Hit-tia̍p tāi-ke jû chhiáng-chhiáng, saⁿ phah kàu tio̍h-siong. Liâm-piⁿ koh thoa nn̄g ê ha̍k-seng khı̀ hō͘ sı̄-toā mn̄g, kóng-kiò i chhá koe-chhı̄--nı̍h ê lâng kàu hō͘ in saⁿ phah. Tùi án-ni ū chiong nn̄g ê ha̍k-seng tāng-tāng phah, Ēng thih-liān kā in liān, thoa in khı̀ sı̀-koè hō͘ lâng khoàⁿ, hō͘ lâng m̄-káⁿ kap in kiat-tóng, ia̍h liân oá mā-káⁿ kap i oá. Hit-tia̍p nn̄g ê ha̍k-seng ná ka-kı̄ soè-jı̄, chiū ná hō͘ lâng pō͘-jio̍k, in ia̍h sı̄ un-jiû thun-lún, koe-chhı̄--nı̍h chiah ū kúi-nā lâng khoàⁿ-kı̀ⁿ che ài beh sı̀n--i. Chèng-lâng tùi án-ni ná siū-khı̀, koat-toān ài beh hāi-sí nn̄g ê ha̍k-seng; liâm-piⁿ hoah in kóng, Tû kap liān, che hêng-hoa̍t iáu-bô kàu-gia̍h, lín kú sı̄ chhá kàu thong siâⁿ, bê-he̍k koe-chhı̄--nı̍h ê lâng, lūn choē kú tio̍h sí. Án-ni chiū hoan-hù lâng kā in koaiⁿ-kaⁿ, thèng-hāu āu-lâi chiah gı̄-choē; liâm-piⁿ chiū kā in koaiⁿ, ēng kha-khàu kā in khàu.
Nn̄g ê ha̍k-seng tı̄ kaⁿ--nih, siūⁿ-tio̍h Thoân-tō bat kā in kóng, sim-koaⁿ nā kian-kò͘ sı̀n. Hit-tia̍p saⁿ an-ùi, kóng, Lán nn̄g lâng, nā chı̍t-ê siū hām-hāi, koh-khah ū hok-khı̀, chiah ta̍k-ê lóng ū chhun chit-ê ı̀-goān, nā-sı̄ chai--kiò Siōng-tè sı̄ chiáng-koán bān-mı̍h, tek-khak tāi-ke kam-goān, chhut-chāi Siōng-tè chú-ı̀, hō͘ i án-ni chiū án-ni.
Kàu hit-ê sím-mn̄g ê jı̍t, chiū hō͘ nn̄g ê ha̍k-seng chhut-lâi siū sím-mn̄g, tit-beh gı̄ in ê choē. I ê àn-chhat-si tāi-jı̂n miâ kiò Ok-siān, ū sím-mn̄g nn̄g ê ha̍k-seng ê oē tāi-khài sı̄ kóng, in sı̄ chhá-nāu chit-ê koe-chhı̄, phah-pháiⁿ in ê seng-lí, pái-lōng siâⁿ--nı̍h ê lâng, hō͘ in ta̍k-ê saⁿ-chiⁿ, koh ín-iù bê-he̍k kúi-nā lâng thàn siâ ê tō-lí. In án-ni kiâⁿ, sı̍t-chāi sı̄ hoān-tio̍h ông ê lu̍t-hoat.
Chı̄n-tiong hun-sò͘ kóng, Goá nā ū hoān-tio̍h--i, sı̄ kóng-kiò i ū tùi-te̍k Siōng-tè. Hit ê lâng kóng-kiò goá sı̄ chháu-lāu koe-chhı̄, lóng bô iáⁿ-chiah. Kiám-chhái ū lâng oá goá, mā-sı̄ goá khı̀ kè-bô͘, sı̄ in khoàⁿ goán chèng-keng bô lām-sám, chiah ū án-ni. Hit-ê lâng lín chheng-choè ông, sı̄ Siōng-tè ê tùi-te̍k, goá bô beh jı̄n i.
