1 Kiù-Chú-Tàn Hit-Mê
A-pa Án-niâ, kín pı̄-pān o͘h! Pài-tn̂g ê toā cheng teh tân lah nē!
Hūi-bí ê sim chin hoaⁿ-hí; in-ūi kin-mê sı̄ Kiù-chú-tàn, i kap in hiaⁿ-ko Chheng-hûn á, chū kúi-nā tiám cheng chêng, chiū oāⁿ saⁿ-khò͘ pı̄-pān hó, beh khı̀ hù. In-ūi nn̄g hiaⁿ-moāi sı̄ chin oa̍h-tāng. I pún-sin kin-nı̂ sı̄ 18 hoè, seⁿ-chò súi, koh koai, léng-lı̄, koh gâu tha̍k-chheh. Kin-nı̂ sı̄ Lâm-kiaⁿ Séng-lı̍p ê ko-téng Lú-ha̍k-hāu 4 liân, ta̍k-nı̂ thâu miâ, iā hiaⁿ-ko kin-nı̂ 20 hoè, tı̄ Lâm-kiaⁿ ê Séng-lı̍p Siong-kho Tāi-ha̍k 3 liân; 2-ê lóng sı̄ koh bô loā-kú beh chut-gia̍p. Iā tı̄ chit-ê hioh-nı̂, tńg lâi chhoē pē-bó. In sı̄ tiàm tı̄ lı̄ Lâm-kiaⁿ jı̍p-tang 10 goā phò͘ ê soaⁿ-kha, chı̍t ê hiuⁿ-chng, kiò-chò Sù-liông chng.
Chit ê chng-miâ chin hó thiaⁿ, chiū sı̄ chng sui-bóng bô loā-toā; iáu-kú chiân Chheng sı̂-tāi, tı̄ hit chng-nih ū chhut kúi-nā ê kí-jı̂n ; siù-châi iā bē chió. Só͘-í sı̄ siong-tong ū bûn-hoà ê chng-siā. Jı̂n-kháu 2000-liân. Iā-ū chı̍t-tiâu ke-á teh bé-bē; Soaⁿ lāi chhut jı̍p ê lâng chin-chē. Só͘-í sui-bóng sı̄ kóng soaⁿ-kha ê chhân-chng só͘- chāi; m̄-kú iā-sı̄ siong-tong ê nāu-jia̍t.
Hūi-bí in lāu-pē khiok-sı̄ siong-tong ē tit-koè ê lâng, chêng A-kong bat tiòng-kí. Lāu-pē iā sı̄ lāu siù-châi, châi-sán ùi lāu-pē siàu-liân ê sı̂ phiâu, tó͘, ím, saⁿ-koán chn̂g; koh ài chia̍h a-phiàn; só͘-í chá iû-goân ū khai-koá. Hiān-sı̂ só͘-chhun khiok-sı̄ 3, 2 tàⁿ chı̂ⁿ. Lāu-pē tı̄ 30 goā hoè ê-sı̂ , ū jiám-tio̍h tāng-pēⁿ hiám-sí, hit-sı̂ ū lâi lâm-kiaⁿ hō͘ Ki-tok-kàu khui ê i-koán i-tı̄, tùi hit-sı̂ tit-tio̍h tō-lí. Hit-tia̍p hiaⁿ-ko Chheng-hûn 4 hoè, iā i pún-sin iá-boē chhut-sı̀. Tùi hit-tia̍p liáu-āu lāu-pē chiâⁿ jia̍t-sim sı̀n-Chú, keh 2 nı̂ chiah seⁿ hūi-bí-ah.
