Hu̍t-tô ū kóng-koè chı̍t-ê sió kò͘-sū. Chit-ê sió kò͘-sū sı̄ án-ni.
Ū chı̍t-chiah lāu chheng-kap-á toà tı̄ chı̍t-ê chúi-tı̂-á lāi. Chit-ê chúi-tı̂-á téng-bı̄n khui chin chē chin súi chin phang ê liân-hoe. M̄-kú chit-chiah lāu chheng-kap-á ta̍k-kang lóng tı̄ liân-hoe-kha sı̀-koè teh loā-loā-sô, iā lóng m̄-bat thiàu-khı̀ liân-hoe ê téng-bı̄n phı̄ⁿ-khoàⁿ-māi leh : I m̄ chai liân-hoe tàu-té ū joā-phang?Iā m̄-bat khı̀ khoàⁿ liân-hoe tàu-té ū joā-súi? Ná chhin-chhiūⁿ liân-hoe lóng kap i bô koan-hē.
Hoán-tò-tńg sı̄ tùi goā-ūi poe--lâi ê bı̍t-phang, pu̍t-sı̂ ong-ong ong-ong poe-koè-lâi, poe-koè-khı̀, chhái-hoe-bı̍t.Liân-hoe tang-sı̂ beh khui, tang-sı̂ beh siā, tang-sı̂ oē-tı̍t-thang chhái-bı̍t, bı̍t-phang lóng hui-siông chheng-chhó.
Lāu chheng-kap-á sui-jiân toà-tı̄ chia, m̄-kú tùi liân-hoe tang-sı̂ hoe-khui, tang-sı̂ hoe-siā, hoe-phang, kiat-chí ê chéng-kô koè-têng soah lóng-chóng boē-thang bêng-liâu chheng-chhó!
Kò͘-sū kóng kàu chia, só͘ beh piáu-ta̍t ê ı̀-sù, tio̍h ài hō͘ lín tāi-ke ka-kı̄ khı̀ siūⁿ !
(Tâi-oân Hiong-thó͘ cha̍p-chı̀ Tē 30 kı̂, 1999 nı̂ 1 goe̍h)
