Sin-bûn ê cha̍p-lio̍k 01

Bân-lâm Sèng Kàu Su Ke̍k 1913

1. Lé-pài-jı̍t choè Kang oē Sı̍h-pún.

Tāi-eng kap Tāi-bí kok ê peh-sı̀ⁿ khah-choē sǹg sı̄ Iâ-so͘ kàu ê lâng, só͘-í hiah-ê só͘-chāi khah tùi-tiōng Siōng-tè ê hoat-tō͘; chhin-chhiūⁿ Lé-pài-jı̍t lóng m̄-sái choè kang, ia̍h m̄-sái choè seng-lí, pêng-siông ê chèng-sū koaⁿ-hú m̄-sái pān, hō͘ koaⁿ-hú kap peh-sı̀ⁿ lóng-chóng thang thiaⁿ tō-lí poê-ióng liông-sim. Kiám-chhái lâng chhiàⁿ tn̂g-kang, boē bián-kióng i Lé-pài-jı̍t choè kang. Taⁿ beh hoan-e̍k chı̍t-chat ê sin-bûn.

Lâng ū chhài-hn̂g, khoàⁿ-kı̀ⁿ chhù-piⁿ ê tn̂g-kang, miâ Jı̄m teh-choè kang, kiò i kóng, “Jı̄m-ló-ah, Lé-pài-jı̍t chá-khí tio̍h lâi goá chhài-hn̂g tàu pang-chān choè kang, lí beh mah ?”

Jı̄m-ló chiū thǹg i ê loe̍h, ēng chhiú pê thâu-khak teh-siūⁿ, lâi kóng, “Thâu-ke ah, goá m̄-káⁿ, kiaⁿ-liáu oē sı̍h-pún.”

Hn̂g-chú kóng, “Heh !M̄-sı̄ beh hō͘ lí khang-khang tio̍h-boâ, sı̄ beh hō͘ lí kang-chı̂ⁿ.” Jı̄m-ló koh kóng, “Oē sı̍h-pún.”

Hn̂g-chú kóng, “Lí beh-thài-oē kóng án-ni ? Sı̄ oē ke-thiⁿ lí ê chı̂ⁿ; goá phah-sǹg lí ia̍h bô kàu joā ū chı̂ⁿ ê lâng.”

Jı̄m-ló ı̀n kóng, “Lí phah-sǹg tio̍h; goá sı̍t-chāi bô sím-mı̍h ū chı̂ⁿ, só͘-í kiaⁿ-liáu oē sı̍h-pún.”

Hn̂g-chú kóng, “Lí kóng, Oē sı̍h-pún, ū sím-mı̍h ı̀-sù ? Lí káⁿ sı̄ thiaⁿ goá ê oē, boē hiáu tit.”

Jı̄m-ló kóng, “Oē hiáu-tit lí ê ı̀-sù; nā-sı̄ goá hâm-bān, ài kóng, kóng boē lâi; lí nā hoaⁿ-hí. goá chiū ûn-ûn kóng hō͘ lí thiaⁿ. Goá sı̍t-chāi m̄-sı̄ joā ū chı̂ⁿ ê lâng, lí kóng hit kù put-chí tio̍h; goá siông-siông tio̍h thoa-boâ. Sui-jiân tı̄ chit sè-kan bô gia̍p, iáu-kú ū hit ê ǹg-bāng sí-āu oē khah-ū. Chit hō ê ǹg-bāng, chiàu goá hū-jı̂n-lâng ê oē, ia̍h thang kóng sı̄ ū hok-khı̀. Goá ê Kiù-chú chhin-chhùi ū kóng, “ Goá khı̀ in-ūi lín pı̄-pān só͘-chāi, tı̀-kàu goá só͘ tı̄-teh, lín ia̍h oē tı̄ hia.”Chá it-jı̄ cha̍p nı̂, goá o̍h chí chit chat ê tō-lí, tùi hit-tia̍p í-lâi goá kap goá ê bó͘, nā ū khiàm-kheh kan-khó͘ ê tāi-chı̀, chiū liām chí chit chat, í-keng ū kúi-nā pah pái.”

Hn̂g-chú kóng, “Hó͘ⁿ, hó͘ⁿ; nā-sı̄ lí tāi-seng kóng, oē sı̍h-pún, chí lō͘-bé só͘ kóng ê oē ū sím-mı̍h kan-sia̍p ?”

