̍h beh pang-chān A-hui-lı̄-ka kap Lâm A-bí-lı̄-ka ê thoân-tō sū-gia̍p ū chhut saⁿ-bān kho͘. Ū chı̍t-keng soè-soè ê lé-pài-tn̂g, in ê hoē-iú ūi-tio̍h tē-hoāⁿ pang-khı̀, in ê châi-sán chha-put-to lóng ū sit-lo̍h. Chóng-sı̄ in ū kià chı̍t-tiuⁿ 209 kho͘ ê gûn-che̍k lâi hiàn.
Hit-ê kong-hoē ê kàu-sū ūi-tio̍h siu in ê chı̂ⁿ soà siū chek-pı̄, kóng i bô liông-sim káⁿ siu hiah-nı̍h kan-khó͘ ê lâng ê chı̂ⁿ. Hit-ê kàu-siū ı̀n kóng, "Chú kiám ū tùi hit-ê chiú-koáⁿ lâng kóng tio̍h chiong i só͘ hiàn ê chı̍t lı̂ tùi khò͘-pâng the̍h tò-tńg mah?"
Thâi lâng ê lâng oē tit-tio̍h kiù boē? "Hok-im sı̄ Siōng-tè ê koân-lêng, beh kiù lóng-chóng sı̀n ê lâng." (Lô 1: 16)
Chı̍t ê-hng tı̄ Gô-lô-su ê bó͘ toā siâⁿ, ū chı̍t keng toā thiaⁿ, lâng chē moá-moá. Kı̂-tiong ū chı̍t ê bó͘ toā-o̍h ê hāu-tiúⁿ, chē tı̄ thâu-chêng ê í-liâu. I tı̍t-tı̍t sı̀-koè khoàⁿ piáu-sı̄ chin kiau-ngō͘. Chū-hoē ê lâng sı̄ choh-chhân lâng, choè-kang lâng, kiōng-sán tóng, chóng-sı̄ iā ū chun-kùi ê lâng.
Tı̄ thoân-tō-su ián-soat bêng-pe̍k ê sı̂, ū chı̍t ê o͘-bı̄n-lâng, chē tı̄ āu-bı̄n, thiaⁿ kàu ba̍k-chiu chin toā-lúi, peh khí-lâi kóng, "Khoàⁿ! goá ê bı̄n chiah o͘, kı̂-sı̍t goá ê sim-lāi iáu koh-khah o͘. Tı̄ lán iáu-bē oāⁿ chèng-hú ê sı̂, goá ū koà thih-liān poeh nı̂ kú, tı̄ Se-pek-lı̄-a. Goá tùi siàu-liân chiū-sı̄ chı̍t ê toā ê choē-jı̂n, thâi-sí lâng ê lâng. Kàu lán oāⁿ chèng-hú ê sı̂, goá ū siū tháu-pàng. Goá chı̍t ê tò-lâi Gô-lô-su, chiū choè kiōng-sán tóng, goá koh-chài choè goá só͘ ài choè ê, koh thâi lâng, só͘ hāi-sí ê sı̀ⁿ-miā pí chē tı̄ chit lāi-bı̄n ê lâng khah choē." I liâm-piⁿ phak tı̄ thô͘-kha toā khàu.
Thoân-tō-su mn̄g i kóng i ū bat Ki-tok ê hok-im á-m̄-bat? I kóng, "M̄-bat, goá chhàu-khám jı̍p-lâi chia, chiah thâu-pái thiaⁿ-kı̀ⁿ. Chin-chhiūⁿ goá chit-khoán ê lâng oē sià-bián-tit á-boē?" Chit-ê lâng ū tit-tio̍h sià-bián, i pı̀ⁿ-choè chin pêng-an, i ê hoaⁿ-hí hián-chhut tı̄ bı̄n-nı̍h. Chit sı̂ i siūⁿ, i boē kham-tit chē tı̄ pa̍t lâng ê sin-piⁿ, beh chē tı̄ thô͘-kha, chóng-sı̄ sian-siⁿ khǹg i tio̍h chē tı̄ í-nı̍h.
