Sı̍p-jı̄-kè Ê Kau-chiàn 02

Sı̍p-jı̄-kè Ê Iáⁿ Choè-kı̄n Jı̍t-pún ū chı̍t ūi bo̍k-su, Chó-tı̂n Eng-gān lâi Tâi-oân tı̄ kúi-nā só͘-chāi------Ko-hiông, Pı̂n-tong, Tâi-pak, Tâi-tiong, Ka-gı̄, Tâi-lâm------thoân-tō, thè lâng kı̂-tó i-pı̄ⁿ, Chú ê Sı̂n kap i tâng-kang, ū chin-choē lâng tit-tio̍h i-tı̄, i ū chı̍t pún chū-toān-------“Sı̍p-jı̄-kè ê cheng-chiàn” tı̄ chia chit phiⁿ sı̄ i boē jı̍p sı̀n í-chêng ê seng-gâi. 1. Chhut-sı̀ “Khoàⁿ ah, goá sı̄ tı̄ choē-ok tiong siⁿ ê, tı̄ choē ê tiong-kan, goá ê lāu-bú hoâi-ı̄n goá.” (Si-phian 51:5) Iáu boē tit-kiù ê lâng; bô Siōng-tè, bô ǹg-bāng, sı̄ chhin-chhiūⁿ tı̄ jı̍t-iáⁿ ê seng-oa̍h, só͘-í chiah siá “Sı̍p-jı̄-kè ê iáⁿ”. Bêng-tı̄ 45 nı̂ goá chhut-sı̀ tı̄ Tāi-kun-koān ê chhân-chng, goá ê a-kong sı̄ chı̍t ê chùi-hàn, siông-siông kui ge̍h jı̍t bô toà chhù-nih, goá ê a-má chin siū-khó͘. I kā goán kóng i chı̍t siang chhiú tio̍h choè 3 lâng hūn ê kang, lâi ı̂-chhı̂ chı̍t keng teh beh tó ê ka-têng. In-ūi án-ni lāu-pē iā sı̄ tio̍h choè 3 lâng hūn ê kang, chóng-sı̄ sêng-chiap a-kong ê ûi-thoân, iû-goân sı̄ toā chùi-hàn, soà tùi chiú-cheng sit-lo̍h sı̀ⁿ-miā, 52 hè chiū lı̄-khui sè-kan, lāu-bú chin gâu toâⁿ sam-hiân, só͘-í goán tau soà chiâⁿ-choè chng-nı̍h siā-kau ê tiong-sim, chng-nı̍h ê lâng iā chin chun-kèng ka-hū, ū siáⁿ tāi-chı̀ lóng lâi kap i chham-siông. Sı̀n-iōng chiâⁿ-choè siā-kau, soà pı̀ⁿ-choè chiú-toh, só͘-í kui nı̂ thàng-thiⁿ chiū m̄ bat tn̄g, khí-chho͘ khiok sı̄ khoài-lo̍k ê kau-poê hô sam-hiân thiàu-bú, kàu-bé chiū choè mô͘-kúi ê lô͘-châi, thò͘-chhut pháiⁿ thiaⁿ ê chho͘-oē, ū-sı̂ ı̀-kiàn boē ha̍h chiū khí oan-ke, siông-siông ū jı̄-chhù hoē chiū chhut-khı̀ chiú-ka, chiâⁿ-choè chiú ê lô͘-châi, hoān thang kiaⁿ jio̍k-io̍k ê choē. Pē-bú thiⁿ bē kng chiū khí-lâi, seng choè 2, 3 tiám-cheng ê kang chiah chia̍h chá-tǹg, khang-khoè bín-chiat, só͘-í bô-lūn pò͘-chhân á-sı̄ siu-koah, chāi chng-nı̍h lóng sı̄ tē-it chá ê ka-têng hó-kè, hó khoán-thāi lâng, ū chı̂ⁿ thang chioh lâng. Nā-sı̄ goá ê kang sı̄ taⁿ toā ki chiú-kan khı̀ chiú-tiàm, bô-lūn poàⁿ-mı̂ sui-jiân ài khùn iā tio̍h khı̀, chı̍t-lō͘ ná siūⁿ goá cháiⁿ-iūⁿ tio̍h choè chit khoán bô lō͘-ēng ê chhe-ēng? Bô chı̍t hāng pí che khah toā ê mâu-tún. Mı̂--sı̂ lo̍h-hō͘, chiū poàⁿ-mı̂ hō͘ lâng kiò khí-lâi, khı̀ chhân-nı̍h tàu hâ tiū-pé, kok-bı̂n ha̍k-hāu ê