Jı̄m-ló kóng, “Tio̍h sià-bián goá; put-chí ū kan-sia̍p. Goá ǹg-bāng āu-lâi tı̄ khah-hó ê só͘-chāi tit-tio̍h khah-hó ê ki-gia̍p, taⁿ kiaⁿ-liáu oē sit-lo̍h hit ê ǹg-bāng, chiū-sı̄ toā sı̍h-pún. Goá ê Kiù-chú í-keng khı̀ pı̄-pān só͘-chāi, taⁿ goá tio̍h kiû I lâi pı̄-pān goá ê sim, hō͘ goá āu-lâi oē kham tit tiàm hit só͘-chāi, nā bô chiū-sı̄ ko͘-hū Chú ê un-tián. Chóng-sı̄ goá bô êng thang choan-bū siūⁿ chit hō ê tāi-chı̀, to̍k-to̍k Lé-pài jı̍t chiah ū. Goá khı̀ lé-pài-tn̂g thiaⁿ thian-tông ê sū-chêng, ná chhin-chhiūⁿ hioh-kha tı̄ thiⁿ-lō͘ ê lō͘-chām. Thâu-ke ah, m̄-thang, m̄-thang; tı̄ lâng ê jı̍t tio̍h choè lâng ê kang, kiám-chhái tı̄ Siōng-tè ê jı̍t lâi choè, kiaⁿ-liáu oē sı̍h-pún.”

2. Lé-pài-jı̍t hioh-kang, ia̍h oē choè Cheng-sı̂ⁿ ê Lı̄-ek

Tāi-bí kok sı̄ khah-toā ê toē-hng. Chá-chêng bē chhòng hé-hun chhia ê lō͘. Hit-sı̂ kok-lāi bô káng bô hô ê só͘-chāi, chài lâng-kheh chài hè ê chhia put-chí toā tiuⁿ; ia̍h put-chí ióng, oē kham-tit chài kàu chiâⁿ-pah tàⁿ, iok-lio̍k ū chiâⁿ-bān kun. Thoa chit hō ê chhia, chài kàu chiah tāng ê chāi, chit tiuⁿ chhia tio̍h la̍k chiah bé; hit ê bé ia̍h sı̄ toā chiah, pí Ē-mn̂g ê bé sı̄ nn̄g saⁿ pē toā.

Taⁿ beh lio̍h-lio̍h-á kóng chit hō chhia-hu chit lâng ê tāi-chı̀. I ê miâ sı̄ Tâm, kúi nā nı̂ só͘ kiâⁿ chài-hè ê lō͘ put-chí hn̄g, khı̀ tò lâi chiu-ûi iok-lio̍k nn̄g chheng lí lō͘; lō͘ hn̄g chài tāng, tio̍h bān-bān kiâⁿ, chit nn̄g ge̍h-jı̍t kú, chiah oē kiâⁿ chiu-ûi bêng-pe̍k. Lō͘-tiong bé ū-sı̂ oē ià, ū-sı̂ oē phoà-pı̄ⁿ, ū-sı̂ oē sí; hán tit oē kiâⁿ kàu chiu-ûi ia̍h bô sit-lo̍h chı̍t chiah, ū-sı̂ sit-lo̍h nn̄g saⁿ chiah, só͘-í ta̍k tiuⁿ chhia lēng-goā khan chı̍t chiah bé thang thoè-oāⁿ.

Kiâⁿ hit tiâu lō͘ ūn hè ê chhia put-chí choē, ū-sı̂ kúi cha̍p tiuⁿ choè chı̍t tı̄n saⁿ-tè lâi kiâⁿ. Lâng tiàm tı̄ soaⁿ-téng hn̄g-hn̄g khoàⁿ-kı̀ⁿ chiah choē chhia, chhin-chhiūⁿ sio-chiap iân-lō͘ oān-oān kiâⁿ, khoán-sit sı̄ chhin-chhiūⁿ chı̍t bé ê thâng teh sô.

Chı̍t-ê lâng miâ Tâm kúi-nā nı̂ choè chit-hō ê thâu-lō͘. I ū nn̄g tiuⁿ chit-hō chhia, cha̍p-sı̀ chiah bé; ta̍k-tiuⁿ chhia-chêng pa̍k la̍k chiah bé thoa chhia, chhia-āu pa̍k chı̍t chiah teh khan thang thoè-oāⁿ. Chı̍t-tiuⁿ chhia sı̄ i ka-kı̄ chiáng-lí, chı̍t-tiuⁿ sı̄ chhiàⁿ lâng lâi chiáng-lí.