Tiong-kok-lâng sı̄ tiōng-lâm-kheng-lú; chóng-sı̄ lāu-pē ūi siàu-liām Chú ê thiàⁿ, kiù i chhut-sí-jı̍p-oa̍h koh ké a-phiàn kap it-khài phaiⁿ-tāi; só͘-í i chiah hō i chò hūi-bí, lâi siàu-liām Siōng-tè in-hūi ê bí. Tùi hit-tia̍p liáu-āu lóng bô koh seⁿ. Án-ni chiū tùi kiáⁿ thiàⁿ-miā-miā. Tùi sı̀n-Chú liáu-āu, chiū jia̍t-sim tı̄ kàu-hoē, só͘-í siū kéng-chò tiúⁿ-ló, liân-jı̄m chē-chē nı̂. Kàu kin-nı̂ 50 goā hoè, iáu-kú teh chò tiúⁿ-ló; só͘-í tē-hng ê lâng nā kóng Lı̂m Tiúⁿ-ló bô chı̍t-ê m̄-chai i sı̄ jia̍t-sim ê Ki-tok-tô͘. Iā i bô keng-êng seng-lí; sı̄ chiong i só͘ ū ê chhân chhiàⁿ-kang lâi choh; só͘-í ke̍k ū sı̂-kan thang poê-iúⁿ nn̄g-ê kiáⁿ-jı̂. Tùi sè-hàn hō͘ in jı̍p Ki-tok-kàu ê ha̍k-hāu, tı̍t-tı̍t poê-iúⁿ kàu chut-gia̍p, thang-kóng sı̄ chin sūn-sū, chin boán-chiok, 2-lāu siông chiong chit 2-ê kiaⁿ lâi hoaⁿ-hí.
Iā kin-nı̂ sı̄ tı̄ chng-kha ê kàu-hoē, beh chò chiok Sèng-tàn-sek, 2 hiaⁿ-moē ū kià-hū kúi-nā chhut. A-hiaⁿ violin siong-tong ē-e, Hūi-bí-ah piano iā siong-tong ē-toâⁿ koh siaⁿ chin hó; só͘-í 2-ê phut-phut-thiàu chin ài khı̀ hù khui-hoē; m̄-kú a-niâ kap a-pa lóng lāu-lâng, àm-sı̂ kiâⁿ-lō͘ ài ta̍h-thām; só͘-í i tio̍h tán kā in khan. Koh bô loā-kú chiū khı̀. Tùi-thâu kàu-boé chin sim-sek tò-lâi. Tiong-kan chı̍t-chhut put-chí chhim-khek tı̄ Chheng-hûn ê náu-lāi; chiū-sı̄ seng-lí-lâng chhoē chin-chu (sı̄ Iâ-so͘ ê phı̀-jū) chò-khı̀ chin chhut-sı̂n. Tùi chit-sı̂ ū hoàn-khí i chı̍t-hāng chhù-bı̄; chiū-sı̄ siūⁿ i Tāi-ha̍k chut-gia̍p āu, iā i siūⁿ beh lâi-khı̀ goā-kok chò chhin-chhiūⁿ hit-khoán seng-lí. Khoàⁿ-liáu tò-khı̀ ū chiong chit-ê só͘-kám kóng-hō͘ in lāu-pē thiaⁿ. Iā lāu-pē thiaⁿ-liáu tiām-tiām, lāu-bú tı̍t-tı̍t hiâm, kóng chò hit-hō seng-lí tio̍h khı̀ goā-kok phún-cháu, i khah bô-ài. Hū-jı̂n-lâng ê khoán lóng-sı̄ án-ni, i ài i tiàm pún-só͘-chāi khui-hâng á-sı̄ kap lâng tiàm. Lâi chia̍h hoē-siā, kong-si ê thâu-lō͘. Chóng-sı̄ sió-moāi Hūi-bí chin chàn-sêng hiaⁿ-ko ê soeh, kóng chheng-liân-lâng eng-kai tio̍h án-ni oa̍h-tāng. Só͘-í nn̄g hiaⁿ-moāi chiū ū-oē-kóng. Liáu-āu koh bô loā-kú, chiū tāi-ke koh jı̍p-o̍h. Chia chhiáⁿ àn-hā.
