Sı̍p-jı̄-kè ê kı̀-hō 02

Ùi Wiki Tô·-su-kóan
 4 Chho͘-Loân 
 Lâu tı̄-hia chin hó khoán-thāi, sı̍t-chāi oán-jiân chhin-chhiūⁿ ka-tı̄ ê kiáⁿ, che-sı̄ it-poaⁿ ê cha-bó͘-lâng khoán, Ek-sam tiàm liáu iā-sı̄ ū chu-bı̄. In-ūi ū Hūi-bí thang kóng-oē. 2 lâng iá-sı̄ chhin-chhiūⁿ hiaⁿ-moē. Lāu-pē iā bô kı̀m-in, só͘-í nn̄g-lâng chin chhin-bı̍t, choā-chhut-chhoā-jı̍p, khı̀ soaⁿ-nih kiâⁿ-kiâⁿ bán pek-ha̍p-hoe; á-sı̄ khı̀ khe-á tiò-hı̂, chin chhin-bı̍t saⁿ-thiàⁿ, oh-tit hêng-iông. Hūi-bí kin-nı̂ 19, Ek-sam 26 hoè, iáu-boē chhoā. Ek-sam kap Hūi-bí ê saⁿ-thiàⁿ, kiám-chhái khí-thâu sı̄ bô-ı̀, āu-lâi soah pı̀ⁿ iú-ı̀ iā bô-tek-khak. Chóng-sı̄ Hūi-bí ê sim sı̄ chin chheng-pe̍h; i ê ı̀-sù sı̄ chhin- chhiūⁿ hiaⁿ-ko, iā chin ài lâu i tiàm-leh ài kap i kóng-oē, in-ūi sı̄ chhin-chhiūⁿ A-ko koh-oa̍h. Só͘-í kap i chin chhin-bı̍t, kóng-oē lâi siū an-ùi; ū-sı̂ khı̀ po͘-á, iā tāi-ke khan-chhiú lâi chò-hoé kiâⁿ. Kàu chiâⁿ lé-pài, tāi-ke chin-chiàⁿ iā khah siū an-ùi. Ek-sam chiū kap in saⁿ-sı̂ tò-khı̀, tāi-ke lâu ba̍k-sái, sàng i kàu mn̂g-goā. Te̍k-pia̍t Hūi-bí sàng i kàu toā-mn̂g-kháu, saⁿ-sı̂ put-chí ū chhin-chhiūⁿ m̄-kam pun-khui ê khoán-sit. 
 Ek-sam tò-khı̀ iā liâm-piⁿ siá-phoe lâi kā Lı̂m Tiúⁿ-ló seh-siā in ê hó khoán-thāi, iā siá chı̍t-tiuⁿ phoe lâi hō͘ Hūi-bí, i ê phoe chin kán; chóng-sı̄ ı̀-sù chin chhim. Siá kóng: 
 Thang-thiàⁿ ê Hūi-bí sàng! Lı̄-khui liáu-āu, sim put-chí siàu-liām, iân-lō͘ teh kiâⁿ tò--lâi, sim hóng-hut chhin-chhiūⁿ iû-goân kap lí khan-chhiú khı̀ po͘-á bán pek-ha̍p-hoe ê khoán-sit, ba̍k-chiu nā kheh-oá chiū khoàⁿ lí oán-jiân tı̄ goá ê bı̄n-chêng. Á! Lí teh chhiò ê bı̄n éng kı̀ tı̄ goá ê sim. Goá goān chı̍t-sı̀-lâng tiāⁿ ē khoàⁿ lí ê bı̄n teh chhiò tı̄ goá ê bı̄n-chêng. Khı̀ lí hia siū lí hó khoán-thāi chin to-siā. Taⁿ kán-tan kúi-kù, bāng lín siū an-ùi, iā bāng lín ê saⁿ-thiàⁿ ē kàu tı̄ éng-oán. 
