Lêng-kài Tāi-chiàn Khòai Po̍k-hoat/Siáⁿ-sū Chú Iâ-so͘ Tio̍h koh Chài-lâi?

SIÁⁿ-SŪ CHÚ IÂ-SO͘ TIO̍H KOH CHÀI LÂI?

Tī hiān-kim ê sî-tāi, chiū-sī Chú Iâ-so͘ khoài bē koh lâi ê sî-chūn, ū chi̍t ê ke̍k-kî tiōng-iàu ê būn-tôe, sī múi chi̍t-ūi Ki-tok-tô͘ bōe thang bô siūⁿ, bōe thang bōe chai ê. Hit ê būn-tôe sī sím-mi̍h? Chiū-sī, lán ê Chú siáⁿ-sū tio̍h koh chài lâi? Tī 1900 gōa nî chêng, I kiám m̄-sī í-keng lâi liáu. Ūi sím-mi̍h lí-iû, ū sím-mi̍h pit-iàu, I tio̍h koh chài lâi chi̍t-pái?

Tāi-seng lâi siūⁿ Chú Iâ-so͘ thâu chi̍t pái kàng-sè ê bo̍k-tek, Chú Iâ-so͘ iáu-bē kàng-seng í-chêng, thiⁿ-sài tùi Má-lī-a kap Iok-sek chí-tēng tio̍h kā I hō miâ kiò "Iâ-so͘". Siáⁿ-sū beh hō "Iâ-so͘" chit ê miâ? In-ūi Iâ-so͘ miâ-jī ê ì-sù tú-tú ōe thang soat-bêng Kiáⁿ Siōng-tè kàng-seng ê bo̍k-tek. "Iâ-so͘" ê ì-sù sī "Iâ-hô-hoa ê chín-kiù". "Iâ-so͘" sī Hi-lia̍p-gú ê e̍k-im, Hi-pek-lâi-gú ê e̍k-im chheng chòe "Iok-su-a". Kū-iok Sèng-keng ê "Iok-su-a" kap Sin-iok Sèng-keng ê "Iâ-so͘" sī kāng miâ. Tī Iû-thài lâng tiong-kan ū chōe-chōe lâng hō "Iâ-so͘" chit ê miâ, chhin-chhiūⁿ tī lán Tiong-kok, ū chōe-chōe lâng hō kāng-miâ, kiò chò "Thian-lâi," "Thian-sù" chit-iūⁿ. Só͘-í tī Sù-tô͘ Hēng-toān, lán khòaⁿ-kìⁿ sù-tô͘ teh chheng-ho͘ Chú Iâ-so͘, ū-sî kóng, "Góa hōng Ná-sat-le̍k lâng Iâ-so͘ ê miâ." Siáⁿ-sū tio̍h te̍k-pia̍t thê-khí Chú Iâ-so͘ sī "Ná-sat-le̍k lâng"? Ì-sù sī beh piáu-bêng só͘ óa-khò ê Iâ-so͘ chí-ū chi̍t ūi nā-tiāⁿ, chiū-sī hit ūi "Ná-sat-le̍k lâng Iâ-so͘". Ū-sî in iā kóng, "Hit chi̍t ūi tèng si̍p-jī-kè ê Iâ-so͘", á-sī kóng, "Hit chi̍t ūi tùi sí koh-oa̍h ê Iâ-so͘". Chiah ê chheng-ho͘ put-kò sī beh piáu-bêng ū chōe-chōe lâng miâ Iâ-so͘ ê tiong-kan, chí-ū kî-tiong ê chi̍t-ūi sī jîn-lūi ê Kiù-chú. I sī Ná-sat-le̍k lâng! Bat tèng si̍p-jī-kè! Ū tùi sí koh-oa̍h!

Siáⁿ-sū Iâ-so͘ ōe thang chòe lán ê Kiù-chú? In-ūi I sī Sîn! Sui-jiân I bat ū lâng ê hêng-chōng, nā-sī tiàm tī hit ê "lâng" ê hêng-chōng lāi-bīn ê, sī Sîn, m̄-sī lâng, sī Sam-ūi it-thé Siōng-tè kî-tiong ê chi̍t-ūi, chheng chòe Kiáⁿ Siōng-tè.

Sam-ūi it-thé Siōng-tè ê Sèng-miâ sī Iâ-hô-hoa, só͘-í "Iâ-hô-hoa" m̄-nā sī Pē Siōng-tè kap Sèng-lêng Siōng-tè ê Sèng-miâ, iá-sī Kiáⁿ Siōng-tè ê Sèng-miâ.

Tī Sat-ka-lī-a su tē 14 chiuⁿ tē 3 chat, tē 4 chat ū kóng, "Iâ-hô-hoa beh kàng-lîm, I ê kha beh khiā tī Ka-ná-soaⁿ." Che sī ū-giân Chú Iâ-so͘ kàng-lîm ê sî, kàng-lo̍h ê tē-tiám sī Ka-ná-soaⁿ. Siáⁿ-sū chiong Chú Iâ-so͘ chheng-chòe Iâ-hô-hoa? In-ūi I sī Siōng-tè, Iâ-hô-hoa sī I goân-lâi ê Sèng-miâ.

Hiaⁿ-tī chí-bē! Tī chia hō͘ lán khòaⁿ-kìⁿ lán só͘ sìn-khò ê Kiù-chú, só͘ teh kèng-pài ê Kiù-chú, goân-lâi I chiū-sī Iâ-hô-hoa Siōng-tè! Tī 1900 gōa nî chêng, I chioh-ēng chāi-sek-lú Má-lī-a lâi kàng-sè, tùi gōa-piáu jio̍k-thé lâi khòaⁿ, I sī "lâng", nā-sī tiàm tī hit ê jio̍k-thé lāi-bīn ê, khiok m̄ sī "lâng", sī Iâ-hô-hoa Siōng-tè! Ū chi̍t siú séng-si án-ni kóng,

Iâ-so͘ goân-pún sī Siōng-tè,

Lîm-kàu hoān-kan lâi kiù-sè,

Kū-iok sèng-tô͘ le̍k-tāi kú,

Kóng sī ǹg-bāng che Kiù-chú!

Iâ-so͘ goân-pún chiū-sī Iâ-hô-hoa Siōng-tè! Iâ-hô-hoa Siōng-tè lâi chit ê sè-kài chòe sím-mi̍h? Ūi-tio̍h beh chín-kiù sè-kan lâng! Só͘-í I lâi, sī tòa chí-kiù lâi! I ê chín-kiù m̄-sī "Lâng" ê chín-kiù, sī "Iâ-hô-hoa" ê chín-kiù, só͘-í chiong I chheng chòe "Iâ-so͘" sī ha̍p-sek. In-ūi "Iâ-so͘" miâ-jī ê ì-sù, chiū-sī "Iâ-hô-hoa ê chín-kiù."

Hiaⁿ-tī chí-bē! Lí ū sìn Iâ-so͘ á-bô? Sìn Iâ-so͘ chiū-sī sìn Iâ-hô-hoa ê chín-kiù! Lí ū chiap-la̍p Iâ-so͘ á-bô? Chiap-la̍p Iâ-so͘ chiū-sī chiap-la̍p Iâ-hô-hoa ê chín-kiù!

Tī chia hō͘ lán bêng-pe̍k siáⁿ-sū thiⁿ-sài hoan-hù Má-lī-a kap Iok-sek tio̍h kā I hō miâ kiò Iâ-so͘?