13 Siōng-Hái Ê Ū-Sím
Keh-jı̍t 8 tiám, chiū tı̄ Siōng-hái ê tē-hng hoat-ı̄ⁿ khui-têng kong-phoàⁿ. Hit-sı̂ mn̄g hoān-choē-jı̂n kúi-kù, chiū kiò Hok-choàn chhut-lâi chò chèng-jı̂n, liâm-piⁿ bû-kı̂-tô͘-hêng soan-kò. Tú beh pı̀-têng ê sı̂, ū chı̍t-ê lâng hut-jiân khiā khí-lâi kiò chèng-lâng bān-chiah soàⁿ. Kiám-chhat-koaⁿ tú beh kiò chiáng sím-phoàⁿ-tiúⁿ ê lâng hoah i tiām-tiām, chı̍t-ê khoàⁿ, to-sı̄ choân-kok tı̄-bêng ê te̍k-bū thàm-cheng Chhoà Thian-phêng sin-seⁿ, chiū tāi-ke koh chē lo̍h-lâi thiaⁿ i kóng. Hit-sı̂ Tân Hok-choân ê bı̄n chı̍t-chūn-chheⁿ, chı̍t-chūn-âng, lóng gōng-khı̀. Te̍k-bū thàm-cheng chiū kóng, Lia̍t-ūi kin-á-jı̍t chit-ê chèng-jı̂n, goân-lâi m̄-sı̄ hō-chò Tân Hok-choân, sı̄ Tân Ek-sam, tāi-ke thiaⁿ chı̍t-ē toā-kiaⁿ; in-ūi Tân Ek-sam Lian-hoe-tı̂ ê sū-kiāⁿ, chiah-kú tiāⁿ-tı̄ sin-bûn-choá khoàⁿ-kı̀ⁿ, só͘-í miâ chin thàu, (choē teh lâng) thèng-chiòng káng chheng-lâng chú-ba̍k khoàⁿ i. Ek-sam chı̍t-sı̂ chin kiaⁿ, bı̄n lóng pı̀ⁿ sí-lâng sek. Te̍k-bū thàm-cheng chiū chiap-soà kóng, chit-lâng chiū-sı̄ sin-bûn-choá só͘ kı̀ Lian-hoe-tı̂ sū-kiāⁿ ê lâng, goá thiaⁿ i cháu tùi Siōng-hái lâi, siông-sè thàm-cha kok hong-bı̄n ê kheh-koán. Kàu Kûn-eng koán ū chhâ-tio̍h chit-ê kı̂-koài ê sū-kiāⁿ, só͘-kí thiâu-kang lâi pông-theng, kàu-ūi kó-jiân khoàⁿ i tı̄-chia. Só͘-í chit-tia̍p ài chū-án-ni lâu i tı̄-chia, bān-chiah thè-tiûⁿ. Kóng liáu-āu chiū chı̀n-chêng oá-khı̀ tùi chhiú kā i khan teh, iā chhiáⁿ chèng-lâng sı̀-soàⁿ, iā in-ūi i ū tng khu-tiúⁿ ê chit, só͘-í m̄-ài tı̄ tng-tiûⁿ lia̍h i.
