Goá ná chı̍t-chiah bô chí-lâm-chiam ê chûn-á,
Teh phiau-liû..........phiau-liû tı̄ bô pian ê Hái-iûⁿ;
Goá bô bo̍k-phiau teh phiau-liû,
Sı̄ hiah-nı̍h iu-chhiû ko͘-toaⁿ!
Goá m̄-chai tá-lo̍h sı̄ pêng-an ê hoāⁿ,
In-ūi bô lâng chí-sı̄ goá;
Iā m̄-chai thang kiaⁿ-hiâⁿ.............,
Ū kông-hong pō-ú teh lâi;
Koh m̄-chai ū gûi-hiám...............,
ı̀-bı̄n hō͘ pho-lōng am-tà pau-ûi;
Iáu m̄-chai thang kéng-séng............,
Mô͘-kúi chhin-chhiūⁿ háu-sai beh thun-chia̍h;
Goá ê lêng-hûn teh khùn................,
Chhin-chhiūⁿ chı̍t-chiah bô lâng sái ê chûn-á--
Phiau-liû tı̄ o͘-àm ê toā iûⁿ.
Tı̄ hái ê hit-kak ū liân-sio̍k teh-sih ê kng,
Ah! sı̄ teng-thah só͘ hoat-chhut ū kui-lu̍t ê kng;
I chhut-la̍t teh kiò kóng:
“Lâi ah! ko͘-to̍k ê chûn-á, goá beh chí-sı̄ lí ê lō͘,
thàu-kàu pêng-an ê hoāⁿ-kı̂ⁿ ê.
Tı̄ hia bô it chhè ê hām-hāi, hái-chúi éng-oán sı̄ pı̂ⁿ ê,
ū khoài-lo̍k kap pêng-an teh tán lí, lâi ah!”
M̄-kú; i sı̄ teh khùn, teh choè tn̂g-tn̂g ê bāng,
Tı̂m-bê tio̍h, tı̄ chùi-seng bōng-sí ê chhiūⁿ-gê thah lāi,
bô ū chı̍t-sut-á ê hoán-èng;
Phiau-liû ah--phiau-liû,
Kè-sio̍k bô hong-hiòng ê phiau-liû.
Bô-kú tı̄ tē-ke̍k ê hit-thâu, phû khí chı̍t tè piáⁿ toā ê o͘-hûn.
Chiām-chiām chiap-kı̄n tı̍t-kàu chiong goá tà-moá,
Thiⁿ tín-tāng lah, hái iā khui-chhùi,
Hoat-chhut thang kiaⁿ ê siaⁿ-im chhin-chhiūⁿ hiong-ok ê háu-sai, beh thun-chia̍h goá,
Sı̄ boa̍t-jı̍t teh beh lı̂m-kàu?
Hut-jiân-kan, lûi tiān kau-chok,
Thiⁿ chhin-chhiūⁿ phoà-khiah piàⁿ lo̍h toā-hō͘;
Hong pí ióng-sū khah kiông,
Éng koân kàu tú thiⁿ koh khàm lo̍h-lâi,
Kiù miā o͘h! Kiù miā o͘h!
Goá phoe-miā teh ho͘-kiò............
Chit sı̂ chúi im-bat goá ê chûn-lāi,
Tı̂m-lûn lah! koh chı̍t-ē éng,
Goá hoán-hoé.......hoán-hoé goá ê hòng-tōng;
Goá khui chhùi.......kiû kiò goá ê Siōng-tè;
Ah! Koh chı̍t ê éng beh khàm goá--
“Chú....Chú-à....Kiù....Kiù......Kiù ò͘........
Beh.....Bô miā lah......”
Goá sit-khı̀ ti-kak chhin-chhiū sí khı̀,
Chit sı̂ goá ê sim iáu-kú teh kiû-kiò,
Siōng-tè ah! lı̂n-bín goá chit ê ū choē ê lâng.”
“Kiù goá!.......Kiù goá thoat-lı̄ háu -sai ê chhùi.”
Goá chhíⁿ lah, chhin-chhiūⁿ chı̍t-tiûⁿ ok-bāng,
Ah! Hong sı̄ hiat-nı̍h chēng, hái iā hiah-nı̍h pı̂ⁿ,
Goá koh khoàⁿ, ah!?............
Hái-hoāⁿ sı̄ hiah súi, ū chhiⁿ-chhùi ê chhiū-ba̍k,
Káng-lāi sı̄ hiah nı̍h hó,
Chhion-moá pêng-an khoài-lo̍k!
Kı̂-biāu ah! Goá oá-khò tı̄ Sı̍p-jı̄-kè piⁿ,
Chia bô kiaⁿ-hiâⁿ iā bô hoân-ló,
Bô hong-éng iā bô iu-chhiû,
Goá tit-kiù lah!
An-ún tı̄ Sı̍p-jı̄-kè ē---
Bô koh phiau-liû........
Éng-oán bô koh bông-bo̍k ê phiau-liû!
(Ka-têng ê Pêng-iú tē 21 kı̂, 1959 nı̂ 11 ge̍h)
