Jı̄-cha̍p Sè-kí ê Chú-jı̍t-o̍h 04

(5) Kiat-lūn Chiàu téng-bı̄n só͘ kóng lâi khoàⁿ chiū thang chai hiān-sı̂ sè-kài ê bûn-bêng kok lóng tùi chit ê chong-kàu-tek ê jı̂-tông kàu-io̍k bô teh khoàⁿ chò chhin-chhiūⁿ tùi-bı̄n hoāⁿ ê hoé-chai. Chóng-sı̄ tı̄ Jı̍t-pún kap chit ê oân-choân tò-hoán, chò kàu-io̍k-ka ê lâng tùi kàu-io̍k ê tiong-kan chı̄n-la̍t beh koáⁿ-tio̍k chong-kàu-tek iàu-sò͘, che m̄ chai sı̄ tùi sím-mı̍h lí-iû? Chin ê kàu-io̍k-ka siūⁿ kóng kàu-io̍k thek-gú ē thang tāi-thè chong-kàu. Chóng-sı̄ ta̍k ê kàu-io̍k-ka nā bat sió-khoá gián-kiù tio̍h sin sim-lí-ha̍k, tek-khak ē chai chong-kàu kap kàu-io̍k ū loā bı̍t-chiap ê koan-hē, iā nā kā oân-choân pun-lı̄ sı̄ joā ûi-poē tio̍h sim-lí-ha̍k ê toā goân-chek. Tàu-tí kàu-io̍k-ka ê chit-hūn sı̄ sím-mı̍h? Kiám m̄-sı̄ chāi-tı̄ chō-chiū oân-boán ê jı̂n-keh? Nā bô si-hêng chong-kàu-tek ê kàu-io̍k, tàu-tí ē tı̍t thang chō chhut oân-boán ê jı̂n-keh? Chí-ū tı̀-sek hō͘ i hoat-ta̍t tek-khak bē thang chō chhut oân-choân ê jı̂n-bu̍t, chı̍t ê chin ū khak-sı̍t ê chèng-kù, kiám m̄-sı̄ kin-á-jı̍t lán ê tō-tek-kài só͘ teh piáu-sı̄ ê sū-sı̍t? Kin-á-jı̍t ê kàu-io̍k-ka ná chhin-chhiūⁿ teh chè-chō phoà-siùⁿ ê kok-bı̂n chò in ê pún-chit. Siūⁿ kóng tı̄ kàu-sek nā kan-ta káng-gı̄, án-ni chiū í-keng chò liáu kàu-io̍k ê pún-hūn, sı̍t-chāi sı̄ toā chhò-gō͘. Nā-sı̄ kàu-io̍k-ka, in tı̄ kàu-sek í-goā iáu ū kà ha̍k-seng ê chit-hūn. Tùi ha̍k-seng hō͘ in ē kèng-sı̂n, thiàⁿ kok-ka, ióng-sêng to̍k-lı̍p ê cheng-sı̂n, hō͘ chū-tı̄ ê khı̀-siōng khah ōng-sēng iā chiong chiah ê lâi sı̍t-hêng, nā bô án-ni beh thài ē thang kóng ū chı̄n kàu-io̍k-ka ê pún-hūn? Lán ê kàu-io̍k-ka, chhiáⁿ tio̍h chai chong-kàu kàu-io̍k ê iàu-kín. Kàu-io̍k-ka m̄-sı̄ lām-sám hoán-tùi chong-kàu, iā chó͘-tòng gín-ná lâi tha̍k Chú-jı̍t-o̍h, chò in ê pún-hūn. Tē 4 Phiⁿ Chóng-lūn Tē 4 chiuⁿ Tùi jı̂-tông Ki-tok ê kàu-hùn Nā tha̍k bān-kok ê le̍k-sú, bô-lūn tó-ūi chı̍t kok ê hô-kia̍t, lóng tùi jı̂-tông m̄-nā chin léng-tām, hoán-tńg tùi jı̂-tông nā ū chù-ı̀ soà siūⁿ chò sı̄ bô hô-kia̍t ê khoán. Te̍k-pia̍t Tang-iûⁿ-khoán ê hô-kia̍t, nā kóng hū-lú kap gín-ná, lóng bô tı̄ in ê gán-tiong. In nā ū beh kheng-pia̍t lâng ê sı̂, tek-khak tio̍h hū-lú á-sı̄ gín-ná chhut-lâi chò