 A.D. 1921, 7.8 
Tân Ek-sam kiok-kiong. Lı̂m Hūi-bí sàng siū. Hūi-bí chih-tio̍h chı̍t-tiuⁿ phoe, tha̍k-liáu sim chin hoaⁿ-hí, kám-kek Ek-sam ê thiàⁿ; chóng-sı̄ m̄-chai phoe-lāi ê ı̀-sù. Sı̍t-chāi ū hâm-khǹg bû-kiông-chı̄n ê thiàⁿ. Chia chhiáⁿ àn-hā. Kóng Ek-sam tò-khı̀ tùi 3,4 goe̍h jı̍t chêng ê koè-sı̍t chin kan-khó͘ chiū m̄-káⁿ koh chò tūi-siong ê seng-lí. Tùi án-ni chiū khı̀ hōng-chit tı̄ Lâm-kiaⁿ ê Bí-kok bó͘ chúi-iû kong-si, tı̄-hia chò goā-kau-oân; in-ūi i put-chí ū kháu-châi, gâu kó͘-bú lâng-kheh, goe̍h-hōng iā chia̍h chin koân, chı̍t-nı̂ oá 2000 ê hōng-kip. Tùi án-ni chiū siông-siông chhut-goā, ū-sı̂ khı̀ Kńg-tang, Ē-mn̂g, Siōng-hái, Pak-kiaⁿ, Hok-chiu kok lāi chhut-miâ ê po͘-thâu bô m̄-kàu. Put-chí oa̍h-tāng, hō͘ Kong-si put-chí tiōng-iōng, put-chí ē hō͘ lâng kau-tāi-tit. Goân-in, i sı̄ chin tiong-hō͘ ê lâng. Ke-lāi ē-tit-koè, lāu-pē chá-sí, lāu-bó chiú-koáⁿ, sı̄ jia̍t-sim ê chia̍h-chhài-ko͘, put-chí hiân. Só͘-í giâm-giâm chek-tok, lâi khan chit-ê kiáⁿ. Tùi Tāi-ha̍k chut-gia̍p āu, chò cháu-chûn seng-lí, iā chám-jiân ū thàn; só͘-í châi-sán 1,2 bān gı̂n. Chheng-liân-lâng ē liâm-piⁿ hoat hiah ê chı̂ⁿ, thang-kóng chám-jiân pún-sū; chóng-sı̄ chit-ê ka-têng ū chı̍t-hāng ê phoà-phah; chiū-sı̄ lāu-bú tı̄ Ek-sam sè-hàn ê sı̂ ū io chı̍t-ê cha-bó͘ gin-ná, sèⁿ Lí miâ Siù-chhun, ı̀-sù beh hō͘ i chiâⁿ Ek-sam, seⁿ-chò khiok bē-bái. Iā lāu-bú chin thiàⁿ i, iā ū hō͘ i khı̀ tha̍k ko-lú, chū-sè chiū siū hó ê kàu-io̍k. Só͘-í siā-hoē ê kau-chè, hū-jı̂n ê hoat chin chai-iáⁿ, sè-sū put-chí thang-kng ê khoán-sit. Thang-kóng bô kiàn-siàu chò siâⁿ-chhı̄-lâng chı̍t-ê. Kin-nı̂ kiám Ek-sam 1 hoè, sı̄ 25.Chū kúi-nā nı̂ chêng, lāu-bú chiū siat-hoat beh kā in chò-toā-lâng; chóng-sı̄ khó-sioh Ek-sam m̄, m̄-chai cháiⁿ-iūⁿ Siù-chhun bô Ek-sam ê iân; chóng-sı̄ lāu-bú ê sim chin tı̀-ı̀. Só͘-í chit-chân sū tiāⁿ khê--leh, Láu-bú kà Siù-chhun chē-chē hong-hoat, ǹg-bāng chò hō͘ Ek-sam