Hit-àm te̍k-pia̍t Chhoà sin-seⁿ tit-chiap hoah thè kiám-chhat-koaⁿ kap su-kı̀. Kan-ta kò-jı̂n chò chhin-chhiūⁿ pêng-iú lâi teh thàm i ê hi-sı̍t. In-ūi Chhoà te̍k-bū chin tông-chêng i, chai i sı̄ chò khu-tiúⁿ, bêng-bōng-lâng, só͘-í chin ài kiù i. Chiū mn̄g i kóng, Ek-sam lí ùi-chiáⁿ-iūⁿ thài tô-cháu? Goá m̄-sı̄ tô-cháu, sı̄ ūi ū sū-kò͘ lâi Siōng-hái. Lí nā m̄-sı̄ chûn tô-cháu ê ı̀-sù, án-choáⁿ tiàm lú-koán thái tio̍h oāⁿ-miâ? Goá to ài pı̄ hiâm-gı̂. Ài pı̄ siáⁿ-mı̍h hiâm-gı̂? Kiaⁿ lâng phe-phêng goá chhoā Ge̍k-chu chhut-lâi. Chhoā Ge̍k-chu chhut-lâi kiám ū sáⁿ iàu-kín, thài tio̍h oāⁿ-miâ? Goá siūⁿ lí m̄-sı̄ ūi án-ni, sı̄ ū khah chhim ê kè-oē. Bô, bô, Lí cháiⁿ-iūⁿ khı̀ bé lō͘-chiò? Goá to siūⁿ beh koè goā-kok. Lí thâu-tú-á kóng sı̄ ū tām-po̍h tāi-chı̀ lâi-kàu Siōng-hái nā-tiāⁿ, iā chit-tia̍p kóng beh khı̀ goā-kok? Goá to lâi chia, chiah siūⁿ ài khı̀. Iā siūⁿ ài khı̀ thái bô ēng lí ê miâ khı̀ kip-lō͘-chiō, thái ēng pa̍t-ê lâng ê miâ? Án-ni lí sı̄ beh thau-cháu. Taⁿ lí nā chûn-sim beh khı̀ goā-kok pān tāi-chı̀ chò seng-lí, iā ún-tàng ū chē-chió ê hêng-lí, hêng-lí tı̄ tó-ūi? Goá to bô khoán hêng-lí, án-choaⁿ bô? To khoán bē-hù. Ū sím-mı̍h sū hō͘ lí khoán bē-hù; Kiaⁿ hù-chûn bē-tio̍h. Lí nā hiah chim-chiok kiaⁿ hū-chûn bē-tio̍h? Cháiⁿ-iūⁿ bô liōng-chá pı̄-pān? Goá to hut-jiân siūⁿ beh chhut-goā-ê. Lí kiám m̄-chai lí sı̄ tng khu-tiúⁿ, ta̍k-jı̍t ài chhut-se̍k pān-sū, án-choáⁿ ū tāi-chı̀ tio̍h khı̀ goā-kok, bô liōng-chá thê-chhut khoat-khı̂n-kài, iā beh chhut-hoat bô lâng chai? Án-ni lí ún-tàng chûn beh cháu-thoat sím-mı̍h choē-chōng ê táⁿ-sǹg, nā bô, chiū bô hiah chheⁿ-kông, iā hiah káu-koài ê pō͘-sò͘. Chin ngē-chhùi, lóng m̄-jı̄n.
Tùi án-ni chiū kā i sàng-lo̍h ū-sím kaⁿ-ga̍k. Ah! chı̍t-sı̀ lâng lóng sı̄ hó-miā, kàu kin-á-jı̍t tio̍h siū kaⁿ-ga̍k, chit-mê chin m̄-goān, chia̍p-chia̍p siūⁿ beh sí; m̄-kú siūⁿ m̄-goān, ē-kı̀-tit goá chàm Hūi-bí to ná-chún chàm bô sím-mı̍h tio̍h, koh goá m̄-sı̄ chûn pháiⁿ-ı̀ beh lâi i sí, án-ni goá nā chū-chı̄n soah chū án-ni hō͘-lâng kóng cha-po͘-kiáⁿ ùi-sū, iā tāi-chı̀ bô-bêng chiū kiaⁿ kàu sí. Ah! chı̍t-sim siūⁿ beh kap i piān chı̍t-ē o͘-pe̍h, tùi án-ni chiū tó lo̍h-khı̀ khùn. Ba̍k-chiu kheh-khı̀, chiū koh khoàⁿ Hūi-bí khiā-tı̄ bı̄n-chêng, phı̄ⁿ, ba̍k, chhùi choân lo͘-kô͘-moâi. Ah! chin kiaⁿ, khah thêng-tı̄ chhn̂g-chêng khah-thêng tı̄ chhn̂g-āu. Peh khí-lâi ba̍k-chiu thí-khui iū bô khoàⁿ-kı̀ⁿ, ka-kı̄ siūⁿ tek-khak sı̄ Hūi-bí pı̀ⁿ-kúi beh lâi lia̍h i. Ba̍k-chiu kheh khı̀ chiū koh lâi, tùi án-ni soah ná chhin-chhiūⁿ siáu-ê. Koh hoân-ló bı̂n-á-jı̍t beh koh chı̍t-piàn chèng-sek ê ū-sím, soah khí-kông ê khoán, kui-mê peh khí-lâi loān-loān kiâⁿ.