chhâi-liāu, chóng-sı̄ Ki-tok tò-hoán, sı̄ gín-ná ê pêng-iú, koh sı̄ jı̂-tông ê ióng-sū. Ki-tok chò gín-ná ê pêng-iú, m̄-sı̄ in-ūi chiah ê gín-ná chiong-lâi ē pı̀ⁿ gâu-lâng ê in-toaⁿ, chí-ū in-ūi I put-chí chai gín-ná ê pún-sèng, Ki-tok-kàu sı̄ jı̂-tông ê chong-kàu. Ki-tok tùi jı̂-tông ê kà-sı̄, chí-ū tı̄ Má-thài 18: 1-10, koh 19: 13-15, chit 2 ūi thang khoàⁿ tio̍h nā-tiāⁿ, tùi Sèng-keng choân-thé lâi pí, sı̄ chhin-chhiūⁿ hái-piⁿ kap chı̍t-lia̍p soa ê khoán. Só͘-í ài tha̍k Sèng-keng ê lâng ê tiong-kan, ū lâng bô chù-ı̀ tı̄ chit ê Ki-tok tùi jı̂-tông ê kà-sı̄, sı̄ bô kı̂-koài. Chóng-sı̄ tùi jı̂-tông ê kà-sı̄ chí-ū chiah ê chiū kàu-gia̍h, m̄-bián koh ū í-goā ê kà-sı̄. Chím-á chiong chit 2 chiuⁿ ê kà-sı̄ kā kái-phò, chiū ē thang khoàⁿ-chhut 9 ê iàu-tiám. 1. Lín nā bô oa̍t-tńg lâi chiâⁿ-choè chhin-chhiūⁿ soè-hàn gín-ná ê, koat-toàn boē jı̍p Thian-kok. (Má-thài 18: 3) Nā tha̍k chit chat bêng-bêng chai beh jı̍p thian-kok ê lâng tek-khak tio̍h sı̄ jı̂-tông, soè-hàn gín-ná sı̄ jı̍p thian-kok ê lâng ê bô-hêng, m̄-sı̄ thian-kok, bô-lūn beh jı̍p tó chı̍t ê ông-kok tio̍h chhin-chhiūⁿ sè-hàn gín-ná, bô siâ-khı̀ (chin thian-chin), ū sı̀n-jı̄m, koh khiam-pi, bû-su. Sè-hàn gín-ná ê lāi-bı̄n ū hui-siông pó-kùi chı̍t chéng ê jı̂n-keh, Ki-tok thiàⁿ jı̂-tông kā in chiok-hok, chiū-sı̄ in-ūi in ū chit ê jı̂n-keh. 2. Kı̀ⁿ-nā ka-tı̄ khiam-pi chhin-chhiūⁿ sè-hàn gín-ná ê, i tı̄ thian-kok chiū-sı̄ choè toā. (Má-thài 18: 4) Sè-hàn gín-ná m̄-nā ū jı̍p thian-kok ê chu-keh, iā nā jı̍p thian-kok siū khoán-thāi chò siōng toā, bô-lūn sím-mı̍h lâng nā bô ū chhin-chhiūⁿ sè-hàn gín-ná ê jı̂n-keh, tı̄ thian-kok tek-khak bē-thang choè toā, só͘-í beh chò hô-kia̍t nā siūⁿ kóng tio̍h thoat-lı̄ gín-ná ê sèng-chit, che sı̄ chin toā ê chhò-gō͘. Bēng-chú kóng: “Toā-lâng sı̄ bô sit-khı̀ eⁿ-á ê sim ê lâng.” Hô-kia̍t ê só͘-í hô-kia̍t sı̄ chāi-tı̄ i ū jı̂-tông ê sim. Ki-tok ê só͘-í thiàⁿ jı̂-tông khak-sı̍t in-ūi I ū jı̂-tông ê sim. 3. Tı̄ Goá ê miâ chiap-la̍p chı̍t hō sè-hàn gín-ná ê chı̍t ê, chiū-sı̄ chiap-la̍p Goá. (Má-thài 18: 5) Gín-ná sı̄ Ki-tok ê chhe-sài. Ū sím-mı̍h lâng káⁿ khoàⁿ-khin lán ê chóng-thóng ê tāi-sài? Siū chhe-khián tı̄ sè-kài ta̍k-kok ê lán ê choân-koân tāi-sài siū chun-kèng, sı̄ in-ūi i sı̄ lán ê chóng-thóng ê sù-chiá. Jı̂-tông nā sı̄ “Bān-ông ê Ông, Bān-chú ê Chú”. Ki-tok ê chhe-sài, iā tio̍h chun-kèng jı̂-tông. Tı̄ chò Ki-tok chhe-sài ê jı̂-tông ê bı̄n-chêng, lán ta̍k lâng tio̍h chı̄n lé-chiat lâi chun-kèng. 4. Lín tio̍h kín-sı̄n, bo̍h-tit khoàⁿ-khin chiah ê bı̂-sè tiong ê chı̍t ê. (Má-thài 18: 10) Khoàⁿ-khin chiū-sı̄ khoàⁿ hit ê kè-ta̍t khin. Phı̀-jū nā tı̄ lō͘-tiong ū chı̍t hun ê chı̂ⁿ ka-la̍uh tı̄ hia, bô lâng beh chù-ba̍k tı̄ hia, in-ūi bô khoàⁿ-tāng hit ê, chóng-sı̄ siat-sú nā kim-kong-chio̍h ka-la̍uh tı̄ hia, sím-mı̍h khoán? Ta̍k-lâng tek-khak chin chheⁿ-cho̍h, sı̄ in-ūi khoàⁿ-tāng kim-kong-chio̍h ê iân-kò͘. Án-ni sè-kan lâng teh khoàⁿ-khin jı̂-tông, in-ūi in m̄-chai jı̂-tông ê kè-ta̍t, kim-sè ê kàu-io̍k-ha̍k chiām-chiām pı̀ⁿ jı̂-tông pún-ūi. Kin-á-jı̍t chiàu Ki-tok ê kà-sı̄, siūⁿ kóng bô pí jı̂-tông khah iàu-kín ê mı̍h. Ki-tok kàu-hoē iā teh hoán-hoé kàu taⁿ khoàⁿ-khin jı̂-tông, chit ê sı̍t-chāi sı̄ chin thang hoaⁿ-hí ê hiān-siōng. 5. Kı̀ⁿ-nā hō͘ chiah ê sı̀n Goá ê bı̂-soè ê chı̍t ê siū that-gāi, hit lâng lêng-khó͘ ēng toā chio̍h-bō tiàu i ê ām-kún, thiām tı̄ chhim hái. (Má-thài 18: 6) Kiám m̄-sı̄ chin thang kiaⁿ ê oē? Chò Ki-tok ê oē, thiaⁿ tio̍h chin chân-jím ê khoán. Nā hut-lio̍k jı̂-tông kàu-io̍k ê lâng, ēng chio̍h-bō tiàu i ê ām-kún kā thiām lo̍h hái sı̄ khah hó, Sèng-keng tiong tı̄ chit chat í-goā Ki-tok m̄ bat kóng kàu “lí tio̍h sí” chit-khoán oē. Tùi Ki-tok ê chhùi kóng-chhut chiah kek-lia̍t ê oē, khak-sı̍t sı̄ teh kà-sı̄ kóng jı̂-tông kàu-io̍k sı̄ choè iàu-kín, pa̍t-mı̍h pàng-hē teh iā tio̍h chò ê. 6. Iông-ún sè-kiáⁿ chiū-kūn Goá. (Má-thài 19: 14) Kó͘-chá Ki-tok ê sù-tô͘ in chhin-chhiūⁿ chím-á ê lâng, khoàⁿ jı̂-tông chò hùi-khı̀ sı̄ sū-sı̍t. Tong-sı̂ lāu-bó ūi-tio̍h thiàⁿ kiáⁿ ê sim, chhoā in ê gín-ná beh lâi hō͘ Ki-tok kā in chiok-hok ê sı̂, sù-tô͘ in kā gı̂n, kàu bé kā kóng “Ah! Chiah hùi-khı̀.” Hit-sı̂ Ki-tok kà-sı̄ sù-tô͘, kiò in hō͘ sè-kiáⁿ chiū-kūn Goá, chin un-sûn ê bı̄n-māu hâm-tio̍h bı̂-chhiò, chı̍t ê chı̍t ê sè-kiáⁿ, kā phō khí-lâi, kā in chiok-hok. Tı̄ sè-kan kiám iáu koh ū pí chit ê khah súi ê tô͘. Phah-sǹg tó chı̍t-ê oē-tô͘-ka, iā bē tit thang oē chiah súi ê tô͘, ún-tàng tı̄ hit-sı̂ Ki-tok