hoaⁿ-hí; chóng-sı̄ Ek-sam khoàⁿ i só͘-chò soah ná chheh, i ē khı̀ goā-kok chò cháu-chúi seng-lí, chı̍t-hāng iā-sı̄ i chı̍t-lâng ê tōng-ki; in-ūi i m̄-ài tiàm lāi-bı̄n. Chia chhiáⁿ koh àn-hā. Kóng ū chı̍t-jı̍t, Ek-sam koh chhut-tiuⁿ, chit-pang chin tú-hó, sı̄ tú beh khı̀ Sū-liông-chng, lâi sin-siat chı̍t-ê chhut-tiuⁿ-só͘, iā phài i khı̀ hia siat-hoat hiah-ê sū-bū, chiū tiàm hia oá chiâⁿ goe̍h jı̍t. I khı̀ thiap Lim Tiúⁿ-ló in chia̍h. Khı̀ bô loā-kú Tiúⁿ-ló phoà-pēⁿ, sı̄ tio̍h hı̀-iām chin siong-tiōng. Lı̂m Tiúⁿ-ló-niû iū lāu lah, Hūi-bí iū cha-bó͘-gín-ná lâng; só͘-í bān-sū lóng pài-thok Ek-sam siat-hoat. Ek-sam iā chin hoaⁿ-hí, chin chı̄n-la̍t, àm-sı̂ iā siông-siông kap in lûn-kò͘, bô koh-iūⁿ sı̄ ke-lāi ê lâng. Tùi án-ni ná chhin-bı̍t. Koè chiâⁿ lé-pài āu Lı̂m Tiúⁿ-ló-niû lāu-lâng khah bē-kham-tit, lóng pàng hō͘ Ek-sam kap Hūi-bí in khı̀ kò͘. Tı̄ hit tiong-kan 2 lâng ê thiàⁿ-chêng ná ke-thiⁿ. Kàu 2 lé-pài goā, Tiúⁿ-ló ê pēⁿ chiū lóng hó, tùi án-ni 2-lāu iā kám Ek-sam ê in bô chı̄n. 5 Sı̍p-Jı̄-Kè Koh bô loā-kú Ek-sam chúi-iû kong-si ê sū pān chheng-chhó chiū beh tò-khı̀. Beh tò-khı̀ ê chı̍t-jı̍t chêng, Ek-sam kap Hūi-bí khı̀ soaⁿ-nih beh koh chhoē pek-ha̍p-hoe. Tı̄ lō͘-tiong Ek-sam khan Hūi-bí ê chhiú kā i chim kóng, Hūi-bí sàng ah! Goá chin thiàⁿ lí! Bı̄n hut-jiân ka-tı̄ chin sio-hōng, soà m̄-káⁿ koh kóng-khí. Hūi-bí chai Ek-sam sı̄ beh koh kóng ê khoán, chiū kā i kóng, Ek-sam hiaⁿ goá chai lí chin thiàⁿ goá, iā lí sı̄ beh kóng sím-mı̍h, chhiáⁿ lí koh kóng. Kàu hia tú tı̄ toā chhiū-kha ū chı̍t-tè chio̍h. Ek-sam chiū khan Hūi-bí, tāi-ke chē-tı̄ hit-tè chio̍h. Ek-sam chiū kóng, Ah! Chin sit-lé, sím-mı̍h tāi-chı̀ sit-lé? Lí lâi, goá chin hoaⁿ-hí, gâu thiàⁿ goán, kap goá tàu-kò͘ ka-hū, hō͘ lí chin ló͘-la̍t, thài thang kóng sit-lé. M̄-sı̄ hit-ê sū lah; sı̄ goá beh kā lí kóng chı̍t-kù oē, khah bô lé-sò͘, m̄-chai lí beh thiaⁿ á-m̄? Chhiáⁿ lí kóng, goá hoaⁿ-hí thiaⁿ. M̄-kú, goá