Poàⁿ-kù bô kâng phiàn

Pe̍h-chha̍t-chhit--a put-sı̂ o͘-liap pe̍h-liap, kóng 1-koá bô-iáⁿ bô-chiah ê tāi-chı̀, hāi chiâⁿ chē lâng lóng hō͘ I phiàn kah lin-long-se̍h. Ū 1-pái Kùi-chím--a tı̄ biō-tiâⁿ khoàⁿ-tio̍h, tiō khoàn I āu-pái chhian-bān m̄-thang koh o͘-pe̍h kóng pe̍h-chha̍t. Pe̍h-chha̍t-chhit--a ı̀n-kóng: “Kùi-chím--a, goá chit-má khah láu-sı̍t --a, kóng-oē poàⁿ-kù lóng bô kâng phiàn ! ” Kùi-chím--a: “Lí pe̍h-chha̍t-oē kiàn kóng lóng kóng kui-tàⁿ, ná ū kóng hit-lō poàⁿ-kù--ê !” Pe̍h-chha̍t-chhit--a: “Oan-oán--o͘, lâng goá sı̄ hau-siâu-oē hán-tı̍t bô-kóng niā-niā, thàu-sı̀-lâng lóng mā m̄-bat phiàn--lâng! ” Kùi-chím--a: “Lí kóng-oē hau-siâu-hau-tak, iáu-koh kóng bô phiàn--lâng, goá khoàⁿ lí ê oē nā ē thiaⁿ--tit, káu-sái mā ē chia̍h--tit ! ” Pe̍h-chha̍t-chhit--a: “Mài kóng hiah pháiⁿ thiaⁿ--lah! Lâng goá chí put-kò sı̄ khah ài kóng sńg-chhiò niā-niā, kóng ê oē mā ē-sái ke-kiám-á chò chham-khó ! ” Kùi-chím-á kiông beh thiaⁿ boē loh--khı̀-a, tiō ı̀n-kóng: “Thiⁿ beh lo̍h âng hō͘--a, goá bô beh sı̀n ! ” Pe̍h-chha̍t-chhit--a kín chiap leh kóng: “Chin--ê-lah, chit pái lí it-tēng ài siong-sı̀n ! ” Kùi-chím--a mn̄g-kóng: “Ah bô sı̄ siáⁿ-mih oē ē-sái chò chham-khó?” Pe̍h-chha̍t-chhit--a ı̀n-kóng: “Soah m̄-chai-iáⁿ goá kóng ê oē 10 kù ū 9 kù poàⁿ hau-siâu, iáu ū poàⁿ kù ē-sái chò chham-khó ! ” “Goá khoàⁿ lí sı̄ kui-sin-khu hāi-liáu-liáu, kan-na chhun hit-ki chhùi iáu leh ngiauh ! ” Kùi-chím--a thiaⁿ-liáu chiâⁿ siū-khı̀, oa̍t-thâu thih-bé khan--leh tiō beh cháu, pe̍h-chha̍t-chhit--a kín ùi āu-kè kā giú--leh, hoah-kóng: “Kùi-chím--a, bān-chhiáⁿ-cháu, goá oē kóng iáu-boē-liáu, iáu-ū chhun--leh ! ” “Lí kóng hiah chē “5-4-3”--ê iáu-koh kóng bô-kàu khùi, ah bô chhun--ê sı̄ siáⁿ-mih ?” “Chhun--ê lóng sı̄ sū-sı̍t--lah !” Chù: “5-4-3”--ê: Tio̍h sı̄ o͘-pe̍h kóng, bô chèng-keng ê ı̀-sù.