Hit-ê toā-o̍h ê hāu-tiúⁿ chin siū-khı̀ chhut-khı̀, chóng-sı̄ kè cha̍p-gō͘-hun cheng, i koh tò-tńg lâi, chhit thâu-hia̍h ê koāⁿ, āu-lâi kóng, "Thoân-tō Sian-siⁿ, goá tio̍h cháiⁿ-iūⁿ choè? Goá ū hoán-tùi Siōng-tè, kóng ú-tiū lāi bô Siōng-tè, goá kap hok-im oân-choân bô kan-sia̍p." Thoân-tō-su kóng, "Ū chı̍t ê chin kán-tan ê hoat-tō͘, chiū-sı̄ lí nā chai koh jı̄n lí ê choē, ka-kı̄ khiam-pi tı̄ Siōng-tè ê bı̄n-chêng, chhin-chhiūⁿ hit-ê thâi lâng ê tú-tú só͘ choè ê, chiū Iâ-so͘ ê huih beh soé-tû lí it-chhè ê choē, bô pa̍t tiâu lō͘."
I kóng, "Lí kóng ê chin hó, iáu-kú lí chai goá sı̄ chı̍t ê ū ha̍k-būn ê lâng, tek-khak bô hoān-tio̍h thâi-lâng ê choē. Ū-iáⁿ goá sı̄ ū ha̍k-būn ê lâng, goá jı̄-cha̍p-gō͘ nı̂ kú tı̄ bó͘ toā-o̍h kà-chheh, siū chin-toā ê chun-kèng. Goá sêng-jı̄n tı̄ chit jı̄-cha̍p-gō͘ nı̂ kú ê lāi-bı̄n, goá chin chhut-la̍t chú-tiuⁿ bô Siōng-tè, goá jı̄-cha̍p-gō͘ nı̂ kú liāu-lí chit-keng o̍h-tn̂g, múi-nı̂ ū chı̍t chheng lâng choè goá ê ha̍k-seng, goá lóng tùi in kan-chèng ú-tiū bô Siōng-tè, iā bô thian-tông tē-ge̍k. Chit-ê kiat-kó chin-chiàⁿ kiaⁿ lâng, in ūi kek-bēng í-āu, goá tú-tio̍h chin-choē ha̍k-seng, choè chéng-chéng put-hoat ê sū. Goá só͘ hoān ê choē, iáu pí chit-ê thâi-lâng ê khah tāng, in-ūi goá ū chèng to̍k tı̄ in ê sim, hāi in ê lêng-hûn, hō͘ in pı̀ⁿ-choè thâi lâng ê, in hiān-sı̂ lóng teh choè pháiⁿ ê kang. Chit-ê lâng chí-ū pún-sin thâi-lâng, chóng-sı̄ goá ū liân-lūi choē-choē lâng hō͘ in thâi lâng. I hoé-kái chiū í-chêng ê sū thang tiâu-tı̍t, chóng-sı̄ goá lóng bô hoat thang pó͘-kiù, iā bô hoat tit thang chhú-siau í-chêng ê hêng-tōng. Nā siat-sú Siōng-tè sià-bián goá ê choē, goá só͘ choè ê kang ia̍h iû-goân chhin-chhiūⁿ kiaⁿ-hiâⁿ, kap sí ê hé tı̍t-tı̍t tō͘. Chhin-chhiūⁿ goá chit hō lâng thái-thó ū hoat-tō͘ thang chín-kiù?"
I kóng soah àⁿ-thâu, chhùi-phoé lóng sı̄ ba̍k-sái, ēng chhiú ng bı̄n. Sian-siⁿ tha̍k Iâ-so͘ chio-ho͘ choē-jı̂n ê oē chin toā siaⁿ, i liâm-piⁿ koh peh khí-lâi kóng, "Gô-lô-su pı̀ⁿ kàu chit khoán, sı̍t-chāi sı̄ tùi goán, goán kū-choa̍t Siōng-tè, só͘-í oē hoat-siⁿ chit hō put-hēng ê sū. Goán ū chhiúⁿ lâng ê liông-sim, iā ū hō͘ Gô-lô-su péng tò-tiàu. Thoè goá kı̂-tó!" Lóng-chóng ê lâng lóng lâu ba̍k-sái. Āu-lâi i koh khí-lâi kı̂-tó kóng, "Siōng-tè ah, siat-sú Lí sı̄ chin ê, kiû Lí hián-bêng tı̄ goá! Nā khéng lı̂n-bín goá, kiû Lí kin-á-jı̍t hō͘ goá chai! Sià-bián goá lóng-chóng ê choē." Hit-ê-hng, sı̂-kan siūⁿ-té, bô ta̍k-lâng ū ki-hoē thang kóng in ê kè-sit. Hit sı̂ chit-ê chú-lí phō͘ hit-ê thâi lâng ê, nn̄g lâng hoaⁿ-hí kàu lâu ba̍k-sái. Keh ê-hng, i koh toà kui-pan ê pit-gia̍p seng saⁿ-kap lâi, hō͘ in chē tı̄ thâu-chêng liâu. Hit-ê-hng in ū chhit lâng, thiaⁿ in ê sian-siⁿ ê, chhē-tio̍h Siōng-tè.