Hit-tia̍p Àn-chhat-si hoan-hù chèng-lâng kóng, Nā ū lâng chai che lâng ê pháiⁿ, kín-kín lâi choè kan-chèng. Hit-tia̍p ū saⁿ lâng choè kan-chèng, chiū-sı̄ Chı̍t-tō͘, Sū-kúi , Chhı̄-ū. Àn-chhat-si mn̄g chit saⁿ-lâng kóng, Chit-ê hoān-lâng lí bat--i mah? I sı̄ sím-mı̍h choē? Hit-tia̍p Chı̍t-tō͘ chı̀n-chêng chiù-choā beh chiàu-sı̍t kóng, ū kóng, Che lâng goá bat i kú--lah. I ê miâ khiok hó sı̍t-chāi sı̄ toā pháiⁿ. Put-koán sı̄ jı̂n-kun, peh-sı̀ⁿ, kok-hoat, hong-sio̍k i lóng pàng hiat-ka̍k bô iàu-kín. I chheng-chheng chhut-la̍t beh ín-iù lâng, ài-tit lâng thàn i ê tō-lí. Goá iū pún-sin bat thiaⁿ-kı̀ⁿ i kóng, Cheh Hi-hoâ siâⁿ ê hong-sio̍k kap Siōng-tè ê tō-lí ke̍k tùi-hoán. I án-ni kóng, bêng-bêng sı̄ chiong lán ê hó-sū lia̍h-choè pháiⁿ, soà hiâm lán sı̄ ge̍k Siōng-tè.
Hit-tia̍p Àn-chhat-si kóng, ia̍h ū sím-mı̍h oē thang chek-choē i?
Chı̍t-tō͘ kóng, Goá pún-jiân beh kóng kàu choē-choē oē, sı̄ kiaⁿ-liáu iân-chhiân lín chiah ê lia̍t-ūi. Nā-sı̄ pa̍t lâng kan-chèng liáu, i m̄-sái sí, goá beh koh kóng, Àn-chhat-si chiū hoan-hù i piⁿ-á khiā.
Liâm-piⁿ tiàu Sū-kúi cháu-chêng lâi, kí Chı̄n-tiong kóng, Lí khoàⁿ che hoān-lâng, i sı̄ cháiⁿ-á pháiⁿ, choè lí kóng.
Hit-tia̍p Sū-kúi chiù-choā beh kóng láu-sı̍t, ū kóng, Goá bô siáⁿ bat cheh lâng, kú ia̍h bô beh bat--i. Nā-sı̄ kúi-nā jı̍t chêng, goá bat kap i kóng, chai-kiò i chin-chiàⁿ sı̄ bê-he̍k peh-sı̀ⁿ, sı̄ cháiⁿ-iūⁿ, i hit-tia̍p teh kóng, lóng sı̄ kóng goán ho̍k-sāi kúi-sı̂n, kèng pu̍t, che sı̄ m̄-hó, koah hō͘ Siōng-tè siū-khı̀. Chiàu i án-ni kóng, chiū-sı̄ goán kèng pu̍t, ho̍k-sāi kúi-sı̂n, lóng sı̄ bô iú-ek, soà ū hāi, goán ê choē bô thang sià, soah-bé tek-khak oē tı̂m-lûn. Goá ê kan-chèng chiū-sı̄ che.
Hit-tia̍p koh tiàu Chhı̄-ū hō͘ i chiù-choā, kah i nā chai--ê tio̍h kóng.
Chhı̄-ū chiū kóng, Lia̍t-ūi tāi-jı̂n--ah, chit-ê lâng goá bat i joā-kú--lah, i m̄ eng-kai kóng ê ia̍h lām-sám kóng, sı̄ goá ê hông-tè Pia̍t-se-pok, éng-éng hō͘ i húi-pōng mā; koh goá ê hông-tè kùi-khı̀ ê jı̂n-sı̂n, chhin-chhiūⁿ Îm-lo̍k, Kiau-chhia, Tham-hoa, chiah-ê tāi-jı̂n, kap Khek-pa̍k, Hòng-lı̄ , chiah-ê ló-iâ, goán ê siâⁿ chiah-ê sı̄-toā koh éng-éng hō͘ i khoàⁿ-khin. Koh kóng, i nā-sı̄ ka-kı̄ oē chú-tit-ı̀, chiah-ê tāi-jı̂n tek-khak beh chá-chá koáⁿ hō͘ in chhut siâⁿ, m̄ chún in khiā chia; m̄-nā án-ni, i soà mā lí, kóng, lí sı̄ pháiⁿ-lâng; iáu--ê, kóng boē liáu.
Hit-tia̍p Chhı̄-ū kóng soah. Àn-chhat-si tùi Chı̄n-tiong kóng, Lí chit-hō chha̍t, chiah-ê chèng-keng lâng teh kan-chèng lí, lí ū thiaⁿ-kı̀ⁿ mah?
