Tı̄ lán ê kàu-hoē kàu-io̍k tàu-tí tio̍h ēng sím-mı̍h khoán jı̄? Che sı̄ lán só͘ tú-tio̍h chı̍t hāng ê khùn-lân ê būn-toê. Ū sı̂ in-ūi hit ê būn-toê-sèng toā, tı̀-kàu hō͘ lán ná-chún ba̍k-chiu pàng-khoeh bô ài kā i siūⁿ, iā teh ǹg-bāng sı̂-kan oē kái-koat. M̄-kú sū-sı̍t sı̄ boē thang hō͘ lán bô kā i siūⁿ, in-ūi che kap lán hiān-chāi ê sū-kong (te̍k-pia̍t sı̄ kàu-io̍k) chin toā koan-hē.
Hoê-kò͘ Tâi-oân pah nı̂ ê soan-kàu le̍k-sú, pe̍h-oē-jı̄ ê kòng-hiàn khak-sı̍t sı̄ toā. Pe̍h-oē-jı̄ ê Sèng-keng m̄-nā sı̄ chı̍t pún put-chí chun-tiōng tı̄ goân-bûn Sèng-keng ê e̍k-pún, jı̂-chhiáⁿ sı̄ chı̍t pún put-chí súi ê Ē-mn̂g im ê chheh. Kè-khı̀ m̄-chai joā-nih choē lâng bat tùi chit pún Sèng-keng lâi tit-tio̍h sı̀-chiàⁿ ê liáu-kái Siōng-tè ê oē, iā m̄-chai joā-nih choē lâng bat tùi chit pún Sèng-keng lâi ha̍k-sı̍p sı̀-chiàⁿ koh súi ê Tâi-oân oē? Khak-sı̍t pe̍h-oē-jı̄ sı̄ ū lı̄-ek ê. Hit ê te̍k-sek sı̄ chhin-chhiūⁿ Iâu Chèng-tō Bo̍k-su (Hōng-soaⁿ), tı̄ i só͘ phian-tù ê “Sı̍t-giām pe̍h-oē-jı̄ bûn-hoat” (Tâi-oân Soan-tō-siā hoat-hêng), tē-it bı̄n ê sū só͘ siá: (1) Lāu-bú oē, chiàu lán ê su-sióng, kám-chêng oē thang tı̍t-chiap piáu-hiān. (2) Ha̍k-sı̍p kán-ı̄ⁿ. (3) Iông-ı̄ⁿ lí-kái Sèng-keng. (4) Kau-tho̍k hong-piān.
Ná-chún ū lâng bat kóng chı̍t ê lē kóng, “Goá ê sim-koaⁿ íⁿ-á, chı̍t tiám khı̀ ut--leh, giâ boē khí-lâi, chin kan-khó͘.” Che chit kù m̄-chai Tiong-bûn sı̄ án-choáⁿ siá lâi piáu-hiān? Koh iā bat ū lâng kóng, bó͘ phah-thih tiàm thâu-ke beh chhoā sim-pū chin hoaⁿ-hí, pài-thok lâng siá mn̂g-liân. I kóng kā goá siá, “Nā bô lín pâ chá-sı̂ ê hı̀-hū khı̍h-kho̍k-khia̍k, ná ū kin-á-jı̍t ê la̍k-ta̍k-chhı̍h, la̍k-ta̍k-khoa̍ihⁿ.” Ì-sù sı̄ ài kóng, in-ūi i chá-sı̂ sin-khó͘ choè phah-thih sai-hū, chiah ū in hāu-siⁿ kin-á-jı̍t teh chhoā-bó͘, chhiáⁿ lô-kó͘ nāu-jia̍t hoaⁿ-hí. M̄-chai Tiong-bûn sı̄ án-choáⁿ siá chiah oē thang tú-tú chiàu chit ê kám-chêng lâi piáu-hiān? Goá siūⁿ, ēng Tiong-bûn sı̄ bô khó-lêng thang piáu-ta̍t. Tâi-oân oē ê hêng-iông-sû te̍k-pia̍t choē, koh lóng ū i to̍k-it ê piáu-hiān. Kan-ta kóng “o͘”, “o͘-o͘” í-kı̍p “o͘--o͘-o͘!” to chha-tit chin-choē. Á-sı̄ kóng, “o͘-sô-sô,” “o͘-mà-mà” téng-téng ê piáu-hiān, tō m̄-sı̄ chı̍t jı̄ “黑” jı̄ oē thang kóng chheng-chhó. Siāng-sı̂ tùi chit ê oē iā thang khoàⁿ chhut bı̂n-cho̍k ê te̍k-sèng, in-ūi tı̄ oē-gú ê lāi-bı̄n ū pau-hâm tio̍h hit ê bı̂n-cho̍k ê bûn-hoà kap sèng-keh téng. Só͘-í sui-jiân kiáⁿ-jı̂ tha̍k pa̍t khoán ê