Tē-it iàu-kín ê siau-sit. "I tit-tio̍h khoàⁿ-kı̀ⁿ." (Hēng 9: 18)
Bó͘ ê Sian-siⁿ ài chhı̀-giām i ê ha̍k-seng ê tùi-tı̄ tng-sı̂ ê phó͘-thong siông-sek, chiū mn̄g in kóng, "Tı̄ téng lé-pài ê tiong-kan ū sím-mı̍h tē-it iàu-kín ê siau-sit?" Chı̍t ê soè-hàn gín-ná kín-kín kia̍h khí chhiú, i lóng bô giâu-gı̂ chin pek-chhiat kóng, "Sian-siⁿ, goá chai." Sian-siⁿ kóng, "Hó, ha̍k-seng lí thang kóng." Gín-ná chin tek-ı̀ kóng, "Sian-siⁿ, goá ê lāu-pē í-keng hoán-hoé tit-tio̍h kiù lah."
Tng-sı̂ sian-siⁿ án-ni mn̄g, kiám-chhái ū lâng beh ı̀n kóng, sím-mı̍h só͘-chāi hō͘ hé sio, sún-sit kúi-nā pah-bān, sím-mı̍h só͘-chāi hō͘ chúi im, á-sı̄ toē tāng, á-sı̄ sím-mı̍h pa̍t hāng. Chóng-sı̄ chit-ê gín-ná oē hiáu-tit sím-mı̍h sı̄ tē it iàu-kín, i chai lâng ê lêng-hûn sı̄ pí sè-kan ta̍k-hāng khah kùi-tiōng.
An-se-mô͘ ê sūn-thàn
Chı̍t-pái goá teh-beh khı̀ tı̄ Lâm Bí-chiu, Gâ-tē-má-lia̍p. Pó Sian-siⁿ chhiáⁿ goá tùi kúi-nā ūi sı̀n Chú ê Ìn-tē-an lâng káng-lūn kiù lâng ê hoat-tō͘. Chı̍t ê lāu-lâng miâ kiò An-se-mô͘, chē tı̄ āu-piah ê tē-sı̀ liâu, goá oa̍t kè-khı̀ kā i kóng, "An-se-mô͘, chhiáⁿ lí kā goá kóng, lí kin-nı̂-lāi ín-chhoā joā-choē lâng lâi bat Iâ-so͘." (Hit-sı̂ sı̄ jı̄-ge̍h cha̍p-jı̄ jı̍t) Lāu-lâng ê bı̄n chhih lo̍h-khı̀ kóng, "Ah! Sian-siⁿ, chin-chió." Goá mn̄g kóng, "Joā-choē, chhiáⁿ kā goá kóng." I ı̀n kóng, "Chí-ū saⁿ-cha̍p."
Hit-nı̂ ê chhit-ge̍h chhoe, goá chih-tio̍h An-se-mô͘ ê phoe, phoe-lāi lia̍t chı̍t-pah sı̀-cha̍p-sı̀ ê lâng-miâ, chiū sı̄ An-se-mô͘ tı̄ 7 ge̍h í-chêng só͘ ín-chhoā lâi kui Chú ê lâng. Thang kóng tı̄ kàu-hoē choè kang ê, hán-tit ū chhin-chhiūⁿ án-ni ê, ia̍h thang kóng chı̍t-sı̀ lâng choè kiù lâng ê kang ê, An-se-mô͘ sı̄ tē-it hó ê chı̍t ê.