kiaⁿ lí siū-khı̀. Hit-sı̂ Hūi-bí khoàⁿ Ek-sam ê bı̄n sı̄ chhin-chhiūⁿ sim-lāi chin khoà-lū ê khoán; chóng-sı̄ m̄-chai i beh kóng sím-mı̍h, chiū bı̄n ǹg Ek-sam kóng, chhiáⁿ lí an-sim, bô-lūn lí kóng sím-mı̍h, goá lóng m̄ siū-khı̀, chhiáⁿ lí kóng. Hit-tia̍p Ek-sam ê sim chin hoaⁿ-hí, chiū khan Hūi-bí ê chhiú kóng, Só͘ thiàⁿ--ê! Goá kin-á-jı̍t chin-chiàⁿ thiàⁿ lí, sı̄ lí só͘-chai, goá ê sim chin-chiàⁿ chiù-choā beh thiàⁿ lí kàu éng-oán. Ek-sam hiaⁿ chin-chiàⁿ hō͘ lí tō-siā; m̄-kú goá sı̄ chin m̄-chiâⁿ-mı̍h, sı̄ chı̍t-ê chin sió-khoá ê soaⁿ-lāi-lâng, thài-thó ē kham-tit siù lí ê thiàⁿ hiah-toā ah! Hûi-bí-sàng ah! Chhiáⁿ lí m̄-thang the-sı̂. Put-ti-put-kak, tùi ba̍k-chiu tih chhut thiàⁿ ê ba̍k-sái tı̄ Hūi-bí ê chhiú, Hūi-bí iā chin tông-chêng i ê ı̀-sù. Chiū sè-sè siaⁿ kā Ek-sam kóng, Ek-sam-hiaⁿ lūn chit-chân tāi-chı̀, goá bē-hiáu chhâi-koat, chhiáⁿ lí tùi goán lāu-pē kóng, goán tia nā hó, goá ta̍k-hāng to hó. Teh kóng ê sı̂ ēng chhiú-chéng-thâu-á oē tı̄ thô͘-kha ê thô͘-soa, oē chı̍t-jı̄ sı̍p-jı̄. Hit-sı̂ Ek-sam sim chin hoaⁿ-hí, chai Hūi-bí chē-chió kap i tông-chêng, iā chai tùi Hūi-bí kóng bē 10 hun tio̍h tùi sı̄-toā lâng Lı̂m tiúⁿ-ló lâi kóng, iā khoàⁿ i oē sı̍p-jı̄ tı̄ thô͘-kha. Hit-sı̂ Ek-sam ê ı̀-sù sı̄ kóng, Húi-bí ún-tàng sı̄ chin hoaⁿ-hí, iā beh ín goá, kóng, sı̄ hiaⁿ ê hó pêng-iú, só͘-í hoaⁿ-hí; chóng-sı̄ m̄-káⁿ bêng-kóng, chiah ēng chhiú oē hit-ê kı̀-hō tı̄ thô͘-nih. Sı̍t-chāi Hūi-bí m̄-sı̄ hit-ê ı̀-sù. I ê ı̀-sù sı̄ beh kóng Ek-sam m̄-sı̄ Ki-tok-tô͘, iā pún-sin sı̄ Ki-tok-tô͘, án-ni chit-ê tāi-chı̀ bē-ēng-tit; chóng-sı̄ Ek-sam m̄-bat hit-ê ı̀-sù. Kan-ta sim-tiong àm-àm teh hoaⁿ-hí Hūi-bí ê tông-chêng. Bán-hoe liáu-āu chiū tò-khı̀. Hit-àm chia̍h-pá Ek-sam chiū hó-táⁿ tùi Lı̂m Tiúⁿ-ló lâi kóng-khí chit-chân sū. Lı̂m tiúⁿ-ló thiaⁿ-liáu khiok chı̍t-sim iā-sı̄ hoaⁿ-hí; chóng-sı̄ chı̍t-sim khoà-lū; in-ūi m̄-sı̄ sı̀n-Chú ê lâng. Lāu-lâng tı̍t-tı̍t chiū ı̀n