Chı̄n-tiong kóng, Lí tio̍h hō͘ goá lio̍h-lio̍h-á hun-sò͘--teh.
Àn-chhat-si hoah i kóng, Lūn choē lí tio̍h sí, nā-sı̄ goá bô beh chhiⁿ-kông hāi lâng, chhiáⁿ hō͘ lí hun-sò͘.
Chı̄n-tiong chiū kóng, Chı̍t-tō͘ teh kan-chèng lóng sı̄ bô iáⁿ. Goá teh kóng, sı̄ kóng-kiò kok-hoat, hong-sio̍k ê tāi-chı̀, nā-sı̄ kap Siōng-tè ê tō-lí saⁿ tùi-hoán sı̄ m̄-tio̍h. Goá án-ni kóng, nā bı̄ tú-hó, lí tio̍h kà goá, goá beh liâm-piⁿ kái.
Kóng, Sū-kúi só͘ kan-chèng ê tāi-chı̀, goá sı̄ kóng-kiò ho̍k-sāi Siōng-tè iàu-kín tio̍h sêng-sı̍t sı̀n; chı̍t-ê sı̀n tio̍h ū Sèng-sı̂n ê kám-hoà chiah oē. Nā-sı̄ kiám-chhái beh ēng chit sè-kan ê hong-sio̍k, lâi saⁿ-chham, kàu bé boē tit-tio̍h kiù.
Kóng, Chhı̄-ū só͘ kan-chèng--ê, goá sı̍t-sı̍t sı̄ kóng; chit-ê koe-chhı̄ ê sı̄-toā, kap chiah-ê tāi-jı̂n, pún-jiân tio̍h khiā tē-ge̍k, mā eng-kai khiā chit-ê siâⁿ. Goá án-ni kóng, chheng-chheng ǹg-bāng Siōng-tè kiù goá ê lêng-hûn, ia̍h bô pa̍t-mı̍h.
Hit-tia̍p ū kúi-nā hiuⁿ-lí ê lāu-toā, piⁿ-á teh chē beh saⁿ-kap gı̄ chit-ê àn. Àn-chhat-si tùi chiah-ê hiuⁿ-lí ê lāu-toā kóng, Kiáu-chhá lán ê siâⁿ chiū-sı̄ chit lâng; lia̍t-ūi í-keng ū thiaⁿ-kı̀ⁿ chèng-lâng ê kan-chèng, koh ū pún-sin thiaⁿ-kı̀ⁿ i ka-kı̄ hun-sò͘ ê oē. Beh hō͘ i sí á-sı̄ beh hō͘ i oa̍h; chhut-chāi lín chú-ı̀ chiū-sı̄ lah. Chóng-sı̄ chit kok ê lu̍t-hoat, kiám-chhái lín bô siông-sè chai, taⁿ goá beh kóng hō͘ lín thiaⁿ. Chêng Hoat-ló nı̂-kan ū siat chı̍t-ê tiâu-kài, chiū-sı̄ pa̍t kàu nā ū siⁿ ta-po͘, lóng-chóng kā i tio̍h hiat-ka̍k hí hô-nih. Che sı̄ kiaⁿ-liáu i siⁿ-thoàⁿ pí i khah choē. Ni-pò͘ kap Nı̂-sat ê nı̂-kan, ia̍h ū siat chı̍t ê tiâu-kài, kı̀ⁿ ū m̄ pài hông-tè ê siōng, chiū hiat-lo̍h hé-lô͘--nı̍h. Koh Tāi-liû-sū nı̂-kan ia̍h ū siat chı̍t-ê tiâu-kài, tû khı̀ pài ông í-goā, put-lūn Siōng-tè á-sı̄ sı̂n, lâng nā ū khı̀ pài I--ê, chiū beh hiat-lo̍h sai-hia̍t.
Chí saⁿ ê ông lóng sı̄ goá hông-tè ê jı̂n-sı̂n. In só͘ lâu--teh ê tiâu-kài lán tio̍h thàn, chit-tia̍p che kan-chà ê lâng sı̍t-chāi ū hoān-tio̍h in ê kài-lu̍t. I mā-sı̄ bô siūⁿ, i ê só͘ kóng só͘ kiâⁿ, sı̍t-chāi tiau-kò͘-ı̀ beh khı̀ hoān-tio̍h--i; lūn kàu i ê choē, che sı̄ iông-ún i boē tiâu. Taⁿ í-keng jı̄n i ê choē, chiah tio̍h gı̄ hō͘ i sí.