2-lāu, kiáⁿ lóng khı̀ jı̍p-o̍h, lāi-bı̄n chin bô-phoāⁿ koh ke-chiáu chhı̄ chē, bô-êng chiū siūⁿ-kóng tio̍h lâi chhoē chı̍t-ê tú-hó ê sim-pū. 2-lāu chiū chham-siông, tāi-ke tông-ı̀ ài chò pún kàu-hoē bo̍k-su ê cha-bó͘-kiáⁿ. Bo̍k-su ê cha-bó͘-kiáⁿ kin-nı̂ kap Hūi-bí tâng-o̍h, pêⁿ-chē hoè, siāng liân-kı̍p, pêⁿ-pêⁿ mê-nı̂ 4 goe̍h ē chut-gia̍p, hō-chò Ông Soat-moê, seⁿ-chò iā-sı̄ chin hó, kap Hūi-bí sı̄ chı̀-hó ê pêng-iú; só͘-í 2-lāu chham-siông liáu, chiū iang-lâng khı̀ tùi Bo̍k-su kóng, Bo̍k-su iā-sı̄ chin hoaⁿ-hí; in-ūi sı̄ pún-tông jia̍t-sim tiúⁿ-ló ê hāu-seⁿ. Siàu-liân-lâng iā-sı̄ hó phín-hēng koh chin ū chı̀-khı̀. Só͘-í tùi-chhùi ín--i. Chiū hō͘ 2 ê siàu-liân chai jı̄-pí iā-sı̄ chin hoaⁿ-hí. Tùi án-ni Chheng-hûn siông-siông siá-phoe hō͘ Soat-moê. Soat-moê iā siông-siông siá-phoe hō͘ Chheng-hûn. 2-ê chin-chiàⁿ chêng-tâu-ı̀-ha̍p, saⁿ-thiàⁿ m̄-ài pun-khui. Sı̂-jı̍t chin khoài-koè, liâm-piⁿ sı̀-goe̍h, chiū tāi-ke chut-gia̍p. Chiàu Chheng-hûn ê lāu-pē sı̄ ài liâm-piⁿ kā in chhoā, Ông Bo̍k-su in hit-pêng iā-sı̄ chin hoaⁿ-hí. Chóng-sı̄ Chheng-hûn ê ı̀-sù m̄-ài hiah-kín, i sı̄ ài chiong i só͘ thàn ê chı̂ⁿ lâi chhoā khah ū sim-sek. Só͘-í chin chhim-ı̀ tùi lāu-pē kiû, chún i chhut-goā lâi chò seng-lí, oá poàⁿ-nı̂ āu chiah tò-lâi chhoā. I ê lāu-pē pún m̄, chóng-sı̄ ūi-tio̍h i pek-chhiat chiū chún i. I ê só͘ ài chiū-sı̄ chiàu chêng só͘-kóng, ài khı̀ goā-kok chò pó-poè kùi-tiōng-phín ê cháu-chúi seng-lí. Só͘-í chiū khı̀ bé chı̍t-chiah bé iā ka-jı̍p goā-kok ê tūi-siong, chit-pang sı̄ beh khı̀ Ìn-tō͘. Hia iā-sı̄ pêng-sı̂ i chı̀ him-bō͘ ài-khı̀ ê ūi, só͘-í chin hoaⁿ-hí ka-kı̄ chiū kap pêng-iú tāi-ke hoē-ha̍p, tı̄ 5 goe̍h chhe beh tùi Lâm-kiaⁿ chhut-hoat. Tāi-ke beh ēng khan-bé koè-soaⁿ, iân-lō͘ tùi kui-hoà ê chheⁿ-hoan á-sı̄ soaⁿ-lāi ê lâng bé chiah-ê cheng-seⁿ iá-siù ê phoê chhin-chhiūⁿ lo̍k-phoê, pà-phoê, á-sı̄ lo̍k-jiông, chhiūⁿ-gê ê lūi. Só͘-í tı̄ 4 goe̍h 29, chiū tùi pún-só͘-chāi chhut-hoat.
2 Chheⁿ-Hoan Pio-Á
Beh chhut-hoat ê sı̂, ke-lāi ê lâng lóng lâi saⁿ-sı̂. Te̍k-pia̍t Hūi-bí kap Bı̄-hun-chhe Soat-moé sàng chin-hn̄g, tāi-ke khan-chhiú saⁿ-chim pun-khui; hit-tia̍p Chheng-hûn khiâ-bé tı̍t-tı̍t chı̀n-chêng khı̀ Lâm-kiaⁿ. Soat-moê kap Hūi-bí khiā-teh kim-kim- siòng, sàng-kàu bô khoàⁿ-kı̀ⁿ chiah soah. Kàu bô khoàⁿ-kı̀ⁿ ê sı̂, Soat-moê hut-jiân lâu ba̍k-sái, Hūi-bí sim iā chin kan-khó͘, 2-lâng iu-būn iu-būn tò-khı̀. Hūi-bí iā m̄-káⁿ mn̄g in só, in-ūi iáu-boē koè-mn̂g. Tāi-ke lóng-sı̄ siàu-liân-lâng sim-tiong àm-àm siūⁿ in só ún-tàng sı̄ teh sim-būn in ko beh khı̀ hiah-hn̄g, tio̍h poàⁿ-nı̂ chiah-ē tò-lâi, só͘-í sim-sng. Iā Soat-moê iā chı̄n só͘-ē kek chhiò-bı̄n, kiaⁿ hō͘ in sió-ko͘ khoàⁿ-kı̀ⁿ i ū teh háu ê khoán. Kı̂-sı̍t Soat-moê m̄-sı̄ kan-ta ūi lı̄-pia̍t lâi iu-būn nā-tiāⁿ; sı̄ chhin-chhiūⁿ iáu-ū koh khah toā chhám ê sū, lâi tı̀-kàu hō͘ i ê sim hiah toā kan-khó͘, chóng-sı̄ lóng bô kóng-chhut. Chia chhiáⁿ àn-hā.