Chông chhut-khı̀ kaⁿ-ga̍k ê chháu-po͘-á lōng-lōng-kiâⁿ. Kàu thiⁿ-phú-kng sûn-kaⁿ ê lâi kā thoa jı̍p-khı̀, chhùi nga̍uh-nga̍uh-liām, ū hoat-jia̍t. Kò͘-kaⁿ ê lâng pín ū-sím koaⁿ-tiúⁿ, iā chhiáⁿ ga̍k-i lâi khoàⁿ, chiah siat-hoat hō͘ i khı̀ kaⁿ-ga̍k ê pēⁿ-ı̄ⁿ, keh chiâⁿ lé-pài chiū khah hó. Tùi án-ni chiū chèng-sek ê ū-sím, ū kiám-chhat, su-kı̀ lâi kı̀ i ê kháu-keng. Chiū mn̄g i ê miâ-sı̀ⁿ, chū-só͘, iā tı̄-sı̂ kàu Siōng-hái, it-it ê keng-koè mn̄g chheng-chhó. Chiū kóng, lí tı̄ 11 goeh chhe 2 àm, cháiⁿ-iūⁿ chiong Hūi-bí kā i that tùi Liân-hoe tı̂-té lo̍h-khı̀ sí? Bô, goá m̄-sı̄ chûn pháiⁿ-ı̀, goá m̄-chai kā i that ū-tio̍h á bô; nā ū, iā-sı̄ tǹg-lap-chē nā-tiāⁿ. Put tı̀-kàu siak-lo̍h tı̂. Nā sı̄ án-ni chiáu lí siūⁿ sím-mı̍h-lâng kā i that lo̍h-khı̀? Goá m̄-chai. Bē án-ni kóng-tit, in-ūi hit-sı̂ kap lí khı̀ ê lâng lóng sı̄ cha-bó͘-lâng, koh i iā-sı̄ bêng-bêng lám-tı̄ lí ê kha teh khàu. Lí chò ū-sím-koaⁿ ê lâng, kiám ū khiā-tı̄ hia khoàⁿ i í-keng tiāu-cha Siù-chhun, i chı̍t-lâng thang-chò chèng-jı̂n, i kóng-bêng sı̄ lí that-ê, in-ūi hit-sı̂ lám lí ê kha, iā lí cha-po͘-lâng chiah ū-la̍t thang sak i kàu lo̍h-khı̀, iā-sı̄ toè lí ê siaⁿ lo̍h-khı̀.