sı̂, tha̍k-chheh tńg-lâi iā tio̍h tàu choè hn̂g-nı̍h ê kang. It-liân-seng ê sı̂ tio̍h taⁿ láng-á khı̀ koah chháu, koah ū chiah thang chia̍h chá-tǹg, iā tio̍h chú-pn̄g, khang-khoè nā khah bān tio̍h siū phah, bān-it nā tô kang kap pêng-iú thit-thô, tio̍h chia̍h sàu-se-gím, bô thang chia̍h àm-tǹg, sui-jiân siū chiah giâm ê koán-kàu iā bô put-pêng, hoaⁿ-hí sūn-thàn, chóng-sı̄ tio̍h toà hang-lô͘-piⁿ, ná hiâⁿ hoé ná un chiú ê sı̂, put-sı̂ siūⁿ kóng cháiⁿ-iūⁿ tio̍h án-ni bô khùn lâi choè chit hō chiú-hàn ê chhe-ēng nih, chhùi-lāi ngāu-ngāu liām kóng “Ah! Goá chhut-sı̀ toà chit hō choē-ok ê ka-têng, oa̍h tı̄ choē-ok ê sè-tāi” ū sím-mı̍h lō͘-ēng. Tı̄ chit khoán bû-siông choē-ok ê seng-oa̍h, nā bô tit-tio̍h Chú ê kiù-sio̍k, sı̄ hô-téng ê pi-chhám ah! Tı̄ chit hō khó͘-náu ê tiong-kan kai-chài ū thiàⁿ ê Siōng-tè, chı̍t-pō͘ chı̍t pō͘, chhoā goá keng-kè m̄-chai ê lō͘, tı̍t-kàu I ê bı̄n-chêng, iáu bē khoàⁿ tio̍h sı̍p-jı̄-kè ê kng, teh kiâⁿ àm-àm ê sió-lō͘ Chú siū tèng sı̍p-jı̄-kè, pài-gō͘ ē-po͘ 3 tiám khı̀ Kok-kok-thaⁿ soaⁿ-téng pò͘-moá o͘-hûn, jı̍t iā bô chhut i ê kng. “Tùi jı̍t-tiong-tàu kàu saⁿ tiám, piàn toē o͘-àm.” (Má-thài 27:45) Bô ū Ki-tok ê jı̂n-seng hô-téng ê pi-chhám ah! Chiú ê bı̄ kap sam-hiân ê siaⁿ kap chèng-lâng ê koa-siaⁿ chiâⁿ-choè chı̍t ê, chhoā lâng tı̍t-tı̍t kàu tē-ge̍k ê chhim-ian. Tng-sı̂ ê lông-chhoan siā-hoē chin tūi-lo̍h, toā-lâng ài lim-chiú, lâng ê sim chhiong-moá ké-choè kap saⁿ-chiⁿ, chheng-liân lâng choè sèng-io̍k ê lô͘-lē, hoaⁿ-hí bô iàⁿ-chiah ê kò͘-sū, goá iù-chíⁿ ê hı̄-khang siông-siông teh thiaⁿ chiah ê, pháiⁿ ê kám-hoà sı̍t-chāi thang kiaⁿ, hiah ê chheng-liân oán-jiân chhin-chhiūⁿ Só͘-to-má, Gô͘-mô͘-la̍h ê lâng thàu-mı̂ ûi Lô-tek ê chhù, siūⁿ beh lêng-jio̍k thiⁿ-sài chı̍t-iūⁿ (Chhong-sè-kı̀ 19:1-13) só͘-í cheng-chiat, sûn-kiat, siu-ióng oân-choân tūi-tē, sı̍t-chāi sı̄ khó-lı̂n ê chêng-hêng. Biō-nı̍h ū sı̂ ū teh khoàn-siān, ū tām-po̍h ê chong-kàu chí-tō chóng-sı̄ lóng bô kong-hāu, sio̍k-gú kóng “kı̄n chu chiá chhek”, goá ê sin-khu lêng-hûn iā án-ni tı̂m-le̍k tı̄ Ná-a ê toā chúi nih, goá sı̄ chı̍t ê moá-moá ù-oè ê gín-ná, iáu-kú teh siūⁿ che sı̄ lâng ê sè-kài, sı̍t-chāi bô hoat-tō͘ thang thoat-chhut. “Bo̍h-tit chiú-chùi ê tı̀-kàu hòng-sù.” (Í-hut-só͘ 5:18) 2. Lāu-bú Ê Sí Goá 13 hè ê sı̂, thang kiaⁿ ê liû-hêng kám-mō͘ toā