Hit-tia̍p chèng hiuⁿ-lí ê lāu-toā ū thê-khí gı̄-lūn chit chân ê tāi-chı̀. Chiah-ê lāu-toā ê miâ chiū-sı̄ Kó͘-chiá, Choa̍t-siān , Oàn-hūn, Sı̀-io̍k, Sù-sù, Kip-hàn , Kiau-gō͘, Oàn-tō͘, Soat-hóng, Chân-jím, Ok-kóng , Hêng-oàn. Hit-tia̍p chiah ê lâng ta̍k-ê kóng ka-kı̄ ê ı̀-kiàn. Kó͘-chiá chiū kóng, Cheh lâng chin ı̄ⁿ-toan, goá bêng-bêng khoàⁿ-kı̀ⁿ. Choa̍t-siān chiah kóng, Chit-hō ê lâng m̄-thang chûn i oa̍h tı̄ sè-kan. Oàn-hūn ia̍h kóng, Khoàⁿ-kı̀ⁿ i ê bı̄n-ba̍k chám-jiân khó-ok. Sı̀-io̍k ia̍h kóng, Cheh lâng goá pún-jiân boē iông-ún-tit--i. Sù-sù chiah kóng, Goá ia̍h tòng i boē tiâu, i sı̄ éng-éng ài hiâm goá ê só͘ kiâⁿ. Kip-hàn soà kóng, Tio̍h kā i thâi, tio̍h kā i thâi. Kiau-gō͘ kóng, Chit-hō chho͘-sio̍k lâng chin-chiàⁿ sı̄ lâng ià-chiān, oàn-hūn. Oàn-tō͘ kóng, Chı̍t-ē khoàⁿ-kı̀ⁿ cheh lâng, goá ê oàn-hūn ta̍uh-ta̍uh khí-lâi. Soat-hóng kóng, Che sı̄ kông-kùn. Chân-jím kóng, Cheh lâng chiū hō͘ i sí, ia̍h bô kàu-gia̍h. Ok-kóng kóng, Tio̍h kín-kín hō͘ i sí. Hit-tia̍p Hêng-oàn ia̍h ū kóng, Lâng chiū nā ēng thiⁿ-kha-ē ê mı̍h hō͘ goá, goá ia̍h bô beh kap i hô; tio̍h kín-kín hō͘ i sí. Chiah-ê hiuⁿ-lí ê lāu-toā kóng-kiò, Án-ni tio̍h; Chiū chhut-khı̀ tēng i ê sí-choē. Àn-chhat-si chiah ū chhut bēng, chiong Chı̄n-tiong thoa kàu kà-tiûⁿ, hō͘ i siū ke̍k chhám ê sí. Hit-tia̍p chèng-lâng thoa Chı̄n-tiong chhut-khı̀, chiàu i ê lu̍t-hoat pān. Tāi-seng pian-phah--i, koh ēng chhiú loān-loān cheng--i, ēng to ta̍uh-ta̍uh le̍h--i; āu-lâi koh ēng chio̍h-thâu tı̀m--i, ēng kiàm chān--i; kàu bé chiong Chı̄n-tiong pa̍k hí chhâ-thiāu--nı̍h, ēng hé kā i sio choè hu.
Goá ū khoàⁿ-kı̀ⁿ chèng-lâng hí piⁿ-á--nı̍h ū chhia-bé teh thèng-hāu Chı̄n-tiong. Chı̄n-tiong sí liáu, liâm-piⁿ chih-chiap i chiūⁿ chhia, peh-chiūⁿ hûn--nı̍h, tı̍t-tı̍t kàu thiⁿ-mn̂g. Hit-tia̍p teh chiūⁿ-khı̀, goá ū thiaⁿ-kı̀ⁿ chok-ga̍k ê siaⁿ, chı̄n-chāi hó thiaⁿ. Khah thêng goá iū ū khoàⁿ-kı̀ⁿ chèng-lâng koh chiong Ki-tok-tô͘ thoa-jı̍p kaⁿ-lāi, thèng-hāu pa̍t jı̍t gı̄ choē. Ki-tok-tô͘ tiàm kaⁿ--nı̍h ū hiah kú, Siōng-tè ū ēng hoat-tō͘ hō͘ i oē-tit-thang chhut-lâi, m̄-sái hō͘ in hāi sí. Hit-tia̍p Ki-tok-tô͘ chiah chı̀n-chêng kiâⁿ, ū gı̂m-si kóng,
Chı̄n-tiong ū siū hāi kàu sí,
Mı̍h-sài thı̂-khàu, bô hoaⁿ-hí;
Siōng-tè hoat-tō͘ chı̍t-ē kiaⁿ,
Liâm-piⁿ chiap i chiūⁿ thiⁿ-siâⁿ.