i kóng, Chin sit-lé, sim khiok sı̄ chin hoaⁿ-hí; m̄-kú ū 2 hāng-sū: Cha-bó-kiáⁿ sı̄ bô keng-giām soaⁿ-kha ê chhân-chng-lâng, beh thái ē-hiáu liāu-lí lí ê ka-sū; in-ūi lí sı̄ siâⁿ-chhı̄-lâng. Koh lín sı̄ siong-tong ū tē-ūi ê lâng; só͘-í kiaⁿ-liáu bô-ha̍p. (Ek-sam in khiok ū iáⁿ, in lāu-pē chêng bat chò-koaⁿ, hiān-sı̂ i ê bó-kū sı̄ chò bú-koaⁿ chin ū sè-le̍k, só͘-í tiúⁿ-ló chin khiam-pi lâi sı̂.) Koh chı̍t-hāng, kiaⁿ-liáu siáu-lú, nā khı̀ bē-tit kap lín gia̍h-hiuⁿ. Ek-sam thiaⁿ-liáu chin kan-khó͘, chai Lı̂m tiúⁿ-ló sı̄ jia̍t-sim ê Ki-tok-tô͘; só͘-í beh tap-èng cha-bó͘-kiáⁿ kè bı̄-sı̀n-chiá, ún-tàng chin oh. Koh nā hō͘ i chai, chhù-nih lāu-bú ū ūi-tio̍h i io chı̍t-ê sim-pū-á, chiū ún-tàng ná bô-bāng. Só͘-í sim chin hoân-ló. Tùi án-ni, m̄-káⁿ koh kóng-khí. Sim chin ut-chut, keh-jı̍t chiū saⁿ-sı̂ tò-khı̀. Tò-khı̀ soah sim put-sı̂ khoà-lū chit-chân sū. Pn̄g ná bē-chia̍h. Àm-sı̂ siông-siông chin àm-khùn, lâng ná sán. Lāu-bó mn̄g i, i lóng m̄-kóng. Kàu ū chı̍t-jı̍t chiū khı̀ in bó-kū hia, in bó-kū mn̄g i. In bó-kū pêng-sı̂ kap i ū-oē-kóng; só͘-í chiū chiong chı̄n-chêng kóng hō͘ i thiaⁿ, in bó-kū thiaⁿ-liáu chin tông-chêng, chiū iok-sok i lēng-kang ū-êng beh kap i khı̀ khoàⁿ chı̍t-choā, khoàⁿ kó-jiân ū loā hó. Chia chhiáⁿ àn-hā. Kóng Lı̂m Tiúⁿ-ló lāu-lâng lah, koh í-keng kı̄n 12 goe̍h, thiⁿ-khı̀ ná koâⁿ soah koh khı̀ hō͘ léng-tio̍h chia̍h-io̍h bô tú-hó, soah koh khí hı̀-iām, kiam hek-súi-jia̍t, pēⁿ chiâⁿ lé-pài kú chiū koè-sin khı̀. Ah! chin khó-lı̂n, chı̍t-ke soah chhun Tiúⁿ-ló-niû, cha-bó͘-kiáⁿ Hūi-bí. Tng tı̄-beh sí ê sı̂, Tiúⁿ-ló, Tiúⁿ-ló-niû lâi kap Hūi-bí chē-tı̄ i ê chhn̂g-chêng. Tiúⁿ-ló khan Hūi-bí ê chhiú kóng, Kiáⁿ-ah! Lí kap lín niâ tio̍h jia̍t-sim khı̂ⁿ-tiâu tı̄ Chú, chı̍t-sı̀-lâng bô pàng-sak. Iā chiong lán-ê châi-sán lâi tō͘ 2 lâng, khó-í m̄-bián hoân-ló. Lâng chin bô-la̍t thêng chin-kú bô koh kóng-oē, Tiúⁿ-ló-niû kap Hūi-bí lóng kūi-lo̍h tı̄ chhn̂g-chêng