ê bı̄n ū piáu-hiān kóng-bē-chhut chin súi ê gín-ná ê chhiò-bı̄n. 7. Bo̍h-tit kı̀m in. (Má-thài 19: 14) “Iông-ún” kap “bo̍h-tit kı̀m” chit 2 kù ná chhin-chhiūⁿ sio-siāng, kı̂-sı̍t bô sio-siāng. “Bo̍h-tit kı̀m” chit kù ê lāi-bı̄n ū piáu-hiān chı̍t-chéng ê koân-ui, sı̄ bēng-lēng ê oē, chiū-sı̄ Ki-tok tùi i ê kàu-hoē ê bēng-lēng. Tı̄ Jı̍t-pún ê kàu-hoē chí-ū chù-ba̍k tı̄ toā-lâng, tùi jı̂-tông ê kàu-io̍k khah ài hut-lio̍k, Chú-jı̍t-o̍h á-sı̄ kiōng-lē-hoē ê kang-chok khoàⁿ bô iàu-kín. Tùi chit khoán kàu-hoē ê bo̍k-su á-sı̄ thoân-tō-su, Ki-tok ēng chit ê oē hoat-chhut bēng-lēng chhiáⁿ m̄-thang bē-kı̀-tit. “Lín tio̍h chı̄n choân-la̍t ūi-tio̍h jı̂-tông ê kàu-io̍k” sı̄ Ki-tok ê kà-sı̄ iā-sı̄ bēng-lēng. 8. Thian-kok sı̄ sio̍k tı̄ chit hō ê. (Má-thài 19: 14) Tı̄ thian-kok ê lâng sím-mı̍h khoán, nā ài chai, tio̍h tāi-seng khoàⁿ jı̂-tông siōng khoài chai, jı̂-tông teh chí-sı̄ jı̍p thian-kok ê chu-keh kap tı̄ thian-kok choè toā ê lâng ê bô͘-iūⁿ. In-ūi tı̄ thian-kok ê lâng lóng chhin-chhiūⁿ sè-hàn gín-ná, só͘-í iā ē thang kóng thian-kok chiū-sı̄ jı̂-tông, iā jı̂-tông chiū-sı̄ thian-kok, koh kàu-hoē sı̄ thian-kok ê bô͘-hêng, só͘-í choè chhin-chhiūⁿ thian-kok ê kàu-hoē thang kóng sı̄ jı̂-tông choè-chē ê kàu-hoē. 9. In ê thiⁿ-sài tı̄ thiⁿ-nı̍h, siông-siông kı̀ⁿ goá tı̄ thiⁿ-nı̍h ê Pē ê bı̄n. (Má-thài 18: 11) Ta̍k ê jı̂-tông lóng ū toè chı̍t ê thiⁿ-sài chò phoāⁿ. Hit ê thiⁿ-sài sı̄ sím-mı̍h lâng? Lāu-bó sı̄ chò gín-ná ê thiⁿ-sài tùi thiⁿ chhe-khián lâi ê, teh kā ióng-io̍k kap kàu-io̍k, án-ni bó-chhin ê chek-jı̄m sı̍t-chāi chin toā. Lán chò bó-chhin ê lâng tàu-tí ū chı̄n chò thiⁿ-sài ê pún-hūn bô? Sı̍t-chāi sı̄ chı̍t ê toā gı̂-būn. Siat-sú bó-chhin nā tùi jı̂-tông ê kàu-io̍k pı̂n-toāⁿ, án-ni khak-sı̍t sı̄ hoān-choē. Jı̂-tông ê choē ê toā-pō͘-hūn lóng sı̄ pē-bó ê chek-jı̄m, m̄-thang bē kı̀-tit pē-bó tùi jı̂-tông ê kám-hoà-la̍t sı̍t-chāi chin toā. Í-siōng só͘ kú 9 hāng, hūn-liōng sı̄ chin chió, chóng-sı̄ sı̍t-chāi sı̄ kàu-gia̍h. Tùi jı̂-tông ê kà-sı̄, chiah ê í-goā m̄-bián. Chit 9 tiâu ê kàu-hùn nā tha̍k liáu koh chài tha̍k, jı̂-tông ê kng ná hoat-hiān, thiàⁿ jı̂-tông ê sim ná chhim, bô-lūn sı̄ thoân-kàu-chiá á-sı̄ pē-bó ún-tàng lóng pêⁿ-pêⁿ ē tit-tio̍h toā hiáu-ngō͘.