[ Tiong-hoē gı̄-tiāⁿ kū-nı̂ 11 goe̍h 21 hō ta̍k só͘-chāi ê kàu-hoē tio̍h chò khèng-hō Hi-liân-hoē, iā ū thok-tiōng Pa Bo̍k-su pı̄-pān chı̍t tiuⁿ sūn-sū-toaⁿ, hō͘ ta̍k só͘-chāi tha̍k ê Sèng-chheh kap gı̂m si lóng tio̍h saⁿ-tâng. Chiū-chhiáⁿ Gô͘ Bûn-pin Sian-siⁿ siá chı̍t siú ê si, chò hit-jı̍t ê lō͘-ēng.Siá-liáu kià-lâi Hú-siâⁿ, m̄-kú Bo̍k-su í-keng khı̀ Jı̍t-pún, chiū bô chiap-tio̍h. Taⁿ chiong hit-siú ê si ı̀n tı̄ ē-té hō͘ tāi-ke khoàⁿ, iā thang siàu-liām Gô͘ Bún-pin Sian-siⁿ; sui-jiân i taⁿ bô tı̄-teh, lán iáu-kú nā chhin-chhiūⁿ teh thiaⁿ i ê oē.]
1.Tâi-oân chin-lí ê khí-thâu,
Goân tùi Eng-kok Tiúⁿ-ló-kàu :
Tiúⁿ-ló kàu-hoē chèng sı̀n-tô͘,
Kam-goān khek-kí thiàⁿ Iâ-so͘.
2.Chún sim siūⁿ beh kiù lêng-hûn,
Pı̄-pān hok-im kiù-lêng-chûn;
Bō͘-chı̍p iân-kim chheng bān oân,
Chiū chhiáⁿ Bo̍k-su koè Tâi-oân.
3.M̄-nā kiù lâng thoat choē-ko͘,
Ia̍h ài i-pēⁿ ê kan-khó͘,
Chiū kah I-seng pān io̍h-châi,
Soà kap Bo̍k-su chò-hoé lâi.
4.Lı̄-khui pē-bó kap hiaⁿ-tı̄,
Tah chûn koè-iûⁿ chheng bān lí,
Ná chûn khı̀ ûi koh sit toā,
Sûi hong phiau-liû chāi hái-goā.
5.Chiong sin ēng sim kau Siōng-tè,
M̄ kiaⁿ siⁿ sí ê koan-hē,
Chiū kàu Tâi-oân ê Kı̂-āu,
Chiàⁿ lâi siat-lı̍p kiù-sé-kàu.
6.Jı̂n-tē chhiⁿ-so͘ sim bông-bông,
Bı̄n-māu im-gí put siong-tông,
Khiā-khí lim-chia̍h kap i-chiûⁿ,
Jı̂n-chêng lé-māu bô chhin-chhiūⁿ.
7.Ài beh kau-poê bô hoat-tō͘,
Khí-thâu sı̍t-chāi toā kan-khó͘,
Āu-lâi o̍h oē kàu cheng-kong,
Chiàⁿ ē kap lâng lâi kau-thong.
8.Ài chiong Siōng-tè ê in-sù,
Pò lâng sı̀n-khò kiù-sè Chú.
Khó-sioh jı̂n-sim siū bê-he̍k,
Soà kap tō-lí chò tùi-te̍k .
9.Kóng tang kóng sai oē sek chē,
Hiâm lâng pài hoan ê Siong-tè,
Chéng-chéng khún-pek oh kóng-khí
Āu-lâi ná chai ná hoaⁿ-hí
10.Siōng-tè in-tián it-hoat toā,
Pài-tn̂g ná siat ná khui-khoah.
M̄-nā liáu kang koh liáu chı̂ⁿ,
Í-keng le̍k-koè gō͘-cha̍p nı̂ .
11.Ta̍k téng ha̍k-hāu ū siat-lı̍p,
Hō͘ lâng lı̄-piān thang ha̍k-sı̍p,
Chí bê jı̍p gō͘ hoat-tō͘ chē,
Hō͘ lán ē hiáu pài Siōng-tè .
12.Siōng-tè un-tián ke̍k-kı̂ toā,
Lán tio̍h kám-siā lóng bô soah;
Eng-kok sı̀n-tô͘ toā jı̂n-ài,
Lán tio̍h kı̀-liām chāi sim-lāi .
13.M̄-thang bông-in koh poē-gı̄,
Án-ni chiàⁿ-sı̄ ū ha̍p-lí;
Goá chò kúi kù lâi hián-bêng,
Ǹg-bāng tāi-ke tio̍h kám-chêng .
14.Ha̍p-kai khiā pâi pò lâng chai,
Ia̍h thang liû-thoân kàu tāi-tāi,
Chiong in thiàⁿ Chú lâi kı̀-chài,
Siông-sè khek tı̄ hit chio̍h-pâi .
15.Ta̍k tāi sı̀n-tô͘ nā iú-gı̄,
Ài khoàⁿ chio̍h-pâi ê só͘-kı̀;
Chò si put-kò sı̄ tāi-lio̍k,
Bô thang ta̍k-hāng kóng chim-chiok.
16.Nā ài ta̍k-hāng kóng siông-sè,
Tio̍h khı̀ káng-kiù hit hō chheh;
Lán taⁿ kı̀-liām che jı̍t-chí,
Tāi-ke tâng-sim teh hoaⁿ-hí .
17.Thiⁿ-pē thiàⁿ-thàng ke̍k-kı̂ toā,
Khǹg lín tāi-ke saⁿ ín-chhoā,
Kiù-chú lâu-hoeh chò tiong-pó,
Lán sı̀n eng-kai kiat siān kó.
(Tâi-oân Kàu-hoē-pò tē 370 koàn, 1916 nı̂ 1 ge̍h)