kı̂-tó, háu-kàu chhngh-chhngh-kiò. Thêng bô kú, Tiúⁿ-ló chiū koh tùi Tiúⁿ-ló-niû kóng, Hiân-chhe, kin-á-jı̍t goá í-keng beh hō͘ Chú chín-tiàu, lín m̄-thang koè-thâu khoà-lū, bān-sū chhut tùi Chú; chóng-sı̄ goá iàu-kín koh kóng chı̍t-kù: chiū-sı̄ taⁿ chí-ū chit-ê cha-bó͘-kiáⁿ, lí gâu siat-hoat. Lūn chhin-chiâⁿ tek-khak m̄-thang phit-phoè hō͘ bô sı̀n Chú ê lâng, Tiúⁿ-ló-niû khui-siaⁿ tio̍h kóng, Ah! Hu-ah! Lí m̄-bián khoà-lū, goá tek-khak bô chò chit-hō bóng-tóng ê sū, lí put-su koà-ı̀. Hūi-bí iā háu kóng, Án-tia-ah, lí m̄-thang hoân-ló, goá tek-khak kàu sí bô li-khūi Chú. Kóng liáu, Tiuⁿ-ló ê nâ-âu-kháu ū-siaⁿ, ki-lı̄-kû-luh, hut-jiân khùi-tn̄g. Tùi án-ni 2 bó-kiaⁿ háu-tit chhám boē-tit kóng kàu chı̄n. Keh thiⁿ-kng liâm-piⁿ pò Ông bo̍k-su, tai-ke lâi sàng-chòng. 6 Thau-khoàⁿ Sin-niû Sàng-chòng bêng-pe̍k, tāi-ke chiū sı̀-soàⁿ. Chia chhiáⁿ àn-hā. Kóng Ek-sam kap in bó-kū keh poàⁿ-goe̍h-jı̍t khah ke chiū 2 lâng lóng khiâ-bé lâi beh saⁿ-chhoē, kàu-ūi khoàⁿ lāi-bı̄n táⁿ-pān ku-song ê khoán-sit, in tio̍h-chı̍t-kiaⁿ. In-ūi Ek-sam chiah tò-khı̀ oá 1 goe̍h liân jı̍t, án-choáⁿ hut-jiân piàn án-ni. Ek-sam chiū mn̄g Tiúⁿ-ló-niû. Tiúⁿ-ló-niû it-it lóng kóng hō͘ i thiaⁿ. Ek-sam chin iu-būn; chóng-sı̄ Tiúⁿ-ló-niû ı̍t-sim chin giâu-gı̂ kóng, kin-á-jı̍t thái-ū chı̍t-ê bú-koaⁿ toè Ek-sam lâi. Chiū mn̄g Ek-sam khoàⁿ chit-ūi sı̄ chi-chūi? Ek-sam chiū kā i kóng, Chit-ūi sı̄ goán bó-kū, sèⁿ Tiuⁿ miâ Thiam-tek. Hiān-sı̂ sı̄ Lâm-kiaⁿ te-2 Lio̍k-kun Liân-tūi ê Su-lēng-koaⁿ. Thiaⁿ-liáu Tiúⁿ-ló-niû kap Hūi-bí chiū liâm-piⁿ khí-ūi ap-lé. Soà hoē sit-chiap ê choē. Jiân-āu chiū kóng chı̍t-tiûⁿ kheh-khı̀ ê oē. Che bián kóng siūⁿ siông-sè. Chóng-kóng Ek-sam ê bó-kū khoàⁿ Hūi-bí chı̍t-bı̄n, kám-kak chin ha̍p-ı̀, chàn-sêng i chhoā; chóng-sı̄ chit-tia̍p sı̄ ku-song, koh sı̄ ū thiaⁿ tō-lí kap bô thiaⁿ tō-lí ê koan-hē. Só͘-í chai beh kóng chit-chân sū, sı̄ bô hiah-khoài: só͘-í khoàⁿ-khoàⁿ leh, sı̀-koè