Tâm choè lâng ê khoán-sit chin bóng-tóng, bô kiaⁿ Siōng-tè,bô kiaⁿ lâng, ia̍h bô kiaⁿ mô͘-kúi; ke̍k pháiⁿ-chhùi, ta̍uh-ta̍uh siat-to̍k Siōng-tè ê miâ gâu mē--lâng; lâng chiū hō i sı̄ Pháiⁿ-kúi Tâm.

Hit-sı̂ Tāi-bí kok ê hong-sio̍k lâng lóng-chóng thı̀ chhùi-chhiu, liân lāu ê lâng ia̍h sı̄ án-ni; hán tit ū lâng lâu chhùi-chhiu; siat-sú ū, sǹg sı̄ ke̍k chho͘-ló͘ ê lâng; nā-sı̄ chit ê Tâm lóng bô thı̀ chhùi-chhiu, bı̄n hô͘-hô͘, lâng chiū hō i ê sı̀ⁿ kiò choè Chhiu Án-ni-siⁿ i pêng-sò͘ só͘ kiâⁿ ê lō͘ ta̍k só͘-chāi lâng ki-chhı̀ kiò i sı̀ⁿ Chhiu, miâ Pháiⁿ-kúi Tâm, i ia̍h bô iàu-kín, to̍k-to̍k pháiⁿ-chhùi ı̀n lâi chhiò tiāⁿ-tiāⁿ.

Taⁿ chit hō ê lâng lóng bô iàu-kín Sèng-chheh ê tō-lí, chū-jiân bô siú Lé-pài-jı̍t, i tâng-pang ê lâng ia̍h bô siú, phah-sǹg Lé-pài-jı̍t kap pa̍t jı̍t, lóng saⁿ-tâng.

Ū chı̍t jı̍t, chiū-sı̄ pài-la̍k ê jı̍t, kiâⁿ in ê lō͘-chām bêng-pe̍k, lâi hioh kheh-tiàm, khoàⁿ-kı̀ⁿ piⁿ thâu ū hn̂g chai hoan-be̍h-sūi, sui-jiân bē-se̍k iáu-kú oē chia̍h--tit. Kàu àm i bóng-tóng chio tâng-pang kúi-nā lâng khı̀ bán hoan-be̍h-sūi, the̍h lâi kàu kheh-tiàm lāi, kiông-kiông kah tiàm-chú ê ke-lāi lâng tio̍h khı̀ sa̍h. I chia̍h kàu put-chí pá, kàu thiⁿ-kng tio̍h-soa phoà-pı̄ⁿ, chin siong-tiōng, boē-tit-thang kiâⁿ-lō͘, i tâng-pang ê lâng choè in khí-sin tāi-seng kiâⁿ, lâu i kap i só͘ chhiàⁿ ê lâng nn̄g tiuⁿ chhia tiāⁿ-tiāⁿ.

Kàu Pài-it thàu-chá seng-khu khah-hó, chiū khí-sin kiâⁿ lō͘ beh jı̍p tâng-pang ê lâng. I ê bé hioh chı̍t jı̍t put-chí khin-sang, khah gâu kiâⁿ, hit jı̍t ke kiâⁿ kúi-nā lí lō͘; Pài-jı̄ bé iáu-kú khin-sang koh ke kiâⁿ kúi-nā-lí lō͘; Pài-saⁿ ia̍h sı̄ án-ni, kàu jı̍t-àm chiū jip-tio̍h i tâng-pang ê lâng, Pài-sı̀, Pài-gō͘, Pài-la̍k kap in saⁿ-kap kiâⁿ. I lóng bô kap pa̍t lâng kóng chit-ê tāi-chı̀, nā sı̄ sim-lāi ta̍k-jı̍t teh siūⁿ, chiū tiāⁿ-tio̍h beh koh chhı̀ khoàⁿ hioh chit ê Lé-pài-jı̍t khoàⁿ cháiⁿ-iūⁿ.