Ta̍k-hāng piān, chí-ū bô kiù-seng-chûn. "Goá bô ûi-ke̍h Thiⁿ ē hián-hiān." (Hēng 26: 19)
Tı̄ Oē-lí-su ê hái-piⁿ, ū chı̍t ê soè-soè ê hiuⁿ-siā, hia ê chúi-lō͘ sı̄ tē-it gûi-hiám ê, chin-choē sı̀ⁿ-miā ū hi-seng tı̄-hia. In-ūi án-ni, hit hiuⁿ-siā ê lâng chiū siūⁿ tio̍h ū kiù-seng-chûn. In thâu chı̍t-pō͘, chiū-sı̄ khí chı̍t chō chhù, khí bêng-pe̍k ê sı̂, chı̂ⁿ í-keng liáu, bô koh ū chı̂ⁿ thang chō kiù-seng-chûn. Chhù khí kàu chin hó-sè, iû-chhat iā chin súi, ta̍k-hāng lóng piān, khó-sioh bô kiù-seng-chûn.
Joā-choē ê chheng-liân lâng sı̄ chhin-chhiūⁿ án-ni, in ū hó ê kiàn-sek, ū hó ê chú-gı̄, ū hó ê chong-chí, khó-sioh in só͘ choè ê kiat-kio̍k lóng bô kiù-seng ê kong-chok.
Thiàⁿ-thàng khui-mn̂g. "I pang-chān goá." (I Thê 1: 12)
Bat ū chı̍t ê soè-hàn cha-bó͘ gín-ná, chin ài kap in lāu-pē saⁿ-kap kóng-oē. Chı̍t-jı̍t, lāu-pē tı̄ ka-kı̄ ê tha̍k-chheh pâng, cha-bó͘-kiáⁿ ài chhē i, chiū chiūⁿ-khı̀ lâu-téng, khoàⁿ-kı̀ⁿ mn̂g koaiⁿ-teh, chiū ēng chhiú nı̍h mn̂g-leng, chóng-sı̄ chhiú siuⁿ-soè, só͘-í iā bô kàu-gia̍h la̍t thang choān. Āu-lâi mn̂g-leng tńg, mn̂g khui, i chin hoaⁿ-hí, cháu jı̍p-khı̀ kóng, "Heh! A-pâ, goá ka-kı̄ khui chit-ê mn̂g." I lóng m̄-chai, i teh khui boē khui ê sı̂, i ê lāu-pē thiaⁿ-kı̀ⁿ, chiū tùi í-nı̍h chēng-chēng peh-khí-lâi tùi lāi-bı̄n thoè i khui. Siōng-tè tú-tú chhin-chhiūⁿ hit-ê lāu-pē, i oē choè lán lâng só͘ boē choè ê. "Ki-tok siúⁿ-sù goá khùi-la̍t, goá chiah oē choè lóng-chóng ê sū."
Kú-tn̂g ê thiàⁿ. "I thiàⁿ-sioh ka-kı̄ ê lâng.... I thiàⁿ in kàu lō͘-bé." (Iok-hān 13: 1)
Bín-nı̂ kap Pho-si chhut-lâi hoe-hn̂g-nı̍h beh sàng in lāu-pē khí-sin khı̀ lú-hêng. Tng lāu-pē beh khiâ bé ê sı̂, sió Pho-si kiò kóng, "Pâ-pâ, chhiáⁿ, chài-hoē, goá thiàⁿ lí kàu chhin-chhiūⁿ lí beh khı̀ ê káu-cha̍p lí hiah tn̂g." Bín-nı̂ ia̍h chhut i un-jiû ê siaⁿ kóng, "Chhin-ài ê Pâ-pâ, chhiáⁿ, chài-hoē, lí éng-éng bô-beh khiâ kàu goá ê thiàⁿ ê lō͘-bé." (Ì-sù sı̄ goá thiàⁿ lí bô kiông-chı̄n.)
