Kó͘-chá ê sı̂ ū chı̍t ê soè-hàn gín-ná khı̀ tı̄ chhiū-nâ-lāi beh thit-thô. I phah-sǹg i ko͘-toaⁿ chı̍t-ê tı̄-teh nā-tiāⁿ, lóng bô khoàⁿ-kı̀ⁿ i ê pē ê ba̍k-chiu chim-chiok teh khoàⁿ i, m̄-kú i ê pē ū khoàⁿ i. Gín-ná hoaⁿ-hí tı̄ chháu-po͘ cháu-lâi cháu-khı̀, thit-thô, bán hoe; iā tı̄ toā châng chhiū-kha kiâⁿ-iû. Koh in-ūi ke̍k hoaⁿ-hí, só͘-í i chin toā siaⁿ teh hoah. Ta̍k hāng khoàⁿ liáu lóng sı̄ sin,in-ūi i iáu-bē bat khoàⁿ-kı̀ⁿ, só͘-í i lóng bô kiaⁿ.
Teh khoàⁿ hoe ê sı̂, tùi hoe-lāi ū chı̍t bé to̍k choâ hut-jiân sô-chhut-lâi. Gín-ná khoàⁿ i ê phê chin súi, soà chhun-chhiú beh lia̍h i. Hit-chūn lāu-pē tùi āu-bı̄n kiò kóng, Gûi-hiám, gûi-hiám. Gín-ná khí-lâi, choâ chiū sô cháu. Chóng-sı̄ gín-ná bô khoàⁿ-kı̀ⁿ i ê pē, soà boē kı̀-tit i ê siaⁿ. Tia̍p-á-kú sin-piⁿ ū chı̍t chiah ia̍h-á chin súi lâi hioh tı̄ gín-ná ê hoe, chiah pe khı̀. Gín-ná teh chhē ê sı̂, ia̍h-á ná pe ná koâiⁿ chiām-chiām khoàⁿ tı̍t-tı̍t bô--khı̀. Hit-chūn lāu-pē chhun-chhiú chiū kí hit chiah ia̍h-á só͘ pe khı̀ ê hong-bı̄n, chiū-sı̄ tı̄ hûn-kan, m̄-kú gín-ná bô khoàⁿ-kı̀ⁿ i ê lāu-pē ê chhiú.
Tı̄-hia ū chı̍t ê chúi-khut-á, hit ê chúi lóng bô tín-tāng, tiām-tiām koh chin chhim. Gín-ná kūi tı̄ khut-piⁿ teh chhiò,khoàⁿ i ê bı̄n tı̄ chúi-toé, phah-sǹg chin sim-sek, soà àⁿ-lo̍h oá tı̄ chúi teh khoàⁿ,lāu-pē chiū koh kóng, Gûi-hiám. Gín-ná oa̍t-thâu bô khoàⁿ-kı̀ⁿ lāu-pē ê bı̄n, phah-sǹg káⁿ sı̄ hong ê siaⁿ. Āu-lâi hong lâi ê sı̂, chúi teh tín-tāng, gín-ná chiong i ê kha chhun-lo̍h-khı̀ chhı̀-khoàⁿ léng á sio, chiū chai chúi chin léng. Hit-chūn ū siaⁿ koh khah toā siaⁿ kiò kóng, Gûi-hiám, gûi-hiám. M̄-kú gín-ná choân sim teh phah chúi phin-phin phông-phông só͘-í bô thiaⁿ-kı̀ⁿ.
Āu-lâi khoàⁿ-kı̀ⁿ tı̄ khut-té ū mı̍h chin súi kng-kng-kng, gín-ná chin-ài tit-tio̍h, só͘-í ū àn lo̍h beh bong i, soah poa̍h-lo̍h tı̄ chhim-chúi, khó-sioh khut put-chí chhim, gín-ná tı̂m lo̍h-khı̀, chiū toā-siaⁿ kiò: “Kiù goá! Kiù goá!”
In lāu-pē tı̄-hia sûi-sı̂ chhun i tn̂g-tn̂g ê chhiú khiú i khí-lâi tı̄ an-ún ê só͘-chāi. Gín-ná in-ūi koâⁿ koh kiaⁿ, sin-khu ngia̍uh-ngia̍uh-chhoah, hit chūn lāu-pē ēng i ê chhiú tah i ê sim kóng: “Goá siông-siông chiàu-kò͘ lí, lí lóng m̄-chai; goá ū chhut kı̀-hō hō͘ lí, m̄-kú lí lóng bô khoàⁿ-kı̀ⁿ; goá ū kā lí kóng, m̄-kú lí lóng bô thiaⁿ-kı̀ⁿ; lí nā put-sı̂ siàu-liām goá, chiū chai goá kap lí saⁿ-kap tı̄-teh.”
Hit-chūn gín-ná thiaⁿ lāu-pē ê oē,chhun chhiú lâi lám i ê seng-khu, hō͘ i ê lāu-pē phō. Chiū kóng, Pē ah, chhiáⁿ kap goá éng-éng saⁿ-kap tı̄-teh, goá ê ba̍k-chiu put-sı̂ him-bō͘ thang khoàⁿ lí ê kı̀-hō, ia̍h goá ê hı̄-khang put-sı̂ him-bō͘ thang thiaⁿ lí ê siaⁿ.
(Tâi-lâm-kàu-hoē-pò tē 438 koàn, 1921 nı̂ 9 goe̍h)