14 Ûi-Giân-Su
Mn̄g kàu-chia, soà tiām-tiām bô-oē, in-ūi sim-bâng-bâng, soà bē-hiáu ı̀n. Ū-sím-koaⁿ kóng, Lí nā m̄ ı̀n, chiū beh kā lí chò sū-sı̍t lâi kè-sàng lah. Iû-goân tiām-tiām, hit-mê chiū kā i sàng-jı̍p ū-sím kaⁿ-pâng, koaiⁿ-tı̄ tē 4 hō sek. Keh chá-khı̀ beh tah chá-chhia lo̍h-lâi Lâm-kiaⁿ, hù 12 goe̍h chhe ê kong-phoàⁿ, in-ūi khah oān, kiaⁿ-liáu ná khı̀ nı̂-boé ná bô-êng. Hit-mê Ek-sam ka-tı̄ ê liông-sim chū-chek, hoán-hoé i ê chhò-gō͘. Ah! kin-ná-jı̍t goá sı̄ tông-tông chı̍t-ê ū chu-keh ê sin-sū, tio̍h lâi siū koaiⁿ-kaⁿ, siū sím-mn̄g, kiám-chhái tio̍h kàu sí-hêng ê tē-pō͘, iā tı̄ 2, 3 jı̍t chêng tùi sin-bûn iā khoàⁿ-tio̍h in lāu-bú tiàu-tāu chū-sat lâi sí. Ah liông-sim it-hoat kan-khó͘, siūⁿ kóng goá kin-ná-jı̍t ê oa̍h, oa̍h-tit bô lō͘-ēng. Koh siāng kan-khó͘, chiū-sı̄ koh siūⁿ-kı̀ⁿ chêng i kap Hūi-bí ê saⁿ-thiàⁿ, khí-thâu i m̄-kè-i, iā i tı̍t-kiû, iā tùi jı̍p i ê chhù-mn̂g, iā sı̄ chin koai, sū-sū lóng sı̄ thun-lún, un-jiû sióng-sè, iā kin-ná-jı̍t ē lâi sí, koh sı̄ sí-tı̄ hui-bēng. Ah! ná siūⁿ ná m̄-kam, koè Hūi-bí chin bē-tit-khı̀. Chiū khui-siaⁿ ka-tı̄ háu, iā tı̄ kan-khó͘ ê ke̍k-thâu chiū koh siūⁿ-tio̍h Siōng-tè, chiū kūi-lo̍h tı̄ ga̍k-pâng ê thô͘-kha khui-siaⁿ kı̂-tó. Ah! Siōng-tè ah, kiù leh ò͘! Sim ná kan-khó͘. Chiū siūⁿ koat-ı̀ beh chū-chı̄n; in-ūi nā kàu thiⁿ-kng, tò-khı̀ Lâm-kiaⁿ, hia ū chhin-chiâⁿ pêng-iú, ún-tàng toā thí-chhiò, khoàⁿ-khin.
In-ūi sin-chiūⁿ ū hāi-sí bó͘, khı̀-sí lāu-bú, sı̍t-chāi sı̄ put-hàu ê choē-khoe, siūⁿ-liáu bô bı̄n thang kı̀ⁿ-lâng. Tùi án-ni chiū siūⁿ beh tháu khò͘-toà khí-lâi chhui hō͘ i sí. Āu-lâi koh siūⁿ-tio̍h sí, sí-tit m̄-ta̍t; in-ūi ka-tı̄ ê sim-tiong bô 10-hun kam-goān, kóng ū hāi-sí Hūi-bí, in-ūi goá to kı̀-tit kā i chàm bô sím-mı̍h tio̍h, án-choáⁿ ē liàn lo̍h-khı̀. Tùi án-ni chiū kā kò͘-kaⁿ ê lâng, thó chı̍t-tè choá kap pit, chiū ka-tı̄ chēng-chēng phak-tı̄ bı̂n-chhn̂g, lâi siá chı̍t-tiuⁿ ûi-giân-chn̄g, āu-lâi chiah beh lâi sí. Siá-kóng, Ah! Kàu-chia goá sı̄ chin kiàn-siàu, sı̄ ū-choē ê lâng; chóng-sı̄ Hūi-bí ah! goá ê sim kàu-taⁿ sı̍t-chāi iáu-ū chûn thiàⁿ lí ê sim, goá chêng ê só͘-chò sı̍t-chāi ū toā chhò-gō͘, goá chit-tia̍p koh siūⁿ-tio̍h lán chêng khı̀ bán pek-ha̍p-hoe, á-sı̄ chò-hoé kò͘ A-pa ê