Án-ni koh kàu Lé-pài-jı̍t chá-khí, i ké choè phoà-pı̄ⁿ, hō͘ i tâng-pang ê lâng khí-sin tāi-seng kiâⁿ, i iû-goân Pài-saⁿ jı̍t-àm jip-tio̍h, kap in kiâⁿ kàu Pài-la̍k. Ta̍k Lé-pài kiâⁿ án-ni kàu chiu-ûi bêng-pe̍k.

Tiàm tı̄ i ê chhù saⁿ jı̍t kú, beh koh-chài chhut-lō͘, khoàⁿ i ê bé kiâⁿ chí chı̍t-pang pí tāi-seng khah ióng-kiāⁿ khin-sang, chiū tiāⁿ-tio̍h í-āu kàu Lé-pài-jı̍t beh hioh-khùn; koh siūⁿ chí nn̄g chiah thoè-oāⁿ bé m̄-sái lēng-goā khan, chiū khı̀ boē lâng. Hit-tia̍p liáu-āu kiâⁿ gō͘ nı̂ kú, lō͘-nı̍h ê tiong-kan chiah-ê bé m̄-bat ū sí phoà-pı̄ⁿ ià.

Jiân-āu hit só͘-chāi khui hé-hun chhia ê lō͘, chiū hit-hō bé-chhia bô lō͘-ēng, i chiū pı̀ⁿ-choè pa̍t-mı̍h ê thâu-lō͘, chiū-sı̄ tiàm tı̄ khoe-piⁿ, khí chı̍t-keng chúi-chhia ê chhù, beh kù chhâ-liāu, chhiàⁿ chai-iáⁿ ê sai-hū lâi kù, bô joā-kú, i ia̍h oē hiáu tit.

I ka-kı̄ siūⁿ chit ê chúi-chhia m̄-sı̄ bah huih kut, Lé-pài-jı̍t m̄-sái chhin-chhiūⁿ cheng-siⁿ lâi hioh-khùn, nā-sı̄ koh siūⁿ Lé-pài-jı̍t thêng-kang chhia khah boē pháiⁿ, choè-kang ê lâng ia̍h oē hioh-khùn tit-tio̍h khin-sang, chiū koat toàn Lé-pài-jı̍t bô beh kù liāu.

Thâu chı̍t Lé-pài, i kap choè-kang ê lâng tı̄ chhiū-nâ lāi teh thit-thô, hut-jiân thiaⁿ-kı̀ⁿ chài sam bé-chhia ê siaⁿ, thêng tı̄ chúi-chhia chhù ê mn̂g-kháu, chhia-hu phah chúi-chhia mn̂g, kiò siaⁿ chin-kú. Tâm thau-khoàⁿ, lóng m̄ chhut--lâi, chiah-ê chhia-hu thèng-hāu kú, lóng bô lâng chhut--lâi, chiū pàng-hē chài sam ê bé-chhia tı̄ hia, chiong bé khan tò--khı̀. Kàu bı̂n-á chá-khí, chhia-hu koh lâi kı̀ⁿ i, mn̄g i, “Chā-bō͘-jı̍t siáⁿ-sū bô lâng tı̄ teh ?” I chiū ı̀n, kóng-khí i Lé-pài-jı̍t thêng kang ê in-toaⁿ.

Tâm choè chit-hō ê kang choē-choē nı̂. Lé-pài-jı̍t chúi-chhia siông-siông thêng-kang, m̄-sı̄ in-ūi beh thàn Siōng-tè ê kài-lu̍t, to̍k-to̍k phah-sǹg khah oē tit-tio̍h sè-kan ê lı̄-ek khoàiⁿ-oa̍h tiāⁿ-tiāⁿ, sim-koaⁿ lóng bô iàu-kín Sèng-chheh ê tō-lí, iû-goân pháiⁿ-chhùi siat to̍k Siōng-tè ê miâ.

