ēng chí-kâi lâi-tsò tsha̍t-tàu. [14] Ũ chheⁿ-mêⁿ-nâng kũa kuái-kha-nâng tõ-toiⁿ-lãi bûa--lâi chiũ Iâ-sou, Iâ-sou ui-hó in. [15] Tān-sĩ chì-si chèng-thâu-nâng, kũa tha̍k-tsṳ-nâng, thóiⁿ-kìⁿ Iâ-sou só-kiâⁿ khî-ĩ kâi sṳ̄, iũ thóiⁿ-kìⁿ sòi-kiá tõ tōiⁿ-lãi hàm--tàⁿ, Tã-phek kâi kiáⁿ-sun, Buān-hok a; in-tshṳ́ tūa-ẽ náu-hṳ̃n, chiũ tùi Iá-sou tàⁿ, [16] Chí-chiàⁿ-nâng só-tàⁿ--kâi, lṳ́ ũ thiaⁿ-kìⁿ, mé? Iâ-sou tùi-in tàⁿ, Ũ: nín khá-m̄ pat-tha̍k hṳ́-kâi-ūe, Lṳ́ tshut-tõ sòi-kiáⁿ kũa chia̍h-nĩ kâi tshùi, ũ tshuân-pĩ tsàn-múi? [17] Iâ-sou chiũ lĩ-khui in, tshut siâⁿ-gūa kàu Pek-tã-nî, chiũ tõ-hṳ́-kò suah-hiah.
[18] Kàu mn̂g-khí-tsá hûe-tńg siâⁿ, Iâ-sou tóu khùn. Thóiⁿ-kìⁿ lõu-kîⁿ che̍k-tsâng bô-hue-kúeⁿ chhiũ, [19] kiâⁿ-bûa--khṳ̀ bô-só-tit, zûi-sĩ hie̍h tiāⁿ-tiāⁿ, chiũ tùi-chhiū tàⁿ, Nguãn lṳ́ tshông-kim íⁿ-ãu ióng-kú bô-seⁿ kúeⁿ-chí. Hṳ́-kâi bô-hue-kúeⁿ chhiū sûi-chiet chiũ kou-ta. [20] Mn̂g-thû thóiⁿ-kìⁿ chiũ hãi-ĩ, tàⁿ, Chí-kâi bô-hue-kúeⁿ chhiũ tsò-nî sûi-chiet chiũ ta, né? [21] Iâ-sou tùi-in ìn--tàⁿ, Uá-khak-sit kāng-nín tàⁿ, Nín zû-jia̍k ũ-sìn bô-gî, put-to̍k sĩ àn chí-kâi-chhiũ chièⁿ-seⁿ nín õi-tsò, chiũ-sĩ pí-huang--tsò nín tùi chí-kâi-suaⁿ tàⁿ, Tie̍h î-khui khṳ̀ ka̍k-lo̍h hái, iā pit-õi. [22] Nín tõ khî-táu--tang, put-lũn só-khiû--kâi, ũ-sìn, chiũ lóng-tsóng tit--tie̍h.
[23] Iâ-sou ji̍p tōiⁿ-tn̂g, tõ kà-hùe nâng kâi sî-hāu, chì-si chèng-thâu-nâng kũa mîn--kan kâi chiáng-láu bûa--khṳ̀ mn̄g--tàⁿ, Lṳ́ sĩ chiã sĩ-mih-khuân lâi-kiâⁿ chí chiàⁿ-kâi-sṳ̄? iáu sĩ tî-tiâng sṳ̀-pun lṳ́ chí-kâi-khuân, né? [24] Iâ-sou tùi-in tap--tàⁿ, Uá iā àiⁿ-mn̄g nín che̍k-kù-ūe, nín jia̍k-sĩ kāng-uá tàⁿ, uá chiũ kāng-nín tàⁿ-tshut ná sĩ chiã sĩ-mih-khuân kiâⁿ chí chiàⁿ-kâi-sṳ̄. [25] Iak-hân si-sói, sĩ tshut tî-kò? sĩ tshut-tõ thiⁿ, a-sĩ tshut-tõ nâng? Hṳ́-kâi-nâng jī-ke kàu-niêⁿ, tàⁿ, Nán zû-jia̍k tàⁿ, Tshut-tõ thiⁿ, I pit-tiāⁿ tùi-nán tàⁿ, Hiá, nín tsò-nî m̄-sìn--i, né? [26] Jia̍k iā-sĩ tàⁿ, Tshut-tõ nâng; nán chiũ ùi chèng-nâng; uân-khî chèng-nâng thóiⁿ Iak-hân sĩ soiⁿ-tsai-nâng. [27] In chiũ ìn Iâ-sou, tàⁿ, Uń m̄-tsai. Iâ-sou iā tùi-in tap--tàⁿ, Uá iā m̄ kāng-nín tàⁿ-tshut uá sĩ chiā sĩ-mih-khuân lâi-kiâⁿ chí chiàⁿ-kâi-sṳ̄.