Kóng Chheng-hûn kàu Lâm-kiaⁿ, chiū ū 7-ê phoāⁿ teh tán-i. Kàu 5 goe̍h chhe-it, chiū tāi-ke pı̄-pān kan-niû, kiōng i 8-ê chiū khí-kiâⁿ. Beh chhut-hoat ê sı̂ ū siá 2-tiuⁿ phoe; chı̍t-tiuⁿ hō͘ sió-moāi, chı̍t-tiuⁿ hō͘ Soat-moê.Hō͘ Soat-moê ê phoe ke̍k-kán; chóng-sı̄ oē hō͘-lâng tha̍k-liáu sim chin kan-khó͘.
Phoe ê só͘ siá.
Goá só͘ thiàⁿ--ê pêng-an.
Tı̄ beh lı̄-pia̍t ê sı̂, goá khoàⁿ lí ū iu-būn ê khoán-sit, goá chin m̄-kam; chóng-sı̄ lán éng-kai tio̍h khoàⁿ lán ê chiân-tô͘ lâi lı̍p-chı̀. Ah! Só͘ thiàⁿ-ê, goá kin-á-jı̍t ê oa̍h, kap it-khài ê tio̍h-boâ, bô m̄-sı̄ lóng ūi-tio̍h lí, só͘-í ǹg-bāng lí gâu chiàu-kò͘ sin-thé, lâi tán-hāu goá ê sêng-kong koh tò-lâi. Chóng-sı̄ chit-pang ê chhut-goā, soaⁿ-lō͘ khi-khu, lō͘-tô͘ hiám-iàu. Thiaⁿ tâng-phoāⁿ teh kóng, ū-sı̂ ū chheⁿ-hoan, ū-sı̂ ū iá-siù ê gûi-hiám. Só͘-í m̄-chai beh ū miā thang tò-lâi kı̀ⁿ-bı̄n á-bô, iā bô tek-khak. Chóng-sı̄ bo̍h-tit koè-thâu ê hoân-ló. In-ūi goán chı̍t-tūi ū 8-ê, koh ta̍k-lâng lóng-ū bé chhèng toà chāi sin; bû-kò͘ lí tio̍h pek-chiat thè-goá kı̂-tó. Kiû Chú chān lán sêng-kong, thang hióng-siū Sèng-ài ê ka-têng kàu éng-oán.
Lâm-kiaⁿ Lı̂m chheng-hûn
A.D. 1920. 5. 1 jı̍t.
Só͘-thiàⁿ kut-tiong ê kut, bah-tiong ê bah ê Soat-moê siu.
Ah! Soat-moâi tha̍k chit-tiuⁿ phoe, moá-pak iu-būn, àm-àm chhit ba̍k-sái lâi khoà-lū tiōng-hu chhut-goā ê gûi-hiám. Chia chhiáⁿ àn-hā.
Kóng Chheng-hûn in khí-kiâⁿ tı̍t-tı̍t kàu Chi-ná ê lâm-pêng-piⁿ, í-keng kı̄n Ìn-tō͘ ê kau-kài tāi-ke chin siān. Só͘-í tāi-ke tı̄ hia hioh kúi-nā jı̍t chiah koh khí-kiâⁿ. Keng-koè chiâⁿ lé-pài, jı̍p-kàu chin chhim ê soaⁿ, tı̄-hia siong-tong tāi-ke iā í-keng ū tùi hiah ê ū kui-hoà ê hoan, lâi bé tām-po̍h soaⁿ-sán-mı̍h, iā tāi-ke kín teh chı̀n-chêng. Chiông-tiong Chheng-hûn lō͘ bô-se̍k, pêng-sı̂ gâu pháu-bé m̄-kú soaⁿ-lō͘ chiū khah bô koàn-sı̀.