Lán tı̄ tá-lo̍h? "I thiàⁿ-sioh ka-kı̄ ê lâng.....I thiàⁿ in kàu lō͘-bé." (Iok-hān 13: 1)
Chı̍t-pái chı̍t ê soè-hàn gín-ná teh khiā tı̄ soaⁿ-téng, i ê chhiú hō͘ i ê lāu-pē khan-teh. Lāu-pē tùi i káng-lūn Siōng-tè bô hān-liōng ê thiàⁿ. I kí pak, kí lâm, kí tang, kí sai, koh kí soaⁿ kap soaⁿ-kok, āu-lâi koh kí thiⁿ-piⁿ kóng, "Goá ê kiáⁿ Iok-hān ah! Siōng-tè ê thiàⁿ chiū-sı̄ hiah toā." Gín-ná ba̍k-chiu kim-kim chin hoaⁿ-hí, chiū ı̀n kóng, "Lāu-pē, án-ni lán só͘ tiàm ê só͘-chāi chiū-sı̄ tı̄ Siōng-tè bô hān-liōng ê thiàⁿ ê tiong-ng, lán sı̄ joē ún-tàng ah!"
Tāi-piáu “Sı̂n ê lâng." (II Lia̍t 4: 22)
Goá ū chı̍t ê pêng-iú, bat siū Bí-kok chèng-hú phài choè khı̀ goā-kok ê tāi-piáu. Khı̀ bô joā-kú, i ū tò-lâi, goá mn̄g i kóng, "Lí siáⁿ-sū tò-lâi?" I ı̀n kóng, "In-ūi goá m̄-ài koh tam-tng hit khoán ê chek-sêng lah." Goá mn̄g, "He sı̄ cháiⁿ-iūⁿ?" I kóng, "Goá bô-lūn khı̀ sím-mı̍h só͘-chāi, hia ê peh-sı̀ⁿ tı̍t-tı̍t khoàⁿ goá, koh kiò goá, 'Uncle Sam'. (ı̀-sù sı̄ chí Bí-kok) Liân goá chí-ū teh lim-chúi nā-tiāⁿ, in ia̍h ûi-teh khoàⁿ, kóng sı̄ Bí-kok khoán ê lim-chúi. Só͘-í goá m̄-ài koh tam hit hō chek-sêng."
Lán choè Siōng-tè ê kiáⁿ sı̄ tú-tú chhin-chhiūⁿ án-ni, sè-kan lâng beh tı̍t-tı̍t khoàⁿ lán, tı̍t-tı̍t gı̄-lūn lán. In bô beh chù-ı̀ lán só͘ gı̂m ê si, lán ê kı̂-tó á-sı̄ lán ê sı̀n-tiâu. In tē-it chù-ı̀ ê, chiū-sı̄ lán ê kiâⁿ-choè.
Hêng só͘ khiàm ê. I ı̀n kóng, "Lóng pêng-an." (II Lia̍t-ông 4: 26)
Tı̄ thò͘-sià chèng liû-hêng ê sı̂, chı̍t ê lāu-bú tı̄ chı̍t jı̍t-lāi sit-lo̍h-khı̀ nn̄g ê kiáⁿ. Hit-ê-hng, i ê tiōng-hu tùi pa̍t-ūi tò-lâi, i ê bó͘ ài pı̄-pān, i ê sim, só͘-í kā i kóng, "Ū chı̍t ê pêng-iú chioh goá pó-poè ê mı̍h, hiān-sı̂ i beh thó tò-tńg, goá tio̍h cháiⁿ-iūⁿ choè?" Tiōng-hu kóng, "Tio̍h lóng-hêng i." Hū-jı̂n-lâng chiū chhoā i kàu pa̍t keng pâng, kí hit-ê nn̄g ê sí ê gín-ná hō͘ i khoàⁿ, kā i kóng, "Nn̄g ê gín-ná sı̄ Siōng-tè kau hō͘ lán ê, hiān-sı̂ I koh thó tò-tńg, lán kiám m̄ tio̍h sūn-ho̍k."
Chûn chú khoàⁿ-kı̀ⁿ. "Hiān-sı̂ lín m̄-chai goá só͘ choè ê, āu-lâi chiū oē chai." (Iok-hān 13: 7)
Chı̍t-jı̍t goá tha̍k-tio̍h lūn chı̍t ê lâng tı̄ chı̍t ê tà-bū ê ô͘. Sui-bóng bū ū tà-moá ô͘-téng, chûn iû-goân kiâⁿ chin kín, kàu hō͘ chûn-lāi ê tah-kheh kám-kak kóng sı̄ siuⁿ kín. Ū chı̍t lâng kā chûn-oân kóng, "Lán ê chûn kiâⁿ kàu hiah kín, kiaⁿ-liáu oē tú-tio̍h gûi-hiám." Chûn-oân kia̍h thâu, ı̀n i kóng, "Tāi-kong tı̄ kiô-téng, i sı̄ tı̄ bū ê téng-bı̄n, i oē khoàⁿ lán só͘ beh khı̀ ê."