phoà-pēⁿ, á-sı̄ tı̄ Lâm-iông ê chêng-hêng. Ah! goá chin-chiàⁿ chai lí sı̄ chin thiàⁿ-goá. Goá chit-tia̍p nā koh siūⁿ tio̍h lí ê bı̄n,chin-chiàⁿ ta̍k sı̂ ū hô-pêng, thiàⁿ-thàng, thun-lún, ê khoán-sit. Ah! lūn jı̂n-keh, goá chin-chiàⁿ m̄-ta̍t-tio̍h lí. Lí chin-chiàⁿ sı̄ chin ê Ki-tok-lú-tô͘, iā goá sı̍t-chāi kóng, goá ê sim m̄-káⁿ bē-kı̀-tit lí ê thiàⁿ-chêng. Goá iā sı̍t-chāi thiàⁿ-lí. Ah! mô͘-kúi ê khùi-la̍t ah! Lí cháiⁿ-iūⁿ bê goá kàu-tı̄ chhim-kheⁿ, hām-hāi goá kàu chiah-chhám ah! Ah! Siù-chhun ah! Ge̍k-chu ah! Lín chin-chiàⁿ sı̄ mô͘-kúi ê khı̀-khū, hāi goá kin-á-jı̍t kap goá só͘ chı̀ chhin-ài ê kut-tiong ê kut bah-tiong ê bah ê Hūi-bí lâi pun-khui. Ah! Hūi-bí ah! Lí nā kó-jiân thiàⁿ--goá, kiû lí sià-bián goá, thé-thiap goá chı̍t-sı̂ ê chhò-gō͘, tông-chêng goá chin-sı̍t ê hoán-hoé. Ah! goá chin-chiàⁿ tek-choē tı̄ thiⁿ kap tek-choē tı̄ lí. Ah! Siōng-tè ah, Lí nā sià-bián kiù goá ê lêng-hûn, kàu tı̄ lí ê kok, goá tı̄-hia tek-khak beh koh tùi só͘-thiàⁿ ê Hūi-bí jı̄n-chhò. Ah! Hit-sı̂ tı̄-hia, goá beh koh éng-oán kap i saⁿ-thiàⁿ; Ah! goá só͘-thiàⁿ ê Hūi-bí ah! Lí tio̍h sià-bián goá, lí tio̍h thè goá kiû Siōng-tè sià-bián goá hoān chhit-kài ê choē, í-kı̍p só͘-chò ta̍k-hāng ê m̄-tio̍h. Ah! lūn lí ê sí, goá chin m̄-kam, goá chin-chiàⁿ bô chûn hit-hō sim, goá khoàⁿ goá that lí bô tio̍h. Chú-ah, kiû Lí kàm-chhat!
Siá kàu chia, sim chin toā kan-khó͘, khui-siaⁿ háu. Hut-jiân khoàⁿ thang-á mn̄g-goā chı̍t-ê lâng kiâⁿ-koè, chin sêng Hūi-bí. Ah! Hūi-bí ah! Kín khui-mn̂g, jiok chhut-lâi. Hit-sı̂ sı̄ goe̍h-àm-mı̂ àm-bı̂n-bong, khı̀ that-tio̍h chio̍h-thâu soah poa̍h-tó. Kàu-chia siông-siông bô chia̍h, hoân-ló, koh bat pēⁿ chiâⁿ lé-pài tı̄ kaⁿ-ga̍k ê pēⁿ-ı̄ⁿ, lâng tú pēⁿ hó chin hi-jio̍k, tó lo̍h-khı̀ soah náu pı̂n-hiat. Hit-sı̂ kiâⁿ-koè thang-á-mn̂g goā ê hū-jı̂n-lâng oá-lâi kā i chhah, hō͘ i the-teh, teh kā i loa̍h, i ba̍k-chiu koh thí-khui khoàⁿ, bêng-bêng sı̄ Hūi-bí chiū khui-siaⁿ kóng, Hūi-bí ah! Lí kiám m̄ sı̄ Hūi-bí. Taⁿ chit-tia̍p lán tı̄ chia sı̄ hiān-sè, á-sı̄ n̂g-choâⁿ ah! Lán taⁿ sı̄ sí, á iáu oa̍h leh? Ek-sam ah! Chhiáⁿ lí an-sim, chia sı̄ chháu-po͘, tio̍h jı̍p-lâi khı̀ lāi-bı̄n. Hit-ê hū-jı̂n-lâng kiò kò͘-kaⁿ-ê lâi, tàu chhah-jı̍p ga̍k-pâng, hō͘ i khùn chiū chhut-khı̀.