Só͘-í siông-siông chò-lâng ê boé-āu, khiok tāi-ke ū siông-siông teh tán-i. Chiông-tiong hiah ê pêng-iú ū chı̍t-ê kiò-chò Tân Ek-sam sı̄ kap i siāng ha̍k-hāu, pí i khah chá chut-gia̍p 2 nı̂, chı̂ⁿ í-keng thàn chin-chē. Chheng-hûn ē lâi ka-jı̍p tı̄ chit-ê tūi-siong, chı̍t-hāng iā sı̄ khoàⁿ chit-ê Ek-sam hiaⁿ ê sêng-kong. Só͘-í chin hòng-sim. Ek-sam iā-sı̄ tài- liām-tio̍h siāng bó-hāu, hāu-iú ê chêng; só͘-í iā chin te̍k-pia̍t chiau-hu i.
Kàu ū chı̍t-chām, jı̍t í-keng àm, hia bô chhù, chiū tāi-ke khùn-tı̄ chı̍t-châng toā-chhiū ê ē-bı̄n lâi keh-mê, sı̀-piⁿ chhiū-nâ àm-àm. Hit-mê sı̄ chin koâⁿ, hong chin thàu, bô-goe̍h bô-chheⁿ, àm-bı̂n-bong. Kàu poàⁿ-mê āu, ū boē-khai-hoà ê chheⁿ-hoan chhut-chháu, chai ū-lâng tùi chia koè; só͘-í chhut-lâi cha̍h-lō͘, khiok lō͘ ê sı̀-piⁿ ū khan tiān-khı̀ ê liân-soàⁿ lâi pé chheⁿ-hoan. In-ūi kin-mê hong-thàu, tiān-soàⁿ ū tām-po̍h phah-pháiⁿ, thèng-tiān; só͘-í chheⁿ-hoan ē-tit lo̍h hit-tiâu toā-lō͘ lâi thâi-lâng; oá-lâi in tiong-kan, ū-lâng seng cheng-sı̂n, chiū hoah chheⁿ-hoan kàu, chiū khui chhèng phah-khı̀. Kı̂-û ê lâng iā khui-chhèng phah-khı̀. Chhèng ê siaⁿ phı̀n-phòng-kiò, tāi-ke lóng tiām-tiām khut-tı̄ ù-nih lâi phah-chhèng. Chheng-hûn bē-hiáu-tit chı̍t-ê-sū,siuⁿ bān bih, khı̀ hō͘ chheⁿ-hoan khoàⁿ-kı̀ⁿ, chı̍t-ê bi tùi āu-bı̄n ēng pio-á chha̍k--lâi, tú-tú chha̍k tùi kha-chiah-phiaⁿ khı̀ thàng sim-chōng koè-khı̀. Aih! Chı̍t-ē chū án-ni tó-lo̍h-khı̀. Ek-sam thiaⁿ sı̄ Chheng-hûn ê siaⁿ chiū hoan-sin khoàⁿ āu-bı̄n chı̍t-ê chheⁿ-hoan jı̍h-oá-lâi, chiū khui-chhèng phah-khı̀. Tú-tú tio̍h chheⁿ-hoan ê heng-khám. Chheⁿ-hoan iā jiáng chı̍t-siaⁿ chin toā-siaⁿ chiū tó-lo̍h-khı̀. Tùi án-ni chheⁿ-hoan kín thè. Kai-chài Chheng-hûn bô hō͘ chheⁿ-hoan khoàⁿ-kı̀ⁿ. Chheⁿ-hoan thè liáu-āu, in chiū tiám-hoé lâi khoàⁿ Chheng-hûn ê kha-chiah. Bı̄n í-keng pı̀ⁿ sí-lâng-sek phak-tı̄ thô͘-kha, teh kiû Siōng-tè chiap-la̍p i ê lêng-hûn. Hit-sı̂ Ek-sam oá-lâi, kā i kóng, hó-pêng-iú Chheng-hûn, taⁿ lí m̄-chai ū beh koh kóng sím-mı̍h á-bô? Ah! I í-keng sim chin bô-la̍t, in-ūi hoeh lâu chin-chē. Chiū sè-sè siaⁿ kóng, Ah! Ek-sam hiaⁿ goá…goá…ū…ū…kúi-kù oē beh, beh kau-tài lí. Bô-la̍t chiū thêng chin kú bô koh kóng-oē. Ah! Ek-sam khoàⁿ chı̍t-ê chêng-hêng bē-kı̀m-tit iā thè i lâu ba̍k-sái. Āu-lâi chiū kóng, Chhiáⁿ lí, lí…chiong goá ê, ê…thâu, thâu-mn̂g…koah tām-po̍h khí-lâi…the̍h, the̍h…siaⁿ tı̍t-tı̍t sè-khı̀, chhin-chhiūⁿ bô thiaⁿ-kı̀ⁿ, Ek-sam chiū kap i phak-tı̄ thô͘-nih. Hit-sı̂ tı̄ i chhùi-lāi sè-sè-siaⁿ teh háu, í-keng chin bô-la̍t thang koh kóng. Ek-sam chiū kóng, Lí sı̄ ài goá chiong lí ê thâu-mn̂g koah tām-po̍h the̍h tò-khı̀ hō͘ lí ê lāu-pē khoàⁿ á-m̄-sı̄? Chheng-hûn tı̀m-thâu lâu ba̍k-sái chiū khùi-tn̄g. Ah! Ek-sam kap kı̂-û ê pêng-iú bô m̄ pi-siong lâu ba̍k-sái; chóng-sı̄ lóng m̄-káⁿ khui-siaⁿ lâi háu.
