Bí-kok chhut-miâ ê pò͘-tō-ka, Mo͘dy (Dwight Lyman Mo͘dy, 1837-1899) ū chı̍t-pái siū-chhiáⁿ khı̀ bó͘ kàu-hoē káng-tō. Hit-keng kàu-hoē ê lâng kā i kóng; hit kàu-hoē ê hoē-iú, ū-ê tı̄ lé-pài iáu-boē kiat-sok ê sı̂, ē tāi-seng liu chhut-khı̀; án-ni choè sı̄ oē jiáu-loān káng-tō-chiá ê cheng-sı̂n, sı̍t-chāi hō͘ lâng chin thó-ià. In-ūi án-ni, tāi-seng kā Mo͘dy kóng-bêng; m̄-bián hō͘ i khoàⁿ-liáu kan-khó͘. Mo͘dy thiaⁿ-liáu chí-ū chhiò-chhiò, bô ı̀n chı̍t-kù oē.
Kàu káng-tō ê sı̂, Mo͘dy kóng: “ Goá kin-á-jı̍t ê káng-tō, sı̄ tùi nn̄g-khoán lâng kóng--ê; Tāi-seng sı̄ tùi iáu-boē hoé-kái ê choē-jı̂n kóng--ê, āu-lâi chiah tùi í-keng hoé-kái ê sèng-tô͘ kóng--ê. “Án-ni Mo͘dy tāi-seng kóng Hok-im liáu-āu, hut-jiân thêng-chí, soan-pò kóng, “Hiān-chāi tùi choē-jı̂n kóng ê tō-lí, í-keng kóng-liáu; kok-ūi ê tiong-kan nā-ū siūⁿ-beh liu-chhut-khı̀--ê, thang tāi-seng tńg-khı̀; tán-hāu in tńg-khı̀ liáu-āu, goá chiah koh tùi sèng-tô͘ kóng chiâⁿ-sèng ê tō-lí.”
Mo͘dy kóng chiah-ê oē liáu-āu, lóng bô chı̍t-lâng káⁿ liu-soan, cha̍p-goā nı̂ lâi, thâu chı̍t-pái tı̄ lé-pài iáu-boē soah í-chêng, bô lâng tāi-seng liu chhut-khı̀.
(Tâi-oân Kàu-hoē Kong-pò tē 2075 kı̂, 1991 nı̂ 12 goe̍h)