Goá bāng-kı̀ⁿ Ki-tok-tô͘ hit-tia̍p lō͘ hit-ê kan-khó͘, koh-chài kiâⁿ, mā-sı̄ ko͘-toaⁿ kiâⁿ. Sı̄ ū chı̍t-ê pêng-iú kap i kiat choè hiaⁿ-tı̄ saⁿ-kap kiâⁿ. Chit lâng miâ choè Hiân-bōng. I ū khoàⁿ-kı̀ⁿ Chı̄n-tiong kap Ki-tok-tô͘ tı̄ Hi-hoâ chhı̄--nı̍h, chı̄n-chāi hó khoán-sit, chiah ài kap i saⁿ-kap choè phoāⁿ. Tùi án-ni khoàⁿ khí-lâi, lâng nā-sı̄ káⁿ phe-sí lâi kan-chèng tō-lí, chiū oē kám-hoà pa̍t lâng, soà hō͘ i choè sèng-tô͘ kiâⁿ thiⁿ-lō͘. Hit-tia̍p Hiân-bōng chiū kā Ki-tok-tô͘ kóng, Hi-hoâ chhı̄--nı̍h iáu ū choē-choē lâng teh siōng, khoàⁿ ū ki-hoē chiah beh tè-lâi.
Ki-tok-tô͘ kap Hiân-bōng saⁿ-kap kiâⁿ bô joā kú, ū khoàⁿ-kı̀ⁿ thâu-chêng ū chı̍t-lâng, miâ kiò Lı̄-tô͘. In nn̄g ê jip-tio̍h--i, chiū mn̄g i to̍h-lo̍h lâng, beh khı̀ to̍h-lo̍h, I ı̀n kóng, Tùi Kháu-giân hiuⁿ lâi, beh khı̀ thiⁿ-siâⁿ; iáu lóng m̄ kóng i ê miâ.
Ki-tok-tô͘ gông-ngia̍h kóng, Kháu-giân hiuⁿ kiám ū hó-lâng?
Lı̄-tô͘ kóng, Ū--ah! Chiàu goá siūⁿ ia̍h sı̄ ū.
Ki-tok-tô͘ kóng, Goá tio̍h kiò lí siáⁿ miâ?
Lı̄-tô͘ kóng, Lí goá lóng m̄ saⁿ-bat. Lí nā-sı̄ beh tùi chia khı̀, goá hoaⁿ-hí kap lí kiâⁿ, nā m̄, goá beh ka-kı̄ kiâⁿ.
Ki-tok-tô͘ kóng, cheh Kháu-giân hiuⁿ goá ia̍h bat thiaⁿ-kı̀ⁿ, chiàu lâng kóng, cheh hiuⁿ-chhng chin pù.
Lı̄-tô͘ kóng, Tio̍h. Chit-ê hiuⁿ-siā sı̍t-chāi chı̄n hó-gia̍h. Hia goá ū choē-choē chhin-chhek. Ki-tok-tô͘ kóng, Chhiáⁿ mn̄g lí ê chhin-chhek siáⁿ lâng?
Lı̄-tô͘ kóng, Chit hiuⁿ-lí toā poàⁿ sı̄ goá ê chhin-chhek. Khah chhin--ê chiū-sı̄ Kháu-giân, Ki-piàn , Hù-sı̂ , chiah-ê. Chit-ê Kháu-giân hiuⁿ chiū-sı̄ tùi in chó͘ miâ i. Koh ū Lêng-sek , Lióng-hiòng , Sek-khó͘ , chiah-ê, lóng sı̄ goá ê chhin-chhek. Koh hiuⁿ-lí ê bo̍k-su, chiū-sı̄ Lióng-sia̍t Sian-siⁿ, i kap goá ê lāu-bú siāng pē. Goá sı̍t-sı̍t kā lí kóng, sı̍t-chāi sı̄ chun-kùi. Nā-sı̄ chêng goá ê chó͘ sı̄ pian chûn-á-bı̄n, khoàⁿ tang ka-chiah ǹg sai kiâⁿ thàn chia̍h, goá ê ke-hé ia̍h sı̄ tùi án-ni lâi.