3 Hóng-Būn
Tùi án-ni Ek-sam chiū kā i koah tām-po̍h thâu-mn̂g, ēng kin-á kā i pau-teh. Keh thiⁿ-kng chiū kap pêng-iú ó͘ chı̍t-khang tı̄ toā-chhiū-ē kā i tâi hia, soá chı̍t-tè toā-chio̍h kā i hē-tı̄ téng-bı̄n ēng i só͘ toà ê to, ēng to-boē kā i tok hit-tè chio̍h . In-ūi bô sı̂-kan m̄-káⁿ khek-jı̄; bû-kò͘ kā i khek chı̍t-jı̄ + chò Sı̍p-jı̄-kè ê kı̀-hō. In-ūi Ek-sam sui-bóng m̄-sı̄ Ki-tok-tô͘; iáu-kú i bat siông khı̀ hù Lâm-kiaⁿ Ki-tok-kàu Chheng-liân-hoē ê káng-ián, só͘-í ū tām-po̍h Ki-tok-kàu ê sò͘-ióng. Chò kán-tan ê kı̀-hō chiū koh chhut-hoat. Tāi-ke chı̍t-sim iu-būn ê sim iā-sı̄ chin kiaⁿ. Só͘-í tı̍t-tı̍t phah-bé cháu chı̀n-chêng bô oa̍t-thâu.
Kàu Ìn-tō͘ Bēng-mái-siâⁿ. Chit-ê sı̄ Ìn-tō͘ hui-siông chhut-miâ ê siâⁿ, chiū tı̄-hia pān-hoè. Liáu-āu chiong in ê bé bē-tiāu, m̄-káⁿ koh tùi goân-lō͘ tò-khı̀. Iā tı̄-hia Ek-sam liām-tio̍h tông-chhong ê chêng; in-ūi tı̄ hāu-tiong tāi-ke bat chò-hoé 1-nı̂. Hit-sı̂ Ek-sam tāi-ha̍k 3 liân, iā Chheng-hûn sı̄ Tāi-ha̍k ê ko-téng-pō͘ 3 liân; só͘-í tı̄ o̍h-lāi chiū sio-bat, liām-tio̍h chit-ê chêng, chiū khı̀ chù-bûn chı̍t-ê sûn-kim ê a̍p-á lâi té hiah-ê thâu-mn̂g. Jiân-āu tāi-ke tùi chúi-lō͘ tò-khı̀ Lâm-kiaⁿ. Chia chhiáⁿ àn-hā.
Kóng Chheng-hûn in chhù-nih ta̍k-jı̍t liām iā bāng, tùi chhut-hoat kàu chit-tia̍p í-keng 3 goe̍h goā jı̍t, cháiⁿ-iūⁿ lóng bô phe-sı̀n. Só͘-í sim chin kan-khó͘. Iā Soat-moê kap Hūi-bí 2 lâng nā chò-hoé, bô m̄-tiāⁿ hoân-ló in Ko ê sū, iā Soat-moê tı̍t-tı̍t teh pı̄-pān kè-chng, ū-sı̂ Hūi-bí iā bat chān i tàu chhiah toh-kin, á-sı̄ siù chhat-á, tang-sai, chin chhin-bı̍t.
