“A-pek-lia̍p-hán chek-chū pù-jū, ū kim gı̂n cheng-seⁿ” (Chhòng 13:2). Lūn A-pek-lia̍p-hán ê ke-gia̍p sı̄ hō͘ i tit-tio̍h hok-khı̀, in-ūi i chai hiah-ê lóng sı̄ Siōng-tè siúⁿ-sù, in-ūi i tit-tio̍h in-tián kap tı̀-hūi chiū ē hiáu-tit án-cháiⁿ-iūⁿ ēng, koh in-ūi i ê sim ı̀-hiòng tı̄ hit ê bē pāi-hoāi ê chin gia̍p. “Kiaⁿ-liáu lí phah-sǹg sı̄ tùi lí ê châi-lêng khùi-la̍t lâi tit-tio̍h hiah ê hoè-mı̍h chı̂ⁿ-châi. Tio̍h ē kı̀-tit lí ê Siōng-tè Iâ-hô-hoa siúⁿ-sù lí koân-lêng hō͘ lí tı̀-kàu hó-gia̍h” (Sin-bēng-kı̀ 8:17, 18).
Lâng nā chai i só͘ ū ê sán-gia̍p sı̄ ná chhin-chhiūⁿ Siōng-tè chioh hō͘ i ēng; iū-koh nā ē hiáu-tit lia̍h ka-tı̄ chò koán-lí-jı̂n, soà chı̄n pún-hūn chiong i só͘ chiáng ê gia̍p hoaⁿ-hí siat-hoat ēng lâi lı̄-ek pa̍t lâng, chiū hit hō ê koán-lí-jı̂n ē tùi i só͘ ū ê gia̍p ún-tàng tit-tio̍h hok-khı̀. Lâng sui-bóng ke-gia̍p, iáu-kú tùi hit ê gia̍p bô tek-khak khah ū koân thang hián-chhut hó phín-hēng. M̄ sı̄ tùi hoè-mı̍h chı̂ⁿ-châi chiah seⁿ-chhut hó bô͘-iūⁿ, kı̂-sı̍t sı̄ tùi i ê phín-sèng. Lâng nā ū chı̂ⁿ-châi thang ēng, che khiok bô hoān-hiâm; só͘ thang hiâm-ê, chiū-sı̄ ū chı̂ⁿ-châi khı̀ lām-sám khai-hùi hit hō. Lūn-kàu Siōng-tè só͘ siúⁿ-sù ê hoè-châi lâng ē-tit ēng i lâi chò hō-toan. Khiok m̄ sı̄ chı̂ⁿ-châi teh chò bān ok ê kin-goân, kı̂-sı̍t sı̄ tham-châi chiah ū án-ni (I Thê-to 6:10).
Lūn-kàu chı̂ⁿ-châi lâng teh khai ēng kó-jiân ū hit hō hó ê hong-hoat tı̄-teh; nā chiàu kui-kí an-pâi chiū ún-tàng ē hun chē-chē hok-khı̀ hō͘ lâng, chiū-sı̄ ē hō͘ Siōng-tè ê Chin-lí khah thong-hêng, kap hō͘ chèng lâng khah tit-tio̍h lı̄-ek. Chı̂ⁿ-châi khiok ū koân-lêng tı̄-teh; lâng nā lām-sám ēng hit ê koân-lêng chiū tı̀-kàu toā chai-hāi, nā ē hiáu ēng chiū ún-tàng toā kong-iōng. Phı̀-lūn lâi kóng hoé-chhia ū la̍t; lâng nā ē hiáu hoāⁿ chiū lı̄-ek lâng bû bān sò͘, nā bē hiáu hoāⁿ chiū hām-hāi lâng sǹg bē liáu. Lâng nā tāi-seng ū A-pek-lia̍p-hán hit hō khiam-sùn, hit hō thian-sèng, jiân-āu thang chhut-chāi i khı̀ keng-êng tek-lı̄; in-ūi hit hō lâng tek-khak beh chiong i só͘ ū-ê lı̄-ek chèng lâng bû kiông-chı̄n.
Chóng-sı̄ A-pek-lia̍p-hán kap Lô-tek hit chân kò͘-sū bêng-bêng chí-sı̄ lâng m̄-thang choan-sim it-tio̍h chı̂ⁿ-châi. Tùi hit chân tāi-chı̀ ū hián-bêng A-pek-lia̍p-hán tùi i ê sán-gia̍p bô jiá hō-hoān, iā soà hián-bêng Lô-tek hiám-hiám ūi-tio̍h gia̍p khı̀ siū chai-hāi.
Lūn châi sán sui-jiân kó-chin sı̄ ū koân, kó-jiân ū thang tùi-tiōng; chóng-sı̄ m̄-thang lia̍h-chò tē it ū koân lâi tiōng kàu siuⁿ koè-thâu. Chhin-chhiūⁿ tē it pó-poè ê mı̍h hō͘ chı̂ⁿ-châi só͘ bē bé-tit. Phı̀-lūn siàu-liân kap ióng-kiāⁿ; lâng nā í-keng lāu kap soe-lám bē-sái-tit ēng chı̂ⁿ koh hō͘ i siàu-liân, koh hō͘ i ióng-chòng. Iū-koh pêng-iú saⁿ kèng-tiōng, sim-sı̂n ē pêng-an, hō͘ pa̍t lâng thiàⁿ lán, í-kı̍p hiân-jı̂n kun-chú ē chun-tiōng lán, hiah-ê sı̄ chı̂ⁿ-châi lóng bé bē-tit lâi. Chiàu án-ni khoàⁿ khó-kiàn tē it pó-poè ê mı̍h m̄-nā hù-kùi jı̂n ē tit-tio̍h, sàn-hiong lâng iû-goân tit ē tio̍h. Siōng-tè bô phian-su: “Hó-gia̍h kap sàn-hiong chham-chhap, pêⁿ-pêⁿ hō͘ Iâ-hô-hoa só͘ chhòng-chō” (Chim 22-2).
Kiù-chú bat siat phı̀-jū kóng-khí hó-gia̍h lâng kap pı̂n-kiông ê Lia̍p-sat-lō͘. Hó-gia̍h lâng siū khó͘ m̄-sı̄ in-ūi i ū chı̂ⁿ-châi, sı̄ in-ūi i lām-sám khai-ēng. I tı̄ im-kan kia̍h ba̍k khoàⁿ Lia̍p-sat-lō͘ tiàm tı̄ A-pek-lia̍p-hán ê heng-chêng teh khoài-lo̍k. Lia̍p-sat-lō͘ sı̄ ke̍k pı̂n, A-pek-lia̍p-hán sı̄ ke̍k hù, iáu-kú hit nn̄g lâng pêⁿ-pêⁿ ū tit-tio̍h Lo̍k-hn̂g ê hok-khı̀.
(Tâi-lâm Hú-siâⁿ Kàu-hoē-pò tē 293 koàn, 1909 nı̂ 8 ge̍h)