hoe-hn̂g kiâⁿ-kiâⁿ leh, sim-tiong àm-àm teh chheng-chàn Siù-châi ê chhù ê phok-sò͘ iu-ngá put-chí ū thiàⁿ hô-pêng ê khoán-sit, só͘-í sim put-chí o-ló tō-lí ê hó, m̄-kú tong-sı̂ ê Koaⁿ-kài khah bô lâng thiaⁿ tō-lí. Só͘-í m̄-ài hián-jiân o-ló. Khoàⁿ-liáu chiū saⁿ-sı̂ tò-khı̀. Tiúⁿ-ló-niû in iā put-kái kı̂-ı̀; in-ūi lia̍h-chún in sı̄ lâi kiâⁿ-iû, iā thiaⁿ-lâng kóng Tiúⁿ-ló sí beh lâi bāi-song só͘-í bô-gı̄. Chia àn-hā. Kóng Ek-sam kap bó-kū kàu lō͘-nih, Ek-sam chiū mn̄g bó-kū khoàⁿ-liáu cháiⁿ-iūⁿ? Bó-kū kóng, Ū chin hó; m̄-kú ū 2-hāng ê oh; chı̍t-hāng sı̄ in sı̀n Ki-tok-kàu; koh chı̍t-hāng lín lāu-bó í-keng ū thè lí io chı̍t-ê. Ek-sam thiaⁿ-liáu sim toā kan-khó͘, soà hàu chhut-lâi. Kiò in bó-kū tek-khak tio̍h thè i siat-hoat, bô i beh khı̀ chò lōng-chú liû-bı̂n, m̄-tiàm ke-lāi. Bó-kū thiaⁿ-liáu sim chin kan-khó͘, chiū kóng hó, goá siūⁿ chı̍t-hoat, lí m̄-bián khoà-ı̀, goá tek-khak thè lí chiu-soân kàu hó-sè. Ek-sam bı̄n chiū chhiò, ba̍k-sái iáu khoà tı̄ ba̍k-kı̂ⁿ, iā chhùi teh ı̀n bó-kū siūⁿ-liáu iā chin tông-chêng i ê sim-ı̀. Ek-sam iā àm-àm teh siūⁿ, ài chhiò Chheng-liân ê loân-ài-jia̍t. Kín mn̄g Bó-kū khoàⁿ ū sim-mı̍h-hoat. Bó-kū chiū kā i kóng, Goá seng lâi khı̀ khǹg lín lāu-bú, hō͘ lí chhoā; iā Siù-chhun ài kā i kè; iā nā khó͘-khǹg m̄-thiaⁿ, goá chiah jû-chhú-jû-chhú lâi siat-hoat. Ek-sam kóng, M̄-kú in hit-pêng goá kàu chit-tia̍p chiah siūⁿ-tio̍h: ū chı̍t-jı̍t Hūi-bí kap goá khı̀ soaⁿ-nih bán pek-ha̍p-hoe, goá iû-goân teh kā i kóng chit-chân sū, iā ı̀n goá. Ìn lí cháiⁿ-iūⁿ i ū hoaⁿ-hí bô? I ı̀n goá kóng sı̄ in lāu-pē ê chú-ı̀. Che-sı̄ chū-jiân, cha-bó͘ gín-ná-lâng ı̀n lí án-ni sı̄ èng-kai; iáu ū pa̍t-kù bô? Bô leh; khiok i iā kóng i chin thiàⁿ goá; m̄-kú teh kóng ê sı̂ chhiú oē tı̄ thô͘-nih, oē chı̍t-jı̄ Sı̍p-jı̄, kàu chit-tia̍p goá siūⁿ-tio̍h i ê ı̀-sù, koat-toàn sı̄ teh ám-chí i sı̄ Ki-tok-tô͘: só͘-í chit-chân sū oh-sêng. In bó-kū kā i kóng gōng-sun