Ū chı̍t-jı̍t tı̄ in āu-boé ê hoe-hn̂g teh siù chhat-á, in-ūi 2 ê chin siong-hó. Soat-moê sui-bóng boē koè-mn̂g; iáu-kú siông-siông lâi Hūi-bí in tau, tāi-ke chò-hoé chò khang-khoè. Hut-jiân ū chı̍t-ê chheⁿ-hūn-lâng jı̍p-lâi, teh mn̄g khoàⁿ Chheng-hûn in ê chhù sı̄ chia á m̄-sı̄? Hūi-bí chiū khí-lâi ip-lé, kóng, Chiàⁿ-sı̄, chhiáⁿ jı̍p-lâi chē. Tùi án-ni chiū chhiáⁿ i khı̀ lâng-kheh-thiaⁿ, iā kap in só jı̍p-khı̀ lāi-bı̄n hia, kā i kóng ū lâng-kheh beh lâi chhoē-chē. Lı̂m Tiúⁿ-ló chiū chhut-lâi, tāi-ke ip-lé, chiū hun pin-chú chē-lo̍h. Iā Hūi-bí chiū chhòng tê lâi, chhiáⁿ tê liáu chiū kap in hiaⁿ-só tāi-ke jı̍p-khı̀ tı̄ thiaⁿ-ê pı̂n-āu, bı̄n ǹg hoe-hn̂g lâi chē. In-ūi ài chai chit-ê chheⁿ-hūn lâng-kheh sı̄ beh lâi kóng sím-mı̍h. Lı̂m Tiúⁿ-ló chiū mn̄g lâng-kheh ê toā-miâ, kap kùi-hú, lâng-kheh chiū ı̀n kóng in sı̄ tiàm Lâm-kiaⁿ, miâ Ek-sam, sèⁿ Tân, chêng bat kap lēng-lông Chheng-hûn tâng-o̍h. Lı̂m Tiúⁿ-ló thiaⁿ chı̍t-kú kóng bat kap Chheng-hûn tâng-o̍h, chiū chin hoaⁿ-hí, khí-lâi hoē sit-lé.
Kóng goân-lâi tō-sı̄ hó-pêng-iú, lóng m̄-chai, chin sit-poê. Nn̄g-lâng chiū koh kóng-khí chı̍t-tiûⁿ kheh-khı̀ ê oē, che bián kóng siuⁿ-chē. Iā Lı̂m Tiúⁿ-ló chiū mn̄g kóng, iā kùi-kheh lí lâi ê pún-ı̀ sı̄ sím-mı̍h? Ek-sam khui-chhùi kóng, Ah! chit-pang lâi sı̄ beh kā lí kóng-khí lēng-lông Chheng-hûn ê siau-sit, oē-boé ná sè-siaⁿ, koh kau-se; só͘-í Lı̂m tiúⁿ-ló thiaⁿ-liáu sim chiū giâu-gı̂, chheⁿ-chin mn̄g i kóng, Tàu-tí Chheng-hûn cháiⁿ-iūⁿ lí kiám chai? Chai, i kap goá chò-tı̄n khı̀ chò tūi-siong. Lı̂m Tiúⁿ-ló liâm-piⁿ koh kóng, Hò͘, iáu taⁿ lín tò-lâi, iā i án-choáⁿ? Tı̄ pı̂n-āu ê Soat-moê, Hūi-bí thiaⁿ in lāu-pē ê oē hiah chheⁿ-chin, chiū cháu chhut-lâi kheh-thiaⁿ khiā-teh khoàⁿ. Hit-sı̂ Ek-sam tùi tē-á lāi the̍h chı̍t-ê kim-a̍p-á chhut-lâi, kóng, Ah! Chit-ê chiū-sı̄ Chheng-hûn ê thâu-mn̂g, i í-keng sí lah! Ah! Lı̂m tiúⁿ-ló thiaⁿ chı̍t-ê hûn-put-hū-thé, pàng-siaⁿ toā-khàu. Hūi-bí tùi A-pa lám teh, Soat-moê bı̄n phak-tı̄ piah-nih tı̍t-tı̍t háu, chı̍t lāi-bı̄n khàu-tit chin pi-ai, Lı̂m Tiúⁿ-ló-niû chhut-lâi khoàⁿ tāi-ke teh háu, mn̄g khoàⁿ sı̄ cháiⁿ-iūⁿ?