liû-hêng, chit sı̂ sí ê lâng hui-siông choē, ka-bó sò͘-lâi chin kiān-khong, só͘-í bô kiaⁿ phoà-pı̄ⁿ, tio̍h liû-hêng kám-mō͘ iā m̄ goān hioh-khùn, iû-goân tı̄ chhân-nı̍h teh koah-tiū, tı̄ chhân-nı̍h tó lo̍h khı̀ chiah tńg-lâi tó chhn̂g, bô loā-kú chū án-ni lı̄-khui sè-kan. “Nn̄g chiah chhek-chiáu-á kiám m̄ sı̄ boē chı̍t hun gûn mah? Nā m̄-sı̄ lín ê Pē ū chún, chı̍t chiah iā boē ka-la̍uh toē.” (Má-thài 10:29) Siōng-tè ū chún, ka-bó tùi chit sè-kan chhú khı̀, goá siūⁿ sı̄ beh tû-khı̀ sam-hiân, súi ê siaⁿ hô sam-hiân lâi chhiùⁿ ê sı̂, chū-jiân lâng ná teh chùi ná teh bāng. Chóng-sı̄ goá chit ê iù-chíⁿ ê sim, ta̍k pái thiaⁿ-kı̀ⁿ hit hō siaⁿ kám-kak chin thó-ià, só͘-í Siōng-tè chún, ka-bó chiū tùi chit sè-kan chhú khı̀, kám-siā Chú! Bô loā-kú Siōng-tè koh hō͘ goá chı̍t ê lāu-bú, sı̄ chèng lâng tâng siaⁿ chheng-chàn ê hó lāu-bú sı̄ thong chng tē-it khı̂n-bián, koh un-sûn, chin-chiàⁿ sı̄ Iâ-hô-hoa í-le̍k (Chhòng-sè-kı̀ 22:14), sı̄ Siōng-tè sèng-chhiú só͘ pı̄-pān ê, ba-bó sí-āu châiⁿ ge̍h jı̍t, goá ta̍k àm to teh tán-hāu lāu-bú, thàu-hong ê siaⁿ thiaⁿ choè lāu-bú teh kiò goá ê miâ, siông-siông khı̀ thàm bōng, chiū hi-khang àⁿ tàm sin bōng ê thô͘, thiaⁿ khoàⁿ lāu-bú ū oa̍h khí-lâi teh kiò goá bô! Nā ū siaⁿ chiū beh cháu tńg lâi khı̀ kia̍h tı̂-thâu lâi ku̍t bōng thang chhoā lāu-bú tńg lâi khı̀, chóng-sı̄ lóng chiâⁿ-choè khang-khang ê bōng, a-má ta̍k-jı̍t khı̀ bōng-nı̍h toā-siaⁿ khàu tùi sí-khı̀ ê ka-bó kóng khó͘-chêng, “goá bāng beh oá-khò lí, nā-sı̄ lí hoán-tńg choè goá ê thâu-chêng khı̀, ǹg-bāng lí kā goá hû lo̍h chhâ, lí soà kui sim chò lí khı̀, ah! Khó͘ sí goá, goá beh oá siáⁿ lâng nih.” Chhin-chhiūⁿ án-ni tı̄ bōng-nı̍h khàu ê a-má, bô kú tio̍h hoân-ló pı̄ⁿ, hoân-ló lâi koè-jı̍t. Ah! Jı̂n-seng sı̍t-chāi sı̄ bû-siông, ah! Chit sè-kan chiū-sı̄ pi-chhám, chit sı̂-chūn goá iā siông-siông su bó sí. “Koh-oa̍h kap oa̍h-miā chāi tı̄ Chú, sı̀n Goá ê lâng sui-bóng sí iáu-kú beh oa̍h.” (Iok-hān 11:25) Chit khoán ū la̍t ê oē, èng-ún lán éng-oán oa̍h ê Iâ-so͘ Ki-tok nā tı̄ goá ê ka-têng, chiū chit hō thang kiaⁿ ê àm-mı̂ beh bô khı̀, hit ê ū ǹg-bāng chá-khí-sı̂ ê kng ún-tàng chiò jı̍p lâi. In-ūi lán beh tı̄ “Iâ-hô-hoa siúⁿ-sù, Iâ-hô-hoa the̍h khı̀, tio̍h o-ló Iâ-hô-hoa ê miâ.” (Hi-pek-lâi 1:21) lâi kám-siā Siōng-tè, lâi kiâⁿ tı̄ oa̍h-miā ê lō͘. Bô ū Ki-tok