15 Lâm-Kian Ê Tē-It Kong-Phoàⁿ
Hit-mê chin-siān, chū án-ni khùn-khı̀, kàu thiⁿ-kng kap Chhoà te̍k-bū, chiū chē bé-chhia khı̀ chhia-thâu tah hoé-chhia lo̍h khı̀ Lâm-kiaⁿ. Koaiⁿ-tı̄ ū-sím kaⁿ-pâng tē 15 hō. Hit-àm ū pêng-iú lâi thàm--i, chiū mn̄g i ū beh chhiáⁿ piān-hō͘-sū á-bô? I kóng boeh, boeh chhiáⁿ sím-mı̍h lâng? Siūⁿ-siūⁿ leh, kóng beh chhiáⁿ Tân Pek-him, chit-ê sı̄ chin chhut-miâ ê piān-hō͘-sū, bat koè-khı̀ Jı̍t-pún liû-ha̍k, ū tit-tio̍h hoat-ha̍k-sū ê ha̍k-ūi. Sı̂-jı̍t tiāⁿ-tio̍h 12 goe̍h 5 jı̍t beh kong-phoàⁿ, in kàu Lâm-kiaⁿ sı̄ 11 goe̍h 30, án-ni iáu-ū 5 jı̍t kú ê iû-ū, sı̍t-chāi sı̄ lóng m̄-chún lâng lâi saⁿ-kı̀ⁿ; chóng-sı̄ tián-ga̍k-koaⁿ chia̍h chı̂ⁿ, chiū thau-chún lâng lâi àm-chı̄ⁿ chhoē i. Keh-jı̍t pêng-iú chiū chhoā Tân Pek-him piān-hō͘-sū lâi chhoē--i, iā kı̀ⁿ-bı̄n ê sı̂, Ek-sam chin hoaⁿ-hí, put-chí pek-chhiat tı̀-ı̀ pài-thok i, chêng-thâu it-lí kóng hō͘ i thiaⁿ. Chóng-sı̄ Pek-him ê ı̀-sù, sı̄ chin oh-tit piān; in-ūi bêng-bêng sı̄ toè lí teh-mē i ê siaⁿ, siak lo̍h-khı̀ Iā hit-sı̂ iā bô pa̍t-lâng tı̄-hia thang chhia i lo̍h-khı̀. Tân Pek-him chiū koh mn̄g i, Lí khı̀ tı̂-piⁿ ê í-chêng khı̀ tó-ūi? Boē-khı̀ tı̂-piⁿ ê í-chêng, goá khı̀ Sài-hoe-lâu. Khı̀ hia chhòng sím-mı̍h? Khı̀ hia the̍h Jı̍t-phiò 1000kho͘ khı̀ hō͘ lâu-chú. Thái the̍h hia-ê chı̂ⁿ khı̀ hō͘ i? Goá tō tùi in sio̍k Ge̍k-chu chhut-lâi, só͘-í the̍h-chı̂ⁿ khı̀ hō͘ in. Hit-sı̂ lí ū kap sím-mı̍h lâng khı̀? Kap Siù-chhun kap Ge̍k-chu khı̀. Khı̀, in ū iōng chiú chhiáⁿ--lí á-bô? Ū pān chı̍t-toh chiú chhiáⁿ goá. Ū chia̍h-chiú bô? Ū. Án-nı̄ hó, án-ni hó. Taⁿ lí tio̍h lâi án-ni kóng. Beh kóng án-choáⁿ, chhiaⁿ lí kà--goá? Lí tio̍h kóng 11 goe̍h chhe 2 àm, lí chhoā Siù-chhun, Ge̍k-chu khı̀ Sài-hoe-lâu, iā