Lı̄ chit ê chúi-chhia chiâⁿ phò͘ lō͘ ū chı̍t ê thé-biān choh-sit ê lâng,chhân-hn̂g chhù-the̍h choē-choē, ia̍h sı̄ choè kàu-hoē lāi ê tióng-ló. I ū chı̍t keng chhù choè cheng-siⁿ ê tiâu kap toé gō͘-kak chháu-á ê só͘-chāi; chit-keng khit hé sio--khı̀, siu-sêng ê sı̂ tit-beh kàu, bô só͘-chāi thang toé gō͘-kak kap chháu-á, chiū chhiàⁿ sai-hū sai-á choè kang ê lâng choē-choē, kín-kín lâi khí sin ê chhù. Tú-tio̍h Pài-la̍k jı̍t sai-hū-thâu kā hit ê thé-biān lâng kóng, “Iáu khiàm-ēng ê chhâ-liāu,Pài-it jı̍t-tàu nā oē tit-tio̍h, kàu Pài-saⁿ chhù ê ki-kut chiū oē khiā tit hó.”Thé-biān lâng thiaⁿ-kı̀ⁿ chit-ê oē, chiū liām-piⁿ khiâ bé khı̀ chúi-chhia kā Tâm kóng, “Goá sai-hū-thâu kóng só͘ khiàm-ēng ê chhâ-liāu, lí nā oē liâm-piⁿ kù hō͘ goá Pài-it jı̍t-tàu tit-tio̍h, chiū Pài-saⁿ oē khí sin chhù ê ki-kut khiā-chāi; lí oē á-boē ?”

Tâm ı̀n kóng, “Boē-oē piān.”Thé-biān lâng kóng, “Cháiⁿ-iūⁿ boē piān ?”

Tâm kóng, “Tio̍h Lé-pài-jı̍t lâi kù chiah oē; nā-sı̄ Lé-pài-jı̍t goá tio̍h thêng kang.”

Thé-biān lâng kóng, “Lâng chhin-chhiūⁿ lí ê khoán, Lé-pài-jı̍t choè kang, kiám ū só͘ hāi mah ?”

Tâm kóng, “Goá ka-kı̄ chho͘-ló͘ só͘ kiâⁿ bô ha̍p tō-lí goá chai, nā-sı̄ kàu Lé-pài-jı̍t goá tek-khak tio̍h thêng-kang.”

Thé-biān lâng kóng, “Goá chit-ê tāi-chı̀ sı̄ ke̍k iàu-kín; hoān-nā ke̍k iàu-kín--ê, Lé-pài-jı̍t ia̍h thang choè. ”

Tâm kóng, “Put-lūn sím-mı̍h lâng lâi chhiàⁿ lâi boé, nā-sı̄ Lé-pài-jı̍t goá tek-khak tio̍h thêng kang. ”

Thé-biān lâng kóng, “Goā ! lí ê sim-koaⁿ bô hiah khiân-sêng.”

Tâm kóng, “Goá chai lah; Lé-pài-jı̍t sı̄ goá chū-kí ài tit thêng kang, goá m̄-sı̄ chhin-chhiūⁿ hit hō chng-choè khiân-sêng ê lâng.”

Thé-biān lâng kóng, “Taⁿ hó lah; goá ê tāi-chı̀ chit-tia̍p pek-chhiat, lí lóng m̄-kam-goān pang-chān, bêng-bêng sı̄ áu-bân; í-āu m̄ koh ēng lí ê kang, liân chı̍t-tiâu sam ia̍h m̄ hō͘ lí kù, goá tāi-seng thong-ti lí; lí chit hō lâng chı̄n sı̄ khó-ò͘ⁿ, goá beh tùi chèng-lâng chó͘-tòng m̄-chhiàⁿ lí choè kang. Lí nā choè pài Siōng-tè ê lâng, sim-koaⁿ tùi-tiōng tō-lí, só͘-í An-hioh-jı̍t bô choè kang, goá chiū sià-bián lí, nā sı̄ chit ê tē-hng ê lāi-bı̄n, tē-it pháiⁿ-chhùi, gâu siat-to̍k Siōng-tè ê miâ chiū-sı̄ lí.”

Thé-biān lâng kóng soah, chiū toā siū-khı̀ koáⁿ-kín khiâ-bé tò khı̀.

Hū-kūn ê hiuⁿ-siā ū chı̍t lâng, káng-kiù kok ê chèng-sū ê siàu-liân sian-siⁿ; i ia̍h m̄-sı̄ thàn Sèng-chheh tō-lí ê lâng. I hit jı̍t ia̍h khı̀ chúi-chhia, tú-tú hit-sı̂ tı̄-teh, thiaⁿ-kı̀ⁿ thé-biān lâng kap Tâm kóng-oē. Thé-biān ê lâng lı̄-khui liáu, chit ê sian-siⁿ mn̄g Tâm, kóng, “Tāi-chı̀ kàu chiah pek-chhiat, lí siáⁿ-sū m̄ kam-goān bı̂n-á-chài lâi kù hit-ê liāu ?”