ê jı̂n-seng, oân-choân chhin-chhiūⁿ bô, bô ū Ki-tok ê ka-têng sı̄ chhin-chhiūⁿ kong-ke chàu-kha, chí ū ūi-tio̍h chia̍h lâi oa̍h nā-tiāⁿ, tı̄ chit toē-chiūⁿ lán teh sêng-siū jı̍p thiⁿ-téng éng-oán oa̍h ê ki-chhó͘ kàu-io̍k, só͘-í ka-têng nā boē thang chiâⁿ-chò sió-hêng ê thian-kok, hit ê ka-têng chiū bē su bōng-po͘. Chú kóng “Tio̍h tı̄ siàu-liân ê jı̍t kı̀-liām chhòng-chō lí ê Chú.” (Thoân-tō 12:1) Hō͘ kiáⁿ-jı̂ chhēng súi-saⁿ, chia̍h hó-mı̍h, m̄ ta̍t tio̍h tē it kà in “A-bēng, o-ló Chú” hō͘ in oē hiáu siang-chhiú ha̍p-oá ǹg Iâ-so͘ ê lâi kı̂-tó che chiah sı̄ chin ê pē-bó sim, tı̄ hia ka-têng chiah ū boē iô-tāng ê toē-ki, tı̄ hit téng-bı̄n lâi khí-chō thian-kok, che ū chin ê pē-bó sim, Che tùi thiⁿ koàn-kò͘ chit-ê tē-chiūⁿ, ēng toā ê jia̍t-sim lı̂m-chāi tı̄ hit hō ê sim, goá tùi sè-kan ê sı̂, thong-kè pi-siong ê kò-pe̍k, chiàu Sèng Sı̂n ê ín-chhoā tı̄ kı̂-tó án-ni kiàn-chèng. 3. Siōng-tè Ê Pó-hō͘ Goán ê chng tiuⁿ-ng ū chı̍t ê pi nı̂-nı̂ loā-choē lâng tı̄ chit ê pi sit-lo̍h sı̀ⁿ-miā, chóng-sı̄ hē-thiⁿ boē kham-tit joa̍h, chheng-liân lóng ài khı̀ hia siû chúi, pē-bó sui-jiân ū kı̀m, nā-sı̄ gín-ná lóng oē thau cháu khı̀ hia siû-chúi, goá iā siū ín-iú khı̀ hia siû, ū chı̍t pái siû liáu siān, teh beh tı̂m lo̍h-khı̀, chia̍h tio̍h chúi teh tı̂m lo̍h khı̀ hit sı̂ ê kan-khó͘ oh-tit kóng bêng, hoah kiù lâng, iā bô lâng thang lâi kiù, siūⁿ beh chhoán-khùi, chhùi chı̍t khui chúi chiū chhèng tùi nâ-âu jı̍p lâi, chiū koh tı̂m lo̍h-khı̀, kha-chhiú koh phah-phún, phû khí-lâi 2, 3 pái, nā sı̄ la̍t chı̄n chiū tı̂m lo̍h-khı̀, choè-āu tı̄ chúi-té siūⁿ kóng “goá ê sı̀ⁿ-miā kàu chia soah lah!” Chiū án-ni tó tı̄ chúi-té, kè chı̍t sı̂-á, ba̍k-chiu chı̍t-ē thí-khui, ū liâng-hong teh chhoe goá ê bı̄n, chiah chai goá tó tı̄ chháu-chang téng, sı̄ kı̂-chek-tek hō͘ lâng tùi chúi-té kiù khí-lâi, ka-hū thiaⁿ tio̍h chit ê sū chiū cháu lâi, chhiú kia̍h chhê-á, bı̄n pı̀ⁿ-pı̀ⁿ, chiong goá thoa lo̍h pi-nı̍h ēng chhê-á tı̍t phah, kóng “m̄-thang koh siû, thài thang tùi chúi lâi sit-lo̍h sı̀ⁿ-miā?” Sı̄ lâu ba̍k-sái ê kàu-hùn, hit sı̂ a-chím cháu-lâi thè goá jı̄n choē, a-chím ēng un-loán ê chhiú chhoā goá tńg khı̀, saⁿ hō͘ goá chhēng, hó-mı̍h hō͘ goá chia̍h, chiah ê sū, kàu hiān-chāi iáu bô bē kı̀-tit. Tùi chiah ê sū hō͘ goá khak-sı̀n Iâ-so͘ Ki-tok ê koh-oa̍h iā Chú Iâ-so͘ kiò