Lán boē bêng ê, Siōng-tè lóng chai. Toā-o̍h ê hāu-tiúⁿ. "Chı̄-chūi ài choè tāi-seng ê, tio̍h choè lín ê lô͘-po̍k." (Khó 10: 44)
Tı̄ Bí-kok ê soaⁿ-lāi, ū chı̍t ê toā-o̍h, chin khiàm-kheh chı̂ⁿ, só͘ ēng ê chhù lóng chin pháiⁿ, kàu-oân ê sin-súi iā chin kē. Ū chı̍t ê siⁿ-hūn lâng jı̍p-lâi kàu o̍h-tn̂g ê khàng-toē, tú-tio̍h chı̍t ê chhēng khò͘-thò teh chhéng he ê lâng, chiū mn̄g i, "Tio̍h khı̀ tá-lo̍h chiah oē chhē-tio̍h hāu-tiúⁿ?" I ı̀n kóng, "Goá siūⁿ lí tı̄ 12 tiám khı̀ i ê chhù, tek-khak chhē i oē tio̍h."
Chit-ê siⁿ-hūn lâng chiū tı̄ 12 tiám chhē-tio̍h hāu-tiúⁿ, sui-jiân chit-ê hāu-tiúⁿ só͘ chhēng ê kap i teh chhéng-he ê sı̂ bô-tâng, chóng-sı̄ chit-ê siⁿ-hūn lâng oē jı̄n-tit i chiū-sı̄ hit-ê chhéng-he ê lâng. Keh-jı̍t hāu-tiúⁿ chih-tio̍h chı̍t-tiuⁿ phoe kap só͘ sàng lâi ê gō͘ bān kho͘. Che sı̄ tùi chı̍t-ê hāu-tiúⁿ ê jia̍t-sim, ho̍k-bū ê cheng-sı̂n, ū kám-kek hit-ê lâng. I sui-jiân sı̄ hāu-tiúⁿ, iáu-kú i kam-goān choè lâng só͘ khoàⁿ m̄-khí ê kang.
Sím-mı̍h koh-iūⁿ. "Lí ê oē sı̄ goá kha-chêng ê teng." (Si 119: 105)
Ū chı̍t ê lāu ê seng-bu̍t kàu-siū, the̍h chı̍t lia̍p chhiah-sek ê soè-lia̍p chí tı̄ chhiú nı̍h kóng, "Goá chai chit lia̍p chí sı̄ tùi sím-mı̍h lâi chō chiâⁿ ê, goá chai i ê sêng-hūn ê pí-lē, goá iā oē ka-kı̄ choè chı̍t lia̍p tú-tú chhin-chhiūⁿ chit-lia̍p tùi sı̍t-bu̍t the̍h-lâi ê chí. Chóng-sı̄ goá nā chiong goá só͘ choè ê chit lia̍p chí khı̀ iā, i khiok boē hoat sím-mı̍h khí-lâi, i só͘ hâm ê chit, chí-ū hō͘ thô͘ khip-siu nā-tiāⁿ. M̄-kú goá nā ēng Siōng-tè só͘ chō ê sı̍t-bu̍t ê chí khı̀ iā tı̄ hó ê toē-nı̍h, i liâm-piⁿ beh hoat sı̍t-bu̍t khí-lâi. Che sı̄ in-ūi i ū chı̍t-khoán ê ò-biāu tı̄-teh. Lán kiò chit khoán ò-biāu choè oa̍h-miā."
Chit pún Sèng-keng ê khoán ná chhin-chhiūⁿ pa̍t-pún chheh. Lán boē bêng-pe̍k i ê kı̂ⁿ-ı̄ⁿ ê lêng-le̍k. Nā chiong i chèng tı̄ hó ê thó͘-toē, i teh-beh hián-chhut i ū chı̍t khoán ê oa̍h-miā. I ū lêng ê oa̍h-miā. I oē kiat ké-chí.