Hūi-bí ná khàu ná kóng, Án-niâ ó! goán a-ko ah kóng sí-khı̀ ah leh! âⁿ-âⁿ! A-ko-ó! Lı̂m tiúⁿ-ló-niû thiaⁿ chı̍t-ē chū án-ni lek-lo̍h-khı̀. Ek-sam khoàⁿ hit-ê chêng-hêng iā lâu ba̍k-sái tông-chêng, Lı̂m tiúⁿ-ló khoàⁿ tiúⁿ-ló-niû hun lo̍h-khı̀, chiū bô khoà-háu, kín siat-hoat lâi kiù. Ek-sam kín cháu-tùi āu-bı̄n, chhiūⁿ chı̍t-poa̍h léng-chúi lâi kā i kiù, bô loā-kú chiū kiù oa̍h. Jı̍t í-keng àm, hit-mê lâu Ek-sam tı̄ hia keh-mê, Soat-moê iā tò-khı̀ kā lāu-pē kóng, iā chiong phoe hō͘ lāu-pē khoàⁿ. Kóng i beh chhut-hoat tı̄ Lâm-kiaⁿ siá ê phoe, chin pháiⁿ tiāu-thâu. Chhin-chhiūⁿ khah chhám chai i ē-sí. Hit-mê Bo̍k-su, Bo̍k-su-niû lóng chhoā-lâi, tāi-ke chin iu-būn lâi thiaⁿ Ek-sam kóng-khí Chheng-hûn sí ê chêng-hêng.
Ek-sam chiū chiong thâu-boé chêng-thâu it-lí kóng hō͘ in thiaⁿ. Tāi-ke thiaⁿ-liáu mà-mà-khàu. Lı̂m Tiúⁿ-ló-niû m̄-goān kúi-nā pái hiám koh sit-khı̀. Ah! Bo̍k-su hit-sı̂ ba̍k-sái kâm-leh, ko͘-put-chiong iā tio̍h khó͘-khǹg tāi-ke, ēng chē-chē oē bián-lē chhin-ke, chheⁿ-ḿ, kiò in m̄-thang koè-thâu iu-būn; in-ūi bān-sū lóng-sı̄ chhut-tı̄ Siōng-tè ê chí-ı̀. Ah! kàu-chia chóng-sı̄ kiàn-sú put-ho̍k-seng.....Taⁿ chia àn-hā.
Kóng Soat-moê ê iu-būn hui-siông, tò-khı̀ kúi-nā jı̍t bô chia̍h. Chóng-sı̄ āu-lâi chiū siū khó͘-khǹg, ná kú ná léng, pún chiū lı̍p-chı̀ siūⁿ beh chū án-ni m̄-kè; chóng-sı̄ siū pē-bó ê bián-lē chiū koh kè. Hiān-sı̂ i ê tiōng-hu teh kà Lâm-kiaⁿ chhı̄-lı̍p ê Tiong-ha̍k-hāu. Só͘-í Soat-moê ê sū, taⁿ tùi chia khí bián koh kóng.
Kóng Lı̂m Tiúⁿ-ló in 2 lāu kap Hūi-bí ê hoân-ló, sı̍t-chāi m̄-nā chı̍t-iūⁿ; in-ūi 2 lāu taⁿ koh ū-hoè, chı̄n-ǹg chiū-sı̄ chit-ê hāu-seⁿ, bô-phah-sǹg kin-á-jı̍t ē lâi tú-tio̍h chit-hō ge̍k-kéng, chin-chiàⁿ sı̄ bû-siōng ê chhám-kéng, chiân-kong chı̄n-khı̀. Tāi-chı̀ kóng liáu-āu, Ek-sam chiū beh tò-khı̀; chóng-sı̄ Tiúⁿ-ló-niû, tı̍t-tı̍t kā i lâu, kóng i ê bı̄n-khoán hóng-hut kap i ê hāu-seⁿ chin siâng-bı̄n, koh sı̄ i lâi pò chit-ê siau-sit, iā sı̄ hāu-seⁿ ê hó-pêng-iú. Só͘-í khoàⁿ i chı̍t-bı̄n, ná khoàⁿ kiáⁿ chı̍t-iūⁿ: só͘-í kā i lâu tı̄-hia chiâⁿ lé-pài.
