Kiám-chhái ū nn̄g-tiâu siàu, chi̍t-tiâu khah-tsōe-ūi, chi̍t-tiâu khah-chió, chīu tio̍h chiong khah-tsōe ūi-ê, siá tī téng-lia̍t tsòe-si̍t, khah-chió-ê, siá tī ē-bīn tsòe hoat, u̍ih-hûn keh-kài. Sêng-khí tio̍h tùi si̍t ê toaⁿ-ūi; sêng-liáu só͘ tit ê siàu hit-ê làn-san tio̍h kì hûn-ē ê toaⁿ-ūi, chīuⁿ-tsa̍p-ê tio̍h chìn chêng-ūi chhin-chhīuⁿ Ka-hoat chi̍t-poaⁿ; í-siōng it-ûn tio̍h án-ni.
Kiám-chhái hoat ná ū chi̍t-ūi tiāⁿ-tiāⁿ, chīu tio̍h siá tī si̍t ê toaⁿ-ūi-ē u̍ih-hûn keh-kài, tùi si̍t ê tōaⁿ-ūi sêng-khí.
Siat-sú ū pún siàu 592, beh ēng 4 lâi sêng-i, khòaⁿ kai tit jōa-tsōe. Hoat-tō͘ tio̍h chhin-chhīuⁿ piⁿ-thâu só͘-sia. 592 tio̍h tsòe si̍t, 4 tio̍h tsòe hoat, u̍ih-hûn keh-kài. Ēng 4 sêng 2 tit 8 , kì 8 tī hûn-ē ê toaⁿ-ūi. 4 sêng 9 tit 36, kì 6 tī hûn-ē ê tsa̍p-ūi, chìn 3. 4 sêng 5 tit 20, kap só͘ chìn ê 3, kiōng 23, tio̍h kì 23 tī hûn-ē. Taⁿ só͘ tit-tio̍h chīu-sī 2368.
592
4
＿＿＿
2368
Ha̍k-seng tio̍h ho͘ kóng, 4, 2 jû 8, kì 8. 4, 9 jû 36, kì 6, chìn 3. 4, 5 jû 20 kiōng 3, 23, kì 23.
Koh piⁿ-thâu pâi-lia̍t siàu hō͘ ha̍k-seng thang ho͘ lâi sǹg. Tio̍h ho͘ kóng 6, 5 jû 20, kì 0, chìn 3. 6, 1 jû 6 kiōng 3, 9, kì 9. 6, 3 jû 18, kì 8, chìn 1. 6, 4 jû 24, kiōng 1, 25, kì 5, chìn 2. 6, 2 jû 12, kiōng 2, 14, kì 14.
24315
6
＿＿＿＿
145890
Chiah ê siàu ha̍k-seng tio̍h ho͘ lâi sǹg.
- 1234 × 2; 230156 × 3; 610378 × 4; 867654 × 5; 635432 × 6; 653002 × 8; 8910046875 × 9.
- Tia̍h-bí, chi̍t-táu tio̍h 285 chîⁿ, chīu la̍k táu tio̍h jōa-tsōe?
- Chi̍t-tè phia̍h ta̍t chhit-ê-îⁿ, chīu 3493 tè ta̍t jōa-tsōe?
- Chi̍t-kho͘-gûn ōe-ōaⁿ-tit 1125 chîⁿ, chīu 8 kho͘ tio̍h ōaⁿ jōa-tsōe?
- Tsûn tsài thô͘-thòaⁿ, chi̍t-tsāi 23460 tàⁿ; chhit-tsāi tio̍h kúi tàⁿ?
- Chi̍t-lâng chi̍t-ji̍t ê kang tio̍h 125 chîⁿ, chīu la̍k-lâng la̍k-ji̍t ê kang tio̍h jōa-tsōe-chîⁿ? Tek 4500.
- Siat-sú chi̍t-tè-tsng ta̍t-tioh la̍k-ê -îⁿ, koh 125 tè ōe pho͘ chi̍t-tn̄g sù-hong: taⁿ beh pho͘ tiâⁿ, it-bīn káu-tn̄g it-bīn chi̍t-tn̄g, tio̍h kúi-tè-tsng? iā tio̍h jōa-tsōe-chîⁿ? Tek 1125; 6750.