Ki-tok-tô͘ kóng, Lí ū ke-koàn á-bô?
Lı̄-tô͘ kóng, Ū--ah! Goá ê bó͘ chin chèng-keng; i ê lāu-bú ia̍h sı̄ chèng-keng lâng. I ê sè-hē ke̍k kùi-khı̀. in lāu-bú sı̄ hu-jı̂n, chiū-sı̄ Iông-gı̂--sı̄ . Goá ê bó͘ soè-hàn o̍h i ê lé, put-lūn sı̄ ho̍k-sāi sı̄-toā, á-sı̄ chih-chiap sı̄-soè, ta̍k hāng lóng oē. Chóng-sı̄ ho̍k-sāi Siōng-tè, goán kap chin sêng-sı̍t ê lâng, ū nn̄g hāng-á sió-sū ê cheng-chha, chiah, nā-sı̄ ge̍k-hong ge̍k lâu, goán bô beh kap i thâu-mn̂g khı̀ chhı̀ hé, koh khoàⁿ-kı̀ⁿ tō-lí nā-sı̄ heng-ōng, goán sı̄ chin jia̍t ài thàn--i.
Ki-tok-tô͘ thiaⁿ-kı̀ⁿ che, chiū kūn-oá Hiân-bōng kóng, Kháu-giân hiuⁿ ū Lı̄-tô͘, liōng-pit sı̄ cheh lâng; nā-sı̄ án-ni, chit só͘-chāi ê húi-lūi ê lâng, bē ū khah lı̄-hāi cheh lâng.
Hiân-bōng kóng, Án-hiaⁿ lí siáⁿ-sū m̄ mn̄g i ê miâ, i kiám sı̄ kiàn-siàu m̄ kóng mah?
Ki-tok-tô͘ chiah koh kūn-oá Lı̄-tô͘ kóng, Chiàu lí kóng, chhin-chhiūⁿ m̄-sı̄ pêng-siông lâng, goá kóng nā-sı̄ bô toā-lı̂m cheng-chha, liōng-iok tek-khak chai lí sı̄ sím-mı̍h hō lâng, Lí kám m̄-sı̄ Kháu-giân hiuⁿ Lı̄-tô͘ mah?
Lı̄-tô͘ kóng, Che m̄-sı̄ goá ê miâ, sı̄ lâng oàn goá ēng che kiò goá. Goá bô tâ-tit-oâ tio̍h siū, sı̄ o̍h chiah-ê hó-lâng siông-siông hō͘ pháiⁿ-lâng húi-pòng, chóng tio̍h jím-siū chiū-sı̄--lah.
Ki-tok-tô͘ kóng, Lâng kiò lí chit-ê miâ kiám bô in-toaⁿ mah?
Lı̄-tô͘ kóng, Chin-chiàⁿ bô. Ū chı̍t-hāng kiám-chhái sı̄ tùi án-ni lâng ū hō goá cheh miâ, chiah, sı̄ goá chhàu-tú-khám teh kóng, tú-tú kap chí sè-kan saⁿ-ha̍p, chiah ū choē-choē tit-tio̍h iú-ek, chit-ê iú-ek sı̄ ka-kı̄ lâi, m̄-sı̄ goá khı̀ kiû--i. Bô in-toaⁿ oàn goá siáⁿ-sū?
Ki-tok-tô͘ kóng, Goá bat thiaⁿ-kı̀ⁿ Lı̄-tô͘ ê miâ, liōng tek-khak sı̄ lí, taⁿ lóng bô cheng-chha; nā-sı̄ goá siūⁿ--khí-lâi, chin-chiàⁿ kiaⁿ-liáu lí ê só͘ kiâⁿ tú-tú sı̄ ha̍h cheh miâ.
Lı̄-tô͘ kóng, Lí liōng-iok án-ni, goá ia̍h bô hoat lí tâ-oâ. Nā-sı̄ lí hoaⁿ-hí kap goá choè phoāⁿ, āu-lâi tek-khak chai--kiò goá hó.