khı̀ kap lâu-chú sǹg-chı̂ⁿ, hit-sı̂ lí ū hō͘ in chhiáⁿ. Kóng án-ni kiám ē-ēng-tit? Ē, ē, lí kóng hit-mê chia̍h chiú liáu hui-siông chùi, iā chiú-chùi khōng-khōng-phiân, khiā bē tiâu-tē, cheng-sı̂n lóng hūn-loān, hō͘ Siù-chhun kap Ge̍k-chu chhah tò-lâi. Iā kóng án-ni kiám ū lı̄-ek? Ū, ū, iā kóng lí lâi-kàu hia, gū-tio̍h Hūi-bí teh khàu, iā lí khōng-khōng-phiân, phiân lâi-kàu hia, Hūi-bí cháu oá-lâi, kā lí lám tiâu tı̄ kha-nih, iā lí khiā bē tiâu-tē, soà hō͘ i lám tó-lo̍h-khı̀, iā e̍h-e̍h-thò͘, iā Hūi-bí kā lí lám-tiâu-tiâu, tı̍t-tı̍t khàu, lí hit-sı̂ chùi-bâng-bâng, só͘-í m̄-chai sı̄ Hūi-bí iā put-kò tı̍t-tı̍t phún chiū-sı̄. Iā beh koh kóng án-choáⁿ? Koh kóng, Teh phún ê sı̂, soà phiân tùi tı̂-piⁿ khı̀, iā Hūi-bí iáu kā lí khiú teh, lí khōng-khōng-phiân, hit-mê goe̍h-àm, só͘-í m̄-chai tı̂ ê gûi-hiám, Hūi-bí soà hō͘ goá kā i táⁿ-tó, liàn tùi tı̂-nih lo̍h-khı̀, sı̍t-chāi m̄-sı̄ thiau-í-kò͘, sı̄ chiú-chùi ê bû-ı̀-tiong. Lí nā kóng án-ni, goá chū-jiân chiū ū lí-khı̀ thang piān. M̄-kú goá nā kóng án-ni sı̄ pe̍h-chha̍t; in-ūi hit-mê goá bô chiú-chùi, in-ūi chiú, sı̄ lim sió-khoá nā-tiāⁿ. M̄-kú lí nā bô kóng án-ni, lí ài chò thiau-ı̀-kò͘ ê choē lâi pān, kiaⁿ-liáu khah tāng; iā nā kóng chiú-chùi, án-ni sı̄ cheng-sı̂n bô tiāⁿ, ǹg-bāng khah ē sià-bián--tit. Chóng-sı̄ Ek-sam ê sim-koaⁿ chin kan-khó͘; in-ūi hiān-hiān ē kı̀-tit i bô kā i that hiah toā-ē, lâi tı̀-kàu ē hō͘ i lo̍h-tı̂, sim-tiong tiāⁿ chú-tiuⁿ ū sím-mı̍h pa̍t-lâng ê só͘-chò, m̄-sı̄ i pún-sin. Só͘-í beh kóng án-ni sı̄ chin m̄-goān, iā nā kóng án-ni, soà bē-ēng-tit, hit-sı̂ beh cháiⁿ-iūⁿ? Che goá m̄-káⁿ kā lí pau; put-kò, goá sı̄ kóng án-ni khah hó piān, nā bô khah oh-piān. Ah! siūⁿ-liáu sim chin kan-khó͘.