Tâm chiū chiong i Lé-pài-jı̍t cháiⁿ-iūⁿ thêng kang ê in-toaⁿ kā sian-siⁿ kóng. Koh kóng “Goá choè chit ê thâu-lō͘ í-keng cha̍p-poeh nı̂ kú, Lé-pài-jı̍t m̄-bat choè kang, ia̍h bô lâng hiâm; taⁿ kàu lāu hut-jiân tú-tio̍h chit-ê thé-biān lâng pàng-tiau beh hāi goá ê thâu-lō͘, hō͘ goá bô chiàu goá sim-goān lâi kiâⁿ,ia̍h hō͘ goá m̄-sı̄ choè láu-sı̍t ê lâng, I ia̍h sı̄ kàu-hoē lāi tng chit-jı̄m ê lâng , cháiⁿ-iūⁿ kah goá Lé-pài-jı̍t tio̍h choè kang ? Chit hō lâng chı̄n sı̄ pe̍h-chha̍t pháiⁿ-sim ké-hó ê lâng. I kóng goá ê sim-koaⁿ nā tùi-tiōng tō-lí ,i chiū oē sià-bián goá; i kiám oē chai goá ê sim-koaⁿ ? I khò sím-mı̍h lâng chiah oē gí goá ê choē ? Siat-sú i oē sià-bián goá; nā-sı̄ i ài bián-kióng goá Lé-pài-jı̍t choè kang, che sı̄ ûi-ke̍h tō-lí, sím-mı̍h lâng oē sià-bián i ? Goá beh liâm-piⁿ khoàⁿ siàu-phō͘ lâi khui i ê toaⁿ, khı̀ i ê chhù, tı̄ i ê bó͘, kiáⁿ, sai-hū, chhiàⁿ-kang ê lâng ê bı̄n-chêng, kóng i ê pháiⁿ. I ê sai-hū kap choè kang ê lâng sı̄ chhin-chhiūⁿ goá, bô chng choè sı̄ khiân-sêng ê lâng, m̄-sı̄ chhin-chhiūⁿ i, só͘ kiâⁿ lóng sı̄ pe̍h-chha̍t chng choè khiân-sêng; jiân-āu chhut-chāi i chhiàⁿ sím-mı̍h lâng choè i ê kang, goá lóng m̄ koán i.”

Tâm kóng bêng-pe̍k, hit-ê sian-siⁿ choè i tò-khı̀, Tâm chiū the̍h siàu-phō͘ khoàⁿ thé-biān lâng ê siàu, khui-toaⁿ khı̀ thé-biān lâng ê chhù. Kàu í-keng àm liáu; hit-sı̂ joa̍h-thiⁿ mn̂g iáu-bē koaiⁿ. Thé-biān lâng kap bó͘, kiáⁿ, sai-hū, chhiàⁿ-kang ê lâng tı̄ thiaⁿ nı̍h teh chē; thé-biān lâng hian-khui Sèng-chheh teh tha̍k. Tâm pún ê ı̀-sù beh liâm-piⁿ jı̍p khı̀ kı̀ⁿ i, tı̄ tāi-ke bı̄n-chêng lâi kóng-bêng i ê pháiⁿ; chiah koh-chài siūⁿ, che tio̍h chhiáⁿ thèng-hāu i tha̍k Sèng-chheh kūi-lo̍h kı̂-tó bêng-pe̍k, chiah jı̍p khı̀ lâi kóng-bêng, hō͘ i koh-khah kiàn-siàu. Tâm chiū tiàm tı̄ goā-bı̄n siông-sè thiaⁿ, beh chiong i só͘ tha̍k ê Sèng-chheh kap kı̂-tó ê oē, lâi piān-pok i.

