Thiⁿ tē chhòng-chō kiōng 6 kang,
Lán ê ūn-tōng iā 6 hāng,
Chı̍t hāng ūn-tōng 2 goe̍h jı̍t,
6 hāng chı̍t-tang chiū oân-pit.
1. Tē 1 ūn-tōng sı̄ “Bat-jı̄”,
Ài lán lóng bat “Pe̍h-oē-jı̄”,
M̄-thang khoàⁿ-khin b, ch, chh,
Tha̍k nā ē-hiáu chin chhù-bı̄.
Jı̄-bó lóng-chóng 26 jı̄,
Tàu-lâi tàu-khı̀ chin piān-lı̄,
Put-lūn sı̄ gōng á-sı̄ khiáu,
Lāu-lâng gín-ná lóng ē-hiáu.
Kı̀ⁿ-nā koat-sim ū ı̀-ài,
Khı̂n-khı̂n lâi tha̍k 3 lé-pài,
Tha̍k-lâi tha̍k-khı̀ che siōng-hó,
Chhiáⁿ lín tāi-ke kín lâi o̍h.
2. Tē 2 ūn-tōng sı̄ “Tha̍k-keng”,
Kó͘-bú tāi-ke tha̍k Sèng-keng,
Sèng-chheh sı̄ lō͘, sı̄ kng-teng,
Hō͘ lán kiâⁿ-lō͘ ū kng-bêng.
Sèng-chheh phı̀-jū sı̄ bı̄n-kiàⁿ,
Chiò lán hêng-ûi ē sı̀-chiàⁿ,
Sèng-chheh chiū-sı̄ Thiⁿ bí-niû,
Khı̂n-tha̍k lêng-sèng tit poê-iúⁿ.
M̄ bat Sèng-keng toā lı̄-hāi,
Kiaⁿ-liáu sı̀n-sim bē khiā-chāi,
Poah-khui sè-sū ê chô-chak,
Sèng-keng mı̂-jı̍t khı̂n-khı̂n tha̍k.
3. Tē 3 ūn-tōng sı̄ “Sı̀n-gióng”,
Kó͘-bú tāi-ke ū sı̀n-gióng,
Mô͘-kúi chok-hong chin lı̄-hāi,
Lán ê sı̀n-gióng tio̍h khiā-chāi.
Chú kóng: “Sè-kan ū khó͘-lān”,
Lán thang khò I tit pêng-an,
Put-lūn sūn-kéng á ge̍k-kéng,
Sı̀n-sim bo̍h sit sim bo̍h léng.
Tio̍h chai sè-kan sı̄ chiām-sı̂,
Thian-tông chiah ū éng hok-khı̀,
Sı̀n I tùi taⁿ kàu kú-kú,
Bān-ông ê Ông, chú ê Chú.
4. Tē 4 ūn-tōng sı̄ “Lé-pài”,
Kó͘-bú tāi-ke gâu kèng-pài,
Siōng-tè chı̀-chun tio̍h ho̍k-sāi,
Êng-kng kui I éng sè-tāi.
7 jı̍t chı̍t jı̍t toā lé-pài,
Sèng-tiān kèng-pài sı̄ eng-kai,
Kèng-pài Siōng-tè tio̍h kiong-kèng,
Gı̂m-si kı̂-tó sim khiân-sêng
Siōng-tè sı̄ Chú tio̍h kèng-pài,
Ke-ke hō͘-hō͘ tio̍h ho̍k-sāi,
Ka-têng lé-pài bô ià-siān,
Tē-chiūⁿ Thian-kok chiū sı̍t-hiān.
5. Tē 5 ūn-tōng sı̄ “Siú jı̍t”,
Kó͘-bú choân-siú An-hioh-jı̍t
Siōng-tè chāi-chá ū iok-sok,
7 jı̍t an-hioh sù toā-hok.
6 jı̍t kong-im tio̍h pó-sioh,
7 jı̍t tek-khak tio̍h an-hioh,
Chit jı̍t tāi-ke siú lé-pài,
Bo̍h chò sio̍k-sū hoān 4 kài.
Te̍k-pia̍t siàu-liām Chú koh-oa̍h,
O-ló kám-siā bô sı̂ soah,
Chiong-jı̍t kı̂-tó tha̍k Sèng-keng,
Tı̀-ı̀ lêng-siu, chı̀n lêng-thêng.
6. Tē 6 ūn-tōng sı̄ “Hōng-hiàn”,
Kó͘-bú tāi-ke gâu hōng-hiàn,
Thiⁿ-pē Siōng-tè hiàn Sèng-kiáⁿ,
Ūi lán chiâⁿ-chò Thiⁿ ê Piáⁿ.
Lán beh ūi I hiàn sím-mı̍h?
Kiám bô koáⁿ-hū 2 poàⁿ-lı̂?
Lí nā bô chı̂ⁿ mā ū kang,
Lí nā bô mı̍h mā ū lâng.
Ūi Chú hōng-hiàn tio̍h tiong-sêng,
M̄-thang khiā teh kóng bô êng,
Lán tio̍h hó-táⁿ kín hiòng-chêng,
Ūi Chú hōng-hiàn chò kan-chèng.
Lí pí pa̍t-lâng khah pù-ū,
Tio̍h chai che sı̄ Chú siúⁿ-sù,
Hoè-mı̍h, chı̂ⁿ-châi chiah-nı̍h chē,
Lóng sı̄ ūi Chú chò koán-ke.
Beh siu, beh jı̍p chiàu sèng-chí,
Beh khai, beh chhut, chhut chāi I,
Chú nā beh ēng bô the-sı̂,
Kam-sim lo̍k-ı̀ chin hoaⁿ-hí.
Lí nā ūi Chú m̄ goān pàng,
Chú beh ı̂-kau hō͘ pa̍t-lâng,
Lí nā ūi Chú kam-goān hiàn,
Beh koh hō͘ lí káng bān chhian.
(Ka-têng ê Pêng-iú, Tē 16 kı̂, 1959 nı̂ 6 goe̍h)