leh, chit-chân sió-sū, lí bián khoà-ı̀. Tı̄ chit saⁿ-jı̍t lāi, goá tek-khak hō͘ chit-chân sū chheng-chhó. Ek-sam thiaⁿ chı̍t-ē, sim khui liáu-liáu, chiū kín mn̄g khoàⁿ, A-kū lí ū sím-mı̍h hó hong-hoat? In kū kā i kóng, Chit-tia̍p bān-chiah koh kóng-chhut; put-kò keh saⁿ-jı̍t āu, tú-sı̄ 10 goe̍h chhe 5 jı̍t, hit chá-khı̀ chò lí tı̄ chhù-nih tán, goá chū-jiân siat-hoat hó-sè, lâi kau lí ê chhiú; chóng-sı̄ lí tio̍h chiong lāi-bı̄n ê chhiàⁿ kang-ê hō͘ goá. Chek-sı̂ ín--i. Bô loā-kú chiū kàu-chhù, hit-àm hō͘ in bó-kū chhiàⁿ, khùn lóng bē-thiⁿ-kng, áu chéng-thâu-á teh sǹg 10 goe̍h chhe 3, 4, 5, àm-sı̂ hām-bı̂n iā bāng-kı̀ⁿ teh kap Hūi-bí kóng-oē. Ū-sı̂ hām-bı̂n chhiò-kàu ha̍h-ha̍h-kiò. Thiⁿ-kng chiū tò-khı̀, kā in lāu-bú kóng chia-ê sū. In lāu-bú chai sı̄ sió-tı̄ thè i siat-hoat-ê iā m̄-káⁿ ke̍h; chóng-sı̄ sim bô sím-mı̍h hoaⁿ-hí. Siù-chhun chin m̄-goān; chóng-sı̄ bô hoat-tō͘. Chiū tı̄ hit-jı̍t pàng-thiap, chhiáⁿ tô͘-chí lâi pān-toh. Pı̄-pān chin hó-sè, iok chhe 5 hit chá-khı̀ chiū ē kàu-ūi, iā hit ē-po͘ chiah beh chhiáⁿ lâng-kheh. Lāi-bı̄n piàⁿ-sàu chin chheng-khı̀, tiám-teng kat-chhái, mn̂g-liân âng phà-phà. Chhin-chiâⁿ lâng-kheh lóng-chóng í-keng lâi lah, chiok-tiān kui tha̍h. Ek-sam iā thı̀-thâu oāⁿ-saⁿ chhēng lé-ho̍k chhiò-gı̄-gı̄ teh tán sin-niû. Chia chhiáⁿ àn-hā. Kóng Hūi-bí in hit-pêng lóng bô chit-hō ı̀-sù, Lāu-pē sí bô kúi-jı̍t, sim chin iu-būn, nā beh chia̍h-pn̄g tio̍h háu. Ah! Ū-iáⁿ chhám. A-hiaⁿ sí, A-tia sí, chí-ū chhun A-niâ kap i. Háu-kàu ba̍k-chiu ham-ham, bô sím-mı̍h thang siū an-ùi; put-kò chá-àm kap lāu-bó tha̍k Sèng-keng kı̂-tó lâi saⁿ-bián-lē, kai-chài ke-lāi ū chı̍t-ê chı̄n-tiong ê tn̂g-kang, chit-ê chú sè bô pē-bó, hō͘ Lı̂m Tiúⁿ-ló khioh-lâi chhı̄ ê, kin-nı̂ jı̄-gō͘, la̍k-hoè, hui-siông ióng, sí-gō͘-pah-kun ê la̍t. Chit-ê kiò-chò Siú-jı̂n, ta̍k-jı̍t teh siu chhân-cho͘ siat-hoat ke-lâi ê sū, iā-sı̄ chin jia̍t-sim gâu an-úi thâu-ke-niû kap sió-chiá.