Hit sı̂ só͘ tha̍k ê Sèng-chheh chiū-sı̄ Lô-má jı̂n su tē cha̍p-jı̄ chiuⁿ, tha̍k kàu cha̍p-káu chat, chı̍t kù kóng, “Chú kóng, Sin lâng ê oan-óng sı̄ goá, goá tek-khak thoè i pò.” Chit kù tha̍k koh-chài tha̍k liân-liân kàu saⁿ-pái, chiū ha̍p Sèng-chheh, kūi lo̍h beh kı̂-tó. Hit-sı̂ ba̍k-sái lâu kàu moá-bı̄n, nâ-âu tı̄ⁿ, oh-tit kóng chhut. Koh chı̍t tia̍p-á-kú thé-biān lâng chhin-chhiūⁿ chiong i ê sim hian-khui tı̄ Siōng-tè kap tāi-ke ê bı̄n-chêng, kóng i tiàm tı̄ chúi-chhia pháiⁿ khoán-thāi lâng ê tāi-chı̀, ka-kı̄ chek-pı̄, ai-khó͘ kiû Siōng-tè sià-bián i ê choē; Koh pek-chhiat kiû Siōng-tè jiâu i ê sı̀ⁿ-miā kàu Pài-it, hō͘ i thang khı̀ chúi-chhia-lāi, tùi hit-ê lâng jı̄n-choē, kiû hit-ê lâng sià-bián i. Kı̂-tó bêng-pe̍k khí lâi, ke-lāi ê lâng lóng-chóng chhin-chhiūⁿ gín-á teh-háu ê siaⁿ chhoeh-chhoeh.

Tâm khoàⁿ-kı̀ⁿ chit-ê tāi-chı̀, chiū jı̍p khı̀ thiaⁿ-lāi, tùi thé-biān lâng kóng, “Goá tiàm tı̄ goā-bı̄n, lí kı̂-tó ê oē lóng-chóng ū thiaⁿ-kı̀ⁿ, taⁿ goá sim-koaⁿ lāi hoaⁿ-hí lóng-chóng sià-bián lí; chit-tia̍p goá tò-khı̀, beh chiong chit-ê tāi-chı̀ kā goá ê hé-kı̀ kóng, koh beh khı̀ sian-siⁿ in-tau kóng.

Kàu Pài-it jı̍t Tâm chiū khı̀ hit-ê sian-siⁿ tau, kóng thé-biān lâng kı̂-tó ê tāi-chı̀, koh kóng, “Goá téng-jı̍t tùi lí bı̄n-chêng só͘ hiâm thé-biān lâng ê oē, taⁿ khoàⁿ i chit-hō ê khoán-sit, sı̍t-sı̍t sı̄ hó-lâng, goá beh chiong hiah-ê hiâm i ê siu tò-tńg, lí m̄-thang tùi pa̍t lâng kóng. Goá cha̍p hè lāu-bú sí, í-āu m̄-bat kı̂-tó; in-ūi Pài-la̍k ê-hng ê tāi-chı̀ kàu chit-tia̍p sim koaⁿ bô siūⁿ pa̍t-mı̍h ê tāi-chı̀ to̍k-to̍k kı̂-tó jı̄n choē tiāⁿ-tiāⁿ. Lí sui-jiân bô thàn tō-lí. Goá chiū tı̄ lí ê bı̄n-chêng kóng-khí, ia̍h bô kiàn-siàu. Goá í-keng khı̀ bo̍k-su kap tiúⁿ-ló gı̄-lūn jı̍p-kàu ê tāi-chı̀. Siōng-tè nā khoan goá ê sı̀ⁿ-miā, goá chiū beh kong-hêng jı̄n Kiù-chú ê miâ lâi jı̍p I ê kàu-hoē. Chit ê toē-hng ê lâng lóng-chóng chai goá hiahN-sı̂ ê pháiⁿ khoán-sit, taⁿ beh hō͘ chèng-lâng chai goá ū hoán-hoé choē ê sim; siat-sú ū lâng chhiò goá, chhut-chāi i chhiò, goá ia̍h bô kiàn-siàu.”

3. Hū-jı̂n-lâng thoè Tiōng-hu Kı̂-tó

Tı̄ Tāi Eng kok bó͘ só͘-chāi ū chı̍t ê hū-jı̂n-lâng, sı̄ choè chho͘-kang ê lâng ê bó͘. I ū tit-tio̍h Siōng-tè toā-un, lâi sı̀n Iâ-so͘ tit-tio̍h kiù, in-ūi chit ê tāi-chı̀ i ê ta-po͘ lâng khún-tio̍k. I ê ı̀-sù koat-toàn bô beh pàng-sak tō-lí, só͘-í tiōng-hu kúi-nā pái mı̂-sı̂ koáⁿ i chhut-khı̀ goā-bı̄n. Tang-thiⁿ chin koâⁿ ê sı̂ ia̍h ū án-ni.