gú-giân; nā-sı̄ tı̄ i tú-tio̍h sím-mı̍h gū-hoat ê sū-kiāⁿ hoat-seng ê sı̂, tāi-khài to sı̄ hoat-chhut pē-bú kiuⁿ (lāu-bú oē).Thang chai, hit ê lāu-bú oē tı̄ hit ê bû-hêng-tiong í-keng lâu-jı̍p tı̄ kiáⁿ-jı̂ ê huih-lāi, chiâⁿ-choè lêng-kám ê thong-lō͘. Án-ni, ēng chhoā lâng thé-giām Siōng-tè ê thiàⁿ choè bo̍k-tek ê Ki-tok-kàu kàu-io̍k, chū-jiân sı̄ tio̍h lı̄-iōng ha̍k-seng ê lāu-bú oē lâi kàu-ha̍k, pí-kàu khah ū lêng-kám sı̄ chin bêng. Put-kò, būn-toê sı̄ hiān-chāi teh kà kap teh tha̍k ê lâng, chiū-sı̄ Chú-jı̍t-o̍h ê kàu-su kap ha̍k-seng, chha-put-to chiām-chiām teh boē hiáu-tit kóng Tâi-oân oē. Che sı̄ teh pò lán chai, hiān-chāi ê chheng siàu-liân chiām-chiām teh lı̄-khui Tâi-oân lâng ê khoán-sit. Tı̄ chit khoán ê chōng-hóng tiong lâi koan-chhat lán ê Chú-jı̍t-o̍h ê kàu-io̍k ê sı̂, lán beh hoat-kak-tio̍h ho̍k-cha̍p ê gûi-ki. In-ūi lán kı̀-jiân tı̄ Tâi-oân oē choè lāu-bú oē lâi sêng-tióng, nā-sı̄ teh sòng-sit hit ê choè tē-it khoài siū lêng-kám phah-tōng lán ê sim ê thong-lō͘. Choè-kūn in-ūi teh chún-pı̄ thang kòng-hiàn tı̄ siat-kàu tē jı̄ sè-kí ê Tâi-oân kàu-hoē ê kàu-io̍k kè-e̍k, sió-tı̄ ū tùi choân-séng ê Chú-jı̍t-o̍h kàu-oân tiāu-cha. Tı̄ í-keng chı̍p oá lâi ê tiau-cha-pió 246 tiuⁿ tiong, koan-hē Chú-jı̍t-o̍h ê kàu-io̍k ê tio̍h ēng Tâi-gú á-sı̄ Kok-gú ê thóng-kè, sı̄ chhin-chhiūⁿ ē-bı̄n:
Chàn-sêng ēng Tâi-gú 84 ê.
Chàn-sêng ēng Kok-gú 24 ê.
Tâi-gú kap Kok-gú lām teh iōng 138 ê.
Kiám-chhái āu-lâi koh kià lâi ê oē hō͘ chit ê thóng-kè oāⁿ khoán, chóng-sı̄ tı̄ hiān-chāi ê thóng-kè sò͘-jı̄ kàu-gia̍h hō͘ lán siūⁿ lán ê chiân-tô͘.
Tiong-bûn chin hó, sı̄ piáu-hiān lán ê kok-ka bı̂n-cho̍k ê iu-siù bûn-hoà kap te̍k-sèng; chóng-sı̄ Tâi-oân-oē iā sı̄ beh piáu-sı̄ lán Tâi-oân lâng ê siūⁿ-hoat kap sèng-keh. Só͘-í chit nn̄g hāng lóng boē thang pàng-sak,koh khah tio̍h siat-hoat hō͘ i lióng choân kı̂ bí. Goá siūⁿ,lán kiám boē thang tı̄ kàu-hoē ê kàu-io̍k sú-iōng Tiong-bûn 600 jı̄ kap Lô-má-jı̄ ê peng-im,chhin-chhiūⁿ Jı̍t-bûn á-sı̄ Hân-kok lı̄-iōng Hàn-jı̄ kap in ka-kı̄ ê jı̄. Chhin-chhiūⁿ “基督徒sı̄上帝ê子民, 主耶穌永遠choè in ê大祭司, 扶持in ê 軟弱, 幫助in勝過一切ê困難kap試探.” Nā án-ni sı̄ it kú lióng tit. Tı̄ Ki-tok-kàu kàu-io̍k ê té-té ê sı̂-kan-lāi thang ēng chhián-hiān ê bûn-jı̄ lâi chhoā lâng thé-giām Siōng-tè ê oē. Bián-tit in-ūi bûn-jı̄ Chhim boē liáu-kái, á-sı̄ in-ūi bô ēng Lāu-bú oē,tı̀-kàu sit-lo̍h lēng-goā chı̍t hong-bı̄n ê kàu-io̍k kè-ta̍t.
(Tâi-oân Kàu-hoē Kong-pò tē 941 hō, 1964 nı̂ 9 goe̍h)