Ki-tok-tô͘ kóng, Lí nā kap goá saⁿ-kap kiâⁿ, chiū nā bô sūn-hong sūn-lâu ia̍h tio̍h chı̀n-chêng kiâⁿ, che sı̍t-chāi m̄ ha̍h lí ê ı̀-sù. Kiám-chhái tō-lí heng-ōng, á-sı̄ siū lâng khún-tio̍k, loé-mē, lóng pı̂ⁿ-pı̂ⁿ tio̍h hoaⁿ-hí thàn.
Lı̄-tô͘ kóng, Bo̍h-tit bián-kióng goá, tio̍h chhut-chāi goá ka-kı̄ chú-ı̀, goá chiah beh kap lí kiâⁿ.
Ki-tok-tô͘ kóng, Nā bô chiàu goá kóng, liân chı̍t-pō͘ ia̍h m̄ chún lí saⁿ-kap kiâⁿ.
Lı̄-tô͘ chiū kóng, Goá chêng só͘ thàn ê tō-lí, sı̄ iú-ek bô hām-hāi, goá kàu-bé bô pàng hiat-ka̍k. Lí nā m̄ kap goá kiâⁿ, goá ko͘-put-chiong tio̍h ka-kı̄ kiâⁿ. Khoàⁿ ū pa̍t lâng beh tè goá, hoaⁿ-hí kap goá choè phoāⁿ.
Hit-tia̍p goá bāng-kı̀ⁿ nn̄g ê ha̍k-seng lı̄-khui Lı̄-tô͘, chı̀n-chêng kiâⁿ, lóng bô kap i choè phoāⁿ. Ū tia̍p-á-kú oa̍t-kè-lâi khoàⁿ, khoàⁿ-kı̀ⁿ ū saⁿ lâng tè Lı̄-tô͘ lâi kàu Lı̄-tô͘ hit-nı̍h. Lı̄-tô͘ ū kap i kiâⁿ lé, saⁿ lâng ia̍h kap i chiap lé. Chí saⁿ lâng chiū-sı̄ Kò͘-châi , Sı̀-kim , Tin-bu̍t . Lı̄-tô͘ chêng kap i saⁿ-bat, sı̄ soè-hàn hit-tia̍p kap i tâng-o̍h. I sian-siⁿ ê miâ chiū-sı̄ Gû-lı̄ , kà o̍h tı̄ Tham-sim hú, Hò͘ⁿ-lı̄ hiuⁿ. Chit-ê sian-siⁿ ū ēng thàn-chı̂ⁿ ê hoat-tō͘ kà i ê ha̍k-seng, kiám-chhái sı̄ ēng kiông-kiông the̍h, á-sı̄ ēng pho͘-pâi, ēng koái-phiàn, ēng pe̍h-chha̍t, lóng sı̄ ēng goā-phê ké choè sı̀n tō-lí. Hit-tia̍p chí sı̀ lâng ia̍h oē khui o̍h choè sian-siⁿ. Chí sı̀ lâng tāi-ke kiâⁿ lé soah, Sı̀-kim ū mn̄g Lı̄-tô͘ kóng, Thâu-chêng teh kiâⁿ sı̄ siáⁿ lâng?
Lı̄-tô͘ kóng, hit-ê sı̄ chin hn̄g ê lâng, i sı̄ chip ka-kı̄ ê phiah kiâⁿ thiⁿ-lō͘.
Sı̀-kim kóng, Haih! Siáⁿ-sū m̄ thèng-hāu lán kap i tâng kiâⁿ? I kap lán kám m̄-sı̄ tāi-ke kiâⁿ thiⁿ-lō͘ mah?
Lı̄-tô͘ kóng, Sı̍t-chāi lóng-chóng sı̄ kiâⁿ thiⁿ-lō͘, chóng-sı̄ hit-ê thâu-chêng kiâⁿ--ê, chı̄n-chāi ko͘-ta̍k, chip ka-kı̄ ê phiah, khoàⁿ-khin pa̍t lâng. Chiū nā ū sêng-sı̍t ê lâng lio̍h-lio̍h-á bô ha̍h i ê ı̀-sù, i chiū m̄-tı̍h.
Tin-bu̍t kóng, Che sı̍t-chāi m̄-hó. Lí kap i bô saⁿ-ha̍h sı̄ sím-mı̍h tāi-chı̀? Chhiáⁿ lí kā goá kóng.