Taⁿ jı̍t-kı̂ í-keng kàu, chhe 5, 8 tiám khui-têng, thèng-chiòng oá 300 goā, iā ū 12 ê poê-sím-koaⁿ thang-kóng sı̄ chin sēng-hóng. Khui-têng, Sím-phoàⁿ-koaⁿ chiū mn̄g 11 goe̍h chhe 2 àm lí cháiⁿ-iūⁿ ēng kha that Hūi-bí lo̍h-chúi? Bô, goá pún-sin bô hit khoán kám-kak. Hit mê-hng kap lí khı̀ ê lâng lóng sı̄ hū-jı̂n-lâng, lí siūⁿ in kiám ū that i lo̍h-chúi? Goá m̄-chai, Tı̄ hit-sı̂ Hūi-bí ū lám lí ê kha á-bô? Goá bē-kı̀-tit lah. Án-choáⁿ bē-kı̀-tit? Lí tı̄ Siōng-hái ū-sím ê sı̂, lí ı̀n ū, kàu chia iā bē-kı̀-tit, he sı̄ cháiⁿ-iūⁿ? Hit-sı̂ goá ū chia̍h-chiú-chùi. Khı̀ tó-ūi chia̍h? Khı̀ Sài-hoe-lâu chia̍h. Kiám-chhat-koaⁿ chiū khí-lâi, kóng, Án-ni bē-ēng-tit, tı̄ Siōng-hái ū-sím, chiàu ū-sím-koaⁿ ê siong-bûn lâi, kóng i ū mn̄g lí chē-chē piàn, khoàⁿ iáu-ū sím-mı̍h oē thang kóng, lí lóng bô ı̀n, iā kā lí kóng nā bô ı̀n chiū beh kā lí chún-chò sū-sı̍t lâi kè-sàng. Lí iā tiām-tiām àn-choáⁿ lâi-kàu chia ē ke seⁿ-chhut chia̍h-chiú ê oē? Tân Pek-him chiū khí-lâi piān kóng, Kiám- chhat-koaⁿ ê oē bē-bián-tit siuⁿ kiông-sû toa̍t chèng-lí, lâng ê kı̀-tı̂ cháiⁿ-iūⁿ hō͘ lí ē liāu-tit? Hit-sı̂ bē-kı̀-it chit-sı̂ lâi kı̀-tit, mā sı̄ iáu ē-ēng-tit. Koh tı̄ ū-sím ê sı̂, ū-sím-koaⁿ kiám-chhái sı̄ ēng tı̍t-tı̍t ok--ê, só͘-í i m̄-goān kā i kóng, lâi kàu-chia chiah kóng. Án-choáⁿ kóng án-ni bē-ēng-tit? Kiám-chhat-koaⁿ chiū chhéng kóng, Nā-sı̄ án-ni chhiáⁿ phoàⁿ-koaⁿ-tiúⁿ tiàu chiú-lâu ê lâu-chú lâi mn̄g, khoàⁿ i hit-àm chia̍h goā-chē chiú. Phoàⁿ-koaⁿ-tiúⁿ thàn i ê ı̀-kiàn.
Khı̀ tiàu ê sı̂ phoàⁿ-koaⁿ chiū koh mn̄g, iā Hūi-bí poa̍h-lo̍h chúi ê sı̂ lí nā m̄-sı̄ chûn ok-ı̀ cháiⁿ-iūⁿ bô liâm-piⁿ kiù i khí-lâi? In-ūi chin àm koh bô pang-chhiú. Koan-hē sèⁿ-miā ê sū, àm chiaⁿ-iūⁿ bô tiám-teng? Lāi-bı̄n bô lâng. Lín hū-kı̄n mā ū phài-chhut-só͘, cháiⁿ-iūⁿ bô kín thong-ti? Ek-sam bô-oē thang ı̀n. Piān-hō͘-sū chiū khí-lâi kóng, Hit-mê i to chiú-chùi, só͘-í sim bē hiáu-tit siat-hoat hit-chân sū, kàu thiⁿ-kng chiú chùi koè. I to ū kiò tn̂g-kang kín khı̀ hô͘, tı̀-ı̀ beh lâi chhoē. Tú ı̀n liáu ê sı̂, Sài-hoe-lâu ê lâu-chú chiū jı̍p-lâi, phoàⁿ-koaⁿ chiū kiò i chiù-choā, i chiū chiù-choā, tek-khak bô kóng pe̍h-chha̍t: to̍k-to̍k chiáu i só͘-chai lâi kóng.