Ná-in ê siàu-liân khí-lâi. (Lō͘-ka 7:11-17) Chiah ê koh-oa̍h ê hok-im, cheng-ho̍k sí, cheng-ho̍k toē-ge̍k, éng-oán oa̍h ê sı̀n-gióng, koh-oa̍h ê hok-im chiâⁿ choè goá ê sı̀n-gióng. Kı̂-thaⁿ goá kúi nā pái siū chû-ài ê Siōng-tè ê sèng-chhiú chín-kiù. 8 hè ê sı̂ beh khı̀ tek-phō-kha bán chháu-mûi, tùi hoāⁿ-téng thiàu lo̍h tek-phō ê sı̂ hō͘ tek-thâu chhiám tùi kha té thàu kha-poâⁿ, lâu-huih kè choē tó lo̍h khı̀, kai-chài ū kè-lō͘ ê lâng āiⁿ goá khı̀ jı̍p-ı̄ⁿ. Ú-tiū it-chhè ê mı̍h to chāi Siōng-tè ê chhiú-tiong, liân lak chı̍t hio̍h chhiū-hio̍h iā ū Siōng-tè ê chí-ı̀. Sı̂n-ha̍k siōng chheng choè Siōng-tè ê liap-lí, it-chhè sı̄ ūi-tio̍h beh kiù lâng, koh 9 hè ê sı̂, hoān tio̍h náu-mo̍͘h-iām, i-seng soan-kò bô bāng, chóng-sı̄ hó khí lâi, iā bô phoà-siùⁿ, chhim-sı̀n sı̄ Siōng-tè ê un-tián, kám-in put-chı̄n. Í-goā iáu ū kúi nā pái tit-kiù chhut sí soàⁿ ê sū taⁿ séng-lio̍k. Chí-ū hoê-kò͘ chiah ê, kám-siā Siōng-tè ê pó-siú, goān hiàn chit ê sin-khu lêng-hûn, ūi-tio̍h khùn-khó͘ ê pêng-iú, phoà-siùⁿ--ê, lân-pı̄ⁿ ê lâng, ho̍k-bū chı̄n-sim kı̂-tó. “Goá bē chhòng-chō lí tı̄ pak-tó͘ lāi ê tāi-seng, Goá bat lí; lí bē chhut-thai ê tāi-seng, Goá hun-pia̍t lí choè sèng; siat-lı̍p lí choè lia̍t-kok ê sian-to.” (Iâ-lı̄-bí 1:5) 4. Chû-ài Ê Lāu-bú Lāu-bú lâu 3 ê kiáⁿ, 33 hè lı̄-khui sè-kan, koh lâi ê āu-bú sı̄ chin un-jiû hó sèng-chêng ê hū-jı̂n-lâng, goán lóng tùi sim-té chun-kèng i thiaⁿ-thàn i, m̄-nā chhâi-hông gâu, ióng-khı̀ bô su ta-po͘ ê, iā ē tı̄ chhân-nı̍h sái gû-lê. I ê sı̀n-sim koh khah hō͘ goán kám-kek, goá lı̄-khui kò͘-hiong khı̀ kiû ha̍k ê sı̂, beh seng-ha̍k chin ûi-lân, āu-lâi chiap ka-hū ê lâi-sı̀n án-ni kóng: “Lín lāu-bú ūi-tio̍h lí ê jı̍p-ha̍k poàⁿ-mı̂ khí-lâi chhēng pe̍h-saⁿ chē toà chíⁿ-piⁿ lâm léng-chúi ha̍p-chhiú choan-sim kiû sı̂n, goá hō͘ poa̍h-tháng siaⁿ kiaⁿ chhíⁿ, só͘-í goá chiah kā i kóng kiáⁿ-jı̂ bô kı̍p-keh mā bô iàu-kín, m̄ thang koh án-ni lâm léng-chúi, nā phoà-pı̄ⁿ beh án-choáⁿ?” Goá tha̍k liáu hui-siông ê kám-bêng. A-pek-la̍h-hán bē siū kéng-tiàu í-chêng, kiám-chhái tè lāi-pē Thaⁿ-la̍h pài ngó͘-siōng, chóng-sı̄ i ê sûn-chin chhim-sı̀n, jia̍t-sim kı̂-tó, kàu-bé thang kı̀ⁿ-tio̍h chin oa̍h ê Siōng-tè, Siōng-tè hē tı̄ lâng sim-toé ê pún-lêng, chiū-sı̄ tui-chhē Siōng-tè ê sı̀n-sim, kám-siā Siōng-tè siúⁿ-sù chit hō ê bó-chhin. A-men!