Lı̄-tô͘ kóng, Chit-ê lâng sı̄ chip-phiah, lóng bô kàu-khàm tō-lí, bô khoàⁿ sı̂-chūn, chheng-chheng beh kiâⁿ; goá sı̄ khoàⁿ hó-sè chiah kiâⁿ. In ê ho̍k-sāi Siōng-tè sı̄ kam-goān chiong in ê ke-hé khoàⁿ choè bô iàu-kín, nā-sı̄ goá ê ho̍k-sāi Siōng-tè, kú beh lâu goá ê ke-hé koah beh chiàu-kò͘ goá ê sı̀ⁿ-miā. In ê khoán-sit chiū nā hō͘ ta̍k lâng hiâm--i, in iû-goân chip-ı̀, lóng bô beh ha̍h pa̍t lâng ê ı̀-sù; goá thàn sèng ê tō-lí, kú sı̄ khoàⁿ hó-sè chiah kiâⁿ. In sı̄ kóng-kiò sèng-kàu kiám-chhái chiū nā chhēng phoà-saⁿ hō͘ lâng khoàⁿ m̄ chiūⁿ ba̍k, ia̍h tek-khak tio̍h thàn; goá sı̄ siūⁿ kiò sèng-kàu tio̍h chhēng kim ê oê hō͘ lâng o-ló chiah beh thàn.
Kò͘-châi kóng, Lí só͘ kóng ê ı̀-sù khiok tio̍h, nā-sı̄ lâng bô beh chiàu-kò͘ só͘ ū ê mı̍h, lām-sám ka-kı̄ phah-sit-lo̍h, goá kóng, i sı̄ bô tı̀-sek. Tio̍h ‘tı̀-sek chhin-chhiūⁿ choâ’, Sèng-chheh kám bô kóng mah? Choh-sit lâng ài-tit siu-sêng, tek-khak tio̍h thèng-hāu hó-thiⁿ sı̂. Tang thiⁿ ê phang iáu-kú chai kiò tio̍h tiàm hí siū--nı̍h, m̄-thang chhut-lâi, kàu ū thang thó-chia̍h hit-tia̍p, chiah sı̀-koè pe chhut-lâi. Lán tio̍h o̍h i. Thiⁿ-sı̂ ū lo̍h hō͘, ia̍h ū hó-thiⁿ; chit-hō lâng chin gōng, phian-phian thàu hō͘ beh khı̀, goán ài kiâⁿ, tio̍h thèng-hāu hó-thiⁿ chiah khı̀. Lâng ho̍k-sāi Siōng-tè tio̍h soà oē chiàu-kò͘ mı̍h, chiah ha̍h goá ê ı̀. Siōng-tè ēng bān-mı̍h siúⁿ-sù lâng, kám m̄-ài lâng kò͘ hit-ê mı̍h, pò-tap i ê un. Án-ni chiàu chêng-lí kóng chin-chiàⁿ sı̄ m̄-thang pàng hiat-ka̍k--i. Chá A-pek-lia̍p-hán, Só͘-lô-bûn, ho̍k-sāi Siōng-tè lóng kàu hó-gia̍h. Iok-pek ia̍h ū kóng, ‘Hó-lâng chek-thiok kim choē-choē, chhin-chhiūⁿ tı̂n-ai.’ Hit-ê thâu-chêng kiâⁿ--ê, nā-sı̄ chiàu lí ê só͘ kóng, kap Iok-pek só͘ kóng--ê toā cheng-chha.
Tin-bu̍t kóng, Goán ê ı̀-kiàn lóng sı̄ pı̂ⁿ-pı̂ⁿ, chiū m̄-sái koh kóng.
Sı̀-kim kóng, Cheh tāi-chı̀ chin-chiàⁿ m̄-sái koh kóng, goán ê ı̀-kiàn lóng sı̄ án-ni, Sèng-chheh kap chêng-lí thang choè kan-chèng.
Lı̄-tô͘ kóng, Lán taⁿ kiâⁿ cheh lō͘, êng-á-oē bo̍h-tit kóng, chhiáⁿ lín ēng chı̍t-hāng ê tāi-chı̀ saⁿ-kap kóng, Siat-sú ū chı̍t-lâng, put-lūn sı̄ bo̍k-su, á-sı̄ choè seng-lí, kiám-chhái tı̄ bı̄n-chêng ū chı̍t-hāng lı̄-ek thang tit-tio̍h, nā m̄-sı̄ chhut-la̍t hit-ê chin tō-lí ê tāi-chı̀, che lı̄-ek, tek-khak boē tit-tio̍h, in nā oē chiàu che kiâⁿ, kiám sı̄ bô sêng-sı̍t ê lâng mah?