Chit ê hū-jı̂n-lâng sı̄ chú-soè ê lâng, bô chiong chit ê tāi-chı̀ kā i chhù-piⁿ lâng kóng, koh m̄ ài hō͘ lâng chai, só͘-í ū khı̀ soaⁿ nı̍h kı̂-tó. Sim-koaⁿ toā iu-būn, nā-sı̄ bô sit-bāng, in-ūi chai Siōng-tè bô só͘ m̄ oē. I chiū tiāⁿ-tio̍h ê ı̀-sù, ta̍k jı̍t jı̍t-tàn chı̍t tiám-cheng kú, beh thoè i ê ta-po͘ lâng kiû-kiò Siōng-tè. Chı̍t nı̂ kú ta̍k jı̍t kiâⁿ án-ni ia̍h bô tit-tio̍h só͘-kiû, ta-po͘ lâng iû-goân sı̄ án-ni. Hū-jı̂n-lâng chiū siūⁿ tio̍h koh poáⁿ-nı̂ kú lâi kı̂-tó, m̄-thang pàng-soah.

Hit ê poán-nı̂ kú ê lō͘-bé jı̍t kàu lah, hit jı̍t ia̍h ū kiû kàu chı̍t tiám-cheng kú. Khoàⁿ lóng bô tit--tio̍h, kiaⁿ Siōng-tè bô beh hō͘ i, sim-koaⁿ tit-beh choa̍t-bāng. Hit jı̍t i ê ta-po͘ lâng tò--lâi bô siáⁿ pêng-an, bô chiàu i pêng-siông ê khoán-sit liâm-piⁿ chē chia̍h, sı̄ chiūⁿ lâu-téng, jı̍p i ê pâng, koaiⁿ mn̂g. I ê hū-jı̂n-lâng tè--i, khiā tı̄ mn̂g goā, thiaⁿ kı̀ⁿ i ê siaⁿ. Hū-jı̂n-lâng chin kı̂-koài , ia̍h chin hoaⁿ-hí, in-ūi sı̄ kı̂-tó ê siaⁿ. Koh tia̍p-á-kú i ê ta-po͘ lâng lo̍h--khı̀ lâu-kha, lóng m̄ chia̍h, koh khı̀ choè kang.

Ê-hng tò--lâi, i ê hū-jı̂n-lâng mn̄g kóng, “Ū sím-mı̍h tāi-chı̀ bô ?” Ìn kóng, “Ū; goá ê choē tāng, bô só͘-chāi thang ǹg-bāng. Cha̍p-jı̄ tiám-cheng, goá teh choè kang ê sı̂, ū chı̍t chat ê Sèng-chheh chhı̀-chha̍k goá ê sim; ài m̄ siūⁿ, ia̍h boē bián tit. Goá lóng bô só͘-chāi thang ǹg-bāng.”

Hū-jı̂n-lâng khǹg i kóng, “M̄-thang sit-chı̀.” Ìn kóng, “M̄-sái kóng, bô lō͘-ēng--lah, goá ê choē tāng-tāng, boē sià-bián tit.”

Kóng liáu chiū kı̀-tit i chêng pháiⁿ khoán-thāi i ê bó͘, liông-sim toā chek-pı̄, chiū mn̄g i ê bó͘ kóng, “Lí hoaⁿ-hí sià-bián goá mah ?” Ìn kóng, “Hoaⁿ-hí. ” Koh mn̄g, “Lí khéng thoè goá kı̂-tó mah ?” Kóng, “Goá khéng.” Koh mn̄g, “Chit-tia̍p hó á m̄ ?” Ìn kóng, “Goá chin hoaⁿ-hí.” Nn̄g lâng chiū kūi--teh, lâu ba̍k-sái kı̂-tó Siōng-tè. Chı̍t lâng ba̍k-sái, in-ūi sim-koaⁿ iu-būn hoán-hoé choē; chı̍t lâng, in-ūi sim-koaⁿ hoaⁿ-hí kám-un.

Chit ê ta-po͘ lâng āu-lâi ū hián-bêng sêng-sı̍t choè Iâ-so͘ ê ha̍k-seng, jı̍t-jı̍t ū chı̀n-pō͘, ia̍h chhut-la̍t hō͘ i ê chhù-piⁿ lâng chai tō-lí, koh chiong chı̍t khu hn̂g hiàn hō͘ lâng khí lé-pài-tn̂g.