Khó-chhı̀-ı̄ⁿ hù Ī-tiúⁿ Lô Ka-lûn Sian-siⁿ, tı̄ 3 goe̍h 18 jı̍t hoat-piáu “Kán-thé-jı̄ ê thê-chhiòng chin pit-iàu” ê lūn-bûn í-āu, siū kok-kài ê chàn-sêng kap hoán-tùi. Goá tha̍k liáu chin chhù-bı̄, kám-kak che kap Sèng-keng ê tāi-chiòng-hoà ū koan-liân tı̄-teh.
Tong-jiân bûn-jı̄ sı̄ thoân-ta̍t su-sióng ê khı̀-kū, chit ê khı̀-kū ná kán-tan, ná chió-jı̄, ná hó tha̍k, lâng chiū ēng ná chió ê sı̂-kan, ē-thang piáu-hiān i ê su-sióng. Chóng-sı̄ Tiong-kok bûn-jı̄ sı̄ ho̍k-cha̍p koh choē jı̄, beh tha̍k kàu ē-hiáu thang piáu-sı̄ su-sióng, ài lōng-hùi chin choē ê sı̂-kan kap sim-sı̂n. Hong-kiàn sı̂-tāi bûn-jı̄ sı̄ te̍k-koân kai-kip ê thit-thô mı̍h, chóng-sı̄ hiān-tāi í-keng kái-hòng tı̄ it-poaⁿ peh-sı̀ⁿ ê chhiú-nih. M̄-kú kàu-taⁿ iáu-kú ū hit ê hong-kiàn-tek ê sek-chhái tı̄-teh, chiū-sı̄ ho̍k-cha̍p koh choē jı̄ ê bûn-jı̄, m̄-sı̄ tāi-chiòng-tek--ê, peh-sı̀ⁿ bē-tit-thang sûi-sı̂ chiū-kūn--ê.
Tiong-kok sui-bóng sı̄ bûn-jı̄ ê kok, chóng-sı̄ kok-bı̂n ê 80% sı̄ bûn-bông ê goân-in ê chı̍t hāng sı̄ tı̄-chia. Só͘-í tùi chá í-lâi to ū choē-choē sian-kak-chiá teh thê-chhiòng kóng, tio̍h ài kái-kek Tiong-kok bûn-jı̄.
Nā-sı̄ kó-jiân tio̍h ài tāi-chiòng-hoà, só͘ tio̍h kiâⁿ ê tē-it kai-toāⁿ tong-jiân sı̄ kán-thé-hoà. Ēng peh-sı̀ⁿ só͘ teh kóng ê pe̍h-oē, ēng kán-thé-hoà ê bûn-jı̄ lâi piáu-hiān che su-sióng, che kiám-chhái iā sı̄ bı̂n-chú chú-gı̄ ê kai-toāⁿ.
Chú Iâ-so͘ ēng tng-sı̂ peh-sı̀ⁿ só͘ teh kóng ê pe̍h-oē, A-lân oē lâi thoân thian-kok ê hok-im, Sin-iok Sèng-keng sı̄ ēng tong-sı̂ choè tē-it thong-iōng ê Hi-lı̄-nı̂ oē lâi siá. Democracy (bı̂n-chú chú-gı̄) ê iû-lâi, sı̄ tùi Hi-lı̄-nı̂-oē demos5 lâi--ê, chit kù oē ê ı̀-sù sı̄ peh-sı̀ⁿ, tı̄ Sèng-keng iā ū chhut kúi-nā pái. Tùi chiah ê sū-sı̍t hō͘ lán thang ná kám-kak Sèng-keng sı̄ peh-sı̀ⁿ ê chheh, Ki-tok ê kà-sı̄ sı̄ pêng-bı̂n ê hok-im.
Sui-bóng tiong sè-kí ê Thian-chú kàu-hoē ū Kı̀m-chí peh-sı̀ⁿ tha̍k Sèng-keng, á-sı̄ Sèng-keng tio̍h ài ēng kap peh-sı̀ⁿ bô iân ê Lia̍p-teng-gú lâi siá. Chóng-sı̄ chiah ê sı̄ ki-hêng ê chōng-thāi. Āu-lâi Má-teng Lō͘-tek ê ló͘-le̍k, Sèng-keng chiah koh tùi Thian-chú Kàu-hoē the̍h tò-tńg lâi peh-sı̀ⁿ ê chhiú-nih. I pún-sin e̍k Sèng-keng chò peh-sı̀ⁿ só͘ teh kóng ê pe̍h-oē, só͘ teh ēng ê bûn-jı̄ lâi siá. Che sı̄ ho̍k-tò Sèng-keng goân-lâi ê chin biān-bo̍k.
Cha̍p-káu sè-kí í-lâi, hái-goā soan-tō sêng-kong ê goân-in ê chı̍t hāng, iû-goân iā sı̄ chiong Sèng-keng e̍k chò tong-tē peh-sı̀ⁿ ê pe̍h-oē, ēng choè kán-tan ê Lô-má-jı̄ lâi siá--ê, chit ê choè hó ê lē, chiū-sı̄ lán ê Tâi-oân.
Í-siōng chiah ê sū-sı̍t, khó-í hō͘ hiān-chāi ê Tiong-kok lâng chò thaⁿ-san chi chio̍h. Sè-kài í-keng chı̀n-jı̍p goân-chú sı̂-tāi, bo̍h-tit iông-ún lán kò͘-chip kap tiû-tû. Ǹg-bāng Kàu-io̍k-pō͘ tong-kio̍k ēng toā eng-toàn koáⁿ-kín chı̍t jı̍t kong-pò͘ kán-thé-jı̄, chhin-chhiūⁿ kong-pò͘ “Siông-iōng bûn-jı̄” án-ni, bián-tit hō͘ kok-bı̂n poa̍h-lo̍h bûn-jı̄ ê hām-khiⁿ, kiám-chió peh-sı̀ⁿ o̍h jı̄ ê lô-khó͘, sàu-tû bûn-bông. Tùi che chū-jiân peh-sı̀ⁿ chiū ná ū ki-hoē thang chiū-kūn Sèng-keng, hō͘ Sèng-keng chāi tı̄ Tiong-kok ná tāi-chiòng-hoà, hoat-hui i ê goân-lâi ê sù-bēng.
Chit ê oē kap lí chin kūn, chiū-sı̄ tı̄ lí ê chhùi, tı̄ lí ê sim, hō͘ lí thang lâi kiâⁿ i.
(Tâi-oân Kàu-hoē-kong-pò tē 786 kı̂, 1954 nı̂ 6 ge̍h)
